رواية ??هجير الشتاء?? الفصل الخامس والثلاثون 35 - بقلم Shaqraa

هجير الشتاء
الجزء الثلاثون

بهالفترة بقى سيوان يراجع ..
وكلولة شهرين ونرجع نعيد التحليل...
ماخليته يحس بكآبة او ينقهر..
حاولت انسي همه..
واعرف هو يحب اكوم ويا جريئة لان جنت اخجل هواي...
استغليت هالشي وبقيت اتجرأ وياه وهواي امور طعته بيها...
حجابي ضبطته ولبسي ضبطته اكثر..
ميك اب احط قليل...
وجان يضوج من كروبات الصديقات غادرتهم كلهم...
لاحظ هالشي بيه وحسيت نفسيته تحسنت وفرح...
قبل عيد الحب بيوم...
اتفقت وي خالتي ..
الي بعد ماسمعت بوضع سيوان تغيرت جذرياً..
وتحاول تسوي اي شي يخلي مرتاح...
بقت تتوددلي يمكن بمنظورها جان اني حتركه...
بهاليوم اخذت خالتي ورحنا للسوك ..
اشتريت فستان اوف وايت طويل ومخصر ع الجسم..
وياه شال وردي خفيف كلش وكعب عالي وردي فاتح ..
واشتريت ثوب نوم ابيض قصير للفخذ وستن قماشة وحيل حلو باللبس...
بعدها وصلتني امه لجيهان وراحت ..
دخلت لكيت عدها ازدحام سلمت عليها وفتت جوا...
لكيت شفق كاعدة بالصالة سلمت عليها ومشتاقتلها هواي صار مشايفتها...
كعدنا نسولف الى ان صاحتني جيهان...
غيرت رسمة حاجبي ورفعته كلش وخففته شوي لان جان ثخين...
سوتلي تنظيف كامل وشعري سويته احمر مثل شعر هويام..
خلصت الساعة ب٣ ونص..
كالت جيهان مفيد يوصلج ..كتلها لازم انطي سيوان خبر...
خابرت سيوان كتله ورفض رفض قطعي..
ياعيني مو تعرف بيه اخوي بالرضاعة؟..
ميخالف مرتي واني مسؤول عنج واني اجيبج واخذج...
ربع ساعة وتلكيني يمج..

صدك ربع ساعة واجه..
طلعت وياي جيهان ومفيد هو سلمو عليه..
بعدها ترخصنا منهم ورحنا..
اول مصعدت صوفر بس بلحن...
ولج مشمش رحميني شنو هالجمال..
يعني منين الكاها من الخدود الشفايف ال..
يااا شوكت تجوز من هاللسان المتبري منك..
هسه ماكافي توبتينا يم الناس عادي خلي بس يمج...
ههه اي حبيبي عيب كدام الناس...
صدك شوكت نروح؟
ورا صلاة المغرب نطلع محضرة كلشي مو؟
اي كلشي حاضر...
لبست فستاني وميك اب كامل وترتبت..
واكف وراي ويصفر ..ولج اريد اكابل ...واكعد ماريد اطلع...
ههه عابت يلا يلا خلصت لتسويها صدك...
صدك استعجلت خفت منه وطلعنا..
رحنا تعشينا وبعدها طلعنا للبستان...
وصلنا دايخين وتعبانين...
مجرد ماوصلنا نمنا..
يوم ثاني صادف عيد الحب..
اني موصية ع كيكة يوصلوها الي..
واشتريتله ساعة ماركة وغلفتها ..
وجنت جايبة وياي ومتسوكة من طلعت وي خالتي هواي اغراض...
طلعتهم وبلشت ارتب بالغرفة سيوان جان يمي ..
بس شافني ارتب طلع...
كملت التزيين وطلعت ثوبي الابيض مالت النوم..
هالحجي جان وقت عصر..
رحت سبحت ورطبت جسمي وشسورت وميك اب تمام..
لبست الثوب وفوكة روب وتمددت ع السرير..
جنت اراسل سماء ودك الفون..
اهل التوصيل جابو الكيكة..
لبست عباية ولفية الشال عدل بس وجهي مال عرس ههه...
طلعت تمشيت لبيت ابو كريم حتى يستلمها..
طلعتلي مرته ووصيتها ورجعت..
ورا شوية جابتها الي للبيت وتشكرتها وراحت...

