«الحلقـــــه الاولى »
روايـــــــــة
«هل كانَ حلماً...؟»
( ارواح ــ مُهشَمه )
بقلمي... ... لؤلؤة _البحار ...
ــــــــــــــــــــــــــــــــــ
:- سديت القرءان ونزلته عالسجاده گمت من مكاني طلعت اركض على صوت مقدام
باوعتله واگف بالهول والموبايل على اذنه لازمه بإيده الترجف
لون وجهه المخطوف وبياض شفته وبلع الريگ يبسن گلبي ونشفن الدم بجسمي..
گعدت ع الگاع مهدود حيلي شفافي يرجفن وعيوني مركزه على مقدام وعلى كل حركه تبدر منه
نزل الموبايل سده باوعلنا وهو شفافه ترجف جر نفس بقوه وزفره بهدوء ابتسامة فرح نرسمة على وجهه
گال و عيونه تفتر بيننا... اتصل رقم غريب بيا يگول اكو بنيه تعرفكم بمستشفى الـ .****
حره... گمزت من مكاني رحت عليه اركض اتصل فدوه مقدام اتصل ع الرقم... گلتها بشهگه طلعت من نص گلبي
اتصل مقدام على الرقم وفتح السبيكر ثواني واجاه صوت حياة..
من الفرحه سجدت بالگاع واني ابجي ورتيل طگتها هلهوله رجعت گمت بسرعه
سحبت الموبايل من مقدام وگتلها
... حياااااة وينج
حياة... اني بخير لتخافين بس بيبي مريضه بهالمستشفى وفلوس معندي حره ساعديني
حره.. دااجاوبها انسحب الموبايل من عندي اخذه مقدام وگللها
مقدام... اهدي حياة ولتخافين جاييكم مااتأخر عليكم
حياة... لا مقدام مو هسه الطريق مو امان الصبح تعال
مقدام... لا صديقي عنده سياره لتخافين
حره... ضلت حياة تتوسل وتحلف بيه يأجل جيته للصبح
بس هو ماقبل دگ رجل الا يروح هسه
وصدگ خلى وطلع ضليت ابجي وهي تهدي بيه وتگول
...لتبجين اني بخير الحمدلله عدت على خير وطلعنا منها...
تحاول تهديني بس مبين الحزن طاغي عليها
كل كلمه تگولها تسحب نفس يهد جبال وياها
سديت الخط ولليل كله ابجي واحمد الله واشكره ان حياة رجعتلي سالمه وسمعت صوتها من جديد
لثاني يوم العصر خابر مقدام من صديقه وگال
مقدام... جايين بالطريق حضرو عشا رتيل راحت تطبخ واني وسالي من الفرحه نرگص
سالي رگضت تجيب جگليت من المحل واني وگفت انتضر بباب البيت باوعت حتى جيرانه واگفين بباب بيوتهم منتضرين جيتهن
والجگليت بأيدهم والابتسامه واضحه ع وجهم اجت سالي ترگض وبإيدها الجگليت
انطتنياه وگالت.. هاج ولج الزمي الجگليت رحت جبته ومن الفرحه منطيت فلوسه للرجال
گالتها وهي تضحك راحت اخذت من رتيل وطلعت للمحل تركض حتى توديله الفلوس
دقايق ووصلت السياره وگفت يم بابنا نزل مقدام وراح فتح الباب الوره وسند بيبي ونزلها
مبين عليها التعب حيل
ووراها نزلت حياة
باوعت لعيونها عندها هالات سود
وراسها وايدها ملفوفين
بس مبينه جروحها مو قويه من الفرحه رگضت الها وحضنتها وضلينا نبجي
والنسوان راحن يتحمدن لبيبي بالسلامه واكو منهن طشن جگليت
والجهال حوالينا يلگطون بيه
واني وحياة شبعنا بجي متحاضنات ودموعنا تدير وبس صوت شهكتنه الطالع
طبينا للبيت والنسوان ورانا گعدو شويه يم بيبي بهيه يسولفون وياها ويسألون عن اوضاع الموصل
للمغرب كولها طلعت لبيوتهم اني وحياة اخذنا بيبي غسنالها وبدنالها وماما اخذتها لغرفتها حتى ترتاح
