-جلبت بالمحجر وصحت.... يمااا... لا اراديا كدرت اسيطر على جسمي بس حسيت رجلي تكسرت
حطيت ايدي على بطني وحاولت اكوم
رفعت راسي البنات كلهن يمي ويصيحن.... شبيج
واني بالي مو يمهن احس رجلي وظهري حيل يأذوني حسيت على رتيل وهي تسندني تريد تگومني گمت ورجعت گعدت حطيت ايدي على ظهري وبجيت وكمت اصيح.... يمااا راح امووت ظهرري رشاش وينك... ابجي واهذي لا اراديا
سندتني رغوده ورتيل كومني ونزلني بصعوبه واني كوا مفتحه عيوني نزلت الدرج مشيت شويه وبعدها غفيت
فتحت عيوني مغوشه شويه شويه بدت توضح
شفت المغذي معلك وراسي يأذيني حيل رفعت ايدي بصعوبه حطيتها على راسي
حسيت برتيل ورشاش اقتربو مني وضلو يحجون بس ما اسمع منهم شي بس وشه قويه بأذني
لزمت ايد رشاش وغمضت عيوني ورجعت نمت
فزيت مره ثانيه انتبهت للشباك الدنيا الصبح درت وجهي رتيل نايمه ع السديه الي بصفي
رفعت جسمي بصعوبه وتذكرت الوگعه حطيت ايدي على بطني وادعي يكون الطفل بخير واني ع هالحال طبت الممرضه مبتسمه تقربت مني وگالت... شلون صرتي
هزيت راسي گتلها... بخير
گالت... الحمد لله
غمضت عيوني گتلها... راسي يأذيني
گالت... اي حبيبتي من العلاجات... وراحت تحط الابر والادويه بمكانهن
فزت رتيل وكامت يمي بسرعه لزمت ايدي وكالت... شلون صرتي ام التوت
غمضت عيوني وكتلها بصعوبه... احسن
جرت نفس كالت... الحمد لله
بلعت ريك وحطيت ايدي على بطني كتلها... الطفل
كالت... العوض على الله اهم شي انتي بخير
بجيت كتلها... لا ليش هيج
كالت... اشش حره حبيبتي لا اعتراض على حكم الله
كتلها واني اشهك... مو هيج بس اني تمنيته يجي ورشاش هم حيل يحب الاطفال خطيه اكيد انقهر هسه
كالت... لج حره بعدكم شباب والعمر كدامكم تكدرون تخلفون عشره بس كوني بخير اهم شي صحتج هسه
مسحت دموعي كتلها... اووف ليش هيج حضنا مدايضبط ويانا شي
رتيل احس تعبت ليش هيج
كالت... لا حره لا تتشائمين كلشي بيه حكمه اسمعي مني اذا هالطفل ما مقسومله حياة وانه يجي فمعناها هذا الاحسن الج الله يرحم عبده بكلشي يصير وياه لان العبد مايعرف خفايا الغيب
يعني افترضي ولدتيه ولا سامح الله طلع مشوه؟
راح تبقين تتعذبين عليه طوله عمرج لان هذا ابنج والام احساسها يختلف
او لا سامح الله يطلع عاق
كلشي بيه حكمه حبيبتي واكيد الله راح يرزقج بطفل يخبل مثلج
هزيت راسي كتلها... امين رشاش وين
كالت... اجو اخوته وطلع برا
جريت نفس وكتلها... الله يعوضنا
كالت... امين
وكعدت يمي تحجي وياي
واني صافنه بالفراغ وافكر اكيد رشاش انقهر كلش جريت نفس وصرت اهون على نفسي شويه واندكت الباب وطب رشاش رفعت عيني بعينه شعره مخربط وهالات تحت عيونه ومبين عليه التعب
ابتسم ابتسامه خفيفه واجه گعد بصفي لزمت كف ايده وحضنته لصدري گال بتعب :-شلون صرتي
هزيت راسي كتله... بخير
گال... الحمد لله
مسح على خدي گال... ادري بيج سباعيه تعافي بسرعه
هزيت راسي گتله... اتعافى دامك وياي
جر نفس وابتسم طبو اوس وحازم سلمو عليه وعلى رتيل
ردينا السلام اوس كال... يول شدي حيل تقوي وكومي ما وكت المستشفيات هسه بعد وراج سادس
يطلعوج منو جنازه
ضربه حازم بكتفه كاله... احجي عدل يول هو هيجي الي يواسي طول عمرك تخربط بالحجي
جاوبه اوس... خاب دنجب شني مجذب بشي انه
بالقران عندي صديقي دخل السادس شاب طلع منو شايب انه جاي انصح لا اكثر ولا اقل
ابتسمتله حازم كله... شلون نصايح خايسه مثل صاحبها
ديجاوب اوس حجه رشاش بهدوء... سدو حلوككم لا بهاذ... واشر على حذائه
اوس كال... انه راح اسكِت بس گوا مو برضاتي
ضحكت على سوالفهم شويه طبت الدكتوره فحصتني انطتني ادويه وابر وسجلتلي خروج
ارتاحيت حيل صايره اتعقد من المستشفى كد ماالي بيها ذكريات سيئه كلش
اجت رتيل لفتلي الشال ولبستني الصايه ولزمت ايد رشاش وكمت رجعنا للبيت ويا حازم واوس
اول ماطبينا تلكتنا سالي الجانت تمشي على كيفها ويمها رغد اول ماطبيت حضنتني وبجت كالت بصعوبه... خوفتيني ولج
حضنتها ومسحت على راسها كتلها... لتخافين اني بخير
ابتعدت وهزت راسها وكالت... فوتي ارتاحي
طلعت مروه تركض حضنتني كالت... شلون صرتي
هزيت راسي كالت... بجيت عليج حتى عيوني حمرن عبالي راح تنامين مثل سالي
كالتلها رتيل... لا اسم الله ان شاء الله مانعيش هالخوف مره ثانيه
هزت راسها وكالت... تفضلو
... وفتحت باب الاستقبال
طبيت كعدت ويمي رشاش راسي على كتفه واوس وحازم كاعدين واحد بصف الثاني طبت مروه قدمت الكيك والعصير وكعدت بصف رتيل
مروه رغم بعدها صغيره بس شكلها اكبر من عمرها وملامحها مال بنيه شابه وجميله كلش
احلى وحده بينا تنطي شبه لرتيل وغير هذا كله تهتم حيل بنفسها كنتورها مايخلا من الكحل والمرطبات الي على طول تستخدمهم
ولو طلعت الها حبايه بوجهها تدخل بانذار لحد ما تعالجها..
