تحميل رواية هند والدجال بقلم حنين عادل pdf

رواية هند والدجال

الفصل الاول1

بقلم حنين عادل

انتي عبيطة اروح لدجال اقوله طلع لي ابويا من الحبس ! الله يهديكي اكيد ربنا هايعدلها

سارة : انا عارفه البير وغطاه وسواء عمتك أو خالتك ماحدش هيساعد بجنيه دول يموتوا علي القرش يا بنتي وابوكي ارزقي اليوم بيومه انا شايفه أنه مافيش حاجه لو روحتي للشيخ شامل مش هاتخسري حاجة مش يمكن كلامه يعجبك !

*_____________________________*

في منطقة شعبية ..

خبط جامد علي الباب ..

بتجري بنت بسرعة وتحط طرحة علي شعرها وتفتح وهي بتسأل مين ؟!

بتستغرب لما بتلاقي ظباط شرطة واقفين

بيتكلم واحد منهم :

فين عبد الحميد أحمد بيومي

بتخاف البنت وبتقول :

ده بابا بس مش هنا بابا في الشغل

بيجي يدخل من الباب ومعاه الظباط فبتقفل الباب مش بيكون ظاهر غير دماغها

_بابا قال لي وهو مش موجود ما ادخلش حد !

بيبتسم الظابط علي سذاجتها وبيقول:

بس احنا مش حد احنا معانا أمر بتفتيش البيت

بيزقوا الباب وبيدخلوا يقلبوا الدنيا

بتقرب منهم بدموع :

ليه كده حرام عليكم انا لسه منضفه ما حدش منكم هايمشي غير لما يظبط معايا الدنيا والا عليا وعلي أعدائي

بيضحك الظابط علي كلامها وبيقرب منها :

عندك كام سنة ؟!

رفعت حاجبها :

بتسأل ليه حضرتك بابا قال لي ماكلمش حد غريب بس هقولك وخلاص انا عندي 15 سنة والسنة دي خلاص انا في تالتة اعدادي وبذاكر عشان اجيب مجموع كبير يدخلني ثانوي عشان اثبت للكل أن انا قدها وان تعب بابا حبيبي مارحش علي الفاضي

واكيد ام محمود العجلة اللي قال ايه كانت عاوزه تجوزني لابنها الميكانيكي العره هو اه الشغل مش عيب بس ده حضرتك احول واعبيط تخيل هاتجوز احول واعبيط

انا ماعنديش مشكلة اتجوز واقعد في البيت ما الست آخرها بيت جوزها سيبك من كلام عمو قاسم أمين ده تلاقيه كان مخنوق من مراته فقال يبعدها عنه بشوية كلام عبيط الست ليها تتدلع وتأنتخ بس بلا كرير بلا جزر بس عارف .....

قاطعها بضحك:

ايه يابنتي اومال لو ابوكي كان قايلك كلمي حد غريب كنتي عملتي ايه يا حاجة !

عقدت بوزها :

هو انا بتكلم كتير شوية بس تقريبا من قعدتي لوحدي هو انتم بتدوروا علي ايه بالظبط بس قولي وانا اساعدك بدل ما نعكشتوا الدنيا كده بالله انا مفاصلي تعباني وانا بعاني يا ختييييي

جرت من قدامه فكلهم جروا وراها وهما مطلعين المسدسات

لفت ليهم بخوف وهي مبرقة وماسكه طرحتها بعد ما طفت البوتجاز :

في ايه يا شباب دا بسبب قدمكم السعد الأكل اتحرق انتوا عاوزين مننا ايه ليه يا دنيا كل المآسي علي مقاسي!

مشوا وكملوا تفتيش أما الظابط كان واقف معاها :

اسمك ايه يا حلوة

_الحلوة تبقي امك يا طعم !

رفع حاجبه وقال: نعم !

هي بتفكير : يخربيتك دا ظابط مش حموكشه اللي بيعاكسك

ابتسمت:

لا مؤاخذه اسمي هند عارف يوم ولادتي حصلت مشكلة بنت لذينه تيتا ام بابا اتشاكلت مع تيتا ام ماما اصل تيتا ام بابا كانت عاوزه تسميني سحر علي اسم عمتي الحرباية وتيتا ام ماما كانت عاوزه تسميني فاتن علي اسم خالتي العقربة قام بابا عشان يفض المشكلة دي والأزمة تتحل راح مسميني هند علي اسم البت اللي كان بيكراش عليها زمان وكان بينهم حب ولڤلڤة

بيقولوا كانت بنت قمر بس تيتا ام بابا ماحبتهاش اصلها كانت بتغير من طوب الأرض و.......

قاطعها : ايييييييييه خلاص

هند : براحتك فاتك كتير أما اسكت بقي عشان مش بتكلم مع اغراب

_سيادة النقيب نوح لقينا دي !

بيمد نوح ايديه وبياخدها :

الله ايه الحلاوة دي !

هند : الله نوح اسمك حلو زي ابطال الروايات ايه مي كده هات وريني شيكولاته هات حتة والنبي والنبي انت ما تعرفش سعرها بقي عامل كام دا بقي في متناول المواطن النجيب ساويرس

بتشد الكيسة منه وبتفتحها بسرعة وتجري وتاكل حتة كبيرة وبتبلعها ..

وقفت فجأة وبصت لهم كلهم :

ايه اللي انا كلته ده تكونش شيكولاته اكسبير يعني منتهية الصلاحية ؟! هههه الانجليزي بتاعي حكاية

ايه ده دقاااات قلبي بتعلي كده ليه تكونش عاوزه تقولي أن الحياة دقائق وثواني؟

انا هنام ولا ايه عيني بتقفل لوحدها ليه انا حرانه ليه أنا سقعانه ليه انا هنا ليه انا مين انا فين انا ليه ما خلاص طه انتهي والنعمة لاجبلك بكره يا واد يا ستها أحاسيسي مشاعري عواطفي جوارحي كله انتهي ! هههههه آه أي اي آه

كانوا واقفين يتفرجوا عليها وهما مستغربين

وفجأة وقعت علي الأرض علي وشها وفقدت الوعي....

بقلم الكاتبة حنين عادل كاتبة الجيل

*________________________*

وفي مستشفي حكومي!

بتفوق هند وبتبُص علي واحدة وبتبتسم :

عمتي الحرباية اقصد عمتي فيكي الخير والله

بترد عمتها :

قلبي عندك يا حبيبتي !

بتبُص لها وهي مستغربة وبتلاقي خالتها ونينتها داخلين عليها والكل حزين ..

هند باستغراب من حالتهم :

هو فين بابا ماجاش ليه وهو ايه اصلا اللي جرا لي مش فاهمه ؟!

