رواية هل كان حلماً ...؟ (الِعراق_المُصغَر) الفصل السابع 7 - بقلم Nawras_Qasimᥫ᭡

الحلقـــــه الاولى »

روايـــــــــة

«هل كانَ حلماً...؟»

( ارواح ــ مُهشَمه )

بقلمي... ... لؤلؤة _البحار ...
ــــــــــــــــــــــــــــــــــ
25 / 9 / 2009

حُره... گاعده بالاستقبال اراجع بالقراءه حسيت ضجه قويه صارت بالبيت وصوت ركض وصريخ رتيل وسالي

جسمي رجف وگلبي انقبض شكو شنو صاير؟
فتحت الباب بإيدي الترجف مديت راسي اباوع

فتحت عيوني مصدومه صرخت مفجوعه واني اشوف ابوي شايل السجينه ورگض بأتجاه امي

التفتت عيوني الامي واگعه بالگاع وبطنها واصله لخشمها وتصيح وتغلط ورتيل واگفه گدامها وتحاميها وهي تصرخ

اجه على رتيل يدفع بيها يريد يلوح امي حتى يضربها ورتيل تدفع بيه وتصرخ

شال ايده وضربها راشدي من. قوته گلبها لورا

التفتت على ركضة مقدام ركض الابوي دفعه عن امي ورتيل وگام يصرخ بصوت مرعب
وكأن اكو شي بداخله انفجر

مقدام ... ايييييييدك لتمدهاااا اكسرهااااا واعلگها برگبتك والله

حُره ... عيوني تباوع الابوي ولو حرامات اگول عليه ابوي لان هذا شيطان مو اب

نگلب مثل الوحش وهجم ع مقدام يضرب بيه ومقدام يدفع بيه ويردله الضربات

صرخت مفجوعه من شفت ابوي رفع السجينه و نبتها بإيد مقدام التفتت عيوني الرتيل

هجمت على ابوي تدفع بيه بكل قوه وهي تصارخ وتغلط عليه
عيوني
رجعت الاخويه

واگف فاتح حلگه ويباوع الابوي مصدوم
يمكن متفاجئ صح يعرف ابونا سيء بس ماجان متوقع توصل بيه لدرجة يحاول يقتلهم...

عيوني تترقب حركات مقدام الموجودين كلهم اختفو وبقه بس مقدام واگف

واسمع بس صريخ رتيل وتحسبها على ابوي

رتيل... حسبي الله عليك يالظالم حسبي الله ونعم الوكيل عليك

حُره... عيوني فترت ويه حركة مقدام راح يمشي سريع بإتجاه التلفزيون جر موبايله

مدري شداس بيه وعاط هو ويباوع الابوي...

مقدام... راح اتصل بأبو صديقي وانته تعرفه ضابط واله مركزه
راح اشتكي عليك وهاي اثار التعنيف عليه وع امي

... وانعل ابو الگو... د اليطلعك من السجن وخواتي كلهن يشهدن وحتى الجيران اشهدهم

انك گو... د وعاق وتزني وتشرب خمر وجنت راح تكتلنه
حجاها وهو يحط الموبايل على اذنه

اباوع الابوي گام يمتمت ويباوع لمقدام بخوف

امي گالت بصياح... اييي اييي مقدام اتصل واني هم دشتكي واشوفهم الضرب العلا جسمي واخليهم يخيسو بالسجون لهالگو... د

حُره... ابوي گام يتراجف خله وطلع يركض باوعت لمقدام نزل الموبايل من ايده وشمره بقهر

رتيل راحت ترگض عليه جابت خاولي ولفته على ايده
امي گومتها سالي واجت وگفت يم مقدام تباوع لجرحه وتتحسب على ابوي

واني اني من هذا كله صوتي ماطلع حسيت نفسي بداخل دوامه وتفتر بيه لااگدر انطق ولااگدر اعيط

حاطه ايدي على صدري وافرك بيه بقوه حتى يهدء
عم السكون بالبيت

مقدام... وخري رتيل لاتخافين مابيه شي هسه دروح اعقمها يم ابو احمد المضمد.. حجاها وهو يلبس نعاله ويطلع

