حمائم تخشى الطيران الفصل الستون 60 - بقلم فاطمة العبادي

فاطمة العبادي ..

في #حمائم_تخشى_الطيران

قراءة ممتعة كيكاتي ..

وصلو البارت 1000 تعليق لطفا 🙏🤎🤎

ليلى ..

ضليت صافنة عليها وعيني ع المحبس مال سيد قيس بأيدها هذا انطانياه بيوم طلاقنا

حرب مد ايده اخذه بهدوء من ايد امه گلبه وگللها ببرود
:- هذا خاتم سيد هادي ابوه ناطي الو وليلى ضامتو ويا ذهبها شفتو مرتين منين جبتي؟

رفعلها طرف حاجبه واني فكيت عيني مصدومه
صحيح اني ضامته ويا ذهبي يعني حرب شايفة من قبل

هي ضلت تبلعم واشرت ع الميز كلتله
:- لگيتو هين والله

باوعلي رافع حاجبه وكال :- شطلعو هذا؟

رفعت اكتافي ماعرف وحجيت بهدوء :- يمكن هادي مادري والله

شمره ع الميز وكال
:- ضمي ويا غراض هادي وحاجاتو
يمه ... كالها وباوعلها بعدم رضا

:- اني مو محذر الف مرة ما تجيبو سيرة حرمتي بالشين؟ انتم ما اتوبون؟ تردوني احلف يمين اهد الوراي والعشتو وياكم كلو واضل هين لا اوصلكم ولا توصلولي؟

يحجي بهدوء بس ملامحه وصكة اسنانه تبين غير ..تبين غضبه من تصرف امه

ام حرب :- تعوفني وتعوف اهلك وناسك وعشيرتك علمود هاي؟

اشرت علي مشمئزة ..

رفع حاجبه وابتسم تك خد :- اعوف الدنيا لخاطرها تا هي تعيش مرتاحة

ابتسمت برضا وعفتهم وطلعت ضلو يحجون اسمع اصواتهم تعلى كل شوي طلعت زعلانة تشيل جنطتها وهو ضل واكف بمكانه

نترت تعال وصلني لاختك مالي ضلي هين بزر بطني يصف ويا حرمتو. علي ويطرد بيه

صاح معصب وهي يدفر الباب ويطلع
:- ما طردتچ كتلج البيت الج والعتبه النه بالمقابل تحترميني وتحترمين حرمتي غير هيج خليج بالغربية واني اجيج شوكت ما ترديني

:- هاي شنو هاي طردة

طلعت تمسح بعيونها التفتت قبل لا تطلع تفلت علي وصاحت
:- لا بارك الله بالبطن النگلتچ خربتي ابني وگلبتي علي من عساج لا تهنيتي يجي يوم وتشوفين ابنج يركض ورا ساقطة ويعوفج

:- ما خذيت ابنج ولا گلبته عليج هو الاجاني يريد ومشتريني بروحه

زمت شفايفها بغضب وطلعت ماقابله تدردم
تنهدت وكعدت متوترة اخذها لبيت ام دلال من كد التوتر كمت نظفت وسبحت اريد اخف احس جسمي ثكيل .. مشطت شعري ورتبته ورتبت روحي

طلعت كعدت يم هادي ع التلفزيون شوية واجة بس وجهه ما يطره السيف بدون ما يباوع علينا فات للغرفة

كمت فتت ورا لكيته يفتح بقميصه يريد يبدل
ما التفت ولا باوعلي حتى
تمشيت وكفت كباله معصب خليت اصابعي فوك اصابعه سحبهن كمت اكمل فتح ازرار قميصه الباقية
وخليت عيوني بعيونه وحجيت بهدوء
:- المحبس انطانياه السيد قبل الطلاك واني ضميته لهادي من يكبر اعتبرته امانة

:- شعندج مطلعتووو فهميني؟
صيح وحط ايده ع خاصرتي يباوعلي بخزره منتظر مني اجاوب

ما حسيت ع روحي غير عيوني غوركت ورجفن شفايفي همست :- لا تصيح علي

رجع صيح
:- ما مصخم ما مصيح جاوبيني شعندج مطلعتوووو تذكرينو مو؟ تشتاكيلو وتطلعين ذكرياتوووووو

هزيت راسي لا بشكل هستيري ولزمته من قميصه حيل
:- والله العظيم ما طلعته اني وناسيته اصلا حتى من اطلع ذهبي البسه ما انتبه اله مادري شنو وصله لايد عمتي ..

دفع ايديني ونتر وينه ..
صفنت شوية وحجيت :- ضل بمكانه

طلع بسرعه من يمي مشيت ورا هادي صافن خايف كتله بهدوء ماكو شي ماما ارجع باوع للتلفزيون

دخلت ورا حرب يدور المحبس لگاه شاله بسرعه وطلع للحمام وكفت ورا شفته شال شبجة المجاري وشمره بي بغضب ورجع سدها والتفتلي

:- اي شي عندج من ذكرياتو ينحرك ليلى لو ابره ابره هم تنذب اذا لكيت شي احركج واحركو فوگچ افتهمتييي؟

رديت بخوف :- ماعندي والله لا تحجي وياي بهذا الاسلوب حرب

وكف كبالي راص ع اسنانه بغضب وعاقد حواجبه
بجيت ورفعت ايديني غطيت وجهي
:- والله ماعندي واني ما مطلعته والله وداعة هادي ليش تصيح علييي فهمني ليششش

سكت شوية نزلت ايديني امسح عيوني ما اهتم طلع من يمي معصب ضجت من تصرفه مادري شبي حيل عصب

غسلت وجهي وضليت ضايجة وهو بدل لبس تراكسوده وطلع مادري وين

تحسرت مقهورة راسي صدع .. الله لا يوفقها اجت فتنتنا وراحت الرگطة

ضليت الوب مارجع لنص الليل هادي جان نايم واني كاعدة بالصالة انتظره ومبايلي بأيدي اخابر مغلق
سمعته يفتح الباب ركضت وكفت كبال الباب انتظره يفوت باوعلي ودار وجهه يسد الباب

كتفت ايديني ما قابلة وكتله بغضب
:- هاي سوايه تسويها تطلع لنص الليل ومبايلك مغلق ما تكول مرتي تقلق علي؟ ما تكول هاي المسكينة شنو حالها حرررب... مو احجي وياك شعندك صافن بوجهي جاوووبني

جر نفس وكال بهدوء :- هادي نايم؟

:- نايم طبعا متشوف الساعة نص ليل هسة

:- عجل صوتج لا يكعد مخترع

:- ع اساس ما اخترع الطفل من عياطك علي وعصبيتك وياي

:- ما صيحت لا تتهميني بشيء زور

حجاها ودخل شمر السويج ع الميز وكعد ع القنفة بتعب
:- وين جنت حرب تجاوبني لو شلون؟

باوعلي وكال متضايق :- يم صاحبتي تونست واجيتج

شهكت ولطمت صدري :- مصاحب صدك؟

هز راسه اي :- ماكو زلمة ما يصاحب شنو اول واحد

:- لا تلعب بأعصابي حررررب والله احط ايديني بالكهرباء وابليك

:- رحت يم ام دلال ارتاحيتي

:- ليش تقهرني لعد؟ حرررب مو احجي ويااااك اني شسووويتلك كتلك ما مطلعة المحبس يمكن عمتي رادت تفتنا لان تكرهني هي بس تفتر بالبيت ماخلت كاونتر ما فتحته لا خلت كنتور يمكن لگته
احجي وأحسب بأصابعي ..معصبة ومقهورة

:- انتي ليش محتفظه بي؟

:- كتلك ضامته لهادي ادري بي محبس اصلي وغالي ما يلبسون الا احجار اصلية

باوعلي بخزره دار وجهه متضايق وضل يمسح ع شواربه

:- ضل زعلان الا اطلك

شمر علي الكوشة بغضب :- ماعدنه نسوان تطلك احش لسانج لو عدتيها وحك سبع الدجيل
تطلك المسعدة
باوعلي بنص عين ودار وجهه

:- حرررب!! ترة انت جاي تبالغ برد فعلك كلش
ترة محبسسس مو هو بكبره ضامته بالكنتور وهاي ذبيته راح بالمجاري شبيك بعد

قبض ايده وعضها حييل وعاط :- اااااخ راح اذبحجججج دخلي جوة يلااا

كتفت ودرت وجهي بعناد :- ما افوت شتسوي تذبحني؟ كوم يلا اذبحني

استغفر وزفر نفس متضايق
وضل ساكت. شوية وكال
:- تردين تموتيني انتي ناوية عليه ليلى؟

تنهدت وتقربت منه كعدت ع رجله ولفيت ايديني ع رگبته ميلت راسي بسته بخده
:- غير محترك دمي من تصرفك شنو تسمي هذا شك؟ ليشش تشك بيه وتشك اني اخونك بالمشاعر
ترة الشك يذبحني لا تخليني اندم ع زواجي منك بسبب الشك

هز رأسه لا تحسر ونصة يهز براسه
:- ما اشك .. بس اني ...

