رواية حليب اسود الفصل الثاني 2 - بقلم الكاتبة شمس السعدي

هـلا وغـلا حباااايـب قلبـي 🌹
///// البارت الثانـي /////
  #حلـــيـب_أســـود
  #الكــاتبة_شـمــس

أنـا حـواء يـاادم خـلقت مـن ضـلعك ..
لاكـون انثـاك !!
وسـميت حـواء لاني احـتويك ..
بقلبي وعقلي ولا انسـاك ..
انـا اليك وخـلقت من ضـلعك ..
ومن محبه عيناك...
أنا لسـت جـارية قصرك المزعوم
أنا لسـت عبدا وأنت المعبود
يكفي كذبـك الملـعون
واسـفاااه على قلبي
سلمتـك إياه ..
نسـيت أنـك من نسل آدم ..
وان الغدر والخيانـة من طباعـك ..
ماذا تـريد بعـد ??
لقد جعلتنـي دمية بلهاء ..
بيـن يديـك ..
عذرا ياسـيدي ..
فأنا من البشر .. ولست جاريـة
أنا حواء .. يـا آدم !!
أنا حبك الموعود .. الـذي غـدرت به.

واكـفة مقابيل المراية ..
وأباوع النفسي ..
گلبيتي الي لابستها .
شعـري الي ملفوف دائما ..
لو وجهي التعـبان . حتى مااتذكـر شوكت خليت ماسك او مرطب أخر مرة ..
انتي يمته صرتـي هيج حور ..
معقوله الزواج والمسؤوليه اهم من نفسـج ..
انتـي الي كنتي تلبسين ع المـوديل.
ومعتنيـة بأناقتـج ..
باوعت الاضافـري .. تعبانات وايـدي من الغسل والجلف صايـر بيـهن سـواد..

معقولـة بتسـع سـنوات هيج تغيـرت ..
يعنـي محمد نفـس شكـلة من يـوم الي اخذتـة .
وانـي كبـرت وتبهذلت..
شلون هيـج البيت والجهال ..
خلـوني انسى نفسـي وزوجـي ..
يعني انـي الـي ضيـعت محمـد منـي ..

كنت احـاول بأي طريـقه ابـرر الـي سـواه ..
بـس لا مـاكو شـي يـبرر الخيـانة ..
محمـد بدل مايحجي وياي ويگلي الاشياء الي ضايج مني بيها ..
جان مصار الي صار ..

دخل صفـاوي . ماما جوعانين ..
اووووف نسـيـت اولادي بلا اكـل .
مسحـت دموعي وگمت للمطبخ ..
طلعت الي بالفرن لگيتهن محترگات من جوة..
رحـت سويت اثنين جدد بـس الهم ..
وخليـتهن بالفـرن ..

بقيـت واگفه بالمطبـخ وكـلام محمد بأذنـي ..
ودموعـي ينزلن لااراديـا ..
معقولـة هانـت علـيه العشرة .
معقولـة راح يلمس وحـدة غيـري وتنـام بحظنة ..
الحظن الي نسيت شوكـت اخر مرة حظنـي ونيمنـي بي .
ببدايـة زواجـنا .
كنت ماانام الا بحظنـة ويبقى يلعب بشعري ..
الى ان اغفـى..

يعنـي مو بـس اني الي مقصـرة ..
انـت هم ..
محمـد انـت الي نقـصت عليه هواي اشياء .
وخليتـني مااهتم ..
كنت دايما اگله حبيبي مايـوم گتله بأسمه ..
وهو من فترة طويـله ماسمعـت منه كلمـه حلـوه .
حياتـنا صـارت بـس لبــس وغدا وغشا واريد انـام ..
هذي حيـاتي ويـاه ..

طلعت البيتـزا وقطعتها الهم ..
خليتلهم اكواب كولا .
وگلتلهم اگعدوا هنـا اكـلوا ع الطاولة بالمطبـخ.

