رواية هل كان حلماً ...؟ (الِعراق_المُصغَر) الفصل الثاني 2 - بقلم Nawras_Qasimᥫ᭡

         « الحلقـــــه الاولى »

              روايـــــــــة

          «هل كانَ حلماً...؟»
       
         ( ارواح ــ مُهشَمه )

         بقلمي... لؤلؤة _البحار

        ..............2007.............

ابتسمت...  تعالي اسولفلج..  جرت طابوگه گعدت عليها گعدت يمها..  سولفي يلا

.. حياة...  باعي من دا اروح للصيدليه اجيب علاج الضغط لبيبي فتت من حيينا...  سكتت شويه نزلت راسها كملت بصوت مخنوگ

...  لزمتني من اذني مره عجوز وگالت

... انتي مو وهابيه  شعندج هنا شوو دوليي...  ودفعتني حيل

ظلت المره تدفع بيه وتصيح...  ماكفاكم التفجيرات هايه كلها من راسكم يالوهابيه.!!

حياة...  اني نصدمت احنا شعلينه ناس فقره لايمكم ولا بگاعكم ليش هيج تفكرون شمدريكم السنه هم الفجروه الشيعه شفتوهم بعينكم؟

تحجي بقهر ودموعها بلنن خدودها الحمر.. ابتسمت على شكلها

.. ليش تبتسمين گايله شي يضحك!  حجتها بقهر وهي تباوعلي..

...  لا ماگلتي شي يضحك بس شكلج يجنن وانتي تبجين...  حجيتها بأبتسامه

ابتسمت الي هزت راسها...  انتي وين واني وين والله انتي وحده بطرانه

...  انتي مو گلتي احنا جيل واعي وملازم نكون مثلهم بلا فهم..؟
بعد ليش تنقهرين منها تولي حتى لتفكرين بكلامها
دام انتي تعرفين نفسج شنو وتعرفين السنه ميأذون الشيعه ولا الشيعه يأذون السنه
دام تعرفين هايه فتنه سياسيه لتهتمين ولتنقهرين تجاهلي الكلام ولا كأنج سمعتيه انتي اطهر واحلا من كلامهم السم... گلتها واني اباوع لعيونها بأبتسامه...

حياة...  كبرانه وگايمه تفتهمين تحجين ولج من شوكت كبرتي؟ گالتها بضحكه...

.. من اول ساعه اجيت بيها ؏ هالدنيا كبرت الف سنه لگدام...  حجيتها بحزن طاغي...

حياة... شنو بيج سولفيلي بلكي ترتاحين احسج مامرتاحه وعيونج دائما حزينه مو بس انتي حتى اخواتج؟ 

حُره...  سكتت خجلانه شسولفلها شگللها..  ابوي ميحبنا ميريدنا لو امي تاركتنا وحتى متعرف بأي صف صرنا

لو اگللها نتغده منتعشى لو نتمرض منتداوه لو القهر الشيب اخوتي وهمه بعدهم بعمر الورد

  شگللها حرت
وخجلت
حزت بخاطري اسولف
عن اهلي بالموزين...

...  ماكو شي...  حجيتها واني مدنگه...  رفعت راسي بإيدها.صارت عيوني بعيونها الملونه...

...مو ؏الاساس احنا اخوات ومنضم على بعض قبل شويه لمتيني لان مقبلت اگلج شبيا وهسه انتي دتضمين عليا راح ازعل عليج واجر اصحابي منج تره... گالتها وهي معصبه

... ماكو شي بس مشاكل بابا وماما وعرايكهم گامت تعبني حيل...  گلتها بخجل واني مدنگه..

لمسة كف ايدها الدافيه صارت على كف ايدي رفعت عيوني باوعت لعيونها ابتسمت...

...  عادي حره مو مهم المشاكل اهم شي وجودهم يمكم هذا كلش كافي عالقليل محتويكم ابيت وما شامريكم...  حجتها بألم وغصه حسيتها واگفه بگلبها...

هزت راسها بإيدها ضحكت وگامت وگفت گالت..

...  ياااا هههه صارلي ساعه ارطن ونسيت علاج بيبي هسه تتخربط خطيه...

ابتسمت...  روحي وسلميلي عليها هوايه...

... ادللي زماله ..  حجتها وهي مبتسمه.. 

ابتسمتلها.. راحت فتحت الباب وطبت لبيتهم..  رجعت عيوني لسهر گاعده وتباوع ؏ الجهال وهمه يلعبون

نزلت دمعتي...  اول مره اشوفها تعبانه ومتلعب وياهم وهي كل مره صريخها وضحكها يترس الشارع...

گمت بعدت الطابوگه حطيتها بكتر الحايط ورحت عليها قرفصت گبالها باوعتلي وجهه اصفر وشفافها بيض

...  اشيلج نروح يم رتيل...  حجيتها واني اباوع لعيونها..

... برطمت شفافها هزت راسها بإي..   نهضتها وشلتها ما اكدرلها اني اكبر منها بأصبع واحد (سنه) 

شلتها واني اسحل بيها طبينه للبيت رحت لرتيل...

