رواية حليب اسود الفصل العاشر 10 - بقلم الكاتبة شمس السعدي

مساء الهنا لاجمـل متابعين 🌹
///// البارت العاشر /////
#حلـــيـب_أســـود
#الكــاتبة_شـمــس

حياتنـا سـلسـلة متشـابكـة من الصـدف الصـغيرة التى قـد يغير وقوع إحداها قبل الآخرى بثوان أو بعدها بثوان مجرى حياتنا كلـه ..

"ورب صـدفةٍ.. خيرٍ مـن ألـف ميعـاد "

السلام عليكم ..
اسمي قيس .. قاضي بالمحكمـة الاتحادية العليا..
عمري 50 سنة اصلي من الجنوب .. بحكم عملي اعيش الوحدي ببغداد ..
شكلي يصغر عمري .. لان محافظ على لياقتي البدنيه واتبع نضام غذائي ورياضة ..
واحب البس وارتب نفسي .. الي يشوفني يگول عمري اصغر من عمري الحقيقي ..
مع العلم اني جد وعندي احفاد ..

الوالد زوجنـي واني طالب بعدني البنت عمي ..
ماكنت مستعد للزواج بس بعد اصرار الوالد انجبرت اتزوج انسـانه مااحبها بس احترمها ومجبور اقدرها لان صارت مسؤوليتي ..
درست ببغداد . واغلب وقتي بعيد عن عائلتي وزوجتي مااجي بس يوم واحد بالاسبوع ..

كانت علاقتنا ودية اني وبنت عمي ..
بس ماكو حب وشغف بين اي اثنين متزوجين . وماگدرت اتعود عليها لان بعيد عنها ..

من دخلت الجامعـة حبيت وحده كانت جميله جدا .
الشعر ع ذول جسمها .
واشگر . والوجه ناعم وصافي ..
كنت من ارجع الاهلي انتظر لحظه لحظه حتى ادوام واشوفها ..
مااتحملت صارحتها .. وگلتلها يابنت الناس اني متزوج من بنت عمي بس حبيتج وهويتج ..
وكنت بذاك الوكت شخصيه وطول وجسم ..
ولان من الجنوب حبيت ومااگدر اخبي حبي .
بس ماكذبت عليها وصارحتها لحياتي وطبعنا وعاداتنا .
هي سكتت وترددت ..

بس حبي الها خلاني اسوي المستحيل حتى اخطبها ..
رجعت لابوي وسولفتله رفض وحلف يبطلني ..
وخاصه بعد ماعرفت بنت عمي حامل ..
انقلبت الموازين ..

ماردت اكسر بخاطرها . بس ظلمت گلبي وحبي وسكتت
البنيه الي حبيتها .. احسها عيونها عليه ورايدتني ..
بس لااني الاگدر اظلمها ولااگدر اظلم بنت عمي وابني الي ببطنها ..

عشگتها بگلبي وبعيوني ..
نضراتنا الي تسولف عن حبنا وهوانا ..

مرت السنين وتخرجنا وتفارگت طرقاتنا ..
امي الله يرحمها .. حاطه فكرة براس بنت عمي ..
جيبيله جهال حتى يحبج ..
وبنت عمي ماقصرت .. من الاربعين وتسويلي الثاني .
صار عندي اثنين ولد واثنين بنات ..
گلتلها بعد مااريد .
واذا حبلتي بعد اوديج لاهلج .
عاد هي بطلت .
بس صارت اعمار اولادي متقاربه ..
كبروا وتخرجوا وتزوجوا ..
واني تحول حبي الدوامي والشغلي ..
بنت عني كبرت وتمرضت .
وعايشه عند ابني الجبير ..
اني اغلب وقتي ببغداد وعندي بيت هنا من اجي للدوام اگعد بي .
ومن ارجع المحافظتي ..
اروح البيت ابوي .. بي ابني الثاني متزوج بنت اختي الارمله وعايشه ويانا هم ..
مرات اروح اشوف بنت عمي واجيبها يمنا بالبيت بفترة وجودي .
من تزوجتها لسا تصيحيلي ابو امجد .. مايوم صاحتلي بأسمي .. وعلاقتنا طيبه ..
بس يبقى اكو فراغ بحياتي .. لان ماحسيت بالحب وماعشت حياتي مثل مااريد ..
انفرض عليه وعليها الزواج رغم هي اكبر مني بثمان سنوات ..
بس ماحسستها بيوم انه مااريدها ولااذيتها ..
ومافكرت اتزوج عليها ..

