رواية حكايتي مع النصيب الفصل الحادي والعشرون 21 - بقلم نور الشمس

وانه غير البسمه فوگ شفاك معاندي حلم

                  ❤❤❤❤
            _____________________

طلعت منها فرحان احساس المخنوگ واشتم الهوه
من صار باب بيت عمي ابو حيدر بوجهي رغم الفرحه الأنه بيها گلبي وجعني حسيت بخمشه بگلبي وطيف حيدر صار گبال عيوني غمضت عيني وانه اتخيله شنو تحس هسه فرحان لأن خلصتها من المريض وعائلة مرت ابوها الماتخاف الله بيها
لو محتقر صاحبك ومتندم على ايامك وياه
خليت ايدي بجيبي وانه اباوع البابهم شلون اشوف عمي مااگدر مااشوفه ولا اگدر اخلي وراي
الكل موجودين بالمشيه بس عمي ماحاضر وانه عاذره حقه صعبه عليه
بعدني واگف ورجلي احسها مشلوله ماتعبرني من هالباب البابهم
طلعلي عمي مبتسم ابتسامته اليخفي بيها حزنه
گالي

..ع الخير عمي تستاهلها وهيه تستاهلك تعال وليدي انت هم ابني وفرحان الك والله بس ماحضرت المشيه لأن اخوي ماقدرني ردته يلغي فكرة زواجها من هذا عصام
بس ماسمع مني واتهمني انه اخر بقسمتها الخاطر ابني وانه ياعمي مو هذا همي ردتها تكون مرتاحه وماتلگه احسن منك وثق هسه گاعد نسولف انه وعمتك كالتلي هسه هوه مرتاح ماكو احسن من باهي يداريها
..دنگت خجلان ماردت اگله انجبرت حته احميها مااريد اجذب واصلا مااعرف وانه البداخلي غير انه ردتها مو حته احميها ردتها لأن احبها ورايدها خفت اجاري بالحچي واكله ماردت تصير العصام جي مريض وعيوني تفضحني
رفعت راسي اله وبسته براسه بدون مااحجي
گلي تعال عمتك تريد تباركلك
سلمت عليها وانه احس نفس الاحساس بس من شفت وجهه واعرفها من تكون مرتاحه ارتاحيت
وماعدت افكر تليفوني ماسكت اباوع نورس تتصل ترخصت منهم وطلعت
جاوبتها

..الووو

..هلا بعريسنه سويتها ولحگت والله بطل باهي تروحلك فدوه اختك محتاره شسوي هسه من الفرحه تدري من عرفت تريد. تعقد على هذا المريض الحد من امي كالت اخوج عقد انه شصاير بيه ..فدوه فدوه الأغلى اثنين عندي

..ضحكت انتي الغاليه نونه لو ماانتي ماادري شيصير بيه

..الحمدلله  هيه شلونها فرحت

..سؤال صعب عليه بس راح اجاوبه لا مافرحت بالعكس ضاجت بس اصبر عليها لمن تتعود عادي

..الله كريم اعذرها انت تعرف ظروفها

..اعرف عادي المهم صارت الي هذا هووو عندي ومارايد شي منها بس راحتها

..الله يريحكم الاثنين ..صدگ وين انت

..انه هسه بالطريق راجع للبيت ومااعرف ردة فعل امي شني وانه ابيت عمي خليت صفاء يروح يفهمها وبيني وبينج يمكن زعلانه لأن سمعت بيها اجت باركت الياسمين وانه ماسلمت عليه اصلا ولاشافتني
بس انه اليوم مزاجي مفول مستعد على نغماتها اطگ اصبع

