تحميل رواية «جثة متفحمة» PDF

الساعة كانت 10 بليل لما وصل بلاغ من جيران واحدة ست ساكنة في عمارة في مصر الجديدة، انهم سامعين صوت صراخ جاي من شقتها وان الست دي بتستنجد وبتقول للناس تلحقها

ولكن الناس كانت خايفه تقرب، خصوصا انها ست مش طبيعية وفي ناس كتير بتقول عليها مجنونة.. وبعد 10 دقايق الصوت سكت ولكن كان في ريحه طالعه من الشقة اشبه بريحه الشياط.. اتحركنا على مكان البلاغ ولما وصلنا قدام الشقه اضطرينا نكسر الباب عشان نتفاجئ بجثة الست دي محروقة ومتفحمه قدامنا.. ويبدأ التحقيق في واحدة من أصعب الجرايم اللي حققت فيها

…

اسمي نصر عبد العزيز وكيل نيابة مصر الجديدة، وصلتنا اشارة عن جثة محروقة ومتفحمة داخل شقة بعقار بمصر الجديدة.. اتحركت على مكان البلاغ.. وكانت الشرطه وصلت وملت المكان، الشقة كان في الدور التاني والجيران هما اللي بلغوا

قربت من الجثة اللي كانت على الارض وكشفت الملاية وللاسف الحروق كانت صعبة جداً وواصلة لمرحلة بشعة

وعرفت من الجيران ان اسمها صابرين ومتجوزه من دكتور اسمه عزت نصار.. الاسم كان مش غريب عليا، وفعلا لما ركزت افتكرت انه الدكتور عزت هو دكتور تشريح مشهور اوي في البلد

ولما سألت عنه عرفت انه كان متخانق مع مراته وده الطبيعي بتاعهم واكيد هو دلوقتي في المستشفى.

كنت حابب اعرف ايه نوع الخلافات اللي ما بين الدكتور عزت ومراته مدام صابرين؟!

فسألت الجيران اللي واقفين.. حد يعرف ايه الخلافات اللي كانت بين الدكتور ومراته؟

فردت واحده من الجيران.. وكانت ست كبيره في الخمسينات من عمرها واسمها عفاف.. وقالت

_ الدكتور عزت كان بيشك في سلوك مراته.. وكان بيمد ايده عليها كتير وبيغلط فيها، وقبل ما حضرتك تسألنى عرفت منين، صابرين كانت زي بنتي وكانت ساعات بتيجي تقعد معايا وبتحكيلي

= طيب معلش، ليه في البلاغ الناس خافت تقرب من الشقه وقالت عليها ست مش طبيعية

_ عشان في الفترة الاخيرة.. من كتر ما تعرضت لضغط نفسي كانت ساعات بتكون قاعده في الشقه لوحدها وتصرخ من غير سبب، وكانت بتروح لدكتور نفسي وبتاخد علاج اكتئاب

= لا حول ولا قوه الا بالله.. تمام يا مدام بشكرك جداً

…

وصل رجاله الطب الشرعي والمعمل الجنائي بعد نص ساعة من وصولنا تقريباً.. عشان يتم فحص الجثة ومسرح الجريمة وفي الوقت ده لقيت واحد قرب مني وطلب يتكلم معايا وعرفني بنفسه، ان اسمه خالد وانه من سكان العمارة

وقفت معاه على جنب واتكلم وقال

_ انا عاوز اقول لحضرتك على حاجة.. مدام صابرين كانت هتتحبس قريب ولكن اللي طلعها من الموضوع هو تقرير الدكتور النفسي اللي بتابع معاه، واللي قال ان تصرفاتها مش طبيعية

= كانت هتتحبس ليه؟!

_ اللي اعرفه ان تسببت في موت بنت اخوها، ازاي معرفش؟!.. بس هو اخوها مش شقيقها يعني.. من ام تانية

= تمام يا خالد، بس خلي بالك احنا هنستدعيك عشان هناخد اقوالك دي تاني بشكل رسمي يعني

_ تمام يا فندم انا تحت امرك

…

كنت عاوز اوصل للدكتور عزت نصار عشان اكيد هو ميعرفش اللي حصل لمراته، ولكن الجيران قالوا انهم حاولوا يتواصلوا معاه ولكن تليفونه مغلق

وفي الوقت ده دكتور الطب الشرعي نده عليا انا ورئيس المباحث سليم ابو المجد.. واتكلم وقال

_الجثة اتفحمت على الاخر.. ومش هقدر اقدم اي تقرير مبدئي عن الجثة

=عندك حق فعلاً.. الجثة منظرها صعب، خلاص هننتظر منك التقرير النهائي بعد التشريح

…

وبعد ما الطب الشرعي والمعمل الجنائي خلصوا شغلهم، اتنقلت الجثة للمشرحة واتقفلت الشقة وطلبت من رئيس المباحث عمل تحريات عن المجني عليها وتكون في النيابة في اسرع وقت