وحياة اخذت ملابس مني وراحت تسبح واني افتر وراها مثل ضلها
ممصدگه وخايفه خاف اعوفها
وخاف ترجع تبتعد وتختفي من گدام عيوني
حتى من طبت للحمام اني افتر يم باب الحمام وكل ثانيه اسألها عن شي حتى اطمئن هي بخير
لليل وبعد مكملنا العشا وغسلنا الماعين ويه رتيل
وبيبي نامت يم امي بغرفتها گعدنا اني وحياة ورتيل وسالي
نحجي ونبجي نسألها عن الصار وشلون گدرو ينهزمو وهي بلشت تسولفنا المواجع
والقهر المرت بيه وشلون تعلعلت هي وكل المهجرين الطلعو من بيوتهم في سبيل يأمنون على ارواحهم
وللاسف اكثرهم خسرو رواحهم ومگدرو يأمنوها
حياة :- تهجرنا وتركنا كلشي نملكا هناك ردنا بس نطلع بأرواحنا وبس
بقينا فتره ب.**** وبعد ماراد داعش يوصل ل**** هم تركناها وطلعنا لغير مكان
ضلينا معلعلين يوميه نتهجر بمكان ومن نسمع بوصول داعش للمكان الاحنا بيه نتهجر منه وهم. نعوف كلشي ورانا وننفذ بأرواحنا
مرت خالي ويانا وجانت حامل ومن الخوف عندها شكل السكر
وقريب مدا نطلع من الموصل
صار ويانا حادث من خلاله توفت بيه مرت خالي وبيبي تأذت واني هم بس مرت خالي اساسا من الخوف صاعد عدها السكر وهي حامل فالانفجار الصار جان رحلتها الاخيره ويانا
سكتت شويه غمض عيونها بألم... مسحت دموعي واني اباوعلها شلون متألمه حسيت گلبي يتقطع عليها
كملت بغصه موجوعه
حياة... شوفتها وهي تطير گدام عيوني ودمها يزين وجهي ولحمها يغطي جروحي المفتوحه هالشي موت بحد ذاته الي
حره اني رجعت رجعتلكم بس ما اريد اتذكر اي شي صار بالموصل
حره... رجعتلنا حياة بس رجعتلنا جسم بلا روح متأكده ان هي شافت اشياء ميتحملها العقل
واعرف ومن عيونها متأكده هي ضمت عليه اشياء هوايه صارت وياها بالموصل
مثل الي تحاول تحتفظ بهالذكريات السيئه النفسها وبس
بليلتها نمت مرتاحه نمت بصفها وحضنا بعضنا ونمنا ومقدام طالع بره يبات يم صديقه
حتى بيبي وحياة ياخذن راحتهن.. لثاني يوم الصبح گعدت على صوت طگطگه خفيفه فتحت عيوني
باوعت لحياة گاعده مدده بفراشها وعيونها تباوع للسگف... صباح الخير.. همست بأبتسامه
... صباح النور.. قلقنا راحت مقدام المسكين بات بره البيت بسببنا
حره...اشش لتفكرين هيج بالعكس هو فرحان برجعتكم اكثر منا بعد واذا سمع هالكلام منج راح يزعل
تعرفين انتي مقدام شگد يحبكم ويعزكم..
حياة... الله يخليكم الي لو لاكم ماجنت ادري وين انطي وجهي... گالتها ودمعه خاطفه نزلت على خدها
حره... اشش احنا اهل والاهل مابينهم هالكلام لتنسين انتي اختي وتوؤم روحي ماصدگت رجعتيلي بخير وسلامه انسي الموصل وانسي كلشي سيء صار بيها
من جيرانكم السيئين للسقوط ...
هزت راسها وابتسمت گمت طلعت غسلت وجهي وهي وياي وگفت يمها غسلت وجهه
وباوعت لشكلها بالمرايه ابتسمت بوجع وگالت.. الف الحمدلله من طلعنا من الموصل بخير وان شاءالله يوم لكل المهجرين يطلعون بخير وسلامه
حره... ان شاءالله رب العالمين وياهم ومراح ينساهم
حياة... ان شاءالله.. گالتها بنفس مخنوگ
حره... رحنا للمطبخ طب مقدام شايل علاليگ حطهن عالميز باوع لحياة ابتسم
... صباح الخير
حياة... صباح النور..