ماانكر احس بوحده وخاصه ببغداد اولادي بعيدين عني .
مرات يجون يمي يتونسون ببغداد ويرجعون .
بس ارجع للوحده نفسها ..

الى ان يوم عندي شغله بوحده من المحاكم ..
ومنتظر قاضي صديق الي بذيج المحكمه ..

انتبهت على بنيه طلعت من غرفه قاضي ووگعت ..
وجان محد وياها بس محامي ..
وهي حرمـة وماگدرنا شلون نتعامل وياها ..
اضطريت اشيلها من باب الانسانيه ..
وخليتها بغرفـة ..
وهي مغمى عليها كانت ملامحها تسولف .
بقيت صافن عليها ..
جذبتني .. دموعها الي تنزل من عينها الي مغمضه وكميه الحزن الي بيهن ..

المحامـي يحجي وياي واني صافن عليها ..
استحيـت وتراجعت ..
گال سيدي بس ثوانـي اتصل بواحد من اهلها ..

اشرتله .. گتله ع راحتك ..
ابتعدت عنها ورحت يم الشباك ..
درت وجهي الى ان حسيت بيها گعدت..
من شافتنـي انصدمـت ..
وگامـت بسرعـة وعبالك خايفه ..

ماردت الفت الانتباه او اتعـدى حدودي او احجي وياها .
انسانه عابره ومرت بحياتي ..
وهموم الناس اشكال وخاصه اني قاضي واشوف القضايا الي تمر عليـة ..

مرت الايام ورجعت شفتها .. بس هالمـرة تبجـي وتشهگ وكأنه هموم الدنيا كلـها ع راسها ..
حضنت شخص وتبجي وبعد گامت تتناقش وي شخص والشخص كأنه يهددها ..
واني كان عندي اتصال ..
تركت كلشي وبقيت صافن عليها ..
هي عينها صارت عليه ومستمرة بالبجي ..
تالي طلعوا ..

بقيت حاير بيها وكتلني الفضول اعرف قصتها ..
كلفت واحد يجبلي ملف قضيتها ..

قرأته وافتهمت سالفتها ..
اذن كانت دموعها بسبب اولادها ..
وحسيت بزوجها مو راحه ولاعب لعبه عليها ..
وخاصه بعد ماعرفت عنده معارف بالمحكمه ..

ماگدرت اتدخل او اتصرف .. لان هذا مو مكان وضيفتي بس البنيه شغلتني اكثر ..

رغم صغر سنها بس الزمن كبرها ..
جذبتني نضراتها وهي تباوع مثل الي تتوسل او تطلب المساعده تريد اي شي يرجعلها اولادها ..

ليل ونهار مافارگت خيالي ..
تفكيري بيها تطور لدرجه .. گمت اشوفها بطيفي ..
ردت اعرف اخبارها وشنو صارلها ..
وحسب علمي ابن عمها يداوم بالوزاره ..
واني دايما هناك بحكم عملي ولان عندي علاقة تربطني بمدير مكتب الوزير..
استغليتها فرصه ورحت ..
بس الصدمـة او الصدفـة الغير متوقعه هو انه اشوفها تداوم هناك ..

هي باوعت ودارت وجهها يمكن ماعرفتني .. او ماانتبهت مااعرف ليش كنت انتظر منها تعرفني بسرعه او كانت تفكر بيه مثل ماافكر بيها ..
للحظة رجعت مراهق .. وخاصه بعد ماشفتها بغير هيئة
انسانه جميله وقويه وتشتغل ..
مو ذيج الانسانه الشاحبه والمكسوره الي شفتها ..
معناها گدرت تتخطى الصعاب وتوگف ع حيلها من جديد
#بقلمي_الكاتبـة_شمس
........................ .. .......................
كملت شغلـي وردت اطلع . بس مااگدر اذا مااحجي وياها مااريد انتظر اكثر ..

انتظرتها طلعت وجانوا الحمايه وياي ..
گلتله انزل وقفها ماردت انزل اني خفت تبدر ردة فعل مو حلوه منها وتخجلني گدام الناس ..

من نزلت وشافتني صفنت عليه وخاصه بعد ماذكرت اسمها .. بعدين تذكرتني ..
بس مابدرت اي اهتمام ..
طلبت اوصلها ماقبلت وتركتني وصعدت بسياره ..

زاد شغفي بيها .. رغم هي مصارلها هواي من انفصلت واكيد مرت بمصاعب وكارهه الزواج ..
بس اني كنت مااريد اضيع فرصه واطلبها للزواج بسرعه
وخاصه بعد مالگيت الانسانه الي حركت مشاعري وگلبي بعد كل هذي السنين .
اريدها تعوضني عن السنين الي عشت بيها وحيد.
واعوضها عن حياتها الي عاشتها ..

