رواية حب وحنين🔞🔞 الفصل الثالث عشر بقلم Nada hs

#حب_وحنين

الجزء الثالث عشر والاخير

nada hs
حنين
واخيرا تحقق المستحيل الي چنت اظنه مراح يتحقق هههه.. وصار اسمه بظهر جنسيتي وخلصت ايام المخاتل والخوف من الناس ههه.. بيوم العرس تمنيت امي يمي.. واني متأكدة لو تعرف چان فرحتلي .. دخلت للصالون وحيده بس وصال متركتني وشفت نفسي من صدگ عروس مو مثل ذاك العرس الاسود ولو هو چان قدر مكتوب ونصيبي هيج يصير حتى التقي بأكرم..
اجه اكرم واخذ بيدي وجماعته مقصرو سولنا زفه تجنن.. چانت فرحتي ماتنوصف وحسيت صدگ متزوجة رجال گد كلمته ووعده
هوايه رگصت بالقاعه ونسيت كل همومي السابقه وتأملت كلش بحياتي ويه اكرم.. رگصت ع اغاني يارا.. ههه كلها مال عشاق
فديته لعشيقي وكل حياتي..
مرت الايام بس خوفي من اهلي مچان يفارگني .. بس ماشفت احد اهتم ولادور عليه ويمكن حتى مكاني صار معلوم الهم بس محد وصلني.. بذيچ الفترة چنه نبقى اني والحجيه مثل ايام قبل بس شنو صحتها شوي ادهورت وصارت متگدر متلحك ع نفسها اكرم راد يقدم ع البورد بس تردد بسبب حاله امه .. شجعته يقدم بس مقبل.. گال ع الاقل انتي كملي السادس حتى اگدر اقدم..
وصدگ بده يدرسني حتى امتحن سادس هههه .. مارجعت مدرسه لان اذا ارجع يرجعوني خامس واني گبل اريد امتحن السادس واخلص.. چنت اشوف نفسي كلش غبيه گدام اكرم هههه .. مرات اصفن علي من يشرحلي شي.. واكثر من مره اگوله خلص مااريد امتحن اني ماادبرها.. ويرجع يرزلني واگعد اقره واحس نفسي مراح انجح.. خاصه اني قبل واهسي مو هلكد بالدراسه وچنت مفكره بكل الاحوال مراح اكمل لان اعرف باهلي وعقليتهم... بذيج السنه الي چنت ادرس بيها ومتجهزه حتى امتحن التمهيدي.. توفت امه بشهر 11..
كلش حزنت عليها وافتقدتها واكرم خطيه چان يكبت بداخله وميطلع حزنه ويمثل انه مو مهتم.. بس من چنت اصفن بعيونه اعرف كل شي.. چنت احضنه بالليل واخلي راسه ع صدري وكل حسره يطلعها هلگدها.. من يوم الي توفت بي امه صارت فرقان مرت امجد تجينا دائما وصرنا صديقات كلش ..
اما نهاد بقت ع موقفهه ويايه متحاچيني وحتى بكلامهه چانت تلومني ع موتت امها.. اكرم هو اكثر واحد شفته متأثر بيهم.. احتاج اشهر يله گدر يرجع طبيعي شوي بس طبعا مانساهه وكل مااضيعه الگاه بغرفه امه.. nada h
اضطريت اترك الدراسه ذيچ السنه وماامتحنت وگفت ويه اكرم بشدته.. مرت اشهر ورجعت ادرس حتى اقدم ع السنه التجي واكرم مقصر خلالي دورات لكل المواد ..يمكن لان شاف عقلي مجيم هههه بس شوي شوي بديت استوعب الكتب وافهم المعادلات والمسائل الي چنت من اشوفها احاول احفظها مثل ماهي ههه.. اكرم ماخله شي ماوفره اليه خلال فتره الدراسه..
حتى شغل البيت ساعدني بي.. بيوم الامتحان گعدت اتقيء من الصبح هههه... ظل يشجعني ويساعدني بنفس طريقته الي گدر يجيب معدل الطبيه.. كملت التمهيدي وطلعت النتائج ودخلت بكالوريا.. بس طبعا مو ذيج الدرجات الزينه.. خلال ال3 اشهر بين الامتحان التمهيدي والنهائي موتت نفسي دراسه وگلت اله ماارفع راس اكرم.. صار يومي عباره عن دراسه وحبيبي كل مايصيرله مجال يدرسني ويراجعلي... حتى الوقت مچنت اعرفه ليل لو نهار.. هو الي چان يگلي كافي لتقرين..
امتحنت النهائي والخوف مافارگني.. وكل يوم يقترب موعد النتيجة احس راح يصير يوم القيامه...
بيومهه چنت نايمه ومادري شلون نمت بوقتهه بس من خوفي يمكن فقدت ونمت.. گعدني اكرم وجايب ورقه وبيها ارقام بالبدايه مستوعبت شنو الموجود لان بحياتي كلها متخيلت نفسي اجيب هيج درجات..صفنت بوجه اكرم وطلعت مني هي صرخه وهي دموع وهي ضحكه بنفس الوقت..
ظليت حاضنته وابچي.. وهو يضحك عليه ويگلي عرفتج هيج اطلعين.. مرت الاشهر بسرعه وقدمت ع حسب معدلي .. صيدله بغداد.. ومن دخلت الجامعه حسيت نفسي انسانه كامله وموجوده ع وجه الكرة الارضيه ههه.. لان لومهما كان الزوج مدلل زوجته وهي بدون شهاده راح تبقى تحس بنقص والحمد لله كملت النقص بحياتي ...