كعدت سالي تسأل رشاش عن شغلهم وعن عثمان وانو ليش ميجاوبها وصار حديث على مقدام اخوي
كال رشاش... الولد ما مات وهالشي من صالحنا راح نقلبها دفاع عن النفس حاليا الجلسات جاي تتأجل بسبب المظاهرات
حسيت على حازم وهو يحجي ويا اوس بهمس يكوله... تلوكون البعض اثنينكم جهال الهديه مالتي راح تكون حليب نيدو
كله اوس... انجب يالفهيم دحج الفخامه جدر ولگه غطاه انت بس لا تتدخل وتسود وجهي
كله... اكل خرا منو يسود وجهك
جاوبه اوس... يول انه ماردتك تدخل هين كلت خاف تدحج لخلقتك وتطفر وحقها الصراحه
استغربت هذول شديقصدون جانو يحجون بهمس وكلمات النعل تتطافر ابتسمت على شكلهم مثل الفاره والبزون بالضبط
وراها بكم يوم گاعده اقره قرأن بليل كملت طبكت القران حسيت نفسي ضايجه كمت اخذت الموبايلي الايفون جابه رشاش الي جديد
اتصلت عليه مره مرتين تلاثه وكله مشغول حيل ضجت كلت... ويامن دايحجي بهالوكت هذا
اخذت الموبايل ومن الملل صرت اتصفح ع الفيس اقرا قصص دخلت التعليقات شفت بنيه كاتبه... اقراهن ع الواتباد احسن
جاوبتها... شنو هذا البرنامج؟
كالت ... حبيبتي برنامج قصص هناك تكدرين تنزليهم وكلما تنزل الكاتبه يجيج شعار احلى من الفيس
كتلها... عفيه شلون انزله؟
جاوبت... نزلي من متجر بلي بس كتبي واتباد ويطلعلج
ماجذبت خبر دخلت نزلت البرنامج وبعدها نزلته وصرت انزل القصص الجنت اقراهم ع الفيس
وبديت اقرا لحد تلاثه بالليل اقرا والقصص كلها حقيقيه واغلبها ضباط ويخونون يعشقون النسوان
كلبي وجعني وتذكرت رشاش جان مشغول معقول يخوني؟
ومن ادخل للتعليقات كلها يزيد شكي
سديت الموبايل وصرت افكر الى ان غفيت كعدت ثاني يوم متأخره وضايجه لكيته متصل ماهتميت كمت سبحت وبدلت لكيت رتيل تسوي ريوك كملته وراحت كعدت سالي كعدنا اكلنا ورجعت للغرفه احس نفسي مكتأبه
للظهر هم اتصل جاوبته گتله... وين جنت البارحه؟
كال... شغل يعني وين
حره... وشغلك الساعه بـ ١ بليل
كال... اي جنا نحجي انه وكسار بموضوع
حره... ها حلو
كال... شبيج ؟
حره... سلامتك
كال... بربج كِلش ما وكت نكدج ابوي مستلگ هينا
حره... واني مدانكد ولا شي هو بس سؤال
گال... اوكي
سمعت صوت يمه واحد يگوله... ابو السباع استعجل بعد اخوك
جاوبه... جاي... ورجع كلي... بعدين نحجي.. وسده
تأفأفت ورحت ادرس شويه
لليل خابرته جاوب حجينا شويه كتله... رشاش انت معقوله ماعندك سوالف منا منا!
