رواية ??هجير الشتاء?? الفصل الثاني 2 - بقلم Shaqraa

مرحبا حبايب قلبي..اسفة تأخرت عليكم بس عندي ظروف شوي وماكدرت اكتب..
رح نبلش بقصة شتاء وانشالله تعجبكم..
مشتاقتلكم فرداً فرداً😘😘
واحب اشكر مروشة SMRA_srmde  ع تصميم الغلاف وتعبها وياي

شتاء
الجزء الاول

جانت الدنيا صبح والجو بارد نهاية الشهر الثنعش..
فزيت على صوت امي تكعدني اني واختي ..
بنااات كومو يلا صارت الدنيا ظهر ..
نعرف جمعة بس مو تنامن للعصر يلاااا ..
واحنا متغطين ماودنا نكول لان دفو ونعس والفراش بالشتا مينعاف..
كالت امي..
يلا اذا متريدن ابقن اني اروح وحدي لبيت خالكم عزيز..
هي كالت هيج احنا طفرنا وطارت النومة وتنشطنا..
نحب نروح لبيت خالي كلش علاقتنا حلوة..
ضلت تضحك علينا وكالت..
استعجلو حتى نخلص ونروح قبل ليصير ظهر..
باوعنا للساعة بالتسعة ونص..
كالت اختي سماء..
ياااااا وماما تكول كعدو صارت ظهر طلعت ناصبة علينا..
ضحكنا وكمنا حتى نخلص شغلنا ونروح....

************
اني شتاء...سماني خالي بهالاسم لان جان يحب وحدة مسيحية اسمها شتاء..
وخطبها واهلها ماقبلو وجدي كله اذا تزوجتها اتبرى منك..
ورغم تهديدات جدي راح وخطبها وجانت ماما تساعده وتوصل بينهم..
بس البنية اهلها زوجوها وسفروها فجأة اكتشف خالي هالشي..
لا حجت ولا كالت ابد ..
وماعرف شنو الظروف ولا شلون وشوكت المهم راحت..
وهو سماني ع اسمها ..ومنو يسمع باسمي يستغرب ويعجبه..
يكلولي اسمج مميز مثل ما انت مميزة..
اني بيضة بياض صافي كلش وملامحي حلوة..عيون كبار وملامح نازكة حلك صغير..
بس قصيرة وناعمه..
صح جسمي انثوي ومو ضعيفه..
بس شكلي صغير وناعم لان قصيرة ..

اني طالبة سادس علمي..ومستواي عالي الحمدلله واتمنى ادخل طب لان احب التشريح..
طبيعتي مااخاف بسرعة وع كولة...
ماما قلبج قوي..
وعندي اخت وحدة اسمها سماء هي اكبر مني بسنة وتدرس مرحلة اولى هندسة نفط..
بابا...يستحق كلمة بابا؟؟؟؟مااعرف..
بابا شخصية عصبية انانية معقدة..
يموت من شي اسمه بنات يتعقد...
جان يريد ولد من ولدتنا امي اني واختي يأس منها..
كلها متجيبيلي الولد خلاص لتحبلين بعد..
بس هي رادت حياتها تستقر وحتى يرضى عليها حبلت ..
وماكالت لبابا لحد مابرزت بطنها وعرف..
ومن عرف كتلها وحبسها بالغرفة وطلع..
واحنا بوقتها اطفال ومن شفنا امي هيج بقينا نصرخ وطلعا للجيران..
اجت جارتنا ام ناظم وفتحت الباب ودخلنا لأمي..
جانت تنزف وملابسها كله دم وحيلها مهدود..
المرة بسرعة اخذتنا وكلت لامي راجعتلج صبري ..
اخذتنا يم جنتها واجه ابنها فتح السيارة واخذو امي..
بوقتها امي فقدت الطفل ..
الي طلع ولد والي من اعرف ابوي تخبل وكلب الدنيا،،
لان ولد ومات وهو شكد جان يتمناه..

