رواية هدية الشيخ سراج الفصل التاسع والعشرون 29 - بقلم dina

هديه الشيخ سراج بقلم دينا الربيعي 📝

ياحمام الرايح الهم
وصل اخباري وتعال
انه ما اكــدر بعدهم
روحي مكسوره بفكدهم
لو ترد ليه بصورهم
لو تسكتني بوصال

فيصل عاشور

حوري . رحت للأستقبال فتحت الباب جان متمدد عله القنفه يباوع اخبار بسرعه اجت عينه عليه بس فتت رجع يباوع يسوي روحه مامهتم الجيتي گعدت يم رجله

حبيبي سراج اريد نفتح صفحه جديده بس اريد منك وعد قبل كلشي
بسرعه گعد عدل مثلي وحجه

سراج . شنو حور احجي اني هم تعبت من هذا الوضع

حوري . جنت متخيله راح يگلي اسوي كلشي تردي بس خلي نرجع مثل قبل اني هم اشتاقيت الذيج ايامنه الحلوه جنه مستحيل واحد منه ينام ومزعل الثاني

گتله اطلگ ساره گتلي بس ست اشهر واطلگها شوف صارلك اشگد
وتوعدني بعد متزوجها ولا تشوف خيالها سراج احبك موبيدي اغار عليك منها احسها تاخذك مني بأي طريقه

سراج . شوفي حوري افهميني عدل ماگدر اطلگ ساره اني صحيح گتلج كم شهر واطلگها بس مو هسه خليها بعدين هسه هيه بشنو مأثره حالها حال نوره بالنسبه الي تركيها لتهتمين الوجودها بالبيت وتأثر علينه حبيبي

حوري . بس انته گتلي ست اشهر واطلگهه ليش غيرت رأيك هسه سراج

سراج . اذا تحبيني وتردين نرجع مثل قبل عله الأقل الخاطر ذول الجهال حوري والله مليت بيت مابي راحه ماينراد تره گدام العالم محسوبه عليه مزوج اثنين واني

لا مرتاح ولا شايف الراحه من يوم الزوجت الهسه كافي رحموا بحالي تعبت

حوري . يحجي بحرگه انقهرت علي مبين علي مهموم وتعبان اخذت ادي بستها واباوع بعيونه نزلت دموعي گتله حبيبي اسفه والله شنو تريد اني وياك وماعوفك للموت

سراج . هدية گلبي محتاجج لتحرميني منج احب ووعد مني ما احب غيرج ولا اسلمها گلبي غيرج بس خلي ثقتج بيه وحاولي تتفهميني لو مهما يصير لازم

نفهم بعض حوري مرات الأيام تجبرك تختار شي موبرضاتك ياعمري اريد منج اصيرين وياي موعليه ماشي حبيبي

حوري . ماجنت متخيله وره كلام سراج هذا اكو لغز ولاحته فكرت بمعنه كلامه شنو كل السويته بوكتها خليت راسي علئ كتفه واستمع اله بس المفروض اكون

واعيه اكثر واگله شنو معنى كلامك فهمني اكثر راحت ايام واجت ايام وعلاقتي بسراج احلى ايام رجعنه مثل اثنين مزوجين جديد والجهال كبروا صار عمرهم سنه

ويفتهمون اكثر وهسه بدو يحجون كم كلمه راحت ايام واجت ايام واني وسراج مثل العسل مره جنت بالغرفه ويمي فطومه وفهد اوكلهم سريلاك ودخل فهد مبين

علي ضايج ومتعارك جان يگلي حبيبي ترحين لهلج كم يوم گتله ليش اني تفاجئت سراج يجي ويگلي روحي لأهلج من وحده جنت اگله يأجلني بمزاجه يگلي روحي

يگول اضوج من ترحون گتله بكيفك بس ممحضره نفسي ولا للجهال جان يگلي اني وياج هسه نغير ملابسهم ونبدللهم صدگ گمت حضرت نفسي واخذت

ملابس لان گلي راح اطلع لأربيل كم يوم وارجع خاف اتأخر اخذت هواي ملابس للجهال ورحت لهللي بقيت يمهم اسبوع وبليل سراج اجه بدون ما ادري بي اني

قبل يوم بليل گتله شوكت تجي گال بعدني بأربيل المهم ماحبيت اضغط علي بأسألتي واحقق ويا ردته من كيفه يفتحلي گلبه ويگلي ليش ضايج ومعصب اربعه

