رواية حليب اسود الفصل الحادي والثلاثون 31 - بقلم الكاتبة شمس السعدي

اسعد الله اوقاتكم احبتـي 🌹
وصلنا النهاية الرواية اتمنى عجبتكم ويارب اكون وفيت وكفيت وياكم ..
واعذرونـي ع التقصير 😚
///// البارت الثلاثون والاخيييير /////
#حلـــيـب_أســـود
#الكــاتبة_شـمــس

ماما .. ها امي شراد منج هذا قليل الاصل ..
حور .. معليج منه ماما هذا عايش بالاحلام .. عباله انـي حور القديمـة الي يضحك عليها بكلمتين ..

دخلت للبيت بدلت وبدلت الجهالي .. ماما گالت انـي راح اطبخ ..
رحت نضفت البيت وكملت شغلـي ..
رحت للمكتب .. گعدت ع كرسيه .. فتحت الحاسوب مالته .
كان مملي بصورنا وصور مسرة ..
اخذتنـي الصفنه وي ايامنا الحلوه ..

دگ موبايلي ..
باوعت هذا استاذ مضفر ..
ردت .. هلو استاذ شلونك .
-هلو خويه ام مصطفى. اگلج خويه هاي ام زين تريد تحجي وياج ..
-اي نطينياها ..
-هلو ام مصطفى شلونج .
-هلو ام زين الحمد لله ..
-اگلج عيني . ابو زين گالي تردين تنقلين . وگال زينه بالحاسبه وكلشي تعرف . ليش ماتجين هنا يمي ..
بالضريبه والمدير محتاج سكرتير شاطر وع الحاسبه وهم الشغله مريحة احسن الج من المحكمه شتگولين .

حور .. والله ام زين علواه . اني بعد قيس ماودي ابقى بالمحكمه . وهم بعيده ع بيتي ..
ام زين .. لعد هاهي اخلي ابو زين من باجر يمشيلج بأوراق النقل . وخليت المدير يسويلج طلب حتى تسهل الشغله ..

حور .. مااعرف شأكلج ماانسى وگفتكم وياي ..
ام زين .. گولي يالله احنه اهل . والمرحوم كان اخونا وياما وگف ويانا ..

تشركت منهم وسديته .. فعلا اكو ناس غربة بس يوگفن ويانا اكثر من الاقارب والي نعرفهم ..

خبرت ماما فرحت .. گالت اني اصلا مااحب شغل المحكمه بس لان رجلج وياج جان مطمأنه ..

مرت الايام وبديت اشتغل بنقلي .. والحمد لله كملت ..
وبيوم اجاني شخص شايفته بس مااتذكر ..
گال ست حور ممكن احجي وياج ..
-تفضل اخي محتاج شي .
-اني عدنان ابن عم قيس ماعرفتينـي .

-تذكرت .. هاااا اي اهلا وسهلا محتاج شي ..
كانت نضراته ماتعجبني وحاسه وراه شي .

عدنان ..اريد احجي وياج على انفراد ..
حور .. بشنو ?
عدنان .. هنا ماينفع ..
حور .. واني مااگدر اطلع وياك بمكان عام . انت ناسي اني ارمله ومايصير اطلع وياك ..
عدنان .. بس الظاهر تردين تطلعين خليني اوصلج وبالطريق نحجي ..
حور .. لا مطالعه بعدني بس دا الم بغراضي لان بعد مااداوم هنايه انقلت .
عدنان .. بأستغراب .. ليش صار شي هنا اكو احد مضايقج بس گولي ..

تعجبت من لهجته عبالك من اهلي ويدافع ..
حور .. لا شكرا ماكو احد مضايقني بس بعد قيس المكان صار يخنگ لهذا طلبت نقل ..

عدنان .. امممم ست حور اني معجب بيج وخاصه من شفتج هناك وشلون تدافعين عن حقج وبنتج عجبتيني وماطلعتي من عقلي ابد ودووم افكر بيج ..