من وقتها بعد امي ماصار عدها حمل..
وابوي معاملته سيء للأسوء وياها وويانا هم ..
بس امي معوضتنا وتموت علينا..
حنينة وتهتم بينا كلش وماتقصر علينا بلبس ..
باكل بطلعة بكلشي توفره النا..
وابوي ملتهي حياته حياة اعزب..يسهر ومرات يجي شارب ويتعاركون هو وامي لان عنده سوالف نسوان..
بس امي صابره لخاطرنا..

جنا عايشين بمستوى حلوو ..لان امي اصلا من عائلة مرتاحة مادياً..
وابوي موظف بالنفط وعنده كم عقار مأجره ويجي وراد كلش زين..
بحيث احنا من زمن الحصار جنا ماحاسين بالحاجة..
وامي مدبرة وتحط الفلس بمكانه وماتبخل علينا بشي...
مرت السنوات وكبرنا وابوي معليه بينا..
حتى من يشوفنا يدور وجهه ولا كأنه بناته...
فد يوم خالي عرض ع ابوي يفتح المحلات الجوا العنده بالعمارة ويستغلها..
لان جان مأجرهم لناس...
خالي نسيبة خسران وراد يبيع بضاعته وعرضها ع ابوي وقنعه بالفكرة...
وابوي درس الشغلة وشافها مربحة وقبل...
فتح المحلات وجانت مالت جبب وعبي خليجي ..
ولان ابوي بعده ميعرف للشغلة ..
ساعده نسيب خالي وجان ابنه اليمشي الشغل..
وفعلا مشى الشغل وانرزق عليه بابا كلش..

وتقاعد من وكت حتى يلزم الشغل ويكول اريح من الوظيفه ودوختها..
وصار شغله بالسوك ومعروف وجماعته يومية جاي خطار شكل للبيت..
كثرت سفراته بحجة البضاعة وضل اغلب وقته مو يمنع..
خالي عزيز ماترك امي واقل شغلة تحتاجها تخابره يجيها ركض..

جانت امي تاخذنا ونطلع نتسوك ونفتر اني وسماء ومرات احنا وبيت خالي سوا..
خالي عزيز عنده بناية بعمرنا و٣ اولاد ..
واحد كبير متزوج ومشافر لغير محافظة لان شغلة هناك..
وواحد بالجامعة مرحلة اخيرة وواحد بالاعدادية..
وعلاقتنا بيهم قوية هواي..
وحتى خوالي البقية وخالتي قريبين منا بس خالو عزيز غير شكل...
طبعا خوالي ٣ هم صفاء وعزيز ومراد..
مراد الجبير الي هو ايد جدي اليمنى..
وخالتي وحدة وهي وفدوى..
خالتي وامي علاقتهم حلوة عبالك بعدهم ممتزوجات وبيت واحد ..
من يجتمعن نحسهم بعمرنا..
ودوم نحب جمعتهم والاكثر يتحمعون بيت خالو عزيز..

فد يوم كالت امي امشو نروح لبيت خالكم لان متجمعين هناك الاهل..
ورا ماكعدتنا امي وسحلتنا من الفراش كوة ..
لان جمعة وواحد ميشبع نوم خصوصا بدفو الفراش..
كمنا وتحضرنا وخلصنا شغلنا..
بابا بوقتها كالعادة مسافر..
واحنا اخذتنا امي بسيارتها لان هي تسوق..
قفلنا البيت وطلعنا لبيت خالو ..
وصلنا ولكينا خالتي هناك وعائلتها ..
دخلنا المطبخ وساعدنا بالغدا..
وشقاا وسوالف والوقت مينحس بي الى ان خلصنا غدا وكعدنا نشرب جاي..
وجابو الولد الدومنة وتجمعنا اني وسماء وميقات بت خالو و أوان بت خالتي هي بعمرنا (وعدها خالتي بعد ولد ثنين كبار ومتزوجين)...
وحسام ابن خالو الي بالكلية وبسام الي بالسادس ...
كلنا تجمعنا وبدا الغش واللعب..
اني ماعرف اذا مااغش ويخافون مني من العب لان لازم انصب عليهم...
بس لعبنا وعياطنا وكل شوي وعاطو بينا الكبار لان صوتنا عالي..
سمعنا اندك الباب وعاط خالو ..
ولك حساااام كوم افتح الباب تفلش..
راح حسام ويدردم ويكول لتغشين انت بالذات اشلع خدودج بس افتح الباب واجيي..