******

انا سليم ابو المجد رئيس المباحث رجعت على مكتبي ومعايا الرائد حسن الكردي عشان نبدأ التحريات عن صابرين سيد الكومي.. وأول حاجة كنا بنفكر فيها اننا نوصل للدكتور عزت نصار، ولما حاولنا نتواصل مع المستشفى، عرفنا ان الدكتور عزت اتصاب بغيبوبه سكر من حوالى ساعتين وهو سايق العربية على الطريق، وفي حد ابن حلال نقله للمستشفى، وبكده عرفنا الدكتور كان فين وقت وقوع الجريمة

وبعدها اتحرك الرائد حسن الكردي عشان يبدأ التحريات مع فريق البحث الجنائي ونعرف كل حاجة عن المجني عليها صابرين الكومي

وبعد 48 ساعة ظهرت التحريات ودخل عليا الرائد حسن وفي ايده الملف عشان يتم مراجعتها قبل ارسالها للنيابة

واتكلم الرائد حسن وقال

_ شوف يا باشا.. احنا عندنا 3 متهمين وكلهم عندهم الدافع للانتقام من المجني عليها صابرين، بس قبل اي حاجه حابب افكر سيادتك ان رجاله المعمل الجنائي اثناء فحص مسرح الجريمة قالت ان مفيش كسر في باب او شباك، ولكن شباك المنور كان مفتوح… يعني ممكن القاتل يكون دخل بمفتاح الشقه الاصلي او المجني عليها نفسها هي اللي فتحتله.. او ممكن يكون نط من شباك المنور

= طيب بس قول ايه اللي في التحريات، وبعدين نعرف مين اللي عملها؟!

_ اول واحد وهو الزوج.. الدكتور عزت نصار.. دكتور معروف وليه اسمه ولكن على المستوى الشخصي هو شخص شكاك جداً وعصبي، الدكتور عزت كان بيشك في سلوك مراته وانها تعرف حد عليه وكان بيعملها معامله صعبة، ولكن ده بسبب

والسبب اللي وصلناله من التحريات ان الدكتور عزت متجوز مدام صابرين من خمس سنين وربنا مرزقهوش بالخلفة وبعد اللف على دكاتره كتير وكلهم متخصصين، الكل اجمع ان المشكله عنده هو مش عندها هي، الموضوع في الاول كان ماشي بالتفاهم ولكن مع اي مشكله كانت بتحصل كانت مدام صابرين بتعاير الدكتور عزت بموضوع الخلفه وده اللي وصل الموضوع ما بينهم لحيطه سد وبعدها بدأ يشك فيها وانها تعرف حد عليه.. لحد ما تسبب ليها في ازمه نفسية وكانت بتتعالج عند دكتور نفسي اسمه صفوت عبد الحميد وكانت بتاخد ادويه اكتئاب.

الشخص التاني هو اخوها كامل ولكن هو مش اخ شقيق من ام تانيه كان مسافر بره البلد.. ولما رجع عرف ان ابوه قبل ما يموت كتب كل حاجه باسم صابرين، خصوصا انه كان رافض يرجع ووالده تعبان، ولما كامل طلب من اخته حقه هي رفضت والمشكله كانت مشكله ميراث لحد ما من شهرين كده، كامل اخد بنته الصغيرة وراحوا زاروا صابرين في بيتها، البنت كان اسمها ياسمين والعيله كلها عارفه ان عندها حساسيه من الشطة، ولما راحوا عندها اصرت صابرين انهم لازم يتغدوا معاها، والغريبه انها حطت كميه مش طبيعيه من الشطه في اكل ياسمين وده اللي خلي البنت تجيلها الازمه وللاسف الموضوع تفاقم والبنت توفت في المستشفى بضيق تنفس.. ويومها كامل كان هيقتل اخته لولا تدخل الدكتور عزت اللي منعه يعمل كده

الشخص التالت وده حكايته حكايه اسمه طاهر وده كان متجوز صابرين قبل الدكتور عزت، طاهر كان راجل مرتاح وغني جداً ولكن التحريات بتقول انه اتنصب عليه من مراته مدام صابرين اللي اخدت كل حاجة بتوكيل عام منه وكان عامله ليها في وقت كان تعبان فيه، الشخص ده لما خسر كل حاجة دخل مستشفى العباسيه وكان بيتعالج هناك، ولكنه خرج من فتره صغيرة ومن ساعتها ومحدش يعرف عنه حاجه

يعني وارد يكون دور عليها وهو اللي عمل فيها كده!