رتيل... حسبي الله ونعم الوكيل بسك يأبوي الله عالظالم الله يردك ويحرگ گلبك مثل ماحرگت گلبنا.. تفتر تلم بالهوسه الصارت ويه العركه وتدردم

گمت من مكاني رحت للمغسله فتحت البوري مديت كفوف اديه مليتهن ماي وشمرته ع وجهي

برودة الماي صحتني ورجعتني للواقع بعد ماجنت غايبه عنه
التفتت عيوني تدور ع سالي

وينها طول العركه مااشفتها رحت امشي للغرفه طبيت اتلفت وادورها
عيوني صارت عليها

گاعده بزاوية الغرفة مگرفصه نفسها وحاطه راسها بين رجليها
تقربت منها..
.. سهرر

سهر... بابا راح لو ضربها لماما... گالتها بغصه ودموع

حُره... تقربت منها.. لاسهر لتخافين امي زينه مابيها شي وابويه طلع من البيت

شنو صار وليش تعاركو هم تعرفين...؟

سهر... من ابويه طب راح بدل ملابسه واجه طلع موبايله وگام يخابر مدري المن

ويگول عمري وحبيبي اجت ماما شافته سحبت الموبايل منه وگامت تصيح منو هاي وهو تخبل شلون تسحب الموبايل منه هيج

گام عليها ضربها وماما گامت تغلط وواحد تلاطش ويه الثاني رتيل حاولت تهدء الوضع بينهم

بس ماكو ماسكتو وظلو يتعاركون فجاءه بابا ركض للمطبخ وطلع بإيده سجينه ويگول الماما ذبحج على ايدي اليوم

جان مقدام متجاهل عركتهم وبس يباوع عليهم
فبابا رگض لماما ديكتلها وو..

حُره... اششش كافي الباقي شفته كافي لتضوجين بابا راح وماما سكتت يلا گومي خطيه رتيل مقهوره مو حمل تشوفنه مهبوطات

تركتها ورحت ارگض للسياج طفرت منه ع بيت حياة رحت امشي بسرعه خاف يجي ابوي فتحت باب المطبخ

... حياااااة حياااااة

... هااا تعاي هنا

حُره... باوعتلها گاعده بالهول وبيبي بهيه نايمه بفراشها
رحت گعدت يمها...

... حياة تعالي اسولفلج شنو صار ويانه..

حياة... شنو صار احجي... حجتها وهي تتتربع وترجع شعرها ورا اذنها وتباوعلي بأهتمام

حُره... مقدام وابويه تعاركو عركه جبيره كلش ومقدام راد يخابر الشرطه على ابوي ووو سولفتلها العركه بالتفصيل ...

حياة... اوگفي اوگفي گومي للمطبخ ومثليلي شصار بالضبط وشلون دفعه

تعالي... حجتها وهي تگوم كمت وراها ورحنا للمطبخ وگفت گبالي وگالت

... يلا هسه اني ابوج وانتي مقدام شلون دفعه مثلي

حُره... مثلتلها الحركات والكلام بالضبط..

عصبت گالت... والله هذا ابوج داهيا ادري شنو من بشر شلون يضرب ابنه بالسجينه يعني لاسامح لو جايه بگلبه او براسه بدل ايده جان شگال لنفسه...حجتها وهي تباوع لعيوني

حُره.. الصراحه حياة مقدام ضل متفاجئ وحتى اني حيل تفاجئت نعرف ابونا شخص سيء بس ماتوقعنا بهالسوء هذا ... گلتها بألم يون بگلبي

حياة... الحمدلله مصار شي سيء وعدت سلامات لتنقهرين وتعالي ناكل حب اني وياج... گالتها بأبتسامه

حُره... لالا لازم ارجع للبيت خاف يرجع ابوي ورتيل هم ماتدري بيه اجيت لاماتلگاني وتظل قلقه... حجيتها واني البس نعالي واطلع من المطبخ

حياة... خوش خل اوگفلج لعد...