عمتها بدموع :

ابوكي اتقبض عليه كان في الشغل يا حبة عيني ورجع علي ملا وشه لما عرف حالتك خدوه من عالباب حتي قبل ما يطمن ويشوفك !

بصيت لها وفي غصه في قلبي واتمنيت أنها تكون بتضحك زي عادتها :

بتهزري صح بس علي فكره انا ماضحكتش

حطت وشها في الأرض بحزن...

قومت من علي السرير بسرعة :

انا لازم اروح له ومعايا محامي مش هاينفع اسيبه لوحده ابدا

بترد جدتها :

وانتي هاتعرفي تعملي ايه يا بنتي دا ابوكي شيلته كبيرة دا اتجار في المخدرات اللي انتي فكرتيها شيكولاته

بصت لها بصدمة :

مخدرات ايه ؟! اكيد في حاجة غلط اكيد في حد حطها لينا واحنا مش في البيت بابا مستحيل يعمل حاجة غلط مستحيل

وكالعادة تيتا وعمتي وحتي خالتي شايلين أيديهم حتي ماعرضوش المساعدة ولو عزومة !

في اليومين دول ما حدش بيشيل هم حد !

طلعت جري من المستشفي رجعت الحارة لأول مرة اركز مع نظرات الناس واخد بالي من نظرات الشماتة في عيون كتير

والشفقة في عيون ناس قليلين خالص

حتي الناس اللي كنت فكراها طيبين طلعوا شمتانين

عديت قدام الميكانيكي الاحول اللي رفضته اللي ضحك ضحكة شماته وقال :

كل واحد بياخد جزاؤه صحيح الحمد لله الذي عافانا مما ابتلى به غيرنا طول عمرنا بناكلها بالحلال وراضيين بأقل قليلنا وربنا مبارك لنا في القليل!

ردت عليه مامته اللي كانت قاعدة جمبه( ام محمود):

الحمد لله يا بني علي نعمة الحلال ربنا يبعد عنا الحرام وولاد الحرام !

لفيت عشان ارد عليه بس لقيت أن مالوش لازمة الرد لازم اثبت براءة بابا وبعدها هاروقهم كلهم واحد واحد ....

الفصل الثاني من هنا

رواية هند والدجال

الفصل الثاني2

بقلم حنين عادل

لفيت عشان ارد عليه بس لقيت أن مالوش لازمة الرد لازم اثبت براءة بابا وبعدها هاروقهم كلهم واحد واحد

طلعت جري علي شقة قديمة عليها لوحة مكتوب عليها الأستاذ حمدي حمدي المحامي في الكُفت اي مشكلة وليها حل ولا تشيل اي هم ولا تحتار انت احسنت الاختيار! ..

بصيت علي اللوحة وبلعت ريقي بخوف :

ربنا يستر !

دخلت لقيته قاعد بفلينه حمالات بيضة عليها بيجامة كستور الچاكت بتاعها مفتوح ولابس نضاره سودا عدساتها مش موجودة في أيده بقصماته عاملها سيجارة في بوقه

قام وقف :

اه واخيرا زبونة اتفضلي يا استاذة الأستاذ حمدي حمدي محامي في الكُفت مش عاوزك تقلقي اي مشكلة وليها حل ولا تشيلي اي هم ولا تحتاري لانك احسنتي اختياري هههه ايه المشكلة بالتفصيل يا فندم ؟!

نفخت هند :

جرا ايه ياض يا حمدي جرا ايه يا بن عمتي مش عارف المصيبة اللي خالك واقع فيها !

وقف حمدي وبص للشباك :

عارف طبعا ! بس مين هايديني اتعابي انا هاشتغل لله والوطن ولا ايه ؟

هند : اه يا واطي عاوز كام اخلص

حمدي : مليون جنيه ماينقصوش جنيه

هند : نعم نعم انت هاتهرتل ولا ايه

حمدي : الف جنيه ماينقصوش جنيه

هند رفعت حاجبها: انا غلطانة اني عبرتك ده انا جيت أجبر خاطرك يلا الف جنيه ايه اللي ادهمولك اروح ادفعهم لمحامي بجد مش محامي مترب من قلة الاستخدام !

قامت وقفت ومشت فجري وراها :

استني بس نتفاهم

هند: لأ !

نزلت عالسلم فوقف قصادها.

حمدي: خلاص فور فري يعني مجانًا .

هند بصت له : برده لأ

حمدي : والنبي نفسي اخش قسم الشرطة و اروح المحكمة اهئ هئ

هند : صعبت عليا يا حرام طب هات 100 جنيه

بيطلع 100 جنيه بسرعة وبيديها ليها ...

هند : تمام اتفقنا إلبس حاجة عدلة بقا بدل العك ده انا هستناك تحت

حمدي:فوريرة !

بتنزل هند وبيبُص حمدي عليها :

تؤ تؤ يا حبيبي يا خالي ماكنش يومك !

بيلبس حمدي وبينزل وبيمشي معاها ومعاه شنطته الجلد السوده تحت باطه

حمدي : ما تقلقيش براءه براءه ادخلي اقعدي علي اي استراحة أما اروح اجيب لي كوباية شاي بسرعة عشان اركز ..

قعدت علي الاستراحة وهي بتضرب كف في كف وبتعدل طرحتها

_ يارب استر يارب ربنا يطلعك بخير يا حبيبي يا بابا هو اتأخر لي كده !

بتسمع صوت زعيق والناس بتتلم كتير بتقرب تشوف في ايه

بتلاقي حمدي والظابط نوح بس مش بيكون لابس ميري وحمدي بيزعق ليه .

حمدي : انت ما تعرفش انت بتكلم مين طب اهو

بيدلق حمدي عليه الشاي بعصبية علي وشه

الظابط نوح بيمسح الشاي وبينده بزعيق:

يا عسكررررررررري أمسكوا الحمار ده

بيبلع حمدي ريقه بخوف :

نهار اسود انت ظابط

بيشوف هند فبينده لها بخوف :

هند هند شوفيلي محامي والنبي ابوس ايدك

بتمشي هند وراهم وهي بتستسمح نوح يسيبه وبتترجاه

بيقعد نوح علي مكتبه وبيحط الجاكت بتاعه علي الكرسي وراه وبتقعد هند علي الكرسي قدامه وحمدي ماسكينه اتنين عساكر

حمدي بخوف : سامحني يا باشا اللي ميعرفك يجهلك

هند : سامحه والله دا عبيط مايغركش أنه عجل كده ده أهبل

وعلي نياته

حمدي : اه والله

بيبتسم نوح: عشان خاطرك بس سيبوه

بيعدل حمدي الجاكت بتاع البدلة بتاعه وبيقعد علي الكرسي

حمدي: حمدي حمدي المحامي حاضر مع المتهم

نوح: متهم مين ؟!