بقى بالي يم سيوان وين راح هالكد طول..
صار مغرب وهو ماكو..
كمت صليت لان متوضية قبل لا امكيج..
كملت صلاة واني انتظر...
خابرته كال هسه جاي..
ورا نص ساعة يلا اجه..
بصراحة ضجت ليش مو شافني احضر ليش غاب هالكد..
يعني ممهتم ولا اله خلك لحيته جانت دوم مرتبة وتخبل هسه مخليها بلا ترتيب...
ووجهه اصفر وضعفان..
نفسيته كلش بس اني هم الي حق عليه...
كلت اثكل وجهي شوي حتى يحس بيه انقهرت من عافني...
سمعت حركته قريب الباب اتخذت وضع الميت..
مددت ايدي بسرعة وغمضت...
اول مادخل ضربت ريحة الكولونيا بخشمي..
بقيت اشتمها واتنفسها..
هو واكف فوك راسي...
دكومي عيني لو كل الناس هيج تشتم جان صار خشمها بكد ....
فتحت عيوني متفاجئة وزادت الصدمة من شفت الترتيب والجمال...
معدل لحيته ومشذب شواربه ووجناته تلمع...
ابتسمتله وهو كعد يمي..
كومي خل نحتفل..
اممم مهتم للحفل انت اشو شفتني احضر ورحت...
بعدين تعرفين ليش رحت كومي هسه...

طفرت كدامه وفتحت الشمع وطفيت التيبلامب ...
هو جان نازع سترته وباقي ببدي ابيض وجينز ثلجي..
لزمني من خصري وجر الروب...
هذا تذبي يمي مو زين وقابل بهذا..ويجر بالثوب مالتي...
نيمت راسي ع جتفه واحنا واكفن يم الميز..
اخذ السكين ولزم ايدي...
تعالي خل نذبح الكيكة ضحية لحبنا...
ههه شنو هالجملة الغريبة..
كرصني بجتفي...لعد سمعي الاغرب..
اني رفت وجهي لوجهه..شنوو!
سوا حلكه مثل حركتي بحلكي لم شفافه..ماكوووو..
ههه لتقلد..
لا مااقلد بس شوفي رح اذبح الكيكة الي ع الميز واكل الكيكة اليمي...
يااا انت ابد متعرف تصير كيوت..
اشو انجبي رجال مشورب والشعر حتى بعيوني تكلي كيوت...
حضنته حيل وضحكت...
قطعنا الكيكة واخذها وحطها بحلكي...
وانوب شلون قطعة شكبرها..
اختنكت واني اضحك ماكدر عليها...
تقرب وحط شفايفه ع شفايفي والتهم الباقي..
واسترسل لركبتي وايده تتحسس بكل مكان...
دخت بيده وذبت لزمني كال اوكفي لا نحترك..
نفخ الشمعات واخذني للسرير..
وهو يسقيني بحنانه وحبه الي احسه كل يوم يزيد اكثر...

بعد ما مر وقت وكمت طلعتله هديته ...
حيل عجبته ومدح بذوقي...
راح اخذ السترة من الكرسي وطلع علبة من جيبها...
باسني بين عيوني وكال..احبج بنتي وربي لا يحرمني شوفة طفل منج...
فتح العلبة جانت ع شكل وردة جورية كبيرة...
طلع منها سوار عريض بي اسمي واسمه ومرصع بالماس من الجهتين...
حبيبتي هذا صغته الج ع مود عيد الحب ونسيت اجيبه ..
من شفتج تحضرين يلا تذكرت ورحت ..
حضنته حيل وبست باطن ايده..
تعيش ايدك يعمري يمكن حيصير عندي طقم..كلادة بيها اسمي والحلقة وهسه السوار...
وليش ميصير طقم تدللين ..
اصوغلج احلى تراجي حتى يكمل...
ههه طلعت صدك مرت صايغ..
لعد شعبالج مسامعة المثل..الصبي مينصح بس لجنته ...
هههه سامعته ...
بعدها طلعنا تعشينا ونمنا وقت متاخر ..
يوم ثاني رجعنا لان وراها عندي دوام...
شوي نفسية سيوان ارتاحت حسيته...
وبعده مستمر ع العلاج..