كال... احد گلچ مگو**ـي انه؟
حره... لا حشاك مو هيج بس ماادري يعني
كال... الحجي الي بكلبج كوليه
حره... شو الضباط كلهم عدهم سوالف نسوان.. جريت نفس كتله.. صرت اضوج كلما تتاخر عليه
كال... منو كلج هالسالفه
حره... البنات يحجن وهم دااشوف بالقصص
كال... بويه ما كِل اصابيع ايدج سوا
هاي انه صارلي جثير وياج دحگت لوحده غيرج؟
حره... لا ما دحكت لعد ليش البنات يكولن الضباط يدورون نسوان؟
ضحك كال... شلون تطبكين بين لهجاتنا بس افهمي شغله بويه ما ضروري كل ضابط يصير كو**د ودينو النسوان بس لان شكم واحد عندهم هالسالفه
صح مانكر هين جثير ضباط يضوجون بوكت فراغهم ويرحون يخابرون ويكضون وكت
كسار جثير سولفلي عن هالنمط بس ما كلهم هيجي اكو زلم خوفهم من ربهم وحبهم لحريمهم واكف بعينهم ويمنعهم عن الغلط
جريت نفس كال... يولي وانه ليش جاي اشرح شني ماتثقين بيا؟
حره... مو هاي هم جانت تثق بيه وطب فش طلع متزوج
كال... اوي والله
حره... وعلي وفوكاها يريد يعيشها ويا ضرتها بلا هذا مايستاهل ينطگ بالقندرا
كال... لا بالله محد يستاهل ينطگ غيرج انه ويني ووين هالقصه ابوي مستلگ خاب امشي جاي تلهيني
ضحكت كتله... شدتسوي
گال... اكـ**د
ضحكت كال... يلا نامي
كتله... ماشي
وسد الخط رحت فتحت الواتباد وگعدت اقره بالقصه وابجي ويه البطله
مرت فتره گمت مااشوف من گد القصص هم اقره وهم ابجي ع واهس البطله
بيوم دااتريك واقرا قصه اضيع وكت
اندكت الباب كمت اشوف منو فتحت الباب شفته رشاش ضحكت وبسته بخده
كال... خواتج يول
حره... نايمات بس اني كاعده
هز راسه وطب كال... جاي تقرين
هزيت راسي بلا كتله... دااقره قصص
كعد ع الصينيه و كال... كـ** امي وانه عبالي اجتهدتي من طيـ**ي تطلعين معدل
حره... الله كريم اذا كلش ااجل
كال... انجبي ماكو تأجيل اقري وانجحي
تأفأفت وكعدت صبيتله جاي كتله... مالي واهس ابد
كال... كل الطلاب ماعندها واهس سوي واهس لروحج وانجبي
باوعلي كال... يولي هاي سنه شني ما تستهضمين تخسريها ترا هاذ وكت من عمرج
حره... مدري احس مداكدر ادرس شي
كال... لا تكدرين اعرفج سباعيه
جريت نفس باوع للموبايل وكال ... هالقصص خففي منها جاي تلهيج
حره...اي والله ادمان صارت
كال... حددي وقت محدد باليوم وها اها
هزيت راسي وكملنا اكل كمت اغسل المواعين كال... انه رايح يم عثمان
حره... ليش ابقى هين
كال... عندي شغل عگب باجر الصبح اخذج تدحكين بيتنا بالانبار
ضحكت هزيت راسي كتله... ماشي حضنته بسته بركبته وطلع
ثاني يوم واكفه دااسوي حلويات،، الداطلي،، اخر شي خليت عليها الشيره وكملت حطيته على جهه وطلعت الببسي
من كعدتنا بالبيت ماعدنا شغله نسويها غير الاكل حتى وزني زاد
بس هالشي من صالحي لان جنت حيل ضعيفه
صحت البنات يجون كعدت سالي ويمها مروه اكلت كالت... عاشت ايدج... وباوعت كالت... لعد وين رغوده؟
كتلها... يمكن برا لحظه ادحك وين صارت
كمت طلعت برا واسمعها تخابر تقربت دااكوللها تعاي سمعتها كالتله
:-يعني حتدز امك باجر زين وابوك خاف ميقبل
ابتسمت دارت وجهها ارتبكت كالتله... بعدين نحجي.. وسدته
تخصرتلها كتلها... ياخاينه صايره اسرار من ورانا
ضحكت كالت... لا مو هيج
كتلها... منو مصخم الحظ
رغد... اوي انجبي
ابتسمت كالت... الولد الي التقيت بيه بالمستشفى
كتلها... الي شبعتي رزايل... وطكيت ايد بايد وضحكت
رغد... يماا انجبي حقيرا هو صح اني جنت لئيمه بس هو خوش ولد
كتلها... شلون هيج تعرفتو؟
رغد... مره احتاجو دم وتبرعت لاخو هيج ثواب وامه ضلت تتشكر مني وهيج يعني صارت بعد
ضحكت لزمت ايديها كتلها... يارب يكون زين وياج رغد انتي تستاهلين كل الخير
رغد... اي والله اني خوش بنيه بس محد يشوف روحي الحلوه
ضحكت كتلها... بس نحن شفناها يلا تعالي ناكل
طبينا كعدنا كالت... ام التوت صايره تحجي مثل رجلها دحكت وهين اي بعد بعد
ضحكت كتلها... تعودت ع لهجتهم
سالي كالت... اني عكسج اتبغدد عليهم بحجاياتي
ضحكت كتلها... واني اتنمبر عليكم بحجاياتي
كالت... اتنمبر شنو
كتلها... من كلمة انبار
ضحكت كالت رغد وهي تضرب سالي على كتفها... شو انتي لسه نفس اللسان ونفس اللهجه خاب شني ماتتأثرين برجلج
كالتلها... عثمان يحجي بغدادي وياي واصلا ماعايشه ويا اهله مثل حره ولا علاقتي قويه بأحد انباري فما اخذت بينما حره اوس وطيبه وحازم ورشاش كلش كافين يقلبون لهجتها
ضحكت وكتلها... صح