حره... مقدام طلع لشغله ورتيل فتحت العلاليگ طلعت گيمر وجبن وبيض وصمون حار
وباقي المسواگ جايبه للغده رتبتهن رتيل بالثلاجه وراحت تحضر الريوگ طلعنا اني وحياة
رحنا لغرفة امي الباب مفتوحه باوعنا بيبي گاعده وامي كاعده يمها وتصبر بيها
صبحنا عليهن وگعدنا يمهن بيبي باوعت لحياة وگالت
بيبي بهية... حياة شسوت حميده شبيها ليش ردتي تشتكين عليها وهي صديقتج فهميني ليش من اسألج بخصوصها متجاوبين شي
حياة... الله ينطيها السوء بگد نواياها...
حره... گالت هالكلام وهي تطلع كالت...
... دااروح للحمام هسه اجي
حره... راحت حياة للحمام التفتت ع بيبي وحجيت... شنو بيبي منو حميده وشبيها ويه حياة
بهيه... والله ماادري يمه شبيها بس هنا جانن صديقات من جنا بالموصل وحياة حيل تحبها
بس بعد ماصارت الهجره حياة صارت متطيقها لحميده
مااعرف السالفه شنو اجتنا حميده من جنا بالمستشفى وفجأه حياة طردتها
وگلتلها... الله يحرگ گلبج واخرتج تصير عبره لكل ظالم
اني سالتها شنو الصار وشسوت حميده مقبلت تگولي غير
:- وسيعلم الذين ظلمو اي منقلب ينقلبون
بس هذا الگالته الي اي شي ثاني مقبلت تسولفه
ولما جنا بالمسنشفى حياة طلبت من الممرضه انها تشتكي
وشلون ووين تروح تشتكي
بس اني مقبلت وكتلها ممنوع تسوين هالشي انسي السالفه وحميده مو غريبه صديقتج وجيرانا
وحاولت افهم منها شمسويه بس هم مقبلت تكول ولا تجيب طاريها وهاي شوفت عينج ييمه كل مااسالها لو تسكت لو تكوم من يمي
حره... صفنت امر غريب وحيرني ليش حياة مترضى تسولف شسوتلها وليش رادت تشتكي عليها
ضل هالشي بالنسبه الي لغز محير وممفهوم حله لان حياة متقبل تسولف بيه ولا تقبل افتح موضوع وياها بخصوص حميده
للعصر كالت بيبي... مترهم نبقى هنا ننضف بيتنا ونرجع ونأثثه على كيفنا....
حره... هو بيتهم صغير وسكنو بيه تلث مؤجرين بس الاخير ع نص الشهر وطلع گللها الاجار غالي وهو كله 75 الشهر
وبيبي من شافت وضع جيرانهم الي بالموصل وعرفت انهم ارهابيه مااجرته بعد كالت حتى نرجع ونسكن بيه
يعني بيبي وحياة جانت نيتهم يرجعون بس اكو شي منعهم وهي حكمة ربنا
ماما مقبلت وكلتلها... لا ضلو هنا البيت بيتكم وانتم مو غربه اهلنا
بهيه... منگدر نقلق راحت مقدام ميصير خطيه قلقنا راحته
حره... امي مقبلت وضلت تحلف بيها تبقى يمنا بس بيبي يمكن متحسسه لان مقدام طالع بره البيت فأخذت ان هو ممرتاح ومماخذ راحته بسببها
وحياة ضلت تشحع بيها وتگولها... اي خلي انضفه ونرجع لان اشتاقيتله كلش
اني ضربتها بگوعي على بطنها وباوعتلها مخنزره... شنو ست حياة الظاهر ممشتاقتلي وبس تردين تفلتين لهناك
حياة... انجبي زماله شنو ممشتاقتلج بس حتى مقدام ياخذ راحته واحنا هم ناخذ راحتنا تعرفين الواحد ميرتاح الا ببيته
سكتت واني اباوعلها بطارف عيوني وهي تكرص بيه عود تشاقيني تالي رحنا اني ورتيل وحياة وسالي ننضف البيت مالتهم
وببيبي ضلت يم ماما هي ومروه رحنا للبيت وغسلنا غسل من فوگ ليجوه وحياة خليناها تگعد متنضف