لبست نعالها واجت وراي طفرت من السياج ع بيتنا باوعتلها ابتسمت... يلا روحي اني راح اطب

حياة... تمام سلميلي على رتيل وسالي.. گالت بأبتسامه

... يوصل... ابتسمت ورحت طبيت للاستقبال سالي نايمه بفراشها وتلعب بخشمها

رحت لفراشي مددت عليه جريت نفس بهدوء ونمت... للفجر حسيت بطگطگه بالبيت رفعت راسي بخوف

باوعت مقدام نايم ورتيل هم وسالي نايمه يمي خفت حيل تقربت من رتيل وهمست بخوف واني اهز بكتفها..

... رتييل رتييل.. اگعدي اسمع طگطگه بالبيت

فتحت عيونها... ها حره شبيج..

.. اكو طگطكه بالبيت خاف حرامي جات علينا

رتيل... والحرامي شعنده يمنا هذا الا حرامي امه داعيه عليه بالرجم وفگر الحظ والله جابه علينه حتى ينتقم منه

... گالتها وهي تگوم وتهمس بصوت ناصي واني امشي وراها وملزمه بطرف ثوبها...

باوعت غرفة امي مفتوح الضوه والطگطگه بيها امي اليوم نايمه يمنا بالاستقبال خافت من بابا خاف يرجع ويأذيها...

جرتني رتيل ورجعت للاستقبال طببتني وهي ظلت واگفه بباب الاستقبال وتباوع للغرفه

شويه وطلع بابا وشايل جنط كبيره بأديه واوراق لازمهن بطرف شفته رتيل ضمت روحها ليشوفها

وهو هم مااباوع ولا التفت خلا وطلع من دون كلام
التفتتلي رتيل صافنه ووجهه باهت

اني مفهمت شنو السالفه رجعت لفراشي ونمت لان حيل نعسانه
ثاني يوم الصبح گاعدين نتريگ كلنا

گالت رتيل.. ابوي اخذ غراضه وطلع من البيت ومااتصور بعد يرجع لان مااخذ كل ملابسه وحتى جنسيته

حُره... ظليت صافنه عليها رجعت عيوني التفتت على مقدام ساكت وياكل ماانطه ردت فعل

اميره... ان شاءالله يموت هالعار هذا ولو العار مايموت ولايلفه جفن

حُره... انقهرت من كلامها صح بابا موخوش ويانه بس كلامها يحز بخاطري

كملت ريوگ ورحت ارگض لبيت حياة واني مرتاحه

سولفتلها على بابا گالت

... لتخافين اكيد يرجع ويمكن طلع لان عرف غلطه ف ان شاءالله من يرجع تتصلح الامور

لان هو جبير وواعي وانتي صيري قويه كملي وياه او بدونه بس صدگي حيرجع ولتزعلين

حُره... ياا شبيج حياة تخبلتي اصلا اني ادعي ميرجع بعد

حياة... لا ميصير تگولين هيج يبقى ابوج

حُره...اكرهه مااكدر اباوع بوجهه بعد كلشي سواه... حجيتها بغضب طاغي

حياة ... والله حيره انتي توكلي ع الله ومايصير غير الكاتبه وكلشي يكتبه ربج هو الخير النا

حُره... والنعم بالله... يلا اگوم اروح للبيت ...

ودعتها وطلعت من بيتهم طبيت لبيتنا التفتت مبتسمه على مقدام
واكف ومطلع اغنية كتكوت مصارلها غير شهر من نازله

ويرگص عليها هو وسالي يهز جتف وي يغني ويه الاغنيه

... هاااي شنو.. لك ملعووون
بعدك زغير كتكوت
ابن عائله وابن بيوت
هاااي شنو
ملعوون ياهو ال علمك تشرب جگاير بسكووت
هااي شنوو

حُره... رگضت عليهم وكمت اركص وياهم فرحانه

باوعلنا اني وسالي نرگص وفرحانات صااح

مقدام... ارگصن ارگصن الله يديم نعمة الراحه علينا

واحنا منطلقات نضحك ونرگص

ومن يومها مقدام ورتيل حسبو امي مموجوده وبدو يعتمدون ع نفسهم بكلشي

مقدام زيد اوقات شغله حتى يجمع فلوس لولادة امي مبقالها شي وتولد
مرت اشهر وابويه مارجع واحنا ماحاولنا نسأل عليه اونعرف وينه

امي دائما تدعي عليه وتگول... ان شاءالله يموت ويخيس وتاكله الجلاب انقهر من تحجي عليهزرغم حقدي اله