هند : بابا ! والله بابا عمره ما عمل حاجة غلط ولا اكلني بقرش حرام ولا عمره ساب فرض حتي الفجر بيصليه في الجامع اقوله يا بابا مش هاتقدر تروح شغلك يقولي عشان ربنا يطرح البركة في يومي وربنا هو المعين

بيشاور نوح للعساكر أنهم يجيبوا ابوها

نوح : للأسف حد عمل بلاغ أن ابوكي بيتاجر في الممنوعات وجينا لقينا الدليل حشيش !

بيدخل ابوها فبتجري عليه تحضنه وبتمشي أيدها علي دقنه بحب:

ما تخافش يا حبيبي هاتطلع منها بإذن الله تعالى هاتعدي يا ابو هند زي ما اي حاجة عدت دا انت جبل !

وقف حمدي : سيدي القاضي حضرات السادة المستشارين !.

نوح برفعة حاجب :

قاضي ايه يابني ومستشارين ايه احنا مش في المحكمة

حمدي بتوتر : اه انا اسف ! دلوقتي سعادتك موكلي برئ براءه الذئب من دم ابن يعقوب والله العظيم تلاته برئ وحياة أمي برئ وغلاوة هند عندي برئ !

نوح : لا مش مصدق الا لما تحلف عالمصحف

حمدي : عملت حسابي

بيطلع من شنطته المصحف وبيحطه علي عينه :

والمصحف ده علي عيني عم عبد الحميد برئ

بص عبد الحميد ل هند :

مالقيتش الا العبيط ده يا هند !

هند : هاجبلك واحد تاني متقلقش .

نوح : اطلع بره !

حمدي: بتطرد محامي أثناء تأديه عمله يا حضرة الظابط !

نوح : يا عسكررررررررري

حمدي بسرعة : انا ماشي عن اذن سيادتك مش عاوز حاجة ! .......

روحت البيت بسرعة ادور علي اي فلوس احاول اقوم بيها محامي ل بابا ..

مافيش ...

قعدت هند علي الكنبة بقلة حيلة :

وبعدين حتي لو روحت لعمتي أو لخالتي هيقولوا منين والظروف والجوابات !

ياربي احنا بنعدي اليوم بيومه اعمل ايه انا دلوقتي ..

بتسمع خبط علي الباب فبتقوم تفتح .

هند : سارة ...

بتحضنها وبتطبطب عليها ..

هند: ادخلي يا سارة

سارة بتقعد : ايه اللي حصل لعمو عبد الحميد ده

هند : حد متضايق منه عملها فيه أن شاء الله ربنا يعاقبه في نور عينه أما يبهدل راجل كبير أمله في الدنيا يعيش مستور

سارة بتوتر : طب وهاتعملي ايه قومتي له محامي !

هند : اخد اربع ايام علي ذمة التحقيق خدت الموكوس حمدي النيلة قعد يحلف للظابط أن بابا برئ وحلف له كمان عالمصحف

ضحكت سارة : حمدي ده نكته

هند: المشكلة أن مافيش فلوس اقوم بيها محامي انا حاسه اني عاجزة لاول مرة في حياتي احس اني وحيدة مش لو امي الله يرحمها كانت جابت لي أخ يسندني ويسند ابوه كان فاته واقف معايا دلوقتي

سارة : ما انتي اهو بميت راجل وبعدين انا عندي الحل

هند : وساكته قولي بسرعة ..

الفصل الثالث من هنا

رواية هند والدجال

الفصل الثالث

بقلم حنين عادل

سارة : ما انتي اهو بميت راجل وبعدين انا عندي الحل

هند : وساكته قولي بسرعة

سارة : الشيخ شامل

هند : الدجال !

سارة : أيوه اي طلب بتطلبيه منه بيحققه ليكي مقابل حاجات لا تذكر يعني

هند : ده ازاي ده بقي

سارة : أنا روحت له عشان زي ما انتي عارفة أهلي كانوا رافضين عبد الرحمن خطيبي رفض تام كانوا بيقولوا عليه واد صايع ومستحيل يوافقوا مع أنه والله طيب بس ماكانش في قبول بينهم وزمان عبد الرحمن كان شقي لكن ربنا هداه بس بابا ماكانش عاوز يخاطر بيا غلبت معاه لحد ما واحدة اعرفها حكت لي عالشيخ شامل روحت للشيخ شامل من هنا واتخطبت له من هنا

هند : دي أمور هايفه وبعدين يمكن باباكي لسه شايفك صغيرة أو راجع نفسه لما لقاكي متعلقة بيه ولو فرضا هو اللي ساعدك ايه المقابل يعني؟!

سارة : هو مش فلوس و انا ماينفعش أقول لحد علي المقابل ده عشان ماتأذيش جربي مش هاتخسري حاجة لو مش عجبك طلبه خلاص

هند : انتي عبيطة اروح لدجال اقوله طلع لي ابويا من الحبس ! الله يهديكي اكيد ربنا هايعدلها

سارة : انا عارفه البير وغطاه وسواء عمتك أو خالتك ماحدش هيساعد بجنيه دول يموتوا علي القرش يا بنتي وابوكي ارزقي اليوم بيومه انا شايفه أنه مافيش حاجه لو روحتي للشيخ شامل مش هاتخسري حاجة مش يمكن كلامه يعجبك !

هند : مستحيل اروح لدجال انتي عوزاني انطرد من رحمة ربنا !

مشت هند وانا بفكر هاعمل ايه هاجيب فلوس منين ..

صوت خبطات علي الباب خوفت منها ندهت قبل ما افتح :

مين مين

فتحت لما لقيته صوته الميكانيكي الاحول

_عاوز ايه

ابتسم بشماته : قلبي عندك ربنا يخرج ابو نسب بالسلامة هه دا لو خرج يعني

انا بس حبيبت اقولك انك دلوقتي ابوكي بقا رد سجون وصعب تلاقي حد يتجوزك بس انا هتنازل واستر عليكي وكمان هاساعدك واجبلك محامي عقر يطلع لك ابوكي بس تكوني ليا خدامة طول العمر !

