حب عصبي 💜 الفصل الثالث عشر 13 - بقلم ميني

بعد مرور اسبوع احمد تقرب من ميس هلبا وحبها لدرجه لاتوصف ميقدرش ينحي عيونه من علاها لحظه حتى لما يبدا في العمل يخلق في اعذار باش يكلمها لانه يبي يسمع صوتها بس لاكن ميس مزال تتحشم منه هلبا مرات حتى يكلمها تبدا تشبح لوطا او لجيهة تانيه خاصة لما يقول نحبك او هكي هيا تتوتر
الصبح احمد ناض خش بيدير روتينه لانه بيمشي الخدمه
ميس ..نزلت غسلت وجهها في الحمام التاني وخشت للمطبخ بدت توتي في الفطور
وحطاته على الطاولة بعد شويه نزل احمد لابس سوريه سوده مشحطه وسروال اسود وساعه فخمه كان طالع يهبللل
شبحتله نازل من الدروج نزلت عيونها للطاولة لانها كانت متحشمه تشبحله
احمد..ابتسم للحركة ميس وجى للطاولة جبد كرسي ..اوووو امتى درتيه هادا كله
ميس..توا
احمد..فالحه مرتي
ميس..ابتسمت وقعمزة ع الكرسي اللي على يمين احمد
وبدو يفطرو
احمد..جلال يبي يحدد العرس بعد شهر
ميس..متلحقش شهد توتي روحها
احمد..لالا تلحق شهر بكبرة شن تبي تاني
ميس..سبحان الله زي واحد نعرفه يحب كل شي مستعجل تقول يجرو وراه
احمد..اوباااا طلع عندها لسان وتلقح
ميس..تضحك مش تلقيح هادي حقيقه
احمد..تو انى استنيتك لعند تميتي السنه وبعدها قربب شهرين حتى هوا وهادا كله طلعت مستعجل
ميس.. ولما حددنا العرس كم عطيتنا مده
احمد.. تلااااته اياام بطولهم
ميس..تلاته ايام يسدو بنت توتي روحها ؟
احمد..قرصها من خدها وباسها بوسة طفوليه ..يسدو مرتي
ميس..حطت ايدها على خدها وشبحت لصونيه قدامها
احمد..ابتسم ..هي حبي انى طالع
ميس..ناضت وقفت معاه ومشو للباب
احمد..يلبس في سبيدروه وميس واقفا قدامه ناض احمد وفتح الباب ميس دارتله بااي بإيدها وخشت
احمد..بادلها نفس الشي
مشى احمد وميس بدت الضم في الحوش وترتب رن تليفونها
ميس..الو
نسرين ..ايواميوستي ليك وحشه بصغارها
ميس..حتى انتي
نسرين..شني تنسينا هكي ولاااا احمد خدالك عقلك
ميس..هههه تحشمي يابارده
نسرين..نتحشم شني امتعك صحبتي والله غير قوليلي قوليلي شني جوكم مع بعض
ميس..ابتسمت بروحها وقعدة سرحانه
نسرين.. الووووو وينك
ميس..اه قعدة خيرك
نسرين..قتبك شن جوكم مع بعض
ميس..الحمد الله كويسين
نسرين..ووووو معاش تدوي زي حناي خيرك
ميس..ههههه شن تبيني نقولك
نسرين..اعطيني تفاصيل
ميس..اممممم اعترفلي
نسرين..بشني
ميس..انا يحبني
نسرين..الله اكبر هههههه امتى
ميس..من اسبوع
نسرين..باهي شني نوتي هدية البيبي
ميس..ضحكت
نسرين..نعرفها الضحكة هادي صحبتي السايعه
ميس..ههههه
ودار الحديث بيناتهم لفترة
بعدين كملت ميس ضمان و طيبة الغدى وخشت دارها خدة دوش ع السريع لبسة

وشعرها مفتوح لاكن القدامي قايماته زي الكعكة صغيرونه ولمسات مكياج بسيطه وبخت من العطر امتعها ونزلت توتي في الطاولة للغدى
خش احمد وكانت ميس عاطية بظهر
احمد ..حضنها ويشم في ريحتها
ميس..انخلعت
احمد.. طالعة بلقفطان صاااروووخ
ميس..احمد تعالى قعمز باش نحطلك الغدى
احمد..تعرفي علاش مخليتكش تبخي الصنه هادي هاداكا اليوم
ميس..لالا
احمد..لان الصنه هادي خاصه بيا انى بس ممنوع يشمها اي حد تاني غيري حتى يجونا للحوش متبخيهاش باهي
ميس..امباه
احمد..لفها ليه متبيش تقوليلي حاجه
ميس..لالاحاجه زي شني
احمد..مش عارف اي حاجه هكي تبي تقوليهالي
ميس لا مصارش شي جديد مكلمنيش حد غير صحبتي لا امعتقدش في شي
احمد..استسلم لانها عبيطه هلبا (لانه هوا كان قصده تقوله نحبك لانها مقالتش صح هوا اعترف لاكن هيا لا )
احمد..ضحك على جنب ..في حد قالك انك بريئة هلبا
ميس..ابتسمت شكرا
احمد..بري حطي الغدى هي
ميس..حاضر ومشت
ركب احمد بدل حوايجه وتغدو مع بعض
قعمز احمد وفتح تليفونه وقدامه الاوراق امتع الخدمه
ميس ..احمد
احمد..هممم
ميس..عادي ترفعني حوشنا
احمد..اما حوشنا
ميس..حوشنا حوش ماما وبابا
احمد..ناض وقف
ميس..تحسابه عصب
احمد ..علاش
ميس وقفت..ااههكي استحشته معاش مشيتله بكل
احمد..يشبحلها ..باهي البسي هي
ميس..تبصر
احمد..لا منبصرش
ميس..قربت حضناته بعفوية من الفرحه ..شكرا ..وطلقاته وخشت تلبس
احمد.. والله متزوج طفله باهي
بعد شويه ميس نزلت ..انى واتيه
احمد.. باهي اطلعي هي طلعت ميس وراها سكر الباب وطلع
ميس: الفرحة مش عاطيتها لي حد
أحمد.. فتحلها أغنية( مكتوبة ليك، اليسا)
ميس.. توسعو عيونها وابتسمت
احمد..غني معاها
ميس..لالا
احمد..علاش لا
ميس..نزلت عيونها
احمد..مش قتلك معاش تتحشمي مني
ميس..تشبح قدامها بدون صوت
احمد..عقد حواجبه وعصب لان فيةعقله هوا ميس مزال مش متقبلاته
ميس شافتله لقاته يشبح لطريق قدامه والغضب في عيونه
ميس احمد
احمد..نعم
ميس..عاودها من الاول الاغنيه
فتح احمد التليفون ورجع الاغنية للبدايه
بدت ميس تغني معاها
ميس..مكتوبة ليك اني انا للي تعيش لاها
مكتوبه علاسمك حياتي كلاها