... خوما تخربطت...  حجتها وهي تلم بالخبز..

... لاا جانت گاعده تباوع للجهال وهمه يلعبون...  حجيتها واني اجر گرصة الخبز قسمتها نصين انطيت نص السهر واخذت نص گمت اكل بيه...

لمت الخبز رتيل واخذت هدومها وطبت للحمام تسبح گعدنه اني وسهر ع التلفزيون نباوع لكارتون سالي...

حيل احب هالافلام كارتون بس سهر مغرمه بيه اكثر مني تاكل بالخبز وهي تباوع وتضحك...

طلعت رتيل من الحمام وگعدت يم باب الهول وگامت تمشط شعرها  گامت سهر راحتلها 

سهر... غيريلي اسمي...  گالتها وهي مبرطمه...

رتيل... ليش اسمج كلش حلو ليش تغيريه؟  حجتها وهي مبتسمه

سهر...  سميني سالي مثل اسم سالي هذيج...  گالت وهي تأشر عالتلفزيون....

رتيل... دللي هاهيه سميتج سالي من اليوم ورايح سهر صار اسمها سالي تمام...  حجتها بأبتسامه وهي تحضن بسهر...

حُره...  گمت من مكاني رحت عليهن وحضنتهن جرتني رتيل عدلت نفسها واخذتنا لحضنها ثنينه...

انفتح باب البيت... طب مقدام كتابه بإيده يمشي ويباوعلنه مبتسم...  واني مالي حضن وياجن...  حجاها وهو يدحس روحه ويانه بحضن رتيل...

رتيل ...  مقدام من اليوم ورايح سهر صار اسمها سالي...  حجتها وهي تباوع لسهر

مقدام ... اسم يخبل سالي العشق انتي...  گالها وهو يجرها لحضنه ويبوس بيها... 

ابتسمت لضحكتهم صار الليل اجه ابويه باوع لرتيل وگال...

شعلان... شمسوين عشى..  حجاها وعيونه تدور بالمطبخ...

رتيل...  مامسويه عشى ماكو مسواگ بالبيت...  حجتها وهي تجر نفس.. 

شعلان...  هاا يلا لعد راح اطلع للكافتريا اكل...  گال وهو يلبس حذائه ويطلع...

طلع وطبگ الباب وراه درت عيوني لرتيل وجهه صار احمر من القهر عيونها حمر وبالگوه واگفه حطت ايده الترجف ع الكاونتر النصه مفلش استندت عليه وهي تباوعلنه بقهر...

شويه وطبت امي...  الجنطه بإيدها ولابسه بنطلون اسود وقميص سمائي ورافعه شعرها من وره...

...  شمسوين عشى..  گالت وهي تنزع حذائها...

رتيل .. ممسوين ماكو مسواگ...  حجتها ببرود..

اميره ... اروح انام لحد يگعدني...  حجتها وهي تطب للغرفه...

سمعت عيطتها بقهر... ادرررري متسألون علينه متگولون هذوله منو الهم دام انتم مو گد المسؤوليه ليش خلفتونه ليش جبتونه ؏ هالدنيا...

بنتكم مريضه دمها نازل حيل وعلى ساعه يوگف گلبها ثنينكم طبيتو وطلعتو وهي نايمه ومدده ومدرتولها بال شنو من گلب عدكم...

تحجي بقهر ودموعها تدير...

اميره...  معليج انتي ولتعلين صوتج عليه فاهمه مو بنتج اني...  اجت عليها رفعت كف ايدها دا تضربها راشدي..

لزم كف ايدها بقوه وگللها بغضب طاغي... ايدج لا ترفعيها على خواتي لاتخليني اضرب بر الوالدين بعرض الحايط واتصرف وياكم تصرف لا يرضيكم ولا يرضي الله...

ﺣُره...  نترت ايدها من كف مقدام غزرته وراحت للغرفه تدردم طبت ورگعت الباب وراها...

گعدت رتيل بالگاع اني وسهر رحنه گعدنه يمها  جرت سهر گعدتها بحضنها وهي ساكته

ظلينه ساكتين اباوع عليها وعلى مقدام گاعد على صفحه ويفرك عيونه بقهر...
شويه وڪامت حطت طحين بطاسه وسط وڪامت تعجن بيه كملته لفته بلايلون وحطت عليه مخده...

راحت للحمام توضت واجت لبست ازار الصلاه فرشت السجاده وگامت تصلي...

حطيت المخده مددت عليها سهر مددت يمي تباوع للتلفزيون واني اباوع لرتيل..

عيوني وياها وويه حركتها كملت صلاه شالت السجاده طوتها وحطتها ع الميز راحت للمطبخ جرت طاسة العجين گام تاخذ قطع زغير وتسويهن على شكل دائره...

..اخر شي شفته قبل لعيوني تغمض هو الطاوه من طلعتها من الكاونتر وحطتها ع لنار...