ما حسيتش بنفسي الا وانا قالعة شبشبي وكان جمبي المقشة بتاعت البلاط ونازله فيه ضرب وكان بيجري قدامي وانا وراه

_تستر علي مين ياض يا مفضوح يا اللي ريحة زناختك جايبة اخر الشارع يااحول يا عبيط ابويا ده سيدك وسيد الحارة

وقفت في وسط الحارة وبكل قوة بثبتها لنفسي قبلهم :

يا حارة معفنة ابويا هايخرج منها ويقطع لسانكم وديني اللي عمل فيه المغرز ده لاوريه أبشع أيام حياته واوريه البنت اللي عندها 15 سنة اللي ابوها علمها ورباها تبقي ب100 راجل هاتعمل فيه ايه

طلعت فوق بعد ما اديته الطريحة التمام وهديت وانفتحت في العياط :

حتة كلب زي ده يا بابا اتجرأ وقال لي كده ! .

احنا اللي عمرنا كعبنا عالي عليهم

مسحت دموعي وانا بقول لنفسي اني قوية وبحاول اواسي نفسي لاني لوحدي فين تيتا فين عمتي فين خالتي فين اهلي للأسف انا من غير وجود بابا جمبي بقيت يتيمة

مسكت تليفوني النوكيا الصغير اللي بابا جايبهولي عشان يطمن عليا وانا بروح دروسي ورنيت علي صحبتي سارة

سارة : ايوه يا هند

هند : انا عاوزه اروح ل الشيخ شامل !

*_______________________________*

مشيت مع سارة لحد ما روحنا بيت شكله قديم اوي وقدامه شجرة كبيرة بس أغصان بس مش عليها ورق خالص شجرة ناشفة مافيش فيها روح

البيت تصميمه غريب لفت انتباهي أنه مش زي البيوت اللي بنشوفها العادية ولا علي طراز اسلامي مثلا زي بيوت زمان

دا متصمم بفوضوية وعشوائية كبيرة تحس ان غرفه مثلثات مش مربعات زي الاوض العادية منظر مؤذي للعين

دخلنا كان كل الحيطان مدهونة باللون الأسود ومتعلق عليها لوح مكتوب عليها حروف وارقام في مربعات متخططة صغير بيت كئيب ويخوف

انا في العادي قوية مش بخاف بس الخوف دب قلبي

وصلنا أوضته والغريب أن البيت كان فاضي وفجأة صوت غراب فزعنا وخلانا صوتنا واحنا لسه قدام أوضته والباب مش مفتوح

لفيت وانا بنهج وبقول لسارة :

لأ انا مش هاكمل انا خايفة انا ماشية

الباب انفتح وكأن حد فتح علينا جهنم ماسورة دخان ضربت في وشنا

قعدت اكح انا وسارة مش قادرين ناخد نفسنا لحد ما الدخان راح والرؤية بدأت توضح

كان قاعد وقدامه كورة كبيرة زي اللمبات بتاعت الديسكو تقريباً كريستال اللي بنشوفها في التليفزيون وعليها رسمة نجمتين فوق بعض وشكله غريب اوي

كان لابس تاج وشعره اسود طويل ومضفره ولون بشرته ابيض لدرجة تخوف وعيونه خضرا ولابس عباية سودة عنده مثلا في حدود 30 سنة

شاور أننا نقعد قدامه فقعدنا ..

شامل : سارة ممكن تمشي وخليكي انتي يا هند

هزت سارة راسها وقامت تقف فمسكت هند ايديها بخوف

شامل بابتسامة : ما تخافيش يا هند

سارة مسكت ايديها وابتسمت وكأنها بتطمنها ومشت

هند : انا مشكلتي....

قاطعها شامل : انا عارف كل حاجة !

هند بإبتسامة وثقة: سارة حكيت لك اكيد صح ؟!

شامل : لأ انا عارف عنك كل حاجة من يوم ما اتولدتي

هند بلا مبالاة : هاتعرف تطلع بابا؟!

ابتسم شامل: أكيد

هند : مين اللي عمل فيه كده !

شامل: الميكانيكي

اتعصبت هند ونفخت بضيق:

عوزاك تنتقم لي منه تعيشه ايام سودة

شامل بابتسامة: سهلة اوديه ورا الشمس بس انتي قد طلباتي

هند بلعت ريقها بخوف :

ايه هي طلباتك ؟!

قام وقرب منها وابتسم:

لما يبقي في بنت حلوة وراجل في مكان لوحدهم تفتكري ايه هايكون طلباته ؟

اتوترت من نظراته وابتسامته الباردة

قعد جمبها فبعدت عنه بخوف قرب اكتر فقامت تجري وقبل ما تطلع من الباب بثواني الباب اتقفل جامد

حاولت تفتحه بخوف وهو بيقرب منها بخطوات بطيئة وابتسامة باردة

ركنت ضهرها علي الباب وقالت بخوف وتحذير :

وديني وما أعبد لو قربت مني لأموتك وأموت نفسي

قرب أكتر فجريت لعند الكورة الكبيرة وشالتها وحدفتها عليه ..

كان بيروح وراها وهو مبتسم ...

قالت بعصبية : انت يا شيخ زفت والله هاموتك

وفي ثانية مسكها وهو بيحاول يبوسها غرزت ضوافرها في رقبته بغل

بعد عنها ومسك رقبته بغضب شافت سكينة عليها دم علي الترابيزة اللي كانت قدامه مسكتها وكانت هاتضربه بيها

مسك أيدها ورفعها لفوق وقع السكينة وحاوطها بايده التانية شل حركتها

قرب وهو بيبُص لشفايفها برغبة فعضته في رقبته بعد عنها وهو حاطط أيده علي رقبته

استغلت الوضع وضربته بالشلوت في بطنه ضرب متتالي ورا بعضه

لحد ما وقع عالأرض

طلعت تجري ناحية الباب بتحاول تفتحه وتشد فيه سمعت صوت تسقيف

لفت تبُص عليه باستغراب .

كان واقف مبتسم :

اقعدي يا هند ما تخافيش دا كان اختبار دلوقتي هاقولك طلبي الحقيقي

بصت له بتوتر...

شامل : ماتخافيش ..

قعدت هند وهي باصه ل السكينة عشان لو حاول يعمل حاجة تلحق تجيبها تدافع عن نفسها بيها

هند بصت ل شامل :

ها ايه هي طلباتك ؟!

شامل بيسكت لثواني وبيرد:

عاوزك !

هند باستغراب :

عاوزني ازاي مش فاهمه عاوزني اعمل لك ايه يعني؟!

ابتسم شامل علي سذاجتها وقال : عاوز اتجوزك

ابوكي هايطلع من المصيبة اللي هو فيها وهايكون غني وصحته كويسة كمان

الميكانيكي هايشوف اسوء ايام في حياته

هاتجيبي مجموع كبير وتدخلي ثانوي

هاحقق لك كل أحلامك كل اللي هاتطلبيه هتلاقيه

في مقابل....

