جذبني فمك البني الفصل الثامن 8 - بقلم عبير إدريس

يتم عاطفي
مرات يكون اقوى من اليتم الابوي ..

كلما حاولت الوقوف على قدمي يذكرني بوحدتي انكساري يتمي انخذالي اموت كل يوم وجعاً اموت حباً ..
ماذا عن حبك العالق بداخلي عن بعثرة روحي عن ارتباكي عن حنيني لأحضانك ، ماذا عن السؤال والاهتمام ..
قد اصبح حبك بداخل صدري غصة...

بقلمي عبير ادريس

_______________

شمرت المفتاح والجنطة وبكلبي اكول الله جابج يمكن حسيتي بيه محتاجه اطلع ضيم كلبي واجيتي...

سيلين : هاي شجابج؟

كامت وكفتلي فتحتلي ايدها..

تمارة : شلونج ماما شنو مشتاقيتيلي...

ضحكت مستهزئه..

سيلين : شلون عيدي بله رحمه لابوج اريد اضحك مشتهيه اضحك صارلي هواي مضاحكه ..

تمارة : اعرف تعبتج واذيتج اعرف والله ومتندمه وجيت اصلح غلطتي..

سيلين : تعبتيني ، شكد سهله يايابه خفيفه بحلكج من تحجيها ، عطت بعلوا صوتي انتي تعرررررفيين شصار بيه بذيج السنين الفاتت تعرفين لشنو تعرضت وبشنو ابتزيت ، تعرفين شسويت وبشنو جازفت حتى احافظ على اختي التركتيها مريضه وجانت بين الحياة والموت..

تماره : حقج حقج بكلشي تحجيه بس اختج وين ماشفتها..

سيلين : علمي علمج اختي تبرت مني مثل ما انتي تبريتي مني ، نكرت تعبي ومجازاتي وعافتني ممكن اني غلطت وهيج جازتني بس ماغلطت بحقها ولا اذيتها ، لتخافين عليها عايشه ومستقره عوفيها بحالها ..

تمارة : ماما عيني اني رجعت الكم واريد نعيش سوه..

سيلين : من الاخير طاردج واجيتيني ومنين جبتي عنواني لان محد يعرفه..

تمارة : اليسأل ميتوه..

كزيت على اسناني وحجيت بصوره متقطعه كلمة كلمة..

سيلين : منين جبتي عنواني كتلج..

تمارة : رحت للجامعه وسألت عنج هناك وكلتلهم اني امها رحت للقسم سألت بنات دلوني على مكان سكنج ..

سيلين : ومنين عرفتي مكان دوامي ...

تمارة : من زاكروز ...

سيلين : زين هسه شتريدين.

تمارة : ماعندي مكان اروحله الله لا يوفقه ضحك عليه وطردني وجاب وحده صغيره تزوجها ومتحملت طلعت..

سيلين : لعد شنو جنتي متوقعه من تتزوجين واحد أصغر منج بعشر سنين على شنو ماخذج لسواد عينج مثلا اكيد طمعان بيج وشافج مضحكه ضحك عليج وهيج راح ورثنه ابطنه..

تمارة : تندمت والله يا ماما سامحيني..

سيلين : طلعي بره بسرعه..

تماره : تطردين امج..

سيلين : ماعندي ام ، امي ماتت من زمان ...

تمارة : سيلين بنتي ماعندي احد غيرج..

سيلين : روحي لاخوج يلفيج ، تتذكرين من وكفت ابابج مكسوره خاطر وكتلج وين اروح كتيلي روحي لعمامج ، اني هم اكلج روحي لأخوج ...

تماره: يعني مابيج امل تسامحيني..

سيلين : ابدااااا..

تماره : ماما حبيبتي ...

حجتها وتقربت تريد تلزمني رفعت ايدي ليفوك وعطت بيها..

سيلين : ايدج شيليها مني لا اعيط بصوت افزز الميتين من كبرهم ..

شالت جنطتها رادت تطلع وصلت للباب صحتها ..

سيلين : دقيقة قبل لا تطلعين ..

وكفت بمكانها والتفتتلي مبتسمه عبالها راح اكوللها ابقي يمي ...

سيلين : اليوم ذكرتج سبحان الله شلون صدفه..

تماره : ذكرتيني..

سيلين : اي ..

تمارة : وين وليش ..

سيلين : تذكرت سوالفج يم الطبيب النفسي ردت اتعالج من اثارج الحفرتيها بكلبي ولحد الان اعاني منها..

تمارة : اسفه..

سيلين : ميفيد سدي الباب وراج ...

طلعت وكعدت بالكاع ابجي انهاريت...

