رواية حكمت محكمة الحب الفصل الرابع والعشرون 24 - بقلم زينب العبيدي(زينبيه)

مرحباا قراءه ممتعه

حكمت_محكمة_الحب

بقلم #الزينبيه

البارت #١٩

مر عشر ايام على طلعت ايه من بيتنه للميتم وايمان طلعت وياها لان ماقبلت اتضل وحدها يمنه وتعوف اختها جنت كل يوم اسأل ماما حبيبه عنهن ومرات ادز الهن افلوس من مصروفي الخاص الي ينطينيا سلطان ما اصرفه فا اجمعه انطي الهن مرات

سناء الغثه كل يوم ناطه ببيتنه بعد ماجنه مرتاحين منها لان جانت مسافره هي واهلها للكوت عد عمامها جدها توفه
وضلو للاربعين مالته وفوك ولمن رجعو لليوم ساكنه عدنه كل يوم تجي من الصبح للمغرب اله تروح بحجت اشوف خالتي وهي ابد مامكلبتها ولاتدري وين الله حاطها ميته على ابن خالتها الخفيفه اكرها

اني جنت فرحانه بالفيس الي سواه الي سلطان قبل فتره كلش هوايه بس ماجنت اعرف استخدمه كانت الصفحه بأسم ولد فلمن عرفتله مثل المخروعه ضليت٢٤ ساعه عليه بس من يجي سلطان اضمه لان مايقبل اكمش التليفون هوواي وتعرف على بنيه اسمها وسن كلش حبابه وصرنه صديقات بهذه العشر ايام وبعت وياها ميانه ونتشاقه ونضحك وتنصحني وتعلمني على كلشي هي اكبر من يمي ب٥ سنوات يعني عمرها٢١ سنه مامتزوجه بس عدها علاقه وي ابن خالها وعلاقه زواج جاده لان اهلهم يدرون بيهم

اما سلطان فصار اكثر يهتم بيه وتحيرني نظراته الي يكعد يتباوع علي هوواي ودائما اراقبه وهو ايدقق بمشيتي وحركتي

فقررت احجي وي نوال بنت عمه لان هي الوحيده الي تفهمني وتعرف طبيعه مشاعري اتجاه سلطان

الوو نوال محتاجه اشوفج

نوال سلامات شنو خمابيج شي

نواره لا بس اريد اسولفلج عن سلطان

نوال لج كلبي وكع وانتي تكليلي اسولفلج عن سلطان شبي سلطان سولفي

نواره ما ادري احس دائما يباوع علي ويصفن بيه هواي ولمن التفت عليه يدور اعيونه

نوال يالفهيمه يبدو ان الرجال بده يحب يماااي مايردلها روحه للقاضي

نواره ما اعتقد يانوال لان الي يحب يظهر يعبر عن شعوره يحجي بس سلطان لا ماعنده اي مشاعر اتجاهي

نوال حبي نواره اعتقد حتواجهين هواي عراقيل بسبب هذا الشي من حقج طبعا اتسمعين حجي حلو وغزل بس شكلج سلطان مر بي العمر وصار رجال جبير يحس الحجي والغزل وهاي السوالف للمراهقين ويكتفي ان يحب بكلبه واهتمامه ....بس منو يدري يجوز يتغير لمن يصير عدكم اطفال تقوه العلاقه ويتغير يظل لاتشيلين هم ولاتضوجين حبي .... ع العموم كل الي متاكده منه حاليا ان سلطان بده يدك كلبه صدكيني هههه

نواره صدك

نوال هيج احساسي ايكلي

نواره واني اضل ورا احساسج ام احساس

نوال ولج ولي من وجهي عابت ولاتتصلين بعد فوكاها

سديت التلفون واني اضحك عليه

الظهر الساعه ١:٣٠ جنت اني بالمطبخ وحنين وياي انجهز الغده وسناء واكفه باب المطبخ وتتباوع علينه ولا اني طايقتها ولا حنين وهي تدري بهذا الشي بس مع ذالك واكفه جنها نائب ضابط وتتخوزر بينه

شوي وسمعنه هورن سيارة سلطان باوعت على سناء الي تعدل بنفسها وتكرص بخدودها حتى يصيرن حمر وهي وجها كأن لعابه بلاستك ممطوط مط وبسرعه اتقربت من يمنه وشكلت الدشداشه مالتها وكفت ع الطباخه