بس الغير نفسيته وحسيته انقهر بس ماحجه ..
بس عيونه تحجي كلشي...
بيوم رجعو عذراء ويامن من شهر العسل...
وبشرتنا بحملها..
اهله حسيتهم فرحو بس عيونهم بيها هواي كلام..
وهو بوس يامن وباركله..
بس من رحنا للغرفة ضل يطحن بالجكاير..
وكل صفنة يصفنها توصله لابعد نقطه بالتفكير وترجعه....
بعدها بفترة رجع فحص نسبته..
وهالمرة متراجعة اصلاً...
تخبل من سمع بقى ينفخ وسال الطبيب..
ليش النسبة تتراجع واصلا صار حمل عد زوجتي من اول شهر زواج؟
الدكتور طبعا مطول باله وياه كلش ..
كله الدكتور حاليا مجاي نلكى سبب عضوي وهالحالات تصير هواي...
اصلا اكو ازواج يخلفون طفل ومن يحاولون يجيبون ثاني ميصير حمل..
يراجع يلكى نفسه عنده عقم..
ياعزيزي احنا تعرضلنا لحروب واشكال اشعاعات..
مو زين وبعدنا عايشين...
بس انت اريد اسألك تشرب؟؟
حجه بحسرة وصوت تعبان..
جنت اشرب بس تارك صارلي فترة..
حاليا بس اركيلة وجكاير...
ساله الدكتور باهتمام..
تشرب جنت اركيلة ومشروب؟؟؟
اي كلش هواي جنت...
نفخ الطيب...اي يابابا مدمر نفسك...
اركيلة وجكاير وشرب ؟؟وانت بعدك بالثلاثين...
هسه تركت لو جاي تزغلط؟؟
لا دكتور تركت كلش قطعي...
اي اترك احسن ويرادلك وقت حتى جسمك يستعيد نشاطه ...
استمر ع العلاج وقلل من التقارب ..

بعدها استمر ع العلاج وبين فترة وفترة تجي الحالة الجنونية..
يتعارك وياي ومرتين احصلي راشدي..
بس ورا ميكفخني الكاه مچوي ايده..
رغم الطبيب منعه مو الجكاير وفعلا تركها وقلل كلش لان ميكدر يتركها فجأة...
بس لاحظت كل ميضربني رغم هو راشدي خفيف حتى مااتأذى...
بس ردة فعلي بوقتها تقهره اكثر..
مااضوج ولا ابجي..
بس احضنه واهدي بي واحاول اريح اعصابه...
بس من شفت اثر الحرك بزنده واضح...
تقربت منه وجان قبل يوم ضاربني راشدي..
لان جان مهموم كلش وكتله طز بالاطفال عساهم لا اجو...
انقهر وكفخني...
يوم ثاني من سفت زنده قلبي وجعني..
تقربت لمسته بيدي ...ليش تأذي نفسك؟؟
تعرف تأذيني قبلك ..احس هذا الحرك بيه ويوجعني..
تنهد وحجه بحسرة...
خليني اطلع حركتي بنفسي ..كل مرة امد ايدي عليج واكول مااعيدها...
بس اني ..... ...
تقربت وكعدت بحضنه..
انت صدك .... لان كم مرة توبتك من الفشار وترجعله...
وهسه توبتك من الحرك وهم ترجعله..
اريد اعرف انت ليش عنييييد؟؟
دكومي من حضني ترى اني منا عقل مابراسي وانت بحضني...
والدكتور يصيح قلل...
هو المكابلج يكدر يقلل...
خرررب هبل...
شنو هذا حلقتك وين؟غير نزعتها حبي الدكتور كال انزع شكو ذهب لابسة...
جاي اسوي بلاتين نفس الدزاين هاليومين تخلص...نشوف وين توصل..
كل يوم عافين ونازعين شي...
هذا الدكتور رح ينزعني بالنهاية حتى هدومي ولو هو نزعني..
يبوووو اكلك لسان هذا لو رشاشة يووومه...

استمر الحال هيج ..نسبته متذبذبة...
وهو نفسيته متحطمة...
اني شوي الدوام مغير نفسيتي..واشوف سماء هناك وارتاح...
اقترحت علي نروح لاربيل ويسوي فحص..
جان شهر الرابع والدوام بعده...
وماكدر اخذ اجازة كل يوم ...
انتظرت للخامس وسافرنا...
والنتيجة جانت نفسها ونفس الكلام...
ضاج ورجعنا حتى مطولنا...
بهالفترة خابرني حسام...
وعزمني ع عرسه واخذ رقم سيوان وهم عزمه...
هنا قبل نروح وكال اجي وياج...
واني خفت يلتقي بكرار وتطلعلي بلوة جديدة...
خفت اكله لتروح ويتحسس...
اجه يوم زواج حسام ورحنا اني وياه..
اشترينا ملابس سوا..
اني اخذت فستان بيجي وحجاب تركي زيتوني ..
وكعب عالي زيتوني..
وهو لبس قاط بيجي والقميص زيتوني..
الرباط ميرتاحله ومقبل يلبس...
بس طلع فد شي بقيت اباوعله غيرانه عليه اخاف وحدة تباوعله...
اخذت جزداني البيجي بيدي ولبست اكسسواري ...
لزمني من ايدي وطلعنا...

للحكاية قليل