يعني اني ناقصه عذاب ضمير حتى تجي تزيدها عليه خاف جانت ناقصه التمت عبالك تعرف نفسيتي تعبانه واجتي تكملها عليه ، يعني شنو اتذكر الها واغفر شنو اريد انسى وعن شنو اتغاضى دمرتني ...

كمت غسلت وجهي ورحت لشقه ابو عبد دكيت الباب فتحها ابنه الصغير...

سيلين : حباب انزل صيح ابوك كله سيلين منتظرتك هنا تريد تحجي وياك بسرعه...

يكرط بالجزر صفح واكعات اسنانه الاماميات ويهز براسه متفهم الكلام ، نزل يركض واني طبيت لشقتهم صحت ام عبد...

اجاني صوتها..

ام عبد : كعدي جيتج بس الم العجين ....

كعدت على القنفه ورجلي تهتز قلق وتوتر...

صاح ابو عبد : يا الله...

سيلين : تعال عمو منتظرتك ...

اجه كعد سلم من وره خشمه عرفته ضايج مني..

سيلين : عمو شلون تفتح باب شقتي لمرة غريبه وتفوتها يعني لو مبيوك مني شي منو يتحمل المسؤولية...

نفض راسه بغضب ونتر..

ابو عبد : بس هاي امج وانتي كذبتي عليه..

سيلين : شنو يثبت امي ، هاي ياهي التجي تكلك اني امها تدخلها لبيتي..

ابو عبد : طبعا لا اني مو غبي لهاي الدرجة اكيد طلبت منها مستمسك وشوفتني هويتها وحجتلي عنج هواي ...

سيلين : على العموم هالمرة صارت مرة ثانيه اترجاك ما اريدها تتكرر..

ابو عبد : انتي كذبتي وعندج هواي اسرار من باجر تدوريلج مكان ثاني كعدي بيه ...

نترت ...

سيلين: عمو انت شعليك بيه عندي ام اب عسى ما عشيره شيخصك شو كاعده بفلوسي ما كاعده بلاش لو صدقات احد...

ابو عبد : واني كلت العندي ...

مجاوبته عفته وطلعت دايخه بزماني وين اروح هسه وين الكى مكان زين وناس زينين ومن انام مأمنه جيراني خوش ناس ، شلون قهر عفيه ام بس تخلي رجلها بمكان تهدمه ....

رجعت للشقه مددت والف فكره ابالي كمت للكنتور طلعت صورته ورجعت مددت قرفصت على نفسي وعيوني تتودد لملامح وجهه الملتحي ، لتقاسيم جسمه الرجوليه ، اعاتبه بنظراتي ، اذا انت هلكد قريب مني تعال واكسر حاجز الزعل وخلينه نرجع من جديد ، خليت الصورة على كلبي وبدت دموعي تنزل دافيه على وجهي ....

نمت مادري بروحي كعدت الصبح مسطورة اريد اتوازن ما اكدر هاي المقويات من جنت اخذهة بالبدايه زينه ليش اخر كم كبسوله كاعد تسطرني بسرعه انام واكعد راسي جبل من الثكل ،

تريكت ولبست عبايه اسلاميه ورحت للسوبر ماركت تسوكت كم شغله ورجعت للبيت ، صفيت الغراض الجبتهن كلشي بمكانه ورحت اهتميت بشرتي سويت سكراب وخليت قناع مرطب ونظفت جسمي ،
حبيت اهتم بنفسي اريد التهي وما افكر ، رجعت للمطبخ اليوم ادلل روحي ،

كعدت لفيت دولمه باكه سلك وحده سويت وبصل مخليت شي ثاني بيها ، انتظرت تستوي خليتها على نار هادئه دخلت سبحت وكعدت جوة المي الحار رخه جسمي واعصابي ارتاحت كملت وطلعت للغرفه بدلت ملابسي ، ورطبت جسمي ،

رحت للمطبخ طلعت ريحه الدولمه الله انتعاش تذكرني بعمه ياسة من جانت تسويها ونكعد بالحديقه نتغده اووف اووف ...

كلبتها بالصينيه طلعت تمر ولبن و تغديت ، اوهم روحي بأن حياتي طبيعيه وخاليه من المنغصات وهيه العكس ....

كملت غده وكمت نظفت الشقة تنظيفه زينه ، صارت ساعه اربعه ونص فتت نمت نص ساعه ودكتلي نسرين..

جاوبتها بصوت مليان نعاس وعيوني مغمضتها خاف تطير نومتي اريد ارجع انام ...

سيلين : الووو هلو...

نسرين : خاف نايمه ولج..

سيلين : اي ليش؟

نسرين : ولج شنو اتفقنه احنه..

سيلين: ماتذكر ذكريني انتي ؟

نسرين : مو كلنه نطلع نشتري ملابس ومنتظرتج تمرين عليه وكل شويه اكول ما اتصل هسه هيه تجي...

