جذبني فمك البني الفصل الثاني 2 - بقلم عبير إدريس

للحب مخالب واسهم وطعنات ، لاتشفى ولا تنسى...

الحب مغامرة جميلة وممتعة ومتعبة في اغلب الاحيان ..
الوقوع بالحب اشبه بمخدر
يهيأ لنا بأن الحياة جميلة
وكل شيء على ما يرام !!!
لم نعلم بأن الحياة تفرق بين المحبين ....

لكني قرأتُ يوما ما عباره كتبها احدهم نفت الكلام السابق تقول :

( في دين العشق لا يجوز الفراق )

صدقتُ وايقنت وجربت هذا العشق ولكن حدث ما لم يكن بالحسبان ...

بقلمي عبير ادريس
____________

الساعة الثانية عشر مساءا
بتوقيت مدينه بغداد

المكان العمل ...

اسمع زميلتي بالعمل تصيح سيلين..التفتت الها حاجيتها وبيدي الاغراض كاعد ارتب بيهن ..

سيلين : هاا نسرين...

نسرين : باعي خابرني رامي راح يجي ياخذني واستأذنت من ابو الشغل ، بس كلي لازم تكملين جرد القوائم واني تأخرت حبابه تكمليهن انتي علمود ابلغه..

سيلين: ماشي جيبي ..

نسرين: حبيبتي مردودة ..

دزتلي بوسه بالهوى ولوحت بيدها ..ابتسمت وخليت القوائم على صفحة ورجعت اكمل شغلي، خلصت ورة ساعة عمل متواصل كعدت على الكرسي وبلشت بالقوائم ، كمت اسجل كل شخص زار المكان واشترى من عدنه وكم مرة خلال هذا الاسبوع ، شنو الغرض من هذا الشي ماعرف بس الاوامر مال مدير الشغل هيج يريد واحنه نشتغل بسكته ممنوع لا اسئلة ولا استفسارات ..

بلشت الاسم المكرر مرتين اشطبة ..

استمريت اشتغل بيهن مده نصف ساعة الى ان وصلت للأسم الأستوقفني بصدمة صرت ارجف خوف ورهبة وحب كلهن بنفس الوقت ..قريت اسمه والله هذا اسمه اسمه الثلاثي...
كصتي عركت اوضاعي تخربطت واني اقره حروف اسمه...

ادهم يوسف عمران ..

خليت ايدي على حلكي مصدومه دموعي تجري بللت الورق ، رجعت اقره يايوم جاي لهنا وبأي وقت ارتبكت اريد اسيطر على رجفة ايدي ما اكدر ، انصدمت هذا الاسبوع ، معقوله يعني صدفه لو ؟؟؟؟؟

عززة اذا يعرف اني اداوم هنا معناها انتهيت خلص راحت عليه ..

كملت جرد الاسماء بسرعة ومشفت اسمه بعد بس مرة .رحت سلمتهن وطلعت امشي سريع وصلت للكراج صعدت بسيارتي وانطلقت للبيت ، وصلت طبكت السياره باب العمارة الساكنه بيها ، بأحد مناطق بغداد ..

نزلت فتحت الباب الخلفي اخذت الصمون
بطبيعتي اشتري وجبه كبيرة كل ٣ ايام حتى ما اضطر انزل كل يوم واشتري وحتى مسواكي اسبوعي ...

صعدت الدرج واني ادور بالجنطة على مفتاح شقتي، لكيته كملت صعود الدرج وصلت باب الشقه توني اريد ادخل المفتاح بالباب حسيت بشي مو طبيعي حركة غريبة ورايه التفتت بسرعه شخص خطف ونزل الدرج بس مشفته منو تقربت من المكان الجان واكف بيه اشتميت عطر بدأ العطر ينتشر بالمكان ، عطر شامتة بكثره ، هو والله هو وكعت الجنطة من ايدي وعلاكة الصمون
وعيوني تفتر تدور عليه
غمضت عيوني بقوه ونصيت اخذت الأغراض من الكاع فتحت الباب وايدي ترتعش دخلت وسديت الباب كمت اتنفس سريع حسيت بلحظه كلبي راح يوكف خليت الصمون بالمطبخ وركضت للحمام كمت انزع ملابسي واشمرها بشكل عشوائي منا ومنا بدون وعي ماعرف شنو دا اسوي من هول الصدمة