لان مرت شهور وهو ماكو ولاسأل علينا ولايعرفنا ميتين عدليين رجعنا اني وحياة طبيعي اني اروحلها وهي تجينا

هي وبيبي بهية تحب امي تحب تكعد يمها وامي هم تحبهن امي عكس ابويه ماعدها سالفة طائفيه

وتحب حياة وبيبيتها حيل تگول خوش ناس وماكو منهم

اكثر شي حلو صار بهايه الفتره اني وحياة

صرنا مانتختل حتى نلتقي
او نتقاسم الحلويات
او نتبادل الرسائل
او نمشي لنهاية الافرع
هذا كله انتهى
ورجعنا نلتقي بدون خوف من جديد

بيوم 2010/1 كعدت الصبح وكالعاده بوجهي لبيت حياة دگيت الباب وطبيت

باوعت بيبي بهية ماموجوده وحياة كاعده عالدرج وطاكتلها صفنا

رحت عليها... وين صافن الحلو..؟

حياة... عندي خبر بس مااعرف اذا يفرحج او يزعلج.. گالتها بخوف وهي تدير عيونها مني

حُره... شنو هو گولي؟ حجيتها بخوف واني اترقب كلماتها

حياة... راح نرجع للموصل... گالتها بحزن واضح ع معالم وجهه

حُره.. انصعقت من كلامها عبالك واح. وكفخني من راسي.... ليش ترجعون

حياة... بيبي بهية دا تعاني تريد تشوف اخوها بعد ما رجع من السفر تكول اشتاقيتله ومن زمان ماشايفته

حُره... ليش هو جان مسافر...گلتها بغصه

حياة.. اي هو وزوجته بس قبل فتره رجعو واستقرو بالموصل وبيبي تريد نرجع للموصل
تگول اريد ابقى قريبه منه حتى اذا صارلي شي انتي متبقين وحدج اكو احد قريب منج ويمج

وخالي هم خابرها گللها تعالي واجري البيت البصفي واستقري بيه

حُره... هي تحجي واني دمي يغلي نقهرت وضجت حيل عطت بيها

انتي المفروض مترحين وتبقين هنا شلون راح تروحين وتعوفيني شلون بعد مااشوفج

گلتها بدموع وتركتها وطلعت لبيتنا اركض فتحت الباب وطبيت للغرفه ابجي

ظليت بالغرفه ضايجه ومقهوره ومطلعت ابد حتى مااشوفها ولا التقي بيها صجت منها حيل حتى اصحابي راح اخذه منها

لليل اجتني سهر للغرفه.. گومي اجت حياة وبيبي بهية...

كمت طلعت من الغرفه باوعت بيبي بهية كاعده وبصفها حياة رحت سلمت على بيبي وعفت حياة لان زعلانه منها حيل

گعدن يسولفن بيبي ورتيل لان ماما ماهي اني اباوعولحياة من جوه لجوه حتى متشوفني وتگول نست زعلها

وهي تحوص مدري شبيها الا ان عاطت بيها بيبي

بهيه... ولج كااافي لتگرصين زروري راحت.. گالتها بصوت عالي

باوعتلي وگالت... تعالي حره هنا اكعدي.. كالتها وهي تطبطب عالكاع يمها

رحت كعدت يمها وسالي لازكه بيها گالت

... حياة گالتلي انتي زعلانه لان دنرجع للموصل

... اي كلش

هزت راسها وكالت... بيبي انتي بعدج زغيره ومراح تفهمين ولا اگدر افهمج كل ضروفي بس خلي ببالج

اني مالكيت احسن منكم جيران ولاشفت بنات خلوقات وحبابات مثلجن واني جنت اتمنى ابقى هنا

اني وحياة بس اذا صارلي شي حياة وين تروح؟

رتيل... لا اسم الله بيبي عمر الطويل ان شاءالله

بهية... يمه هو هذا حق الله زين شلون حياة وين تروح قابل تجي يمكم؟

وانتو مهما يكون ابوكم ميقبل حياة تطب للبيت وهو لابد يرجع بيوم لبيته وعياله ماكو رجال يكدر يترك بيته هواي

