رواية جثة نبوية الفصل الأول 1 - بقلم محمود الأمين

ن

الجريمة المره دي غريبة، ليه بقول غريبة؟!

عشان دي اول جريمة قتل وسط جرايم خطف اطفال وانتحار ستات وشباب بدون اي سبب وفي وسط ما احنا مسحولين في المحاضر والتحقيقات والتحريات، يجي بلاغ لرجال الشرطة من واحده اسمها سوزان وكانت بتقول في البلاغ انها دخلت البيت لقيت امها مقتولة ومرمية على الارض.. اتحركت قوه من القسم على مكان البلاغ.. وهناك لقيوا جثه ست في الخمسينات من عمرها واقعة على الارض وراسها متهشمة تماماً.. واضح ان القاتل ضربها على دماغها أكتر من مرة لحد ما وصلها للمرحله دي

ولكن اللي مكنتش اعرفوا ان موت الست دي هيكون كلمه السر في كل الجرايم اللي بتحصل.

...

انا المقدم حمزة.. القوه اللي وصلت لمكان البلاغ كانت بقياده الرائد خالد عبد الفتاح وانا وصلت المكان متأخر، ولما دخلت لقيت رجاله الطب الشرعي بتفحص الجثة ورجاله المعمل الجنائي بيفحصوا مسرح الجريمة.. قربت من الجثة واللي كانت ست في الخمسينات من عمرها مقتولة وواضح استخدام العنف في الجريمة.. اتحركت في المكان ووقتها لمحت بنت في العشرينات كانت واقفه على جنب وبتبكي قربت منها وعرفت منها ان الست دي تبقى والدتها وانها هي اللي قدمت البلاغ.. الوالده اسمها نبوية وعلى حسب كلام بنتها انها كانت في حالها خالص ومش بتتكلم مع حد، ولكن في الفترة الاخيرة.. بدأت تكون عصبية ومش عارفه ايه السبب؟

خلصت كلام مع البنت اللي واقفه واللي كان اسمها سوزان واتحركت ناحيه دكتور الطب الشرعي اللي كان بيفحص الجثة بص ناحيتي وهز دماغه وقال

_ انا متاكد ان القاتل ده، قتل بغرض الانتقام لانه ضربها بغل في راسها لحد ما قتلها، والتشخيص المبدئي يخليني اقول لك ان اللي قتل شخص قريب منها ومش بعيد، لان الضربه الاولى كانت في الوش وده بيرجح احتمالية المجني عليها كانت تعرف القاتل والا كانت هترفض تدخله البيت..

= كلام الدكتور كان منطقي، وعشان كده سبته يكمل شغله وبعد مخلص اتكلم وقال

_ الجثة هتتنقل للمشرحة عشان ناوي ابدأ تشريح فيها على طول، وفي اقرب وقت هيكون التقرير عندك

شكرت الدكتور وبعد شوية رجاله المعمل الجنائي والطب الشرعي خلصوا واتنقلت الجثة للمشرحة عشان التشريح، لكن رجاله المعمل الجنائي مقالوش عن اي ملاحظات في المكان

...

رجعت على مكتبي وانا الصداع هيفرتك دماغي ولحد دلوقتي عندي اربع بلاغات عن اختفاء اطفال، ده غير انتحار شاب وست في اوائل التلاتينات ومفيش اسباب لانتحارهم

دخل عليا الرائد خالد وهو عارف اني تعبان ووقتها طلبت منه تحريات عن الست نبوية وكل معارفها وقرايبها والعدوات، وكل حاجه بنطلبها في اي تحريات عن جريمة قتل.. وعلى طول بدا الرائد خالد شغل مع رجاله البحث الجنائي عشان نوصل للقاتل في اقرب وقت

وبعد حوالي 48 ساعة داخل علي الرائد خالد وفي ايده ملف التحريات الخاص بالست نبوية.. الست نبوية كانت عايشة لوحدها هي وبنتها سوزان ومعندهاش قرايب غير ابن اختها سليم وده عايش في اسكندرية من فترة كبيرة ومتجوز ومستقر هناك، وملهاش اي عدوات او مشاكل مع حد

ولكن الست نبوية عندها بيت تاني غير البيت ده، وعلى حسب التحريات هي بتخرج كل يوم وبتروح على البيت التاني ده، ومحدش عارف هي بتعمل ايه هناك، وفي ناس كتير قالت انها مربية طيور وبتبيع منهم وبتسترزق

...