دخلت جوه المي وعيوني كامت تجري دموع بحركة ،
اريد المي يطهرني من ذنوبي السويتها ،
شلون اذا طلع هو وشلون اندل بيتي معقولة كل هذه الاشياء الصارت وياية صدفة مستحيل ، احتمال اني متوهمه ،
لا لا شلون هذا عطره هو الوحيد يستعمل هذا العطر وابد ميغيره جان يشتريه من الخارج ويجيب هواي منه ..

كملت سبح لفيت نفسي بالمنشفة وطلعت من الحمام رحت لغرفتي شمرت نفسي على الجرباية وابجي بحركه ، اني شلون غدرته ،

اريد ارجعه اليه بس بيا عين ارجعلة بشنو جازيتة اخ سيلين الغبية ، جان الج سند وظهر هيج سويتي بيه ....

ردت انام مكدرت اعصابي كلها تختض مثل السعفة ، ساعه ابرد اطفي البنكة وساعة احتر ، شبيه اني شبيه ، خربطة مشاعر مو طبيعية، مشى اليوم وخلص بين الخوف والارتباك ،
صار الليل حضرت ملابسي مال ثاني يوم ورحت للمطبخ سويت لفة من اكل البارحه بارد حتى ما حميته ، اكلت بنفس مسدوده ،

كملت غسلت ايدي وفرشت اسناني ورحت مددت بفراشي من التفكير والتعب بسرعه غفيت كعدت الصبح بدلت ورحت للدوام هاي سنه الأخيره بالجامعه ،

وصلت مرحلة ثالثة وتركت بسبب الظروف وهسه رجعت ، دخلت للقاعه كعدت اخر سره دخل الاستاذ بلش يشرح واني بالي مو وياه كل شويه يسرح بمكان ، خلصت المحاضرات وطلعت مشيت بدون وعي الناس كلهم عباره عن خيال مغوش اصوات تروح وتجي ما افرزن شنو يكولون هذا اليبيع وهذا اليصيح تكسي تكسي بس هاي سمعتها ،

وصلت لسيارتي بالكراج ، فتحت الباب صعدت توني شغلت السياره جذب نظري شي عكس لمعته على الجامه جوة عودة الماسحة نزلت من السيارة، باوعت اكو جيس صغير وبداخله ورقة ، فتحته مكتوب ...

( ليش مصبغة اظافرج تعرفيني شكد اكرهة بس للأمانة هذا اللون لايك ويه نعومة ايدج ، بالمناسبة طرف كحلتج سايل اظنج باجية ؟؟؟ )

اقره بالكلام وارجف باوعت يمنه يسره ماكو احد الكراج فارغ بس كم طالب ينعدون على الاصابع ، وينك متكلي ، يعني ليش هيج تسوي بيه لو بيه يواجهني ويخلصني لو يبطل يلعب ويايه ، اعصابي تعبت واني تعبت ...

صعدت للسيارة ضميت الورقه بالجنطة ومشيت ، كل شويه اريد اندعم مراقبني هسه تأكدت شكوكي كلها ، زين من شوكت اه ه ه ه راسي راح ينفجر...

وصلت لمكان عملي صفيت السياره ونزلت بلشت شغل اليوم عدنه جرد قوائم وبالي يسرح واغلط وارجع اعيد ، ضربت راسي حيل انتبهت عليه نسرين اجتي يمي كالت..

نسرين : شبيج سيلي ليش مو على بعضج..

سيلين : لتكولين سيلي اتخبل من هذا اللقب..

نسرين : ماكول يلا سكتت بس كليلي شبيج من اجيتي لسه التوتر يقره الف ..

