رواية حليب اسود الفصل الثامن 8 - بقلم الكاتبة شمس السعدي

بارت مفاجئ لعيون السهرانين 🌹
///// البارت الثامن /////
  #حلـــيـب_أســـود
  #الكــاتبة_شـمــس

انا حواء..ولست كأي النساء
متمرده عنيدة مستبدة. .
انا دنيا الله. .
في الأرض والسماء...
انا تلك المخيفه وبنفس الوقت حنونه.
.انا القاسية الطيبه. .
انا الرعد والبرق والمطر.
..والبرد والشتاء. ..
والدفء..
والفصول الاربعـة ..
أن أردت انت ..
أو..انا اشاء. .
انا لست كأي النساء.
.انا حواء بمافيها. .
من غرور وكبرياء ...
لن تستطيع كسري وهزيمتـي ..
فإنا لست كأي النساء ..
متمرده عنيدة مستبدة بكبرياء
وبصمتي اخرست أفواه
البحار وعويل البكاء. ..
فأنا حواء ولست كأي حواء
فأنا لست كأي النساء ....

دخلت للبيت مخنوگة من تصرفاته وكلامه الجاف وياي ..
وقررت ارجع حور الي كلها حيويه وقوه ..
حور الي من كنت صغيره محد يگدر يتقربلي ..
اي احد يضوجني اخذ حقي بإيدي ..
مرات بابا يضحك يگول اني مااخاف عليج .
لان تاخذين حقج ثالث ومثلث ..
وراح ارجع حور القديمـة .
لأن الطيبـة ماتنفع وي هيج بشر ..
هذا قانون الحياة . القوي ياكل الضعيف .
واني لازم اصير قويه واوگف ع رجلي ..
حتى اگدر ارجع اولادي الحظني ..

ماما .. لاتنقهرين يوم يمرن الايام بسرعه وتجي الجمعه وماتحسيهم الا بحظنج .
حور .. صحيح ماما بس اني لازم اشوف شغل او اي شي يخليني التهي بهذي الايام وماافكر واتعذب .
وهم اگدر اكون مستقبلي ومستقبلهم ..

لليل اتصلت بفرح ..
ردت .. هلو حور شلونج اليوم
-الحمد لله فروحـة احسن . اگلج فرح شسوه ضرغـام ع الشغل . اشو مارجعتيلي جواب .
-اوووه انشغلنا بيج بذيج الفتره ونسيت .. ضرغـام شگد توسطلج وبالگوه لگالج شغل ع الحاسبه لان تدرين همه شغلهم بالوزاره يختلف وصعب . بس لان انتي لغات وتعرفين بالحاسبه وهمه محتاجيج قبلوا .
بس مو دائمي بعقد ..
حور .. عادي المهم اشتغل وافيد نفسي وشويه شويه على مااثبت .
فرح .. زين لعد انتي حظري وثيقتج ومستمسكاتج كلها وباجر اخلي ضرغام يمرلج ..
حور .. ينطيه العافيه الضرغام هواي تعب وياي ..
فرح .. غير ابن عمج واخوج شنو هالحجي .
حور .. اوووف فرح اخوي ماوگفلي بگده .
فرح .. لاتگولين هيج . زياد هذا طبعه من زمان .لان بابا دللنا هواي وهو الكبير تحمل كلشي وبابا ضغط عليه .
فحس بتفرقه .. والا هو زين . وشنريد منه يمعوده خليه اسمه اخ النا ..
حور .. لاشريد منه عساه طيب الولده وبيته .. صدگ فرح المحامي شسوه ع الحاظر والغايب مالي وفلوسي .
فرح .. رفع قضيه عليه . لان هذا محمد يماطل واليوم وباجر ويأجل ..
حور .. ادري بي نذل . وهسا يگول ماعندي لان حظرته خلصهن ع الزواج .
فرح .. والله نطلعهن من عيونه .
حور .. يله حبيبتي ع راحتج . وباجر الصبح انتظر ضرغام
فرح . . ان شاء الله بس اذا تحسين نفسج مالج خلگ اجليها .
حور .. لايمعوده اني اريد اطلع من الي اني بي ..

ثانـي يوم ..
بدلت طبعا رجعت سافرة بلا عبايه اسلاميه الي جبرني بيها محمد ..
لبست قميص وتنوره ولفيت الشال ورتبت وجهي .
واجه ضرغام اخذني ..

