رواية حكايات من بيت جدي الفصل الأول 1 - بقلم مريم اماسي الليل

حكايات من بيت جدي
قصص اماسي الليل
رواية حكايات من بيت جدي

#حكايات_من_بيت_جدي
هكذا الحياة

حين تغيب عن مكان ...اشخاص ستتغير وانتَ... كذلك  ...وحين تشتاق للعوده عليك ان تدرك

ان الماضي ولى والتغيرات حدثت بالفعل

شوقك ليس كفيل بجعلهم يعودون كما في ذكرياتك

عنهم

ولا انت ستعود كما كنت

لذا حين تغيب ...لاتعود إن كُنت لا  تملك طاقه

للبدء من جديد

لان ما تجده لن يسرك وشوقك وحده لن يغير شئ بل يضرك

عذراء: بيت جدي من بيوت ايام زمان .... من بيوت المناطق الراقيه الي مساحتها ... تتعدى الالف متر ...

اوصفلكم البيت .... باب اسود عالي .... وكراج طويل يكفي ٣ سيارات ... وحديقه عامره مثل الجنه ... بأشجار البرتقال ... والزيتون والورد الجوري

هالحديقه شاهده على لعبنا .... وضحكنا ...

ممر ضيق يودي  للمطبخ ... وبصف الحديقه الصاله .... بعدها كليدور... مليان نباتات اللبلاب ... ماشيه على الحايط ... بعدها هول چبير بأرقى الاثاث  ... بنهايته باب يودي على ملحقات البيت .... ٤ غرف نوم .... غرفة بيبي وجدو ... ( ياسر ومحاسن ) هالغرفه مكان مقدس ممنوع ندخله ...

وغرفة( عمي قيصرو مرته امال) ... وعمي (سعد ومرته نجاة) وغرفة (امي سعاد  وأبويه معن )

اما الاحفاد .... اني  عذراء 

وبنات عمي سعد مريم وهويده بغرفه جبيره ... بيها ٣ اسره ومكتبه وميز تواليت وخزانة ملابس من خشب الصاج  ب ست ابواب ....

ومكان مثل ملحق للغرفه نلتم  بي وقت  اللعب   ....

والغرفتين الكبار للولد .... اخويه وليد وولد عمي قيصر ( سلوان وسنان )وابن عمي سعد م(ميثم ) محتويات غرفتهم  اربع  اسره ومكتبه 

والغرفه الثانيه  غرفه معيشه  بيها تلفزيون وفديو ... ونص تخم قنفات .... واللعابهم ....

طفوله حلوه بيها معاني البراءه والحنيه .... تخلى من الحقد والحسد

تكاتف ... اخوه وقلب واحد

جدي ياسر ... مثال للقوه والسيطره خيمه البيت .... الكل تهابه ...

على قدر قساوته ويا الكبار حنين علينا وطفل ويانا ... ساعات يصعد ... يقفل الباب ويلمنا بالهول الفوگ... يلعببنا  ... ودائما ينصحنا 

( طول ما انتو قلب على قلب محد يكدر يفرقكم صح انتو مو كلكم اخوه لكن تعيشون بنفس البيت وكل واحد منكم مسؤول عن هالبيت ولازم يحافظ عليه حتى لو دخل غريب بينكم... تبقون مرتبطين بدم ).... هالجمله  جان   كثير يكررها بين حين وحين

الشغله الوحيده الي جنت  امقتها بشخصيه  جدي هي ضربه لبيبتي محاسن  ... جنت  استغرب لطبيعه  علاقتهم ....

شگد يحبها ومخليلها كلمه بالبيت ... لكن ... من يقفل باب غرفته  ...

بساعة العصبيه ... نسمع مشاكلهم  واحيانا  يمد ايده عليها  .... وورا ما يطلعون  من الغرفه .... احس  بيبيتي ورا كل يمد ايده عليها   تحبه اكثر وتتوددله اكثر  ....جنت  احسها انسانه ماتملك  كرامه .... احاور نفسي بأستغراب

شلون تكدر تحبه  وهو قبل شويه قسى عليها

ايامجنت .... اوگف بوجه جدي .... واعاتبه لان يضربها .... ما اشوف منه رد غير الابتسامه

واذكر كلمته انتِ قويه .... الي مكدروا علي الكبار انت كدرتي عليه

جان سنان ابن عمي ... يخاف عليه من اصير عصبيه واوگف بوجه جدي .... واحرض بيبي عليه ....

يجرني حتى ما اكمل كلامي واصعد اللعب وياهم

بيبيجانت   تگلي .... لا ميضربني ... هو يحبني وتضحك

جنت  استشيط غضب .... واعاند اگلها لا ضربج واني سمعته

الكبار كلهم يلهون نفسهم الا  خزرة ابويه تردعني بكل مره ... لكن بعد كل  مره ... اصير اقوى  من المره الي قبلها ... ما اخاف من الظلم ... واحجي الحق ... احيانا ازعلعلى  جدي بالايام

وبهالايام احس عليه بكل ليله .... يقبلني  ... واني نايمه ومرات احس من يشيلني وينزلني انام بصفه ....