وعشرين ساعه احسه يريد ينفجر بليل انام بحظنه يجر حسره ويشرب جگاير احسه شايل اهموم الدنيا على راسه بقينه هيج تقريبآ اقل الشهر ويگول روحي

لهلج ارتاحي جاي اتعبين لو مرات يگلي اسافر لاربيل يجيب بضائع مناك

بيوم جنت طالعه من الغرفه الصبح اخذت فهد اريد اسبحه بالحمام البره لان اكبر اخذ راحتي بي خليت الملابس وفتحت المي بالنجانه ورجعت اخذت فهد

فتت من يم غرفه ساره واسمعها تگول النوره گتله بس يگلي اريد اگول الحور يله ماريد اسوي شي من وراها رجعت نوره تگللها ي اذا ميقبل رجعي گولي العمي علي

هسه يحاجي ويخلي يجيج غصبن علي شنو صارلج شگد صابرتله والله اني منج اروح لهلي واخليهم يحجون ويا يهددو شنو مو رجال يخاف من مرته خاف

تكتشفه وتعوفه والله ياالله خفت حسيت اكو شي صاير بين ساره وفهد بالگوه حسيت رجليه تمشيني وصلت للحمام وسبحت فهد واني بالي كله مو يمه

احس گلبي گام يوجعني طلعت نشفته وبدلتله ونومته انتظرت فطومه تگعد حته اسبحها والدموع ماوكف ابد جنت بيني وبين نفسي اگول شلون لوصدگ راجع الها

شلون لو متقرب منها وارجع اگول لاوعدني ميتقرب منها گلي انجبرت عليها صحيح بس ماخلي علاقتنه تخرب بسببها

گعدت فطومه اخذتها سبحتها ورجعت للغرفه بدلتلها دخل سراج

سراج . هله حبيبي شلونج

درت عليه وگتله ها الله يساعدك ماردت ابين بسرعه اني باجيه وادور مشكله ويا لان گلي نتفاهم بينه قبل كلشي

متغدي لو اسويلك

لا والله مامتغدي اجيت اهنا اتغده

هسه نازله اسويلك نزلت حضرتله الغده وصحن فواكه وصعدت لگيته گاعده بالگاع وداير التلفزيون على الأخبار خليت الصينيه وگعدت قريب علي خليته خلص وجبتله جاي وحجيت گتله سراج اكو شي اني ما اعرفه

سراج . شلون يعني مثليش

حسيته مثل الانصدم او الأرتبك گتله يعني انته موگتلي ما اسوي شي اله انت تعرفين بي وبرضاتج احس اكو شي اني ماعرفه وظامين عليه

سراج . هه شنو يعني مثلآ احنه كل واحد عايش ابيت وواحد يظم على الخ شوفه عينج اجي من الشغل اصعد فوگ ومرات يم الوالد بديوانيه يم الشيخ بعد اكو غيرها

لا ماكو بس حبيت اذكر بالوعد اني الحد هسه وفيت بوعدي الك وسويت مثل ماگلت لتحجين وياها ولتعتبريها موجوده وتخرب علاقتنه من اجيب سيرتها

يربتبك ويبعد عيونه عني هنا اني شبه اتأكدت بس ماردت اسوي شي بدون ما اتأكدت اكثر لو يصير عندي دليل بقيت يوميه احاول اعرف اكثر بس سراج ابد

مايدخل الغرفتها ولا يحجي وياها اله هيه تريد شي ومن تحجي ويا يباوع بموبايله حته راسه ميرفعه الها مرن شهرين بس ردت اشوف شي عليهم ولو واحد

بالميه جاي يلتقون لو عدهم شي بالسر بس ماكو اي شي حته مرات افز باليل اگول خاف من انام يروح الها بس ابدا ماكو شي فكرت گلت يمكن جان كلام نوره

وساره مو عله سراج وبقيت اقنع بنفسي الى ان نسيت السالفه كلها ونسدت

سراج حبيبي والله ضايجه ملينه من هذا الروتين خلي نطلع

سراج . اوك عمري باجر عندي بظائع توصل من البصره بس خلي اجيبها هنا ونطلع وين متردين

حوري . ماشي بس العصر اروح للصالون ويه زمن

سراج . ماشي عمري براحتج

حوري . نزلت الزمن جتي الصبح خطيه اول ماگتلها گالت ميخالف نروح صدگ رحنه اني صبغت شعري لان مليت من الرصاصي نزل هواي وسمرني گتلها اريد

اصبغه لون زيتوني فاتح صبغته كلش حلو عليه صار اللون غير بشرتي فتحها وقصيت منه وحفيت وسويت مساج ورجعنه زمن بس قصت شعرها گالت صابغته