اني دااسوي المستحيل حتى اامن حياة حياة لانها امانه عندي والامانه ثگيله ع العباد

ومااريد اقصر بشي حتى اوگف گدام ربي واني مرتاحه واگول اني سويت الي اگدر عليه

ادري بيج تحبيها لحياة بس مو مشكله تضلن تتواصلن واني اكيد. اجيبها بين فتره وفتره
والله اني الدا اسويه علمود حياة اني احن ع حياة من امها حياة جزء من روحي

رتيل... كلامج صح بيبي ومحد يگدر يلومج عليه واكيد. حره راح تتفهم الموقف وتتقبله بالنهايه احنا نريد مصلحة حياة وسعادتها صح حره..؟

گالتها وهي تباوعلي بأبتسامه تحاول تقنعني بيها

سكتت خايفه خاف اقنع بكلامهن وبعد مااشوفها رغم اني ماعندي حق يخليني امنعها من الروحه للموصل

ف مجبوره اتحمل باوعت عليها تباوعلي بنضرات قلق وخوف وترقب
ابتسمتلها لازم مااخليها تحس اني لسه زعلانه

حتى متضوج وهي رايحه لمكان بعيد جريت نفس اصبر گلبي الخايف بيه گمت گعدت يمها

ابتسمت... هاهيه حياة اني اهم شي عندي سعادتج الله يوفقج بحياتج والله لايفرقنا بيوم.. گلتها وگلبي وجعني مدري ليش

حياة... والله ميهون عليه فراگج بس مجبوره مثل مگالتلج بيبي كلشي دتسويه علمودي ف مجبوره اوافقها بكلشي

بس انتي تبقين احلى صديقه واخت وتوؤم روح ماراح يفرقني عنها بس الموت

حره... ابتسمت مرتاحه.. تعللنا شويه وراحن واني رحت لفراشي وبعد تعب من التفكير والحسره ع الايام الدتمر بحياتي وكل يوم يمر يخليني اشتاق للايام العدت ومضت الانها ورغم مرارتها الا انها احلى بهوايه من الايام الجايتني

ثاني يوم الصبح مقدام كال

مقدام..  خلي اخذكم انزور الامام الكاظم شفت حلم مو حلو

رتيل...  شنو ششفت

مقدام...  شفت غراب طب للبيت واريد اروح ازور واشد علگ حتى مايرجع الگواد الجبير

رتيل...  مقدام صدگ تحجي

مقدام..  اي والله

رتيل...  لعد. خنشوف بيبي بهية وحياة يجن ويانا

مقدام... تمام...  حره روحي شوفي بيبي بهية وحياة يرحن ويانه للزياره
...  گالها وهو يباوعلي

حُره...  ماجذبت خبر لبست نعالي وطرت لبيتهم سألتها لبيبي گالت

بهية...  ياريت والله اگيد نجي

حُره...  فرحت كلش رجعت اركض لرتيل كتلها وافقو يرحون ويانه
رحنا تجهزنا حتى نروح للزياره

شويه وانفتح الباب باوعت حياة طبت وبيبي بهيه وراها
باوعت لحياة لابسه بنطلون وحجاب وقميص طويل

اني هم لبست بنطلون وقميص اجت رتيل گالت...

...  اخذي جادر الصلاه احسنلج لان المكان مقدس وهم خاف هناك متفوتين الا اذا عبايه وخاف ازدحام وينشلع گلبنا

هزيت راسي رحت اخذت الي والثانيه اخذتها لحياة

حياة... ليش هاي شنو

حره... رتيل تگول ميدخلون الا عبايه...

حياة...  هاخوش همزين گلتيلي

حره..   احنا بطبيعتنه نتوضى قبل لنروح للامام  طلعنا من البيت ووصلنا الامام مقدام راح ويه الزلم واحنا ويه النسوان

احنا بالصحن واذن زرت ووكفت دااصلي كملت الظهر باوعت لحياة گاعده تباوعلي  ومدا تصلي

... شبيج گاعده ليش مدا تصلين

حياة...  ماادري متردده

حره...  من شنو

حياة...  هاي اول مره ازور وكلش حابه هالشي بس خايفه الي هنا هم ميحبوني لان سنيه

حره...  لايمعوده صلي هنا كلهم حبابين..