مصطفى..  وانتـي ماما متاكلـين ويـانا ..
حور .. لاماما مااشتهـي اكلوا انتوا بالعافـية ..
مرتضى .. عاشـت ايـدج ماما ..
حور .. عافيـات حبيبي .

تركـتهم ودخـلت الغرفـتي ..
طگيت بجـي ..
مااتحمـلت ..
طلعـت صـور زواجـي .
واشـوف نفسي شلون كنت ووين صرت ..

گمت من مكاني ..
لا حور لاتستسلمين .
گومي ..
لازم ترجعين محمد الج .
لازم ماتضعفين وغيرج تاخذة ع الجاهز ..

دخلت للحمام سبـحت ..
لبسـت ثوب طويل شيفون ..
ونزلت شعري ..
خليـت مكيـاج خفيف ..
عطـرت الغرفـة ورتبتها ..

فرشـت الجهالي ونومتهم من وكـت .
رتبـت المطبخ..
ورجعت للغرفـة تعطـرت .
وگعدت اگلب بالموبايل ..

صـارت ساعة.. 12 ونـص ..
وهو ماكـو ..
بقـيت انتضـر الى ان غفيـت وماادري بنفسـي .
صحيـت ع صـوت باب الغرفـة انفتـح ..

باوعـت محمد دخل ..
والنهار طالع ..
من غير مايحجي ..
طـلع ملابسـة من الكنتـور ..
وعبالك هو الي زعلان مو انـي ..

حور .. انتضرتك بالليل مااجيت وين كنت .
محمد.. نمت عند اهلـي . ماردت تصير مشاكل ..
حور .. بس اني مرتك ومن حقي افهم . والليل كلـة گاعده ومنتـضرتك ..

باوعـلي من فوگ لجوة ..
گال حور ..
اتقبلي الوضع . گتلج ماراح ينقصج شي .
اولادج وبيتج وحياتج تبقى نفسها مراح يتغير اي شي ..

گتله .. وانت . زوجي وحبيبي وين .
اشو ماذكـرتة ..

محمد ..حوووور لاتصعبيهـا .
حور .. ليش هي سهلة ومااصعبها .. اني الي حبيتك وفضلت الكل عليك . واخذت من عمري وحياتي وشبابي حتى ارضيـك هيج تعاملـني .
هيج تجازيـني ..
لا محمد مو حور الي تنذل وتجيب ضرة عليـها ..
لو انـي لو هـي اختار ..

محمد .. اوووووووه ليش ماتجيت بالليل . ردتج تهدين وتفكرين . بس مايفيد بيج .
الي عندي گلته . ومااتراجع ..
راس الشهر اتزوج واجر شقـة يعني مو يمج ولاتشوفيـها ولاتشـوفج .
اعتبريـها ماموجودة .
لاتكبريها ..

حور .. تحجي صدگ انت . شنو اعتبرها مموجوده وانت تروحلها وتجيني .
تنام يمها وتجي تنام يمـي .
مستحيـل اگدر اتقبـل .
هي الخيـانه وحدها مااگدر اتقبـلها .
مو ادور اتعايش وي الوضع ولاكأنه شي صاير ..

محمد .. خلص بكيفج تردين مااجيج مااجي اذا تلعب نفسج . ابقي هنا وربي جهالج ..

حور .. الله ينتقم منك . خسرتني اهلي وناسي وهسا جاي تتشرط عليه وتخيرني ..
من هـاي اللحظة صـرت محرم عليـه ..
ولاگلبـي ولاعقـلي يتقبلك بعد ..
بس الله موجود وياخذلي حقي منك .

محمد .. كاااافي دعاوي وروحي كملي اولادج بسرعه اتأخرت .. ترى اعوفهم وامشي ..

اخذت دشداشة من الكنتور .
وطلعن بدلت بره فوگ ملابسي .
وگعدت جهالي .
بسرعة غسلتلهم وبدلتلهم .
وسويتلهم لفات جبن ع السريع ..
خليتلهم حلويات وفواكـه .
ماتريگوا بسبب محمد مالحگت .
بس شربتـهم حليب ..