سناء يله حنين خل اساعدجن شوي جيبي المواعين خلي اصب

غميتها اني من ورا شكد غثيثه وخفيفه اني الج

حنين لابالله وستوج تردين اتساعدينه لووو من اجه لو تموتين مايكلبج

سناء عن الحجي الماصخ اني لو اريد سلطان من باجر اخذه ويله حضري المواعين

حنين وهي تكعد ع الكرسي هاي المواعين يمج طلعيهن وصبي ياالنادره

التفتت سناء علي طلعيهن انتي الاخت راح تموت مقهوره على شنو ماادري

حنين مقهوره من وجه الباجه

نوره والله مابيه ياسناء لو تدرين اليوم تعبت هواي واني يمكن حامل اخاف على نفسي هاي المواعين يمج حبي

سناء وهي تضحك شلج بهذي الجمبزه ست نواره حامل وما متقربلج سلطان

نواره وانتي منو كلج هذا الحجي

حنين لا متقرب الها بس يبعدون العين عنها لان يمكن حامل وتدرين اعيون الناسس مفككه عشره عشره وتاشر باصابعها عشرتهن بوجه سناء

نواره اف نقذتني خوش طلع منها زين هل حنين باوعتلها ابتسمت الها كانما اشكرها باوعتلي بعين ونص ودارت وجها

دخلت ماما حبيبه وبيدها علاليك وسلطان وراها بيده علاليك هم

حبيبه وسلطان السلام عليكم

ردينه اني وحنين وسناء وعليكك السلام

سناء شلونك سلطان شخبارك تحجي وهي تعوج بروحها وجنها اريل مال تلفزيون ضاربه الهوه

سلطان هلا بيج هلا بسناء

غمتها ماما حبيبه وهي كالبه وجهه بدون ماتشوفها واني وحنين متنه ضحك

سناء يله ابو السلاطين اصعد غير ملابسك حتى اصبلك غده اكيد جوعان

سلطان اي والله ميت من الجوع

حجيت اني فاتحه عيوني على كبرهن ياااء شرايج تصعدين تحضريله ملابسه والحمام

شفت ماما حبيبه خلت ايدها ع حلكها وضحكت وسلطان ابتسم

سناء شسالفه يانواره شهل حجي ترى فهمت قصدج اني ماكلت شي مابيها شي حجايتي

نواره واني هماتين ماكلت شي كتلج حضريله ملابسه

سلطان وهو مبتسم لا هذا شغلج انتي هي خطار وطلع من المطبخ

حبيبه بالضبط يا امي صعدي حضريله شسالفه اطلبين من الغريبه وانتي موجوده وباوعت السناء من فوك ليجوه وطلعت

حنين حل عساج احسن فشلوج هههههه

نواره اكول عوفي البيدج ورجعي اتفرجي لو روحي كعدي ونزلي دشداشتج غطي كصباتج

احتقن وجه سناء وضلت تخزر بينه وباوعتلنه بحقد وطلعت

غميتها وهي طالعه احس روحي ما اطيقها وخصوصا من تحجي وي سلطان يشتعل كلبي منها

صعدت فوك ع اساس احضر السلطان الملابس بس لكيت بغرفه ماما حبيبه وهي هم موجوده بالغرفه والباب مسدود فما دكيته حضرت الملابس وخليتهن بالحمام وجبت خاوليته خليتها هماتين وكعدت انتظر يطلع بس تأخر

دخلت الغرفتي وضليت واكفه كبال المرايه اباوع النفسي اووف شنو بيه شي عيب معقوله مو حلوه ليش ماتحبني هاا ليش زين اذا حجي نوال صدك وهو بده يحبني مثل ما تكول ليش مايبين لي او يكلي احبج وعمري وحياتي والحجي هذا
اففف رشيت عطر من الي انطتنيا ماما حبيبه وكالت سلطان يحبه

سمعت الباب انفتح مال غرفت ماما حبيبه فتحت الباب بسرعه باوعت ع ماما حبيبه هي ماشافتني جنت دتعدل بشعرها وتضضحك وهي تكول السلطان لالا لوتموت ونزلت الدرج بسرعه