كامت احت وكفت يمي وكمنه نصلي ثنينا  هي مكتفه ايدها واني اصلي بدون ملاحضت احد انتبه او ركز ع الصلاه

غير اكو مره ظلت تباوع لحياة وتبتسم كملنا صلاه هي اجت سلمت ع حياة وگلتلها

... فدوه انتي من اخواننا السنه وجايه تزورين

حياة هزت راسها بأي راحت لمره لبيبي بهية سلمت عليها وكعدت تسولف وياها

باوعت لحياة اشوف الفرحه بعيونها ابتسمت لعد الكلمه شكد تفرق عند الانسان

طلعنا من الامام واتعشينا وهي على نفس الضحكه تمشي وتگولي

حياة...  انتهى زمن الطائفيه انتهى الناس بعدها بخير

واني على فرحتها اضحك رحنا اكلنا موطه واخذنا مقدام فررنا الاسواق صح مااشترينا شي بس بوقتها اللمه والطلعه صارت اجمل شي بحياتي وابد متنسي

من دانرجع صعدنا بالسياره اني كعدت بالنهايه يم الشباك وبصفي حياة ويمها سالي ورتيل

وليگدام صعدت مره ويمها بيبي  ومقدام گعد ع الكرسي المتحرك

المره اليم بيبي دااتسولف ويه ابنها ع الموبايل گالتله

...  خايب ماتنجب وتوگفلي عالباب انا وين اولي انا بهالليل 

وظلت كل شويه وكالت خايب وتسولف وتضحك

التفتت ع صوت سالي وهي تسألني...  اگول حره شنو يعني خايب...؟

حره... صفنت شويه بس مغرفت التفتت على حياة...  صدگ حياة شنو يعني خاايب

حياة صفنت گالت... هااي يعني... لحضه صدگ رتيل شنو يعني خايب

رتيل...  هم اهل الجنوب هيج يگولون

التفت مقدام علينا...  شبيجن متفتهمن اكو واحد ميعرف شنو يعني كلمة خايب

رتيل...  لا والله مندري شنو يعني

مقدام...  هاا ماادري...  حجاها وهو يحاول يخفي ابتسامتها

ضلينا الطريق كله نحاول نفهم معنى الكلمه ومفهمناها واستحينا نسأل المره...

مرت ايام وبيبي وحياة بدو يجهزون يشيلون غراضهم  شويه شويه واني صرت اتحسس وازعل كلش

من اشوفهم يشيلون الغراض عبالك شايلين روحي من جسمي

بيوم گاعده اني وبنيه من مدرستنا دتحجي كالت

...  اسمي زمرد يخبل وكلش حلو واحبه
بس انتي اسمج ليش متغيريه شو موحلو حره حتى مبيه معنى

حره... لا ليش اسمي حلو واحبه

زمرد...  لا موحلو حتى ماما البارحه  گالت حره اسم قديم كلش ليش هيج اهلها سموها

حتى من يگولون حره عبالي بيبي حره ام اللبن

حره...  ظلت تحجي وتعيب ع اسمي واني ضجت صدك حسيت اسمي قديم
رجعت اني ونكدي للبيت حياة وبيبي اليوم يتغدون يمنا

شافتني حياة زعلانه گالت...  ها شو هم غيمتي

حره...  حياة ضايجه

حياة...  ليش شبيج

حره...  اسمي محلو

حياة..   انجبي ياحمار هيج يفكر

حره.. زمرد هيج كالت وصدك اني هم  لاحظت اسمي محلو حتى اكو مره جبيره هيج اسمها موتدرين وتعرفيها بيبي حره

اجت كعدت يمي... لج لا بالعكس والله اسمائنا حلوه وبيها معنى وحره معناها ان الانسان حر 

او تحرر من العبودي شي كلش حلو يعني انتي حره تخيلي جمال هالاسم
وبعدين اني وياج اسمائنا تشكل جمله

حره..  شلون؟

حياة...  اني حياة ترمز للحياة سواء بالدنيا او بالاخره
وانتي حره يعني الانسان الحُر

فــ اني وانتي نكون جملة

حياة حُره ... نهاية البارت

____________________

لتنسون التصويت والمتابعه

مشاهده ممتعه احبتي