طلع مبدل ومتعطر كالعـادة ..
گالـهم يللة للسيـارة وطلعـوا ..
اكـيد الي خطبـها ويـاه بالجـامعة .
لهذا كل يـوم يلبس ويتعطر .

اي من الجـامعه لان هو من الدوام للبـيت .
مايطلع الا العصر ويرجـع ..

بـاوعت الموبايلي . ماما متصله هواي .
وفرح هم ..
مالي خلگ اتصل .
وحتى اذا اتصلت شأگول وشأحجي ..
بيا عـين احجي وي ماما ..
#بقلمي_الكاتبة_شمس
………………………………… .
اتذكر ..
شلون من خطبنـي محمد ..
گالت يمـه مبينين ناس عينهم فارغه .
امـة شايفـة حالها وماعاجـبها العجـب .
وج يمـه لو بيت عز .. جـان ماشـافوا حالـهم .
لان شايفين ومالين تصير عيونهـم مليـانه ..

وانـي گلتلها ..
لاماما محمد غير .. مو مثلهم .
واني شعليه بأمه . اني ماخذته اله .
ومدام هو شاريني .. مالي علاقه بأهله ..

اااااه يايوم . لو سامعه كلامكم بذاك اليوم .
جان ماصار كل هذا ..
وشتفيد لو بعد الي صار ..
مالفاس وگع بالراس ..
ومحمد ظهر ع حقيقته ..

رجعت اتصلت ماما .
رديت ..
-هلو يوم
-وج شمنتضرة انتي . عاقد وگاطع مهر .
وانتي بعدج هناك ..

-ماما مااگدر جهالي ماينطيهم الي . يهددني بيهم . شلون اعوفهم ..

-وج والله حجي مايتحملهم . انتي ازعلي واتركيه وشوفي يومين ويجيبهم الج .
هو بحالهم لو بحال مكسراته ..

-ماادري ماما اني من البارحة لليوم مصدومة . ممصدگة كل هذا يطلع من محمد ..

-بنيتي همه طينتهم مبينه . بس انتي الي كنتي سادة عيونج ومتردين تشوفين حقيقته .. احفظي الي بقى بكرامتج ياامي وتعالي بيت ابوج مفتوح الج ..

-ماما زياد زعل وگال ماعندج اخو بعد شلون اجي ..

-ياامي هذا حجي . شفتي رغم ماهو ماراضي عليج من تزوجتي لسا .
بس وكت ماعرف بسوايت رجلج . اجاج يركض .

-ماادري يوم خلي اشوف طريقه اطلع بيها . لازم اجيب جهالي مستحيل اخليهم عنده ..

خلصت من ماما ..
وگلت اي حور .. انتي شمنتضرة من واحد باعج بسهوله
خلص هواي تنازلتي .
اجه الوكت الي لازم هو يتنازل .
انسان خاين ..
شأتوقع منه ..

گمت طلعت الجنط . ولملمت ملابس اولادي وكتبهم وكلشي يخصهم ..
ولملمت ملابـسي هم ..

سمعت الباب تندگ ..
سديت باب الغرفه وطلعت ..

فتحت الباب عمتي جايه ..
-گالت شلونج حور .. ودخلت للصاله .
حتى فراشات الجهال بمكانهن .

-واني اشيل بالفراشات . گلتلها شلوني عمه بعد سواية محمد ..

-الصراحة حور .. انتي السبب ماعرفتي تكسبيه . دومج بهاي لابسه دشداشه .
واذا تطلعين هي ذيج العباية الاسلاميه لازگة بيها .
ومحمد شاب ويطلع ويشوف .
والبنات اشكال يلبسن وخاصه بالجامعه ..

-باوعتلها واني محروگ گلبي . وهي جاية تتشمت بيه .