تلعثم وسكت رجف فكه حضنته حيل لف ايده ع خصري وباس كتفي حيل
حط رأسه بركبتي شمها حيل وكال بحسرة
:- اغار ذبحتني الغيرة ذبح اغار منو ومن اسمو اذا جبتي ع لسانچ اتمنى اكدر امحي هذا الاسم من ذاكرتج وامحي صورتو من ع عيونج
اغار من عيونج تشوفو ..

ما اريدو يسمع صوتج ولا يشم ريحتج من يروح هادي عليهم اور وحك سبع الدجيل النار تاكلني
ادري بعطرج تارسو اخاف يحضنو ويشمچ بي

واغار من اشوفج تحضنينو لهادي وتشمين ريحتو اهجس ريحة السيد ترست ريتج و اموت

:- هههه طلعت تغار موو

:- لا تتمضحكين واني ميت متعلعل

رفع راسه رجعت بست خده وكتله :- اسم الله عليك من الموت حرب متعشي؟

هز راسه لا :- صبو الاكل بس ما اشتهيت احط لكمة بحلكي نار شابه بزردومي

:- اني هم ما اشتهيت اكل وعزلت حصتنا انتظرتك تجي علمود نتعشا سوية

:- ايي عشتي يول عشتي ماخذ مرة معدلة
حضني باس شفتي بسرعه وباوع بوجهي ذب نفس وقرب وجهه من وجهي

:- عاهديني ليلى ما يمر حتى بخيالچ

:- حرب!

:- هيج صعبة عليج توفين وياي بمشاعرچ؟

:- ما احبه حرب نسيته
نصيت ولساني نطق شي عكس الجان بكلبي
:- كرهته اذا مر ببالي ما يمر كمحبوب سابق احسه عدو

هز راسه برضا وكال وهو يرجف
:- وان كان ماريده يمر بخيالج حتى لو عدو ليلى تفهميني؟ ولج تفهميني اشب ناررر
جر ايدي من ع ركبته خلاها ع صدره

:-تحسسين؟

جاوبت بصوت مبهوت :- گلبك جاي يدك بسرعه
شبيك ترررجف حرب
:- من ناري ليلى افهمي اغار عليچ
من كثر ما اعشگچ اتمنى اطلعج من بغداد كلها اغار عليج من الهوى لان يشمو قيس

ما اريدكم تشمون نفس الهوى

كون اكطع الهوى .. عن نحرو حتى ما يشاركج بي

سكتت لحظات بعدها كتله بهدوء
:- اذا تريد نطلع من بغداد لان غيرتك تأذيك نطلع ما اكلك لا اهم شي راحتك

هز راسه لا :- لا الاهم هو راحتج بالغربية ما ترتاحين. ولا نستقر

هزيت راسي اي رفعت اصبعي ابرم طرف شاربه
حط ايده ع ايدي وباسها
مغمض .. مساع ليش رجعت لبيت ام دلال

:- هي كضبتني وطلبت اضل بس ناري صعدت ع راسي اجيت اكطو للخاتم وارجعلها ما ردت افشلها

:- اوووي

باس خدي حيل وتنهد
:- اعشكج يول

ابتسمت بدون رد .. كمت من حضنه للمطبخ اجهز الاكل شوية وفات كعد يسولفلي عن كلام امه ويا ام دلال ويشكيلي من قسوتها علي
يكول تشوفني عفتها وصرت الج بس.. تريدني اكون يمها واذا خذيتج ورحنا للغربية شهر ما نطول ونتطلك

:- حتى لو تزعل علي بس امك هي ورا سالفة المحبس والله مستعدة احلف بكل المقدسات اني ممطلعته ولا ع بالي

هز راسه مقهور :- يمكن والله مو بس الغربية اعوف الدنيا كلها علمودج
ليل البنفسج

:- مو جنت ليل الشتا؟

:- ليل الشتا بارد وانتي دفو الدنيا كلو بحضنج
ياليتني اغفى ع صدرج وما اكوم العمر كلو

اشرلي بايده اتقرب
:- تعالي يول خليني اشمج واحط راسي ع صدرج روحي بردت

رحت اضحك حضنته حيل لف ايدينه ع ظهري وحضني بكل حيله

ضحكت وضربته ع كتفه
:- الاكل احترك عود داحمي
:- هو بس الاكل اني حميت
ضحكت ودفعته حيل وركضت للطباخ

حسيت بخطواته وراي حضني من ورا وغمر رأسه بشعري
:- طفلتي المدلله

ضحكت :- ليسمعك يكول بيناتنا عشرين سنة وهن كلهن 5 سنين

:- بس انتي طفلتي لو اكبر منج بيوم واحد

هزيت راسي اي مبتسمة ..

مرت الايام بيناتنا طبيعي سجلنا هادي بمدرسة اهليه قريبة وقدملي حرب ع الجامعة وضبطلي كل اموري

طلعنا للسوك اشترينا ملابس لهادي والي للدوام اكثر شي احذية وجنط وشالات لان البس عباية

دخلت لمحل مكياج وعطور اخذت مكياج جديد وعطور لان ماعندي
ورجعنا للبيت رتبنا اني وهادي ملابسه وحضرتله جنطته كان متحمس
طلع كل الالوان والمسطرة وضلينا نرتب الدفاتر سوية ونزخرفهن

دخل حرب شافنه كال لاا بس لا كتبتو الاسم؟

:- لا ما كتبناه

هز راسه براحة واجة جايب بأيده قلم حبر وخلة الدفتر ع رجله وكتب اسمه بخط يخبل "هادي قيس عبد الرحمن"

هادي :- ما شاءالله .. ختم كلامه وباوع لحرب منبهر
عمو علمني اكتب مثلك

حرب :- طبعا اعلمك بس تحتاج وكت بعدك صغير

ليلى :-بطل ويا الوكت يصير خطه يجنن متاكدة

هز راسه مبتسم وضل يباوع لأسمه وحرب كتب ع كل الدفاتر
اول يوم مدرسة حرب عنده دوام واني بعدني
بس لبست وطلعت وياهم وصلناه سوية للمدرسة
بقميصه الابيض ورباطه الاسود وبنطلون اسود
وشايل جنطته ع كتفه وشعره مرتب ..دمعت عيوني من فرحتي بي

لوحلنا باي .. ودخل للمدرسة بهدوء
حرب :- عين الله ع هادي قوي وسبع طالع ع خالو هادي ما بچة مثل ذول الجهال ولا طلب نفوت ويا

:- اي شخصيته قوية ومستعد لاي خطوة جديدة ما يخاف

:- الله يحفظو عقبال ما نشوفو خريج

هزيت راسي وعيوني تدمع
كرص خدي بين اصابعه يضحك :- من هساع اشتاقيتيلو شسالفة شجرالج

:- غير ابني اووف وانت هم رايح لدوامك اضل وحدي البيت وحشة علي

:- فترة وتداومين وياي وتلتهين بالدراسة بعد ما تگلبينا

هزيت راسي ضايجة رجعني للبيت وطلع لدوامه ضليت افكر شنو اسوي غدة وافتر بالبيت محتارة