اول مائلت بحبك كانت ليا انا
من تستاهلها غيري او تتئلها
قول بائا ياحبيبي حبيبي
لمين انا لو مش ليك
قول بائا ياحبيبي حبيبي
ححب ف مين غير فيك
طب دا انا ايامي احلامي وحياتي واقف عليك
ميس..خلاص ساد
احمد..لا مش ساد
ميس..هههههه شوف هادي اول مرة في حياتي نغني قدام حد
احمد..وهادا المطلوب قدامي انى بس
ميس..لانك زعلت مني
احمد..ويهمك نزعل
ميس..اي اكيدة يهمني زعل راجلي
احمد..هههههههه حلوة راجلي
ميس..اممم باهي وحبيبي
احمد..شد فرينو قوي ..لا حبيبي هكي بنولو للحوش
ميس..ههههههه لا بالله
احمد..باهي عاوداها
ميس..راجلي وحبيبي وقلبي وعمري وروحي وكللللل شي حلو حتى لو كان عصبي هلبا لاكن عادي نحبه
احمد ..خليها ايجابيات بس علاش تدكري في السلبيات
ميس..اممم ماهو خلاص انتا مش عصبي معاي مع الناس التانيه بس
احمد..وانتي هكي انانيه
ميس..على راجلي اي انانيه وهلباا
احمد..لا انتي مش ناويه على خير
ميس..احمد
احمد..مش احمد انى
ميس..املا مني
احمد ..حبيبك
ميس..حبيبي السياره تبيب علينا
احمد..ااااه اي سامحنا خويييي ومشى بسيارة
ميس..تضحك
احمد..شد يدها وبدى يبوس فاها باستمرار ويتكلم في نفس الوقت..تعرفي قداش ليا خاطري نسمعها
ميس..ضحكت اسفه لاكن لازم نعدبك شوية
احمد..ياشريرة
ميس..😂
بعد شوية
احمد..انزلي وصلنا
ميس..شبحت للحوش على طول تغيرو ملامحها
احمد..ميس
ميس..همم وهيا تشبح للحوش بعيون حزينه
احمد..لفلها وجها بإيده ..خليك قوية كل شي يديره ربي لحكمه
ميس..استحشتهم
احمد..ادعيلهم برحمه
ميس..اللي يرحمهم برحمته الواسعة
احمد..تو ننزلو مع بعض ومنبيش دموع
ميس..هزة راسها بلايجاب
نزل احمد وميس شدها من ايدها وخشو مع بعض احمد خدى منها المفتاح وفتح الباب وخشو داخل
احمد..يشبح لتفاصيل الحوش كان حوش بسيط ومتواضع مرتب
ميس..تدكر في كل تفصيل صغير عاشاته مع عيلتها من صغرها كل الشريط فات من قدامها
شدة احمد .. انى هنى تربيت وعشت احلى ايام عمري
احمد..قربها من حضنه اكتر بدون ما يتكلم
ميس..تعالى شوف داري
احمد..مشى معاها
دخلاته الدار كانت دار طفوليه لونها وردي ميس اول ماخشت للدار قعمزت على سريرها وبدت تشوف لكل شبر فاها
ميس..داري حلوة ولا
احمد..زي صاحبتها
........
شهد خشت لدارها وردت على الرقم الغريب اللي يتصل باها
شهد..ألو
المتصل.. الو
شهد..قامتةالتليفون من ودنها فاتحه عيونها وردت التليفون ..ككيف الحال جلال
جلال..بخير وانتي
شهد..انى الحمد الله
جلال..استاحستك
شهد..بلعت ريقها ..أأه كيف حال عمتي فاطمه
جلال..الحمد الله
شهد..دوم ان شاء الله
جلال..شهد خيرك متوترة
شهد..لالا مش متوترة
جلال..خايفه من احمد
شهد..تبي الحق اي
جلال..باهي ساهلة احمد يعرف
شهد..حى انتا قتله
جلال..اي قتله اختك بعد شهر بتولي مرتي ومنعرفش الا اسمها
شهد..شهر شني
جلال..العرس بنحددوه بعد شهر
شهد..شويه شهر
جلال..لالا مش شويه شدي الهمه نبيك تجي لحوشك بسرعه
شهد........
جلال..تكلمت مع خوك قال معنداش مشكله (خدى نفس) شهد انى نحبك من انتي صغيرة معمريش حطيت وحدة في بالي غيرك شهر سادك ونتزوجو
شهد........
جلال..خيرك ساكته شن قلتي شن رايك موافقه
شهد..اوكى مدام تبي هكي على راحتك
جلال..اووووبااا على راحتك ومدام تبي هكي شكلك مش حتعبيني بكل
شهد..وعلاش انتعبك وانى نحبك
جلال..انتي شني؟
شهد..هههههه
جلال..غير استني انتي شني عاوداها نبي نسمعها كويس
شهد..نحبك انى نحبك وهلباا مش شوية
جلال مصدوم في الجرئة امتعها ..خلاص معناها سبوعين ساد بلاش منه الشهر
شهد..لااااا جلال بالله عليك
جلال..اول مرة نحب اسمي هكي
شهد..باهي جلْلّولي هكي تحبه اكتر
جلال..فرخه فكيني شرك اه
شهد..باهي انى فرخه ولا
جلال..ااااااه فكينا عاد خليني ندوي معاك بمزاجي منبداش نفرز في الكلام اللي في قلبي بنقوله
شهد..قصدك في قلبك انى فرخه
جلال..اي فرختي شني عندك مانع
شهد..باهي يا بيبي
جلال.. منحبهاش الكلمه هادي راجل طول بعرض قوليلي بيبي
شهد..والله فكنا عاااد خليني ندوي زي مايعجبني منبداش نفرز في الكلام بنقول اللي في قلبي ههه قولي من قائل هده العبارة
جلال..يعني انتي بترداها
شهد..بزبط
جلال..باهي خودي راحتك في الشهر هادا وتو نتلاقو ونوريك
كملو هدرزة وبرادة مع بعض فترة وسكرو
شهد مستغربه في روحها كيف تكلمت معاه بطلاقه ولا كإن اول مرة يتكلمو في التليفون ممكن السبب انها تحبه من سنين ومتمنية هادي اللحظه لحظة ان جلال بدى خطيبها خلاص ومن حقها تكلمه وعرسها بعد سبوع هادا كله كان زي الحلم بنسبه لاها
جلال طول ماهوا يدوي معاها الكلام يطلع من قلبه مش متحكم في شي كل ملامح وجهه يضحكو صوتها كان احلى شي سمعه في حياته كان يسكر موضوع يفتح موضوع المهم انه يهدرز معاها ويسمع في كلامها وضحكتها مبالك لو تزوجها وصارت حلاله
.....