گلتلها عمه .. محمد مو صغير اكبر مني بعشر سنوات .
بس هو الي بهذلني ووصلني الهاي الحاله ..
بخيل عليه . وفلس ماينطيني ..
منين اجيب والبس واشتري .
غير كون عندي . وارتب نفسي ..
ومن اطلب منه .. يگلي ماعندي واقساط ومصرف .
وهو كل يوم لبس جديد للدوام ..

احجي حق الله عمه .. لاقصرت وياه ولا وياكم .
وبدل ماتنصحوه . وتگلوله عندك بيت ومره واثنين ولد مثل الورده ..
رحتوا خطبتوله وبسكته ومن وراي ..

تقبلين بنتج يتزوج عليها زوجها . ليش شنو الناقصني .
شو الجمال عندي والندارة عندي .
وجايبتله اثنين ولد ونضيفين ومرتبين ومتفوقين .
بعد شنو الي ناقصه .
اذا ع اللبس والتعديل . هذا كله بيده .
من بخله وكلمة ماعندي وصبري عليه .
وصلت الهاي الحاله ..

ام محمد .. هو هذا السـانج العام عـليج ..
المهم .. اذا تردين جهالج وبيتج . اگعدي واسكتي ولاتفضحينا .
محمد يگول لو تگعد وتربي جهالها . لو تحلم تشوف اضفر منهم ..

حور .. مو بكيفكم اكو قانون الي ياخذلي حقي ..

ام محمد .. يعني شنو قصدج تردين توصليها للمحاكم .
والله خوش مربايه .
بحياتنا ماشفنه مره شريفه تدخل محاكم وتوگف رجلها وتبهذلها.  مايلام من شاف غيرج طلعتي سوسة بله .

حور .. مارايحة اتونس بالمحاكم . اروح اخذ حقي وحق جهالي الي ابنج حرمنا منه طول هاي السنين واني ساكته ومتحمله تالي هيج يجازيني ..

ام محمد .. اني شعليه عشتوا الي عليه حذرتج وبقت بكيفج انتي وياه مالي شغـل ..
وتركتني وطلعت ..

گعدت دگيت ولطمت وخرمشت وجهي ع حظـي وقسمـتي الـي وصلتنـي لهنا ..

گمت اخذت غراضي واخذت مستمسكاتنا ..
انتضرت شويه حتى يهدئ الشارع ..
فتحت الباب باوعت الشارع فارغ .
وعيالي بابهم مسدود ..

رجعت لبست العبايه الاسلاميه ولفيت شالي
وطلعت على كيفي . والجنط ثگال ..
سديت الباب ..
وسحبت الجنط .
وعيني ع البيت ودموعي تجري ..

ااااه يامحمد . مااعرف ادعي عليك لو ادعي ع الوكت الي بهذلني هيج ..

وگفت براس الشارع وعيني ع شارعنا .
خاف واحد من عيالي يشوفني ..

اشرت للتكسي بي رجال جبير .
نزل ساعدني بالجنط ..
صعدت وعيوني مابطلن بجي ..
دخلت الهذا الشارع عروس وكلي امال واحلام ماتحققت وماحصلت من زواجي بس التعب .
بس كنت عميه بحب محمد .
تحملت كلشي لأجل حبة ..

السايق .. بويه مبين هموم الدنيا على جتافج . الله يساعدج ويعينج ..
بس ماادري وين تردين ..
گتله عمو . اخذني المدرسة……
بس اجيب اولادي ودور نروح المنطقة.…

-صار بويه ..

وصلنا للمدرسة ..
دخلت للمديره . گلتلها صار عدنا ضرف واريد اخذ جهالي واروح .
من شافت عيوني وارمة من البجي .
وحالتي حـالة . كسرت گلبها .

المديره .. استرحـي عيني وهسا اخلي العاملة تجيبهم
انطتني مي تشكرتها ..

شوية واجو نور عيوني ..
حظنتهم واشم بيهم . ماادري ليش خفت محمد صدگ ياخذهم مني .
اموت مااتحمل مااشوفهم ..