بصت له هند بتركيز وهي مستنية يكمل كلامه

بيكمل كلامه :

انك لما تتمي ال 18 سنة تتجوزيني وتخلفي لي عيل يشيل اسمي

هند بصدمة : اشمعنا انا اللي اتجوزك ؟!

شامل : لأن نسبة اني ألاقي بنت كويسة اليومين دول ماحدش لمسها أو لها ماضي مش مشرف قليلة جدا لكن واخيرا لقيت بنت كويسة تفتكري اضيعها من ايدي ولا أمسك فيها بإيدي وسناني

هند : وافرض ما بخلفش مثلا ما انت هتتجوزني عشان اجيب لك ولد

ابتسم : لأ انا متأكد انك بتخلفي

هند : طب عاوز ولد ليه وانت يعتبر عندك كل اللي انت عاوزه

شامل : عاوز ولد يكمل طريقي من بعدي هايكون بقدرات خارقة للطبيعة زيي ها قولتي ايه ؟!

هند بصت ليه بتفكير:

ها اوافق عشان يطلع بابا ولا لأ انا هوافق لحد ما يطلع لي بابا وبعد كده اشوف له حل وابلغ عنه لو ضايقني

هزت هند راسها بالموافقة وهي مبتسمة

ابتسم شامل وقال :

بعد ما تتمي 18 سنة هاتكوني ليا ولو اخليتي بالاتفاق هاتحل عليكي لعنتي هايكون نهارك ليل وليلك نهار هاتكوني لعنة واذي وموت لكل اللي بيحبوكي وبتحبيهم !

هند باستغراب : مش فاهمه حاجه!

شامل بابتسامة : مش لازم تفهمي المهم تشوفي وتعرفي انك بتتعاملي معايا انا !

بمشي من عنده بيكون المغرب بروح البيت وانام وانا بفكر في كلامه بخوف

_ دا دجال مش هايقدر يعمل حاجة كله في الفاضي

نمت واخيرا ....وقبل ما اغمض عينيا النور قطع قومت اجري اجيب شمعة لقيته قدامي اول ما ولعتها بعدت بخوف عنه بس قرب مني وحط أيده علي رقبتي صرخت بخوف .

الفصل الرابع من هنا

رواية هند والدجال

الفصل الرابع4

بقلم حنين عادل

نمت واخيرا ....وقبل ما اغمض عينيا النور قطع قومت اجري اجيب شمعة لقيته قدامي اول ما ولعتها بعدت بخوف عنه بس قرب مني وحط أيده علي رقبتي صرخت بخوف

فجأة فتحت عنيا وطلعت كنت نايمة والساعة بقت تسعة قومت غسلت وشي وبسرح شعري قدام المراية وافتكرت الحلم وببص علي رقبتي لقيت نفس الرسمة اللي كانت عالكورة عند الدجال نجمتين فوق بعض

حاولت امسحها بس لكنها زي وشم محفور عالجلد قعدت عالسرير بخوف وبدأت أحس لأ اتأكدت اني حطيت نفسي في مشكلة كبيرة اوي

لقيت الباب بيخبط جريت بخوف ووقفت وراه وانا بقول مين

_افتحي يا هند يا بنتي

هند بفرحة : بابا !

فتحت الباب بسرعة وحضنته

قعد وقعدت جنبه وانا ماسكة أيده وببوسها :

طلعت ازاي حد قوم لك محامي

_لا الحمد لله طلع مش حشيش طلع حاجة شكله بس مطبوخة مش مخدرة

هند بفرحة : الحمد لله الحمد لله

سكتت فجأة وبعدين قالت:

بابا انا عاوزه احكيلك حاجة

_قولي يا بنتي !

حكيت له اللي حصل ساعة ما روحت ل شامل بس ما قولتش ليه أنه حاول يتقرب مني وحكيت له عن النجمة اللي ظهرت علي رقبتي ...

اتعصب :

بتروحي لدجال ياهند دي آخرة تربيتي ليكي الله اعلم بقا عمل لك عمل ولا ايه ربنا يستر من الايام الجاية

هند بدموع : والله يابابا كنت خايفة عليك اوي ومالقيتش حل غير كده سامحني ...

حضني وطبطب عليا وانا في حضنه بحس اني قوية يارب يفضل طول العمر جمبي

بنسمع صوت سارينة البوليس وفجأة بنسمع صويت

بابا بينزل جري يشوف في ايه وانا بلبس اسدالي وبنزل بسرعة

محمود الميكانيكي كان بيقول بتوتر:

والله يا باشا انا ما اعرف حاجة عن المخدرات دي انا عمري عايش في حالي

ابتسمت وانا ببُص ليه الجزاء من جنس العمل

محمود بخوف والعساكر ماسكينه: ياما والنبي اوعي تسيبيني قومي لي محامي بسرعة

_حاضر يا بني ربنا يجازي اللي كان السبب

ركب البوكس مانكرش أن قلبي وجعني أن ده بسببي بس هو ليه قلبه ما وجعوش لما عمل كده في بابا مش العين بالعين والسن بالسن !

*____________________________*

بعد 3 سنوات ..

بتفتح عينيها وهي مبتسمة في بيت كبير

بتقوم من علي سريرها تدخل الحمام وتاخد شاور وتطلع تسرح شعرها زي عادتها بيبان في المراية أنها بقت ليدي جميلة وجسمها بقي متفجر الأنوثة

بتنزل علي السلم وتروح تقعد علي السفرة بعد ما باست أبوها في خده

هند: صباح الخير يا عُبد

ابوها : صباح الفل يا ست البنات ها فكرتي في الموضوع اللي قولت لك عليه

هند بتوتر: يا بابا انا مش بفكر في موضوع الارتباط ده دلوقتي انا لسه صُغيرة

ابوها: صغيرة ولا لسه خايفة من كلام الدجال

هند: وما خافش ليه يا بابا هو اللي طلعك وقال لي انك هاتتغني وفعلا بقيت غني هو نفذ الاتفاق وانا لسه انا هتم ال18 كمان كام يوم ومرعوبة لأني لو مانفذتش اللي هو عاوزه واتجوزته قال لي هاكون اذي حبايبي اللي حواليا وانا ماليش حبايب غيرك يا بابا ومش هقدر استحمل لو حصل لك حاجة أو لو دخل حياتي حد واتآذي بسببي

بيبدأ الفطار وهو مبتسم لأنه سمع الكلام ده منها كتير : انا ربنا كرمني اوي الفترة الأخيرة

عارفة انا لما دخلت السجن قولت أن الدنيا خلاص وقفت وان خلاص انا انتهيت لكن خرجت منه بتدبير ربنا ...بتدبير مين ربنا.