سيلين : ولج تعبانه اليوم هواي سويت شغلات خليها باجر حبابه ..

نسرين : صدك تحجين واني مبدله ومنتظره...

سيلين : باجر فدوة خليني اكمل نومتي..

نسرين : ماشي روحي نامي متشبع ...

سديته ورجعت نمت ورة ربع ساعه سمعت الاذان فتحت عيني الغرفه ظلمه وصوت الاذان مالي المكان دنيا غروب اذا ضليت نايمه اكعد نحسه ، بس شنو سالفه النعاس ليش هالكد انعس مجنت هيج قبل ، جنت اله اهلك نفسي تعب يلا اكدر انام ...

رحت توضيت وكفت اصلي كل شويه بالي يسرح بمكان واستغفر وارجع اعيد من البدايه كملت صلاه لفيت السجاده وكعدت اتفرج على التلفزيون ،

حسيت راسي بده يوجعني ، تذكرت مشاربه جاي رحت للمطبخ خدرت ورجعت كعدت بمكاني، ورة شويه سمعت صوت القوري اعلن على الانتهاء ،، ركضت للمطبخ طفيت الطباخ وصبيت الجاي واخذته للهول كعدت اشرب واكلب بالموبايل ، اجتني رسالة على الواتساب...

فتحتها كروب الدوام ، البنات سوو كروب علمود الشغل وضافوا الولد من ضمنهم محمد اقارب نسرين سامعه بيه بس مشايفته لحد الان ولا سامعه صوته ...

المسج منه كاتب ...

( سامعين بالتخاطر الروحي اكو واحد منكم مجربه )

البنات مجاوبيه يعني شنو اول مره نسمع بيه ؟

كتب ..

يعني مثلا فد يوم وحده بيكم فكرت بشخص واتصل بيها بنفس اللحظه ، او حلمتوا بشخص وكعدتوا ثاني يوم وحسيتوه عبالك جان موجود يمكم او حتى لمسكم .

وحده كتبت اي اني دائما تصير ويايه هاي الحاله ..

الثانيه كاتبه اني كلشي ما احس لان جفاف عاطفي وكل واحد كتب شكل ...

وحده كتبت ..

_ هذا شعليه بالتخاطر هاي صدفه تصير التخاطر شي يختلف اني قاريه عنه ..

جاوبها ..

_ مرات تحسين اكو ضيق بصدرج او مخنوكه وبعدين تسمعين خبر سيء صح لو لا ..

جاوبته البنيه ..

_ صح

رجع كتب .

_ هم مره كعدتي فرحانه وسمعتي خبر كلش حلو بنفس اليوم..

كتبتله اي..

_ هاي معناها عقلج يعكس الشي اليفكر بيه وبالتالي يجذب الاشياء لحياتج سواء جانت سيئه او زينه..

اني اقره وبس مكتبت اي شي صار عندي فضول قوي اعرف شنو هذا الموضوع ..

اشرب جاي ومندمجه خلص ورجعت صبيت واحد ثاني ..

كتب ..

محمد :

التخاطر الروحي هو عبارة عن التواصل من خلال انتقال المشاعر والأفكار والعواطف والرسائل والطاقة بين شخصين بطريقة غير مادية والأمر أشبه بتقنية البلوتوث، كأنما يشعر الشخص بالطرف الثاني ويفهم اليريد يوصله اله بغض النظر عن المسافة البينهم أو الوقت، ويمكن أن يتمثل :

بقراءة أفكار الشخص الآخر وما يدور في ذهنه. التواصل المباشر مع الطرف الآخر بدون التحدث.
غرس فكرة أو كلمة أو صورة في ذهن الشخص الآخر.
التأثير على التصرفات والأفكار والأفعال وردود الفعل التي تصدر عن الشخص الآخر.

جاوبته هيه ...

اعرف التخاطر الروحي شائع أكثر بكثير مما نعتقد وبشكل خاص بين الأحباء والأشخاص المقربين التربطنا بهم علاقة قوية..

محمد : صح واذكرلج واحد من أهم الأمثلة التي يظهر بها التخاطر بشكل واضح هو حالة الأم التشعر بأولادها وتفهم تمامًا ما يمرون بيه حتى ولو كانوا في مكان بعيد جدًا.

جاوبته .

_ و التخاطر بين التوائم بحيث يكون التوأم قادر على الشعور والتواصل بينهم بدون التحدث ...

فيعرفون إذا كان الثاني يعاني من أمر معين أو مريض أو حزين.

محمد : صح هذا يسموه التخاطر الذهني يتيح للجميع أن يستخدمه ويختبره ويعتمد عليه..

، ولكن يحتاج إلى شخص يتمتع بروح شفافة وصافية وهدوء نفسي كبير بالإضافة إلى طاقة قوية..