وراها رجع حسام ويا ولد شكله ثلاثيني..عرفنا عليه كال هذا ابن خالتي كرار  ..
يعني يصير ابن اخت زوجة خالي ..
سلم على الموجودين وباس راس خالي وزوجته وكعد ..
سلم علينا وعرفنا عليه حسام انا مباوعت عليه صح ممدنكة جنت..
بس نظري ابد مو يمه جنت كل همي اغش وابدل الصايات ..
وفعلا ذبيت من صايات ثنين وي مالت حسام بلا ميدري حتى ادومن بسرعة..
كال حسام لكرار تعال كال..
تعال يمنا بس نكمل هالداس واريدك تسحل الالي بالي..
هو كله..
تدلل خويي اني خبرة بالسحل بس اطلب..

اجه يباوععلنا توه بلشنا نلعب وحسام كمشني من شعري ..
لج غشاااشة عرفتج متكعدين راحة ..عرف اني مخلية صايات وفركشو اللعبة ودخل كرار باللعبة وبلشنا من جديد..
وفعلا بدا يسحلني وانيي اكابر ومااريد اخسر..
ضجت كلش بقيت اخزره وهو يباوع ونظراته ماعرف افسرها ومبتسم ابد ماارتاحيتله ..
وخفت اترك اللعب ويكول غلبتها ! سحبت الفون ودزيت مسج لميقات كتلها فضي اللعبة بسرعة..
ورا شوي كالت ميقات ..يلااا امشو نحضر العشا كافي لعب..
كمنا وحسام منتصر لان فازو عليه واني اسوي نفسي مبتسمة واكابر...

رحنا للمطبخ بدينا نحضر واجو يمنا وحسام يضحك وكرار ابتسامته مستفزة..
كال حسام ..
ايييي كل قوي الله يهده ههههه ..
كتله عزيزي ترى مافزت بزودك لو مابعض الغشاشين انت تبقى تاكل هزيمة مني،..
ههههه خرب انضغطت انضغطت ديلا اعوفج لا تموتين ههههه من القهر..
راحو برا واني مقهورة من هذا خشمة بكد راسه ويبتسم بنصر ..بسيطة اردها الك ...
مر الوقت وكملنا عشا وكرار مارجع للبيت رايح لاهله..
بقينا سهرانين احنا الگروب الشعوذة ..
نسولف وكل واحد يحجي عن مواقف ..الى ان غفينا..
يوم ثاني سحلتنا الوالدة من الفراش كالعادة..
كوومو بنات امشو نرجع للبيت فضوها...
فتحت نص عين كتلها..
ماما مو كلتي باجر ليييش الخيانة ..
هههه ام لسان كومي كومي اليوم عيد زواجنا واريد افاجأ ابوج ..
لان اليوم يرجع وناسي عيد زواجنا بس اسويلة مفاجأة مثل كل سنة..
فتحت عيوني عدل ..شنوو هالجمال ماما فدييت..
شفتها صابغة شعرها احمر قاتم ..
حواجبها مرتبة ووجها يضوي..
اوف ماما مااطلع وياج بعد ما...
عزا العزاج ولج شبيج؟
شبيه اغار اذا امي هيج صاكة منو يباوعلي يحظي..
يلتهون بيج...
كفختني ومستحية ..ولج ام لسانين مو عيب تحجين هيج كدامي انوب تدور معجبين القزمة..
يوووومه ترى مو قزمة مو قزززمة ..
اسمي ناعمة انثى..
دولي انثى شكلج مال رقيقات بس كن تعيطين صعيدية وتطلب ثار..
مشكورة حجية يصير خير هههه...