ماصار شهر رجعنه للبيت شفت فهد يبجي اخذته رضعته وصعدت اجيبله ملابس من فوگ اول ماوصلت الغرفه ساره سمعت صوت سراج يمها يمكن يتعاركون اخذني الفضول اسمع شنو يحجي وياها تقربت للباب

سراج . لج بس افتهمي عليه شلون اروح واگللها فجئه هيج بدون مقدمات ساره محد جابرج هاي العيشه وياي يعجبج اهلآ وسهلآ ميعجبج الباب يوسع جمل

ساره . هااا هيج صارت ياسراج لعد انته مو گلت لأبوي راح اعتبرها حالها حال حوري وين كلامك مع الاسف عليك شيخ وعليك العتب تخاف تواجه مرتك وتگللها تعدل بينه ياوسفه الشوارب

سراج . لج بت ال.... شلون تحجين هيججج اعلمج اليووووم تردين تحجين هيج حته تحركيني عليها امشيييي ولييي لهلججج اليوووم ماتبقيين ابييييتي

حوري . كتلها كتله يمكن كسرها هيه توها فاتحه رجلها اني احس اديه ترجف لا اگدر افتح الباب واواجهم اثنينهم ولا اروح وكأنه ماسمعتهم اختنگت والعبره

بصدري بجيت وخليت ايدي على حلگي ما احس اله انفتح الباب بسرعه وصار بوجهي سراج شافني ابجي وعيونه حمر جر اديه وسحبني الغرفتنه اول مادخلت گال

سراج . لا صيرين انت والقدر عليه رحمه لأبوج كل الأريده منج تبقين يمي لان تعبت من هاي الحياه والله صرت اتمنا الموت

حوري . سراج مو گتلك مو حجيت وياك وگتلك اذا اكو شي ضامه عليه گولي ليش خليتي اسمع بالصدفه وانته تتوسللها تصبر عليك اريد اسألك سؤال واحد

وجاوبني بكل صراحه علي الله يخليك
صار شي بينك وبينها سراج تقربت الها موو حجيتها وبجيت بصوت عالي يمكن بوكتها جان عندي احساس

قوي صاير شي بينهم لان كلامهم مو مال اول مره يحجون كلامهم مبين اكثر من مره حاجين سوه وصايره مشاكل بينهم هواي بس اني ماجنت منتبها عليهم

سراج . راح احجيلج كلشي حوري تعبت واني احاول ابينلج كلشي طبيعي اني كل ماترحين لهلج اروح ابات يم ساره

حوري . هه ليش تخاف تبقه وحدك مثلآ لو شنو

سراج . بس اسمعيني حبيبي وداعت جهال ماحبها ولا طايقها بس انجبرت عليها لان وصلت لأهلها اني مامتقرب منها تعتبر اهانه الي هاي حور

حوري . ماريد اسمع اكثر من هذا الحجي سراج اريد اروح لهلي هسه اروح ماريد ابقه دقيقه بعد اهنا عيوني مغوشات گمت حيل ونضربت بالحافه مال ميز بأصبعي حسيته انشلع الاظفر من مكانه صرخت من الالم ومسحت عيوني بديه دنگت اجه سراج يركض

سراج . حبيبي شبيج تعالي اشوف رجلج شبيها

حوري . كلشييي ماريددد منك بس ابقه بعييد عليه الله يخلييك شفت دم طالع من اصبعي عرفته انشلع من مكانه بس موكلش انرفع حسيت الم روحي اكبر من

الم اصبعي لفيتها بلاصق للجروح وگمت طلعت جنطه خليت بيها ملابس للجهال والي وهو يشرب جگاير ويباوع عليه اجه وجان يجر الجنطه مني فتحها حيل

انشكت السحاب واطشرت الملابس كلها بالگاع ويباوع بعيوني ويحجي

سراج . لو تموووتين مطلعيين مناااا افتهمتتتي واذاا گتلج روحي معناها وحدج جهاليي ميرحوون وياااج مفهوووم

حوري . مو بكيفككك اروووح واخذهمم وياااي افتهمممت ما احس اله اجه عليه وضربني كف حسيت خشمي طگ دم ذب عصبيته كلها بيه بعد لابجيت ولا

طلعلي صوت مثل البنجني بس كل جسمي ضل يرجف احنه غرفتنه بالاخير صايره صوتنه مينسمع جوه ابد بس اليگعد بالصاله ومرات ميسمعون لان جهال وصوت

