رواية هدية الشيخ سراج الفصل الثاني وثلاثون 32 - بقلم dina

هدية الشيخ سراج بقلم ✍ دينا الربيعي

احَبـك ڪثيراً رغم بعد المسافه بيننا ، رغم عدم التقاء اعيننا ببعضـهـا ، رغم ڪل مايحدث لنـا من تقلب المزاج ، أنا احَبـك واريدك دائماً شخصـاً مثلك جعل حياتي اكثر اشراقاً اكثر توهجاً جعلت حياتي تبدو اكثر جمالاً ووضوحاً ، انا الان ﻼ اسعى لتحقيق اهدافـي فقط انا اسعى لأكون لكِ أيضاً♥️ ..ِ ©®

حوري . گاعده فوگ بالغرفه صارت ملجئي الوحيد اگدر ابجي براحتي واشكي همي النفسي صرت انيسه للوحده الي عايشه بيها اتذكر وين جنت ووين صرت

جنت اشرد من اليقهرني بحظنه وخوفه ولهفته وكلامه الحلو هسه اگعد بغرفتي حالي حال الي دخل بمشروع وخسر حالي حال الي بنه بيت وتعب علي وحب يكمل

وشاف جماله وقوته وتعلق بي وبعدين ينهد للگاع هيج صرت اقارن حالي وزاد حقدي على كل شخص قبل نفترگ وماحاول يرجعنه مرات اگول لأمي ما أذيت

واحد بيهم ولا يوم سمعتهم احجايه تغثهم ليش هيج جازوني ليش فرطوا بيه ومرات اگول اكيد بت عمهم قابل يطون بالغريبه وميطون بيها كل همي هسه صار

جهالي ميته موت عليهم كل شهر يمر عليه احس خلص بعد مامني رجعه السراج مشاقتلهم موووت لأديهم اللعبهم لصوتهم من يناغون ما اشبع منهم من يجون

مااحس بالوقت وياهم بسرعه يخلص ومن يجي يريد ياخذهم احس روحي تطلع اموت بس مابيدي شي اسوي ابجي وانقهر واخلصها نوم اول يوم وبعدين

شويه شويه انسه لا مو انسه اتعود بس ابقه انتظر جيتهم لحظه لحظه اما سراج اجدب عليكم اذا اگللكم كرهته لو نسيته حته لو افكر انسى ما اگدر شخص

فتحت عيني علي وحبيته حب مستحيل اگدر اكرر هذا الشي بعد الغيره اشتاقله كل يوم بس جهالي ماخذين عقلي وبالي اكثر منه تشتت وتبهذلت ابعدهم وتعبت حيل

جنت نايمه او احاول اغفه واجاني اشعار على الواتساب فتحت الرساله من سراج اول شي ترددت بس لأن صار هواي ممتراسلين لان كل ميراسلني ارجعي ومشتاقلج ويحاول يخليني ارجع بس اني اصده ماريده يغيرلي رأيي اريد يطلگ يله كاتب

سراج . حوريتي شوكت ترجعين مو شليتي حالي شل بالكعبه ميت بدونج كافي هواي گتلج ارجع وانت موتگولين احبك ارجعي واوكفي وياي لج وداعه حبنه اطلگها والله كارها وكاره البيت لان موجوده بي بس ابالي شغله اخلصها واطلگها

حوري . قريت الرساله واحس كلش لشتي ترجف من صفحه احبه وكل ما اذكر تمسكه بهاي البلوه احقد علي گتله

ما ارجع سراج عفيه گتلك شروطي مامستعده ارجع من جديد على نفس المشاكل ضحيت بجهالي وبيك وتحملت فراگكم في سيبل اطلگها وصار اكثر من سبعه اشهر زعلانه وهسه چاي تگلي ارجعي شنو السوينا بعد سراج

بعد مارد شاف الرساله وقراها بس مارد عرفته انقهر لأن خلال هاي الأشهر ماترك توسلاته بيه ابد بس اني بقيت مصره على كلامي واهلي ابد ما ادخلوا گلولي براحتج من شافوا متمسك بيها انقهرو عليه وتركوني