دك تلفوني الساعة 10 شفت المتصل العلوية
جاوبتها سلمت علي وسألتني هادي دوام
كتلها اي اليوم اول يوم اله حبيبي وفد مشتاقتله

ضحكت وكالت :-حتى اخته خاتون داومت اليوم سجلناها زين قبلوها
:- ماشاءالله زين سجلتوها ماراحت عليها سنة مثل هادي ندمت ما سجلته العام كتلني الخوف علي

:- ما تأثر سنة .. سكتت شوية وكالت
:- من تجي الجمعة اريد اشوفه كلبي طاك علي
خليني اخذه يبات يمي

:- اخذي الخميس علوية اني سجلته بأهليه السبت يداومون

:- ان شاءالله
تحسرت وكالت :- ماصار بيج شي؟

:- لا لهسة ماريد ما اتمنى لان راح اداوم جامعة وتصير عندي دراسه

:- ياا ماشاءالله مرتاحة ويا رجلج؟ شوفي اذا ما مرتاحة كولي اني اوكف وياج لو الدنيا كلها توكف ضدچ

:- لا علوية رجلي خوش رجال زين الحمدلله كلش مرتاحة

ضلت تسولف وياي شوية وكالت دنيه تريد رقمج انطي الها
كتلها انطي ونهينا المكالمة ..

اجة الخميس حضرت اغراض هادي وجنت مختنكة احس بشي سيء بس ماردت يبين علي ويكولون ليلى ما مرتاحة
دخلت سبحت ورتبت شعري وخليت. مكياج واضح ولبست ثوب حلو مخصر طلعت جني عروس

حرب جان ما موجود كال اذا ما تجي العلوية بنفسها ما تفتحين الباب
كتله تدلل بعد لازم اسمع كلمة زوجي

من اندك الباب كلت منو كالتلي اني يلا فتحت الباب
مخليه شالي ع راسي سلمت عليها بوستها
وطلبت تدخل .. فاتت صلت ع النبي وباوعت للبيت والتفتت باوعتلي

:- بيت العامر ان شاءالله كلش مرتب وحلو تستاهلين هيج بيت

:- تسلمين بعد روحي

:- شلونك بيبي؟ هز رأسه
:- زين

مسحت ع راسه وباوعتلي بتمعن
ابتسمت بس عيونها لمعت بحزن
:- صلاوات ع النبي صايرة جنج گمر اربعطعش علي بالعافية حرب عرف يختار

نغزني كلبي فجأة .. عبالك ينبأني بشي موزين جاي
هزيت راسي وشكرتها ونصيت

ما طولت خمس دقايق وكالت
:- يلا تضل عندج العافية الولد منتظريني بالسيارة نريد نمر ع السوك نتسوك للجهال

:- والله لو تتعشين يمنه علوية واحنه نرجعج

:- تضل عدكم العافيه بعد صعبة ضلتي تدرين

بوستني ودعتني وطلعت وياهم وصلتهم للباب
انفتح الباب وصار بوجهنا حرب راجع سلم ع العلوية بسرعة وفات
هادي لزم ايدي نصيت بسته بخده وكتله
لا تسوي وكاحة

هادي :- لا اضل مؤدب

حرب :- راح اشتاگلك يا بطل
مدله ايدينه تقرب علي هادي بسرعه شاله باسه وانطاه فلوس گله هذا مصرف الك .. ونزله

لوحلنا بأيده وكال الله ويااااكم .. وركض ع السيارة

ضليت اضحك والوحله بأيدي حرب حط ايده ع زندي وسحبني ورا
ضحكت :-ترة الشارع فارغ

:- من ذول بالسيارة
:- منوو ماشفت والله خليني اسلم خاف هاشم سيد هاشم عزيز ع كلبي مثل اخوي

:- اي هاشم بس ويا واحد غريب فوتي فوتي
ضل يأشرلي بأيده افوت بس صرت ورا الباب طلعت السيارة دخل عادي سد الباب

:- ثوبج مخصر انتي تتعمدين تتحرشين بيه

:- شسوي وكيحة عقلني انتَ

لفيت ايدي حول زنده ودخلنا للبيت جوة
:-اليوم هادي ماكو الا العب لعب محد يسمع صوت ندك نركص نلعب ختيلان براحتنا
غمزلي بوكاحة

ذبيت الشال وفتت للمطبخ اصيح
:- شنو تريد عشا
:- بكيفج
:- نطلع؟ نتونس شوية

:- مو اني ما يطاوعني كلبي اطلع وهادي مو ويانه استنغص الطلعه

رفعتله طرف حاجبي ما مقتنعة ..

جر نفس وكال
:- وين تردين ترحين؟

:- مطعم عنده اكل طيب وراها افران حلويات
بشرفك صارلنه هواي ماطالعين

:-يلا خوش حضري روحج

:- ماعندي شي بس البس عبايتي وجواريبي

:- وتمسحين خلقتج

هزيت راسي واشرت ع عيوني من هاي العين قبل هاي العين

ركضت جهزت روحي وهو بدل واخذنا طلعنا
جان كل ما يحاجيني كلبي ينغزني بشكل غريب يخوف
تعشينا سوية وطلعنا نفتر بالسيارة
صفنت ع الشارع ماعرف شنو بي مد ايده ع رجلي خلاها فزيت
رفعلي حاجبه شبيج

:- مخنوكة وكلبي ينغزني مادري احس اكو شي موزين راح يصير
:- خاف تغيير بالهرومونات يخليج تحسين بهيج شعور
هساع ننزل نتمشا وتفترهين

هزيت راسي اي .. نزلنا ع الشط نتمشى الهوى يرد الروح كعدنا خليت راسي ع كتفه
ولفيت ايدي ع ذراعه
مد ايده خلاها فوك ايدي ساكت

:- هاي الفترة وانت هادي بعيدين عني لهذا السبب گلبي احسه مختنگ

:- تحسين بفراگي؟

هزيت راسي اي .. شلون لعد؟ انت مليت حياتي صارت تخبل بوجودك
بست كتفه
كال يضحك :- عااالم
:- وين محد الشارع فارغ
حرب عود صدك الداعيشه وياك؟

:- عجل شنوو؟ عقد حاجبه مستغرب

:- مرات يجيلي شعور موحلو احسه حلم وراح افز منه

ابتسمت ورفع ايده لزم حنجي رفع راسي
:- دحكي بعيوني يول .. هاي العين تعمى وما تشوف غيرچ ولا الگلب عرف يهوى غير حرمه لا من كبلج ولا هساع

يـَ ليل روحي .. وشمس گلبي انتي
يَ روح حرب وعمره

غمضت مرتاح تنهد :- شنو تهجسين من تغمضين عينج؟ فكري بيَ
شنو اجة ابالج
سكتت لحظات احاول افهم الاحس بي

فتحت عيني وكتله :- أمان .. اشوفك اماني
اسمك حرب بس ما الك من اسمك نصيب الحمدلله
المفروض يسمونك امان ..

:- اني وياچ امان و ويا غيرچ حرب ..

سكتت مريحة راسي ع كتفه اجة واحد خبل مادري سكران يصيح علينا
كمنا بسرعة بأيده عصا حرب يريد يروحله جريته من ايده حيل
:- عوفه امشي للسيارة

هو رفع العصا وصاح بصوت عالي :- اناااا العباس ابن القعقاع سأسل سيفي هل من مبارز

:- يولي اني الحرب نفسها

ضل يركض علينا كوة يجر بروحه ضحكنا اني وحرب وركضنا للسيارة انطيناه ع كد عقله
ورجعنا للبيت بنص الليل عشنا ليلة حلوة شبعت حيطان البيت من صوت ضحكاتنا
وشقانا .. حضني حيل يبوس بركبتي و وجهي

دفعت حيل وذبيت روحي ع صدره امشي ايدي علي مرتاحة لحد ما غفيت ..

صوت اذان الفجر .. يصدح بأرجاء البيت طر الفجر
كعدت ع حيلي مخنوگة ، لحد ما عرفت واستوعبت الصار ..
كانت اسوء لحظة تمر علي بكل حياتي ..