سيلين : ماكو شي سالفه شاغله بالي ..

نسرين : محتاجه فلوس.

باوعتلها بطرف عيني ..

سيلين : لا عندي خير من الله تسلمين...

سكتت وراحت رجعت اكمل شغلي صارت ساعة ثمانية اليوم دوامي مسائي اني يوم اداوم بالجامعة وشغلي يصير على الشفت المسائي ويوم اغيب واداوم بالشغل الصبح حسب ابو العمل شنو يطلب مني اسوي ما اكدر اكول لا حتى لو عندي امتحان اعوفه لان يبطلني ...كملت شغلي ورجعت للبيت ، طلعت مفتاح شقتي اريد افتح الباب لكيت عباره مكتوبة على الباب بقلم سوفت ،

(حديث الساعه الثانية عشر اله دقيقة ؟؟؟؟))

رجفت التفتت اباوع ورايه وارجع اباوع على الباب صحت ...

سيلين : وينك ادهم وينك اعرف انت هنا ويننننننك اطلع واجهني كافي لعب كافي مليت...

على صوتي طلعت جارتي ام عبد الله صاحت ..

_ خير حبيبه شكو شبيج..

باوعتلها وبجيت كأنما استنجد بيها ، مادام ذكر الساعه والوقت معناها ادهم ميرحمني خلص ضعت اني ضعت ناوي ينتقم اتذكر كل كلمة كالها بذاك اليوم وبهاي الساعة بالضبط كلشي ميروح من بالي كل تفصيلة كل همسة ....

سيلين : خاله فدوه اجي يمج لو ابو عبد موجود..

_ تعاي حبيبتي هله بيج..

نزعت حذائي برجلي بحركه سريعة التفتت منا ومنا وفتت .

_ تفضلي خاله كعدي اجيبلج ماي..

راحت واني مددت على القنفه مكدرت بعد احس روحي راح تطلع نفسي ضاق وحراره تطلع من عيني..

_ هاج شربي اصبلج غده ..

اخذت الكلاص من ايدها واشرت براسي ..

سيلين : هئ ، ماريد..

مددت خليت ايدي على عيني وغمضت ، حسيت بأمان بيت ام عبد ، لهذا غفيت ماعرف شكد مر وقت وكعدتني ..

_ كومي حبيبتي اجه ابو عبد والولد خاف تستحين منهم ..

نزيت وكمت اعدل بملابسي ..

سيلين : اسفه خاله صارلي هواي نايمة..

اشرت براسها اي وحجت..

_ صارت الساعة ١١

سيلين : حييييل هواي ..

كمت اخذت جنطتي وتشكرت منها وطلعت رجعت لشقتي فتحت الباب فتت للمطبخ جبت وصلة بيها مي وزاهي ومسحت العبارة المكتوبة على الباب ، قررت ثاني يوم اغير مكان سكني ، زين ودوامي وشغلي وين الكة شغل ، اوووف شلون بيه شسويت بروحي اني ..

كمت افتر بالشقه اروح واجي مثل المخبلة ، نظفت وكملت شغلي اريد اتعب بلكت ادوخ و انام ،ما اكدر لان نمت صوجي نمت صوجي ، كعدت على القنفه فتحت الشباك وسديت التول طفيت الضوه حتى ما ابين ومددت اريد اشتم هوى اختنكت ، لهناك واجتي كلماتة ابالي ...

عيوني صلفه هي تباوع مو انه ، تصدكين تركض تحضنج قبلي ...

لو يرجع بيه الزمن ماعوفج لغيري شلون تحملت شلون صبرت جنت امووووت كل يوم واتخيلج بحضنه ...

انه شخصيتي هيج شكد ردت امثل اللامبالاة بس ماكدرت ابين الج انه ما مهتم ...

لو اتذكر مره كعدنه واجه عيونه حمر حسيته باجي ترددت اسأله ، مدد على القنفه وطلع باكيت الجكاير هلكد شرب ، تجرأت وسألته شبيك ، من بعد سكوت يقارب ساعه اكثر تنهد وهمس...