مره جنت جوه اني ومره حيدر نسوي عشه تلفوني على الكاونتر يمي سمعته اشعارت جتي ماجاوبت گلت اخلص شغلي واشوف منو لأن اذا فتحت التلفون بعد

ماعوفه واليوم اريد اخلص شغلي من وكت لان اليوم سراج يجيب الجهال صدگ خلصت واخذت التلفون فتحت الرسائل من نرجس

نرجس . هلو حور شلونج عيني شوماكو صار يومين شكو

كتبت الها
هلو بيج عمري الحمد لله انت شلونج والله مشتاقتلج
موجوده بس اكثر وكتي اخلصه نوم حته مافكر بالجهال 🥺

نرجس . ياعمرري سوده عليه لج والله مشتاقتلج كومه تعالي علينه شبيج شويه ورجعي الله عليج حوري

حوري . لا والله ما اگدر صدگي ماطلع من البيت ابد واليوم سراج راح يجيبلي الجهال راح التهي وياهم هاي اليومين

نرجس . مامليتي حوري سراج ذاكليوم شفته لج متغير حيييل والله عبالك واحد ثاني مشافيه عيونه شلون منگرات خطيه وسود جواهن وبس يدخن سألت حكيم علي يگول متخبل على مرته والبيت كله داخل انذار من وراه

حوري . هه كله الصار بسببه وعدني ست اشهر ويطلگها وقبلت وماعتبرتها موجوده بس من اتقرب الها وصارتله مره وتمسك بيها بعد ميهمني الصار كله

نرجس . لج البارحه گال حكيم راح يطلگها مابقه شي سألته لعد شنو الموقفهم كل هاي المده ومبهذل نفسه ومرته عله شنو بس مجاوبني

حوري . ي صدگي اكو شي بس ماعرف شنو مرات احس اكو شي ظامينه عليه بس ميحجون اكو شي بين زمن وسراج بس معرف شنو من جنت هناك جان اكو بينهم مخابرات ومحادثات بس ماعرفت على سنو

نرجس . ي الله كريم حبيبتي ان شاء الله يطلگها وترجعون مثل قبل الزوجج وجهالج

حوري . ان شاء الله الله كريم يي سولفيلي انت شلونكم حكيم شلونه هم رحتي للدكتوره بعد

نرجس . الحمد لله زينين
ي ارجع واخر مره سويت تحاليل الدكتوره گالت زينات اتصدگين گاعده اخذ مانع بدون علم حكيم

حوري . ياا عزا بعينج ليش ولج لعد على شنو مراجعات وخابصه الرجال واخر شي تاخذين مانع

نرجس . 🥺 والله اخاف حوري اثنين طرحت واثنين اتعلقت بيهم وردتهم بس ماصار وهسه اخاف هم احبل ويروح مني واحس نفسيتي تعبانه من اخر مره بعد مامستعده هسه

حوري . ي بس جان اكو سبب يخلي رحمج يرفض الطفل بسبب الفايروسات الجانت عندج هسه تعالجتي وتگولين الدكتوره گلتلج زينات تحاليلج بعد ليش تاخذين مانع وبدون علم زوجج

نرجس . ماعرف حوري ماريد انقهر هسه خلي يصير سنه ونص سنتين ونسوي طفل احسن بعد ممستعجلين هسه

حوري . براحتج بس غلط الي جاي اسوي بدون علم حكيم خطيه يمكن يريد طفل اني انصحج وبس

نرجس . ي سدي الموضوع حوري كافي وترتيني افكر بعدين

حوري .اوك حبيبتي يله لهيتيني هواي اروح اني هسه الجهال على جيه

نرجس . ي حضري نفسج زين وذاك الرجال منسلگ سلگ خطيه

حوري . يله باي حبي بعدين نكمل سوالف 😘
رحت سبحت ولبست تراكسود اسود وبالبجامه والتيشريت علامه جلد النمر ورفعت شعري كبايه

وخليت كحل ومرطب وعطر ونزلت اني ماحضرت نفسي علمود سراج بس ماحب يشوفني مبهذله لو هامله نفسي بغيابه نزلت حضرت عصير وكيك يحبونه

