رواية حليب اسود الفصل السابع والعشرون 27 - بقلم الكاتبة شمس السعدي

تحياتي لكم احبتـي 💕
///// البارت السادس والعشـرون /////
#حلـــيـب_أســـود
#الكــاتبة_شـمــس

زوجـي وحبيبـي قيـس ..
ستبقـى في قلبـي في وسط أحشائـي في جوفـي .. وفي أعماقـي الى ان يقال مـاتت تلك الغريبـة و هـي تـردد لـم تنتهـي القصـة ..!!

ماما اريد اروح البيت قيس اخذونـي مااروح الاي مكان ..
ضرغـام .. حور لاتعاندين . انتي مريضه وتعبتـي من التحقيق والسين والجيم ..
روحي هناك ارتاحي واولادج هناك خطيه فكري بيهم لاتعذبين قيس بگبرة.

باوعتـله ودموعي مانشفت .. ااااااخ ضرغـام المگبرة مو القيس .. شلون راح يخلون التراب علـيه شلون راح يتركوه بهالليل وحده ..

ضرغـام .. لاتخافين احتمال مايدفنوه هسـا .. لان سمعت راح ياخذوه المحافظته والفجر احتمـال يطلعون ..

اخذونـي البيت اهلـي رغم الدكتور نبه ابقى بالمستشفى بس مااگدر اريد اروح اصلي الوحشة واعزي روحي بشوفة بنتـي .. مسرة اليوم تيتمت ومحتاجتنـي..
تلگونـي جهالي .. حضنوني ويبجون ..
صفاوي .. ليش عمو قيس مات من قتله احنه نحبه ليش عافنه ..

ضرغام.. منو گلهم ?
هيبت .. امي گالتلهم ..

انـي بدون صوت ومالي خلگ احجي ..
دخلت شفت فرح تصلـي ..
وعيونها وارمـة شافتنـي اجت حضنتنـي ..
حور .. وج فرح مات بحظني فرح يباوعلـي ويودعنـي بعيونـة ..
فرح .. اشششش لاتبجين كافي مو زين عليه تعذبيه ..
ادخلي غسلي جسمج وبدلي وصلي واقري قرآن اله محتاج كل حرف هو هسـا ..

اخذت. ملابسـي وساعدتنـي فرح لفيت ايدي بنايلون ورغم الالم تحملت وغسلت ..
وتوضيت بعدين . دخلت للغرفـة شفت مسرة نايمة .
شميتها وعبالك ريحة قيس بيها ..
اااااه ياريحـة الغالي .. مالحگتي تشبعين من حنانه مثل مااني مشبعانة منه ..

گعدت اصلي .. واقرأ قرآن واني ممصدگة خلص راح بعد مااشوفـة ..
بس كلما اتذكر عيونـة اصدگ وابجي ..

الليل كلة مانمت بس ادعي واقرأ قرآن وماما وفرح وضرغام كلهم يقرأون قرآن وماناموا ..
جابتلي فرح عشا مااكلت ..
زياد اجـة يواسي بيه ويحجي وياي .. بس للاسف اجه متأخر . الاحبهم راحوا ماتفيد الوصايا ..

اتصلت وفاء . من شفت رقمها رجف گلبي وعبالك قيس الي يتصل .

اول مارفعته هي تبجي ..
گلتلها .. ااااااه يوفااااء . وج غالينا راح .. راح وماخلوني اودعه ولااروح الگبرة ..

بعد ماگعدنا نبجي واسولفلها شلون مات بحضني وشلون عيونه تباوعلي ..
وهي بس تبجي ..

گالت .. حور . ادري ببابا يجبج وانتي تحبيه وهو يحتاجج اكثر وحده من يدفنوه ..
همه راح ياخذوه يدفنوه قبل الفجر ..
انتو اطلعوا من وكت لان احنه اقرب عليكم من النجف .
وابقى على تواصل وياج .

اني راح ياخذنـي زوجي ورى ميخلصون دفن حتى اشبع منه لان وياهم زلم هواي وميقبلون اروح ..
واتصل عليج وادليج ..