لثاني يوم الصبح صدك بدلت وكملت واخذني رشاش رحنا للبيت دخلت جان كلش بسيط وحلو طابقين ومو كلش جبير مثل بيت اهلو
بس فرحت بيه هوايه افتريت حوالين البيت ونزلت من الدرج واني فرحانه وهو تحت ركضت حضنته ابتعدت باوعت بعيونه ولزمت ايديه كتله... كلش حبيته
ابتسم كال... تستاهلين الاحلى
كتله... كلشي دايمشي تمام هالفتره وكلشي حلو فرحتنا ناقصها بس مقدام
هز راسه وكال... يطلع وعيونج الموضوع يحتاجله وقت بس يطلع وهاذ العار عايش راح نخلي يسحب الدعوه
هزيت راسي وكتله... ياارب
جرني وباسني من راسي ونزل باس عيوني وكال... وعيونچ،،، كِلشي ينحل
ابتسمت ضلينا شويه ورجعنا لبغداد
بعدها بيومين گاعدات اني وسالي فارغات ماعدنا شي ومروه حاطه ماسك لوجهها وخيار تحت عيونها وحاطه السماعات باذنها ومتمدده يمنا بالهول
كاعدات نكرز حب ونباوع للاخبار اندكت الباب كمت اشوف منو
فتحت الباب شفتها شذر وابنها ابتسمت وبوستها
طبت و كالت... ها حبيباتي شلونجن... وراحت تبوس سالي
رحت جبت عصاير وكيك وكعدنا ندردش جبناها سوالف عن حياتنا ووضع مقدام لحد ما جبناها سيره على قصص الواتباد كتلها :-حاليا اني متابعها قصه وميته قهر ع البطله
گالت... وقصتي ما تابعتيها
كتلها... يا قصه ولج؟
شذر... "غياهب الجهل والظلم"
فتحت عيوني متفاجئه كتلها واني افتح موبايلي وانزل القصه... ياجلبه ليش ماكلتيلي
شذر... المصايب التمت عليكم مالحكت
هزيت راسي سالي كالتلها... شلون تأمنين تنطين قصتج لوحده غريبه ماتخافين تهددج؟
جاوبتها شذر... لا بلعكس والله البنيه حبابه ومحترمه وهيج تحسيها تعيش بمكانج بحيث من نگوللها عن تصرف غلط تنقهر وتفرحلنا
ابتسمت باوعت لسالي كتلها... خنكتب قصتنا
سالي... يا يمه دنجبي شتكتبين يمعوده قصتنا مو سهله داتشوفين تهديدات وقتل
حره... مابيها شي نوثق حياتنا
سالي... وشلون تثقين ببنيه غريبه السالفه تخوف حره خاف تغدرج
شذر كالتلها... يا شسالفه سالي لعد اني حتى صور دازتلها ببساطه تكدر تبتزني حتى انطيها فلوس
بعدين حتى التحرش سولفنالها عليه ولا هددت ولا شي
هي هوايتها الكتابه ودا تكتب
سالي كالت... ماادري ما مرتاحه اني
حره... اريد اكتب قصتي خلي البنات ياخذون العبره من حياتي وين جنت ووين صرت اريد اذكر كلشي
سالي... براحتج بس اني لتذكرين عني شي عثمان مستحيل يقبل وهم اني اخاف... جرت نفس كالت... مااريد اخاطر طلعت من حلك الموت بصعوبه
هزيت راسي وحطيت ايدي على ايدها وكلتلها... مثل متريدين
ضلينا نسولف شويه وشذر كالت... راح اكول للكاتبه حتى تدمج قصتنا اذا مصارت كتبيها وحدها
هزيت راسي كتلها... ان شاء الله اني هم حاراسلها انطيني حساباتها
اخذت الحسابات وراحت شذر لليل كاعده ضايجه وحدي ومخنوكه علمود مقدام حاجيت الكاتبه كلتلها... مرحبا
عيوني اني حره بنت خالة شذر صاحبة قصة غياهب الجهل والظلم شذر گالت حتگولچ عني
مجاوبت كلت فشله اكيد نايمه حطيت الموبايل جوا راسي وغفيت لثاني يوم لكيتها مجاوبتني
حاجيتها حسيت نفسي مرتاحتلها وحجيتلها الاول والتالي صرت كل يوم احاجيها وافضفضلها
صح بالبدايه خفيت اشياء لان خفت على سالي بس البنيه جانت حيل متفهمه ومن احجي بدون مااكوللها تكولي... حااخفي فلان شغله علمود متنكشفون
للعصر گاعده احجي وياها اجه رشاش گال... مقدام تحولت قضيتو من قاتل الى دفاع عن النفس
حره... حسيت گلبي طار من الفرح والدمعه صارت بعيوني الحمدلله واخيرا اخوي حايطلع
لثاني يوم اجه رشاش گاللنا.... مقدام راح يطلع بهالاسبوع بس بقائو ببغداد خطر لان هالكلب انهزم هو وجماعته حر طليق
جر نفس وگال... بالاضافه انهم منتمين لحزب الـ*** يعني وراهم ظهر قوي فلازم مقدام وسالي يرحون يمنا للانبار بين ما نكمللهم اجراءات سفرهم
رتيل بجت وكالت... سووا اي شي اهم شي اخوتي يبقون بخير مااريد غير شي ماعندي گلب يتحمل اكثر
هز راسه گاللها... ان شاءالله... وهذول الجلاب انه الهم بس خلي اسفر مقدام وسالي ويشوفون اذا ماعدت ترباتهم هين انه الهم
وفعلا ثاني يوم طلعنا كلنا للانبار اني وسالي ومروه هم لان ماقبلت تفارگنا اما رتيل فبقت يم رجلها وعمتها ماتركتها
رحنا لبيتي الي جان مستعمر من اوس وحازم
دكيت الباب فتحها اوس كال... اهلا اهلا تفضلو تفضلو البيت بيتكم لا تحسبون نفسكم غربه
حجه حازم... نحن نطلع وانتم تبقون ابد لا تحسون بغربه
كح رشاش كاللهم... شكلكم نسيتو ان هاذ بيتي ما بيت ابوكم