همه من يجون دائمآ اسوي كب كيك بس اغير بالنكهات سراج يگعد ومرات نحجي كم كلمه بس بوجود اهلي اكيد ومرات نشرح عتبنه وقهرنه البعض بالنظرات

سمعت الجرس ندگ طلعت اركض للباب فتحت واشوف الجهال اثنينهم يدگون بالباب بسرعه نزلت عليهم ابوس بيهم رفعت راسي سراج گلي دخليهم جوه وبوسيهم مو هيج بالباب وياها خزره اكيد

حوري . تعالو ماما مشتاقتلهم اووي فدوه العطركم الطيب هذا باوعت سراج يباوع عليه گتله تفضل فتحت باب الأستقبال وراح گعد دخلنه ورا وگعدت مقابيله والجهال يبوسون بيه

فهد . امي ببا حبس يدول حبس

حوري .فهد يصيحلي امي هه حبيبي بسرعه افتهمت علي يگول بابا يحبج باوعت السراج يباوع عليه ارتبك ورجع گله

سراج . بابا موعيب تحجي اسرارنا اني وياك شنو نحجي ميصير تگول مو هيج علمتك انه

حوري . ي اكيد قابل اني ساره ليش تعلمهم هيج يبتعدون عني سراج بسرعه نزلت دمعتي اجه گعد يمي وحضني بدي وهاي اول مره من بعد زعلتي اخلي سراج يتقرب هيج مني

سراج . يايابه شلون مشتاق الهذا الحضن ولج والله ماعايش مثل البشر بغيابج حور الهديه مالازم ترجع واني رجعتج مجبور واليوم اجيت ارجعج البيتج يابعد بيتي

حوري . شلون مافتهمت كل عقلك تريد ارجع و
بعدني مامكمله وگال

سراج .طلگت طلگت لا تحجين سمعيني زين انه سويت هيج جنت مجبور تذكرين من رحنه للسيد

حوري . هزيت راسي بأي

سراج . من طلعتي رجعت خابرت السيد  گلي ما اطيك اي اسم ولا حته صفه وحده صارت هواي مشاكل بسبب هاي الشغله بس الي مسوي العمل ياكل ويشرب

وياك وهمه اثنين مو وحده ونسوان ردت اعرف رجعت خابرت علي وگتله بس كم صفه الوحده منهم حلفته اطاني تلث صفات بس كلهن موجودات بساره بس

ماردت احجي ولا اطلگها قبل ما اخلي بأيدي دليل قوي عليها  وتمنين ساره الها ايد  بالشغله حتى اثبت الهم شنو نوعها هاي البنيه كل يوميه ابحوش بتلفون ساره

بدون متدري بس ما الگه شي قبل يومين هيه جانت جوه وسمعت تلفونها يدگ بالصدفه رحت ردت اعرف منو هالگد يتصل عليها وميمل شفت اسم ابنيه بس

شكيت بالسالفه من انگطع الاتصال دزت رسائل كتبت بيها يمعود جاوبي هاذا الولد خابر يگول موسويت الها عمل وتفرقه هذني بمليونين من جانبها سويتهم

وقصدتهم الها هم ترا اجي البيتهم وافضها اذا مدز الفلوس هنا اني دين مابقه براسي بس طگيت صوره للمحادثه وخليتها بتلفوني وردت اعرف اكثر رحت

الساره وگتلها اريد نطلع اني وياج عندي موضوع مهم بينه هيه فرحت كلش طلعنه وبالطريق گتلها شلون ترديني أمن بيج واخليج شريكه حياتي من جديد

ونوره اختي سامعتج تحجين ويه وحده اسوي اعمال ومدري شنو هنا هيه صار وجها اصفر

ساره . شنوو لا جذابه شنو هالحجي ماعندي هيج سوالف اني

سراج . بس اني عندي دليل عليج ساره لو تحجيلي الحقيقه كلها لو اطلگج اختاري

ساره . شنو الدليل العندك اني مامسويه هيج شي ابدد وبعدين المنو اسوي عمل

سراج . الحور مسويه المنو يعني عندج عدوه غير حوري يعني بكيفج خيرتج واختاري طلاگج لو تحجين الحقيقه وهاي الصوره هم شوفيها شوفتها الها بسرعه بجت