حور .. صدگ وفاء .. بحياتي ماانسالج هذا الفضل ..
طلعت سولفت الضرغام ..
گال اني اخذج ..
بس راح انام ساعه علمود ورانا طريق ..
وگعديني ونروح ..

لبست عبايه اسلاميه سوده ولفيت شالي وجواريب سود ..
وگعدت انتظر الدقايق .. دقيقة دقيقه . حتى التقـي بحبيبي ..
ماما وفرح رادن يرحن . ماقبلت لان فرح حامل وماما مريضه ماتتحمل .. وعمود الجهال مايبقون وحدهم ..

طلعنا قبل ب 3 الصبح ..
كان الدنيا سواد عتمة ماكو لا قمر ولانجوم ..
وعبالك الدنيا كلها حزينه وياي ع فراگ قيس ..

الطريق كله مابطلت دعاء وقرآن .. صح گلبي مخنوگ وابجي ..
بس لازم اصبر مااخليه يتعذب من يشوفني بهيج حاله .

وصلنا للنجف .. واتصلت ع وفاء ..
گالت نص ساعه وتوصل ..
ودلتنا وين نوگف ..

وگفنا يم المغيسل ..
ومنتظرة وفاء تجي ..
راح ضرغـام يجيب مي ويجي ..
وطلعت سيارات كومـة من المغيسل ..
صارت عيني ع التابوت ورف گلبي شبحت عينـي عليه ..
بقيت ادور بالوجوه بلكي اشوف واحد من ولده ..
صارت عيني ع سعد اي هو والله هذا سعد .
مخلي غترة ع راسه . ويمسح بعيونة ..

اجة ضرغام .. گتله ذولي والله ذولي . هذا تابوت قيس شفت سعد احجي مثل المخبله واعيط ..
التشييع كان كبير . وبالاضافه سيارات مضلله وشرطه وياهم .. لان الناس كلها تحبه وماله اذيه ع احد ..

ضرغام .. اهدي حور .. مانگدر نروح وراهم .. بس راح ابقى مسافه عنهم ..

حور .. منو يعرفنا ضرغام واني راح اخلي الشال ع وجهي . وانت دتشوف بالخمسين سيارة او اكثر من يعرفنا ..

بقينا نمشي مسافه عنهم .. وعيني ع التابوت ..
احس الهيبه تطلع من التابوت مالته ..
تستاهل يحبيبي تستاهل هيج تشييع .. انت مقامك عالي بالدنيا وبالاخرة ان شـاء الله ..

كنت اراقبهم من بعيد ومقهوره لان المفروض اني اول وحده اكون يمه وهمه يدفنوه ..

كنت مغطيه وجهي وبس عيوني طالعه وبقيت مسافه عنهم وكانت هوسه ومااشوف شي .
نزلوا التابوت واني اقرأ قرآن واودعـة ..
ضرغام مابطل بجي ..
ويگله .. مودع بالله خوية ماتستاهل هيج نومـة .
ومن اسمع هيج يتگطع گلبي اكثر ..

بدأ النهار يطلع .. واني منتضرة ..
همه بعدهم كملوا وبقوا شويه .. والناس گامت تصعد سياراتها ..

بقوا بس الولد يتفقون وي الدفان ويسولفون .. احنه صعدنا بالسيارة ..
لان اذا شافنـي امجد ميخليني اوصلـة ..

طلعت الشمس يله راحوا ..
اتأكدنا راحوا ..
حرك ضرغام السيارة واتقربنا يمه . بس ترابات ع الگاع ..
طلبت مي من ضرغام راح يجيب ويجي ..
#بقلمـي_الكاتبـة_شمس
..........................................
مددت طولي وي طولة .. ونمت ع ترابه ..
حبيبي ادري لاتخاف اني يمك .. الليله الراحت كلش موحشة وطويله بلياك ..
اشتاقيتلك يروحي اشتاقيت الحضنك ..
اااااااه ياقيس .. شلون هانت عليك حور وتتركها وهي بحاجتك .. مسره بعدهي ماشافتك ولاشبعت من حنانك شلون نطاك گلبك تتركنا ..