التلفزيون فه ميسمعون گعدت بالگاع وامسح بديه بالدم رفعت رسي وصحت بصوت عالي

يابه شوف اسويت بيه اطيتني هديه وشوف اسوه بيه لو باقيه عدل اخوتي وامي ماجان حالي هيج يابه اذاني حيل الرجال الهديتني اله ذلني وجاب عليه مره

بدون سبب مني ابجي واحجي جان گاعد على الجربايه والجگاره بيده اجه اتقرب مني اباوع الطوله جان لابس دشداشه بيضه گتله وخر مني جانت

بحضنك وتتوسلك تبقه يمها مو هنا جنت تنومها من اروح لهلي مو وخر مني لعبت نفسي منك قربني اله حضني بثنين ادي ودفن راسه بشعري ويجر نفس ويرجع يبوسني براسي ويهمس

سراج .والله ماحبيت وحده بگدج ولااكو وحده بگلبي غيرج صدگي وداعت جهالي اعز شي عندي بالدنيا ذول جاي احلفلج بيهم مصدگين

حوري . لا ماصدگ بعد بيك وخر مني

سراج . طلعه من بيتج لتفكرين اطلعين وذول يتبهذلون لوفكرتي تروحين وتعوفيهم حوري وداعتج كلشي يتصلح بس انطيني وكت كلشي ماريد حبيبه گلبي

حوري . وخرت ادي وگمت نزلت جوه رحت للحمام غسلت وجهي ورحت لغرفه خالتي اخذت الجهال وصعدت بدلتلهم ونومتهم ونمت قريب عليهم هو نفس گعدته لليل بدل وطلع استغليت الفرصه حضرت ملابس الجهال ونزلت المنتظر گتله وديني لهلي سراج گال خلي منتظر يوديج لان يتأخر منتظر ماگال شي صدگ رحنه اول مانزلت ونزلت الجنطه والجهال وگعدت سولفت لاهلي خابر عليه ماجاوبت لامره ولا مرتين اخر شي اتصل على عمار گله جاي اخذ الجهال بس سمعت هاي الكلمه انخمش گلبي خفت صدگ ياخذهم مني

ام سراج . يمه اطيهم اله وانت هسه نفسيتج تعبانه ارتاحيلج يومين وخابري يجيج

حوري . يمه ماگدر اخليهم يرحون شلون اغفه الليل وجهالي مو يمي اموت

عمار . حوري خويه ميصير حلو مشاكلكم بهداوه ليش توصلوها للجهال وتبهذلوهم متسوه ياعمري يعني هو من ازوجها اشجنتي متوقعه اكيد مرته ويروح يمها وحالها من حالج بس صدگي لو يحبها جان عاملها مثل ماعاملج لضغطين علي اطي مجال موگلج اطلگها خليها وراه هو يعرف يتصرف لتفشلي گدام اهله وعمامه اني حجالي وگلي هاي كلها كم شهر ويطلگها لتخربون عليكم وبينكم اثنين اطفال

حوري . عمار والله قبل اكثر من شهر گلي ست اشهر واطلگها وبعدين گلي سنه بس هو ميگدر لان انطه كلمه العمامه ولأبو تورط بيها شنو ذنبي تجي عليه مره واني كلشي مامسويتله ولا مقصره منه واذا گلك راح يطلگها عادي اني هنا ابقه منا من يطلگ صدگ يله ارجعله وجهالي ميگدر ياخذهم مني
جاي نحجي وندگ الباب راح عمار يفتح سمعت يسلم على سراج

سراج . السلام عليكم

ردينا السلام بس مارفعت وجهي ابد احس گلبي مشتعل نار بسببه گال

سراج . حوري هاي گدام اهلج احجي وارجع واگول اني وساره مو عشره عمر ولا راح اخليها على ذمتي لاتخربين بيتج وتهجولين جهالج امشي وياي وسمعي الكلمه لاتعاندين يله عيني گومي

حوري . ما اتحرك منا اله تجي وجايب ورقه طلاگها بيدك وتگلي طلگتها

سراج . يعني افهم من كلامج تبقين يم اهلج مو

حوري .ي ابقه وگتلك من اطلگها ارجع وياك بس هسه لا اعذرني لان هواي تحملتها بعد ماعندي طاقه اتحملها اكثر

سراج . ماشي براحتج بس اطيني الجهال اخذهم وياي لان ما اگدر بدونهم

حوري . بسرعه بجيت گتله اذا انته متگدر بدونهم اني هم ما اگدر بدونهم واني متواجده وياهم اكثر منك شلون ينطيك گلبك تاخذهم مني