كمنا اني واختي بدلنا وتريكنا اباوع الساعة ب11 يووو..
اني عبالي بثمانية شكد مطفية..
سلمنا ع بيت خالتي وطلعنا ..
امي رادت بنزين رحنا فولنا وبالطريق اخذت كيكة وشمع..
رغم ابوي يعاملها اسوء معاملة..
بس تهتم بادق التفاصيل وياه ومدللته...
صافنة عليها وهي تسوق سألتها..
ماما عاجبني اصبغ دانتيلا..
ومدام عدكم حفلة ذبيني هسه ع جيهان اني وسماء وابقو لوحذكم..
طبعا جيهان صديقة امي من ايام الشباب وعدها صالون ودوم نروحلها...
حتى ابنها اني راضعة ويا يعتبر اخوي بالرضاعة..
دارت ماما طريقها وصلتنا لجيهان سلمنا وفتنا..
لكينها عدها عروستين ..
كعدنا نباوع اني واختي ونبسبس ونضحك..
وحدة شعرها كيرلي لحد اذنها..
وتعت بي البنية بالسشوار ومينزل ..
اخر شي باوعتنا جيهان طكينها ضحك..
جانت جيهان تشتغل ببنية عدها والبقية يشتغلن تاتو وحف ..
جان الصالون واسع وبي خمس بنات وجيهان المديرة..
جيهان متشتغل لاي وحدة لان هي دارسة بدبي ومطورة مهنتها وبأيران هم..
بس احنا تشتغلنا بايدها ...
كتمت ضحكتها كالت..
بنوتات فتوتو جوة يم شفق اخذو راحتكم..
احنا كمنا جوا شفق بتها جانت تسوي الغدا واصلا صديقتنا...
كعدنا نسولف وملتهين...
صارت بثنتين الظهر ..اجت جيهان تغدت كالت بس نخلص غدا نبلش..
ساعدنا شفق بالاكل والترتيب ورجعنا للصالون ..لأن هو من ضمن بيتها ..

صبغتلي شعري وسوتله بروتين وكملت...
باوعتله فد شي يخبل ..لان هو اسود والاطراف سوته ازرق..
حيل عجبني سماء شافتني تشجعت كالت اريد اني هم..
بس هي صبغت الاطراف وردي..
تقريبا ساعة اربعة ونص خلصنا ..
كالت جيهان مفيد يوصلكم خلو امكم مرتاحة..
وصدك اجه مفيد وصلنا ويسولف ويانا وفرحانين بشكلنا وشعرنا...
نزلنا وسلمنا ع مفيد وتشكرنا وراح ..
فتنا للبيت جان هدوء وشتا اصلا النهار قصير بسرعة تصير ظلمة..
دخلنا للغرفة بدلنا ونريد نروح لأمي ناخذ رأيها باللوك الجديد..
دكينا الباب غرفتهم وننتظر..
ورا شوية انفتح الباب واحنا نتسابق منو تفوت اول...
بس طلعت بنية شابة منعرفها!!
تخوصرت وكالت ابوكم نايم خير رايدين شي؟وترفع حاجب ومبتسمة بحقارة...
جمدنا من الموقف بقينا صافنين ..
تالي جريتها من كلابيتها لج هيييي انت منو!!؟
ضحكت واندارت تريد تسد الباب رجعت حجت..
صدك ههه شوفو امكم خطيه بس لا ماتت!

للحكاية بقية..
بقلم شقراء قمر كانون