كوابيس تلاحقني مو حلوه ما احبها كلها تخص سهر
سهر هوايه تضحك بكابوسي
ضحكتها جميله وبريئه
بس فجاءه
الضحكه تتحول لصرخه عاليه
صرخه موجعه والدنيا تصير ظلام قوي ما اشوف بعد
مااشوف شي حتى سهر مااشوفها

فزيت خايفه مرعوبه باوعت عليها تباوعلي بخوف...

رتيل... شبيج حُره..؟ گالتها وهي تباوعلي بقلق وخوف..

.. مابيه..  حجيتها واني انهض نفسي واگعد باوعت للصينيه محطوطه بالگاع ودايرها مقدام وسهر..

... گومي تعشي من تكملين اكل نامي بفراشج صرتي جبيره بعد مااگدر اشيلج نفس قبل..

حجتها بأبتسامه..

ابتسمت..  گعدت بين مقدام وسهر خبز بالدهن وياه جاي مديت ايدي وگمت اكل... 

...................... 2009..................

عمري زاد سنتين وحياتي زادت قهرين وتفكيرين تفكير بـ عائلتي ومشاكلها وتفكير بـ دراستي

واگفه گبال المرايه لابسه تشيرتات ولبست فوگهن بلوز جريت الصدريه لبستها صارت تخنگ عليه

ضيگه حيل احس التنفس عندي انقطع باوعت بقهر الجو حيل بارد مااگدر ماالبس بلوز

اذا البس قميص اموت برد واذا انزع التشيرتات هم اموت برد حتاريت شأسوي باوعت للساعه الوقت راح يروح عليه...

... لبست الصدريه بالگوه اباوع عليها لونها الاسود رايح وقماشها تعبان من الاول ابتدائي عندي بس هي البس بيها ارجع تغسلها رتيل وثاني يوم البسها...

ولبستها بالثاني وهسه بالثالث هم زين اني ضعيفه وناعمه وتصير عليه وزين  منها ولهسه باقيه وماتشگگت... ابتسمت بأستهزاء..  كالعاده اهلي ميدرون وين الله خلقنه

جريت نفس اصبر روحي بيه...شلت جنطتي لبستها طلعت للطارمه لبست حذائي وطلعت امشي بالفرع...

بليل مطرت الدنيا مطر كلش قوي وافرعنه ماشاءالله من تمطر الدنيا  مااريد اسولف بيها خاف ننحسد...

امشي على كيفي خاف ازلگ واوگع بالطين وگفت مسافه بعيده عن بيتنه حتى انتظر حياة تجي

طول هالسنتين نلتقي بالسر يا من السياج من يطلعون اهلي يا ندز رسائل ورقيه لبعض ونتفق نطلع بمكان بالفرع ونلتقي هناك...

واذا اهلي تواجدو بالبيت اكتبلها رساله واگللها ابويه هنا مااگدر اطلع اغلفها بورقه واشمرها من السياج وهي تشوفها...

استمرينه ؏ هالحال نلتقي بالسر بسبب شي اسمه طائفيه وبسبب عقول مريضه وتعبانه كل همها تسمع للفتن وتشعلها اكثر..

مديت كفوف اديه ومسحتهن ببعض حتى يخف البرد باوعتلها ابتسمت

...  تمشي بسرعه لابسه تنوره سوده وقميص بني بس مال بيت..  عقجت حاجبي..  ليش ملابسه ملابس المدرسه حتى جنطتها مجايبتها...

وصلت ليمي ... صباح الخير... حجتها وهي مبتسمه... 

حُره...  صباح النور...  ليش ممبدله لسه راح نتأخر والمديره ترزلنه...

حياة...  ما اداوم اليوم تعبانه وباجر عدنا امتحان فراح ارجع انام شويه واگعد ادرس روحي انتي..

حُره...  لعد لو ضاله نايمه ليش طلعتي الجو بارد حيل...؟

حياة...  لا ميصير اعوفج تنتضرين بالبرد...

حُره... يلا لعد ارجعي واني خلي اروح راح اتأخر...  حجيتها بأبتسامه...

... تمام...  گالتها وهي تتقرب مني حضنتني و بوستني دارت وجهه وراحت واني رحت للمدرسه...

طول الدوام واني مكتئبه وضايجه لان حياة مو ويايه متعلمين بالمدرسه كل خطوه احنا سوه بيها الي يفرقنه عن بعض هو الدروس وبس...

والي كئبني وضوجني اكثر الصدريه ضيگه عليه واحس مختنگه بيها حيل...

ونوب لابسه بلوزه وتشيرتات جوه البلوزه بسبب الجو بارد حيل احس روحي تقيدت حتى بمشيتي وصرت  مثل النفاخه النافخيها بقوه وعلى لحضه تنفجر...

صار وقت الطلعه للأهل لبست جنطتي وطلعت دا امشي بس التفتت ؏ صوتها وهي تڪول

نوران... شلونج حُره..؟
گالتها وهي مبتسمه

.. الحمدلله انتي شلونج؟

نوران .. الحمدلله.. نروح سوه..؟
حجتها  وهي تنتظر جوابي

ابتسمت.. اي يلا... نوران صديقة حياة ووياها نفس الصف حلوه ولطيفه
دائما اقارن نفسي بيها اشوف حياتها وين وحياتي وين

اهلها يحبوها حيل وشنو تريده ينفذو الها لبسها من احلى البس حتى تسريحات شعرها وحده احلى من الثانيه...