ملف التحريات مزودش اي حاجة، وخلى في غموض حوالين الست نبوية بس انا مش عارف ليه كنت حاسس ان البيت اللي هي بتتردد عليه ده وراه حاجه، وعشان كده جبت اذن من النيابة بتفتيشه عشان نعرف ايه اللي جواه عشان الست نبوية تتردد عليه كل يوم.. وفعلا بعد وصول اذن النيابة اتحركنا على هناك واقتحمنا البيت واول ما دخلنا شمينا ريحه صعبة أوي، أشبه بريحة عفن وده اللي خلاني انا والرائد خالد نطلع مناديل ونحطها على بوقنا ومناخيرنا من كتر ما الريحة بشعة

وطلبت من العساكر تفتح اي شباك على الشارع عشان الريحه دي تخف شوية، وبعد ما عملنا كده بدأنا تفتيش البيت حتة حتة وفي البداية كان الموضوع مقتصر عن شوية طيور ميتة، وقولت جايز تكون هي اللي عامله الريحة دي، ولكن في اوضه دخلها الرائد خالد ووقتها لقيته بينده عليا ولما دخلت الأوضة اتصدمت

عشان الاوضه كان فيها عظام بشرية ده غير ان احنا لقينا اربع جثث لاطفال.. ودول نفس الاطفال اللي اختفوا واللي اهاليهم قالبين الدنيا عليهم وعاملين محاضر باختفائهم

ومن كل حاجة حواليا.. كان الاستنتاج حاجة واحده بس ومش عاوزه تفكير.. الست نبوية دي كانت دجاله وبتعمل سحر وكانت بتأذي الناس بس ليه تخطف اربع اطفال وتقتلهم؟!.. وهل هي السبب في الراجل والست اللي انتحروا كمان؟!

الدنيا اتقلبت ووكيل النيابه جيه وبص على البيت واللي جواه، وكان مذهول من كل حاجه شايفها

الجثث اتنقلت على المشرحة.. وبلغنا اهالي الاطفال ان احنا لقينا عيالهم ولما الاهالي وصلت القسم مكنتش عارف اقولهم ايه؟!

الناس كانت مستنيه تسمع مني كلمة تطمن بيها على عيالها ولكن لما طلبت من الرائد خالد ياخدهم على المشرحة سمعت الصراخ واللي ضرب على دماغه، واللي وقعت من طولها.. وفي الوقت ده كنا قبضنا على سوزان بنت الست نبوية اللي كانت مش فاهمه اي حاجة وكانت بتنكر معرفتها بالبيت ده وعلى حسب الكلام اللي قالته في التحقيقات انها بتشتغل في محل ملابس من الساعة 9 الصبح للساعة 7 بليل وبعدها بتروح وبتلاقي امها في البيت، ولما واجهناها باللي كانت بتعمله كانت رافضة انها تصدق

...

وبعد 24 ساعة ظهر تقرير الطب الشرعي وتقرير المعمل الجنائي الخاص بجثة الست نبوية واللي كان مكتوب في تقرير الطب الشرعي يتماشى مع التقرير المبدئي للدكتور اثناء فحص الجثة في مسرح الجريمة.. وانها تعرضت لضربه في الوش في البداية ولكن الضربه اللي ادت للوفاه هي الضربة اللي من ورا واللي كانت بآلة حادة.. اما تقرير المعمل الجنائي فمكنش فيه اي حاجة تدل على شخصية القاتل حتى البصمات اللي في مسرح الجريمة هي بصمات الست نبوية بس

قفلت التقرير وفي الوقت ده دخل عليا الرائد خالد بسرعة وأتكلم وقال

_ انا عملت تحريات عن الصور اللي كانت موجوده في بيت نبوية التاني، والمفروض اصحاب الصور دي هما اللي بيتعملهم اعمال سحر وقرف

= تمام ايه المشكلة؟

_المشكلة في الصورة دي، صاحبة الصورة دي تبقى مرات سليم ابن اختها، واللي عايش دلوقتي في اسكندرية، وبنسبه كبيرة الست دي بتعاني من حاجة دلوقتي او ممكن تكون عملت في نفسها حاجة

...

بعد ما سمعت الكلام من الرائد خالد، قررت اني هسافر اسكندرية عشان اقابل الاستاذ سليم بنفسي والحق واحده من حاله انتحار او من مصيبه ممكن تعملها بسبب السحر والقرف

وطلبت من الرائد خالد يخليه هنا لحد ما ارجع، جبت العنوان بتاعه من التحريات وسافرت اسكندرية وكان ساكن في منطقه خالد بن الوليد واول ما وصلت هناك ومشيت على العنوان لقيت نفسي قدام عماره مكونه من ست ادوار.. قربت من البواب وسألته عن شقه الاستاذ سليم وعرفت انها في الدور الرابع

ولقيت البواب بيشاورلي على البلكونة اللي كانت واقفه فيها ست وكانت شايله بنت صغيره عندها حوالى اربع سنين.. حمدت ربنا انها بخير وكنت لسه هطلع عشان اقابل الاستاذ سليم لكن فجأة حصلت حاجة خلتني مصدوم ومش عارف اتحرك من مكاني

الست اللي هي المفروض مرات الاستاذ سليم من غير سبب وبدون سبق انذار رمت بنتها من الدور الرابع ونطت وراها.. اتجمدت في مكاني ومكنتش مصدق اللي شوفته وفجأة...