جاوبته ..

_ سامعه يتحقق التخاطر من خلال مجموعة تمارين وتقنيات تنفس وطاقة معينة يعني مو هيج ياهو الجاي يسوي تخاطر...

محمد : صح واني مجربها هواي اذا يهمج تعرفين شلون تخلين شخص يفكر بيج ؟ اكدر احقق الج هذه الأمنية اذا تريدين هههههه ....

اني كتبتله .

سيلين : اكتبلي شلون ؟؟

محمد : هلو ست سيلين شلونج شلون الصحه.

سيلين : اهلا استاذ محمد الحمد لله انت شلونك..

محمد : اني زين اذا انتي زينه ، عجبج موضوع اليوم مع العلم يوميا نكتب اشكال مواضيع متشاركينه بيها..

سيلين : العفو منك بس متهويني كلش ، موضوع اليوم لفت نظري وصار عندي فضول اجربه ...

محمد : بس بيه سلبيات هواي ديري بالج..

سيلين : لتخاف ما اتعمق كلش ..

محمد : تمام راح اكتبلج الخطوات وامشي عليها...

سيلين : انتظر..

محمد : اول خطوه تحتاجين لشخص ثاني يلا تصير شغله التخاطر..

سيلين : شلون يعني مافهمت..

محمد : التخاطر يحتاج إلى شخصين المرسل والمستقبل، وبشكل عام لازم تحسين بأنج تملكين قدرة للقيام بأحد الدورين أكبر من الدور الآخر وهذا بالبداية لذا يمكنك اختيار هذا الدور لتبدأين بالتدريب، وبعدين تكدرين تبدلين دورج بين المرسل والمستقبل.

سيلين : حرام اذا فهمت شي وضح اكثر...

الكل انسحب من المحادثه بقينه اني وياه نكتب وكأنما محادثه خاصه مابيهة اكثر من عشرين موظف..

محمد :تتدربين باستمرار علمود تحصلين تخاطر روحي أفضل...

سيلين : وهاي شلون ؟؟

محمد : اهم شي متشككين في أمر التخاطر.وتكونين قادر على استقبال التخاطرو عقلج لازم يكون في استرخاء تام و جسمج كذلك...
بعدين ترسمين الأفكار بعقلج وضروري تتواجدين في مكان وزمان هادئ ،تتدربين على فهم الآخرين والشعور بيهم..

تتدربين على بناء ممر طاقي
رسالتج لازم تكون مناسبة..

سيلين : شلون يعني مناسبه من اي ناحيه..

محمد : اكو شروط تتمتع بيها الرسالة حتى يتحقق قانون التخاطر بشكل صحيح..

سيلين : وهي؟

محمد : اول شي تكون واضحة بسيطة ومفهومة مختصرة غير معقدة و أن تكون في حالة التأكيد بدون نفي اما اذا جان سؤال لازم يكون مباشر… يعني بالمختصر تكون واضحة مفهومة ومختصرة.

سيلين : فهمت هاهيه لو اكو بعد ؟؟

محمد : اخر شي الخطوات سويهن...

سيلين : ياخطوات الذكرتهن قصدك....

محمد : لاالخطوات الخاصه بالتخاطر الروحي..

سيلين : اكتبهن ولو زحمه عليك..

محمد : لا رحمه تدللي اول شي تحددين الشخص التردين تسوين وياه التخاطر ونوع الرساله
بس باعي مو اي شخص ..

سيلين : شنو قصدك مو اي شخص..

محمد : لازم يكون شخص تعرفيه او التقيتي بيه ولو مره بحياتج واهم شي تحتاجيه بهاي الخطوه تركزين على ملامحه وتفاصيله وتتذكرين صوته وكلشي يخصه..

كلت بكلبي ليش اني ناسيته حتى اتذكر..

سيلين : تمام...

محمد : راح ادزلج باقي الخطوات بالسره ورديلي خبر اذا سويتيها ،، سؤال انتي اليوم تسويها لو شوكت..

مجاوبته ليش يريد يعرف ..من شافني مجاوبت دزلي الخطوات

الاسترخاء والتأمل
كعدي بمكان هادئ وصفي ذهنج من كل الأفكار التشغله، كعدي بطريقة مريحة وابدأي بالتنفس العميق اخذي نفس بطيء وعدي للرقم 4 بعدين حبسي أنفاسج ورجعي عدي لل 4 وبعدها زفير طويل مع العد حتى الرقم 8، وكرري الأمر لحد الوصول لمرحلة عميقة من الاسترخاء.