حور .. بس اني بعد قيس مستحيل اتزوج وگول للي دزك عليه . يخسى اذا يفكر مجرد تفكير انه بيوم ابدل قيس بغيرة ..

عدنان .. والله محد دازني اني رايدج بالحلال . وقيس مات وانتي صغيرة وعندج اولاد لازم تشوفين حياتج ..

گمت من مكاني .. استاذ لو سمحت هذا مكان شغل . وقراري نهائي مستحيل افكر بغير قيس انسى .
ويمكن انت تعرف قيس شنو .
يعني مو بالسهوله الواحد يگدر ينساه ..
وهسا من رخصتك وياليت ماتتعود تجي لهنا وتعب نفسك لان ماراح تحصل شي مني ..
انسونـي واطلعوا من حياتي ..

عدنان .. ع العموم اسف اذا ضايقتج .. وتصدگين اني حاسد قيس عليج . رغم الكلام الي وصلني عنج بس عرفت اختيار قيس مايخيب ..
اسف اذا ضايقتج . بس اذا بيوم احتاجيتيني راح اكون موجود بأي وقت ..
كم البنتج وسند الج .. سحب ورقة من الطاوله وكتب رقمه واسمه ونطانياه ..

واستأذن وطلع ..

هففففف مااعرف ليش كنت متوترة منه وعبالي يطلع مثل امجد . بس الحمد لله گدر يتفهم ويطلع من حياتـي لان كنت خايفه لا يسببلي مشاكل ..

انقلت للضريبة وكان دوامي حلو وبنات هواي هناك تعرفت عليهم . وام زين وياي ماتركتنـي ..

اما محمد فكان مثل الشوكة بالبلعوم .. كل يوم وطالعلي بسالفه ..
وكل يوم اطردة وارزله وميفيد ..

بيوم من الايام كان جمعـة .. ماما رادت تروح يم فرح خطيه دايما تتوسللها تجي يمها كم يوم .. واخت وياها الاولاد بقيت بس اني ومسرة ..
فكنت دااسوي شي خفيف بالمطبخ لان وحدي ..
سمعت الباب اندگت ..
رحت للكاميرات باوعت . هذا امجد شيريد ..
مافتحتله .. بس اصر وحرگ الجرس ..

اتصلت بضرغام .. گال هسا جايج انـي ..
اضطريت فتحته بعد ماكسرها للباب .. عطت بي . شرايد ماكفاك الي سويتـة ..
دفع الباب حيل عليه ودخلني للحديقه ..
ردت اعيط سد حلگي . والايد الثانيـة شالنـي بيها ..
دخلنـي لجوة ..
واني اضرب واقاوم بس مااگدر هو اضخم منـي ..
تندمت لان فتحت الباب بعد ماشفت الشر الي بعيونـة .
ماردت احسسه بضعفـي وخوفـي ..
بس ماانكر ساعتها گلبي راد يوگف من الخوف ..
ومن سمعت كلامه وهو يگول ..

امجد .. وج حور دمرتيني راح اموت كلما اريد اقسى عليج حتى اكرهج واحطمج بس گلبي يحبج ويعشگج من يوم الي شفتج ذبت بيج وماردت ابوي يتزوجج وحاربتج حتى تفترقون .
وردتج تجين يمي لهناك حتى تكونين قريبه عليه واشبع منج ..
#بقلمـي_الكاتبة_شمس
…………………………………………
دفعته برجلي .. لك انت متستحي شنو هالحجي اني مرت ابوك ومحرمة عليك انت تخبلت ..

امجد .. اي تخبلت . ماحبيت مرتي بگد ماحبيتج . ابوي مات حور وهاي العقائد ماتهمنـي اني رايدج ..

تفلت عليه .. انجب حقير سافل . اذا ماطلعت منا الم الدنيا عليك ..
ركضت للمطبخ . اخذت السجينه وگتله .وربي اذا اتقربت مني اقتل نفسي ..
هجم عليه بوحشيه . ولواها الايدي واخذ السجينه اذا ماطاوعتينـي وتزوجتنـي اخذج بالقوه ..
گمت اعيط واريد احد يسمعنـي ماكو ..
الدموع نزلت من عيونـي وصار قيس گبالي ..
گمت اصيح ..
قيس تعال حبيبي قيس .. قيس ليش تركتني الهيج حيوانات .
وكنت احاول ادفعه واتعارك وياه وساعه اتوسل بي وساعه احلفه ..
بس مايفيد كان حيوان هائج ..

