رواية جيت مابيك تحقرني جيت أبيك تعز شاني الفصل الثالث والسبعون 73 - بقلم r010ee

اليوم الثاني
طالعت مصعب اول ماوصلنا البيت كان مره متحمس ...عكس أمس ...وكان محضر لي الغرفة الي تحت تفأجت يوم شفتها ..أول مادخل وهو حامل عادل صديت عنه بزعل حط عادل بسريره وقال : ياهووو للحين زعلانه ماعرفت قلبك كذا حقود دايم اصايل والتسامح مبدأها

صغرت عيوني الخايس كأنه يتريق علي ضحك وقال : عندي لك مفأجاة بتخليك ترضين علي

اعتدلت بجلستي وانا اتمددد بتعب وطنشته
وقف على راسي وقال : دقايق بس وراجع لك وأشر على عادل انتبهي له تمام وحط يده على رقبته بذبحك لو يصير له شيء

ابتسمت بسخريه انهبل ذا ياشينه بس لا حب وياشينه لا كره ...طالعت عادل وابتسمت ماتوقعت يالنتفه أبوك بينهبل فيك كذا ...الله يسخره لنا بس
ويهديه تتمنى تشوفه على طول كذا فرحان و الحقد والانتقام يخليه عنه ....

أشرت لميري تقربه مني ...بس صرخت من الي اشوفه قدامي : يمههههههه
جيت بقوم بس ماقدرت جلست اضحك وابكي مشاعري متلخبطه ...قربت مني وضمتني بقوه
وهي بعد صاحت معي ...وبعد صياح وعناق
وقفت أمها وأخذت عادل وهي تسمي عليه
وتصيح بنفس الوقت
مصعب ابتسم وقال وهو يمسك كتف عمته اللي للحين يحسها خجلانه منه عكسه يحس عمره يعرفها من زمان :أنا اقول اصوله لمين طالعه
تحب الدراما اتاريها ماراحت بعيد .... ‏

اصايل طالعته وهي صدق مبسوطه ماتدري وشلون تشكره على هذي المفاجاة وبعد متسغربه وشلون أخذ على أمها كذا بسرعة ....
أم صايل وهي تبوس عادل : والله يمه دموعي الحين من فرحتي بشوفته وطلعت اصايل الحمدلله يمه ربي طمنش عليش وطالعت مصعب : مبروك يمه وعساه يتربى بعزك

مصعب ابتسم : الله يبارك بعمرك

ام اصايل نزلت نفسها وحطت عادل بمكانه وهي تسمي عليه وقالت : مصعب حابين نطردك شوي ترى اختها منطوف قلبها على شوفتها والحين على اعصابها تنتظر

اصايل بصرخه : شموس معتس بعد
طالعت مصعب برا يالله خلني اشوف أختي

مصعب عض شفته وقال : لا لا ماتوقعت كذا رد الجميل منك ومن بنتك وهز رأسه بتحسف فيه إسلوب ارقى من كذا والله ونزل نفسه وحمل ولده وقال :اشبعووو في بعض

وقفت بوجههه أمها وقالت : وين وين ماخذه

مصعب طالعها ورفع حاجب : اب ولده بيطلعون يتمشون فيها شي ذي بعد

صرخت بصدمه : ايشششش
وطالعت بنتها الي هزت راسها بيأس وقالت : خذي شوي من جنونه انا تعبت

مدت يدها وأخذت الولد منه وهي تقول : وربي الحين صدقتس يمه

مصعب صغر عيونه وقال : عسى بس الي صدقيته كان خيررررر

ام صايل وهي للحين مفزوعه من الي كان بيسويه: لا والله يمك مابه خيررر اعقل يمه والولد مايصير يطلع وهو بذا السن شوفه وشلون لحمه وكل شيء يضره وأنت بتروح تتمشى معه بعد

مصعب طالع اصايل وقال : تمام لحين ماراح اخذ واعطي معاكم عشان أختك ورجلها اللي صارو متحف برا

اصايل ضحكت على تريقته بشمسه وعواد طالعت أمي اللي قالت : وشلون بيعتدل من جنونه وأنتِ تضحكين له ومبسوطه على هباله

عضيت شفتي منحرجه بس صدق صدق ماتوقعت يسوي هالشيء عشانها ...احسن شيء سواه لها من يوم تزوجته ...وبعد السعادة الي تحسها بصوته وحركاته هذي بعد مفرحتها دعت له من قلبها ...
أول ماشافت اختها صرخت بفرحة وهي تقول : ياعمــرررررري