ميس كملت الدور بأحمد في الحوش وتحكيله على حياتها كيف كانت
احمد..كان يشوف لعيون ميس اللي يلمعو لما تحكي على امها وبوها حس انه ظلمها هلبالما كانت عندهم أنبه ضميره على كل لحظه عصب فاها علاها او سمعها فاها كلام صح مش بإيده لاكن حبه كان عامي على عيونه كان ميبيش يغلط ويحبها في نفس الوقت ميبيش يخسرها كان في حالة صراع قوي بين قلبه وعقله من اعنف الصراعات الممكن يواجهها الانسان لاكن قلبه فاز وبجداره في هادي اللحظه بتحديد رجع الشريط قدامه تصرفات حبيبته الاولى (هاجر)كان همها في الحياة الفلوس اللبس والماركات كانت تركز هلبا على حاجات في نظره تافهه كانت انسانه متشبعه بحب المظاهر (اسوء انواع الناس حب المظاهر ) كان همها كله يشوفوها صاحباتها بسيارة فخمه وفي محل غالي وماركه على عكس ميس اللي ابدا معمرهاش ركزة على شي زي هادا مكانش همها ابدا لبس ولا سيارة ولا غيره روحها طفوليه تحب الامل رغم كل معاملة احمد السيئه يلي عاملها باها لاكن سامحاته وحباته ونست كل شي عكس هاجر اللي كان شايلها على كفوف الراحه لاكن غدرت بيه والغدر مش ساهل خاصة من اقرب الناس ليك
(هادا الفرق بين الناس ركزو كويس ومتغلطوش💜)
نرجعو للواقع
احمد..هيا ميس نروحو الدنيا مغرب
ميس..حاضر هي
لبسة عبايتها وجت لأحمد ..انى واتيه شافت للحوش بحزن
احمد..متشبحيش هكي كإنك معاش بتجي مرة تانيه امتى ماتبي نجيبك
ميس..حضناته ربي ميحرمنيش منك إن شاء الله
احمد..حضنها بقوه هيا نطلعو بنروحو
طلعو مع بعض روحو لحوشهم
تاني يوم على سفرة الغدى
ميس..احمد
احمد..تؤ شن قلنا على اسمي
ميس..قصدي حبيبي
احمد..عيون حبيبك
ميس.. كلمتني شهد تبيك ترفعها تشري اللي ناقصها لان معاش وقت على عرسها
احمد..وخيرها مكلمتنيش
ميس..مرات متحشمه منك ولا خايفه
احمد بصوته الغليظ ..شني انى نخوف
ميس..اي بدات لما تدير نبرت صوتك هكي
احمد..انتي تخافي مني
ميس..مرات لما تعصب نخاف منك
احمد..علاش تخافي انى مهما عصبت مش حنديرلك شي بعدين انتي معاش تعصبيني باش منخوفكش
ميس..اصلا عادي نحبك حتى لو عصبت عليا
احمد..باس ايدها ..ملقيتش حد يفهمني غيرك والله نحبك والله
ميس..ضغطت على ايده وابتسمت ..واجبي هادا انتا راجلي وحبيبي وفي النهايه مليناش غير بعض
استمرو في الاكل شويه بعدين جت بتنوض شدها احمد
احمد..وين ماشيه
ميس..الحمد الله بنوض للمطبخ
احمد..خليك مقعمزة لعند انتم انى ماكله بعدين نوضي المطبخ يستنى مش حيهرب
ميس..ماهو بنظم
احمد..وانى بناكل
ميس..باهي حاضر وقعدة مقعمزة قدامه شاده الكاشيك تحرك فيه في الصونيه وأحمد ياكل ويشبحلها مباشرة هكي عيني عينك
كملو وناضت ميس ضمت المطبخ وكل شي وأحمد كالعادة يخدم على ورق
مرالشهر
نحكيلكم شن صار فيه
بنسبه لاحمد وميس هادم بدو مكملين لبعض احمد ميقدرش منغيرها لحظه كان لاقي فاها الحنان اللي ملقاشي غير عند امه واهتمامه باها يزيد يوم عن يوم كإنه يتأسفلها على كل شي داره كان ميعشها اكتر من اميرة حتى لو غلطت او قالت شي ميعجباش صح يعصب لاكن مش زي قبل كان شبه متحكم في عصبيته ويطبع يفرغ اعصابه في الشارع ويهدا بعدين يخش معمراش قرب ومد يده علاها ، ميس حتى خيا حبة ميس بشكل هيا مكانتش متوقعاته لقت فيه حنان الاب يلي فقداته وسند الاخ يلي هيا اصلا معاشاتاش وحب وغيرة الزوج والحبيب (ركزو الحبيب تجي بعد الزوج والعكس غير صحيح يعني تتزوجيه تحبيه لان العكس غالبا يفشل الا في حالات نادرة ومع فائق احترامي للناجحين) ورغم اهتمامها بزوجها وحوشها مفارقتش شهد كانتزمعاها خطوة بخطوة
ونجولشهد ،شهد كانت غارقه في المحلات والشري شي بتوصيل وشي تمشي هيا المهم كانت تجري من مكان لمكان وهادا كله من عمايل جلال