دائما اڪول الله ليش مخلى امي حنونه علينه مثل امها لو ابويه رجال خير وزين ويانه مثل ابوها

بس حياة متقبل اقارن نفسي بأحد دائما تگولي لتباوعين
للاعلى منج
باوعلي للاقل
حتى تشوفين ان رب العالمين
منطيج هواية اشياء
يتمنوها غيرج

واهما الصحه.. بس كلامها ابد ميقنعني ولا يريحني بالنهايه هي ماعايشه ويه اهلي ولا عايشه عيشتنه اني واخواتي..

جريت نفس ابتسمت واني اباوعلها تمشي وتسولف وتضحك تحب تسولف هوايه اذا شافتنه اني وحياة كاعدين تفرح حيل

تروح تشتري حب وتجي تگعد يمنه نگوم نكرز وهي تبلش تسولف ومتسكت الا لمن تعيط بيها حياة وتگولها دخت

نوران نفس منطقتنه بس بغير فرع مو نفس فرعنه قريب مدا نوصل لفرعها اكو طين هوايه

امشي وما انتبهت ع الطين الى من زلگت بيه تكومت بنصه ويه وگعتي انشگت الصدريه من فوگ ليجوه...

متت خجل استحيت مدري من الوگعه بنص الطين مدري من صدريتي النشگت من الطول للطول

الدمعه بطرف عيني مدتلي ايدها گومتني...

نوران... كومي حُره اوووف عفيه منطقتنه مابيها خير ابد اجمعو من كل بيت فلوس وبلطو الافرع

لا الدوله بيها خير ولا الشعب بيه خير...

تحجي مقهوره وتدردم ع الحكومه النايمه ومتدري بالدنيا كامت گعدت

واني صرت فضيحه مگدر اكوم كلشي يطلع من صدريتي شكها صار فضيحه.. 

باوعت لنوران نزلت جنطتها بالگاع وفتحت دكم جاگيتها الابسته نزعته گامت ولفتني بيه

...  روحي بيه للبيت لتنزعيه جسمج كله طلع ماشي..

... شكرا نوران ما اعرف شصار بيه لو لاج... حجيتها واني دموعي تنزل..

... الصديقات لبعضهن يلا روحي ونتبهي عالگاع زين لتزلگين مره ثانيه

.. هزيت راسي اخذت جنطتي ومشيت باوعت عليه واگفه يم فرعهم وتباوعلي اسرعت بمشيتي واني مدنڪه وخجلانه من عيون الناس الصارت عليه

.. فتحت باب البيت  طبيت رتيل دا تكنس بالطارمه شافتني اخترعت شمرت المكناسه من ايدها واجت عليه

...  شبيج حُره شنو زالگه بالطين؟ 

.. اي زلگت وصدريتي انشگت كلها... حجيتها بخنگه...

... اوكفي...  راحت طبت جوه البيت ثواني وطلعت هدومي بإيد والايد الثانيه شايله بيها الصوبه النفطيه

راحت للحمام خلت الصوبه علگتلي ملابسي اجت اخذت مني جنطتي گالت...

... اسبحي وتعاي... گالتها وهي تروح للمطبخ وجنطتي بإيدها

طبيت للحمام سديت الباب نزعت ملابسي الكلهن طين خليتهن بسلة الملابس الوسخه

كاسرت المي وسبحت كملت سديت الدوش نشفت جسمي لبست هدومي وطلعت اركض للصاله

باوعت سالي جايه من المدرسه وگاعده تقره بقراءتها...  اليوم مقدام مر علينا للمدرسه وهي جانت مكمله واجباتها والدرس الاخير شاغر فطلعت وياه

بس اني مگدرت اروح وياهم  لان عندي الدرس الاخير اسلاميه
اجت رتيل شايله صينيه حطتها بالگاع وكعدت رحنا گعدنه يمها

روبه وخبز وتمر محموس بالطاوه مدينه ايدنه وگمنه ناكل... 

كملت اكل رحت لجنطتي طلعت القراءه باجر عدنه امتحان بالتعبير 
اخذتها ورحت للاستقبال

گعدت اقره واحفظ بيه للمغرب  وگمزت مخروعه صدريتي مشگوگه واني معندي غيرها شلون اروح باجر؟

ظليت محتاره المرشده التربويه متقبل بغير صداري واني معندي بس هايه ونشگت...

مشيت للحمام اروح اخذها لرتيل تخيطها.. دورتها بسلة الملابس الوسخه لگيتها فارغه طلعت من الحمام باوعت للحبل

ابتسمت بحزن...  رتيل غاسلتهن وشارتهن حتى جاگيت نوران غاسلته وشارته

رحت عالصدريه اخذتها من الحبل ورحت لرتيل...  رتيل خطيها حتى باجر البسها..

اخذتها من عندي.. يا هاي بعد متتخيط!

.. ليش... گلتها بقهر..