جنت ادعي النوم لكن  اسمع كل كلمه من كلامه

واني بحضنه

ياسر: انت البنيهالي جنت  اتمنى الله ينطينياها .... وانطانياها

من صلبي ... ومن اعز ولدي ....

انت الي راح تشيلين اسمي واتباهه بأسمي من اسمج والي  راح تكونين عليه من تكبرين .....

كبرت ....وتبدل الكلام لأمور تخص المستقبل جان  يذكرني كدام بيبي .... وهو فخور بيه

(بس هاي الي توكف بوجهي وما اكدر اردها ولا ازعلها ... هاي ما انطيها لغريب ... اخلي سنان ياخذها لان بس هو الوحيد الي يكدر عليها .... ويوالم طبعها .... )

هالكلام بقى يرن بأذني كل ما  اكبر سنه  احس بديت احب سنان .... وقربه مني ينطيني طموح وقوه .... احسه الوحيد الي مسيطر عليه وعلى مشاعري والوحيد الي ما اكدر اوگف بوجهه

وكلمته عندي  مسموعه ....

بقت شخصية جدي مبهمه عندي .... على كد ما احبه ... اكو امور بأطباعه ما اتقبلها ولا احبها وصارت حاجز بيني وبين افكاره

... شگد  ما منحني القوه  وخلاني شخصيه راكزه والها احترامها عند الكل حتى ويا ولد عمي وبنات عمي .. اكو غصه بقلبي منه

كبرت وصارت ونستي الكعده والسوالف ويا سنان ....

جنت   اشوف الفرحه بعين جدي ويا كل مره يدخل يلگاني اضحك ويا سنان .... ويفرح من يكون سنان  مهتم بيه وقريب مني ...

اما بقيه افراد العائله  وشخصيه كل واحد منهم ابدي بوالدي 

معن( اب ل عذراء ووليد  )  ... انسان طموح وحياته كلها هدوء ودراسه واغلب الوقت مختلي بنفسه يقرا كتب ... شخصيته قويه ... بالهدوء والتفاهم يثبت كلمته ووجوده

  عكس امي انسانه عصبيه ... قليلة ال صبر تمتلك صفة المقارنه  والتنافس ويا الغير .... ( عينها على الي عد غيرها ) وهالشي متعب ابويه لذلك دائما اشوفه بعيد عنها ... على الرغم من حبه الها لكن ... يتجنب التصادم وياها ... مخليها ... براحتها ... تفضفض الي بداخلها  لكن بالنهايه كلمته هي الي  تمشي

عمي قيصر( ابو سنان وسلوان )  مثال للالتزام والحرص جان  مقيد زوجته  ... بغيرته الي توصل حد الشك ... جان  اكثر شخص يتودد لجدي وماشي على مرامه بالصح والغلط ...جنت  اميز   التناقض بشخصيته  ملتزم ويعرف الله ...وميعرف حق الله  ويأيد جدي من دون ما يكون حقاني 

غير عن  زوجته عمه امال   انسانه جدا محترمه مثال للام الحريصه الي تحاول تحقق طموحها بولدها وتزرع بيهم ... كل الامور الايجابيه ... وتوجههم للدراسه .. وقايمه بالامومه على اكمل وجه ... انسانه مضحيه ...ملامح  وجهها  جانت  تعبر عن  حزن وتعاسه تحاول تخفيها بالضحكه الهادئه ...

عمي سعد ... انسان ضعيف ومهمش الحل والربط بأيد  زوجته

عمتي نجاة  كانت مهمله  لاطفالها  همها لبسها ومكياجها وكعداتها وطلعاتها   والسبب من عمي الي ما اله كلمه عليها ولا  على بيته واطفاله ولا عنده حرص  ... جدا  متأثر بالمظاهر  ...غير عن  جدي وابويه وعمي قيصر  ..

ماجان  غيور على مرته بالرغم  من انها جدا جميله ... جان  يتفاخر بيها كدام الناس .. حتى بلبسها متحرره  وتظهر مفاتنها

احيانا جنت استغرب  من يتغزل بيها كدام الكل ... كأنه سلعه مشتريها ويثير غيره الي حوله  انهم ما يمتلكون مثلها  كان هالتصرف منه يمنحها العنجهيه  بتصرفاتها ... وضحكتها العاليه  ...جانت   كتله من التفاهه ماتمتلك  شي تتباهى بي غير جمالها  ... الي تحاول تبرزه بكل فستان ... ترتدي ....و  دائما ... تمدح بناتها وجمالهم كدام الناس ... وعمي نفس الشي

ما جانت  مهتمه لشي اسمه دراسه ومستقبل دائما تردد

بناتي وابني بجمالهم ... يحصلون الي يريدوا ....