جلال، يلي كان يستنى في موعد عرسه بفااارغ الصبر كان معاها خطوة بخطوة مكالمات كل يوم وحتى لما تمشي للمحلات يدرس من بعيد ويبدا يشوف فاها كيف تشري وتوتي لعرسهم
وداد وعثمان حلهم تحقق ميس تزوجت من احمد وهما توا في قنت سعادتهم يعني عصفورين بحجر وشهد خلاص بتمشي لحوش راجلها يعني هما توا حيرتاحو عليهم وحتى ولو لقدر الله صارلهم شي معاش يهمهم لان كل حد خدى المكان الصحيح ليه
موعد العرس
يوم السهريه
كانت شهد الدور وتشوف شن ناقص
ميس..شهد تعالي قعمزي مشفتش عروسه من قبل هكي الدير
شهد..منقدرش لازم نشوف بلكس تنقص حاجه ولا حاجه
ميس..اهو انى موجودة كوني هانيه
خشت شهد قعمزة جنب الناس وميس شدة مكانها من كان لمكان ودايره بالها من كل تفصيل صغير في الخيمه وداخل طبعا مننسوش ميس شن لابسه

ميس ..متنسوش الناس اللي في الدار اوكى وو هنى في تلاته نساوين كبار مقعمزين
الوقافه ..حاضر مدام متخافيش كل شي حيكون مزبوط
ميس..تسلمي يارب.. تليفونها رن
ميس..الو احمد
احمد..الو تعالي جنب الباب التلاني نبيك
ميس ..تمام جايه هي وطلعت جري
وقفت جنب الباب وتستنى فيه
فجئة في حد جبدها من ايدها وسكرلها فمها
وقفها ع الحيط وشدها بإيديه
ميس..تشبح بصدمه
احمد..خيرك مخلوعه هادا انى
ميس..هدت
احمد..نحى ايده ويمرر فاها على شعرها ..تعرفي قداش طالعه حلوة
ميس..عيونها في عيونه ..ءااحمد يشوفنا حد عيب
احمد..مرتي يلي بيشوف خلي يشوف
ميس..ابتسمت ابتسامتها الحلوة
احمد..فكيني منها الضحكه هادي راهو نروح بيك
ميس..هههههه اديرها والله نعرفك
احمد..بعدها شويه عليه ويشوف لشكلها وقفطانها..انى نبي نفهم حاجه وحدة كيف خليتك تطلعي هكي من الحوش
ميس..نعم
احمد..اي مرة تانيه لما تبي تلبسي قفاطين هكي تلبسي في الحوش والبرا لا
ميس بدلع..احمد خيره القفطان
احمد..يتكلم زيها ..احمد شن فيه القفطان ..فيه كتافه طايحات فيه قصير شن تبي فيه تاني
ميس..لاكن حنى كلنا نساوين يعني
احمد..حتى كان نساوين لا انى بس نشوفك بيه
ميس..باهي خلاص اخر مرة
احمد..يعني توا بتخشي هكي تاني
ميس..باهي شن تبيني ندير
احمد..نروح بيك تغيري
ميس..لا والله مانقدر مفيش حد ياخد مكاني وشهد متوترة هلبا وخالتي
احمد..يشبحلها بدون صوت
ميس..حمووودي بالله علييك
احمد..معاش الديري هكي
ميس..بلييييييز
احمد..باهي خلاص وانتي قريب تبكي المرة هادي فاتت مرة تانيه لأااا وضغط على كلمة لا
ميس..حضناته شكرا
احمد..هي بنطلع انى الناس تستنى خشي داخل
ميس..اوكى باي
احمد..متطلعيش لجنان هادا الا كان قتلك انى
ميس..وهيا خاشه ..حاضر
مشى احمد وخشت ميس وطبعا كانت في وحدة واقفه من بعيد تراقب فيهم من لما طلعت ميس (ابرار)
ابرار..مش حنخليك ترتاحي بيه ياميس وحتى انتا أحمد تو تشوف كيف نباعدها منك ونخلاها تكرهك استنو عليا شويه
خشت ميس جنب شهد اللي متوترة
شهد..وين كنتي ميس
ميس..خوك بيهبلني
شهد..هههههه ربي يكون في عونك
ميس..تضحك إن شاء الله
فات الوقت
وقت العشى
احمد خاش يطلع في الصواني للناس
ابرار..احمد
احمد غمض عيونه بملل ولفلها ..نعم
ابرار..شن الجو احمد وسلمت عليه
احمد..تمام
ابرار..شوف احمد ومدتله التليفون
احمد..خدى منها اتليفون شني
شهد..بدت توريله في مشكلة في تليفونها تبي احمد يساواها ..ومقربا منه هلبا ومتعمدة تمس ايده على اساس بلغلط
كمل احمد وعطاها تليفونها وطلع
ابرار.. مشت تجري لغيداء (بنت عمها)..شني وريني الصور
غيداء..هههه شوفي شوفي
ابرار..حي عليك تصويرك ابداع حتى انى صدقت شوفي هادي كأنت هوا شاد يدي
غيداء..اي ههههه
ابرار ..هيا توا بري وريهالها خلاها تموت بقهرتها
غيداء..اي مو تكرم عينك ومشت
......