انعصر كلبي وضليت واكفه مكاني واني ابلع الغصه وعيوني مغوركه دموع

واني احجي وي نفسي شبيج نواره سيطري على نفسج هاي زوجته قبلج وبينهم عشرة عمر والله يساعد كلبها هي الي جابتله زوجه وزوجته وكل هذا مسيطره ع نفسها وع مشاعرها

بس اني مو بيدي والله مو بيدي كلبي يوجعني طاحت دمعتي ع خدي اني ماعندي كلب حبيبه ولاعندي صبرها اني ضعيفه بحبه

طلع سلطان من الغرفه وقبل مايدخل للحمام انتبه علي عكد حواجبه شبيج تبجين

نواره مسحت دمعتي لا مابيه شي حاولت ابتسم بالكوه

اجه صار كبالي سناء ضوجتج

نواره لا خليها تولي ماتهمني

سلطان ههه عفيه لعد شبيج يابه

نواره مابيه شي ضايجه شوي

حسيت ايدين سلطان انمدت على خصري بلمسه خفيفه رجفت وكلبي ضل يدك بسرعه ونفسي اتسارع

رفعني من خصري وشالني صرت اعله منه

وحجه يعني ماتكليلي شبيج

دنكت وجهي عليه كتله مابيه شي

سلطان زين حضرتي الحمام

نواره اي حضرته ودرت وجهي من وجها لان انفاسه تضرب بوجهي ويزيد من توتري

كتله اللله

سلطان شنو

نواره انت تشوف الدنيه بصوره اوضح حلوه الدنيه من يمك

عكد حواجبه وكال لج شنو مافهمت

نواره اقصد حلو واحد يباوع من هذا الارتفاع وانت ماشاء الله تباوع بدون محد يشيلك شطولك

ظرب راسه براسي على كيف حسبالي فد شي طلعتي حاسدتني على طولي يله نزلي باوعي من مستواج احسن

ضحكت وهو نزلني ودخل للحمام نزلت اني جوه ولكيت ماما حبيبه وي حنين يحضرن الاكل كلت الماما حبيبه ماما روحي ارتاحي انتي هستوج اجيتي من الدوام روحي كعدي

حبيبه لاعادي يا امي متعلمه

نواره الخاطري كعدي انتي اتعبين هواي ارتاحي

حبيبه هههه خاطرج عزيز عندي وراح اكعد بس اهنا يمجن لان جوعانه هههه

نواره ثواني واصبلج

حبيبه لاوياكم بعد اتغده سلطان مانزل

نواره لادايسبح

حبيبه راح يموت من السبح لو وزه هم ماتسبح بكد مايسبح

ضحكت اني باوعت ع حنين تشتغل وبالها مو ويانه ابد

رجعت احجي وي ماما حبيبه واني اصب بالغده اكول ماما

حبيبه ها حبيبتي

نواره اشتاقيت للميتم اريد اروح اشوف صديقاتي وابات اهناك يومين عفيه ماما

ابتسمت حبيبه طبعا البنات كلهن يسألني عليج حتى الماتعرفج بس بالاسم هههه

نواره صدك والله عفيه ماما اريد اروح

حبيبه واني شكو احجي وي سلطان واني اخذج اذا قبل

نوارة اي مو الهيج كتلج اريدج تحجين وياه انتي

حبيبه لا احجي ويا انتي خلي اتطيح الحواجز البينكم يا امي وتتعودين اتطلبين منه هو مو مني اوك

نوارة مو اخاف مايقبل

حبيبه هذيج الساعه اني احجي ويا وانشوف

نواره تمام راح اكوله

صبينه الغده وكعدنه كلنه على الغده

ام سلطان يوم سلطان علاوي ابن خالتك سعاد اتصل علي يكول اتصلت على سلطان مايرد ومهند جهازه مغلق

سلطان اي اي ادر اتصل علي بس جنت مافارغ ارد عليه وهو شلون مايحب يسولف شرط لازم نص ساعه يله يفصل

مهند اي والله كلاشن كوف مو ولد

ام سلطان يايمه هاي شبيك ترى خوش وليد ابن خالتكم ومؤدب الله يحفضه ويستر عليه

سلطان هسه اني شكلت عليه سرسري لو اخلاقه سز كلت مايفصل وهواي يصرف حجي اي ماكلتي شيريد يتصل علي وعلى مهند

ام سلطان ايكول ولو تصير عليهم زحمه بلكي يشوفولي شقه قريبه منامنا ايريد يجي يكول قريب على جامعته