كرمني أخر كرم ...كنت واحد عايش اليوم بيومه راضي بقليلة شغال اوميجي أسطي معلم بس الحظ لعب معايا والشغل كبر وجالي طلبات اكتر اشتغلت اكتر لحد ما بقيت انا الريس وتحت ايدي صنايعية اتعرفت اكتر والورشة بقت اتنين وتلاتة ومصنع اثاث ومعارض وكله بفضل ربنا

لو الدجال هو اللي خلاني غني ليه اشتغل ما قومش من النوم الاقي الفلوس جاهزة ؟!

هند : طب ما حضرتك شغال من زمان اشمعنا الفترة دي بالذات

ضحك عبد الحميد:

ربنا ...لقاني صابر وراضي وكرمني في اخر ايامي يا بنتي يا حبيبتي الدجال ده شغال علي الوهم بيوهمك أنه الخير اللي دخل حياتك وهو بيكون شيطان وشر

كل حاجة بإيد ربنا الغني والفقر الحياة الموت الحب الكره

السعادة الحزن القوة والخوف

هند وهي بتشاور علي رقبتها : طب والوشم اللي علي رقبتي يا بابا

عبد الحميد: مش قولتلك هما شغلتهم الوهم دي حركة خوفك بيها مش اكتر ملك عقلك بيها عشان كل ما تشوفيها تفكري فيه وتخافي منه اكتر انا عاوز يا بنتي اطمن عليكي قبل ما اموت

هند : بعيد الشر عنك يا حبيبي ربنا يطول في عمرك ويحفظك ليا

عبد الحميد : الظابط نوح من يوم ما شافك وانتي عندك 15 سنة وهو طلبك مني وانا قولت له إنك صغيرة وهو قال إنه هيستناكي لحد ما تتمي ال18 بيحبك يا بنتي ادي له فرصة

هزت راسها بابتسامة ففهم ابوها أنها وافقت

ما نكرش أن من يوم ما شوفته وانا قلبي متعلق بيه بس خوفي من شامل كان مشتتني قررت واخيرا أن حتي لو شامل ظهر تاني مش لازم اخاف كفاية خوف لازم أواجه خوفي لازم أواجه كوابيسي اللي بيظهر لي فيها وهو بيتجوزني غصب عني لازم أواجهه وربنا يستر !

*__________________________*

يا دبلة الخطوبة عقبالنا كلنا ونبني طوبة طوبة في عش حُبنا نتهني بالخطوبة ونعيش من قلبنا ...

كان في حفلة كبيرة في الجُنينة..

كنت بلبس في اوضتي وسارة صاحبتي بتساعدني

سارة بابتسامة :

ما ستعجلتيش شوية دا انتي في سنة تالتة ثانوي ولسه ليكي كام سنة كمان هاتعملي ايه ؟!

ضحكت هند : اكيد هاكمل مش هاتجوز بكره يعني لسه هانتخطب سنة مثلا ويمكن اكتر يلا اقفلي لي سوستة الفستان هو في ايه

مالك ليه حساكي متوترة كده ومش علي بعضك وشكلك بهتانة وغريبة ؟!

سارة : مافيش مشاكل بيني وبين جوزي

هند: ليه خير مش ده اللي قعدتي من تعليمك عشانه في ايه يعني ؟!

سارة بضحك : ولا حاجة هما الرجالة كده نكدية .

الباب بيخبط ..ابوها بيفتح الباب

عبد الحميد بحُب: بسم الله ما شاء الله ايه الجمال والحلاوة دي..

كانت لابسه فستان هافان ستان وليه ديل طويل ورا وعليه طرحة نفس لونه مع ميكب سيمبل ورسمه عيون فرعونية ..

ابوها انكجها وطلع بره الأوضة وسط زغاريط ستها وخالتها وعمتها اللي بقوا حبايبهم من لما ربنا كرم ابوها وبقي غني

بصت سارة عليها وهي ماشية مع ابوها بحزن ...ونظرات غير مفهومة .

نزلت علي السلم والعريس كان واقف مستنيها خدها وقعدوا عالكوشة ولبسها الشبكة اللي كانت عبارة عن خاتم سوليتير

باس ايديها بحب وهو بيقول :

النهاردة اسعد يوم في حياتي ..

ابتسمت هند بخجل ..كان يوم جميل ومفرح مليان بهجة وسعادة ...

*_________________________*

كانوا قاعدين في مكان عام ...

هند : ها احكيلي اكتر عن نفسك يا سيادة الظابط

ضحك : انا اسمي نوح انسان بسيط هادي من عيلة ميسورة الحال اجي يخدم بعيد عن أهله في حارة شعبية كان ساعتها نقيب ماشي في ال25 سنة قابل فيها اجمل وأحلي واشقي بنت في العالم ودلوقتي عنده 28 سنة ونفسه يكمل حياته كلها مع البنت اللي اختارها قلبه وفضل يحبها 3 سنين في صمت ويدعي ربنا أنها تكون ليه

ابتسمت هند بخجل

كمل نوح كلامه :

والدي عنده شركة استيراد وتصدير ووالدتي متوفية عمي عميد وخالي وكيل نيابة وانا دلوقتي بقيت رائد وبس ..

هند : والله ما انا عارفه كل الكلام ده اقصد مثلا يعني حبيت قبل كده ليك علاقات كده يعني ؟!

نوح : الصراحة لأ ..

هند : ولا اتكلمت في تليفونات واشتغالات وكده ؟!

نوح : عمري ما عملت كده ولا هاعمل كده وبستحقر اللي بيعملوا كده انا الحمد لله عمري بتقي ربنا عشان ربنا يكرمني بانسانة طيبة بنت حلال ..

حياتي مع نوح فترة خطوبتنا جنة تفاهم وراحة رهيبة بحسها في وجوده كان الأول مجرد اعجاب بقي عشق حبيت فيه كل تفاصيله هزاره سكوته كلامه حركات وشه وهو بيكلمني أسلوبه ذكائه طيبته التزامه

نوح حافظ القرآن كامل وكان مفهمني أنه مش حافظه وأننا هنبدأ نحفظه سوا ومن حماسه حمسني وفي خلال 6 شهور حفظته كامل ..

كان دائما كلامه بيطمن قلبي وفي قربه راحه من كتر كلامه عن الجنة ونعيمها وعن ربنا قربت من ربنا اكتر والتزمت في الصلاة وقيام الليل وخوفي من شامل اتبخر مش هخاف من انسان ضعيف زيي وانسي اني في حماية القوي اللي خلقني وخلقه

باختصار نوح كان خير كبير ربنا كرمني بيه ..

*______________________*

كنت في استراحة قدام المدرسة الثانوية قاعدة بقرأ كتاب لأنك الله كنت مبتسمة

لفت نظري حد بيقعد قدامي برفع راسي لقيته هو الشيخ شامل ..