..هههههههههه لا لتخاف هيه خابرتني گالت اتباركي الأخوج وگاعد اتخطط امك للبعيد

..الله يستر ههههه يلله نونه راح اوصل اشوي نسولف

..مو تنساني اريد اعرف التفاصيل كلها

..وانه اكدر انساج

.. وصلت للبيت دخلت بعدني بالباب تفاجأت بهلاهل امي بصوت عالي

..ابتسمتلها مامتوقع منها كافي حبيبه عيب من عمامي فدوه اروح الصوتج ماقصرتي دنگت عليها بستها براسها يمه صارت بسرعه عذريني مو عبالج اخليج وراي لو مامجبور انتي اول وحده تعرفين

..بعد امك  ردت اطرد الشر بالهلاهل .الف مبارك المهم صارت الك وانت رايدها الله يبعد عنك وعنها كل شر ياسمين بنيتي مو غريبه احسن من غيرها

..الله يسلمچ يمه

..شويه واجت بنيه جايبه الأمي صينيه ومواعين
خاله تگول امي الف مبارك عليهم وربي يفرحهم عدنه خطار بس افرغ اتعنالها واباركلها

..صفنت على امي اريد افتهم ضحك صفاء گال امي سوت اعلان الك ناقصها تبث مباشر ماكو بيت بشارعه والشارعين الورانه مادرن بيك خاطب واليوم عاقد وفنك تمد راسك من الباب هسه كلها تباركلك واحتمال ام حسين جارتنه اتصكك بهلهولتين اول ماتشوفك

..ضحكت صدگ عود يمه ليش هيج بعدني جاي احجي وفاتت ام حسين وهلهلت مبارك يمه باهي يوم الك صافي واكل لحم بعرسكم
ضحك صفاء گالها بس لحم انتي ادعيلي نص لشه من الطلي الينذبح على رجل العروس شرط نص لشه اشيلها واحطها ابابج بس ادعيلي واخذها
ضحكنه انه وامي وعلاء جان موجود
گالتله ياا كونك عاشگ خاله كون اهل الكليات تتمعشكون وتجيبون بنات بغداد جا بناتنه ياهوو يصخمهن وياخذهن
علاء كالها ام حسين اليسمعج يكول بيتها متروس بنات وخايفه عليهن
..لا خاله بنياتنه هواي نعمه كلهن خير وبركه وهبات ريح جا شنهي لو ماتحله بعينكم الا الغريبه
بس بهاوي اخذ بت عمه مبارك يمه وشايف كل الخير
قاطعها صفاء كالها هسه ماتدغيلي تفوتج النص لشه والله اروح انطيها الام يونس ..ام يونس ضرتها

..يادهر طر ام يونس حته بالطلي شاركتني لا يمه ادعيلج بجاه داحي باب خيبر ينولك الي ابالك وتاخذها ويفرحك ويفرح امكم بيكم
ونستنه وطلعت
انتبهت الروحي مبتسم رغم ماكو احد يحچي
علاء كال هابهاء اذا رايدها من زمان ليش ماگلت واحنه نتصرف ومن زمان صايره الك ولا الموقف الخليتنه بي
انه رايح احضر مشية بت عمي على رجال غريب والناس كاعده وانت خابرتني احتاريت شلون اطلع عمي واحاجي

صفاء..علاء انت هم مايحتاج اطلع عمي وتتفق وياه وتجرجرها وانت گاعد كلهم يابه منهيين

..انه هاي النهوه وهاي السوالف ماتصرفلي موحلوه افشل عمي يم العالم انتظرته يطلع واحاجي وفهمته كلش وهوه هم صاح مرته كدامي كلها گةلي الياسمين نعقدلهم على بهاء هاي كامت تصيح وعمي مدري شحاجاها سكتت بس من طلعو اخوانها وعمامهم طلعت وياهم هيه وشكم مريه هم

امي كالت اي عود زعلانه العويه سليمه كون اطمها والله داقتني انه كون يوم واطيح بيدي هالعكرب