مهند يمه بعد وكت على الدوام بعد شهرين ليش من هسه ايريد يجي اهنا

ام سلطان مو يايمه اظاهر متحاجي وي ابو خطيه وتدري ابو عصبي وماينجرع

سلطان وان يكن يضل ابو واذا عصبي وماينجرع معناها يعوف البيت ويطلع شهل تبن زعاطيط اخر وكت

ام سلطان لا هو كال بيها وبلاها لازم اجهز واشوفلي شقه قبل الدوام

احجيت اني ودا اكل كلتلها الام سلطان لعد ليش خلي يجي يكعد عدكم لويش شقه وبيت خالته مفتوح والحمدلله

ام سلطان والله كتله يايمه بس هو يكول لا مااريد اضايقكم وماقبل

سلطان على العموم والله اني مافارغ ادور عود اسال اصدقائي والله كريم خلي مهند هم يشوفله

نواره ياا ليش الشقه خلي يجي هنا مشاء الله البيت كبير

كرصتني ماما حبيبه وهمست انتي سكتي ولج

باوعت السلطان ايباوع علي بنص عين وحجه مشكوره نواره ماتقصرين مضيافه والنعم منج بس احسن اله ايروح يكعد ابحده لان هو ناوي يكعد سنه مو يوم ويومين

هزيت راسي بمعنه اي وسكتت

سناء اي والله حجيك يا ابن خالتي هو الصحيح

غميته اني بدون ماينتبهولي بس ماما حبيبه شافتني لان كاعده يمي من كون تريله محمله وماتخلي ولا عضمه صاحيه بيج

لمن خلصنه كمنه انشيل المواعين ودا نغسلهن

حبيبه حجت وهي تضحك انتي شلطشتي خل يجي وخل يكعد

نواره اي ليش والله مابيها شي عادي مو ابن خالتهم

حبيبه ولج سلطان ماهلكد يحبه يكول عنه خفيف ومايرتاحله من هيج مايقبل يكله يجي يكعد اهنا

نواره يااا واني الغبيه لزكتله هههه

حبيبه ههه حشاج حبيبتي

كملنه غسل مواعين وصبيت جاي السلطان وصعدته اله

جان بغرفتي ودا يخابر  واول ما دخلت حط اصبعه كبال حلكه بمعنه لاتحجين شي ورجع يحجي بالتليفون

اتقربت حطيتله الجاي ع الميز اشرلي باصابعه ثنيناتهن على حلكه بمعنى اريد الجكاير

رحت اجيب الجكاير من ملابسه لان هو ينزع ملابسه بغرفه ماماحبيبه

جبتهن واجيت لكيته مخلص مكالمته وديشرب الجاي

انطيته الجكاير وضليت واكفه

جان هو مدنك يشعل بالجكاره ورفع عيونه باوع علي ورفع الجكاره من حلكه نفخ الدخان بوجهي وهو مبتسم احجي اسمعج

ضليت اكح من الدخان واني الوح بالهوه ابعده عن وجهي

سلطان اسم الله ياب حقج علي

نواره شيفيدني حقي عليك واني مختنكه

سلطان هلو ياب اشتغلت اللواته تعااي سحب ايدي وكعدني على رجله احجي شعندج

صار كلبي طبل لان حيل قريب منه درت وجهي للجها الثانيه وانفاسه تضرب بركبتي

سلطان احجي اسمع

ضليت اعصر با اصابعي اريد ارووح

سلطان وين

نواره التفتت عليه و حجيت بسرعه كتله للميتم والله اشتاقيت للبنات واشتاقيت الغرفتنه عفيه ينطيك العافيه بس يومين او ثلاثه اذا بيها مجال عفيه لاتكول لا ينطيك العافيه والصحه ويخليك ويطول عمرك