بس ربي العالمين وروح قيس الي محاوطتنـي حمونـي منه .. اجه ضرغام بالوقت المناسب ..
تخبل من شاف الموقف ..
ولزم شبعه بوكسات وضرب وامجد يرد عليه بس ضرغام كان مسيطر اكثر .. الى ان حسيت امجد راح يموت جواه ..
الغريب انه امجد كان منتهي ويصيح حور انتي الي حور مااتركج ..
طلع ضرغام المسدس خلاه براسه .. گاله اذا اتحركت ارميك ..
امجد انگلب فار بذيج اللحظه ..

ضرغام .. روحي استري روحج بسرعه ..
انتبهت ع ملابسي مشگكه ..
صعدت ابدل .
بس الدموع كانن نهر . واحس جسمي توسخ . هذا الجسم من حق قيس وبس ..
دخلت اسبح وابجي . بدلت وقفلت الغرفه ..
كانت عيني ع صور قيس وابجي ..
ليش هيج قيس .  ليش تركتني . شوف شصار بيه من بعدك .. ابنك من لحمك راد ينهش شرفك وعرضك ..
اخذني وياك قيس . لاتخليني هنا ..

بقيت ساعه حابسة نفسي بغرفتـي ..
اندكت الباب طفرت ..
منوو.
انـي فرح افتحي ..
فتحتها وشمرت نفسي بحضنها . گمت ابجي واعيط .
وج فرح خايفه فرح شفتي هذا النذل شرايد يسوي .
وج لو ماضرغام . جان اني انتحرت ولاخليته يسوي بيه شي..

صعدت ماما حضنتني .. اني الصوج بيه طلعت اني تركتج الوحدج . نمت بحضنها وفرح اخذت بنتي ونزلت ..
ماما .. لاتخافين ياامي ضرغام خبر صديقه واجو اخذوه وهسا يتختخ بالسجون ان شاء الله ..

من الخوف كان الحل الوحيد انام . حتى انسـى ..
مر كم يوم واني كارهه الدنيا ..
وكل يوم مراكز ومحاكم ..
ااااه ياحور شنو بعد ماصابج .. كل انواع القهر صار وياج ..
بعد شگد تتحمل يگلبي ..
ادخلوا خواله وعشيرته .. وگالوا تنازلوا ونخليه يسوي تعهد مايجي ولايدخل بغداد بعد ..
بس مانريد فضايح وهي مرت ابوه وام اخته .
مانريد الناس تاكل وجهنا ..

بالاول قرروا يزوجونـي العدنان حتى مايصير حجي .
اني رفضت هالشئ ..
وعمي وضرغام هم ..
بس شيخ عشيرتنا گال . هيج احسن لان البنيه صغيرة وعليها العين ولازم نسكت حلوگ الناس ..

تخبلت من سمعت هالكلام ..
وگلتلهم انتحر اذا جبرتونـي ..

بقيت الليل كله ابجي .. تذكرت رقم عدنان ..
اتصلت عليه من الصبح ..
رد بأستغراب ..
الو منو حضرتج ..
اني حور مرت قيس..
اهلا ام مصطفى. الصراحة فاجأتيني ..
اسفه اذا ازعجتك . بس كان لازم اتصل .
لا بالعكس تفضلي ..
استاذ عدنان .. الي سواه امجد قله شرف منه . ولازم يتعاقب . ولان العشاير تدخلت وطلبوا تنازل اتنازلت .
بس مال يحلوها ع حسابي ويجبرونـي اتزوج مستحيل هذا الشي ..
عدنان .. الي ترديه يصير . بس لو تفكرين بالموضوع من جانب الامان الج والاولادج . انتي لازمج رجال يحميج ويدافع عنج .. الله شاهد اول ماعرفت ضربته وبهذلته .
وضجت حيل .. يعني اني مالي ذنب ..