اوس كال... لا ما نسيت بس نحن متعودين على قلة الاحساس
كمل حازم... والتربيه
ضحك رشاش كاللهم... شلون بيكم بلوه ووكعت فوك راسي
طبينا للبيت وصرت انظف صعدت للفوك شفت مو مال انظف وحدي نزلت تحت اخذت مواد التنظيف ووزعتهن على اوس وحازم ومروه وكلتلهم... يلا عيني شدو حيلكم
مروه كالت... لا اظافيري يتكسرون من الزاهي
اوس باوعلها بابتسامه وكال... وانه هم شواربي تتسلت من الصبغ
حجه حازم... انه مرتي مانعتني من التنظيف تخاف عليه
ضحكت ورحت طلعت كفوف انطيتهن لمروه كتلهم... يلا عيني الكل على شغلو
باوعت لحازم ولاوس كتلهم... انتو مو تردون تستقرون هين
هزو راسهم بإي كتلهم... عجل يلا حالكم من حالنا تنظفون
طبت مروه للمطبخ تنظف اجه رشاش وهم واكفين يتبسبسون كال... هاه هاي شني
كتله... دايساعدونا بالتنظيف حبيبي وانت هم يلا اني ما خدامه هين الكل يتساعد بالتنظيف
اوس باوع لرشاش بترجي وكله... انه حامل مااكدر انظف
طكيتها ضحكه رشاش دفرو وكلو وهو يضحك... يول ساعد وانجب كِلنا عايشين هين
هز راسه وباوع للمطبخ كال... زين يصير انظف بالمطبخ؟
كتله... لا مراوي هناك
كال... عجل انه رايح على بياض لون المواعين
كتله... شنوو
ضربه اوس بالماسحه وكله... كافي تسخيت نظف يلا
تركتهم وصعدت ليفوك واسمع اوس يكول :-ماكو وطن ماكو تنظيف
كله رشاش... نظل بالخيسه شني
ضحكت على سوالفهم وضلينا ننضف كملنا بعد مامتنا تعب وطلعت رواحنا
بقن شوية غراض ضليت ارتب بيهن براحتي
بعدها بيومين اتصلت رغد وكالت... بنات خطبتي بهالايام
لسالي لازم تحضرين تمام؟
سالي...تمام اشوف عثمان واردلج خبر
صدگ بعدها سالي حيل اصرت على عثمان انها تروح بس رفض تماما ان ترجع لبغداد وصارت الخطبه ومارحنا
بس رتيل ماتركتها وبيوم الخطبه فتحتلنا كاميرا ع الواتساب
ونحن كاعدات نباوع لفرحة رغد وهي تلبس خاتم الخطبه
باوعت للكاميرا وكالت... سالي مكانج فاضي... وسوت علامة النصر بايدها
سالي برطمت مقهوره
واني ابتسمت وفرحت الها رغد ماتستاهل غير الخير
دانباوع لخطوبتها ومندمجات اندفرت الباب التفتت شفتها طيبه
ضحكت وكمت بوستها كتلها... ما تبطلين سوالفج
طيبه... اليوم ادفر بابج باجر ادفر باب رجلي
ضحكت كتلها... هو وينه الفصعون
طيبه... لا لا ده كان زمان انه خلص راح اهج من البيت واتزوج
ضحكت كتلها... وشوكت
طيبه... خلي يخطب الكلب بالاول
ضحكت كتلها... شبيج ضايجه
طيبه... ما ضايجه متوتره
حره... من شنو؟
طيبه... كسار
باوعتلها بعيوني بمعنى شبيه كالت... دز شيوخ وعمامه تا يخطبني
ضحكت وباوعت لسالي ضحكت وهلهلت طيبه كالت... يول فضحتني
كعدتها كتلها... وابوج
طيبه... كاللهم نفكر
حره... يوافق لتخافين
طيبه... اكيد بالنهايه هو من زمان حاجي... جرت نفس كالت... متوتره
ابتسمت ولزمت ايدها كتلها... هالشي طبيعي يولي هالايام حتصير ذكرى حلوه كلش بحياتج
ابتسمت وكالت... الله يكتبنا الخير
ابتسمت الها وضلينا نسولف
صدگ بعدها بايام ردو خبر لكسار انهم موافقين وحددو موعد تلبيس الحلقات
مر الاسبوع وكعدت الصبح بنشاط انظف واعطر بالبيت ابتسمت بفرحه من تذكرت اخوي مقدام حيطلع اليوم
جريت نفس قوي بفرحه وطلعت للحديقه فتحت المي تا ارش الزرع
طلعت مروه شايله بيدها غسول الوجه والمرطب ورافعه كذلتها بالباند كالت بفرح :-صباح الخير
كتلها :-صباح الحب
ضحكت وكالت :-شوكت يجي مقدام
كتلها... بلكي يتغدا هنا
هزت راسها كالت... يارب يرجعلنا سالم
كتلها... اميين
راحت تغسل وجهها واني طبيت للمطبخ اندكت الباب رحت فتحتها شفتهم طيبه وحازم جايب مسواك طبت طيبه واجت يمي بالمطبخ نسولف ونضحك ونلف الدولمه الي يحبها اخوي
شويه وطلعت سالي ويانا الفرحه جانت بعيون الكل
اليوم حتكمل فرحتنا
طبخت انواع الاكل علموده
كاعدات ع التلفزيون وطيبه تلح عليه علمود اروح وياها من تتسوك لخطوبتها كتلها :-اشوف رشاش واردلج خبر المشكله الامتحانات قربت
كالت :-يول هو يوم ما يفرق
هزيت راسي كتلها :- ان شاء الله
فزيت على صوت مروه وهي تكول... عزاا العزاني شصاير بيك... وتبجي
كمت اركض شفت اخوي حاضنته مروه وتبجي وهو يهدي بيها تفاجئت من حالته حيل صعبه شعره مخربط وعيونه حمر وكلش ضعفان
ويمه الولد عثمان ورشاش واوس
رشاش يخابر ومبين حيل ضايج ويصيح وعثمان يهز برجله
بس اوس اهدئ ويبتسم مجامله
ركضنا عليه اني وسالي حضناه وصرنا نبجي وهو يهدي بينا ويحضن بسالي باسها بعيونها وكال... الحمد لله من رجعتيلنا شلون صرتي