لانها مبين حيل تعبانه اليقهر البيت فارغ مابيه اثاث والقهرني اكثر التعب الاشوفه بوجهه حياة
صح فرحت برجعتها بس تعبها تعبني
اشتغل واركز ع حركاتها وملامح وجهها حياة مثلي
لو تزعل يبين الزعل على ملامحها
غسلنا البيت غسل وصلت لبيوت العنكوبت خفت انضفهن
خاف يوكع عليه عنكبوت لان كلش جبير عاد صحت سالي وقشمرتها
... سالي انطيج خمسميه ونضفي بيوت العنكوب اخاف منهن
سالي... اي جيبي هسه الخمسميه حتى انضفهن
حره... مديت ايدي للحمالات طلعت خمسميه مجعوصه من الحر وحتى ارقامها رايحه
انطيتها الخمسميه وراحت تنضفهن اني طلعت لبره دااجيب الماسحه
اخذت الماسحه وطبيت باوعت لسالي واكفه ومبين عليها خايفه تتقرب من بيوت العنكوبت
من شافتني شمرت المكناسه وگالت ... ماانضفهن يميي يخوفن خاف يوكعن عليه
حره... لعد جيبي الخمسميه
سالي... يااا هنيالج دطيري ماانطيهزلو تموتين
حره... لحكت وراها بالماسحه گتلها.. انطيني الخمسميه يالجذابه
هي تركض واني اركض وراها وهي تصيح
... لو تموتين ماانطيها
حره... رتيل دا تمسح بالغرفه وغاسلتها من شافتنا نزعت نعالها شالته وصاحتنا لان شافتنا نتناگر
گالت... عوفي الخمسميه اني انطيجياها والبيوت مال العنكبوت اني انضفها بس فكني وخلني اكمل شغلي
حره... خنزرت على سالي واني اتحلف بيها وهي تعيب عليه بالسانها..
رحت گعدت يم حياة الصافنه علينا وما بدر منها اي ردت فعل للمغرب كملنا كلشي ورجعنا للبيت
تعشينا ورا مكملنا بيبي مقبلت تضل لان مقدام ميبات هنا ضلينا نتوسل بيها وهي قافله
نهايتها انطيناهم حصير وفراش من عدنا بوست حياة وراحو لبيتهم لليل والوقت متأخر كلش
اجه مقدام وحايب حبشكلات وياه وگف بباب الهول ودگ الباب گلتله رتيل
... فوت بيبي وحياة راحو
مقدام... ليش راحو... گالها وهو عاقج حاجبه ويباوعلنا
رتيل... مقبلت بيبي تضل
مقدام... فشله مايصير يرحن هسه زين فراش منيلهم مبرده منيلهم؟
رتيل... انطيناهم فراش بس مبرده ماادري همه ماعدهم..
مقدام... الحو حار مترهم يضلون بلا مبرده...
راح لمبردة الهول گال
... خلي اوديها الهن حرام هالحر منو يتحمله.. گالها وهو يباوع الامي ديشوف ردت فعلها
گلتله امي... اي عفيه اخذها اذا تگدر خطيه بهيه وبنتها حالتهن حاله وفوگاها الجو حار
حره... مقدام مجذب خبر خابر ع صديقه بسرعه اجاه شالو المبرده ونقلوها لبيت حياة
شكلوها وفحصوها ورجع مقدام ثاني يوم صاحتني حياة من الداير طلعت الها ارگض
رحت وگفت گبالها ابتسمت گالت
حياة... حره شكرا ع الي سويتو مراح انساه
حره... شهالكلام حياة احنا اخوات ميصير هالحجي
ابتسمت وضلينا نسولف شويه وكلمن راحت لشغلتها
مرت الايام والوضع نفسه وكل مااجيب طاري الموصل حياة تگولي
حياة... هالذكرى السيئه خليها بس الي...
ومره ضليت الح عليها حتى تسولفلي گالت
حياة... اذا تحبيني لتسأليني ولتحجين شي بخصوص الموصل گلبي يحترگ
حره... اني اسكت وفعلا بعد ماسألتها شي وشويه شويه بدت ترجع نسولف ونضحك ونتشاقى
بعدها بدت تخبز هي بدل بيبي لان بيبي صحتها بالنازل واني وياها اساعدها...