تخيلي الشخص

غمضي عينج وتخيلي شاشة كبيرة كدامج تخيلي بيها الشخص نفسه يجي من بعيد ويقترب منج تخيليه بملامحه وتفاصيله بصوته وابتسامته كأنما كدامج حقيقي و لازم ترحبين بيه وتبتسمين اله بالإضافة إلى شكره ومسامحته على كل شيء او تطلبين المسامحه منه اذا جنتي انتي غلطانه بحقه...

سيلين : تمام كمل...

محمد : ترسلين الرسالة
لازم تكون رسالتك محددة قبل ما تبدأين بخطوات التخاطر الروحي ومن الضروري أن تكونين محققة للشروط أي واضحة ومختصرة ومفهومة.

من تتخيلين الشخص بشكل كامل كدامج بلغيه بالرسالة وطلبي منه الرد عليها، بعدها تخيليه وهو يودعك ويدير ظهره ويبتعد إلى أن يختفي.

سيلين : هذا هو لو اكو بعد..

محمد : اهم شي تنسين السالفه..

سيلين : شلون يعني؟؟ ..

محمد : من تنهين تمرين التخاطر لتشغلين نفسج بيه والتفكير والتشكيك ها سويته صح لو لا انسيه تماما ..

سيلين : وشنو الفائدة من كل السويته لعد شحصلت اني ..

محمد : تنتظرين استقبال الرد..

سيلين : قصدك بالحلم..

محمد : ممكن حقيقه احتمال رساله تجيج منه او هو شخصيا يجيج .. او الجواب يكون بشكل طاقة أو شعور أو حلم…

بس شرط تفتحين عقلج وقلبج ومشاعرج لأستقبال الرد على رسالتج الدزيتيها اله يجوز الجواب عنها بشكل طاقة أو شعور أو حلم…

سيلين : شكرا اسويها واردلك جواب..

محمد : بس باعي اكو هواي سلبيات بيها اذا تعمقتي تتأذين ..

سيلين : اكتبها عود اقراها بعدين ..

تركت الموبايل وجبت الحاسبه وطلعت كل التفاصيل تعمقت اكثر بهاي الشغله وقريت اكو سلبيات بس مهتميت الها تركتها ردت بس اوصله بأي طريقه صرت اصدك حتى بالخزعبلات السمعتها هسه ...

ساعتين ضبط ادرس الموضوع ، تعبت كمت حميت الدولمه البقت من الغده واكلتها بالجدر غسلته نشفت ايدي بالخاولي المعلك ، اخذت المقويات مالتي ورحت تمددت وبلشت اسوي التخاطر الروحي ...

رخت اعصابي وبلشت اسوي الخطوات وحده وحده الى ان بديت اتخيل كلشي عبالك حقيقه غطيت بالنوم كأنما منوم مغناطيسي بلشت روحي تنسحب مني اريد اكعد ما اكدر شبهت الحاله الصارتلي بالجاثوم مرات من التعب نحس واحد نايم فوكانه ويخنك بينه والروح تفرفح لان ينكطع النفس اني عاده بهيج حاله جنت اقره المعوذات واتخلص منه بعد دقايق بس هسه لا مداكدر ابد ، حسيت ورطت روحي ....

هنا بده كلشي يتحول حقيقة حسيت واحد حضني هذا عطره ملئ ريتي لمسات ايده على بشرتي تمشي برقه ..

هذا يمي مستحيل يكون حلم او وهم كاعد احس بيه واشعر بقربه ..

خله شفته على شفتي وطبع قبلات رقيقه نزولا لركبتي حسيت بيه بدأ يتجرأ اكثر بس ما اكدر اقاوم اعصابي راخيه جسمي نحلان ما اكدر ادفعه ولا افتح عيني ، سحبني لحضنه دخل ايده جوة راسي وحضني ، متأكده من الديصير حقيقي و الأكدلي اكثر من همس بأذني كلمات حركت روحي حرك ...

ادهم : اعرف بيج مسلوبه الاراده بس حضنيني محتاجج تعبان انه تعبان موجوع متأذي حبيبتي ..

حسيت دموعه بللت وجهي وجان يحجي مهضوم وبحه صوته تشهد ...

ادهم : اعصابي منهارة وانه بعيد عنج ماجاي اتحمل بعد تعبت تعبت ، كاره قسوتي عليج ورايدج بس من اتذكر السويتيه بيه اكرهج واحقد عليج واريد بكل قوتي أأذيج ، متتصورين انه جاي أجلد روحي ..

اختنك وكمل ...

ادهم : حاير شسوي نصي كارهج ونصي يصرخ يريدج ، اكرهج حبيبه كلبي اكرهج بحجم معاناتي ....
تتذكرين بيوم اجيتي وكلتيلي شتسوي اذا عفتك ، شجاوبتج انه ..

كتلج اليروح بأرادته ما اهتمله .. ..