حور .. استاذ عدنان . قراري ماله علاقه بيك . بس انت تعرف اني مااتزوج ومستحيل اتزوج بعد قيس .
اموت ولا رجال غيره يتزوجني .
لهذا اتمنى الرفض يكون منك وتفهم شيخكم بهذا الشي ..
عدنان .. بعد الي گلتيه مستحيل اجبرج عليه . والي ترديه يصير ..
حور .. شكرا مع السلامه .
عدنان .مع السلامه

بعد شهر انحلت عشائريا .. وفصلوا خمسة وعشرين مليون .. اني ماتهمني الفلوس ولاطلبت ..
بس عمي گال لازم نرد اعتبارنا ومانسكتلهم ..

ومن ذيج اللحظه قطعت علاقتـي بيهم . بس وفاء تتصل تسأل ع مسوره لو تطلب صورها ..
وقهرتنـي من اتصلت تعتذر وتبجي ع السواه اخوها ..

يوم عن يوم گدرت انسى واستمر بحياتـي ..
ودوامي مستمر ..

ماما بقت يمي .. ونقلت غراضها كلهنا الي ..
اني رتبت وحدة من الغرف الفوگ . المكتب قيس .
صعدته كله هو واغراضه يم غرفتي . صار قريب عليه شوكت مااشتاق ادخل اگعد ع كرسيه وافتح لابتوب مالته اباوع الصورنا وذكرياتنا ..

وماما صارت غرفتها جوة بمكان المكتب .
رتبته الها واستقرت عدنا ..

بيوم من الايام اني بالشغل ..
واتصلت فرح ..
هلو فروحة حبيبتي شلونج ..
صوتها غريب وتبجي ..

فرح .. وج حور مصيبه وگعت ع روسنا .. لاتگولين الماما حور .. شكو فهميني اولادج وضرغام بيهم شي .
فرح .. لا وج بيت اهلي احترگ هسا خابرتنا ام هوار .واني وضرغام بالطريق .
لاتگولين الامي تعاي بس انتي ..

اخذت اجازة بسرعه وطلعت .. والخوف موتنـي .
والف فكرة اجت براسي ..
زياد هسا دوام . بس الجهال وايمان بالبيت بس لايصر عليهم شي ..
#بقلمي_الكاتبه_شمس
………………………………… .
وصلت الشارعنا وشفت الناس مگلوبة ..
نزلت اركض واوگع . رجليه ماتشيلني .
البيت اظلم من الدخان والنار ماكله البيت كله .. وسيارة الاسعاف والاطفاء بالباب .
ابعد الناس بإيدي واركض .
وصلت البابنا .
شفت زياد يلطم ويريد يدخل مايخلوه وايمان مقرفصه ع جهه .
فرح گاعدة وتبجي وضرغام لازم زياد ..
گمت الطم ع وجهي ..
وج فرح احجي . زياد وين ولدك گلولي ..

گبلنا مثل النسوان ويلطم ويانا ..
ولجن اخوجن انهجم بيته .  اولادي كلهم جوة والنار اكلت البيت كله .

جانت مثل الصدمة بحياتنا ..
گمنا نلطم ونعيط ..
طلعوا الاسعاف ومطلعة جثثهم ثلاثتهم ماينعرف شكلهم متشوهين ومقرفصين .
سودة عليه يعمه .. شگالت روحكم من اكلت النار جسمكم الحلو هذا ..

گمنا نلطم بالزايد ..
زياد تهستر يريد يحضنهم بس منعوه جسمهم حار واللحم ممرود ..
گام يشيل روحه ويرگعها ..
ويصيح . ولكم يابه ريت يومي قبل يومكم ..

ايمان مثل المصدومة وصافنه ..
راح زياد شبعها ضرب .. الله لايوفقج انتي السبب هاملتهم وگاضيه نهارج بالصالون. 
شنو من ام انتي شنو من ام فهميني ..
بالگوة سحبوه منها ..