...  لان مشگوگه من ناحية قبل الخصر ليجوه وبيها فتوگ هوايه  والقماش منتول حيل بس اخيطه يبين ذاك وينه مخيط...

حُره...  رحت لامي بالغرفه نايمه گعدته...  ماما ماما اگعدي

اميره...  خير شكو

...  اريد صدريه صدريتي انشگت وباجر عندي امتحان...

اميره...  اني شعليه ذاك ابوج روحي گليله خيجيبلجن صداري اني شعندي نعل فلوس

حُره...  گعدت ع حيلها وگامت تدردم

اميره...  گاعد لليل ونهار واني حايره بالدنيا ميگول عندي بنات عطال بطال نايم بالبيت مثل النسوان...

حُره... ويه كلامها طب ابويه للبيت سمعها تحجي اجه تعارك وياها هو يصيح وهي تصيح گبو وتعاركو

جرتني رتيل من الغرفه للاستقبال طببتني وسدت الباب باوعت رتيل فارشه فراشنه...

رحت گعدت ؏ فراشي وگمت ابجي...

سالي...  اهوووو هم عركه ماكو يوم ميمر اذا ماكو عركات بيه... لفت راسها نامت وهي تدردم ؏ اهلي ...

... ظليت ابجي لان باجر عندي امتحان وما عندي صدريه اروح للمدرسه ورتيل گاعده يمي تهديني

بس بعد طفله ونهدت دموعها...  البعمري مو مال تحير  بملابسها لو شلون تروح للمدرسه

البعمري المفروض تحير  اذا باجر حتجاوب بالامتحان لو لا

ظلو اهلي لوره الاذان همه يتعاركون واخيرا سكتو وخلصت عركتهم ابويه طلع وامي راحت نامت...

واني ؏ گعدتي ودموعي ورتيل يمي تهدي بيه وهي مقهوره اكثر مني...  لوقت متأخر طب مقدام

شافني ابجي ورتيل يمي تفاجئ فتح حلگه مصدوم گال لرتيل

... شكو رتيل خو ماكو شي شبيج حُره..!

رتيل...  ماكو شي هيج عادي..

مقدام... حُره احجي شكو هذوله (يقصد ؏اهلي) صيحو عليجن 
هذا الدايح (؏ابوي)  ضربج احجي

حُره...  صفنت ؏ اخويه واصل مرحلة الاحتقار الهم حتى بأسمائهم ميگول كله هذا الدايح وهذيج..

حقه الشافه منهم مو قليل عمره 14سنه شيدرون عنه هاي اذا درو شگد عمره هسه

گتله..  لاا مضربني

مقدام...  لعد ليش تبجين... حجاها وهو يگعد گبالي...

... صدريتي انشگت ...

مقدام...  البسي غيرها...  حجاها وهو يباوعلي...

حُره... مو ماعدي وما تتخيط بعد ونوب عندي امتحان باجر... حجيتها بدموع وقهر...

صفن عليه وبين عليه نقهر حيل وجهه صار احمر وهو عصبي من ينقهر وجهه يتغير لونه من الاسمر للاحمر

ظل گاعد وهو ساكت شويه وگام طلع من الاستقبال

اني نمت بفراشي ورتيل نامت بنصنه اني وسهر نامت وهي لازمه كفوف ادينه...

لليل الشتاء طويل واحنا انام من وكت بيه مرات اگعد الفجر شبعانه نوم رتيل متخلينه نسهر لان عدنه دوام صباحي...

ويه همومي وتفكيري بـ الامتحان الراح يفوتني وتفكيري شلون بعد اداوم من دون صدريه غفيت واخذتني روحي لعالم الاحلام

العالم المرات اتمنى اظل بيه وما ارجع لعالمي الحقيقي واذا رجعت اتمنى ترجع روحي لغير جسم مو جسمي لحقيقي

لجسم بنت ثانيه عزيزه ومدللة اهلها ومرتاحه وماكو هموم ببالها غير العب والدراسه وبس

فزيت من نومي رفعت راسي شفت مقدام گاعد وراسه بين رجليه

رجعت راسي للمخده ونمت ظليت كل ماافز الگاه گاعد
للصبح وهو منام ابد وجهه احمر وعيونه حيل حمر مثل الباجي هوايه...

للصبح ابويه طلع ومقدام هم طلع رتيل گعدت سالي بدلت حتى تروح لدوامها

بتسمت بحزن... اليوم مااروح والله كريم ع الامتحان

ظليت امدده بفراشي اندگت الباب راحت سالي تفتحها رفعت راسي اشوف منو

... طفل من منطقتنه سأل سالي... وين
حُره؟ 

سالي دارت وجه وصاحت...  حررررررره تعااااي الولد يصيححححج

... گمت طلعتله... ها
تقرب عليه مد راسه الاذني وهمس... حياة تگول وينج لعد منتظرتج شنو ما تداومين؟

ضربت كف ايدي بگصتي نسيت حياة ونسيت اگللها ما اداوم... ابتسمت اكيد هي موصيته يشاورني بسكوت

... گللها اليوم متداوم خلي تروح لتنتظرني..