لسنة 2015 حياة تخبز ونعرفت والجيران گامو يطلبون منها تخبزلهم ونروح اني وياها نودي الخبز وكل شهر تستلم الفلوس
اني بديت اطبخ كبه وكباب وابيعه اني وحياة بكلشي مشتركات
نتساعد بالخبز
نتساعد بالاكل
ومن نبيع بالنص اني وياها احنا بكلشي واحد استمرينا ع هالحال ومااتذكر بيوم تعاركنا ع فلوس
او وحده گالت للثانيه اني تعبت وانتي لا
لا اني وحياة علاقتنا مختلفه علاقة اخوات روح بروح
حاولت ابطل من الدراسه بس مقدام وحياة مقبلو
بيوم مقدام من شافني كلش نالي نفس بالدراسه صاحني بالليل وضل يحجي وينصح
مقدام... حره كلشي ضل نفسي بيه سونه انتن اني اذا تركت الدراسه مو لان مااريدها لو كسلان
تركتها علمودجن واني مااريد. تعبي يضيع لا اني دايملجن ولا رتيل وامي معروفه بأهمالها
حره اعتمدي على نفسج مااريد بيوم تتأذين وتگولين اخوي قصر ويانا بشي رغم ادري بنفسي مقصر
بس لو بيدي مايصير هذا كله لو بيدي اگعدجن عالنجوم
حره... استمع الكلامه واني ساكته ورتيل كلامها نفس كلام مقدام بس اني احساسي بالحمل واحس نفسي حملي جبير عليهم مدا يخليني اركز بدراستي
اما حياة فتركت اخذت شهادة الثالث والرابع ع النص وتركته
تركت من هي بالموصل ومن رجعت لهنا
حاولت تكمل بس ترسب وواهس ماكو للدراسه
ضلينا هيج اني اشتغل وهي هم رغم رتيل ومقدام ابد ميقبلون ويزعلون عليه
بس اني مااقبل واگوللهم... خلوني اساعدكم ولو شويه
بيوم جان الجو بارد حيل طلعنا اني وحياة نودي خبز لجيرانا بالفرع الثاني
ودينا ورجعنا من طبينا للفرع شفنا سياره فخمه واگفت گدام بيت ابو احمد جيرانا بعد. عن بيتنا بخمس بيوت ومحل
نزل منها شاب شكله مألوف سألت نفسي.. وين شايفته؟
وراه نزلت بنيه لابسه كعب اخر موديل وفستان يجنن من جماله متت عليه ولابسه وياه شفقه
وهي مبينه نازگه حيل سمره ومن رفعت ايدها عندها وحمه جبيره بس شكلها حلو
نزلت وگفت يم السياره تباوع لحياة وگف يمها الشاب يحاجيها
هو يحجي ويباوعلها
وهي تستمع وصافنه ع حياة
حسيت بندسة حياة باوعتلها ابتسمت وگالت
... باعي النزاگه فدوه
كتلها... اي والله
جرتني من ايدي وگالت... يمعوده لتباوعين للولد هيج مبينه هاي لو حبيبته لو زوجته باعي نضراته العا كلها حب
حره... لا مو قصه اباوعله بس حياة اني شايفته لهذا الشاب بس وين مدا اتذكر بس متأكده شايفته
ضحكت وگالت... عوفيه يلا نروح للبيت سختنا هوايه عندج دراسه انتي...
حره... باوعنا للبنيه صافنه على حياة حياة گالت
... شبيها تباوعلي... رجعت باوعت لتراكها... يمكن تراكي محلو هفف يلا امشي امشي
حره... مشينا بأتجاهم حتى نطب لبيتنا ركضت البنيه بأتجاهنا وهو مشى وراها
وصلت يم حياة گلتلها... بس اريد احجي وياج
حياة... اي تفضلي
حره... البنيه باوعتلي وگالت
سمرا... موضوع خاص
حياة باوعتلي وضحكت گلتلها... عادي احجي حره اختي مااضم عليها شي......
حره... البنيه فتحت عيونها بدهشه وباوعت للولد وهو بادلها نفس النضره والدهشه مثل المستغربين هو رگز عليه اني طخت عندي وتذكرته
هو نفسه الشاب الي اجه من زمان وسأل على بنيه... البنيه گالت
... طيب تعالو بغير مكان نحجي بالسياره؟
حياة... لا احجي هنا
حره... اني ندست حياة باوعتلي ورجعت گالتلهم
... من رخصتكم بس ثواني..
حره... جريتها ووگفنا ع زاويه گلتلها... حياة هالولد اجه اجه من. جنتي بالموصل وسأل على بنيه اسمها مدري شنو بس المواصفات تشبهج
بس اني لان گلي البنيه اسمها مو حياة كلت هذا مدا يقصد عليج ...؟
حياة... صدگ؟ گولي والله!