ميس ..واقفه في الكوجينه وشاده اميه تشرب وتتكلم مع الوقافات
وصلتها رسالة وتس اب على تليفونها كملت مع المرا ومشت
فتحت تليفونها لقة صور جدد من رقم غريب
فتحتهم وهنى كانت الصدمه بنسبه لاها
بدت تشوف بصدمه ومش مصدقه عيونها تعبو دموع
بدت تقلب بين الصور وكانو فعلا كإن احمد شاد يدها وفي صور تضحك فيهم ابرار وهيا قريبة منه
وداد..مييس ميس
مسحت ميس دموعها وسكرت التليفون ومشت لخالتها
ميس..بإبتسامه مزيفه نعم خالتي
وداد..خيره صوتك
ميس..لالا مفي شي شرقت في الميه بس
وداد..باهي صحه نبيك تمشي تجيبي صندوق كلينكس من دار الخزين بالله عليك
ميس..حاضر
وداد..يحضرلك الخير
مشت ميس وكانت حاسه بحرقه في قلبها
مشت لدار التخزين خدت منها الكلينكس وخشت
قعدة مقعمز في مكانها وسرحانه ابرار وغيداء مقعمزين جنب بعض ويضحكو على شكل ميس كيف مكسورة
ناضت غيداء لميس
غيداء..احححم
ميس..شافتلها وابتسمت خير تبي حاجه
غيداء ..فوتيه جو القوية واللي متنكسرش شفتيه احمد مع مني ولا شفتي كيف مش حاسبك واضح انك معرفتيش تتعاملي معاه
ميس..انتي بعتي الصور
غيداء..بصراحه اي انى نبيك تفهمي انه ميحبكش احمد يخون فيك مع ابرار وحيخطبها من عيلتها لاكن يستنالك في غلطة باش يطلقك ويلوحك زي الكلبه قلنالك من البداية حنى عائلة غنية ونتزوجو من بعضنا لاكن انتي تحديتينا وتزوجتي احمدوتوا احمد حيفوتك ويتزوجزيلي من مستواه
ميس..مصدومه وساكته
غيداء..خيرك مستغربه ههههه اكيدة احمد مش حيقعد مع وحدة زيك طول عمره يعني افهمي انتي انسانه ناقصه عيله ناقصه فلوس متقدريش تتأقلمي مع طبقتنا
ولو مش مصدقه كلامي اكيد الصور متكدبش يعني
ميس..ناضت من جنبها ومشت للحمام وكل حرف يتكرر في ودنها
ميس على مراية الحمام ..لا يكدبو مفيش حاجه هكي احمد مستحيل يدير فيا هكي..وتبكي بهستيريا ..باهي والصور شني انى نقنع في نفسي بحاجات غلط احمد علاش بيحبني خلاص كل شي واضح ودموع ينزلو اكتر
تأخر الوقت وبدو اللي بيروح يروح ويلي بايت فرش فراشه والبنات يهدرزو مع بعض
احمد..رن على ميس
ميس..شدت التليفون ومتبيش ترد فصل وعاود تاني
ميس..بصوت مجروح.. ألو
احمد..الو خيرك مترديش
ميس..مسمعتاش
احمد..باهي معاش تخليه بعيد عليك التليفون
ميس..في داخلها كيف قادر تكدب هكي حراام عليك ..باه
احمد..شني باه هادي وين حاضر
ميس..حاضر
احمد..خيرك تتكلمي هكي اطلعي نبيك
ميس..منقدرش نطلع المرا جنبي عيب نطلع ونخلاها
احمد..باهي نبي نشوفك
ميس..احمد الناس يفرشو فراشاتهم وانى مش فاضيه بنعطيهم مخدات واللي ناقصهم
احمد..باهي ماشي كملي اللي في يدك وكلميني نبيك
ميس..تمام
وطبعا مفيش منه يلي قالاتها الناس عطتهم مخدات واللي يبوه من بكري لاكن كانت تتهرب منه ومن الكلام معاه
خشت ميس لدارها لبسة بيجامه ورقدة ع المخدة وهيا عيونها معبيات دموع تراجع في كل لحظة عاشتها مع احمد وكلام غيداء يرن في ودنها ..معقولة قدرت الدير فيا هكي ياأحمد وانتا اللي مجرب الشعور هادا وفاهمه كويس ااااه وغمت وجهها في المخدة ورقدة
طبعا احمد مقدرش يركب لان نساوين داخل رقد في المربوعه مع الرجاله
وكان مستني مكالمة ميس قبل مايرقد لاكن مكلماتاش
حاول يتصل باها مرة وتنين لاكن تليفونها مسكر حط احتمال ان مفيشي شحن ومن الزحمه مقدرتش تشحنه و رقد
فاتت الليله تاني يوم ميس من الصبح ناضت للمطبخ توتي في الفطور تحاول تشغل روحها بأي طريقه متبيش تفكر في يلي صاير رغم الالم يلي في بطنها من بداية العرس وزاد الوجع بعد اللي سمعاته وشافاته
حطت ميس الفطور مع البنات وكلهم قعمزو زي فطور اي عرس ليبي وجوه الحلو
خشت ميس للمطبخ بروحها تبي الدير قهوة لاحمد وتبعتهاله مع الصغار لان لازم يشربها اول ما ينوض
خش احمد من الباب متع المطبخ لقاها
احمد..صبالخير
ميس..سمعت صوته حست بلكهرباء في جسمها كله ..صباح النور من غير ما تتلفتله
احمد..استغرب الحركة امتعها ..خيرك امس تليفونك مصكر
ميس..مفيشي شحن
احمد..قدم ولفها ليه خيرك عاطيتني بظهرك اشبحيلي..استغرب فاها ..خيرهم عيونك باكيه
ميس.. عيونها منفوخات لانها بكت هلبا قبل ما ترقد ..لالا مش راقدة كويس
احمد..متأكدة مش باكيه
ميس..لالا علاش بنبكي (وفي داخلها ..على اساس يهمك)
احمد..باهي ديريلي قهوة
ميس..قريب الطيب
احمد..قرصها من خدها استحشتك مفروض امس روحنا لحوشنا
ميس..معطتش اي ردة فعل بعدت عليه..القهوة طابت
احمد..واقف يشبحلها
ميس..صبت القهوة ومدتهاله
احمد خداها منها جوك مش عاجبني راه بالك في حد كلمك
ميس..لالا احمد قتلك تعبانه شويه بتني توجع فيا
احمد..نرفعك المستشفى