من غير مااضيع وقت .. رحت طلبتها من ابن عمها ..
هو استغرب . وگال الامر بيدها بس بالاول لازم تخلص عدتها .
واكو مشاكل تنحل يله افاتحها الافضل تنتظر ..

ماعرفت شنو المشاكل ..
اذا على اولادها مستعد ارجعهم الها بس تعيش مرتاحه وتنحل مشاكلها ..

مرة من المرات قررت امر من شارعهم عسا وان اشوفها كنت احس نفسي مراهق وينتظر حبيبته براس شارعهم .

شفتها تحجي وي شخص . هو نفسه طليقها ..
وكان يريد يصعدها للسياره وهي ماتقبل ..
بسرعه حسيتها ملكي ومو من حقه ..
هو فرط بيها خلص ..
ماله حق بيها ..

من شافني گام يتطاول بالحجي .
الحمايه طلعوا اسلحتهم اشرتلهم ينزلوهن .
ولان اني بنيتي اقوى منه .
گدرت بآيد وحده الوي ذراعه وابعده عنها ..
هو اصلا طلع جبان .
وصعد سيارته وراح ويتوعدلها .

ردت احجي وياها مانطتني مجال وراحت ..
ااااه ياحور شوكت تحسين بيه ..

طلعت موبايلي واتصلت على ضرغـام ابن عمها ..
سلمت عليه
گال اهلا استاذ تفضل ..
ضرغـام احجيلي الصدگ حور شنو مشكلتها ..
ضرغـام .. استاذ مشكله بينها وبين زوجها ..
قيس .. غير هو طلگها شيريد منها بعد .
ضرغـام .. هو طلگها محكمه بس سيد مايقبل يطلگ
قيس .. اممم وهي شنو رأيها اخاف رايدته بعده
ضرغـام .. لا اصلا هي تكرهها .. بس هو يريد يكسرها اول مره اخذ اولادها وتمرضت ودخلت المستشفى من وراه وهسا يريد يخليها هيج حتى خاف تفكر تتزوج غيره .
قيس .. هينه هينه .. يله اني عطلتك اعتذر في امان الله
ها ضرغـام طلبي خليه بينا حاليا ..
ضرغـام .. ان شاء الله استاذ .. الله وياك ..

حور.....
هذا القاضي طلع روحي .. وين مااروح اشوفه صدفـة او متقصد ماادري ..

رجعت تعبـانه تغديت ونمت ..
دز رساله محمد .. منيلج هذا اليوم .. هو هذا الي تغيرتي علموده ..
ضحكت بأستهزاء على عقله وتفكيره .. هم اله عين ويتحكم بيه ..

سويت موبايلي صامت ونمت ..
للعصر گعدت شفت مكالمات هواي من محمد .
اوووه هذا شيريد بعد ..
لو باقيه حاظرته مو احسن . وين مرته عنه .

اتصـل ضرغـام ..
رديت ..
-شلونج حور
-هلو خويه شلونك
-حور محمد متصـل عليج
-اي هواي بس مارديت شمدريـك
-هسـا لگيته دازلي رساله ..
-يگول رضاوي متعور ويبجي يريدها اذا تگدر تجي تشوفه ..

من سمعت رضاوي متعور تخبلت .. مااعرف شنو حجيت وي ضرغـام وشنو گلي .. بس اي اي گضيتها ودموعـي تنزل .
لو عورة بسيطـة محمد مادز عليـه بس لازم بي شي ..

ضرغـام گال روحي گدامنا واني وفرح نجيج ..
لبست بسرعـة وخبرت ماما .
گالت اخذي واحد من ولد ام هوار ..

رحت دگيت الباب مثل المخبلـة .. گلتلها خالة وين الولد اريد اروح للمستشفى ابني متعور ومااگدر اروح وحدي

خطيه هوار هسا جاي من الشغل وتعبان ..
گال اني اوصلج خويه ..
بدل واجه اخذنـي ..

نزل وياي ..
گتلـة ارجع خويه هسا ضرغام وفرح يجون .
گال .. من يجون ارجع واصـر يدخل وياي ..

دخلت ومااعرف وين اروح .. اتصلـت على محمد .
گتله وين انتو ابني وين .

گال تعاي للطوارئ ..
رحـت وشفت ابنـي يون من الالم ويهـذي .
وخليلـه مغذي ودم . وايده ملفوفـة ..