وصلنا للوزارة ..
وكنت متوترة حيل . وضرغـام يمشي ويوصي . خليج قويه وهنا اشكال تشوفين لاتنطين مجال ولاتطوخين بعلاقاتج . ووووووو..
وترني اكثر مما اني متوتره ..

وصلنا يم ولد هيج يطلع بنهايه الثلاثين عمره ..
گال ابو علي هاي الامانه مااوصيك . وهاي اوراقها دخلها للوزير وگله من طرفك وثقه  .

الولد .. تدلل سيدي بالخدمـة ..
دخل الولد المكتب الوزير .. اتأخر يله اجـة واني منتضره
ومنصيه راسي من التوتر .وحتى من اباوع ماانتبه من الخوف.. 
مو بسهوله احد يدخل للوزير بس المعارف والي الهم رتبه معينه ..
كانت اكو مكتب خاص ومساعد الوزير او مدير مكتبه .
هو الي يدير الشؤون والاوراق من يمه ..
واحنة منتضرين بغرفـة الانتضار ..

من طلع الولد گال . مدير المكتب يريدج ادخلي ..
دخلت كان رجال كبير متوسط ..
گال اسمج وعنوانج .
انطيتهيا . گال خريجه شنو .
گتله لغات .
گال تعرفين بالحاسبه ..
گتله بلي داخله دوره حاسابات ..
گال جيد .. احنه راح نخليج تحت اختبار .
واذا عجبنا شغلج تستمرين .
راح تبقين هنا بالسكرتاريه يم قصي ابو علي .
وهو يعلمج ع الشغل ..
اي خطأ محسوب عليج لهذا كوني حذره .
اني مااشغل اي شخص .
بس لان من طرف قصي ووصى بيج .
وهو من زمان ويانا .
بيضي وجهه .
گتله .. ان شاء الله. 
گال… لا مبين عليج خوش بنيه وشاطره . يله تفضلي .
وباجر تعالي .
بين ماادخل اوراقج للوزير ونسويلج عقد عمل .

طلعت من المكتب ولاقطرة دم بيه ..
گال ابو علي ..
ها بشري ..
اخذت نفس وگتله گال من باجر داومي .
قصي .. ها بالخير . بس باجر تعاي من وكت وراح اخليلج مكتب يمي هنا وحاسبه وارتبلج الوضع اليوم ..

اجـة ضرغام ..
گال قبلوج مو ويضحك .
گتله شمدريك اتصل عليك الولد ..
گال .. دمشي يامحظوظه وكل هذا وتگولين ماعندي حظ خلصتي من النذل محمد وتعينتي بهيج مكان حساس .
بعد شتردين .

باوعتله بحسرة .. اريد اولادي ..
ضرغـام .. وذولي نحصلهم ان شاء الله بس تستلمين راتب وتوگفين ع حيلج ..
حور .. ان شاء الله..

گال راح اركبج تكسي .. لان دوامي ومااگدر اطلع ..
حور .. لاعادي تسلم ماقصرت اني هم عندي شغل بالسوگ ومناك اروح للبيت ..

ركبني تكسي ودفع الكروه . رحت للسوگ . اشتريت ملابس جدد وشالات وجنط واحذيه ..
#بقلمي_الكاتبة_شمس
………………….. ... .………… ..
اتصلت ع فرح .. گلتلها اريدج تاخذيني المركز تجميل ارتب وجهي .
فرح .. اي عيني هيج صيري . اخذ الهذا المركز يطلعج فد شي ..
حور .. بس كون مو غالي ماعندي هواي فلوس .
فرح .. مايهمج بالفلوس روحي ومعليج ..
من الدوام وامرلج للبيت حتى اخلي البنات يم ماما ..
حور .. اوك منتضرتج ..

رجعت للبيت بين ماصبينا غدا وحضرته ..
اجت فرح وبناتها .
تغدينا وكملنا .. رحنا اني وياها ..
اخذتني المركز راقي حيل ..

باوعت الوجهي گالت تعبان ويرادله كذا جلسه .
بس راح اسري تنضيف وتقشير .
وشمع الوجهج وارتب حواجبج .
وبوتوكس الوجهج من جانب العين اگو تجاعيد خفيفه .
رغم صغر سني بس القهر والبجي كبروني ..