ميس..لالا تو يمشي
احمد..باهي كان وجعك اكتر قوليلي نمشو نعاينو
ميس..امباه
احمد..قرب باسها من راسها وطلع
ميس..تشبحله ومش فاهمة تصرفاته ابدا لوهله كانت بتكدب غيداء وكل شي سمعاته لان النظرة يلي في عيون احمد كانت فعلا نظرة حب لاكن كل ما تتفكر الصورة يلي احمد شاد فاها ايد ابرار تراجع في نفسها انى نحاول نقنع نفسي بأي طريقه ان هادا كدب للكن كل شي واضح
فات اليوم وجى يوم الحفلة كلهم مشو للمزينه ماعدا ميس جابلها احمد مزينه للحوش ميبيهاش تمشي خايف علاها تصيرلها حاجه داخل المزين
ساوت المزينه ميس وطلعتها تهببل كانت جميلة بكل معنى الكلمه مع قفطانها وتسريحتها البسيطة مع خصلات نازلة على وجهاا خيااال لاول مرة ميس تلبس قفطان كبير كان من اختيار احمد جابهولها لعندها بدون ما تطلع
طلبة منها المزينه تلبس القفطان تبي تشوف طلتها تامه

لبست ميس وطلعت
المزينه..ماشاء الله الله يبارك شني الجمال هادا
ميس..تسلمي عيونك الحلوة
المزينه. لا جديات انتي طالعه أميرة والله ياخدوك بعين
ميس..ابتسمت
المزينه..عنده الحق راجلك جابني للحوش مخلاكش تمشي للمزين في حد يخلي قمر زي هادا يمشي والله نياله بيك
ميس..شكرا هادا من دوقك

روحت المزينه وميس خشت لبست عبايتها وكلمت احمد يرفعها
خش احمد بما ان الحوش شبه فاضي والناس كلها يلي في المزين ويلي روح لحوشه يلبس احمد لابس هديكا البدله الكحلة اللي تقتل مع شعره ولحيته والعطر متعه كان يهبللل🤤 ..لقى ميس لابسة عبايتها
احمد..خيرك لابسه عبايتك قبل منشوفك
ميس..معاش وقت علينا مفروض انى من بكري في الصالة
احمد..ميس نحي العبايه
ميس..عطلنا هلبا هيا نمشو
احمد استفزه برود ميس معاه لسبب مش معروف ويحاول يتمالك اعصابه..ميس خليني هادي منبيش نعصب عليك نحي العبايه وضغط على كلمة نحي
ميس..بدت تنحي في العبايه وهيا شادة دموعها بسيف
نحت العبايه والوشاح احمد بسرعه متبدلو ملامح وجهه لما شافها بلقفطان ..شدها من يدها قربها ليه..شني هادا وصفر تصفيرا قوية ..حى علمك حى مفيش مشي الحوش طول
ميس..احمد عادي نلبس عبايتي لأن خالتي قتلي لازم نجي بكري
احمد..اي عادي لاكن مش قبل هادي وباسها على طول ميس دموعها نزلو
احمد..لما بعد علاها شاف دموعها ..خيرك علاش اهما
ميس..مفيش شي تعبانه وخلاص
احمد..كيف مفي شي ودموعك
ميس..احمد بلحق مفي شي خلاص هيا ارفعني
احمد..كيف نرفعك ادوي خيرك مني كلمك مني جى شورك
ميس..احمد بالله عليك ارفعني توا بالله ارجوك هياا نمشو
احمد..خدى نفس طويل وطلعه..توا حنسكت ونرفعك لاكن بعدين تدوي شن فيك
لبست حجابها وخمار على خاطر المكياج وطلعو
ساعدها احمدتركب في السياره وركب حتى هوا ومشى
ميس..تشبح للروشن بدون ولاصوت
احمد..كان بيتفجر يبي يعرف السبب خيرها ميس لأول مرة تتعامل معاه بطريقه هادي حتى قبل مايتزوجها مكانتش نافره منه لهدرجه
قرب احمد يده وحطها على يدها سحبت ميس يدها بسرعه ودارت روحها بتفتح الجزدان متعها
احمد..فهم حركتها لاكن فوتها لبعد الحفله
وصلو للصاله نزلت ميس خشت وأحمد رجع لسيارته وولع دخانه وكان يراجع في كل لحظاته مع ميس ملقاش روحه غالط ابدا ولا تفكر انه دارلها حاجه وحتى ولو لما يعصب علاها ولا يزعجها معمرهاش تصرفت هكي بلعكس تحاول تحلها معاه بهداوة ومتاخدش على خاطرها منه
مر الوقت وخش جلال طلع شهد وسط الزغاريت ودارولها احلى زفه روح باها جلال لفندق وطول الطريق وهوا فاتح اغاني تعبر على فرحته وشهد فرحتها متقلش على فرحت جلال مشو للفندق
شهد اول ماخشت قعمزة على السرير وتشوف للدار بعيونها
جلال..نورتي يامرتي
شهد..ضحكت بنورك
جلال..قعمز قدامها وشد يدها ..ما شاء الله هادا زين ولا رضى والدين
شهد..شبحت لوطا بخجل
جلال قاملها راسها تتحشمي مني نقتلك ايواا قلتهالك
شهد..جلال
جلال..عيون جلال
شهد..يسلمو عيونه
جلال.. متقولي شي نوضي بدلي خلينا نصلو هي مدام الحكايه فاها يسلمو عيونه
شهد..تضحك هلى جرئته في الكلام ..وهادا يلي بنقوله خلينا نصلو
ناضت ساعدها جلال نحت الفيلو وخشت بدلت ولبست بدلة الصلاة وصلو مع بعض
(وياسركم من القصقصه خلوهم في حلهم)
نرجعو لميس قعدة في الصالة لعند فضت علأخير رغم الم قلبها وبطنها مع بعض وروحت هيا اخر الناس هيا وداد طلعت وداد مع راجلها وميس نفس ظع احمد
مجرد ما شافها طلعت من الصاله جى ساعدها نزلت من الدروج وركبة السياره ركب احمد وولع ومشى
ميس..ولا صوت
احمد..بنروحو للحوش راه
ميس..منقدرش مني بيضم وخالتي بروحها
احمد..امي قالتلي نروح بيك للحوش وهيا بتجيب من يضم
ميس..........