اعتذرت من المديرة وتشكرتها وطلعنا ..
صعدتهم بالتكسـي ..
#بقلمي_الكاتبة_شمس
……………………………………
مصطفى.. ماما وين رايحين .
حور .. البيت جدو تركي ..
مرتضى .. اييييييي يعني راح نروح يم هيبت ومهيمن .
حور .. اي ماما بس اريدكم تصيرون حبابين ومتشاغبون

وصلنا الشارع اهلي . گتله هنا نزلنا .
بيت اهلي ركن ..
نزل الرجال الجنط .
گتله ثواني هسا اجيبلك الكروه ..

اااااه ياحور حتى كروه ماعندج .
ومحمد يحاسب ع اهمالج اله ..

دخلت للبيت .. شفت امي وايمان مرت زياد ..
گلتلها يوم انطيني خمسة ..

انطتني ورحت ..
گتله هاك عمو تفضل ..
گال خليهن عليه بنيتي .
گتله ولو قليلات بس اعذرني .
گال معذوره بويه .. ربي يفتحها بوجهج ويريح بالج ..

سحبت الجنط .
گال مصطفى .. ماما شنو راح نبقى هناك .
وبابا منو يبقى يمه .

حور .. حبيبي ماما ادخل هسا وبعدين افهمك ..

دخلنا وتلگتني ماما حضنتني . واني گمت اشهگ بحظنها ااااااه شگد محتاجه هيج حظن ابجي وافرغ همي بي ..

✴ عندمـا يخذلـنا مـن نحـب .. نصـاب بخيبـة عميقـة .. خيبـة تشـعرنـا بأن كـل مـا ذرفنـاه مـن دمـع ومشاعـر كـان مضـيعة للـوقت ليس إلا ..!

ايمان .. الله يساعدج .. عفتيه يعني .?
ماما .. اي طبعا خي يولي مايستاهل اضفرها ..
حور .. مو وكتها واشرتلها ع الجهال .مااريد جهالي يسمعون كلمة محلوه عن ابوهم ..
ماما .. يله ياامي گومي بدلي الجهالج وبدلي وتعالوا اكلوا لگمة اكيد مماكله من البارحة ..
الله يجازي الي كان السبب ..

اخذت جهالي الغرفة امي . بدلتلهم ونزعت العبايه الاسلاميه ..
وطلعنا . لگيت ايمان وماما يصبن .
گعدنا ناكل ..
والجهال مكيفين وي ولد زياد .
وهنا بنت زياد بحظني . اني ابجي وهي تمسح دموعي .
شايله محنه عماتها ..

بعدني بأول لگمة دخل زياد ..
السلام عليكم ..
سلمت عليه ..
گال ذوله ليش جايبتهم ..

صفنت بوجهه . باوعت الماما ..
ماما .. ياامي مو وكت الحجي اختك تعبانه ومالها خلگ .
زياد .. من ايديها يمه . عاتدتنا واخذته . والبارحة عاندت وبقت . وضحت بروحها وبشبابها حتى ترضيه .
وهو مابي حظ ..
ودور جايبة خلفته حتى يطيحون حظها مثل ماابوهم سوه بيها ..

مااتحملت . گلتله . زياد مو گدام ولدي . مااقبل .
اذا متريدنا اني اروح الفرح .

زياد .. ايبااااه وخايف على مشاعرهم ..
ماما .. زياد مو وكته اسكت ..

هو ماعجبه الوضع . دخل الغرفته وصاح . ايمان جيبيلي غداي للغرفه ..

ماما... يله ياامي اكلي وأكلي جهالج لاتاخذين على خاطرج . بس هو ضايج علمودج .

گلتلهم اكلوا ماما ..
ونزلت دموعي .. ااااه يااابة وينك .
لو انت عايش جان فتحتلي ذرعانك الي .
من اجي واريد احتمي بيك ..

ماما .. وج يمه كافي دموع راح تموتين روحج .