الفصل الخامس من هنا

كنت في استراحة قدام المدرسة الثانوية قاعدة بقرأ كتاب لأنك الله كنت مبتسمة

لفت نظري حد بيقعد قدامي برفع راسي لقيته هو الشيخ شامل

لاول مرة ماحسش بخوف لما اشوفه ابتسمت وانا ببُص ليه وبقفل الكتاب

_خير ؟!

قعد : عديتي ال18 هاتكوني مراتي !

هند: لأ انا مخطوبة وبحب خطيبي شوفلك واحدة غيري

بص لي بغضب: انتي كده بتتحديني وانا ماحدش يتحداني هاتكوني ملعونة وكل اللي بيحبوكي هائذيهم !

هند : في ايد ربنا كله في ايد ربنا مش في ايدك انت دجال بتاع وهم هوا ...انا مش خايفة منك انا متحصنة من اي اذي بربنا ربي وربك ...

وقف وهو شكله مش ناوي علي خير لقيت حد بيخبط علي كتفي لفيت لقيت نوح وببُص تاني عليه لقيته اتبخر خوفت منه بعد كلامه

نوح قعد : مالك في ايه

بصيت لنوح بتوتر وحكيت له علي كل حاجة وعلي الوشم اللي في رقبتي وعلي سبب خوفي من الارتباط حكيت له كل حاجة بالتفصيل ..

نوح بحزن : دجال يا هند !

هند : والله كنت صغيرة مش عارفه ازاي عملت كده كان ادراكي غير دلوقتي اكيد وربنا يسامحني

نوح : والميكانيكي عمل ايه

هند : مش عارفه اي اخبار عنه ومحاولتش اعرف ..

نوح : احنا لازم نروح لشيخ وعندي بإذن الله يقدر يصد آذي الدجال ده بس روحي انتي دلوقتي وانا هاحدد معاه ميعاد واجي اخدك ونروح له

هزيت دماغي ومشيت بس ماروحتش لقيتني بمشي واروح علي سارة صاحبتي الوحيدة وانتيمتي حسيت اني عاوزة افضفض بتعرف تفهمني وتحتويني هي بير أسراري الصديقة الوحيدة اللي طلعت بيها من الدنيا

وقفت قدام باب شقتها سمعت دربكة وصريخها وصوت تكسير خبطت بسرعة وانا خايفة وهموت من القلق عليها فين وفين لما فتح لي جوزها وكان شكله يخوف زي ما يكون سكران

ببُص وراه لقيتها واقعة علي الأرض بتنزف دم من مناخيرها ووشها مليان كدمات

زقيته ودخلت اجري عليها كان مغمي عليها ومش بتفوق ...

هند بزعيق وعصبية وخوف وتوتر :

عملت فيها ايه يا غبي !

حطت أيدها علي مناخيرها تشوف نفسها ونزلت عند قلبها تسمعه بودنها اتنهدت بارتياح وطلعت تليفونها اتصلت علي الإسعاف..

بقلم الكاتبة حنين عادل

*_________________________*

كانت قاعدة جنبها وماسكة أيدها وهي علي سرير المستشفي ودماغها ملفوفة بشاش ودراعها متجبس واهلها حواليها

طلع أن ده مش اول مرة يعتدي عليها بالضرب وأنه مدمن مخدرات وصايع وده سبب رفض ابوها ليه بس مراية الحب عامية

كانت بتعيط علي منظر صاحبتها وقلبها واجعها اوي عليها

اتكلم ابوها بقلة حيلة :

ليه كده يا بنتي توجعي قلبي عليكي قولتلك اطلقك منه مش موافقة ليه عاجبك فيه ايه البهدلة وقلة القيمة والضرب

فتحت سارة عينيها وبصت عليهم كلهم وانفتحت في العياط .

حضنتها هند وانفتحت في العياط :

مالك يا حبيبتي اهدي في حاجة واجعاكي ..

سارة بصت لها بدموع:

سامحيني يا هند سامحوني كلكم انا آسفة ليكم كلكم

ابوها : انتي اللي سامحيني يا بنتي انا اللي وافقت عليه لما اصريتي عليا قولت يمكن يكون فعلا بقي كويس ورميتك الرميه السوده دي ياريتني ما وافقت!

سارة : سامحني انت يابابا انت ماكنتش في وعيك انا روحت للشيخ شامل عشان توافق علي عبد الرحمن انت كنت صح لما كنت رافض بس انا اللي غبية واستاهل

_شيخ شامل مين !

سارة بدموع : كنت بحب عبد الرحمن وهاموت نفسه وكنت خلاص فكرت في الانتحار لكن في واحدة صاحبتي

قالت لي عليه ليا قالت إنها كانت حامل وأبوها لو عرف هايقتلها والواد اللي عمل معاها كده كان مجوزها بورقة عرفي وقطعها الدنيا داقت بيها لحد ما شافت له بوست عالفيس قالت تروح ومش هاتخسر حاجة وحل لها مشكلتها وخلي الواد يجي يتقدم لها

خدت كلامها ثقة وروحت له قال لي أنه هايعمل لي اللي انا عوزاه في مقابل بس مش مقابل فلوس لأ

بصت ل.هند بدموع :

كان المقابل انتي يا هند

بصت لها هند بإستغراب :

ازاي كان المقابل انا

كملت سارة كلامها :

قال لي أنه هايخلي بابا يوافق علي عبد الرحمن ونتجوز في مقابل أن اعرفه علي حد من صحابي واحدة يعني كويسة مش بتكلم ولاد محترمة ماحدش لمسها

وانتي اول واحدة جت في دماغي فحكيت له عنك وانك عايشة عادي وراضية بعيشتك ومتفوقة ومش هتحتاجي له وعشان تروحي ليه كان لازم يكون عندك مشكلة

بصت لها هند بصدمة :

وبعدين !

سارة بشهقات ودموع :

اداني الكيسة اللي فيها الحشيش المزيف وحطيتها تحت المرتبة بتاعت سرير ابوكي وانتي بتعملي شاي في المطبخ لما كنت عندك قبلها بيوم

بس والله كنت عارفه أنه مش حشيش وعمو عبد الحميد هايطلع منها !