احمد..شني جو الحفله
ميس..حلوة
احمد..تعبتو
ميس.. شويه
احمد..خلاص نزل المؤشر علأحمر من طريقة ردها
وصلو للحوش خشت ميس وأحمد ناداه جاره بيباركله
خشت ميس دارها ونحت عبايتها وكيف تبي تفتح الفطان بتبدل وترقد لأن معندهاش جهد ابدا تواجه احمد اليوم
خش احمد للدار بسرعه وقربع الباب شدها من يدها قربها ليه.. توا بتقولي خيرك ولا شني
ميس..خيرني احمد نحي تعبانه ونبي نرقد
احمد..ميس اخرر مرررة حنسألك بهدوء خيرك
ميس..شن بديرلي بتقلب الدنيا بعياطك ولا بتكسر الدار عادي اصلا تعودت بدى عندي حاجه طبيعيه منضايقش لما الدير هكي
احمد..ميس متستفزينيش وقولي شني في
ميس..😭دموعها ينزلو بقوة ويدها على بطنها ..علاش هكي يا أحمد بعد ما وتقت فيك وحبيتك تكسرني علااااش
احمد..خيرني انى كلمتك
ميس..تبكي بعبرتها .. ياريت كلمتني ياريت عصبت عليا حتى دربتني انت كسرت قلبي وحطت يدها على بطنها وطلعت منها عيطة من لالم لاشعوريا
احمد..شدها بسرعه خيرك شن يوجع فيك
ميس..فكت روحها منه و مشت بسرعه للشنطه طلعت التليفون وفتحت الصور ومدتهوله
احمد..يشوف للصور وفاتح عيونه بصدمه واضحه
ميس..حرام عليك باهي والله حرام
احمد..ميس متصدقيش الدوة الفاضيه
ميس..احمد معاش تستهان بيا اكتر من هكي خلاااص غيداء ورتني كل شي واضح نبي نفهم انى في شني قصرت معاك باهي حتى لو قصرت تعالى قولي كلمني انى معمريش رفضتلك طلب يلي تبيه نديره بدون ما نفتح فم فمي اه وتتنفس بسيف والكلام يطلع متقطع
احمد..ميس اصكتي
ميس..مش ساكته انى غلطة عمري بعد ما صدقتك وحطيت تقتي فيك انتا مكنتش محل تقة ياأحمد شوف روحك كيف شاد ايدها علاش خيرني انى باش تمشيلها هيا
احمد..سكرلها فمها ..ضمي فمك قتلك اصكتي
طاحت داخت ما بين يديه
احمد ..ميس افتحي عيونك نكلم فيك نوضي حاول معاها هلبا مفيش ردة فعل لبسلها العبايه وطلعها مكانش في وعيه ابدا سرعة السيارة جنونيه
وصل للمستشفى وقامها خش باها على طول
حطتها على السرير وخشت الدكتورة شافتها ومطلعت احمدالا بسيف
احمد..واقف قدام الباب وحاط راسه علىةالحيط يخبط فيه و متوتر وخايف على ميس لان حتى وجهها شاحب هلبا ايدها منحتهاش من على بطنها وتتكلم بألم
بعد مورو وقت طلعات الدكتورة
..مشالها على طول ..شني وضعها يادكتورة
الدكتورة..انتا احمد
احمد..اي انى
الدكتوره..شن صلتك باها زوجتك ؟
احمد..اي
الدكتورة ..باهي نقدر نعرف شني السبب اللي خلاها توصل للحالة هادي هيا طول الوقت تهتري بأسمك
احمد..موضوع عائلي
الدكتورة ..خدت نفس المدام اعصابها تعبانه هلباا ومقدرتش تتحمل فقدة الوعي و زيادة عندها نقص في الحديد
احمد..يعني هيا شني توا
الدكتورة ..حاليا مفيش شي خطير حنى توا عطيناها مهدئ ورقدة وكتبتلها شوية فيتامينات ..ومدتله الروشيتا ..بعدها على اي شي يزعجها صدقني لو صار اي شي يوتر اعصابها في خطر كبير علاها وعلى البيبي
احمد..شني بيبي
الدكتورة.. المدام حامل ليها شهر وستر ربي مصارش شي المرة الهادي
احمد..مش مصدق ابدا من جهة فرحان بحملها ومن جهة تانيه زعلان علاها وعلى اللي صايرلها
الدكتورة ..ركز ع لادويه لازم تاخدهم وبانتظام لان لا سنها ولا جسمها يقدرو ع الحمل محتاجه اهتمام ولازم تباعدها على ضغوطات
احمد..باهي ان شاء لله توا نبي نروح باها
الدكتورة.. هيا توا راقدة خلاها تنوض وترتاح شويه و روح باها
احمد..شبحلها بعدم رضى
الدكتورة ..طبق كلامي كويس لاني قبل مانكون دكتورة نساء انى دكتورة امراض نفسيه ونعرف حالتها كويس
احمد ..باهي ياسرك من التفلسيف على فيتي وخش
(انسان قليل ادب صراحه)
شافلها احمد لقاها راقدة زي الصغار مش حاسة بشي
احمد..قعمز جنبها ويتلمس في ملامح وجهها وميس زي الميته ..حنحاسبهم نفر نفر على اللي داروه ..ساولها عبايتها وحجابها وقامها طلع باها ركبها السيارة ومشى
وصلو للحوش حطها على سريرها كانت الساعه 4الفجر .نحالها العبايه والوشاح
وطلع
قعد شوية وقت ورجعلها
وقعمز جنبها وشد يدها يبوس فاها وعيونه ينزل منهم دموع
ميس..بدت تتململ على السرير احمد عرف انها بتنوض
مسح دموعه بسرعه وقرب منها يشوف فاها تفتح في عيونها
ميس..فتحت عيونها بدت تشوف لأحمد ولروحها الدكرت كل شي صار بدو دموعها ينزلو من جديد
احمد..اشششش متبكيش متبكيش
ميس..دموع بس بدون صوت
اتكى احمد على السرير وجبدها ليه حضنها وهيا تبكي معطتش اي ردة فعل
احمد..شادها بقوى ومقرب من ودنها يدوي بهدوء لأول مرة في حياته.. شفتيه اللي صارلك كله اللي صار لعبه امصخه منهم يبوك يوصلوك للحاله هادي
ميس..انى مصدقتش كلام انى شفت بعيوني صور
احمد..والله مفي منه اللي شفتيه خدى نفس جتني ابرار شاده تليفونها قالت عندي مشكله في الاعدادات النت ميفتحش ساويتهولها وهيا كانت متعمدة الدير هكي وغيداء كانت واقفه بعيد وتشوفلنا .. الندالة امتعهم وصلاتك للحالة هادي
ميس..باهي الصور انتا تضحك معاها وحتى شاد يدها
احمد..اتصل بتليفونه وفتح المايك
غيداء تتكلم وتبكي
احمد..نسمع فيك
غيداء..ميس يلي صار كله خطة من ابرار هيا قتلي نصورها لما مشت تكلم في احمد وتعمدت كل حركة دارتها وهيا خلتني نوريك الصور هيا قالت لو احمد مش لاها مش حيكون ليك انى والله ما دخلني هيا خلتني ندير هكي
ميس ..تبكي وكانت بتتكلم لاكن احمد شدلها فمها لان محمود (خو غيداء هوا اللي خلاها تتكلم وواقف جنبها )
احمد..منور ولد العم
محمود..واجبنا حميدو
سكر احمد الخط وشبحلها ..منبيشي يسمع صوتك
خليني توا نعاودو شن صار
فلاش باك...