اكلت لگمة وماگدرت اكمل ..
گلتلها يمه اني كلشي ولاجهالي . مااريد زياد هيج يعاملهم يقبل خوال اولاده يعاملوهم هيج ..

امي سكتت بس ايمان سمعتني من حجيت .
گالت .. حور لاتقارنين اخوج بمحمد . زياد مامقصر لاوياي ولا وي جهالة . ويحترم اخوتي ويقدرهم .
فغصب عليهم يحترموه ..

باوعتلها شأريد احجي .. حقها شماتحجي .
محمد ذلني وكسرني وماعندي لاوجه ولاالسان الي يدافع عن نفسه ..
يعني لو ابقى هنا واتحمل حجي زياد ونضرات الناس وشفقتهم .
لو ارجع لمحمد واتحمل ذله وكسرت گلبي من اشوف يروح ويجي منها . وساعتها يمكن اطگ واموت مااتحمل

فوضت امري الله . هو الي يساعدني ويصبرني على مابلاني ..

سمعت موبايلي يدگ بالجنطة .
فتحته هذا محمد ..
گلتلهم ماما روحوا الغرفه بيبي ناموا واني هسا جاية يمكم ..
اخذت الموبايل ورحت للاستقبال .
فتحت خط ..
محمد .. حور وين انتي . جهالي وين اخذتيهم رحت للمدرسه گالوا امهم ماخذتهم ..
حور .. خلص محمد اني اختاريت . بقت عندي كرامه شويه احافظ عليها احسن مماتذلني اكثر .
محمد .. لاتتحدني حور . وحق الله اندمج . وين ماكنتي هسا اذا ارجع وماالگاج بالبيت ماتلومين الا نفسج .
حور .. هههههه والك عين وتهدد بعد الي سويته .
محمد .. هذا الحجي عوفيه على جهه اني ماغلطت بشي . لازنيت ولا بالحرام .
وگتلج تبقين بالبيت انتي وجهالج ومصرفج جاري بعد شتردين اكثر..
حور .. انت مستحيل تكون محمد الي حبيته . انت واحد ثاني .
محمد .. حور لو ترجعين انتي والجهال . لو اجي اخذهم واحرمج منهم اختاري ولاتخطين خطوه تندمين عليها ..
سد الموبايل بوجهي ..

دخلت امي . گالت شيگول .
حور .. يوووم يهدد لو ارجع لو ياخذ الجهال شأسوي .
ماما .. معليج هذا بس صوت . مايسوي شي .
اني احجي وي اخوج يشوفله صرفه ..
وگومي هسا ارتاحي ونامي يم جهالج .

رحت لگيتهم مخلين التاب مال هيبت يلعبون بي .
فرشتلهم بالگاع .
وگلتلهم تعالوا بحظني ماما ..
خليت واحد منا وواحد منا . وحظنتهم..
گمت اشم بيهم . وخايفه لااخسرهم .
بس مامعقوله محمد توصل بي النذاله لدرجة انه يحرمني من اولادي ..

غفيت شوية وحلمت ..
ببيتنا اني ومحمد . مخسوف بينا واني كلما جايني اوگع اكثر بالحفره .
وامد ايدي لمحمد اريده يطلعني .
بس محمد مايحرك ساكن وبس يباوعلي ..
واولادي يبجون ويردوني .
وهو يسحب بيهم ..
فزيت واني ابجي ..
باوعت جهالي يمي .
احس روحي اختنگت .
ااااه يمحمد حتى بحلمي ماراحمني ..

خليت جهالي نايمين .
وطلعت ..
شفت ماما تحظر بعجين الكبه .
گالت فرح راح تجي تشوفج .
من گلتلها تخبلت .