جنت اكابر بس داخلي يكول لا تكذب ، ندمت على جوابي لو ترجعين تسأليني مره ثانيه ، جان كتلج لا

لان انه رجل مؤمن وعدنه بالاسلام لايجوز قتل الرجل عمدآ وانتي بروحتج قتلتيني ...

كام يوخر بشعري عن وجهي ويمسح دموعه البللت وجناتي خدرت روحي من شميت عطره، كلبي جان متعطش لريحته مو بس كلبي كلي متعطشه اله ..

ادهم : عذريني يمكن سويت شغله اذيتج بيها ماعندي حل ثاني حتى اجيج بس
هاي الطريقه ، كلبي طك عليج والله ...

جر نفس قوي ورجع تقرب حسيت نفسه بوجهي ...همس بصوت تعبان ..

ادهم : مره كتيلي عمو شنو اسوي وتحبني اني غلطت بحقك بوقتها سكتت لان جنتي متعرفين بمشاعري اتجاهج وغيرتي عليج كرجل شرقي مكدرت اتجاوز حدودي وياج لهذا سكتت اكتفيت اباوعلج وبس بوقتها انقهرتي مني عبالج ماسامحتج على الاساءة البدرت منج بحقي ، بس لو ينعاد بيه الوقت جان كتلج ابقي يمي لتعوفيني راح احبج اكثر وادللج ...

سكت واني هم سكتت بالاحرى سكتت كلوبنا وضلت تبجي على حالنه بقهر طفل تشبث بركبه امه التريد تتركه لوالده يربيه ، وحتى تسكته كلتله روح البس ملابسك وتعال منتظرتك من يروح يلبس ويرجع يلكاها رايحه ،هيج الألم يدك بينه ...

اخر شي سمعته منه قبل لا اغط بالنوم العميق كال..

ادهم : الرجل اذا تركته حبيبته العشقها بجنون
كلبه يشيب ويموت ، يصير عصبي ومن كلشي يتنرفز ، حتى من صوت المي ميل الساعه ، حتى نبض كلبه يزعجه من تهجره حبيبته وتغدر بيه يصير وحيد ويعاني اشد آلآم الغربه لو داير مدايره الف واحد ميسدون مكانها كلشي ثكيل على صدره حتى النفس...

بعدها حسيته رفعني ونيمني على صدره ، كاعد احس بكلشي بس ما اكدر لا افتح عيني ولا ارفع ايدي ولا انطق بكلمه وحده ...

وراها نمت مرتاحه لان بين ايده وبحضنه جان قافل عليه بكل قوته ...

محسيت إلا على المنبه يدك براسي كعدت اريد افتح عيني ما اكدر جفوني ثكيله ...

بديت اتذكر الصار فزيت وكمزت من الجربايه ادور عليه فريت الشقه كلها ماكو اله اي اثر ، لزمت راسي وكمت افرك بركبتي من القهر لا ياربي يعني الصار حلم الكلام السمعته حلم لا لا مستحيل جان يمي اني نمت بحضنه للصبح،،

رحت مثل المخبله اركض على الفراش اشم بيه شميت المخده واللحاف دنكت على الفراش شميته ماكو ريحته ماكو ماكو بس ريحتي ماااااكو ريحته ماكو يعني جنت اتخيل ادهم ما اجاني لا ما اجه ..

كعدت على الجربايه والطم على وجهي وابجي بحركه ..

تعبت كافي بعد ما اتحمل هواي الجاي يصيرلي والله هواي ..

فركت وجهي وكمت غسلت رحت للموبايل طلعت سلبيات التخاطر شنو والصارلي حقيقه لو حلم...

كلبت كلبت طلعته وضليت اقره وخاله ايدي على حلكي..

اضرار التخاطر
يحتاج الإنسان أحيانا التعبير عن مشاعره فيلجأ للتخاطر، لكن كل أمر غير مثبت علمياً أو دينياً له سيئات وأبعاد أخرى، فيصنف البعض التخاطر على أنه جزء لا يتجزّء من السحر والشعوذة.

الابتعاد عن الواقع: قد يمضي الإنسان بعيداً عن الواقع أثناء اتباعه للتخاطر وأحلام اليقظة، ويصبح عاجزاً عن مواجهة الأشخاص ومخاطبتهم وجها لوجه.

التخاطر والشعوذة والعالم الآخر: هناك بعض الآراء تفيد بأن التخاطر هو بوابة الإنسان للضياع في العالم الآخر، واتباعه للمشعوذين الذين يتعاملون مع الجن والشياطين قد يكون سبباً في هلاكه. والعياذ بالله..

كمت اضرب على راسي غبيه غبيه لو صاير بيج شي لو متخبله ناقصه خبال انتي ..