سراج . اعذريني ما خليهم تردين تجين وياي امشي بيتج موجود ماتردين هسه اخذ الجهال وامشي

حوري . لا حرام عليك سراج لتضغط عليه بجهال الله يخليك اتفهمني شويه لتزيد القهر قهرين الله يخليك بس المنو احجي ابو راس اليابس اذا گال كلمه بعد

مصير اثنين بجيت وصرخت وملخت نفسي وهو ياخذ الجهال مني ويروح عباله بعملته هاي راح اغير رأيي واگله ارجع وياك اول يوم خلصته بجي على الجهال

ثاني يوم ماگدرت اتصلت بي ونفس الحجي تعال ارجعي هسه اجي عليج بس گتله ابد ما ارجع اذا متطلگ وفعلآ گدرت اصبر على فراگ الجهال وعمار

خليته يروح كل اسبوع يجيبهم الي ومرات سراج يجيبهم ساعتين وياخذهم ومرت شهرين واني وسراج على تواصل مستمر حسيت نفسنه مخطوبين يوميه

رسائل واتصالات واشعار وغزل بس يريدني اغير رأيي واگله تعال اخذني بس اني بعدني على اصراري مشتاقتلهم هواي كل يوميه ما انام اذا ما ابجي عليهم

حسيتها بعدتني عن عائلتي زوجي وابني وبتي كل ضحكه وكل سالفه وايامنا قبل اذكرها اشبع بجي واگول منين طلعتي خربتلي كلشي هواي اجاني عمي

ابو سراج راد يرجعني ومره اجه ابو ساره وابد مارجعت جان ردي الهم لو مقصره منه ومنكم عادي ازوجوا بس مابدر مني شي يخليكم تجيبون مره عليه

وسراج ابدآ ما بطل مني ومن محاولاته وياي اغير رأييي وارجعله وهاي صارلي سبع اشهر وسراج ما طلگها وگطعت التواصل بينه بس علمود الجهال اخابر

يجيبهم لو اسمع صوتهم واسده ابدآ ما احجي ويا ودائمآ اسمع من زمن تگول راح يطلگ بس ماعرف شنو المانع

وسراج يوميه رسائله اليه يعبرلي عن شوقه وندمه الي بس اني اقره بدون ما جاوبه لان مجروحه منه هواي بس مره وحده دزيتله لو حبيتني صدگ جان طلگتها

بس فضلت حبك القديم عليه هواي رد عليه وراها ودزلي راح اسوي شي يخليج تتفاجئين بتصرفي وراح اثبتلج اني شگد احبج

واني نرجس اكثر من خوات نشارك همومنه واسررنا لان من نفس العائله ونفس المعاناه باجر ينزللكم بارت نرجس وراح تعرفون شنو صار وياها ادعولنه ربي يسعدنا ويوفقنه

انتهت قصتي لهذا اليوم حبيت اشاركها وياكم واستفيد من كلامكم الجميل ونصائحكم الي انتو مثل خواتي والله اقره تعليقاتكم وحده وحده ونرجس هم وياي متابعه والي سأل على السيد الي عالجني اعتذر جدآ منكم ما اگدر اگللكم الاسم لأسباب خاصه بس السيد بكربلأء معروف جدآ وقديم جدآ وعلى ايده هواي عالم تشافت واولآ واخيرآ الشفاء بيد الله والله يبعد عنكم كل سوء وكل عمل شيطاني

وكل الشكر والأمتنان للكاتبه دينا الربيعي حبيبتي اشكرج جدآ على تعبج وياي وسردج الحلو ❤️

وماراح اقطع وياكم كل كم يوم راح ادز يومياتي للكاتبه وراح تنشرلكم شنو يصير ويانه واكيد راح نقره تعليقاتكم الجميله مع السلامه حبايب قلبي ❤️ احبكم جدآ

راح اگللكم يتبع . بس مو معناها انزللكم بارت كل يوم كل ما ادزلي حور شنو صار وياهم انزللكم بارت كامل حته تستمتعون بالقراءه واعتذر جدآ عن التأخير بس بنتي مريضه فلاونزا وتعرفون الأوضاع شلون تخوف ابدآ ماصار عندي مجال حتى اگللكم

باجر ان شاء الله انزللكم البارت الأخير بارت نرجس وتنتهي الرواية الجميله وراح انزللكم كل كم يوم بارت اضافي الهم وشنو صار وياهم

دمتم بخير ❤️