سلطان بس بس جنج مكديه زين تردين ترحين مو

نواره اي

سلطان اها العصر اوديج تدللين

نواره حجيت بفرح  شكرا تسلم خلي اكوم اجهز ملابسي ع ما انت تنام وتكعد

وردت اكوم بس باايده ثبتني من خصري

باوعت الايده  وباوعتله وضليت ارجف

سلطان لا تعاي نامي بعدين العصر حضري نفسج

نواره بس بس خاف تتأخر وانت ماتحب الانتضار

سلطان لا ماوراي شي انتظرج

نواره بس ا.اني ما نعسانه

سلطان لا نعسانه نامي

نواره زين ح انام شوي وردت اكوم بس هم ما كدرت ثبتني بمكاني

سلطان لج صايره حلوه انتي شنو الفلم غمزلي وهو مبتسم

نواره ها ا.ا.اني م.م.مادري شكرا

ظحك وكومني من على رجله يله روحي طفي الضوه خلي انام

طفيت الضوه واجيت نمت ع الجربايه واني اكلب بالتليفون شفت هواي رسأل من وسن صديقتي

سحب الفون مني بسرعه وكال كتلج نامي

وسحبني من ايدي حطها جوه راسه وحجه مو ترافسين حيل داريني شوي شوي رحمه الامج

ضحكت اني

وخمس دقايق ونام قربت وجهي يم شعره واني اشتم بعطره يجنن اموت على هذا العطر ولمن اشتمه بشعره يصير احله متاكده ان شعره المحلي العطر او يمكن بس اله انصنع لان بس بشعره احبه ضليت هيج لحد ما غفيت

وللعصر كعدت قبله واول ما فتحت عيوني لكيت نفسي نايمع بالعرض وعايفه المخده ورجلي وحده على صدر سلطان والثانيه ع بطنه

فتحت عيوني على كبرهن وضربت خدي يمهه عزاا لايكعد شلتهن بسرعه بالله شموازي نايم يمي واني النوم مالتي اسباحه بشط مو نوم الله يساعده علي كمت بسرعه

فتحت ضوه النقال وطلعتلي ملابس ورحت اسبح

وبعد ماخلصت اخذتلي شكم لبسه خليتهن بالجنطه وشكم شغله احتاجهن وبعدها فتحت الضوه حتى يكعد سلطان بس ماكعدتها اني لان بعدني مامكمله وكفت كبال المرايه خليت مكياج طبيعي
واخير عرفت احط مكياج عن طريق النت بس شنو بسيط ما اعرف للمكياج المضبوط خلصت لفيت شالي ولبست حذائي

واجيت يم سلطان ضربته خفيف على زنده  وكتله يله سلطان ااكعد

حجه سلطان وهو حاط ايده على وجها هممم كاعد كملتي انتي

نواره اي كملت

شال ايده من على اعيونه باوعلي شدعو يومين

نواره قصدك هواي اضل يومين

سلطان اي

نواره لا عفيه حباب مشتاقه للبنات عفييييييه

سلطان زين زين كافي ماكلنه شي حجاها وكام من الجربايه وكف شوي يكلب بنقاله وبعدها حطه ع الشحن وطلع من الغرف

خمس دقايق وصاح يله نوااره

نزل هو واني نزلت ورا لكيت ولكينه الحجيه كاعده هي وسناء بالحديقه ويشربن جاي

سناء تعال اتفضل سلطان خوش جاي وكليجه حاره اني مسويتهن

سلطان اي والله الف رحمه على روح اخوج صبيلي استكان

نواره بس سلطان حيصير الدنيه مغرب جذب بعد وكت بس ماريد يشرب وياكل من ايد هاي الجنها اريل معووج

سلطان بعد وكت خل اشرب استكان جاي

الحجيه هايمه نواره رايحه

نواره اي يوم اروح للميتم اشوف البنات اشتاقيتلهم

الحجيه اي وغيري جو ابنيتي

سناء سلطان ماطول انت طالع اخذني وياك على بيتنه

سلطان اي بس استعجلي على ما اشرب الجاي انتي مخلصه

كامت وكالت ثووواني واخلص وراحت ركض

جنت اريد اغمها وستوني فاتحه ايدي وشفت سلطان يباوع علي سديت ايدي صبع صبع وابتسمت وسويت نفسي احك بخدي

هو ابتسم وهز راسه يمنه ويسرى

شويه واجت لابسه ومكمله

كال سلطان يله

صعدنه بالسياره وسناء  لوك لوك لوك حلكها ما انسد تسولف وي سلطان على قرايبهم ما اعرف ولاواحد بس استمع وهي هذا تزوج وهذاك طلك وفلان سافر وعلان اتمرض تكول مختار المنطقه مو مره