كمت مسطورة سطر وايقنت اني الحسيته والسمعته سببه التخاطر مو حقيقي ...

كمت سويت جاي شربت اريد راسي يتعدل ، وراها خابرت نسرين ..

سيلين : هلو نسرين اكلج نطلع هسه..

نسرين : شبيج مخروعه ساعه عشره..

سيلين : ولج اختنكت اريد اطلع من الشقه فدوة.

نسرين : شنو السالفه انتظري للعصر مابيه اطلع هسه وعندي كومه شغل واليوم رامي يجي على الغده...

جريت نفس طويل..

سيلين : ماشي العصر العصر ...

فتت للحمام سبحت وطلعت علكت التدفئة كعدت كبالها صافنه على الصار البارحه ممعقوله حلم مكاعد اصدك زين والكلام الحجاه بأذني اصلا تعمد يحجي بأذني ويركز على كل كلمه يكولها حتى تنطبع ابالي..

ياربي دخيلك ..

تذكرت شغله وراح اسويها متأكده اذا يراقبني راح يطلع بوجهي لان كلشي يتحمل إلا هذا الشي وهي غيرته عليه..

كمت حضرت احلى ما عندي من الملابس كويتهن وخليتهن على الجربايه وكعدت انتظر شوكت يصير العصر متحمسه العب بأعصابه مثل قبل ، ليش بس هو يلعب بيه خلي هالمرة اعكس الادوار ...

انتظرت كوة مشى الوكت ، كمت لبست بنطرون جينز ازرق وكوت بيج وبدي لونه تركواز ،

خليت مكياج طوخت شويه ، استغربت شكلي يمكن لان صارلي هواي هامله نفسي ،

لفيت الشال بطريقه كلش حلوة رشيت عطر لبست جنطتي والحذاء وطلعت ،

قفلت باب الشقه ونزلت لكيت عمو ابو عبد شافني دار وجها على الجهة الثانيه سلمت عليه ومشيت مجاوبني عرفت بعده ضايج ...

صعدت السياره ونويت انتبه على كلشي يصيرلي ...

مشيت وعيني على المرايا اريد اشوفه اليوم اذا لاحكني راح يبين ، وصلت نص الطريق الوضع جداً طبيعي ماكو شي ، لزمت موبايلي اتصلت على نسرين بلغتها راح اوصل كالت مكمله ماعندي شي وصلت اتصلت عليها فصلته طلعت اشرتلي مبتسمه ، اجتي صعدت صوفرت ..

سيلين : شكو شبيج ولد وتصوفرين..

نسرين : لج شنو هذا الجمال وين جنتي ضامته..

سيلين : يمعوده لا جمال ولا شي مجرد ترتيب..

نسرين : ممم ترتيب لعد شبيه اني صارلي ساعه واكفه كبال المرايا ونفس جهرتي ..

سيلين : لا انتي حلوة بس لان متعود وجهج على المكياج كل يوم لهذا متشوفين فرق..

نسرين : هم صح ، هسه وين نروح..

سيلين : كيفج..

نسرين : نشتري ملابس وبعدين نتعشى..

سيلين : ماشي ...

ظلينه نسولف وصلنه للمكان الأتفقنه عليه ، صفيت السياره بالكراج ورحنا نتمشى ، فرينه كم محل ملابس واشترينه كم قطعه ..

سيلين : اكلج تعبت وباجر ورايه دوام امشي نتعشى ونرجع..

نسرين : مضل بس جنطه حبابه شلون البسهن باجر وماعندي جنطه نفس اللون..

سيلين : نسرين رجلي تكطعت وانتي مكاعد تقتنعين بشي هذا اخر محل اذا مشتريتي نرجع..

نسرين : محلين حبابه موووواه..

ضلت تشمرلي بوسات بالهوى ..

سيلين : يلا امشي امري لله..

رحنا افترينه اربع محلات يلا قنعت باوعت الساعه عبرت التسعه..

سيلين : لج شوفي بيش الساعه..

نسرين : وشنو يعني..

سيلين : شلون شنو يعني ولج اني ما اتأخر وره ساعه ثمانيه تعرفين اني عايشه وحدي واقل تصرف محسوب عليه ..

نسرين : حقج بس هاي اول مره تسويها شنو يعني.

سيلين : لتنسين لبسي ومكياجي يدل على غير شي..

نسرين : قصدج عبالهم متواعده..

سيلين : بالضبط..

نسرين : اووف والله مهتمه للناس زايد...

باوعتلها صفح بنظره معاجبني حجيها درت وجهي..

ورجعنه للسياره خليت الغراض بالجنطه وصعدنه ...

نسرين : يلا للمطعم بسرعه هسه اهلي متعشين..

سيلين : روحي بابا يا مطعم..

نسرين : والنبي ما ارجع اذا ما اتعشى..