ادهم : احب وحده عنيدة مأذيتني حيل بحيث كل ما اسرع خطواتي الها ترجع ليورة وتتركني ارجع اخطوا خطوة ليكدام وترجعني الف خطوه ليورة ، تراوغ ويايه تعبتني ...

كتله..
سيلين : ليش متعترف الها وتنهي هذا العذاب منتبهة عليك صارلك فتره متعذب ...

باوعلي بنضره يتوسلني بيها بس مجنت افسرها هاي حب جان ممبين حبه الي ابد ، تنهد واخذ نفس عميق صدره ارتفع ورجع هبط بصوره عشوائية..

همس بتعب ..

ادهم : اخاف اخسرها ، اخاف منها وعليها ، تدرين انه وياها علاقتنه مثل شنو.

سيلين : مثل شنو .

ادهم : علاقتنه عباره عن طريقين متوازيين كل طريق يودينه لجهة معينه يعني من سابع المستحيلات نلتقي بيوم سوه، هههه بس الحلو بالموضوع ، عاجبني اكون بصفها افضل من ما تلتقي طرقنة بمنطقه مشتركه ونهايتنه كلمن بمكان واحد بعيد عن الثاني...

همست ،

سيلين : شحبيت منها ..

رفع عينه متلهف ، كال بصوت عزف مسامعي هلكد ماجان رقيق ...

ادهم : حبيت كلشي بيها ، حبيتها لدرجه كمت اشوف سترها عورة ، وحجابها فتنه صوتها يخدرني لدرجه الثمالة ..

انعصر كلبي اختنكت كمت سديت الشباك ودخلت سبحت اريد انسى حجيه انسى حبه اطلعه من بالي خلص ادهم مو الي مو الي وحتى اذا يحبني مستحيل يسامحني....

ثاني يوم كعدت مكسره تكسر وراسي يأذيني نوم قليل و بجيت طوال الليل ، كمت من لا جارة غسلت ولبست ملابسي شلون مجان وطلعت حتى كحله مخليت مالي واهس اسوق وبالي بغير عالم وصلت للدوام اخذت محاضرتين لساعه عشره ونص رجعت للشغل لان عدنه بضاعه جديده ورادنه من وقت نجي ، الشفتين ننجمع سوى ونشتغل ....

رجعت للبيت سويت اكل على السريع اكلت لكمه ورحت مددت عظامي تون من الألم تعبت كلش اليوم ، لزمت موبايلي ، عجبني اتصل ب ايفين بلكت هلمرة تجاوبني ، اتصلت يرن وينسد مثل كل مره ، عرفت اختي بعدها حاقده عليه....

رجعت راسي ارتاجيت على ظهر الجربايه وعيني متشخصه بالفراغ الكدامي ، دك تليفوني اخذته باوعت على الشاشه هي مو هي لا مستحيل جاوبت بلهفة ...

سيلين : افونه حبيبتي واخيرا جاوبتيني..

جرت نفس وكالت..

ايفين : سمعيني خابرتج احذرج وبس مو محبه بيج لان السويتيه ما يغتفر ، خلي بالج ادهم رجع وناويلج غير نيه...

غمضت عيني بتعب وتنهدت...

سيلين : اعرف بيه رجع اعرف..

ايفين : شو مرتاحه للوضع معقوله مخايفه منه..

سيلين : خايفه اكيد بس متأكده ميأذيني يلعب على اعصابي وبس..

ايفين : قصدج مثل ما لعبتي بأعصابه وغدرتيه..

سيلين : عفيه عليج يعني وحده بوحده راح تصير..

ايفين : فرحانه يعني ، سمعيني اي شي يصير بيج اني معليه وما اريد حياتج تأثر عليه وياريت متتصلين بعد..

سيلين : ماشي يا اختي تدللين ...

ايفين : راح اروح صاحوني..

سيلين : الله وياج...

يتبع ...