شمسه قربت منها وضمتها
وبعد السلامات ....
شمسه جلست جنبها وقالت وهي تفسخ العبايه
:قسم بالله يوم شفت رسالتس بغيت انجن وحمدت الله ان عواد موجود ...
ابتسمت اصايل وهي فرحانه حدها
طالعت أمها اللي قالت : توجعني بلحالتس يمه

هزت رأسها وهي تمنع دموعها وقالت : الحمدلله يمه ربي سهلها

وقفت وقالت : الحمدلله الله كريم واللحين بروح احضر لتس شيء تأكلينه وتقوين عظمتس بوه

قالت وهي صدق مبسوطه :وربي مابي شيء يمه بس خليتس جنبي على قد الوجع الي شفته بس وربي شوفتكم نستني كل شيء ومسكت يد شمسه
وهي تطالع بطنها : الله يسهل عليتس بس وربي وجع يذبح

شمسه بخوف : يمه قلبي وجعني

قالت أمها وهي ناقده عليها : وشلون تخوفي البنت تسذا وهي توها

اصايل ابتسمت لها وقالت : طيب اسفه خلاص
يا شموس مايعور ابد بس شكت ابره كذا لا شكت سكين لا شكت سكتت يوم امها سكتهاا : وبعدين يعني وطالعت شمسه : ماعليتس يمه منها جبتهن كم والحمدلله ماصار فينا شيء وكله ينتسي يوم تشوفي ضنانتس قدامتس بخيررر
والحين خليني اروح اسوي لتس شيء ورفعت يدها بتهديد اصوله ياولتس تخوفينها

هزت رأسها وهي مبتسمه وهي تحس بسعادة ماهي قادره توصفها .. وقالت :شموس بتجلسون هنا لما أكل الاربعين مالي شغل

شمسه وقفت وحملت عادل : ايه هين أبوي بيرضى الحين

اصايل بقهر : ليه مايرضى أنا تعبانه ومحتاجه وجودكم جنبي وبكلمه وأكيد ماراح يردني

شمسه طالعتها وقالت :والله كان بيجي معانا بس رجوله وجعته هالفتره ومايقدر يمشي عودت خالتي عيت عليه

اصايل بقلق : من ايش توجعه

شمسه :من فتره طاح وتعور وبعدها خلاص صار توجع بستمرار
اصايل بعتب : ليه ماقلتوو لي

شمسه : مانبي نقلقك عليه وسكت شوي وقالت تصدقين أبوي متغير والله معاده مثل أول أبد
وكل مايشوفني يجلس يقول أنا عارف مين اعطيت بناتي ومهما صار منهم تقصير بس رجآل مثل اللي يقول لا تحقدون علي

اصايل نزلت راسي : ايه آخر مره كلمته قالي
لاتزعلين علي ولا تسودين وجهي من رجلتس وتجلسي تعيدي وتزيدي عليه طريقة تزوجي له
رفعت راسها وقالت الله يسامح مصعب حط هالشي براسه وأفتكر أنا الغلطانه

شمسه ابتسمت لها وقالت : ماعليتس الحين من ذا كله ويالله احكي لي وشلون امورتس معاه وبخبث اللي اشوفه غير الكلام اللي وصلني منتس

اصايل ابتسمت وقالت بصدق :وربي للحين ماعرف اشرح حالتنا مع بعض مره كذا ومره كذا

شمسه نزلت راسها وقالت : سامحي مثلي وعيشي حياتس وربي بعدها ارتحت ماجنيت من الحقد إلا التعب

اصايل غمزت لها : يمه يمه اسمعوو بس مين اللي ينصح

شمسه تنهدت :وربي صدق يوم اعطيته فرصه تغير عواد وصار شيء ثاني بس الله لو يفكني من أخته حياة بكون صدق مبسوطه بس الحين الحمدلله
معاده مثل أول معاها وبالاصح هي بس مندسه
بغرفتها مع بنتها بذات يوم صارت خالتي تهاوشها
الحمدلله صرت منفكه منها

بعد اسبوعين
( الجنوب )

رجع البيت وهو تعبان حده ...من امس مقد نام
أول ماشاف أمه قدامه ابتسم لها وقرب منها وسلم فوق رأسها مسك يدها وقال : عساش اليوم احسن