حره... والعباس
حياة... هذوله شيردون من عندي شو ممرتاحه
حره.. خنروح ونشوف
حياة... تمام يلا امشي
حره... رحنا يمهم حجت البنيه وبدون مقدمات
سمرا... حياة اني اعرفج انتي ... باوعت لحره بأستغراب... بس انتي ما عندي علم بيج؟
حياة... ترا مفهمت
سمرا... اعرف كلشي صار وياج وحاسه بيج واسفه ع كلشي عشتي..
دتكمل قاطعتها حياة... دقيقه دقيقه شدتحجين انتي؟
سمرا... اني سمرا اختج...
حياة صفنت عليها... حصرتج دتستهزأين...!
سمرا... لا والله هذا الصدگ
اني وحياة وحده باوعت للثانيه الولد گال...
... اعرف الموضوع صعب تتقبلو بس هذا الواقع واذا ممصدگات عندي الجنسيه التثبت ابو سمرا هو ابوجن بس اني ماعندي علم ان مشعل عنده ثنين بنات
كل الي اعرفه بنيه وحده اسمها ازهار وتم تغيير اسمها بعدين
و سمرا تهز براسها
اني گتلهم.. اني وحياة مو خوات بس صديقات روح بروح
حياة كلتلي
حياة... شبيج حره صدگتي كلامهم.. باوعت عليهم... وانتو هيي شنو دتستهزأون لا عبالكم فقيره وما اكدر احجي وجايين تستهزأون بيا
والله اذا زودتوها متشوفون مني الخير...
حره... الولد طلع جنسيه من جيبه وحطها گدام حياة گللها
... هااا؟ شوفي الاب منو
حياة رگضت طبت لبيتهم واني ركضت وراها بيبي بهيه شافت حياة تبجي گامت وكالت
... شكو حياة شبيج
حياة راحتلها تبجي كلتلها
... بيبي هذول هيج وهيج يگولون...
حره... بيبي بسرعه فتحت عيونها بصدمه وگالت..
... وينهم صيحيهم..
طلعت لگيتهم بالباب گتلها... تعالو فوتو خلينا نحجي بهدوء
طبو ثنينهم للبيتهم بيبي تلكتهم وطببتهم للهول
باوعت لسمرا اول مطبت للهول فتحت عيونها مصدومه مثل الي تفاجئت بالبيت وتفاجئت اكثر
من ما شافت تخم بالهول بس مفروش مدايد. وجودليات فرت عيونها فر ع البيت
لحد ماگالت بيبي... تفضلي اكعدي
كعدت وكعد يمها الولد وبيبي اسمهان كعدت وكعدتني اني على يمينها وحياة على شمالها
وهي صاارت بنصنه وسمرا والولد مقابيلنا يعني صرنا تقريبا مثل الدائره حتى تفهم وتفهمهم حياة منو
بالاول سالت سمرا گلتلها... انتي منو وشتقصدين بكلامج وشلون عرفتي حياة
حره... سمرا مركزه بحياة حيل رجعت باوعت للولد والولد باوعلها وحجه
... حجيه اسمحيلي احجي واوضحلج كلشي
بهيه... اي ابني احجي
حره... هو باوعلي حسيته ديسأل عادي يحجي گدامي حياة كلتله
حياة... حره هي اختي صح ماجابتها امي بس تبقى اختي وكلشي بحياتي زغيره وجبيره تعرفها ف احجي كدامها عادي
بهيه... احجي ابني حره منا وبينا
الولد حجه... مبدئياً اني اسمي رشم... رجع باوع لسمرا ... اعرفكم بسمرا بنت مشعل
اكيد الكل يسال احنا منو وليش جايين واذا ازهار او حياة بنت مشعل واخت سمرا
ليش احنا الجايين مو ابوها..؟
اعرف كل هالاسئله ببالكم
واني راح اشرحلكم كلشي
اني وسمرا نحب بعض قبل اربع سنين ابوها واولاد عمها كلهم جانو اصدقائي
جنت راسم ومخطط لمستقبل حلو مع شريكتي وحتى جنت حاجي بيها ويه ابوها ووعدني ينطينياها
وبيوم وقبل ثلاث سنوات اجاني مشعل وطلب مني اتغاضى عن ملف لمجرم واحاول اسد سالفته رغم هو قاتل
بيبي گلتله... ليش انته شتشتغل...