لحد ما وصلها للبيت انوب لطشت عليه اله تنزل

سلطان يمعوده عندي شغل اريد اودي نواره واروح

سناء مايصير بعد انت وصلت لازم تنزل انوب ابوي يكول هلايام سلطان حتى ما انشوفه من اتزوج مره ثانيه ولليوم  ويكول عود اني عمه وهذه خالته ولايسال ولايمر حتى مهند الاصغر منه كل فتره واجانه

سلطان هووب هووب يمعوده خذيتيني حاصل فاصل نازل بس سكتي حجاها وهو مبتسم

اني مديت البوز شبرين وقبل ماينزل كمشته من ايده وكتله استحي

سلطان هاي شبيج نواره هذول اهلي من شنو مستحيه عشر دقايق ونطلع

نزلت كوه عني وسناء راحت قبلنه دخل سلطان كبل واني دخلت ورا

طلعله رجال جبير سلم عليه واني كتله شلونك عمو

ضحك وكال هلا عمو بس ترى اني اكبر من زوجج بخمس سنوات بس ههههه

اني الفطيره ضحكت وكتله بس مامبين سلطان جنه هواي اصغرمنك
حجيت هيج من فهاوتي لان صدك هو شعره مشيب كله وحتى وجها بي تجاعيد كأن رجال جبير ابد مو يم سلطان صحيح سلطان بعد سنه ويدخل بالاربعين بس ماشاء الله وجها ولا بي تجاعيد بس عنده كذا شيبه بشعره مو هواي

شفت الرجال عكد حواجبه كنما ضاج

سلطان وهو مبتسم اعذرها ابو زينه بعدها صغيره

ابو زينه لا شسالفه ادري بيها زعطوطه واضح هل شي اتفضلو حياكم

دخلنه واني ابدي ارفسه بكرشه اطلع معدته من حلكه ابو ثرب

كعدنه واجتي ام سناء وياها سناء سلمنه عليها وسلطان باس راس خالته واجتي زوجت اخوها وبعدين اجانه حجي كام سلطان سلم عليه وباس راسه

الحجي كال لا لا عاد صدك زعلان منك سلطان هل فرخ البيضه هاي اتغيرك علينه

سلطان شسالفه  عمي اني لامتغير ولا شي ومن يوم يومي شغلي الفوك راسي وبعدين اني قبل فتره جنت يمكم بلمت العمام عد بيت الحجي رضوان لو نسيت

الحجي لامانسيت بس قصدي بعد ما مريت علينه للبيت هل بزر كلبتك علينه

سلطان حجي لاكلبتني ولا راح تكلبني بس كتلك ما فارغ وجاي اسوي معاملت نقلي يردون ينقلوني للانبار وملتهي

كتله شلونك عمو وبكلبي اكول عوذه منك يالشايب اخذنه حاصل فاصل

عاد هو رجع علي هلا هلا

وضلو يسولفون كلهم واني ابد محد حاجاني كلمه احسهم كلهم كارهيني
وخمس دقايق وكال سلطان يله من رخصتكم

الحجي بعد وكت ضل ع العشه

سلطان لا عمي مشكور ودايم وراي شغل والله

الحجي اي هاي شغلك وياك واضح

مارد عليه سلطان والتفت علي وكال يله

طلعنه وهما ورانه طلعو للباب ومان صعدت السياره اله اتنفس جنت حاسه كأن بلوكه كاعده على صدري وما اكدر اتنفس

واول ماصعدنه كال سلطان حلللل خوش سويتي بي حجاها وهو يضحك

نواره منوو

سلطان هذا ابن خالتي ابو زينب غثيث ما ابلعه

نواره قصدك الشايب الطلع النه بالباب

ضحك سلطان اي

نواره بس صدك هو شايب كنما عمره ٦٠ ولايمك

ضحك سلطان لاولج مو الهذا الدرجه بس هو بس كبر وبين بي العمر من هو ب٣٠ انترس شعره شيب

نواره صدك حينقلوك للانبار اني سمعت الانبار خطره وبيها داعش

سلطان اي الله كريم يمعوده هذوله مادري منين طلعونه هل اوغاد

نواره بس ليش ح ينقلوك لاعفيه والله اخاف عليك

ابتسم اتخافين علي الله كريم بعده مو اكيد احنه كذا واحد طالع علينه نقل بس مو كل احنه ينقلونه لان لو خليت قلبت بس ها مو تكولين هذا الحجي محد يدري بي حتى حبيبه لان ماكو شي اكيد لحد هسه