ظلينه نضحك ونسولف طلع صفاء كتله اوگف نطلع انه وياك طلعت والشارع كله يتباركلي جاي احجي وي صفاء على نفس موضوعنه انفتحت الباب صارت هدى بوجهي بيدي جگارتي جنت ادخن من شفتها نفس ذيچ صفنتها ونفس النظره ذبيت الجگاره وسحگتها برجلي مشيت وماباوعت الها ماتهمني بعد نظراتج اكيد سمعت بالخطوبه ورادت تشوفني نفسها عبالها اهتم
صفاء گال وين راح بالك جنك رحت بعيد

..لا وياك

..شفتها موو

..اي شفتها

..بعدك تحن

..لا والله لا احن ولا شي ابد مو ابالي ولا تحرك شعره بيه

..ختولي تره متعمده تطلع حته تشوفها وخلي ابالك امي علنت خطوبتك بس حته هيه تعرف

..ضحكت امي الهسه خايفه عبالها ارجع الها

..لا بعد السويته اليوم تأكدت انت تحب ياسمين

..ماعلينه انت وين توصل انه رايد اشتري تليفون الياسمين واريدك انت تودي مااريد اروح خاف عبالها اضغط عليها لو اتحجج

..عادي انه اودي

رحت اشتريته وفعلت شريحه ونزلت الها برامج خليتلها رصيد واشتركت الها نت ع الشريحه
ورجعته بالعلبه انطيته الصفاء ورجعت للبيت

لكيت علاء باقي ولاحكي زوجته وابنه وهذا ابنه اموت عليه وهوه هم اول ماشافني ضحكلي اخذته سلمت على امه وكتله ابدل واجيك اخذت ملابس رحت اسبح بدلت ونزلت يمهم صحت حسين يجيبلنه عشه من بره
شويه واجوو علاء واياد يتباركون وحازم هم لحكهم بيومها مافرغت الحد الليل كلش
صعدت اريد الزم تليفوني واخابر طلعت رقمها خزنته قبل لا اودي الها اتصلت منها على جهازي وحفظت رقمي يمها
خابرت اول رنه انه دكات كلبي زادت
جاوبت

..الوو

..هلا هلا  بريم الفلا

..هلا بيك

..شبيچ تبلعمين انسي الصار وارجعي صديقه وبس

..اي عادي لا مابيه شي

..اي مبيين مابيچ..گليلي شطالعه اليوم انتي

..مو شسمه هذا مرت ابوي جبرتني البسه

..مو شسمه وهذا ههههه شبيج ولچ اهدي
شرايچ اغنيلچ

بحشاشتي سهمك مضى

وعبگبك علي ضاك الفضا

الي حضى بوصلك حضى

والماحضى لا والحظ

..اوگف هيه كبل اغنيه احچيلي انت شلون عرفت وشلون طردتهم

..ولا تخلين واحد ينطلق ويغني ويسلطن ادري بيج خفتي تتاثرين بصوتي لاتنكرين ههههه

..ضحكت ع اساس ماسامعته انه

..وين سامعته

..سامعته هواي معليك وين بس سولفلي
وخلينه اصدقاء خوش صداقه اذا بدايتها سهمك مضى

..حلوه هاي غير هيه اغنيه مكتوبه من سنين احد كايلج انه كتبتها الج اصلا دايما اغني الأمي قل للمليحة بالخمار الاسود قابل اتغزل بامي صفي نيتج ياصديقتي جنج تتحرشين بيه

..ياا هاي اني انت بهاء لو مبدلينه مو جاي احجي وياك

..لا والله بهاء.. بهاء ياروحه انتي وعافيته

سمعت الخط انقطع شفت الشاشه المكالمه منهيه ضحكت انه تحرشت بيها بس هيه فضوليه وماترتاح هسه الا تعرف شلون وصلت الها وشلون حاجيت عمي
ابتسمت وانه اتخيل ملامحها وشكلها وهيه مرتبكه
شويه واجتني رساله

..الله عليك نبقى على اتفاقنه تره مااعرف احجي وياك هيج

..شنو اتفاقنه نسيته

..بهاء شنيه هيه مو گتلي اصدقاء وبس

..اي ياعيني قابل بايسج هسه انه شو عقد وشككتيني بي لمن اتاكد من صحته يلله افكر نلغي صداقتنه ونبدي بالعلاقه