اتهسترت .. گمت اخذ من ترابه واطش ع راسي ..
حسيت وحدة من وراي حضنتي وتبجي ..
شفتها وفاء واني حضنتها قوي ..
اااااه يوفاء راح والينا ومحد النا .. هي تبجـي واني ابجـي ..
تسألنـي عنة شنو حس وشگال وهم وجعه شي . صاح ااو تأذة .. واسولفلها بحرگة وهي تبجي حتى زوجها وضرغام يبجون ويانا .. انتهيت بالگوة اخذونـي من قبرة ..

رجعنا البغداد وحالتـي حتلـة .. رجعت الوحدي بدون قيس .. شلون راح اگدر اعيش وشلون ادخل البيت بلاه ..

ضرغـام اشترالي لفة بالطريق .. گال هاج اگلي نزفتـي هواي مو زين هيج فكري بأولادج .. حلفنـي بالغالي ..
اكلت شوية .. گتله بعد مااگدر لاتجبرنـي .

وصلنا البيتنا .. شفت نسوان هواي جايات يعزن .. واقاربنا كلها هنا ..
اول مادخلت .. گلتلها يووووم ماخلونـي اروح الفاتحته ..
هنا انصب عزا عليه ..
اتصلي ع الملـة خلي تجي ..

سويت فاتحة ولطم اله .. والناس تجي تعزي وتروح واني بعالم ثاني .. اولادي ماادري بيهم ..
عايشـة بخيالي وي قيس ..
اتخيله يدخل عليه بأي وقت من الباب ..

اجو صديقاتـي بوسوني وسلموا عليه وثلاث ايام همة وياي بس ماحسيت بوجود احد ..
كل الناس والعالم ماتغنيني عن لحظة وحده وي قيس ..
مرات يجيبون مسره بحظني لان تبجي ..
من اشوفها اتذكر قيس واخذها الحضني وابقى ابجي ..

مرت هاي الايام مثل الصاعقة عليه .. من غير التحقيق والمحاكم ..
ضرغـام گال گولي ماشفتهم وهو فعلا ملثمين ماشفت شي منهم ..
گال الي گدروا يقتلون سيارتين ماتفرق عندهم اذا قتلوج انتي واولادج ..
ساعتها تمنيت يقتلونـي . بس خف ع اولادي مااتحمل بعد مصيبة فوگ مصيبة قيس ..

ذكرت احد القضايا الي قيس لازمهم همه مهدديه .. بس ماذكرت منو ..
مو خوف .. بالعكس امنيتي اموت واروح وياه .. بس اعرفهم راح يطلعون منها مثل الشعره من العجينه والخاسر الوحيد اني واولادي او اهلي ..

مر اسبوع .. لميت ملابسـي وغراضي ..
گلتلها يوم راح ارجع البيتـي ..

ماما .. ياامي شلون ترجعين هناك وحدج والمنطقه هناك تختلف .. مو مثل مناطقنا شعبيه وناس تطل ع ناس ..
هناك لو تموتين وتنقتلين محد يطلعلج ..

حور .. يعنـي شتردين يوووم ابقى هنا واضل للمذلـة اني وولدي .. وبعدين هناك ريحة قيس وذكرياتـي وياه مستحيل اتركة ..

ماما.. ياامي انتي تعرفين باجر عگبه يجون ولدة يطالبون بالبيت ويطلعوج منه .. وهذا ابنه الجبير شراني ومايخاف الله منو يگول ينطيج حقوقج ..

تذكرت قيس من جاب كاتب العدل وسجل البيت بأسمي .
نزلت دموعـي .. يروحـي تگول گلبه حاس .. وراد يضمن مستقبلنا ..
اخذت نفس قوي وگلتلها البيت بأسمي ..

حسيت اكو صوت شهگة ..
ايمان .. عليج الله مسجل هذارالقصر بأسمج .. بعد عليمن تبجين ضامنه نفسج وماطلعتـي خسرانه ..