من كمت افتر بالبيت ادور ع حرب وما لگيته
ولزمت مبايلي اخابر علي مغلق
ولكيت رسالة منه مكتوبة بخط ايده الاحبه وجان عاجبني واحب اشوف كتابته

"اجت الوقت الي تتذوقين بي السم نفسه الي شربه صهيب"

....

بيت السادة ..

وسط عائلة يسودها الحب والامان .. همسات رحمانية وقلوب نقية

دخل هادي للبيت يركض بفرحة طفل ورا العلوية وهاشم وقيس .. باوعت عليهم بأستغراب لان وجه قيس ما يتفسر

فززني صوت هاي وهو يسلم علي مبتسم بارزه اسنانه الصغيرة ورصعات خدوده
:- شلونچ عمه

فتحت ايديني اخذته بحضني بوسته
حنان :- شلونك حبيبي شلونها الماما؟

:- زينة .. وين حيدر؟

:- بالاستقبال يم جدك روح العب ويا عمة

كعدت عمتي يمي تتنهد قيس صعد وهاشم غسل وجهه بالمغسلة ورجع يحجي بحيرة
:- احنه شوكت نتقبل المرة صارت ع ذمة رجال ثاني ليش كل ما نشوفها ويا ننمرد نحسها لهسه ع ذمة قيس استغفرالله العظيم واتوب اليه

حنان :- هاشم انتم تدرون بالوضع صعب ويقهر بس مجبورين تتقبلون لخاطر هادي

هاشم :- واحنه ع شنو تحملين؟ اني لو بأيدي حتى هادي ما اروح اجيبه يضل يمها مداريته هي بس حتى ما اشوفها ويا رجال ثاني

باوعتله يحجي منفعل وجهه احمر وحواجبه معقودة
وابتسمت ع غيرته عليها ..

توجه للاستقبال باوعت لعمتي صافنه حطيت اصابعي ع ايدها فزت وسمت بأسم الله وباوعتلي بحيرة
:- الله يسعدها مرتاحة لو تشوفينها حنان عين الله عليها هي طويلة وصايرة مربربة والخد كاعد كعده
والشعر شلون والمكياج شلون .. واللبس مخصر غير جنها العافيه ماشاءالله
وشافها قيس بس جانت لابسه شال ولا نزل ويانه للسوك ولا حجة تكولين صار اخرررس الولد

حنان :- يااا وين شافها

:- بالباب والنوب اجة حرب وشال هادي كدامنه باسه وهادي فرحان وهي واكفة بصف رجلها بالباب تودع هادي بثوبها تشع شع تكولين عروس بصباحية عرسها صلاوات على محمد مبين مرتاحة وقيس شاف

:- تؤؤ .. بعد شنو بأيده راحت لغيره

:- من ركب هادي بالسيارة كله ابو بس هاي الحجايتين عمك حرب يريدك؟

هادي گله :- اي مدللني تدلل

:- لا مبين كل مايجي ويسولف ويا الجهال يحجي بطلعاتهم وطباتهم ولعبهم سوية ومشتراهم
مامقصر الزلمة وهو الزين

:- بس ثكيله علينا حنان وليدنا بحضن الغريب

:- شتسوون لعد؟ هاي قسمة رب العالمين

تنهدت وكلتلي :- سويتن عشا؟
:- اي سوينا ذاك الاكل اليحبه گلبج الدجاج بالفرن ينشوي والبنات سون مقبلات اشكال
:- اي عفيه سويتن كيك هادي يحب الكيك

:- سويت صينتين كبار ومخليتهن ع الكاونتر مغطيتهن بس هاي سكينة اخخ منها سكينة
خبطت ككو وخلته ع صينيه منهن اضنها صارت ناكعة وخربت

:- لا ان شاءالله ماتخرب

طلعت فاطمة من المطبخ سلمت ع عمتي واجت كلتلها بفضول
خالة قيس هم شاف ليلى

:- لا وين يشوفها رجلها طلعلنا هادي

حطيت ايدي ع حلگي وغمضت عيني فضولها خله المرة تجذب
حتى ما تشب نار غيرتها وتصير مشكلة بينها وبين قيس

صلينا سوية .. ورحنة نكمل تحضير العشا بالمطبخ وعمي والولد دخلو كعدو بالصالة وعمي كالعادة جامع احفاده حوله يحجي وياهم والحلو مخلي هادي ع يمينه ولاف ايده ع ظهر هادي حاضنه ..

سبحان الله ابن المرأة الكانت مرفوضة من عمي صار اعز واحد بالاحفاد .. وابني الكبير ع يسار عمي واكيد اله معزة خاصه لانه اول حفيد دائما عمي يكول هذا اعتبره مثل هاشم ابني الصغير مو حفيد

وحتى بوقت العشا هادي ماخذ مكانه ع يمين عمي ويجيب ويحط بأيده

مصطفى كال لقيس ع نيته :- شبيك وجهك مخطوف مريض؟

قيس باوعله لحظات وجاوبه :- لا مابيه شي دايخ شوية تعبت بالشغل اليوم وما ارتاحيت الظهر

:- مو يمك هادي مايصير تدوخ اليوم ههههه

هادي سمع اسمه وابتسم عمي كاله
:- شلون امك زينة؟

هادي :- زينة جدو

:- مرتاحين ان شاءالله

هز راسه اي :- اي

فاطمة :- حبيبي هادي شعجب امك ما سلمت ع بابا غير تطلع للباب تسلم علي

كلنا وجهنا انظارنا الها مستغربين عمي خزرها بسرعه وقيس شال ايده من الاكل باوعلها بغضب
ومرتضى كللها بصوت ناصي هذا هم حجي

وهي عينها ثابته ع هادي تنتظر جوابه وتدري بي ذكي ويعرف الموقف كامل وراح يحجي مثل ما هو

كللها :- هي طلعت بالباب وشافت بابا بس ما سلمت علي لان عمو حرب يغار عليها

فاطمة :- هههه بعدك صغير شمعرفك بالغيره

:- اعرف هو ذب محبس بابا لان يغار عليها من المحبس

قيس :- فاطمة!!! اشش سكتي

عمي عض اصبعه الها وهي ما سكتت كلتله
:- يا محبس؟ انت شمدريك تعارك ويا امك

هو جر نفس وكال
:- لا ما يتعاركون همه بس هو محبس بابا عمو زعل من لكته امه بالبيت وطلع مارجع لحد نص الليل واني سمعته يكول لماما يغار

عمي كللها بغضب :- رضيتي فضولج

هي هزت راسها وباوعت لقيس كلتله بصوت ناصي
محبس شنو؟

قيس :- شدخلج شي جان بيني وبين طليقتي خاص

شالت ايدها وكامت من الاكل ضايجة ..

كملنا عشا وصبينه جاي لكيت عمي كاعد يحجي ويا قيس ع فاطمة يگله أدبها تصرفها مو مقبول
وهادي يلعب ويا الجهال باوعله وكله
بينك وبين هاي المرة طفل اذا فاطمة تضل تشوف ليلى ضرة مو طليقة تكره الحسن وخاتون بهادي وتصير فجوة بينهم ويمكن حتى بگلبك وانتَ بكيفك بعد

قيس :- ردت مليت مايفيد وياها يابة عقدتها بالحياة ليلى

:- لانك ما ناسيها المرة تحس كلبها يعلمها

تنهد ودار وجهه من عمي مقهور .. خاط استكان الجاي وباوع لعمي يگله
:- يابة شتحجي اني شفتها واكفة بصف رجلها من صفحة بالصفحة الثانية شفت ملك الموت يسلم علي

مصطفى: -هي مال استهزاء قيس

ضحكت قيس :- لا والله صدك روحي وصلت لحلگي جلبت بيها كوة

عمي هز ايده ما قابل ..
قيس :- لا تهز ايدك يابة كل واحد كعد ابيته واستقر بحياته بس الگلب من يهوى صعب ينسى