كالت... جان ناقصني بس شوفتك هسه اني كلش بخير
هز راسه وطب جوا جبتلهم عصير وعثمان ورشاش ماطبو جوا
مقدام باوع لاوس واشرله بعيونه كام اوس راح يمهم شويه ورجع
رحت يمهم جان رشاش يحجي ع الموبايل ويكول لعثمان... ردلي الاسماء بسرعه
وعثمان يردله الاسماء
جاوبه... هذول الواكفين بالسيطره اليوم اريد اعرف من هذول وليا حزب ينتمون كل المعلومات اريدها اليوم
هز راسه وسد الموبايل دار وجهه كتلهم :-شكو خوفتوني
هز راسه كال... ماكو شي.. وطبو جوا
شربو عصير بارد
كاعدين ومقدام يسأل بمروه ويسأل عن رتيل اتصل تليفون اوس جاوب كله... ها حبيبي
سكت شويه وكله... ابقى بمكانك جايك... وكام
لزمه من ايده عثمان وخزره رشاش كله... يول وين رايح
جاوبه اوس... يم ربعي منتظريني هين قريب
گله رشاش... اكعد واسكت جاي تدحك الوضع مال طلعه هسه
جاوبه... ربعي خطيه منتظريني بحر الشمس
رشاش كله... خابرهم وكلهم ماتروحلهم اليوم
تأفأف اوس كله... خويه مايصير ترا اليترك ربعه ياكل جبس بالدين
ابتسمت جاوبه عثمان... يول ما وكت تحشيش هسه ابقى لمصلحتك
جر نفس ودزلهم مسج كتلهم... ليش شكو ليش متخلوه يروح
كال رشاش... افضل
كتلهم... احجو عفيه اكو شي ليش هيجي متوترين
جاوب رشاش... ماكو شي يابه
ضلينا اني وسالي نلح الى ان كال عثمان... حاولو يغتالون مقدام اليوم
شهكنا ولزمت ايد مقدام كتله... منو وشلون
كال رشاش... نزلنا بالطريق وگفنا گدام سوبر ماركت الـ**** ومانحس غير صار رمي عشواىي بيننا
بس الگوا**يد انهزمو بسبب الازدحامات
حره... شويه واجه اتصال لرشاش رحت وراها كتله... شكو؟
تنهد وگال :-اتاكدنا من ضباط السيطره ومن هوياتهم
حره... ليش؟
گال... لان شكينا بالگوا**يد شلون عبرو من السيطره بس الضباط اكدو انو هم عدهم باجات وسلاحهم جان مرخص
حره... القلق تملكني وخفت حيل عمام رشاش سمعو بالوضع هيجي خطر
اجو هم يحرسون البيت بغياب رشاش وعثمان وماتركونا ولا لحظه
اني بهالفتره ضغطت على نفسي حيل حتى ادرس زين لان الامتحانات مابقالهاشي وردت اطلع معدل وطبعا رشاش واخوتي حيل شعجوني
طيوبه تأجلت خطبتها لان كسار هايه الفتره مريض
ضليت اسهر الليالي اقره اريد بس اطلع من السادس واخلص منه
لحد مااجت ايام الامتحانات وامتحنت حسيت نفسي زينه
بهالفتره سووا الجواز وكملو كل الاجراءات علمود سالي ومقدام يطلعون برا البلد مقدام رفض هوايه بالبدايه بس اصرارنا واصرار رتيل بالذات اضطر يقبل بالواقع ولا يبجينا واجه هاليوم الي حيسافرون بيه
الليل كله ابجي وألملم بهدومهم ورتيل يمنا تحضن بيهم وتبجي
ومروه تاكل وتبجي وتكول :-ليش متاخذوني وياكم
ومقدام يكوللها :- اسويلج جواز واجيبج يمي
لثاني يوم دايطلع للموصل يزور بيبي بهيه وصلتهم للباب واني ابجي
دقدام كلي... كافي ام التوت راح تخلينا مانروح والله
مسحت دموعي كتله... غيابكم صعب بس من مصلحتكم روحو الله يوفقكم وينور طريقكم وين مارحتو
كال... راح اكون بخير طول ما انتي تدعيلي
حضنته ورجعت حضنت سالي واني ابجي مسحت دموعي كتلهم... سلمولي على بيبي بهيه وكولولها حره تحبج هواي
وبس تصير الفرصه راح ازورها
حضني مقدام كال... وهي تدري
... باسني من راسي وطلعو
ضليت واكفه بالباب صعدو بسيارة عثمان ومشت السياره رشت رتيل ماي وراهم
واني ضليت اباوعلهم لحد مااختفت السياره من كدام عيني
نزلت دمعتي وكلت ... في امان الله
جريت نفس كلت... يارب لا تشوفني ايام سوده بعد
مسحت دمعتي وببالي بيبي بهيه
مشتاقه لريحتها
التفتت لبيتي شكد حلو على گدنا واخوتي بخير انتبهت لاوس الكاعد يرتب الحديقه ابتسمت الله رزقني بحمويني المثل اخواني وبطيبه الماكو احن منها
وبزوج لو الف الدنيا مالكى منه
اني تعوضت وعايشه حياتي بخير
بس بيبي منو الها بعد غير الله
نزلت دمعتي وعرفت منو الدفع ثمن هالاحداث المره شهكت
رتيل كالت... شبيج
التفتت الها كتلها... زعلانه على بيبي بهيه ضاع كل تعبها بلحظه... مسحت دموعي كتلها... احس بغصه جبيره كلما اتذكر ايامنا وياهن
لزمت ايدي وكالت... ماكو شي يبقى على حاله والظالم البارحه دفع الثمن اليوم
شوفي بالنهايه ابوهن الكلب وين صار؟ انقتل بابشع طريقه ومحد يتذكره اليوم
او ابو حوراء( حبيبة مقدام) باوعتلها كالت :-مات ابشع موته لدرجة صارو يغيروله الحفاضات من تحته
اللهم لا شماته
بس عدل ربج يشمل الكل
وكل ساقٍ سيسقى بما سقى
هاي سنة الحياة..