…

3 متهمين عندهم دوافع قوية للقتل، ولكن لازم دليل عشان نعرف نثبت التهمة على حد منهم.. في الوقت ده جالي تليفون وكان من دكتور الطب الشرعي رديت عليه وبعد السلامات اتكلم وقال

_في حاجة لقيناها اثناء تشريح الجثة.. واظن انها هتفيد سيادتك في التحقيقات

= خير يا دكتور حاجه ايه؟!

…

واللي قالوا الدكتور كان صدمه كبيرة بالنسبالى عشان المجني عليها كانت.

المجني عليها كانت حامل، بس حامل ازاي؟.. والدكتور عزت مش بيخلف

رد عليا الرائد حسن وقال

_ هو في ايه يا باشا؟!.. حضرتك بتكلم نفسك؟!

= مدام صابرين كانت حامل يا حسن والتحريات بتقول انه الدكتور عزت مش بيخلف

_ طيب وده معناه ايه؟!.. ان الراجل كان صح لما كان بيشك في سلوك مراته، معنى كده انها كانت بتخونه يعني ولا ايه؟

= مش عارف يا حسن انا مخي هينفجر، لكن احنا اللي علينا ان احنا هنبعت التحريات للنيابة، وهما يشوفوا هيستدعوا مين؟.. والتقرير لما يطلع اكيد النيابة هتستدعي دكتور عزت للتحقيق معاه

…

بعتنا التحريات للنيابة عشان تبدأ تحقيق مع المتهمين، او المشتبه فيهم بمعنى اصح، وبصراحة مرضتش ابلغ وكيل النيابة بكلام دكتور الطب الشرعي، وقولت استنى لحد ما يصدر التقرير واللي ممكن حاجات تانيه لسه مستخبية

*******

بعد انتظار 24 ساعة وصلتني التحريات من المباحث، ولما فتحت الملف وابتديت اقرأ.. عرفت اني قدام 3 مشتبه فيهم

جوزها الدكتور عزت واللي كان شكاك بطبعه، وكمان موضوع الخلفه اللي اكيد اثر في نفسيا وخلاه بيتعامل بالاسلوب ده معاها

اخوها كامل واللي بجانب موضوع الميراث الا ان اخته قتلت بنته بالخطأ.. واللي خرجها من الموضوع هو تقرير الدكتور النفسي اللي اكد انها مش في وعيها وبتتعالج من الإكتئاب

طليقها طاهر اللي على حسب التحريات هي نصبت عليه في فلوسه، والراجل اتجنن وكان في المستشفى بيتعالج، ولسه خارج من فتره قريبة ومن ساعتها وهو مختفي

وعرفت من مكالمه مع المباحث ان الدكتور عزت اتعرض لغيبوبة سكر وهو سايق العربية، وواحد ابن حلال في الطريق.. نقلوا على المستشفى.. ولكن بعد التواصل مع المستشفى عرفنا ان الدكتور عزت بقي كويس.. واكيد طبعاً عرف الخبر وعشان كده قررت استدعيه عشان ابدأ تحقيق معاه كزوج للمجني عليها وكمشتبه فيه حسب التحريات.. وبمجرد ما وصله الاستدعاء متأخرش وفي خلال ساعة كان قدامي في المكتب

_ دكتور عزت البقاء لله.. والف سلامه على حضرتك عرفت انك لسه فايق من غيبوبة سكر

= سبحان من له الدوام.. متشكر لحضرتك جداً، انا يا دوب فوقت من غيبوبة السكر وعرفت الخبر

_ طيب انا عاوز اقول لحضرتك حاجه، انت هنا مش بصفتك بس زوج المجني عليها، انت للاسف الشديد مشتبه فيك يا دكتور عزت وانا اسف اني بقول الكلام ده لدكتور كبير زيك، ولكن التحريات هي اللي بتثبت انك كنت على خلاف مع زوجة حضرتك مدام صابرين

= انا متهم؟!.. حضرتك مش عارف انا مين؟… انا دكتور عزت نصار من اكبر الدكاتره في البلد، راجل ليا اسمي وسمعتي.. ازاي حضرتك تتهمني بحاجة زي دي؟

_ دكتور عزت.. مكانة حضرتك فوق دماغي، ولكن القانون ميعرفش حضرتك ولا حضرتي، انا عندي تحريات.. والتحريات دي بتقول انك كنت على خلاف مع مراتك وكنت بتشك في سلوكها وكانت بتوصل للاهانه ومد الايد والموضوع زاد عن حده خصوصا لما عرفت انك عندك مشكله في الخلفة وانك مستحيل تكون اب

= التحريات دي غلط، انا فعلا عندي مشكله في موضوع الخلفة بس عادي يعني الدكتور قال ان انا ممكن اتعالج، ولكن المشاكل اللي بيني وبين مراتي.. كانت مشاكل عادية زي اللي بتحصل ما بين اي واحد ومراته