مصطفى: - اي والله اووف اووف

باوعتله بصدمة ضحك خصمت عيوني اباوعله بشك
:- يمعودة هو شوكت لحكت اهوى غير عمري 15 وتزوجت

:- اي اكول

من عدها واتأكدت ان حياة فاطمة وقيس الزوجية ماشية بس تسودها المشاكل
عدم الثقة .. والشك المستمر
فاطمة صارت مهووسة وحتى بحلامه تتدخل
وصلت بيها مرة كعدتنا بنص الليل ع صوت بجيها ومحد فاهم البيها

الصبح اعترفت كالت حلمان بيها ومن سألته جاوبني وهو نايم بدون شعور
احلم بيج ليلى

وضلت ايام مريضة وصفرة الغيرة موتتها .. و من ورا غيرتها ما اظن تطول بصحة زينة
اتوقعلها كم سنة وتطيح

فززني صوت عمي وهو يطلب اصبله استكان ثاني

سكينة دخلت شايلة الكيكة
عمي كللها ولج العشا مالحك نزل

:- عمي حنان تحجي علي تكلي حطيتي بيها ككو خربتيها صارت ناكعة
حطتها بالكاع وتربعت
تعالو يمة كريمة .. خديجة خاتون حيدر هادي وضلت تصيح عليهم كلهم التمو عليها ضلت تنطيهم ياكلون

وكل واحد تستجوبة وحدة
شلونها طيبة؟ كول الككو محليها

هاشم :- خبلتي مرتي خوية
:- هههههه ماكتلها شي

سكينة :- والله طيبة والله

اجت تركض بأيدها كيكة تريد توكل هاشم كوة
اخذها من ايدها اكل منها وبهت وجهه ابتسم ابتسامة صفرة وكللها عاشت ايدج ام كريمة الكيكة طيبة

:- خل اجيبلك وحدة ثانية لعد

بلعها بصعوبة وهي جابتله قطعة جبيرة وضلت واكفة تباوعله تبتسم لمن اكلها كلها يلا وخرت عنه

جابت تنطينه اكلناها وكلنا ذبينها الككو مر يكطع
:- ناسية ما حاطة شكر ع الككوو سكينة

حطت ايدها ع حلكها وكالت :- ياااا اكول شنو ناسية طلعت ناسية الشكر عوفوها يا جهال عوفوها مرة
كلهم ذبوها وضلو يضحكون

سكينة:- اكول شبيهم ما اكلوها وبس صفنو بوجهي طلعت مرة
هاشم انت كليتها؟

هاشم :- لو توكليني سم من ايدينج هم اكله علويتي
عاشت ايدج طيب ناقصة بس شكر

سكينة :- اخبط مرة ثانية واحط علي شكر واخلي ع الكيكة الثانية؟

هاشم :- خبطي علوية

احنه كلنا صحنا لا لا .. خليها سادة

هاشم :- خبطي شوية واخذيلي قطعتين خلي عليهن اني اكلهن

:- ان شاءالله هسة

راحت طايرة تشيل الصينية البيها كيك كله ككو مر
قيس صافن ع هاشم
من باوعله هاشم كال بهدوء
:- هم جانت صغيرة حرمتها من احلى سنين عمرها علمود ترضيني وترضيكم
خليتلها هواي قيود حقها من ماقبلت ترجعلي
لان تحررت من قيودي وفتحت يمه مثل الوردة

هاشم :- المرة ع ذمة رجال غير معمم انتَ؟

:- هسة شحجيت اني بس احجي تطلعوني غلطان بس قيس يغلط مسكين مو هذا مصطفى توة يتحسر محد غلطه

مصطفى: - اي دز اخوك للنجف

ضحكو علي بس عمي ضل يوبخ قيس وطلب منه ينساها ومايفكر بيها لان صارت ع ذمة رجل غيره
وكل واحد راح بطريق مختلف
وتبع وجها مختلفه

....

الشيهانة ..

كاعدة العصرية بغرفتي يم جبران نسولف
يمد ايده ع راسي ويقرب وجهه يحط خده ع خدي يتحسسه
:- يجيلي شعور مخلي اصابعي ع خدج من اسوي هيج

:- صدك؟

هز راسه ..اي والله صدك
:- باجر الصبح امشي وياي للمعمل شبيك والله تتونس تشوف الشغل وتشوف نجاح مرتك

هز راسه لا :- ويكولون حرامات مرة شايلة كل هذا الحسن وتاجرة بنت تاجر
زوجها مكطعات جفوفه

كمت من يمه بسرعة وحواجبي انعقدت بغضب
:- انت ما تبطل هذا حجيك ترة كلشششش تغث كلششش مو عبالك شي حلو افندي

:- جا هذا الصدك حبيبتي ... قاطعته

:- اني مااا اشوووف هيييج

:- بس الناس كلها تشوف

:- العن ابو الناسسس شدخلكم بيهم فهمممني شدخللللك اني مرتك واحبك مثل ما انت
احبك لو متوذر احبك احبك واموت عليك
اليحجي يحجي من غيرته وحقده

ابتسم صافن علي
:- لا تصفن جبران اني اريدك شلون ما جنت واذا الناس يشوفون بيك نقص ف النقص بيهم هم مو بيك بس يقنعون نفسهم انت ناقص حتى يحسون نفسهم كاملين

:- تدرين شنو احلى شي بيج؟
صفنت بوجهه اني دمي محترك وهو يكول شنو احلى شي بيج

:- من اكلج صبي عيني ما غلطان .. اشوف الدنيا بيج
انتي صبي هاي العين ونظرها وادري بيح ما تفاركيني للموت

:- مستفز انت .. اوووف منك

غمزلي :- ليش اووف تجين يمي نشوف الاوف شلون تصير هنا

:- يمة اعوووذ بالله ههههه لالا خابرتلي ليلى كالتلي جاية تشوفني لا تصير وكيح

باوعلي بنص عين يمثل ما قابل .. فتحت الكنتور طلعتلي ملابس نزعت كدامه وبدلت
:- شيل عيونك بس تبصبص .. ياليت بصبصتك فايدتنا كون هسة حامل

ضحك ورفع حواجبه
:- هذا شاربي ازينه بالقندرة اذا ما حبلت هذا الشهر

باوعتله بمكر وغمزت :- نشوووف.. بس شد حيلك خليني اوصي غفار يجيبلنا كم كيلو بقلاوة

:- جا هيج يطكني سكر

:- ميخالف ههههههه
محتاجني؟

رفع ساعده خلاه ورا ظهره وغمض عيونه متألم :- اي اخ ظهري مادري شماله بالله تعاي شوفي

رفعت حاجبي وتخصرت :- لوتي لا تصير كتلك شد حيلك بس مو هسة

فتح عيونه يضحك اكتافه تهتز .. ويكول امشي طلعي برررة

نزلت اضحك رتبت المكان .. ودخلت شفت نزهة شنو مشترية
باوعت للحديقة البنات يدرسن .. وشعلان يلعب بالبايسكل

:-شعلااان عندك دروس؟

باوعلي صفن شوية وكال:- لولوة تدرسني

:- اي مخلفتك وناسيتك غير عندي دراسه اني صف خامس ترة

:- واذا صف نعل ماتدرسيني

:- ياااا ياااا ولك تغلط شالت الشبشب تريد تشمره علي

عطت بيهم بغضب .. ورزلتهم ثنينهم
كتله اني ادرسك بس لتجاوز ع خواتك
عفس وجهه معصب وشمس تسويله حركة عود بسيطة ولولوة تأشرله ع شمس وتحط ايدها ع ركبتها
وتكله :- تفترسك بس اهدها

تنهدت ..فتت شفت عمتي تلف كبة ع التلفزيون
كاعدة وعمي ماكو ..