سيلين : نسرين وتالي..

نسرين : حبابه بس هالمرة والله شلعتي كلبي ..

هزيت راسي وسقت وصلنه للمطعم صفيت السياره بالكراج ونزلنه ، نسيت سالفه ادهم ونسيت ردت احرك كلبه طار من بالي كلشي خططته بسبب الفره والتعب..

اول ما دخلنه للمطعم تونه كاعدين نختار الاكل بالمنيوا اجه النادل...

_ مرحبا ..

رفعت راسي جاوبته.

سيلين : اهلا بعدنه ما مختارين شي..

_ لا العفو بس سيارتج الحمره...

سيلين : اي سيارتي..

_ بلكت تحركيها لان معارضه سياره زبون ويريد يطلع..

سيلين : بس اني صفيتها بعيد عن السيارات..

_ تفضلي ويايه بلا امر عليج..

كمت مشى ومشيت وراه هو راح واني طلعت بره باوعت سيارتي بمكانها وماكو سياره يمها ..ردت ارجع اجتني رساله على الموبايل..

_ رجعي للبيت بسرعه لو ميصير خير ...

قريتها ابتسمت باوعت منا ومنا عرفته موجود وقريب مني واحترك بغيرته ...

رجعت للمطعم لكيت الاكل واصل كعدت اكلت ورجعت للبيت بس بكلبي فرحه ، كدرت احرك كلبه ههههه..

مر اسبوع وكلشي تمام ماكو شي غريب غير النوم مالتي الموطبيعي بحيث افقد واكعد مسطوره ...

شكيت بالمقويات الأخذها كلت اتركها اليوم واشوف هم هيج انسطر ويغلبني النعاس ، عفتها مشربت لا الصبح ولا بليل ، حسيت نفسي زينه منعست بس السطره براسي بعدها قررت ثاني يوم اخذ علبه الكبسول واروح للصيدلية اسأل ...

ثاني يوم العصر رحت دخلت للصيدلية..

سيلين : مساء الخير ..

_ اهلا مساء النور تفضلي..

سيلين : بلا زحمه هاي المقويات صارلي ٣ اشهر اخذ منها والوضع جدا طبيعي بس اخر فتره تقريبآ صارلي اسبوعين كمت انعس من اخذها ومن انام اغط بنوم عميق افقد..

_ بله شوفيني وينها .

نطيته العلبه فتحها باوع للكبسول ..

_ نفسه شنو المشكله خاف انتي تاخذين مهدئات او منوم لو علاج بيه منوم ..

سيلين : ابد بس هاي المقويات والبارحه واليوم تركتها ما نعست بس مسطور راسي منها ..

_ تمام خليها يمي وباجر ادزها للمختبر يشوفون شنو السالفه ..

سيلين : شوكت اجي ..

_ انطيني رقمج واني ابلغج ..

نطاني ورقه صغيره وقلم كتبت رقمي وطلعت ، ثاني يوم اتصل بيه رحت ...

سيلين : ها دكتور بشر..

_ هذا منين جايبته..

سيلين : اخذته من صيدليه قريبه من دوامي..

_ هذا الكبسول صح يشبه المقويات بس الماده البداخله عباره عن نوع من انواع المهدئات او مسكن الآم بس قوي كلش من تاخذيها تنامين اقل شي اربع ساعات وهذا النوع ماينطي اله بوصفة طبيب وفقط ينطوها للشخص اليعاني الآم قويه بجسمه ...

سيلين : زين شنو تسوي ...

_ تخليج تفقدين وتنامين بعمق ..

سيلين : بس اني مفقدت احس بكلشي بس عيوني ما اكدر افتحها ولا اكدر احرك ايدي..

صفن بوجهي وضيق عينه سأل بتردد..

_ جنتي تتعاطين قبل ؟

سيلين : نعم ..

_ حضرتج جنتي تتعاطين ...

سيلين : مفهمت ..

_ يعني مخدرات او كبسله ..

سيلين : ليش تسأل ..

_لان هذا النوع من الحبوب اذا ياخذها انسان صاحي ينام وكأنما ميت ميحس بأي شي ، بس اذا انسان متعاطي قبل هذا النوع ميأثر بيه مجرد شي قليل نسبه ٣٠ بالمئه يعني يخليج نعسانه وتنامين بس حاسه شلون متفضلتي وشرحتي الحاله..

سيلين : مممم تمام فهمت شكرا ..

_ اهلا وسهلا...

طلعت والف حسبه ابالي تذكرت من همس بأذني وكال سويت شي غصب عني بس ماتحملت اريدج معناها هو غير المقويات بمهدئات ...

يتبع...

متابعه ممتعه ...

https://www.youtube.com/watch?v=HdRvfFaEI7Q