…

كنت لسه بتكلم مع الدكتور عزت وكان زعلان من انه ضمن المشتبه فيهم في القضية، وفي الوقت ده وصل تقرير الطب الشرعي.. بصيت في التقرير واتصدمت ورجعت بصيت لدكتور عزت وقولتله

_ ممكن تفتكر يا دكتور، لما جتلك غيبوبة السكر كنت في اي شارع بالظبط

= الشارع اللي ورا المستشفى على طول، هو حضرتك لسه بتلمح ان انا اللي عملت كده، حضرتك انا كنت في غيبوبه سكر وكنت تعبان امبارح اليوم كله ومن الساعة 7 بليل موجود في المستشفى

_ اللي قدامي ده تقرير الطب الشرعي..ومش عارف اجبهالك ازاي بس مدام صابرين كانت حامل قبل ما تتقتل، وكانت واخده حبوب كتير عشان تسقط الحمل ده او بمعنى اصح تنتحر، بس في واحد خلص عليها قبل ما تموت

= كانت حامل ازاي؟!.. ايه اللي حضرتك بتقوله ده؟

_ مش انا اللي بقول يا دكتور، تقرير الطب الشرعي هو اللي بيقول

…

الراجل بدأ يتعب، وكان بياخد نفسه بالعافية وعشان كده طلبت منه يهدى وخليت العسكري طلعه بره عشان يعرف ياخد نفسه

وبعد ما هدي افرجت عنه بضمان محل اقامته، وقولتله انه لو ظهر جديد هنستدعيه

واتواصلت مع المباحث وطلبت منهم اني عاوز اعرف مين الشخص اللي وصل الدكتور عزت للمستشفى، واكيد الشخص ده بياناته هتكون موجودة في المستشفى

وبعدها قررت استدعي المتهم التاني.. كامل اخو المجني عليها من الاب.. والراجل ده كمان متاخرش وكان موجود بعد اقل من ساعتين وبدأت تحقيق معاه

_ استاذ كامل ما قولك فيما هو منسوب اليك.. انك قتلت اختك مدام صابرين

=محصلش، انا سمعت الخبر زيي زي الناس، وهكذب على حضرتك لو قولت اني زعلت او الخبر اثر فيا، انا صابرين بالنسبالى ماتت من يوم ما قتلت بنتي، وانا مش مسامحها حتى بعد ما ماتت مش مسامحها

_ما هو ده مربط الفرس يا كامل، انت عندك دافع قوي عشان تقتل مدام صابرين، عشان تنتقم لبنتك اللي مدام صابرين كانت عارفه انها عندها حساسيه من الشطة ورغم كده حطت الشطة في الاكل وبكمية كبيرة، وعلى حسب التحريات انك اتهجمت عليها وحاولت تقتلها وقتها، ولكن جوزها الدكتور عزت هو اللي منعك

= وقتها ده حصل فعلاً، ولكن اعذرني انا كانت حالتي صعبه.. تخيل تسمع ان بنتك ماتت بسبب ضيق تنفس حصلها عشان حساسيه الشطه اللي العيله كلها عارفه ان بنتي بتعاني منها، واولهم صابرين

فتقوم تحط الشطة وهي متعمدة انها تأذي بنتي

_ وطبعا تقرير الدكتور النفسي بتاع اختك، طلعها من الموضوع لانها بتتعالج من الاكتئاب والادويه بتأثر عليها بالسلب وبتخليها غير مسؤولة عن تصرفاتها.. وده خلاك تفكر تاخد حقك بايدك وخلصت عليها

=محصلش، والله العظيم ما حصل

….

وبعد التحقيق معاه عرف يثبت انه كان عند واحد صاحبه في نفس توقيت وقوع الجريمة.. وكده مش قدامنا غير التحقيق مع الشخص التالت طاهر طليق المجني عليها واللي كان بيتعالج في مستشفى العباسية وخرج قريب، ولكن المشكلة ان العنوان اللي موجود معانا، واللي قدرت المباحث تتوصل اليه، عنوان قديم وطاهر مش موجود فيه والبيت مقفول

ولكن لازم نلاقيه لان عنده هو كمان دافع قوي للقتل واختفاءه ده مريب.

في الوقت ده اتواصلت معايا المباحث، وعرفت ان الشخص اللي نقل الدكتور عزت للمستشفى اسمه ابراهيم عيد وكان سايب بياناته.. عملتله إستدعاء

ولكن في نفس الوقت بتوصل اشاره عن جثة مشوهه ومرمية على جنب طريق صحراوي، ووقتها كان لازم اتحرك عشان نشوف دي جثه مين؟.. وصلت هناك وكانت الشرطه وصلت ولقيت العسكري بيديني محفظه كانت جنب المجني عليه.. فتحت المحفظه وطلعت البطاقه وكانت الصدمة…