شوية وسمعت صوت نزهة ترحب بليلى طلعت بسرعة للاستقبال باوعتلها وجها مخطوف
وعيونها مورمة

اول ماشافتني تصنمت بمكانها حتى ماتقربت تسلم
من طلعت نزهة خليت ايديني ع اكتافها وحجيت
بحيرة والخوف دب بداخلي
:- منو وياج ليلى

نزلت دموعها وكالت بصوت كله غصة
:- ما اريد شي بس حضنيني داده .. حضنيني اخذيني بحضنج من هاي الدنيا التعبانة الي تعبت اختج ومرمرتها

نزلت دموعي وياها وكتلها بغصة :- ولج مو بس بحضني بروحي اخليج
حضنتها حيل وهي انفجرت بجي جنها طلعت ضيم السنين كله بحضني

ضلت تشهك وتبجي بغصة وتحجي بصوت مكسور
:- خذلني .. اماني خذلني شفت امان الدنيا كله بحضنه
علقني بي .. خلاني اتعلق بي مثل الطفل قدملي اكثر من اللازم متعمد
ترس روحي حنين ..عوضني عن كل شي
خلاني اعيش ويا طفولتي ومراهقتي وشبابي
تالي شمرني وراح

اماني خذلللني سهيررر خذللني راح يوكف گلبي ولج ااااخ ولج يممممة تعاي شوفي حالي يممممة

كعدت وكعدت يمها كضيت وجها بأيديني اباوعلها دموعها تجري وشفايفها ترجف
:- شسووالج

:- ما سوالي شي ماضربني ما طلكني ما سوا شي فجأة اختفة وكلي ضوكي من نفس السم الشربتي لصهيب
طلع كل شي عيشنياه لعبه
راد يعلقني ويعوووفني لان بظنه اني علقت اهو وعفته

نشغت مصدومة :- صخام الصخم وجهه ولج وابنج وين

مسحت وجها بالعباية وكالت: -يم بيت جدة ع اساس تجيبه العلوية كتلها خلي يمج لباجر عنده عطله
ماردته يجي يشوف امه بيا حال

ولج تعاليلي فهميني شنو اكول للعالم شنو اكول لعمامي
شنو اكووول لهادي ابني تعلق بي

:- مادري عقلي مجاي يستوعب

لطمت ع رجليها :- من الصبح الهسة ابجي عيني مابطلت دمع
تدرين الشماته الوراي؟ هسة يكولون ما ضل وياها رجل فوك ضيمي وقهري وهضمي ضيم الشماته

:- العن ابو الشماته المهم انتي وابنج
لا لا ما انتهت شنو الغربية متروسة اهله وناسه خابري سأالي وشوفي لا عبالج كل شي انتهى بهل سهولة

هزت راسها اي وكالت مفكرة

:- خابرتي ام دلال
:- لا وين

:- خابريها

:- لا خليني هسة اسكت اشوف شلون تصفا لو هاي اكللها حرب راح للغربية واتأخر مارجع اشوف ردها

تحسرت ولطمت وجها حيل:-بس هو طلع يلعب علي وعااااافني ولج كسررررني اااااخ يمة كسررر كلبي وروحي وفشلني

:- ولج ماتوقعتج هيج تحبينه

:-مالحكت احبه بس علقني بي علقني كلششش البارحة اني بحضنه ويعاملني معاملة تجنن كأني كل دنيته شلون هيج سوا بيه شلوووون فهميني

:- اش صبري نلگي حل لهاي المشكلة بس صبري وخلي عينج بعين رب العالمين

:- شنو اكللهم اختاريته وزامطت بي تالي متالي خذلني؟

غمت روحها مقهورة وتبجي ضلت يمي ساعتين ماخيلتها تطلع بس اصرت تروح لبيتها ماعرف ليش
خليت غفار يوصلها
مسكينة طلعت عيونها دم ومورمات تمنيت اضمها يمي ومااخليها تطلع بس عاندت

ضليت محتاره بأمرها وكلها تسألني شبيها ليلى؟
كلتلهم مابيها شي رجلها مسافر وضايجة

فتحت مبايلي لكيت رسالة من قاسم كاتبلي
:- ام شعلان اختج عايفة العراق ومسافرة بعد موت رجلها ..

تنهدت وسديته .. اختفت ورا موت عادل ومن ذاك اليوم لهذا اليوم ادورها بكل مكان ما لكيتها
وهسة طلعت مسافرة بس وين؟ وشنو نواياها
ماعرف

اني اخاف تختفي وترجع بمصيبة جديدة .. لو ترجع اقوى وشايله سم وحقد اكثر من قبل
كتبت رسالة لقاسم
:- اني اريد اعرف كل اخبارها ف اريدك دوم تراقب وتشوفلي خاف ترجع للعراق

كتبلي :- صار تدللين

ثاني يوم كعدت بكل نشاط جهزت نفسي وحضرت ملابس جبران لان وافق يروح وياي للمعمل
اخذنا غفار المعمل شوية بعيد

وصلنا سويتله جولة بالمكان .. انغمت كلبي من تقرب شخص يسلم علي نسى ومدله ايده
للمصافحة جبران حسيته انطعن بس سيطر ع رد فعله ومد ساعده لزمه للسلام مافشله

والولد انحرج. . حسنين اخذه يشربون قهوة
ع ما كملت شغلي جان عندي شغل بسيط لان حسنين ما مقصر ومكمل كل شي

بعد ساعات بالمعمل طلعنا. . جبران جان يمدح بالشغل وبالترتيب والنظافة
وما حسينه غير السيارة نزلت ع التراب وغفار عاط
:- نصووو

جبران حط ساعده فوك ظهري ونزلني بسرعه وذب روحه فوكي
جبران :- غفاررر نصي دير. بالللك

سمعت صوت طلق عطت وحطيت ايديني ع اذاناتي
ما حسيت غير التاير انفجر والسيارة انكلبت بينه اكثر من مرة مادري شلون اني ضليت بكامل وعيي بس الخوف كتلني

مديت ايدي اتحسس جبران يون متألم
دفعته تحرك برجله دفر الجامه حيل وهمس بوجع
طلعي منااا بسرعة

:- اطلع وساعدني مااكدر

نتررر حيل
:- كتلللج طلعي

هزيت راسي احس ريكي ناشف من الخوف وكلبي يدك بسرعة
جبران حجة بتعب
:- غفاررر .. غفار خوية حاجيني

حاولت اشوف غفار ماكو عيوني مغوشات

طلعت من السيارة اباوع بمكان شبه مقطوع ع طريق رجعتنا مديت ايدي ساعدت جبران يطلع
راح لمكان غفار ضلينا نحاول نطلعه بس غفار غركان بدمه

بلعت ريكي بصعوبة وكتله بخوف: -يمكن مات جانو مستهدفينه

هز راسه اي وكعد ارتجى ع السيارة جثيت ع اركبي كتله شبيك
خليت ايدي ورا راسه كله دم متأذي و وجهه شاحب
:- جبران احنه وين مقطوعين. . هز راسه لا وگال
:-يمكن يرجعون يكتلونه روحي منا بسرعة طلعي من هذا المكان كله وعوفي بغداد كلها

هزيت راسي لا وبجيت بشكل هستيري
:-خليهم يرجعون يكتلوني وياااك
غمض عيونه بقلة صبر وهمس
يمكن ربع عادل مستهدفيني
:- ميخالف والله يكتلوني وياك ... جا اني اذا اعوفك يعني عايفه روحي جبران بالعباس ما اعوفك لو اموت ..

كال الي كم كلمة وسكت بعدها

_طلعي منا اخذي الدرب كله ركض توصلين للشارع العام اخذيلج سيارة وروحي للبيت ولا تحجين شي لأي بشر

لزمت وجهة وانه ابچي وگتله _ما اخليك تموت ، احجي ابوس راسك احجي لو حررف واحد

بوسته بعيونه وحضنته بقوة .. ابتعدت عنه اباوعله بحزن قرب جبينه من وجهي
مقطوع الكفين ما يگدر يلمس وجهي
مرر جزء من وجهة على وجهي وگال بغصة ..

_ بالنهاية .. اكتشفت انِ احببت شمسً لا تهوى سمائي

:- جبران!!