غمضت عيونـي وحاولت اتحكم بأعصابـي ماگدرت ..
گلتلها .. انتي من اي طينـة ماتگليلي .. وج كلشي عندج فلوس وضمان . لابگلبج حب ولارحمه ..
وج مستعده اگعد ع حصيرة بس كون قيس يرجع ..
عبالج كل الناس مثلج تبيع زوجها واولادها عمود حصة بيت ..

ايمان .. عاذرتج هالماارد عليج .. بس احسبي حساب هذا البيت نصه الي يعني ماتگدرين تحجين وياي ..

حور .. اسمعي وج اني مو حور القديمـة . اني هسا مرت قيس .. الي علمتي ماارضخ ولاانذل ..
حصتج اخذتيها من الحديقه والطابق الفوگ .
الجوه حصة ماما كلها يعني حصتنا .
اذا اشوفج جوه منا وجاي واني عند اهلي ماتلومين الا نفسج .
وحق الحق ابيع حصتنا واخذ ماما يمي .. واريد اشوف حصتج شنو تجيب مشتمل ..
هي اصفر وجهها وتركتنـي وراحت ..
يمكن قهر الدنيا طلعته بيها بذاك اليوم ..

ماما .. حور اهدي . اولادج صايرين يخافون من ردة فعلج .. اتحكمي بعصبيتج ياامي ..

حور .. ماما كافي خلصت عمري بالذل .. وماصدگت لگيت واحد يحبنـي وسند الي .. بس مااتهنيت وياه .
ماكملت سنتين وياه تركنـي وراح ..
ليش الزين يروح دايما .. والشين باقي .. ليش محمد عايش حياتة وهو ظلمني وكسرنـي ..
وقيس يروح ليش ..

ماما .. استغفري ربج ياامي كل شخص يموت بيومه . ماكو واحد يموت بمكان الثاني ..
وزوجج ياامي راح شهيد بالجنه ان شاء الله.
والله يجازيه بالاخرة ..

مسحت دموعـي .. گلتلها ماما اني راح اروح ترحين وياي لو لا ..

ماما .. اي گايمـة بس احظر ملابسي واتصلي ع فرح تروح ويانا ..

حور .. البنيه حامل وتعبت وياي هاي الفترة خطيه اتركيها ..
ماما .. هي گالت .. اني راح اتصل بيها ..

رجعت البيتـي واني اتذكر شلون من كنت اروح وارجع بفرح .. والدنيا ماسايعتنـي وهو يسوق ولازم ايدي ..

وصلت للبيت . اظلم باهت .. وعبالك الحيطان حزنانه ع راعيها ..
الحمايه ولا واحد .. بعد شعندهم باقين وقيس ماكو ..
اجه ببالي ماجد ماعرفت اخبارة عاش او لا ..

فتحت الباب ودخلت ..
الحديقه متربه وممنظفـة .. وهو كان مهتم بيها..
ودايما يطلع الفلاح يرتبها ..

اديه ورجلـي يرجفن ومابودي ادخل ..
شلون ادخل ومااشوفـة ولااسمع ضحكته وصوته ..

مسرة كانت عند ماما .. مااگدر اشيلها لان ايدي لسا تأذيني ..
#بقلمي_الكاتبه_شمس
.............................. ..
فتحت باب المطبخ ..
دخلت واحس روحي ببيت مهجور وبارد .. رغم الحر احسـة بارد حيل ..

رجليه تمشي وعيونـي تراقب .. ادوره بالاماكن الي تعود يگعد بيها ..

اسمع صوتـة .. حور تعاي حبيبتي هنا يمي .. ويأشر ع حضنـة ..
فتحت المكتب ..باوعت للكرسي مالتة وحسيته گاعد ويبتسم الي ..
ضحكتله وتقدمت ..

صاحت ماما .. حور ياامي گولي يالله لاتسوين بروحج هيج ..
وعيت ع حالي ..
گلتلهم يلـة ماما روحوا الغرفتكم رتبوا ملابسكم ..
بدت ماما تمسح الغبار الي ع الطاولات والكاونتر والقنفات ..

اخذت مسره لان جوعانه ونعست ..
صعدت الغرفـة .. شفت تراكة مصفط ع السرير .. من طبعه من ينزع ملابسه يرتبهن ..