الطفل طلع وراح سديت الباب ورحت للمطبخ اندگت الباب رجعت فتحتها نفس الطفل گال بهمس

... تگول حياة ختجيني بسرعه منتظرتها عندي شغله وياها...

رحت لرتيل گتلها... رتيل طالعه اشوف حياة تنتظرني بره...

هزت راسها بإي اني طلعت رحتلها شفتها منتظرتني بنفس المكان الننتظر بعض بيه گالت

... شنو متداومين تخبلتي مو عندج امتحان!

همست بقهر.. شو مالي خلگ وگلت ما ادوام اليوم..

عاطت...  انجبي زماله شنو دتنتقمين لان مداومت البارحه؟

هزيت راسي برفض... لا والله بس ما اگدر اداوم..

.. حُره اكو شي...  حجتها وهي تباوعلي بشك

... لا كلشي تمام... حجيتها واني انزل راسي للگاع..

... انجبي واحجي شكو ليش هيج ضايجه اهلج تعاركو ..؟ 

رفعت راسي باوعتلها تباوعلي بخوف وقلق... اي بس عادي تعودت..

حياة...  لعد شبيج ليش متردين تداومين..!  حجتها بخوف

حُره..  بعد مگدرت اضم عليها اكثر سولفتلها كلشي صار جرت نفس

گالت...  يعني علمود الصدريه؟

.. اي...  حجيتها بخجل

...  عندي وحده انطيجياها لبسيها وخل نداوم..

حُره...  لا ميحتاج و اصلا تأخرنا

گالت  ...  انجبي وتعاي وياي...

... رجعنا لبيتها بيبي بهيه دا اتخدر الجاي وسالگه البيض

.. صباح الخير بيبي

ابتسمت...  ياهلا بالحره صباح النور بنيتي تعالي مدي ايدج وسمي..

..  لا بيبي بالعافيه تريگت قبل لا اجي...  رحت وره حياة طلعتلي الصدريه انطتنياها وكالت

حياة.. خمس دقايق البسيها وتعاي

حُره... حياة ما اگدر اساسا اني اطول منج تصير قصيره عليه

حياة... مو مشكله ددبريها اليوم وبعدين هو فرق الطول سانتيمات ميبين او البسي ستريج جوه...

حُره...  ظليت صافنه عليها محتاره وهي تبتسم وتسويلي

... يلا ولج زماله راح نتأخر...

حُره... هزيت راسي اخذت الصدريه وطلعت رحت لبيتنه شفت رتيل گتلها...

... حياة انطتني صدريتها وگالت البسيها شتگولين..؟

.. عادي البسيها وروحي لان عندج امتحان مو مال تفوتيه وحياة مو غريبه عنا... حجتها بأبتسامة قهر

.. جريت نفس ورحت بسرعه ابدل حتى لانتأخر اكثر...  رتيل تحب حياة حيل ومتعترض من اخذ منها شي او اذا سولفتلها ع مشاكل اهلي

رغم هي تتخبل اذا طلعنه اني لو سالي سر البيت للجوارين او للصديقات تزاعلنه وتظل متحجي ويانه تخلينه نتخبل ونظل بس نبجي لان تخاصمنه

بس حياة تختلف عادي كلشي اسولفها ومتگول دائما تگولي حياة وحده منا ما افرقها عنجن..

طلعت واني البس بجنطتي وامشي مستعجله لگيتها واگفتلي بمكانه المعتاد

من شافتني ابتسمت..  رحت عليها لزمت كف ايدي شربكته بكف ايدها ورحنه نمشي بسرعه وبنفس الوقت نضحك عليمن ماادري بس الله ذب علينه الضحك...

امتحنا اول درس واخذنه بقية الدروس واجبات طگ الجرس الخروج للاهل..  نمشي اني وسالي وحياة

اني صايره بنصهم نمشي ع كيفنه لان الگاع لهسه منشفت من المطر ونخاف نزلگ وننفضح مره ثانيه..

اول موصلنه للفرع افترقنه اني وحياة هي راحت تمشي وحدها واني وسالي وحدنا نخاف لا ابويه يشوفنا ويكتلنا...

انقهرت وانكسر شي بداخلي اكثر شي اذاني ووجع گلبي من اباوعلها تمشي وحدها تباوعلنه تبتسم وترجع تباوع للطريق

كرهت شي اسمه طائفيه كرهت هذا الاسم لان يفرقنه اني وتوؤم روحي رغم هو يفرقنه دقائق لا اكثر دقائق تفترق ارواحنا عن بعض ودقائق ترجع ترتبط ببعض...

وصلت للبيت فتحت الباب طبينه سالي رگضت قبلي طبت للصاله نزعت حذائها وشمرته بباب الصاله نزعت الجواريب شمرتهن بكتر والجنطه شمرتها بكتر

حلت شعرها برغثته بإيدها وراحت ربعت ع الصينيه يم مقدام

رتيل ... هاي اجت...
گالتها وهي تباوع لمقدام وتباوعلي

مقدام... ها شلونج بالامتحان؟ حجاها وهو مبتسم

... زينه...  گلتها واني انزع جواريبي واحطهن بالحذاء حتى ميضيعن...