:- ما مكتوب النه نتهنى سبحان الله كل ما اوصلج اخسرج روحي حبيبتي
روحي يا صبي عيني لا يرجعون علينا يكتلونه كلنا
روحي ربي جهالج وداري اهلي امانة عندج

:- رايحة اجيب سيارة واجي قوي روحك

كمت ع حيلي كال منا

رحت اركض مسافة مو بعيدة الشارع جان موجود بس احنه نزلنه بمكان
ماننشاف ضليت ااشر للسيارات وكفن الي كم وحدة شافوني ابجي وبحاله صعبة
طلبت مساعدتهم وما قصرو نزلو وياي لجبران وساعدوه وطلعو غفار بس للاسف كان ميت

نقلونه للمستشفى خابرت ع بيت عمي كتلهم سوينه حادث واجو للمستشفى مرعوبين
كبل كللهم جبران
ضله بالعراق مانضل نروح ورا عمار لسوريا احنه عايشين بغابة ..

وصدك بنفس اليوم رجعنا للبيت اتصل بعمار وجليل وثنينهم تعهدو يساعدونه ويرتبوله الامر حتى نسافر بأسرع وقت

بس للاسف هواي خسرنه وغفار جان وحدة من هاي الخساير االي ما تتعوض جذب انسان شريف ونزيه
وفي وخلوق .. الله يرحمه ويجعل مثواه الجنة ..

....

وسط حيرة وتخبط .. وآلم .. وتساؤولات كثيرة
شنو سويتله اني حتى يعووفني ويخليني اتجرع المر
شنو ذنبي والله ما حبيت صهيب ولا علقته بيه

جنت ابجي ومر اسبوع واني دمعتي ما نشفت وهادي يسألني وين عمو حرب
اكلله عمك حرب مسافر
روحي ذبلت وتعلعلت فد دور

ضليت طول الوكت نايمة بالفراش ابجي وصرت ما اعرف نهاري من ليلي
ابجي بكل لحظة اكون بيها فارغة واحس بخيبة امل كلش جبيرة .. مرات احس ضيم الدنيا كله وكع ع
راسي

كلبي بي الم بي رعشة وبحنجرتي غصة
ما تجرأت احجي غير كدام الشيهانة احس بروحي متفشلة

ليش خليتني بهيج موقف؟ ليش خليتني استحي اراوي وجهي للعالم
ليش صرت سمي وعلاجي بنفس الوقت
ليش علقتني بيك لهذا الحد وعفتني تايها بنص الدرب

ليش لزمت ايدي واخذتني لنص العالم فرحانة وفجأة عفتها وضيعتني .. ضيعتني حرب

غمضت عيني ابچي دخل هادي مسحت عيوني وكتله واني مغمضة روح نام ماما

هادي: -خل نخابر بيبي لو خاله نسومة انتي مريضة

:- لا حبيبي اني هيج مرتاحة من تكبر تفهم روح نام فدوة رحتلك

تنهد وتقرب حط ايده ع شعري يمسد علي غمضت عيوني وشفايفي رجفن من الغصة
قرب وجهه باس راسي ومسح عيوني
:- لا تبجين ماما خابري عمو يرجع بس هو مايخليج تبجين

هزيت راسي اي واحس حنجرتي راح تنفجر تكدست بيها الحسرات
طلبت منه ينام مرة ثانية طلع ضايجة واني شهكت حسيت روحي طلعت ويا الشهكة

وبجيت بحركة كلب سحبت مبايلي اصابعي ترجف صغطت اتصال مغلق وصلن مئات المكالمات وهو مبايله مغلق

خليت راسي ع المخدة ابجي مبلله بدمع عيني وغمضت عيني ارجف .. مادري شلون بديت اغفى لو افقد الوعي وحسيت بحركة يمي ماكدرت افتح عيني بس اون ولساني يكرر اسمه واعاتبه بحيرة ليش رحت

حسيت بايد خشنة ع وجهي ردت افتح عيوني بس مااكدر جنت فاقدة وعيي وما اعرف اني جاي احلم هو يمي لو صدك
ما ادري شنو صار حسيت بالماي ينزل ع وجهي وجسمي فتحت عيني بصعوبة اشوفه لازمني خليني بحضنه وصورته مو واضحة مثل الحلم .. بس ريحته ترست ريتي

همست بصوت مبحوح: -حررب؟

شفت شفايفه تحركن بس ماسمعت صوته غمضت ما مستوعبة عبالي حلم ردت ما اكعد منه حسيته بدلي ملابسي ورفعني ع صدره طلعني للغرفة
شوية وحسيت بنغزة بأيدي .. وراها سكنت روحي

فتحت عيني من حسيت بشي يتحرك ع ايدي باوعت للمكان وبلعت ريكي بصعوبة هاي ايده وهذني محابسة وساعته
جاي يشيل ابرة الكانولة من ايدي

ضليت صافنة اخاف ارفع عيني واطلع متوهمه
غمضت عيني وذبيت راسي ع المخدة

طبطب ع خدي وصوته ترس اذني
:-ليلى كعدي .. ليلى تسمعيني

فتحت عيني صارت ع
وجهه كعدت ع حيلي اباوعله بصدمة وعيني تجولت ع كل ملامح وجهه كعد كبالي ومد ايده ع كصتي يشوف الحرورة

كحيت غطيت حلكي اكحل انطاني ماي شربني
وعيوني جامدة علي لساني انعقد مادري اعاتب اصرخ ابجي لو اخاف يطلع حلم

صفن بوجهي وكال مقهورة
:- اجيت اخذ ثار اخوي منچ تاليتي وكعت بنفس النار ..ما الوم اخوي من انتحر علمودج حبج يشيب الراس ويسلب العقل

اجيت اخذ بثارو تاليتي وكعت بذنب عيونج حالي من حالو ..

كلت بصوت مبهوت :- ليش عفتني؟

:- غبي وحيوان .. كل ظني اكدر ع بعدج بس طلعت اكبر غبي بالدنيا
الكدامج جان عاجز يفهم مشاعرو

وطلع واكع بعشكج من اول نظرة

من اول مرة شفتج بيها تمشين تعبانة راجعة للبيت جنج حمامة مكسور جنحها لافة نفسج بالعباية مبين تعب الدنيا بوجهج وضاله بعفتج وعايشة بشرف وانتي بنص مستنقع
من شفتج بذاك اليوم .. وعرفت انتي شنو بس عقلي يكابر ويعاند ويفرض علي تصرفات ما جان لازم اتصرفها

لزم كفوفي سحبها باسهن وضل مخليهن ع وجهه مغمض عيونه بتعب
:- ليلى يمكن هاي اول مرة تطلع من گلب ولسان
اني اعشكج وميت بهواچ

سحبت ايديني ضربته حيل ودفعته
عطت بوجهه بغضب ودموعي تنزل
:- انت عذبتتتني مرمرررتني ولك شسووويت بيه ما اثق بيك بعد اخاااف منك كوم اطلع
منين ما اجيت

سحب ايديني حيل قيد حركتي وحضني حط راسي ع صدره ابجي بحركه اشهك
:- اعتذر منج وراسج ابوسه
غلطت وماكو بشر مايغلط اني امانج مثل ما كلتي وراح اضل طول العمر امانج .. اعاهدج امام الله
واني عند كلمتي

شهكت مقهورة ارجف ..وهو يمسح ع راسي يتحسر
:-اعشكج يَ ليل البنفسج .. حرب ابن الغربية وكع بعيون ليلته ومحد سمى علي وماريد احد يسمي علي اريد اوكع بيج اكثر
وانغرم بيج اكثر انتي تستاهلين .. تستاهلين اعشكج لحد الموت

ليلى: -لا تعووووفني بعد اموت والله اموت

:- اشششش ما اعوفج .. المثلج ما تنعاف
تمدد خلاني ع صدره ما مستوعبه بس دموعي تنزل وكلبي يرجف خايفة
لزم ايدي باسها

:- سامحيني ع كل دمعة نزلت من عينج حمامتي .. البريئة ..

:- والله ما اسامحك اذا ما ضليت وياي .. والله

:- وياج .. ما اعوفج ولا ساعة عهد مني

:- ولك شلون انطاك كلبك هيج تسوي بليتلك؟

:- غبي ..