قبل لايوديني للميتم اخذني المحل مرطبات ومعجنات نزل واخذ بقلاوه وكيك قطع ونوع كيك ثاني

واجه صعد بالسياره خلا العلاكه بحضني

كتله هاي المن

سلطان اخذيهن وياج عيب اطبين على صديقاتج وايدج فارغه

ابتسمت حسيت ان اني اختلف صار عندي اهل جن مو علاكه جن احساس الامان كله بيها اتمنيت الكل البنات بالميتم يجي يوم وكل وحده يصير عدها انسان مثل سلطان ومثل حبيبه واكثر بعد

كتله شكرا

ابتسم بالعافيه عليج

وصلت للميتم وقبل ما انزل صاح علي اوكفي

شفته رفع نفسه من الكرسي شوي وسحب محفضته من جيب بنطرونه الورا
فتحها ونطاني ٢٥

كتله عندي مصرفي ماداصرفه

سلطان كتلج هاج ادري عندج

اخذتها وكتله شكرا

سلطان بالعافيه لاتشكريني كل ساع انتي واجبي ومسؤليتي

نواره صار حجيتها واني مبتسمه

سلطان يله نزلي وديري بالج على نفسج واذا احتاجيتي شي حبيبه يمج او اتصلي علي

نزلت وهو ضل واكف بالسياره لحد مادخلت

دخلت مشتاقه حيل للمكان الي كضيت بي٨ سنوات وخلصت ايامهن بضحكتها ودمعتها وفرحتها وحزنها اغانينه ولعبنه وحتى عرك البنات وسوالف الرعب مال نص الليل

التمن علي البنات كلهن طبعا الميتم بي مايقارب ٧٠ ابنيه من اصغر وحده عمرها ٣ سنوات واكبر وحده عمرها ٣٠سنه وحتى العامله الي تشتغل اهناك اجت سلمت علي

واجتني رشا طايره طفرت علي شبكتني
وهي تصرخ هلاااا بريتييي هلا بنويرااا شهل موفاجئه الحلووه

كعدت والتمن علي مجموعه واني اسألهن شصار واني ماموجوده

عرفت ان ٤ من البنات اتزوجن اضاهر اني فتحتلهن طريق الزواج الله يسعدهن

لفت انتباهي عدم وجود لا ايه ولا ايمان

سالت رشا كالت بغرفتهن

نواره اووف الله لاينطيج يارحمه مثل مايتمتيهن منج وانتي عايشه

رشا سكتي وخليها امس اجت امهن وماخلوها تدخل لان ماما حبيبه مموجوده

نواره شكو جايه الصخام وجها ع العموم خل اروح اشوفهن خطيه خصوصا هذه ايمان صغيره اووف

كمت رحت يمهن

فتحت الباب مال الغرفه الكاعدات بيها

باوعن علي ثنينهن

كلتلهن شلونجن

ايه دارت وجها وكالت نفس لونه شعندج اجيتي حتى تتشمتين بينه

سكتت ماحاجيتها التفتت على ايمان

كلتلها انتي شلونج حبيبتي

بسرعه بجت وكالت مشتاقه الامي يانواره

ماحسيت الا واني دموعي تصب وياها وشبكتها لاتبجين يابعد كلبي ادري صعبه كلش صعبه تعيشين يتيمه وانتي عندج اهل مثلج بجيت هواي بس بعدين تتعودين ويصير هذا الدار بيتج وامج حبيبه ماراح تبدلينها برحمه صدكيني بس محتاجه وكت وتتعلمين

ضليت كاعده يم ايمان شوي انطيتها ٢٥ الي انطانياهن سلطان  وكلتلها  هذه الج انتي و ايه وهذا رقمي كلشي تحتاجينه اتصلي علي ترى اني اختجن ماراخ اتخله عنجن حبيبتي تمام

ايمان تمام

نواره هاج هذا تليفوني لعبي بي منزله العاب حلوه

ضلت تلعب بي واني اسولف وي رشا

خلص اليوم و كلش اتونسنه اني والبنات ونمت بجربايتي القديمه

ويوم ثاني وحده من البنات كالتلي تعالي خل اصبغ شعرج واحفلج وجهج شوي ترتيبات

اني كيفت بس كلتلها اكول الماما حبيبه

ولمن اجت كلتلها كالت احلى شي تسوينه خليها تسويلج اي شي وكليلي ع لون الصبغ التردي واني اجيبه الج وياي باجر