جربت نفس وگلت... والنعم بالله
مرت الايام ورتيل اخذت مروه وراحت لبغداد وبقى رشاش يصبرني على غيابهم صح صعب بس اهون المهم هم عايشين بخير وسلامه مااريد شي ثاني
بيوم اجت الصبح طيبه وام حازم واحنا دانتريك
كعدت ويانا كالت... خطوبتي هاليومين تجين وياي غصبا عليج
ابتسمت باوعت لرشاش ضحك وهز راسه كال... روحي وياهن هسه اتصل بتكسي ياخذجن
كتله... ليش مو انت التاخذنا
كال... مالحگ وعيونج
هزيت راسي كملت بدلت ولبست الحجاب ودا اطلع جرني رشاش من ايدي وكرصني من خدي وتقرب باسني كال... احبج
ضحكت كتله... واني هم
كال... انتبهي على نفسج واي شي يصير خابريني
هزيت راسي فتح الباب كال... يلا
نزلت لتحت انطه فلوس لخالتي وكاللها... اذا احتاجيتو شي خابروني
كالتله... ان شاء الله
طلعنا التكسي واكف بالباب صعدنا وصعد بسيارته ورحنا للسوك تسوكنا نص الاحتياجات ودانرجع محملات غراض مشى واحد من يمي كال... فدوا للخلقج شني جماره
اني خزرته خالتي كالت... امشن امشن خيولي
تجاهلنا ومشينا وكفنا ع الشارع تقدمت خالتي تأشر تكسي اجه مره ثانيه كال... بوسه لهالحلك
اني فتحت عيوني بغضب وتذكرت رشاش من خلاني اضرب رجل انوار بالنعال لان هذا الي يستاهله المتحرش
جريت نفس وهو واكف كدامي سألت نفسي اني من شنو خايفه؟
خليني اربي
نزعت حذائي وحجيت بصوت عالي... ياكلب ياحقير تتحارش ببنات العالم يالماعندك اخلاق... وشمرت الحذاء بقوا عليه
هو تفاجئ من ردي وركض بهالاثناء تجمعو الشباب وواحد سألني... شصاير خيتي
كتله... هذا الادب سز يتحارش عباله اني ماعندي لسان والله لو تعرف رجلي منو جان طميت روحك امداااك
والولد مشو وراه واني هالفتره كلها فاقده اصيح عليه وماخايفه من شي وبتك حذاء فزيت على طيبه وهي تجرني للتكسي وسايق التكسي يكول... عفيه عليج خيتي يستاهل الضرب بالقندرا... وضل يحجي
رجعت للبيت بتك حذاء طبيت حازم واوس كاعدين ع الكراسي بالحديقه اول ماطبيت اوس انتبه باوع لحازم وكال... بلا هاي سوايه تسويها؟
جاوبه حازم... شني؟
اوس... دحج... واشر على رجلي... مالكيت غير حذاء هالمسكينه تا تاكلو جان كتلي اجيبلك واحد من احذيتي القديمه
لزمه حازم من ركبته كال... انجب هاي انت اكلتو وجاي تذبها براسي عبالك ماادري
طلع رشاش كال... كافي هي كوا***ـد نجـ***ني من اجيتو لسه
.. وباوعلي كال... وين حذائج؟
رفعت ايدي بفخر كتله... ضربت بيه المتحرش
عمتي هزيت ايدها وكالت... غير شهرتينا يولي
كتلها... ممسويه شي غلط
كال... شصار حدري.. ومدلي ايده
تقربت لزمت ايده وسولفتله ضحك وكال :-تربيتي بعد ابوج
ابتسمت باسني من راسي كال :- عفيه هيجي اريدج
باوع لطيبه كال... الي يحاجيجن فـ بالقندرا وعلى راسو
ضحكنا وطبينا جوه
بعدها بايام صارت خطبة طيبه ببيتهم لبست فستان قصير جويتي ردن كامله بس دلع وحطيت تاج من كرستال وشعري برمته
سوينا الحفله واجه كسار عقد وراح
والليل كله نحن نركص ونضحك ونسولف جان يوم كلش حلو
وخالة رشاش اجت متأخره فضلينا طول الليل نركص جوبي وع الاغاني
الساعه 10 اجاني حمودي الصغير كال... خاله بابا رشاش يكول ختجي
كتله... تمام حبيبي
التفتت خالة رشاش كالت... شيريد هاذ ماجاي يدحك نريد نكـ**د شني الواحد مايركص
ضحكت كتلها... اشوفه واجي
هزت راسها ورجعت تركض ويا هند
لبست الصايه والحجاب وطلعت الولد كلهم كاعدين برا وابوهم هم واوس بيده الموبايل تقربت كاملي رشاش وهو يبتسم لزم ايدي ضحكت كتله... تريد شي
كال... اي.. وباوع لاوس
اوس كال... واخيرا اليوم موعد الولاده
ضربه ابو وكله... يول بلا لغوات جانبيه
ضحكت كتله... شنو
كال حازم... طلعت النتائج
كتله... والله؟
هز راسه كتله بقلق... شكد
ابتسم رشاش وكال... ٩٣.٤
حطيت ايدي على كلبي وكمت اضحك واصفك اوس ضرب حازم كله... هلهل يول شني ماتعرف الاصول
صدك حازم طكها هلهوله وصلت لراس الشارع واني اكمز من الفرح واباوع لرشاش كام ابو رشاش باسني من راسي كال... مبروك بويه ان شاء الله تطلعلج الكليه الزينه
كتله... شكرا عمو ربي يخليك
اوس كال... بهاي المناسبه راح تاكلون احلى مندي على حساب رشاش طبعا... وصفكو هو وحازم
ضحك رشاش كله... يول عصي ماتطلع فلس من جيبك
جاوبه... هاي بعد
كتله... خلي اروح ابشر خالتي والبنات