اما اخويه وليد ... عباره عن نسخه صغيره من جدي يحب السيطره وفرض الرآي ... ويستعمل القوه ... حتى يجبر المقابل يسوي الي يريده ...لكن بنفس الوقت  شخصيه عاطفيه تتصف بالحرص والاحساس بالمسؤوليه  وغيور جدا على عرضه  ...

اما سنان ... مثالي بصفاته الهادئه .. صاحب مبدأ  قوي الشخصيه

ومحترم من الكل ... ودائما يحسسنا هو الجبير المسؤول عنا  ... مثل الاب الصغير

عطوف وحساس لدرجه يحس بكل واحد بينا  ... اذا فرحان او حزين ...

اما ... سلوان  انطوائي متأثر بشخصية عمي قيصر  ... من جان   صغير جان  يقلد عمي ويحب يحجي بالحلال والحرام ... والفروض والدين واكثر واحد من بعد وليد  يستخدم اسلوب الضرب ويانا  احنه البنات  ...جان  اسلوبه  

وطريقته بالتعامل ويانا كبنات ...هو القوه بفرض الافكار والتعليمات ظنا منه ان هالاسلوب هو الي يمشينا بطريق مستقيم  ...

لكن كم  مره  جنت  انتبه على تصرفاته المتناقضه ... بين خجول وهادئ ... وميرفع عينه على وحده وبين يسترق النظر ... ونظرته مو بريئه من نكون برا البيت او عد احد من الاقارب الي  عدهم بنات ... واول ما نرجع للبيت يبدي ينتقد ...

جانت افكاره سوداويه

يتخيل كل البنات  مو شريفات  ... الا   من يمنا  احنه الوحيدات بهاي الدنيا

الشريفات   لذلك كان  يحاول يحافظ علينا وعلى هاللقب بتفكيره

ولهذا السبب كان  مقيدنا لدرجه  الكتم على الانفاس  حتى الضحكه يحاسبنا عليها ....

مريم ...مرحه وشخصيتها حلوه ... وتدخل بالقلب بمساعده شكلها لكن ... البيئه وتأثير امها خلاها تغتر ... بجمالها جانت  بعمر المراهقه ما تمتلك  طموح للمستقبل قمة طموحها رجال واطفال 

والسبب  امتلاكها  حنيه وطيبة قلب  ... وبداخلها براءه عكس ما يظهر شكلها الخارجي الجذاب المغري ...ينطيها انطباع ا لفتاة اللعوب وهي بالحقيقه  جدا مؤدبه

هويده جانت   متأثره بأمها لدرجه  ا للاستنساخ  بكل شئ الا باللبس والتحرر لان ماجان  اخد يسمح بهالشي  لا جدي ولا الولد

الكل جان  يتصورها انانيه وانسانه  ما يهمها  احد  غير  نفسها ...

والسبب انها  ما تعرف تعبر عن عاطفتها ... كتومه وتكدر تتحكم  بمشاعرها  ممكن تخلي اي شخص يظن ان هي ما تهتم

  اهتمامها ان تكون هي  مرتاحه ... وكل الي تريده  لازم تحصله حتى لو على حساب حرمان الغير

... خلوقه ومتبدر  منها العيبه ابد

تكدر تحافظ على نفسها لو دخلت بين الف رجال

ميثم  صغير البيت

قلبه طيب وعفوي ولان هو اصغر من خواته كان تحت سيطرتهن  ...و هالشي اثر على شخصيته ...بفتره من الفترات

ما كان  يمتلك كلمه عليهن

وتربى على  نفس نظره التحرر والمظاهر الي ... عمي ومرته يمتلكوها ...

جانو  مفتهمين التحرر والرقي بصوره خاطئه

وهالخطا اثر بشخصية ميثم جعله مدلل من قبل امه ... ضعيف الشخصيه

ممكن اي واحد بينا يمشي مثل ما يريد ...

اي نصيحه يسمعها من احد ينفذها بدون ميكون اله رآي

جانو الولد ينتقدوا ( سلوان سنان وليد) وينبهوا خواته وبنات عمه عرضه المفروض الشي الي ميعجبه ... ويشوفه غلط ينبهنا عليه لكن هو ابد ميدخل يمكن لان يعرف ... الولد مامقصرين ويانا 

معيشينا بسجن انفرادي ... فماا جان يحب يتعب  نفسه

الصفه الحلوه الي  جان  يمتلكها من الصغر طموح ...وافكاره  واضحه ان راحح يوصل .... للي راسمه بالمستقبل

جدي جان اله اثر جبير بحياة كل واحد بينا ... مثل الي يحرك خيوط مسرح الدمى

منطي   حريه الاختيار لولده  وزوجاتهم  و واحد مرتب حياته مثل ما يريد

  لكن بالحقيقه  جدي كان متبع هالاسلوب حتى  يسيطر على  الكل ويكونون  تحت  عينه وجناحه... والكل يرضي

لكن ويا  الاحفاد كان جدا يدقق ... و يدخل بالصغيره والجبيره ... حتى  نكون مثاليين .... مثل ما يريد