ماحجيت گمت اكتفي بالسكوت افضل ..
شويه ودخلت فرح وبناتها ..
بوستني وگالت خلي يولي هو الخسران .
اباوعلها .
هي اكبر مني . بس هسا يله انتبهت عليها .
الي يشوفها يگول هي اصغر ..
ليش اني هذا حالي .
شسويت بروحي اني .
عود اني تزوجت عن حب .
وهي انجبرت تتزوج ضرغام ابن عمي .
وماجانت تحبه .
بس هو مدللها. دلال .
حتى ذهب اشكال لابسه ..
هو يشتغل بالوزارة. ورحمة من الله .
باوعت الايدي ..
بس الحلقه باقيه .
يعني ثمرت زواجي حلقه ب 200 الف .

بعدين استغفرت ربي . وگلت الحمد لله عندي نعمه الكل يحلم بيها .
اولادي هم ثروتي من الدنيا ..

گطعت افكاري فرح .
گالت .. حور معقوله ماحسيتي عليه . ماشفتيه يخابر او يراسل . ترى المرة تحس ..
حور .. الا حور الغبيه ماتحس . كنت عميه بحبه ومااشوف اخطائه .
احسه ملاك ومايخطأ .
هو يلبس ويرتب من اول يوم شفته يعني مو جديده عليه واذا ع الاتصالات والرسائل .
فهو نص النهار يمها بالجامعه بعد شيسوي بالاتصالات .

ماما .. يعني تعرفيها..
حور .. لا منين . بس هي واضحة لايطلع ولايمشي .
والعصر يطلع شويه ويرجع .
يعني اكيد من الجامعه . لو طالبه وضحك عليها مثلي .
لو موضفه ..

فرح .. الله لينطيه ولايفرح گلبه مثل مابهذلج وكسرج هيج ..
#بقلمي_الكاتبة_شمس
…………………………..
طلع زياد من الغرفه ..
هلو فروحة شلونج وبوسها ..
باوعت شلون يسلم عليها بلهفة .
ضجت بداخلي .
من الي تزوجت ماسمعت كلمة هلا من السانه .
الاخ مهما خطأت اخته سنه سنتين ينسى .
الا اخوي تسع سنين هو كلما يشوفني يذكرني بأختياراتي الخاطئة

باوعلي .. گال انتي شناويه تتطلگين لو يومين وترجعين
حور .. اني مااريده بعد ولاارجعله . بسس .
زياد .. بسيش ولج بعدج تحنين لو ماتگدرين بلايه رجل
صفنت بوجهه ودموعي تجري .
سحبته فرح واخذته .
باوعت الماما وايمان واگفه ..
اني ماقصدت شي .
ردت اگله بس وجهالي شلون اخاف ياخذهم .
ليش عبالكم لسا بعدني احن واحب محمد .
محمد من يوم الي باعني شلته من گلبي بس مقهوره وابجي ع شبابي الي راح وياه ..
ابجي ع تعبي ومستقبلي الي ضاع بسببه .
وهمي اولادي .
خلي يتزوج ويطلگ وين ميروح يروح . بس جهالي لاياخذهم .
اتهسترت ..يوم اخاف ياخذهم مني اموت والله اموت.
لزمتني ايمان تهدأ بيه .
واجت فرح تركض حضنتني
وتگلي . لاتبجين الله ياخذج حقج منه ان شاء الله.
زياد .. كافي اسكتي .
جهالج يباوعولج وخايفين .
باوعتلهم واكفين يم باب الغرفه .
مسحت دموعي واشرتلهم ..
او حضنوني ..
كلشي يهون اذا انتو وياي يبعد روحي انتو ..

مهمــا عصفـت بـي الدنيـا وجرحـت قلبـي .. فهناك اولادي سيكونون مرهمـا لجروحـي وشـفائا لي ..

اجة هيبت گال . بابا مرة ورجال بالباب يريدوك ..
طلع زياد ..
ورجع متفاجئ . گال اهل محمد اجو افتحوا الاستقبال ..
اني بسرعه صحت هيبت .
گتله عمه اخذهم وصعدهم الغرفتكم ولاتنزلهم ابد ..
گال صار عمه .
اخذهم واني دخلت البس شال بس گلبي احسة راح يوگف من الخوف ..
#بقلمي_الكاتبة_شمس
يتبع……….
……………………………………