ساره . لا لا سراج احجيلك الحقيقه الله يخليك والله تورطت صحيح سويت عمل تفرقه ردت ارجعك الي من حبي الك والله سراج تندمت الله يخليك سراج لتعوفني والله تندمت حبيبي

سراج . هنا اني جنت فاتح تسجيل صوت حته اخذ دليل اكثر عليها ويعرفوها شنو من بشر گتلها بس مو معناها تروحين تسوين عمل وهاي حياه انسان ماخفتي

تموت يصير بيها شي زين ميخالف منو الورطج هنا سويت روحي متعاطف وياها ومقهور عليها حته تحجيلي كلشي ومتخاف گالت

ساره . والله نوره ساعدتني جابتلي دشداشه حوري وتدري بيه سويت عمل الحوري وشجعتني بس ماجتي وياي صديقتي راحت وياي سراج يعني مراح تعوفني ومتحجي حبيبي والله تندمت اعذرني من حبي الك والله

سراج . راح ارجعج للبيت اني راسي يوجعني اريد افكر بحل للسالفه هاي رجعتها للبيت بعد ماحجتلي كلشي  
بس گوه مصبر نفسي عليها احس قبق راسي طار من

الغضب عليها بوكتها والقهر مال مرضج وتعبج وفراگنه كله عليها بس صبرت نفسي رحت البيتهم طبيت سمعت صوت التسجيل العمي خوانها جانوا موجودين

وشوفتهم الصوره تخبل ابوها گالو وصلت السالفه للسحوره والاعمال هاي نكتلها قبل لجيبنه فضيحه اكبر من هاي گتلهم مرتي وصلت الموت بسببها وراحت لهلها

شرردت من ظيمها گتلهم اني جنت خايف ارجعها لان جنت ادري الها ايد بهاي السالفه خفت ترجع تسويلها شي ثاني وتخليني اخسرها للأبد بقيت متحمل بعدها

ولا اخسرها تعرفون ليش لان جنت اعرف بتكم الها ايد بهاي السالفه كلها بس ردت دليل عليها واجه الدليل بيدي بتكم رايح اطلگها وتعالو اخذوها حته تصدگون

اني ماجنت ريدها ولا الي نفس بيها دخلت عليه للغرفه وخلتك تجي وتشوفها يمي ومن گلتلك هو صاحني صدگتها هاي بتك وهاي عمايلها شتسوولها سوولها بس

اريد اخلص نفسي منها اباوع عليهم ماحجوا ولا كلمه نزلت راسهم وخلتهم مايعرفون يجمعون كلمتين بيهن حظ ويحجوهن طلگتها بس جنت ملتهي لان ابوي

السكر ماله علگ عمي بالمستشفى وماقبل ابوي نحجي اي شي لان گال عيب من العالم انفضحنه گدامهم شيوخ معگله لعبت علينه مره وكحه واني ياحبيه

عمري جنت اريد اگدر اطلگها وارجعج وجنت اگدر ارجعج هم وعيونج هاي الحلوه بس ردت اخلص منها وللأبد وردت دليل عليها قوي يثبت اعمالها وجرأتها وماردت ارجعج خفت ترجع تسويلج شي وتأذيج

حوري . اسمع وابجي دموعي تنزل حاره تحرگ بخدي اهلي امي وخواني طالعين بس زوجه عمار فوگ بغرفتها بس سراج والجهال يمي اريد احجي شي ماكو احس الكلام ميطلع مني

يتبع ...

الاحداث وصلتني جديد وان شاء الله تعجبكم وتفرحكم واذا اتأخر عليكم بالتنزيل لان انتظر حور تگولي شنو يصير وياها وارجع اكتب بس ان شاء الله ما اتأخر هواي يومين وارجع اكتب الكم اذا راح ترجع او لا لان هسه مجاي اراسلها مخبوصين بالمشاكل العدهم منتظرتها هيه تگلي شنو صار وياها
لتنسون المتابعه والتصويت ❤️