مقدام...  سالي تكملين تشيلين هذول خطيه اختج تعبت...  حجاها وهو يأشرلها ع الجنطه والحذاء..

هزت راسها مبتسمه...  رحت طلعت هدوم الي ولسالي بدلت وحطيت هدومها عالفراش من تكمل غده تبدل...

طلعت واني احل شعري من القراصه احسها شانقه شعري شنق..  ربعت وياهم ع الصينيه وگعدت اكل...

كملنا اكل واهلي مموجودين بالبيت رتيل شالت الصينيه مقدام راح يغسل وسالي طبت للغرفه تبدل...

گمت شلت جنطتها وحذائها وديتهن للغرفه ورجعت شلت الجواريب حطيتهن على كتر حتى اغسلهن ويه جواريبي...

طب مقدام شايل 25الف بإيده راح لرتيل

مقدام...  رتيل اخذي حُره جيبيلها صدريه زينه... گالها وهو يمد ايده البيها 25 الها...

رتيل... يا مين جبتها مقدام.. حجتها بصدمه...

مقدام... لتخافين جبتها بالحلال اشتغلت وجبتها.. حجاها بأبتسامه..

رتيل... ششتغلت... حجتها بخوف

مقدام...  ماعليج هسه اخذيها...  انطاها ال25 بإيدها وراح للغرفه...

رتيل انقهرت حيل وظلت تلوب راحت تشتغل اني نعست كلش رحت جريت المخده ونمت عليها...

من التعب بسرعه غفيت.. فتحت عيوني على صوتهم وهمه يحجون بالهول  وصوت الاستكان وهو ينخاط..

ابتسمت... صوت الاستكان ميفوتني لان احب الجاي حيل انهضت من الفراش داگوم اروح يمهم

بس وقفني كلام رتيل والحاحها ع مقدام..  شتشتغلت مقدام ليش متگلي وتريح گلبي

(خايفه ليسوي شي غلط او يسلگ طريق غلط)
اكثر شخص تخاف عليه رتيل هو مقدام
لان ولد مراهق ويطلع للشارع ويختلط بهواية شباب
واهلي ماعدهم رقابه عليه فحيل تخاف
تخاف ليجرو اولاد الحرام للطريق الحرام..

مقدام... والله موتيني بهاالسؤال هذا شلنا سمنتات وطابوگات نقلناهن للبيت وانطوني فلوس هسه ارتاحيتي...؟ حجاها بقهر

حُره...  گمت رحت يمهم گعدت اباوع عليهم رتيل محتقنه وساكته ومقدام يخوط بأستكان الجاي..

شرب جايه رجع الاستكان لمكانه حط كف ايده على فخذها طبطب عليه ... 

... عاشت ايدج عالجاي... گالها بأبتسامه مزيفه

گام راح غسل وجهه مشط وطلع للشارع  التفتت ع صوت شهگتها المكتومه...

حاطه ايده على عيونها شفافها يرجفن گالت بصوت مخنوك...

رتيل ـ هو شگده ويروح يشيل سمنت الي زلم گوه تنهضه وتشيله هيج وطگ ظهره منو يفيده؟

صبيت جاي واني ساكته شربته كملت ڪمت طلعت قرائتي وگمت اقره عدنه حفظ تعبير ع الغيب...

شويه واجت رتيل.. حُره راح اروح اشتريلج صدريه بسرعه ارجع ما اتأخر دزيت سالي ع حياة تجي يمجن

الباب اقفلنها ورايه واول متندگ وتسمعن صوت ابويه خلي حياة تطفر من السياج ع بيتهم فهمتي؟

... اي ميخالف... حجيتها واني اهز راسي بأي.. 

طلعت رتيل شويه واجت حياة گمت طببتها وقفلت الباب گعدنه نسولف ونضحك شويه ورجعت رتيل شايله بإيدها صدريه حيل حلوه...

اخذتها منها فرحانه من اول ماتسجلت واليوم يلا لبست صدريه جديده اخذتها ورحت اركض للغرفه لبستها عليه فيت

طلعت مكيفه بيها شوفتها لرتيل

... الف عافيه تخبل عليج...  حجتها بأبتسامة حزن..

حياة... تجننن لوك طالعه بيها.. حجتها وهي تغمزلي..

ابتسمت..  رحت نزعتها ضميتها ورحت للحبل جريت صدرية حياة واجيتها...

...  شكرا يا اعز صديقه الي هايه صدريتج

... انجبي زماله خليها الج مااريدها عندي اني...  حجتها بأبتسامه

... لااااء والله تاخذيها هايه اشترالي مقدام بعد مااحتاجها...

... هزت راسها وطلعت مقبلت تاخذها وياها

رتيل... عوفيها نزغرها لسالي تلبسها...  حجتها وهي تباوعلي

.. هزيت راسي ورجعتها للحبل حتى تنشف زين.. 
لليل گاعدين اني وسالي بالهول نقره ورتيل بالمطبخ تغسل اماعين ومقدام يطلع الكتب من جنطته

انفتح باب البيت طبت امي تبتسم راحت لغرفتها شويه وطلعت تغسل وجهه راحتلها سالي وگفت يمها وهي تضحك...