ماكدرت انام باقي الليل خايفة .. وعيوني كل شوية افتحها واتحسس صدره اخاف عايفني
كمت فتحت الضوة وكعدت يمه خايفه وايدي جوة ايده

باوعتله حاله مو احسن حالي وكل شي بي يثبت جان متعذب مثل ما اني متعذبة

بجيت بقهر وامسح عيوني بساعدي ارجف
:- موتتني حرب

:- انت الموتيني ليلى انتي .. صدتيني بسلاحي وكتلتيني بي
اعترف انتي اخذتي كل عقلي وروحي وكلبي
واريد اكضي العمر وياج

:- ياليت عندي ابو اخابره اشكيله منك يجي يحاسبك ع السويته بيه
كملت كلامي وغطيت وجهي ابجي

كعد ع حيله حضني حيل وباس راسي
:- اني ابوج وانتي بنيتي فرضي علي العقاب واني اعاقب نفسي ..بالتردينه

:- اريدك تضل يمي ماتروح

:- هاي جائزة مو عقاب بالنسبة الي
هاي فرحة وسعادة .. ليل البنفسج بحضني
فرحي ياروحي .. ليلتي بحضني

يا طعم … يا ليله من ليل البنفسج
يا عذر …
يمامش بمامش و أحبك
طبع بگلبي من اطباعك ذهب
ترخص … أغلّيك و أحبّك
أنه متعلّم عليك هواي
يا سولة سكتّي
يا طواريّك … من الظلمه تجيني
چانن ثيابي عليَ غربه گبل جيتك
و مستاحش من عيوني

وعلى المامش علّمتني
گبل حبك …
آنه حب چثير گبلك ذوّباني
لگّحت بعيوني كل الطّلِع
گبلك …
و إنت توَّك عوِّگك يلفيَّك أشگر
عوّگك كلش زمانك عن زماني
شلون اوصفك ؟
و إنت كهرب
و آنه دمعة عيني … دمعة ليل ظلمه
شلون اوصفك ؟
و إنت دفتر … و آني چلمه
يلّي ما جاسك فكر بالليل
ولا جاسك سهر
يلّي بين حواجبك غفوة نهر
يلّي جرّة سما بعينك
خاف أفزّزها من اگلّك
آنه أحبّك …
مامش بمامش … و للمامش
يميزان الذهب و أدغش و أحبّك
سلّمت كل الحجي الوادم
و أرد أگلّك …
فرني حسنك يا بنفسج
و إنت وحدك دوختني
و علىٰ حبّك …
أنه حبيت الذي بحبهم لمتني
يا طعم … يا ليله من ليل البنفسج
يا عذر …
يمامش بمامش و أحبّك

كمت ع حيلي فرحانة وشكد ردت ازعل منه بس وضعه ماخلاني جنت اشوفه شكد متعذب ويحضن بيه يبوس براسي وايديني ويعتذر كل شوية

ضليت افتر انتظر الصبح وبس صارت بال6 خابرت الشيهانة ابشرها واحجيلها طارت من الفرح وكالت جنت حاسة راح يسوي هيج ويرجع ما يفرط بيج

ضليت طايرة مادري شسوي احضر ريوك لو اسبح لو اكشخ لو شنو اسوي

كعد هادي شافه بالمطبخ طار من الفرح .. وحضنه
كاله وين جنت مسافر

:- لمحافظتي حبيبي ورجعت اشتاقيت الكم يابطل

ضليت افتر عليهم فرحانة مثل الطير وعيني كل شوية تلمع وبكلبي صارت خوفه .. من هذا اليوم وصرت اخاف كل مايطلع اخاف مايرجع وشكد لاحظ خوفي وحاول يغير الوضع بس الخوف رافقني

يمكن ما مكتوبلي اعيش براحة ولازم اضل خايفة

بدأ دوامي وداومت ويا .. جانت ايام حلوة عشناها سوية بالجامعة واحنه زوجين
الدكتور حرب وليل البنفسج. . مثل ما هوا يكول

بس الغيرة تكتل ..الومه من يغار علي
وارجع اتعارك ويا من اشوف بنية تحاول تتقرب منه بأي شكل اشب نار بس اضم بكلبي انتظر نرجع للبيت وتكب العيطة

خابرتني دنيا بشرتني بولادتها جابت بنوته .. جانت طايرة من الفرحة والدنيا ماشايلتها

وبنفس هذا الوكت فاتتني الشهرية ورحت للدكتورة
اخذني حرب جان لازم ايدي طول الطريق وشفايفه تتحرك

كتله بفضول: -شنو تدعي؟

ابتسم: -ادعي تطلعين حامل صدك وتخلفيلي
اريد يختلط دمي ودمج بطفل يجمع بيناتنا للابد

ابتسمت برضا وفتت للدكتورة سوتلي سونار وبشرتني بحملي

طلعت طايرة من الفرح عيوني تدمع من شاف ضحكتي ودموعي ابتسم وجر نفس مرتاح
خجل من العالم وانتظر صرنا بالسيارة مسح دموعي وباس راسي
:- تجيبين بالسلامة ان شاءالله

هزيت راسي وعيوني تجري بفرح ..

:- اخذنه للسوك اريد اشتري شي باجر نروح نودع الشيهانة راح تسافر

هز راسه مبتسم وكل شوية يكول الحمدلله والشكر لله

زارنا الفرح ..

اهلا بذاك الضيف .. المنتظر من سنين

مادري شلون بس جنت صافنة واباوع للشيهانة تبجي وتحجي ويا خالتي نسيمة وريحانة
:- ما اكدر افارك العراق

نسيمة: - اووو يمعودة دروحي يم السوريين كله تئبرني ومحلاك وعنجد .. شبيج تنوحين

:- صعب ع الواحد يترك بلده

:- اوو هسه شنو قدملج هذا البلد تحجين الاخرس

ريحانة :- دروحي يمعودة عيشي حياتج هناك ارتاحي
امان .. واستقرار

هزت راسها ومسحت دموعها باوعتلي وكالت
:- كون تجين وياي

:- يا ولا اعوف العراق مااكدر

هي سمعت هيج ورجعت تبجي ..

نسيمة :- انتي. عازمتنا نودعكم لو تكعدين تنوحين والله ضوجتيني

مسحت دموعها وكالت :- اسفة بعد ما ابجي اعذروني والله بس فراقكم مو هين

نسيمة :- يااا ام جبران بجت نسكت وحدة تبجي الثانية

ضحكت بنص دموعها ومسحت وجها

صوت الزلم طالع من الاستقبال عالي يتابعون البطوله .. شوية وفزو فد نوب وضلو يعيطون ويركصون طلعو بنص الحديقة جبران وحرب وهادي وابو جبران
يهوسون فرحانين بكأس اسيا وكأنهم هم شخصيا فازو بي

ريحانة كالت :- دحكي حرب

ضربت ايد بأيد متحسفه من شفته مخلي هادي فوك اكتافة ويركصون

خربت تربية السادة ..خربها معركة ابن الغربية

الشيهانة جرت نفس وكالت
:- العراق سجن قاسي بس احبه واحب جحيمه

:- حتى جحيمه بالنسبة الي جنة ..

:- جنت اتمنى اعرف منو عدونا الحقيقي واكدر اخلص منه واضل بالعراق بس للاسف ماعرفت
اذا اختي هدير مالها اثر وكل شي يثبت هي مسافرة
منو اله مصلحه غيرها يأذينا

رفعت اكتافي مادري ..

دخلنا كعدنا لزمت ايدي توصيني ع نفسي و ع
هادي وحرب ..

ليلى: - ياليت اكدر اطير واجي الج. لسوريا. بالوقت الاريده واشوفج
هزت راسها. لا وكالت :- حتى لو نكدر ما راح نطير لأن احنه حمائم تخشى الطيران

النهاية 🖤..

نهاية الجيل الاول .. ريحانة شمس لولوة شعلان هادي
هم شخصيات الجيل الثاني ..

ادري راح تسألن ليلى شنو جابت 🤣جابت ولد ويا هادي سماه ابن الغربية مصعب ..

الختام 2007 ..