احمد مروح بميس في الطريق اتصل بمحمود
محمود..الو حميدو
احمد..شن الومور
محمود ..عشرات شن جوك انتا
احمد..الحمد الله بلله متصل بيك في حاجه بنقولهالك ياريت تسمعني كويس وتفهمني
محمود..نسمع فيك ادوي ان شاء الله خير
حكاله احمد يلي صار كله
محمود..والله لما نعاود نرباها من جديد
احمد..انى مكلمتكش لسبب
محمود..قول احمد مدور شي
طلب منه احمد ان اخته تكلم ميس في الوقت اللي يتصل فيه احمد بمحود
محمود..ان شاء الله صار مدور شي وسامحنا بالله عليك
احمد..لالا مدورش يابروي التريس تعرف بعضها
طبعا محمود روح ركها طريحه باهيه وخلاها تكلم ميس
إند فلاش باك
احمد..يلعب بشعر ميس وهيا قاعدة تبكي
احمد..خلاص ساد منه البكى
ميس..يعني انتا متحبهاش
احمد ..لا منحبهاش
ميس..باهي انتا مخنتنيش
احمد..لا مخنتكش
ميس..حضناته بقوة.. الحمد الله والله كنت بنموت
احمد..كان يبي يعصب علاها لانها شكت فيه وصدقتهم لاكن بعدما شاف الصور كانو وكإن حق زيادة هوا مجرب شعور الخيانه وان يشوف يلي يحبه مع حد تاني حس ان ميس معاها الحق في يلي صار
ميس..احمد
احمد..عيونه
ميس..انى اسفه
احمد..على شني
ميس.. لاني شكيت فيك
احمد..ساكة ويلعب بشعرها
ميس..قامت راسها والله مش بإيدي كنت نحس في قلبي يتقطع كل منشوف الصورة انى اعتبرتك كل شي بنسبه ليا اب واخ وزوج وحبيب كنت نحسابك بتضيع مني
احمد..اششش خلاص ارتاحي انتي تعبانه ..لاكن نبيك تحطي حاجه وحدة في بالك الشعور اللي عشته انى مستحيل نخليك تعيشيه ومستحيل نحب غيرك انتي مرتي وعيليتي وام ولدي
ميس..شبحتله ..ام ولدك؟وينه؟
احمد..حط يده على بطنها اهوا
ميس..احمد حقا يعني في بيبي في بتني يعني يعني انى حامل
احمد..مفروض يصير العكس يعني انتي اللي تقوليلي مش انى لاكن الله غالب
ميس..تضحك انى ماما ياأحمد وانت بابا
احمد..هههههههه عارف روحي املا جدي
ميس..ضحكت ببراءة
احمد..باهي مزال مسامحتكش راه
ميس عبست..علاش
احمد..هاتي بوسه نسامحك
ميس..باساته من غير حتى ماتتكلم
احمد..اففف مزال
ميس ..خلاص من غير طماعه
احمد..مصح وجهك طماعه قتلي
ميس..انى بنوض نغير هادا القفطان حاسه روحي رزينه
احمد..لاا مفيش نوضان اقعدي هكي خليني نتفرج عليك المشكله خربتي يلي على وجهك بلبكى
ميس..غدوة اندير مكياج ونلبس قفطان
احمد..تو نشوفو نوضي غيري هي وبشويه اه راكي تتحركي بلقوة
ميس..حاضر
.....
بعد مرور تسعه شهور
ميس في المستشفى في غرفة العمليات(ولادة قيصريه بسبب صغر السن)
احمد..واقف برا ماشي جاي وداد معاه وتصبر فيه شويه وسمعو صوت البيبي
احمد..كإن الصوت هادا ردله الروح
طلعت الممرضه ..مبروك جاكم بيبي ولد يتربى في عزكم
وداد..سلمك بنيتي..الحمد الله ياربي الحمد الله
بعد وقت نقلو ميس لدار تانيه وبدى يتنحى البنج وترجع لوعيها
خش احمد وفي يده البيبي
ميس..فتحت عيونها لقت احمد..احمد تعالى
احمد..نجي بروحي ولا نجيبلك معاي ضيف هوا ضيف صغير هلبا وقرب منها حطلها البيبي في حضنها
ميس..تشبحله دموع الفرح ينزلو
احمد..مسحهملها هادم لا منبيهمش
ميس..ضحكت وباست يده يلي تمس في وجهها وطبس احمد باس راسها
وداد..تتفرج عليهم من الباب وتضحك لان خلاص الدنيا ضحكتلها المرة هادي ولدها تزوج والامانه نسترت والحفيد يلي طول عمرها تحلم بيه جى ع الدنيا
النهايه
لا استنو متنسوش ابرار اللي احمد رفع كل الرسائل يلي تبعتله فيهم والمكالمات وكل شي وراهم لبوها كلت ما كتب الله وحرمت الحركات اللي الدير فاها
توا نقدر نقوللكم النهايه
.....
ردي بالك الدمري انسانه بريئة مدنبهاش شي وتقللي من قيمتها بس لان الشخص يلي تحبيه اختارها خلاص مداما اختارها انسيه وحيجي غيره تقربي من ربي وتوكلي عليه خصوصا في مواضيع زي هادي وما خاب من كان توكله على الله متعرفيش هوا لما خلاك الدنيا شن داستلك
ميس تيتمت وهيا صغيره عاشت مع حد يكشخ ويعيط علاها لأتفه الاسباب صبرت ومشكتش الا لربي وبقدرته سبحانه وتعالى نفس الشخص هادا كان معاها راجل تزوجها وصانها وحافظ علاها زي عيونه مرات لو مصارتش معاها الظروف هادي كانت حتتزوج شخص يدمر الباقي من عمرها عكس احمد اللي عوضها على كل شي
واحمد نفس الشي الصعوبات اللي عاشها وحبيبته يلي خاناته مرات هادا كله ربي يبي ينحاها من طريقه بس ويحط في مكانها اللي احسن منها اللي تفهمه بس ومتعدلش على فلوسه ولا تعطيهم ادنى اهتمام
خليكم زي ميس مش زي شهد ولا ابرار اللي تبي تعيش سعادتها على تعاسة غيرها
شن موقف بوها لما احمد جابله المكالمات والرسائل وكل شي
حطي نفسك مكانها متوطيش راس اللي رباك وكبرك ووصلك للعمر هادا غرورك بلبسك وشكلك هوا يلي صنعهولك بوك اللي صنعلك اللي انتي عليه مدمريشي بغلطه على خاطر واحد مع احترامي ميسواش يحدفلك رقمه وياخد صورك بعدين يجي يصدم بيهم اغلى انسان في حياتك
طولت عليكم في الكلام لاكن هادا رأيي وحبيت نوصله ليس الا
استنوني في روايه جديدة بأحداث احلى وابطال غيير
دمتم في في حفظ الله ورعايته
تحياتي
ميني💜

عطوني رايكم