زياد .. مااريد اشوف شكلج انتي طالگ طالگ طالگ ..

طلگها گدام الكل .. وهو يبجي ..ويگول لو ادري مطلگج من زمان وماخذ جهالي وج ضيعتي ثلاث ورود مني الله لايوفقج . اركض واتعب علمودج وانتي موتي ولدي .

مااتحملت موقفه صعبه اشوف اخوي بهيج موقف .
حضنته وابجي وهو حاضني .. وج حور هم داعيه عليه والله عاقبني بولدي .
وج حور انتي تحبيهم جنتي وهمه يحبوج خو ماداعيه عليهم ..

گتله ينگطع الساني اذا داعيه عليك لو عليهم . انت روحي وهم قطعه مني ..
بقينا بالگاع حاضنته اني وفرح الى ان خرب ووگع .
صار مثل الجثه
گمنا نعيط ..
اجو ولد وضرغام شالوه للمستشفى ..
واحنه رحنا وراه ..

كانت عيني ع البيت واباوع .  اااه ياايمان هذا البيت الي قتلتي نفسج عليه وتالي خسرتي ورود ثلاثه بي ..

راحت فرح وي زياد واني بقيت يم ايمان . لان الشرطة كانت موجودة وتحقق وياها ..

الي عرفته .. القنينه طاگة عليهم .  جوعانين يمكن حبايبي ورادوا يسون شي ياكلوه لان كانت الساعه وحدة وامهم بالصالون ملتهيه وتاركتهم ..

اجو اهلها واخوانها .. وامها گامت تضرب بيها وتلومها .
واخوانها هم .
بس هي ماتحجي بس دموعها تنزل ..
تالي گوموها واخذوها وياهم ..

اتصلت ع فرح اطمأنيت ع زياد .. گالت بي جلطة وبالعنايه ..

گلتلها اني رايحة يم ماما لازم تعرف ..

رحت ومااعرف شلون راح اخبرها ..
وصلت لگيتها مغديه الجهال ومنيمتهم ومنتضرتني . ماتنام الا اجي ..

شافت شكل ووجهي مورم من البجي ..
ماما .. شبيج ياامي لاتخوفيني هو اني گلبي اليوم من الصبح يوجعنـي ..

گعدتها وحضنتها .. گلتلها ماما مااعرف شلون اگلج .
ماما .. گولي بسرعه مو راح اموت ..
حور .. يوم بيتنا احترگ وووو
ماما .. انعل ابو. البيت زياد واولاده بيهم شي ..

نزلت دموعي .. يوم اولاد زياد ماتو ..
عاطت بصوت يمكن هزت البيت بي ..
لدرجه اولادي گعدوا ع صوتها ..

حضنتها وابجي .. يوم لاتسوين هيج اهدي انتي مريضه .
ماما .. وج ريتني اني المتت بدالهم . والله عيب عليه عايشه وهمه ورود بعدهم وماتو ..
حور .. اسم الله عليج ماما .. بس لازم تصيرين قويه وتوگفين وي زياد ..

ماما .. وج وهذا الاثول ومرته الغبرة وينهم عن الجهال .
حور .. ماما زياد حالته خطرة بالمستشفى صارت بي جلطه . ارجوج لاتسمعيه حجايه ..

ملخت خدودها ولطمت لما الدم نزل منهن ..
بدلت واخذنا الجهال وديتهم البنت عمي ورحنا للمستشفى.

من شاف امي .. يون ويبجي مثل الطفل .. حضنته وتبجي وياه ..
گالهم طلعوني منا ماابقى لازم احظر فاتحة اولادي ..

طلعناه وهو بالگوة يمشي ..
سوينا الفاتحه ببيت عمي ابو ضرغام ..
وزياد ماقبل ايمان تحظر الفاتحة ..
كملت الفاتحة وهو حاله تغيير ..
ومو ذاك زياد ..

گومته وگتله گوم خويه بيت اختك موجود ..