رجعت ع البنيه وانطتني لون صبغ يلوك وي بشرتي شكار بس كلش فاتح يعني على عسلي وكلت الماما حبيبه ويوم ثاني جابتهم الي

وصبغتلي البنيه جان اسمها خديجه وكصتلي من اطراف شعري شوي ولفته الي وحفتلي وجهي وحفت حواجبي كطمتلي اياهن جان مديله نازل وغسلت شعري وشسورته وخطت حواجبي بقلم التاتو وحطتلي كحل اتغير شكلي هواي لمن حفتلي وغيرت كصت حواجبي صار شكلي بي ااختلاف هواي

رحت ركض على ماما حبيبه حتى اراويها شكلي

فتحت شعري واني اكول الها شوفي ماما حلو

شفتها ابتسمت وكالت اللهم صل على محمد شنو هل كمر هاي شنو صايره هاي الحواجب وي هذا لون الشعر كالبات شكلج ١٨٠ درجه صاير شكلج جريئ فدوه
شيفكنه راح يتسودن الرجال من يشوفج

دنكت اني ورجعت رفعت وجهي كلتلها ترى اني النفسي سويت هيج مو السلطان صدكيني ماما

حبيبه لعد لاخير البيج اذا هيج

نواره ليش شسويت

حبيبه لازم يكون كل الي تسوينه في سبيل ارضاء زوجج وعلمود يحبج اكثر ويعجب بيج اكثر واكثر  مو تسوين النفسج

سكتت ماكدرت ارد عليها

ماما حبيبه ابتسمتلي يله حضري نفسج شوي واطلع للبيت حتى ترحين وياي

نواره لا يا امي عفيه خلي اضل اليوم هم فدوه فدوه

حبيبه امشي لج حلالج الجو لعد واحنه هم انريدج حجت وهي تضحك

نواره عفيه امي والله باجر ارجع اليوم عيد ميلاد رشا

حبيبه اهاا  كل عام وهي بالف خير حبيبتي هم زين كلتي خل اجيب الها هديه زين اني مابيدي شي كولي السلطان

نواره اي اكوله بس انتي لمن تروحين كليله تكول اتريد اتضل بعد يوم وراح تتصل عليك

حبيبه زين راح اكوله

وراحت ماما حبيبه ورا ماخلص الدوام والساعه ب٣ الظهر اتصل علي

وكال ليش مارجعتي وي حبيبه اني مو كلت بس يومين

كتله فدوه سلطان خليني بس اليوم بعد حباب بس اليوم

سلطان لا ماكو العصر اجي عليج

نواره عفيه هاي شبيك بس اليوم

سلطان ليش اليوم شكو

نواره عيد ميلاد رشا

سلطان اها خوش خليج اليوم بس باجر ترجعين وي حبيبه

كتله تمام جنت بنفسي ارجع لان صدك اشتاقيتله بشكل مو طبيعي ولمن سمعت صوته اتمنيت صدك ارجع بس رشا حبيبتي وصديقتي حبيت اسويلها موفاجئه بعيد ميلادها صبرت شوكي وكلت اليوم ح يخلص بسرعه وباجر ارجعله وبسرعه فتحت الفيس ودخلت على صفحته بالفيس جان بس شوفه اسمه كافي عندي وهو متوسط الصفحه

العميد سلطان السبيعاوي

ضليت اكلب بصوره واني مبتسمه وبسرعه بست التليفون وحضنته

وغمضت عيوني وفتحتهن واني مبتسمه واتذكر صوته ومشيته وعطره

انتبهت الايه صافنه علي وبس شافتني راحت

مرت الساعات حضرنه الرشا عيد ميلاد احلامها اني والبنات وبعض من الاساتذه واحنه لبسنه ومكياج واجواء اغاني وكلش شي حلو واحتفلانه ركصنه واكلنه وضحكنه

وخلصت العيد ميلاد الساعه ١٠ باليل طحنه من التعب كلنه جنت متمدده ورشا نايمه ع رجلي  واتصل عليها مرتضى كلتلها الخاطري لاتردين اليوم خلينه كاعدين سويه

وصدك ماردت عليه وضلينه انسولف لحد الساعه ١١:٣٠

اهنا اجاتني العامله التشتغل بالميتم

وكالت .........

يتبع....