گالتلها فرح .. سوي كل الي تشوفيه يغيرها . ومعليج بيها ..
من الظهر لليل همه يشغلون بيه .
عبالك كنت بكهف معتزله ..
اول مره اشوف هيج شي ..
لان كنت بعازه الفلس .. فيادوب الحگ مصرف البيت .
ماعندي امكانيه اروح صالون .
حتى شعري كنت اصبغه بالبيت ..

بعد الشمع والتنضيف سوتلي بوتوكس ..
احس وجهي خدر ..
وكنت خايفه لان ابر ..
سوتلي حواجبي ولان خفيفات حيل وشگر ممبينات ..
سوتهن ثري دي .. طلعن حلوات .

والمحصله النهائية .. احس نفسي غير .
اباوع الشكلي واضحك ..
مااگدر اسد حلگي من الضحك ..
معقوله هاي اني لامستحيل .

گالت فرح .. هاي الضحكه الي كنت منتضرتها .
گلتلها تكمل بس اولادي يرجعون الحظني ..
گالت ان شاء الله.

الكوافيره الي بالمركز .
گالت تعالي يوم ارتبلج شعرج .
گلتلها ان شاء الله
بس اريد انهزم .
دفعت الفلوس الي عندي الي مخليتهم فرح عند ماما .
وفرح انطت منها .
حسيت بخجل من ناحيه فروحه تشتغل وتتعب واني اخذتهم ع الجاهز .
بس ان شاء الله من يصير عندي راتب واستقر ارجع كل الي صرفته .

اجه ضرغام اخذنا ..
من شافني حس بتغير . گال طلعتي حوريه صدگ
احس روحي صغرت ..
اباوع بمرايه السياره .
صارت عندي خدود . وحواجبي مرفوعات .
وبياضي رجع ..

ضحك صرغام گال .. حلوه والله حلوه .
اشلون اخلع المرايه من مكانها وانطيجياها ..

ههههههه ضحكنا اني وفرح .

فعلا اذا الانسان غير بشكله تصير عنده ثقه وراحه نفسيه وهذي البدايه بعون الله ..
لازم اجتهد واكون نفسي حتى اصير الافضل .

رجعنا للبيت . ماما گامت تصلي ع النبي .
ايمان تعجبت . وگالت ولاعرفتج . المره الثانيه اخذني وياجن الهذا المركز .
مو زياد ..

زياد .. ان شاء الله.  بس حور مو معناها تداومين تلعبين بخلقتج هناك اغلبيتها ولد وكباريه مالي خلگ بلوه جديده

ضرغـام . شبيك طيرت فرحتها . اولا اني يمها وثانيا الي تحافظ ع نفسها لو تخليها بنص مليون تبقى محافظه ع نفسها ومحد يدوسلها ع طرف ..

زياد من يحجي ضرغـام يسكت . لان هو الي ساعده بوضيفته . ودايما ينطيه من يحتاج .
لان ضرغـام عنده علاقات ومركزه زين بالوزاره .

طلعت ملابسي شوفتهن الفرح تعجبت بيهن ..
كانت كلها ملابس مستوره ورسميه تنانير وستر وقمصان ولان اني طويله . فأختاريت احذيه كعب صغير .

الفرحه بشغلي وشكلي خلتني اشتاق الولد ..
واريد اسأل عليهم او احجي وياهم بس شلون .
فتحت الحظر ع محمد .
بعدين تراجعت ..
اولا مااريد اسمع صوته ..
وثانيا .. لايفكر بيه بغير تفكير سواء هو او زوجته ..
اخذت ملابسهم الحظني ونمت ..

دگ المنبه من الصبح .. گعدت سبحت وبدلت .
رتبت وجهي وخليت شي خفيف ..
بس طلعت حيل حلوه وانيقه .. احس رجعتلي حيويتي ونشاطي بأيام الجامعه ..

اجه ضرغـام اخذني خطيه ابتلى بيه..  لان ماجان عندي خط . بس استلم راتب .. اشوف مجموعه موضفات واروح وارجع وياهم . او حتى بس اعرف الطريق وموقف السيارت واتعود ..

وصلنا كان ضرغـام يداوم عسكري مو مدنـي ..
فالكل تسلم عليه ..
واني وياه احس العيون كلها عليه اخجل ودايما امشي وياه منصيه راسي ..
هو خطواته سريعه واني مااعرف امشي سريع احس روحي دا اركض ..