هزت رأسها وقالت : الحمدلله يمه احسن وناولته فنجان القهوة

ياسر أخذه منها و طالع نور وقال :روحي جيبي جهاز الضغط وطالع أمه الي بتعترض بقيسه لش عشان بطمن يمه شاف وجها مخطوف عقد حواجبه
طالع وين ماتطالع شاف ابوه داخل والشر بعيونه
لا لا أبد ماهو وقته والله ماهو ناقص يسمع كلمه تغثه بهالوقت ..بس الحمدلله جاء ورد السلام وجلس مقابل التلفاز
وحطه على قناة الأخبار ..تنهد براحه وطالع نور يوم قالت : تفضل أخذه منها وبدا يقيس لأمه وحصله مرتفع عض شفته وقال ليه يمه كذا صغطش وش قايل لش تريحين نفسش سكت يوم قال أبوه
: وشلون تبيه ينزل وهذي سواتك يالفاهي

قفل عيونه بصبر وتعوذ من إبليس وأخذ الجهاز وقف وقال : ماعليش إلا العافية
واتجهه لغرفته بس وقف يوم قال أبوه شلون عندك قلب تخلي الي باقي على ذمتك ببيت رجال غريب عليها وبعد اليوم واصل ولده وتعرف مين ولده ومصايبه وفعايله الي تسود الوجهه وبحده اكثر قلت لك مانت قادر تلم الي ماتسىمى وتقلعها بقدر أنا ولا تفضحنا أكثر وقتها والله ماراح ارحم فيكم أحد وسكوتي اللحين مقدر حالة أمك بس

بغى ينجن يوم دري بجود ولد خاله طالع أمه الي نزلت رأسها بسرعة طلع واتجههه لبيت خاله...مستحيل يخيلها معاه بنفس البيت .أول ماوصل نزل ودخل شاف خاله جالس ببيت الشعر يتقهوى قرب منه وسلم عليه
وبعدها سأله ان شاءالله أبوه هدي عن موضوعه
وقف وقال : الله كريم ..ياخال اتجهه للصاله وصيح على عمته طلعت وطلعت وراها شدن عقد حواجبه
وهو يشوف وشلون متغيره بوجودها مع عمته وزنها اللي خسرته وجهااا الي بهت بالفترة الي راحت يحس الحين الحياة رجعت لها أجل وشلون لو تفارقها وش يصير فيها ...أكيد بترجع تتعب ..بس مدة بسيطة قضتها معاها تغيرت والراحه بانت عليها .....
سلم على عمته الي صيح عليها خاله تذمرت وهي تقول : هالرجال أبد مايهجد من طلباته وطلعت

طالعها وقال : وشلونش

هزت رأسها : بخير سكتت شوي وقالت جاي تخبرني بموعد السفر

تنهد بوجع وقال :أمر الله ياشدن

عضت شفتها وقالت بأخر محاولة : طيب لو كلمت خالي مبارك بنفسي يمكن يوافق ومسكت يده مقدر اروح مكان ماعرف أحد فيه ومقدر اخلي أمي
والله لو خايف أني بضايقك وانكد عليك بحياتك
اوعدك ماتحس بوجودي والله وحتى لو تزوجت أمل والله ماازعل ولا أفتح فمي بس تكفى خليني جنب أمي مقدر اعيش دونها ياسر

ياسر شد على يدها وهو يتذكر كلام أبوه من شوي
قال بحزن عليها :لو ينفع الكلام مع أبوي كان بنفسي خليتش تكلميه بس اوثقي فيني للأخر صدقيني ماراح أخليش إلا لما اطمن عليش وأشوف وضعش وشلون هناك وتأكدي يوم أني بسفرش لأمش ماهو خايف عشان تضايقيني او من هالكلام اللي توش قلتيه لااااا بس والله خوف عليش من اللي بيصير لش ....

شدن سحبت يدها منه وهي ماهي قادرة تتقبل انها تروح مكان ماتعرف فيه شيء وأهل ماعمرها شافتهم قالت بقهر : لو صار فيني شيء ماراح اسامح أبوك ولا بسامحك أنت بتصرفني عشان تأخذ أمل الخاينه قولها وبس ....

ياسر عض شفته وقال : شدن قولي لي ايش بيدي وماسويته وأمل هذي والله مادريت عنها ومايهمني إلا أمي وعارف وشلون صحتها وهالسبب هوو اللي غير كل حساباتي

نوفه دخلت وسمعه أخر شيء قاله قالت وهي معصبه من كلامه: الحين بتحاول تقنعني ان ماعندك غير هالحل ومسكت شدن وضمته بنتي ماراح تسافر فاهم ماراح تسافر ...