حور .. ابنـي شبي شسويتله .. ليش هيج حالته ..
انتبهـت جانت اكو بنيه يمه متوسطة بالطول وجسمها مليان شويه ..
لابسه بنطرون وقميص طويل ولافه الشال هيج ع راسها .
تباوعلـي من فوگ لجوه ..
عرفتـها هاي مرته .. هو هذا ذوقـك تركتني علمود هاي لان لابسه لزگ ع الجسم ..
لعد منو الي لبسني عبايه اسلاميه ويتحكم بلبسي وحجابي ..(احجي بداخلي)
#بقلمي_الكاتبة_شمس
................................................
محمد .. اسكتي فضحتينا ..
حور .. اخذتهـم مني عساس تحميهم وتالي هيج تسوي بيهم ..
رباب .. هو قدر وصار ..انتي اخر من يحجي . لان مو اولادج فمستحيل تخافين عليهم وگلبج يحن مثلي .

گلي محمد شلون تعور مرتضى ..
محمد .. ها احنه نايمين وهو يلعب بالمكينه واخذت ايده ..
هو گال هيج شهگت ..
يعني اديه راحت ..

محمد.. لا بس اصبع واحد ..
حور .. وفرحان بس اصبع .. تحاسبني على اهمالي .. واهمالك امت ومرتك ماتتحاسبون عليه مو ..
محمد .. مرتي شعليها ..
رباب .. هي هاي تاليتها اربيهم الج واغسل ملابسهم واهتم بأكلهم اطلع تاليتها مهمله ..
حور .. والله ماجبرتكم وگلتلكم اخذوهم زوجج الي اخذهم مني بالغصب .. والا اني هسا يمي ومااتعب حضرتج ..

محمد تقرب مني .. لزم ايدي گال حور اهدي .. ادري اني غلطان بس الي صار قدر ولان تعبانين من الدوام نمنا ونبهت عليهم ينامون بس هو مخلي اخوه نايم وطالع للمطبخ ..

سحبت ايدي منه .. ومرته گلتله محمد وخزرته . عارت عليه مني عبالها مهتمه ..

گتله .. خلص محمد اذا استسلمت وماتگدرلهم گول اخذهم يمي ..

محمد .. هههههه تحلمين .. مو لگيتيها فرصه وتردين تستغليها ماانطيهم واني ورباب ممقصرين عنهم ..

حور .. شنو ممقصرين اشو دراسه اني ادرسهم ملابسهم يجيبوهن الي اغسلهن واكويهن ..
ريوگ ماتسويلهم انت تشتريلهم من بره .. والله العالم اذا يتغدون او يتعشون ..

رباب .. شوف محمد جزاتها شلون اولادك يلفقون ويجذبون .. هي هاي ترباتج تعلميهم ينقلون حجي الج .
يمكن كلشي خاص بيني وبين زوجي يجيبوه الج ..

هزيت ايدي عليها وطلعت اشوف هوار غيب منه بقى بالباب ..

گتله خلص روح انت تعبان ..
هوار.. ام مصطفى اذا محتاجه فلوس او اي شي گولي اني بالخدمـة .
حور .. لاتسلم خويه ماقصرت جزاك الله خير .
هوار.. لعد اشوفه واروح گتله تفضل ..

دخلته شاف مرتضى وبوسـه وسلم وطلع ..
اني بقيت گاعده يم رضاوي وابوس بس وهو يهذي بأسمي ..
عيون محمد مافارگت هوار لحد ماطلع وگام يأفأف .
ويخزر ..
مايگدر يحجي لان زوجته يمه ..

گالها امشي خلي اركبج تكسي وروحي للبيت انتي ..
گالتله ماامشي ابقى هنا ..
خزرها واخذها ع جهة يحجي وياها وهي معانده ماتقبل تروح تخاف على زوجها مني ..
ولاعبالك هو جان زوجي واخذتـة مني ..
ماتدري بعد مااختارها صار بالنسبه الي هو والماكو سوه ..

اجو ضرغـام وفرح ..
بوسوه وماحجوا وي محمد ولاكأنه هو موجود ..
گالوا شبي ..
سولفتلهم وگلتلهم مسوين عمليه الايدة ..
وضرغـام بقى يلومه الاهماله ..
وشويه ويتعتركون لوما فرح هدأت ضرغـام ..

لليل بقيت اني يمه ومحمد ماقبل يروح ..
بس مرته بالگوه اخذها للبيت ..
ومن رجع جاب ملابس الرضاوي ولفات ومي وعصير .