هز راسه وركضت طبيت وكتلهن... يبنات ناجحه ناجحه معدلي ٩٣
هلهلت خالة رشاش كالت... يمه يوم التصيرين بيه دكتوره وتجيبين النسوان
ضحكت كتلها... الله يكتبلي الخير ان شاء الله
علت هند الموسيقى وجرتني بيناتهم اركص وهن بدائره حواليا يركصن ويصفكن لحد ما تعبنا ورجعت للبيت
اول ماطبيت باسني رشاش من راسي كال :-سويتيها وجبتي هالنتيجه الترفع الراس
كتله... تدري ممصدكه
كال :- صدكي انتِ تكدرين تسوين كلشي ترديه
تلمس خدي وكال :- لانج سباعيه وجثير قويه
حضنته بسته من ركبته وكتله :- اني روحك ابو السباع
ضحكت ورفع راسي وتقرب باسني بشفتي وضلينا طول هالليله سويه
لثاني يوم كملت طبخ واخذت ملابسي داروح اسبح مشيت شفته واگف ع المغسله يغسل بسته بكتفه وطبيت للحمام
سديت الباب وعلگت ملابسي
مشيت داافتح الدوش جان تتزحلگ رجلي واوكع ع راسي
صرخت وبنفس اللحضه حسيت غيمه بيضه حاوطت عيوني ورحت لغير عالم
فتحت عيوني بتعب بللت ريگي الناشف
باوعت اني بالمستشفى رفعت ايدي شفت كانولا بإيدي
التفتت دااباوع شفت رشاش واگف
وانصدمت ونزلت دمعتي من شفت حياة واگفه وراه
لابسه ملابس بيضه ووجهها يشع ولازمه المسبحه بإيدها تسبح وهي مبتسمه وتباوعلي
انييت بصوت مكتووم... ح حح حياااة
تقرب رشاش گال... ها حبيبتي انه يمج
رفعت ايدي بعدت كتفه وباوعت لمكانها ماموجوده نزلت دمعتي مسحها بإيده وگال... شلون صرتي
كتله بتعب... احسن الحمدلله بس شلون وگعت..؟
ابتسم گال... الف الحمدلله
فرگ وجهه وگال بإبتسامه... وكعت خير
عقجت حاجبي گتله... شنو؟
گال بضحكه... لو ماهالوگعه ماجان درينا انج حامل
فتحت عيوني وگلت بفرحه... حاامل!
كال بفرحه وابتسامه... اي حامل
جريت نفس براحه وهمست... يارب احفظه الي وثبته ببطني يارب
شويه وكمل المغذي ورجعنا للبيت بعد ماامرينا للصيدليه وجبنا العلاجات الكتبتهن الدكتوره
مدده على سريري ضامه اديه لصدري اباوع للفراغ واني مبتسمه
واني اتذكر شكل حياة بالمستشفى
رجعت الايام طفولتي
رجعت بيه ذكرياتي من عمري 7سنوات
لهذا اليوم
صفنت وگلت :-"ياترى كل المرينا بيه هل كانَ حلماً ام حقيقه!؟
طفولتنا
وصداقتنا
وحبنا لبعض
وتعبنا من الحياة
والعوز والفقر
والهموم الشلناها واحنا بعمر الطفوله
والمرينا بيه كله
جان واقع مجان حلم
حياة موجوده ويايه بكل لحضه من حياتي
بكل حزن اشوفها
بكل فرح اشوفها
حتى من اتعب تجيني ومتعوفني
لاهي العافتني ولا اني الگدرت انساها
بيومها عرفت وتأكدت ان حياة مستحيل تعوفني
ولا راح اگدر انساها
لانها هي بداية لكل نهايه... النهاية
______________________
"(تحليل اسم القصه)
هل كانَ حُلماً...؟
نهب طفولتنا
وسرقة احلامنا
ومقتلُ صديقاتي
واغتيال اختي الصغيره
وسجن اخي ظلماً
والنار التي اكلت ذكرياتنا
هل كان كل هذا حلماً...
ام هو واقع...!
واقع مرير اتعبني وارهقني اخذ مني اعز ما املك وسلب مني الراحة والطمئنينه
لدرجة لم اعد ادرك هل مامررت به كان حلما ام حقيقه
رؤية حياة بردائها الابيض
ووجهها المشع
ونضرة عيناها الجميله
وابتسامتها الساحره
رؤيتها عندما افرح او احزن عندما اكون متعبه مرهقه تجعلني اتسائل هل كانت رؤيا...؟
اما انها واقع
هي متواجده امامي اانا فقط من اراها ام الجميع يراها!
انني في حيرة من امري
العِراق المُصغَر
العُراق الذي جمع بين طائفتين في مكان واحد وبقلب واحد
وانهى شيء اسمه الطائفه
وجمع مسمى البشرية والاسلام فقط
ارواح مهشمه
ارواحنا التي سحقت على يد جلاد اسمه الظُلم ...
فـ الحياة جعلتنا نعاني من ظلمها كثيراً
الطين والكوكب
وقوفي على الارض وانا انضرُ الى السماء التي تملئها الكواكب
واحددُ حجم البعد بيننا تجعلني ادرك
لا الطين سـ يلتقي بـ الكوكب
ولا الكوكب يلتقي بـ الطين
هذا البعد الذي بيني وبين حبيبتي ـ
ولهنا ونختم الروايه
طول فترة القصه جنت سعيده وياكم
وسعيده بتعليقاتكم واندماجكم ويه قصتي
من اگعد اسرد القصه اتخيلكم موجودين حواليا ودااسولفها الكم
متدرون شگد اتمتع بسردها من اتخيل وجودكم يمي رغم تعب وارهاق بس كل هذا يختفي بمدحكم وكلامكم الحلو
حااشتاقلكم هوايه واشتاق الارائكم
انتظروني بقصة جديده وممتعه
اتمنى لكم دوام الصحه والعافيه
دمتم لي يااجمل كࢪز... ❤
Nawras_qasim_22
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!