رضعتها ونيمتها ..
اجيت للتراك ..
سحبتـة وشميته ريحته .. اااااه يبعد عمري . اشتاقيت الهاي الريحـة .. همزين مامغسول هالتراك وباقيه ريحتك بي ..

سحبتـة وخليته جوه خدي ونمت بمكانه ..
تخيلت قيس نايم واني بحظنه ..
صارت عيونـي ع صورنا مال زواج ..
وابتسم الهن .. الى ان غفيت ..

فزيت ع صوت ينادي حور .. گومي حبيبتي جوعان . مامتغدي لسا جعت .. يلـة حبيبتي سويلي غدا ..
گمت امشي ع الصوت وابجي ..

اي حبيبي وينك هسا اسويلك ادري بيك تعبان من الدوام وحتى مالحكنا نتغدا . اخذوك مني وانت جوعان .

لا حوريتـي اني منتضرج مااروح يمج بس سويلي غدا من ايدج جوعان ..

نزلت اركض وادور الصوت .. فتحت الابواب كلها وماكو ..
دااسمع صوتـة وهو مموجود ..
لزمتني فرح .. شبيج حور اصحي حور اصحي شبيج .
حسيت بضربه قويـة ع خدي . صحيت ..

شفت حور وضرغام .. بجيت .. قيس جوعان .. جوعان ماما ..

خلونـي اسويله ثواب . واوزعـة . اكو جامع قريب علينا هنا اوديه اريد ياكل جوعان ..

ماما .. اتركي اني اطبخله ماتگدرين ..
حور .. لا هو طلب مني . اعرفـة يحب مطبگ السمج اسويله مطبگ ..
اكو سمج بالمجمدة هو جايب هواي لان يحبه . طلعيه فرح خلي نسوي ..

بيومها طبخنا ثواب رغم ايد وحدة بس قاومت وطبخت .
وبعدين گعدنا نقرأ قرآن ونصلي .
ضرغام .. اني راح اخذ الثواب للجامع واجي ..

طلع ضرغام .. وانشغلت فرح ترتب المطبخ هي وماما ..

اني خليت الشال ع راسي .. واقرأله قران حتى اهدء واكمله كم ختمة للاربعين مالته ..

حسيت الباب انفتحت .. وشفت شخص واگف گبالي طفرت من مكاني لفيت شالي بسرعه .
وفرح دخلت لجوه لان ملابسه حجاب ..

بقيت صافنه بوجهه هذا شجابه ..
امجد .. ها يفگر .. الظاهر ماصدگتي ابوي راح وكوشتي ع البيت ..
الاحسن تلمين هدومج والزبايل الي وياج ..
وتولين منا .. قبل مااشمركم بيدي ..

خليت فاصلـة للورقه الي دا اقرأ بيها .. وغلقت القرآن .
وتقدمت اله ..
واني احجي بداخلي (حور انتي مرت قيس لاتخلين واحد يذلج ويستغلج بغيابه .. علمج ع القوه والارادة لاتخليهم يخفوج ويتحكمون بيج )

گتلـة .. الاحسن انت الي تطلع من بيتـي قبل مااتصرف وياك غير تصرف ..

ضحك ضحكـة طويله .. هههههههههههههه بيتج منين اجة.
#بقلمـي_الكاتبة_شمس
يتبع... ..
............... . . ............................ ..
احبتي اتاخرت بالبارت ..
لان ماردت اخليكم تضوجون اكثر ردت انطيكم استراحة .

طبعا الكل طلب مني انهيها .. بس مااگدر انهي الي بديته هذي حياة حور .. انتو شفتوا جانبها الضعيف وي محمد .. والجانب العاطفي وي قيس ..
وصار لازم تشوفون . جانبها القوي وشلون گدرت تحافظ ع اولادها وتوگف بوجه كل من ظلمها ..

تحياتي الحور ..
ولمصممة الفيديوهات الي رافقتنا مع رواية حليب اسود
احب اشكرها واتمنـى تتابعوها .. R--o--n--a--k