... راح يجي نونو زغير ع هاالبيت...  گالتها وهي تباوع لسالي بضحكه...

عيوني التفتت على صوت الگلاص الطاح من رتيل وتكسر  تباوع الامي بصدمه...

التفتت المقدام لازم الكتاب ديطلعه من الجنطه وعيونه ع رتيل..

تقدمت رتيل لامي... شنو حامل!  حجتها بصوت يرجف..

... ايي.. گالت بأبتسامه..

رتيل... دتشوفينا ماكلات نعل بإدينا وگوه مدبرين العيشه وثنينكم مو مال بيت وعائله شكو تخلفين؟
خافي الله بينا
خافي الله بأولادج  ...  حجتها بقهر وهي مصدومه...

اميره... انجبي شنو تعلميني شسوي شو دولي بزر اخر وكت...
دفعت رتيل من كتفها وراحت طبت للغرفه ورگعت الباب وراها...

گعدت رتيل ع ركبها حطت اديها ع راسها...  شذنبي اتحمل هذا كله شذنبييي...  حجتها بدموع وقهر...

ظلينه ساكتين وواحد يباوع للثاني سكون وهدوء تملك البيت موطبيعي كلمن ملتهي بشغلته وتفكيره...

مقدام مدري شيحضر بالجنطه شويه وكمل جاب كرسي حطه گبال الكنتور سال الجنطه بإديه وصعد ع الكرسي...

حط جنطة كتبه ع الكنتور وعدل الفراش عليها نزل شال الكرسي رجعه للمطبخ وراح يم رتيل بالاستقبال...

رتيل ...  فرشتلجن يلا تعالن نامن... التفتنه اني وسالي ع صوتها

گمنه رحنا للاستقبال سالي مددت بفراشها واني مددت بفراشي رتيل عاكسه المخده وگاعده ع فراش مقدام وهو گاعد يمها وصافن ع سالي..

مقدام ... وجهه راجع اصفر خاف هم الدم نزل عدها..؟ حجاها بقهر..

عيوني ع رتيل سكتت مجاوبت رجعت عيوني لسالي غافيه وماخذها النوم سالي عكسي بسرعه تنام الا اني اتظاهر بالنوم بس ما اغفي بسرعه..

ومثل كل يوم تظاهرت بالنوم... رتيل طفت الضويات كلها وعافت بس ضوه الطارمه ورجعت گعدت بمكانها...

رتيل...  ليش صعدت جنطتك ع الكنتور شنو انطوكم عطله؟  حجتها بتساؤل...

... لاا ماكو عطله بس بعد ما ادوام.؟ حجاها ببرود 

... شنوووو!  گالت بصدمه

مقدام شبيك شنو بعد ماتداوم..

.مقدام...  اي بعد مااداوم انعل ابو الدوام اشتغل واعيشجن احسن شلي بالدوام شفيدني واني اشوفجن تتعذبن گدامي..

رتيل...  مقدام احنـ.... 

قطع كلامها وهو يگول.. هالمره لو موتحرگين روحج لو مدري شتسوين سوي اخذت قراري ومامتندم عليه انتن اهم من دوامي بمليار المرات

شوفتج وانتي حايره بالگمه وگوه مدبرتها تكسرني باليوم الف مره لو شوفت اخواتي وهنا يرحن للمدرسه وما بإيدهن فلس واحد تموتني مووت..

رتيل خواتي كبرن ويحتاجن لبس وطلعات وعنايه نحتاج ندللهن انتي الله منطيج صبر وصبرتي
ويه هذوله
بس خواتي شلون بيهن والبنيه تحتاج عنايه اني مو دشوف خوات اصدقائي حاطيلهن خطوط للمدارس
ولبسهن احلا لبس 
وكل جمعه طلعه عائليه

رتيل خواتي اذا ماشبعن ببيت اهلهن باجر عگبه بحجايه وحده ينضحك عليهن
لان ناقصهن دلال وحنان

حُره ـ سمعته تنهد بحزن...  والله لو بإيدي اگعدجن عالگمر بس شسوي... گالها بغصه مليانه قهر..

حُره ــ اسمع بكلامهم ودموعي تدير شنو ذنبه يترك دراسته علمود يوفرلنه عيشتنه

شنو ذنب رتيل تترگ دراستها وتگعد تربينا وتشيل همنا ومسؤوليتنه
شنو ذنبهم يتعذبون بسبب اهلي واهمالهم.

مقدام حاول يحتوينه وهو بعمر ال14 عمر المراهقه وهذا العمر بالتحديد يكون صعب ع المراهقين

يكونون مزاجيين وعدهم قلة صبر ويردون كلشي يجيهم لعندهم واهم شي يردون
اهل
واحتواء ومصادقه من الاب
والاهم حنان وحب الام الهم

حاول يحتوينه حاول قدر الامكان بس للاسف المحاولات كلها باتت فاشله... نهاية البارت...

يتبع...
Nawras...