رشم... ضابط.. ولان ماوافقته وماسويت الگاله... من يومها بده يكرهني ويصير ضدي بكلشي
حتى من اروح الاولاد اخو وواحد منهم ضابط وياي جان صديقي هم گام يگلب خلقته عليه
وتوسط حتى بس ينقلوني بأختصار حاربوني ولما رحت وطلبت سمرا من بعد هالحادثه رفض ان ينطينياها
وصار لما يشوفني قريب من البيت او المنطقه يتعارك ويطلب من المرافقين الشخصيين( الحمايه)
انهم يطردوني ويبعدوني
حياة... انته تگول هو عنده نفوذ وفلوس ومعروف بالدوله يعني يگدر كلشي يسوي ليش حتى يكلب منك الك هو ميگدر يطلعه بدونك يعني؟
رشم... هو المجرم كلع وراي لان بالتالي اني سلطتي محدوده بس هو لما اجه بدافع احنا اصدقاء واني رديته لهالسبب انزعج
وعرف اني ضده بأفعاله الاجراميه هذا سبب محاربته الي
گالتله بيبي... كمل يمه
رشم... ماخليت لا شيوخ لارجال دين لا اصدقاء مادزيتهم عليه وهو جان رافض
حجت سمرا تكمل كلامه...رغم اني هم احبه واحنا الاثنين رايدين بعض وهو يدري ومجان يگولي سبب الرفض وتغيره عليه
رشم گال... بالضبط وبعد محاولاتي جزعت وانزعجت منه لان صرت اعرفه واعرف معدنه ان هو انسان وصخ
فكرت بطريقه ثانيه اذله مثل ماذلني ورحت ادور وراه ووره ماضيه الاسود
لحد ما وصلت لواحد من اصدقاء مشعل
صاير بينهم خصام بالالفينات والسبب هو ان مشعل بايگ فلوس واتهم صديقه
وصديقه تحاسب واضطر يدفع مبلغ ضخم رغم ان هو الباگ مشعل حتى لصديقه ما وفى
طلبت من صديقه الباشا....
ديكمل بيبي تفاجأت گلتله... هذا وين صار
رشم... تعرفيه؟
بهيه... اي يمه اعرفه حضر بعرس بنتي
رشم... يعني كلام الباشا صحيح؟
بهيه... و انت شسمعت منه ..؟
رشم...الباشا گلي ان مشعل عنده بنت غير شرعيه (بنت زنا)
من وحده بالموصل عايشه ولما حملت و جابت سنة 96 وصارتله مشاكل اضطر يتزوجها فتره وطلگها
حياة شهگت وگالت... حسبي الله ونعم الوكيل
بهيه...هذا حرف الحقيقه يمكن حقده عماه وراد يفتري عليه بهيج شي بس حياة بنته الشرعيه
ونولدت حياة بعد. زواجه ببنتي مو قبل زواجه
رشم... لعد ليش مسجلتها بالجنسيه بعد سنه من ولادتها..؟
بهيه... بسبب ظروف وصرنا ننتقل من مكان لمكان وامور ثانيه
رشم... وليش يسموها ازهار؟
بهيه... منو يسميها ازهار..؟
سمرا... ابوي والباشا
حره.. يعني ابو حياة يعرف حياة؟
سمرا... اي من بعد ما عرف رشم بهالموضوع واجه وواجه ابويا وهدده
بس ابويه نكر وحتى اني ماصدكته لرشم
وطردته وحضرته ونهبت كلشي وياه لان يحجي هيج على ابويه ويتهمه وخصوصا سمعته مهمه حاليا
بس بعدها بأيام سمعت ابويا يحجي بالتليفون مع صديقه ويطلب منه يدور على بنته ازهار ويسفرها ويضيع مكانها او يسوي اي شي بس المهم يخفيها وميلگوها
بهيه... مشعل طلب مني اسميها ازهار شنو السبب ماادري بس اني ماحبيته
وغيرته ل حياة لان شفت بيها حياتي... نهاية البارت...
يتبع....
لتنسون التصويت والمتابعه
وغلسو اذا اكو سحگ
دا افكر اخلي النشر بين يوم ويوم احسن من يومين نشر ويومين استراحه لان مدا الحگ ابد
عاد يوم انسرلكم واليوم الثاني اسردلكم بيه شتگولون؟
ان شاءالله باجر راح نغير ونوصل للحلقه الثانيه والاسم حيتغير من (ارواح مهشمه) الى (عناق الارواح)
قراءه ممتعه فراشاتي 🦋
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!