كل واحد راح الشغله ..
صعدت اني للمكتب .. لگيت استاذ قصي هناك ..
گلت صبـاح الخير ..
گال صـباح وسكت . ضحك وكمل حجايته .
حسيته حس بالتغيير..
شگد عيب هسا شيگول البارحة شكل واليوم شكل ..

مخليلي مكتب صغير وكرسي وعليه حاسبه واقلام واوراق ..
گمت مسحت الطاوله .. ورتب الغراض حسب ذوقي ..
محتاجه سويه تعديلات باجر اجيبهن ..

علمني ع الشغل .. وشلون ادخل كل الامور المهمه بالحاسبه ..
ساعه يعلمني وساعه يلتهي بالشغل .
بس اني كنت سريعه الفهم ماتعبته ..
بدأ ينطيني شغل ويگلي سويه گدامي ..

وفعلا سويته .. وگال جيد من هسا ريحتيني سريعه الفهم وذكيه مبين عليج ..
طبعا اني من اول يوم خليت حدود بينا . لان هو مبين ضحوك صحيح متزوج وعنده اولاد ..
بس لازم اخلي حدود للزماله .. واكيد الناس بس يعرفون اني مطلقه راح يلفقون اقاويل ..
طبعا هذا كلام زياد .. وشفته منطقي ..
لان مجتمعنا عندهم المطلقه خط احمر ويراقبون تصرفاتها اكثر من البنت العزباء ..

لكن كلام الناس اخر همي .. المهم نفسي وشغلي وبس
ولو ماضرغـام وياي وخاف يسمع حجايه وينحرج مااهتم الاي شي ..

مرت ساعات الدوام بسرعه ومن غير مااحس بالوقت .
كنت مستمتعه بشغلي ..
مثل اول يوم دوام الي بالجامعه ..
#بقلمي_الكاتبة_شمس
………………………………………………
كملنا دوام .. طبعا الوزير يطلع من وقت قبل الموضفين .واحنه بعدين نكمل شغلنا ونطلع ..

اجه ضرغـام اخذني وطلعنا .. وكان كل الي يسأله عليه .
يگلهم اختي ..

يرجعني للبيت ويرجع البيتهم خطيه ..
اتغدا وانام للعصر اگوم اسوي عشا وتنضيف وكذا حتى مااخلي احد يحجي عليه ..
اسهر وي ماما شويه وانام ..
للصبح اجه ضرغـام اخذني ..
گتله محتاجه كم شغله من الماركت .
نزلت جبت تحفيه حلوه وراقيه . وعلبة كلينكس .
وحاملة اقلام حلوه ..

ضرغام يضحك عليه من اشتريتهن . اول ماوصلت
رتبتهن ع الطاوله ..

واستاذ قصي .. گال خجلتيني شوفي النزاكة خو مو مكتبي هوسه وشحاله ..

شغلت الغلايه وخليت بيها بمي وجاي وصبيت الي والاستاذ قصي .
شربنا جاينا وبدينا بالشغل ..

اتعودت ع الشغل بسهوله ومرتاحه حيل ..
الي بالمكتب كلهم يحترموني ويقدروني لان اني محترمتهم واتعامل بحدود وياهم ..

خلص الاسبوع وصار يوم الجمعه يوم لقائي بروحي وفلذات اكبادي ..
گعدت من الصبح وماتريگت علمودهم .
حتى نتريگ سوه ..

اندگ الجرس . لبست شالي وطلعت .
اول مافتحت الباب حضنوني وبوسوني ..
ابوهم جاب جنطهم واجه .
اول ماشافني صفن بوجهي .
اني تعمدت رتبت وجهي ولابسه گلبه وردي فاتح ..
ردت احسسه انه بغيابه مرتاحة مو مثل مايضن هو ..

من صدمته مانطق اي شي .
بس سلم واخذت الجنط منه .
ودخلت ولدي وهملته . طبگت الباب وهو بعده واگف .
كانت ذيج اللحظه بمثباة انتصار الي ..
#بقلمي_الكاتبة_شمس
يتبع ..
……… .،………………………
حبايب تفاعلوا وصوتوا اكثر . حتى يصير واهس اكتبلكم اكثر .. مااعرف ليش احس حماسكم بهذي القصه قليل ودا تطيرون واهسي وحماسي ..
احبكم لاتخذلوني صوتوا 🌹