..ياا والله بعد مااحاجيك

..انتي فهمتي غلط اقصد علاقه ود ومحبه بين الاصدقاء

..بهاء حباب راح اتصل اريد اعرف كلشي بس الله عليك لاموال ولا اغنيه هيج مثل قبل نسولف

اتصلت عليها

..الوو

..اي ذكرتيني انتي شلون توافقين على هذا المسودن خل اولي انه ماترديني بس شلون قبلتي بوضعه عندج عقل لو شنوو

..ابوي جبرني

..ليش ماخابرتيني اعرف جهازج مو يمج بس تگدرين تتصرفين بكل طريقه هاي ضامها الج وحسابها بعدين انتي لو شايفه شصار بيه والله نار وشبت بضلوعي وماطفت الا بشوفتج وانتي حلالي
ولو بعدني شاك
بربج اسمي من شكم حرف يتكوون ماسمعتيه خليتيني بشك بس لا هلاهل امي وام حسين يرحن هيج واطلع مو عاقد

..ضحكت شمعرفني بس انه انطيت وكاله وجنت موافقه ع الزواج مااعتقد يعتبر باطل

..فرحانه موافقه وناطيه وكاله والله بيج كتله تبرد گلبي

..هسه ماگتلي شلون عرفت

..تعرفين ياصديقتي متعود احاجيج واشتاقيت الج وانتي مو هامج خابرت نورس حته تعرف اخبارج وتحاول وياج وتقنعج تتصلين بيه
نورس كالت اليم عقدها اتخبلت جنت بادي وواصل بشغلي للنص خابرت المسؤول وكتله مسألة حياة وموت مجبور اتركه وباجر ارجعلك وعد
طلعت للفندق سبحت وبدلت ع السريع وطلعت
للگراج اجرت تكسي نص الطريق خفت اتاخر  وطخابرت علاء يتصرف ويفهم عمي وعمي من داري فرحان ومعتذر منهم وهمه محاولين وياه هواي بس كايلهم ابن عمها هسه جاي بالطريق ورايدها بطبتي البيتكم لاگتني مرت ابوج ووياها نسوان بس ماشفت زلم وياهن يمكن طالعين قبلهن
اي وبعدها عقدت لأن الشيخ لكيته جاهز همه جايبي وماقبل بوكالة ابوج لان عرف انه ابن عمج فكر خاف مجبوره طلب من عمي يسمع صوتج وردد اسمي اكثر من مره وانتي وافقتي والمشكله انه فرحان لأن وافقتي عليه تاليها طلعت تكلي وين عريس الغفله واسمي ماسامعته ضحكت حته مااحرجها مجمعهن كلهن الج من تصير علاقتنه اقوه اقصد صداقتنه تاخذين عقابج خلي هالشي ابالج

..شمعرفني اني جنت اتخيل شكله وشلون راح اشوفه

..وشنو اتخيلتي بالله

..تخيلته اصلع وسمين ومكرش

..لاتتخيلين هوه مرت ابوج بس عنده شوارب ولحيه وبعد لاتتخيلين تره صديقج يغار

..هههههه لاصديقي لاتغار صديقتك تريدك تغيير النغمه لو اكلك نام احسن تصبح على خير وراك سفر

..وانتي من اهل الخير بالج على نفسج وخليتلج يم امي مصرف ديري بالج تكولين مااخذ باجر تجيج وتنطيج واذا تردين طلعي وياها للسوك اشتري شتحتاجين

سديت الخط واريد انام خليت باكيتي وجداحتي والجهاز ع الجربايه وسمعت صوت صياح ابابنه
والباب يندگ بقوه

يتبع...

البارت بدون مراجعه اليوم تعذروني منشوله واني عندي ربوو يتهييج بالنشله
تأخرت عليكم بالنشر 😘