قاطعها بقهر يوم باقي مستمره تحمله كل شيء : ياعمه لا تقولي شيء وأنتِ عارفه وضعي وشلون قايل مع أهلي وضع أمي ولو طلقتها وخليتها عندش بعد ماراح يسكت أبوي وعارفة وشلون المشاكل بتكبر وبعد لاتنسي ولد رجلش بالبيت وهو عزابي صعب جلوس شدن هنا الناس بتأكل وجهينا وأبوي من غير مايحتاج تشويش ...ورفع حاجب وقال بدقه :ولا لو ماتزوجتي كان الحل بيدش سكت يوم شافها نزلت راسها وماقدرت ترد عليه وقف وقال :خلاص انا اشوف سفرها أفضل شيء وطالعها بحزن ماوده والله بس خايف عليها من أبوه وبعد خايف على أمه صحتها أبد ماتطمن ولا هي حمل أخذ وشد مع أبوه ومشاكله ولو صار فيها شيء بيعيش طول عمره ماراح يسامح نفسه

شدن طالعت ياسر يوم وقف وقال كلامه الآخير حست حتى هو يبي الفكه منها تحس كلامه تغيررر حيل عن قبل قالت بسرعة : يمه أنا بسافر وطالعته متى موعد السفر

نوفه صرخت بقهر : بنتي ماراح تسافر وبطلق وبرجع أخذهاعندي ويالله فارق مالك شيء عندي وروح تزوج وخلي أبوك يرضى عنك ويبعد عنا

ياسر فتح عينه بصدمه :عمه صاحيه على هذا الكلام وش تتطلقي يعني ابوي بيخليش تسوين هالشيء ولا الموضوع سهل على قولش اروح اتزوج وأبوي بيخليش مع شدن حرمش من أختش وهي من دمش مابالش بوضع شدن وبذات لو فعلاً طلبتي الطلاق وصار والله وقتها لا يحط عليها أكثر
وبتزيد المشاكل

شدن صرخت بقهر : خلاصصصص بسافر وبيرتاح أبوك
وطالعت أمها ماراح اخليش تتطلقي سبتي وأنا اللي بسافر خلاص يمه واعرفي اني مسامحتش جت نوفه بتتكلم بس قاطعتها شدن :
واوعدش بزورش ورجعت طالعت ياسر وقالت : متى حجزت

ياسر نزل رأسه وقال : بعد يومين ويالله عشان يمديش ترتبي اغراضش

شدن ضمت أمها الي تصيح وقالت : لااااا بجلس مع امي الليله
ياسر بعتراض : لااااااا وبحده يالله
وطالع عمته الي بتتكلم بس قال بسرعة : عارفه اني ماراح ارضى بوجودها بنفس البيت الي فيه ولد خالي لا تحرجيني أكثر وطالع شدن يالله

نوفه نزلت رأسها وصاحت بقلة حيله
ماتبيها تفارقها أبد ...ضمتها وهمست لها : يمه الحين روحي مع رجلش وانا اشوف ابو سعود واجي الليله ابيت عندش بالشقه

هزت رأسها ...تحس عمرها ثقيله صايره وفعلاً
سفرها وابتعادها عنهم أفضل شيء قالت :لاتعبي نفسش خليش مع رجلش تعبان وصعب تخلينه بلحاله وأنا بجي اودعش قبل اروح المطار وراحت غرفتها وأخذت عباتها وسلمت على أمها الي تصيح وطلعت ...أول ماطلعت
شافت سعود بوجهاااا طالعت ياسر يوم همس بسبه قويه وطنشه ماسلم عليه بس هذاك وقف وقال بستفزاز :وشلونك ياولد العمه

ياسر تعوذ من إبليس وطالعه : اهلين
ومسك يد شدن وجا بيطلع بس
قفل عيونه وهو يسمعه يقول : قالوووو تزوجت الثانيه وبعد الثالثه بالطريق ماشاءالله طالع علي بهذي تطفش بسرعة بس انصحك لا تكدس عليك الحريم طلق وبعدها فكر اخطب لا تجيب وحده فوق راس وحده وجع راس أسال مجرب وأخوك مجرب الله ياخذهن مايجي وراهن إلا وجع الراس
وأشر على راسه شوف قرعت منهن

ياسر عض شفته بقهر من سخافته ..ومن عدم احترامه ان شدن معاه ويقول هالكلام ...