صحى رضاوي گال ماما جوعان وعطشان ..
حور .. اي حبييي هسا انطيك .
گومته واكلتـة بيدي ..
وشربتة عصير ..

گال اريد انام بحظنج ماما ..
اخذته الحظني ونيمته ..
غفيت شويه وگعدت شفت محمد گاعد گبالنا ع السرير ويباوعلي ..

عدلت گعدتـي ودرت وجهي عنه ..
گال ..
الرجال الي وياه حمايه ..منين يعرفج .

-ماادري ..
-معقولـة مايعرفج ويدافعلج .
-اولاد الحلال هواي ..
-هاااااا .. اكيد مايبقى شي مضموم كلشي يبين بالتالي بس لاتصدگين اطلگج واخليج تتهنين لو وزير يريدج ماانطيج ..
-اي لان مسجله بأسمك .. الشغله صارت عشائريه وماكو حجي بيني وبينك ..
-مااعترف لابشيخ ولاعشيره . انتي مرتي ومحد يگدر يجبرني اطلگ ..
-لاالوقت ولاالزمان مناسب الهذا الحجي اني هنا علمود ابني ..
-خوش حور بسيطه وگام ..

ماشفت بحياتي شخص اناني ومتناقض بهذا الشكل ..
واصلا بعد مياكل عندي كلامه ..
خليه لايطلگ المهم اني بالمحكمه مطلگة منه .
قابل اريد اتزوج بعد واهتـم .
لو اموت مااكرر الغلط ..

للصبـح اجه الدكتور شافـة وانطاه علاج وخرجة من المستشفى..
گتلـه محمد خليه عندي احسن اني اهتم بي هاي عمليه وبأصبعه واخاف يلتهب ويبترون ايده كلها ..
ماشفت الدكتور شلون نبه .

محمد .. اي وحظرتج راح تهتميله وانتي تداومين وتاركته بالبيت ..
لاتخافين اني راح اجيبله ممرض كل يوم للعلاج والتعقيم .
حور .. بس.....
محمد .. اذا كاتلج ابنج تعاي ارجعي يمه واهتمي بي .
حور .. تنرفزت من كلامـة .. وين ارجع محمد وين بالبيت الي جبت وحده وخليتها ببيتي الي بينيته بإيدي لو تخليني يم اهلك الي شفت الظيم منهم ..
انسى محمد ماارجعلك ولاارجع يم اهلك الي مايخافون الله ..
عندك مرتك الي هجمت بيتك علمودها .. اهتم بيها وراعيها وانطيها تصرف على نفسها وتعدل حالها .
مو باجر عگبه تجيب وحده عليها وتگلها لان انتي ممهتمـة النفسج ..

محمد .. دصعدي بالسياره اصعدي .. صاير السانج متر
حور .. ههههههه عباله ابقى حور الي مغمضه وماتگلك الا حاظر وسمعا وطاعه ..
گتله .. روح محمد روح اني اخذ تكسي وامشي ..

ركب رضاوي وهو يبجي عليه ويگلي ماما لاتعوفيني .
بقت دموعي وراه ومابيدي شي اسوي ..
مااگدر اظلم حالي وارجع مره ثانيه لمحمد .
وهم يدفني بالحياة .
ولااگدر ارجع اولادي ..
شأسوي ياالهي ..
مشت سيارتهم .. واني امشي وراهم وابجي ..
ربي انت احميه وعافيه ..
مالي غيرك استنجد بيه ..

گعدت ع الرصيف والرايح والراجع يباوع ..
اختنگت وگمت اشهگ من البجي ..

ماكـو شي ماينحـل بهاي الدنيـا .. مدام اكو رب عظيم رؤوف بعبـادة . بس هذا اختبـار منـة ولازم نجتـازة .
رفعت راسـي ومستغربـة الصوت ..

گمت من مكاني .. انـت شتريد منـي .
دااحسـك تراقبنـي ..
بكل مكاث اشوفك .. انت منو وشتريد ..
مد ايدة بيـها كلينكس ..
گال لتخافين اني نيتي طيبـة ..
گتلـة .. شكرا بس اتمنـى مااشوفـك تحوم حولي بعد مبين انت رجال واعي ومثقف . عيب هاي التصرفـات .
تركتـة ومشيت ..
اخذت تكسـي ورجعت للبيت ..
#بقلمي_الكاتبة_شمس
يتبع............

لاتنـسـون التصـويـت 🌹

طبعا شگد دورتلكـم ع شخصيه تشبه مواصفات قيس حسب ماوصفته حور ..
مالگيت بس هذا خمسيني وكاريزمـا 😉