اكرم همين قدم ع البورد وانقبل وصار كل وقتنه دراسه وحتى نسينا نفسنه مااخذنه احتياط وطلعت حامل🙊
اهلي حاولت ادز ناس عليهم بلكي يرجعون يلتقون بيه واشوفهم بس طبعا كل ماادز احد يگولون ماعدنه بنيه اسمها حنين.. انقهرت حيل من چنت اسمعهم هيج يكولون.. بعدين انتبهت لنفسي وگلت الحياة تمشي ومواگفة ع احد..
طول فترة الحمل اكرم مقصر ويايه بشي..خاصه شوربه الفوائد هههه طلعها من خشمي .. راد يجيب خدامه تساعدني بس مقبلت لانو احب كل شي يكون ع ايدي..
بدت بطني تكبر وعرفت الي جايني بنوته عنونه 🙊 سميناهه قبل لتجي ع الدنيا وجهزنا كل شي نحتاجه اني وبنتي حبيبتي
ولدت واكرم ماخله طبيبه بالمستشفى مادزهه عليه هههه حتى اني استحيت منهم كل وحده جايه تتفرج عليه وتروح..
من طلعت وشفت اكرم لمعت عيونه واني متحملت الموقف طگيت بجي.. طول فترة الاربعين يوم مريت بأكتئاب حاد موتني..
حتى اكرم صرت مااطيقه بهل فتره.. بس الحمد لله خلصت ع خير ورجع حبنه مثل اول واكثر..
بس فرحتي الماتمت .. امي توفت.. عرفت بالصدفه من شفت قطعتها داگيها بطريقي للجامعه.. متت قهر وعيني مانشفت عليها.. اتذكرها بكل لحظه وكل صغيره وچبيره گضيناهه سوه..
اتذكرها اخر فتره من چنت يمهم شلون توكلني ومتحاچيني وصايره هلگدها ضعفانه.. ذيبت كل الصوج بيه وگلت اكيد ماتت من القهر عليه... والله اعلم شچانو يحاچوهه ويعيروهه بيه..
قررت اروح الهم وسأل عن اختي الي مااعرف شنو صفه الدهر بيهه..واشوف ابويه .. خفت لاافقده مثل مافقدت امي بغير وداع ولا اشوفهه..
اكرم مقبل اروح وحدي ورحنا تلاثنه.. اني واكرم وبنتي ليونه(لجين) متت خوف واني واگفه اباهم ادگ بالباب.. طلعلي ابويه .. شافني صفن بوجهي ونوب باوع لبنتي.. قبل لااحچي سد الباب بوجوهنه وصاح لا تجين بعد.. احنه نسيناج روحي..
تهدم حيلي من هيچ گال.. اكرم ظل طول الطريق يسب بيهم ويغلط ومو من طبايعه ابد. شگد صارلي ويا مسمعته يغلط بس ع اهلي انهد فد هده ومن شافني ابچي وحاول يسكتني مگدرت
مرت ايام وچانت كفيله تنسيني شويه وتخليني اباوع لحياتي ويه اكرم وليونه.. ليونه چنت اعوفهه بالحضانه داخل الجامعه يمي وكل متصيرلي فرصه اروحلها.. حبيبتي نسخه ابوها وهادئه طالعه علي.. الي اخاف منه خاف تطلع عليه صاحبة غشاء مطاطي وتوگع بيد من لايرحم.. بس مادام اني وابوها نشم الهوى مراح تأخذ اله الي احنه نثق بي ونتأكد منه مراح يأذيها حتى لو بكلمه...
يوم عن يوم يمر والحياة تحلى بعيني .. هواي من الايام تمنيت بيها الموت ولمت حظي ليش انخلقت ع هيچ دنيا ويم هيچ ناس مثل اهلي.. هسه كل شي اختلف.. وكل الي صار انگلب لصالحي وتغيرت حياتي للافضل.. يمكن لو باقيه يم محسن چان هسه اني خلگ جاهله ومااعرف شنو حياة ولا حسيت بحلاوة النجاح ولا دخلت كليه ولا افكر بشي غير الاطفال والطبخ والتنظيف ومشاكل البيت... اكرم هديه من السما.. بكل لحظه ادعي الله يحفظه النا من كل شر..nada hs
اختي سألت هوايه يله گدرت اعرف مصيرها.. اختي تزوجت محسن بعد ما راد يفضح اهلي بيه رادو بس يسدون حلگه ومنطي اختي.. متت قهر من سمعت بيها اخذت هذا الحيوان
صغيره واحلامهه ورديه چانت.. چان كل همها تدرس وتصير معلمه لو مدرسه.. هسه مخلفه 2 ولد واكيد حياتها اقل من عاديه واكيد كرهت محسن بفتره ع الي سواه بيه.. واكيد نسوان حموينها ميعوفوهه بحالهه وهنه الله ميجرعهن واختي الفطيره وين متروح لگمتها تنوخذ من حلگها متحچي.. شگد چنت اتمنى التقي بيهه واشوفهه بس منو يخليها ويجوز هسه هي متطلع بس للسوگ لو من يتمرضون اطفالهه.. هاي المره هيچ تتعامل يم اهلي واقاربي.. دعيتلها وين متكون الله يسعدها ويجمعني بيها بأقرب وقت..