شدن شد على يدي وهمس لي : يالله
حسيت برعب فعلاً الحين عرفت ليه
ياسر متوتر وحالته حاله من وقت مادري بوجود هذا بالبيت ..فعلاً وقح ومايقدر وجودي مع ياسر
أنا الحين الي مستحيل اجلس هنا بعد ماسمعت كلامه ....

نوفه صاحت بقهر وهي تتحسب على أخوها
صح مقهورة من كلام ياسر وتحسه استعجل بالسفر بس عارفه انه على حق
وجود شدن هنا بيتعبها ويوجعها... واخوها ماراح يخليها بحالها ...وبعد لو سكنت معاها مع وجود ولد رجلها الناس بتأكلها تحس بندم ليتها ماستعجلت بالزواج ...بس رجعت استغفرت ربها زوجها ماقصر معاها واقف بصفها وبصف شدن بس من وقت مادري برجوع ولده من برا وهو متوتر ويلمح بكلام كأنه يقول صعب وجودهم مع بعض بنفس البيت وبعد هوو ماهو محرم عليها عشان تسكن معاهم ...وهي عارفه .. ‏أخلاق ولده و تدري بعد بالمشاكل القديمه الي بينه وبين ياسر أفضل شيء سفرها مثل ماقال ياسر والله يسخر لها أمها حست بقلبها وجعها وضربت على صدرها بحرقه أنا أمها ...... آه شدن ليتني ماستعجلت وضيعتش كذا .... والحين لو طلبت الطلاق أخوي بيرد اللوم عليش أكثر وأكثر وعلى قول ياسر بضرش كذا
أكثر من اللي أنتِ عليه الحين
....
@
@
@
أول ماوقف السيارة نزل وبسرعة ركب معاه رد السلام
سفهه وعلى طول مد يده من غير مايلتفت له .وعلى وجهه ابتسامة انتصار

انقهر يوم سفهه بس مسك نفسه عشان يقدر ينتقم منهم هوو بعد بسبب اللي سواه معاه هز راسه وقال : لا ماراح اعطيك كذا

طالعه وقال :المطلوب

رفع يده وقال : للمرة الثانية يامصعب اخدمك وانقذك ياليت تعرف هالمعروف لأني محتاج ترده لي بس ماهو الحين بالوقت المناسب

مصعب عقد حواجبه وقال : ماذكر به مره أول
عشان يكون هذا الثاني

بندر رفع حاجب وقال : أسال خويك عادل يخبرك
بالأول .... اما الثاني ماظن راح تنساه ومد يده بالسيدي ونزل بسرعة

طالع السيدي بيده وهو يفكر بكلامة وش علاقة عادل ...فكر يدق عليه ...بس غير رأيه تذكر رسالته
اللي أرسلها له ( مبروك عليك عادل وتراني وفي بعد بس الله يكرم ) وقتها فهم مقصده انه هووباقي على وعده وبيسمي ولد عليه ..ضرب الدركسون وقال بقهر مابيك توفي بذي أبيك كان توفي بالشي اللي كان بينا بس مع الآسف .....
اتجههه للشركة ...وهو اليوم ناوي عليها بس ينتهي
من العزيمه ...اللي مسويها ...اليوم أول ماوصل نزل ودخل الشركة حصل عزيز بستقباله قال وهو مبسوط : بشر الموظفين فيه ‏مكافأة لهم
ابتسم يوم قرب منه يخم فيه ضحك على هباله
ودخل مكتبه حصل أبوه عقد حواجبه مستغرب
وقف وقال : أنتظرك من أول

: ايش فيه

أبو مصعب قرب منه وضمه وقال : وربي رافع راسي
فيك

مصعب ابتسم ببرود وطالع أبوه يوم ابعده شوي ومسكه من كتوفه وقال : عروض تجيني ماكانت تنعرض على الشركة خليتها تقوم وأنا كنت مفتكر اني بعلن إفلاسي فرحان فيك يامصعب ورجع ضمه
وبعدها قال بغصه :ليت تعرف شيء واحد بس
انك اغلى شيء عندي مهمها صار بيناااااا وابتعد عنه وطلع ...

مصعب انصدم من حالة أبوه ماتوقع يسمع منه ذا الكلام اللي بينهم كان على طول شد وعناد طالعه وهو معطيه ظهره جلس على الكرسي وقال بهمس : بتغليني أكثر اليوم يوم تعرف حقيقة اللي مخليها في الأوله