زياد .. بعدج تحنين عليه وتگولين خويه ..
بسته براسه ..  اخوي وسندي بعد ..
واني الي محتاجتك .. اريد اخوي يمي ويحميني ..
حضني ويبجي ..

اخذته البيتنا وخليلتله غرفة وحده ..
يروح للدوام ويرجع يحبس روحه بيها لايطلع ولايمشي .

بعد مدة طلگ ايمان محكمه ودز ورقتها الاهلها ..
وانتكست حالته كلش ..

بعد شهر صار سنوية قيس .. ورحت الحبيبي وسولفتله الي صار ويانا ..
كنت كلما اروحله ساعه اتغزل بي وساعه اسولفله همومي لان اعرفه يسمعني ويدعيلي ..
ونفسيتي ترتاح من اشكيله ..

بعنا بيت اهلي واخذت ايمان حصتها ..
حالة زياد سائت ولازم فد شي يغير حياته ..

الحينا عليه يتزوج رفض بالبدايه ..
وبعد ماقنعناه ومر ع وفاة اولادة كم شهر يلـة وافق ..
وگال بكيفكم اي وحدة تشوفوها مناسبه لان اختاريت مرة وطلع اختياري فاشل ..
#بقلمي_الكاتبة_شمس
………………………………… .
ماما اقترحت علينا نيران صديقه ايمان . لان هو حبها وهي حبابه وشريفه ويمكن تغيير نفسيته وحياته ..

وفعلا من سمع بيها حسيناه فرح . بس ماگدر يحجي .
خطبناه بسكته واهلها ماصدگوا انطوها بسرعه .
وهي من سمعت بحالت زياد والي صارله انقهرت ووافقت ..

بشهر كملنا كلشي . وكانت التكاليف كلها من ماما وحصتها من البيت .
والباقي .
اجرناله بيت صغير يم بيتي .. مثل المشتمل.
واثثناه اله من كلشي ..

تزوجوا وگعدوا وحدهم .
بس دايما يجون يمي اني وماما ..
ونيران حبابه حيل ..
والصبح تجي يم ماما من نروح للدوام ومن يجي زياد ياخذها ويرحون البيتهم ..

ولان بنت اصول غيرت زياد وخلته يتعلق بينا ورجع يحبنا ويخاف علينا ..
ودوم تاخذة ويرحون الفرح لو النا ..
واحنه حبيناها وصارت مثل اختنا ..

بعد سنه الله رزقهم ببنيه وحاليا هسا حامل .. الحمد لله الي عوض زياد بعد الفاجعه الي صابته ..
رغم هو لسا مانسى اولادة ويروح يزورهم ويسويلهم ثواب ..
وايمان ماعرفنا شي عنها بعد وانقطعت اخبارها ..

اما انـي .. فلسا عايشة ع ذكرى حبيبي قيس .. الي ماشفت مثله رجال بحياتـي ..

رغم الظلم الي شفته من بقية جنس ادم والي ارضعتهم امهاتهم حليب اسود ليكونوا بهذا الحقد والظلم ..
الا انه هناك رجل واحدا اغناني عن كل الرجال ..
ربـي ارحم حبيبي وزوجي قيس .. واجعل مثواه الجنه .
واحفظ عائلتي واولادي ..

احب اشكر كل من تابع قصتـي وترحم الحبيبي والي دعوا اله .. ربي يحفظ احبابكم ومايفجعكم بشخص عزيز عليكم ..
اتمنى قصتـي عجبتكم رغم كميه الحزن الي بيها بس حبيت اشاركم بيها ..
تحياتي للجميع وللكاتبة الرائعة شمس ..
النهايـة………
#بقلمي_الكاتبة_شمس
شكر خاص منـي ومن حور .
لمصصمة الفيديوهات R--o--n--a--k

تنويـه////
حبايب مثل مادعمتونـي ووصلت الهيج مرحله ..
اتمنـى تتابعون الكاتبات المبتدئات وتشجعوهم ..
والكاتبة  _TETO_223  من ظمنهم ..
تابعوها وصوتوا القصتها ..
فديتكم لاتخجلونـي🌹