وقفت هند بصدمة والدموع ملت عينيها :

يعني كل اللي انا عيشته ده بسببك تلات سنين وانا عايشة في خوف وقلق وكوابيس بسببك

ابوها بصدمة وخيبة أمل :

مش معقول انا مش مصدق ودني بنتي تعمل كل ده تروح لدجال وتحط حشيش هو انا بسمع صح

هند بدموع : والميكانيكي اللي اتسجن ظلم والوشم اللي علي رقبتي والآذي اللي ممكن يطول نوح وبابا وكل اللي انا فيه ويا عالم هايحصل ايه كمان

والأيام اللي كانت مش بتعدي .... ايه ده انتي أنانية اوي مش بتحبي الا نفسك تدمريني عشان تظبطي حياتك ! انا مش مسامحاكي يا سارة يا صاحبتي يا اللي كونتي حبيبتي

خدت شنطتي وطلعت من المستشفي وانا مش مستوعبة ازاي في ناس كده ازاي صاحبتي الوحيدة تكون هي سبب تعاستي

وكالعادة روحت لبابا اترميت في حضنه وحكيت له كل اللي حصل لحد ما نمت في حضنه من كتر التعب والعياط .

*__________________________*

في نفس المكان اللي بنقعد عليه انا ونوح في مطعم علي النيل وفي نفس الترابيزة .

نوح: سامحيها يا هند كانت عندها 15 سنة ماكنتش واعية كفاية ولا عارفه هي بتعمل ايه

هند: وان سامحتها هاسامح نفسي ازاي علي اللي اتسجن ظلم بسببي !

نوح : ما هو ده الخبر الضروري اللي نزلتك تقابليني عشانه

هند باهتمام : ايوه ايه هو ؟!

نوح: انا سألت عليه وعرفت انه اخد براءة وطلع

هند : ازاي حد براءة ؟!

نوح : قواضي المخدرات بيكون ليها حلول كتيرة بس محتاجة محامي كبير وده اللي حصل جابوا محامي وطلعه منها ودفع غرامة !

اتنهدت بارتياح ...تليفونها رن مسكته وردت

هند بخوف : مستشفي ايه طيب انا جاية حالا

نوح : في ايه يا هند ؟!

هند بدموع: بابا عمل حادثة وهو في المستشفي

*__________________________*

وفي المستشفي

عبد الحميد : اهدي يا هند والله انا كويس

هند : انا السبب في ده انا السبب !

عبد الحميد : يا حبيبتي انتي السبب ازاي انا اللي غلطان اتشغلت بالتليفون والعربية دخلت في عربية تانية والحمد لله اهو انا كويس انا أغمي علي بس عادي !

هند بعياط: شامل يا بابا بينفذ تهديده وهيئذيكم انا خايفة اوي

حضنته بخوف وفضلت تعيط حاول يهديها لحد ما هدت وراحت تغسل وشها..

نوح : انا عارف شيخ كويس يقدر يفيدنا بستأذنك يا عمي اني هاخدها ليه ..

عبد الحميد : ياريت يابني ..ياريت !

*________________________*

_اللي حصل لابوكي ده جزء صغير اوي من اللي اقدر اعمله انا كان ممكن اموته بس سايب لك فرصة تفكري !

هند بتنده بخوف وهيستريا في الحمام لما جرت تفتحه مافتحش وشامل واقف مبتسم برعب :

يا بابا بااااااابا يا نووووووووح

بيختفي وقت فتح نوح الباب وعبد الحميد واقف معاه

هند بتحضن ابوها بانهيار:

شامل شامل يا بابا بيقول أنه السبب وأنه كان هايموتك كان هنا كان هنا وبيقول عاطيلي فرصة افكر انا خايفة خايفة اوييييي

بيبُص ابوها لنوح :

يلا يا نوح نروح للشيخ اللي قولت عليه

بقلم الكاتبة حنين عادل

*_______________________________*

بتقعد هند قدام الشيخ وجنبها نوح وأبوها

بيحكوا له كل حاجة عن شامل من البداية وبتوري له الوشم ...

الشيخ بيطمنهم وبيقول أنه علاج اي مشكلة القرآن

بيقرأ قرآن وبيبتدي الكلام :

أعوذ بالله السميع العليم من الشيطان الرجيم

انما فعلتموه كيد ساحر ولا يفلح الساحر حيث آتي

بيقرأ قرآن علي ميه وبشربها والوشم بيروح ...

هند : طب وظهوره ليا زي الجن

الشيخ : ده كان سحر وانتي تقدري تتحصني منه بالقرآن اقري قرآن دائما قبل ما تنامي واول ما تصحي خلي ذكر ربنا دائما علي لسانك

اللي يشتغل في السحر والشعوذة والعياذ بالله باع روحه للشيطان ولا يفلح الساحر حيث آتي ملعون ومطرود من رحمة ربنا

قربي يابنتي من ربنا وماتخافيش علي حبايبك حبايبك في حماه وتحت سماه عيشي حياتك وما تخافيش !

هند : معقول يعني شامل كده مش هايقرب لي تاني بالسهولة دي

ضحك الشيخ : شامل وأعوانة اللي مسخرهم لخدمته مافيش أضعف منهم ربنا قال في كتابه العزيز أن كيد الشيطان كان ضعيفا

كلامه ريحني وبقيت كويسة وأحسن حاجة أن شامل ماعتش بيظهر لي بعد ما حصنت نفسي بالقرآن

حياتي بقت احسن والحمد لله بقيت بحس براحة نفسية كبيرة سامحت سارة وكلمتها كفاية اللي هي شافته

من لا يرحم لا يُرحم

*______________________*

النهاردة اسعد يوم في حياتي يوم فرحي علي نوح

مانكرش اني خايفة علي نوح لانه بلغ عن شامل وشامل اتحبس خايفة أي حاجة تحصل ولكن انا سايباها لله

اخدني نوح اشوفه والبوليس داخل عليه ومسكه وبان فعلا أنه إنسان زي اي انسان ضعيف مانفعش نفسه كان بيوهم الناس أنه هاينفعهم ازاي ؟!

الحمد لله دائمًا وابدًا انا بقيت علي اقتناع تام ان أي حاجة هاتحصل قدري ونصيبي يارب تمم لنا فرحتنا علي خير

شوفت نوح ببدلة العريس كان حلو زي عادته بس النهاردة حلو بزيادة

نوح : بسم الله ما شاء الله ايه الجمال ده

مسكت طرحتي وانا بلف بالفستان الابيض:

بجد حلوة ؟!

نوح : أميرة هاربة من القصص الخيالية جاءت لتنير قصري وتفترش قلبي

روحت القاعة وانا في ايد بابا ماشية علي ممر طويل مليان ورد ابيض علي اغنية

طُلي بالأبيض طُلي يا زهرة نسيان ...

نوح اخدني من ايد بابا وقعدنا كلنا وقدامنا المآذون وفرحتنا مش سايعانا

كتب الكتاب وقال جملته الشهيرة :

بارك الله لكما وبارك عليكما وجمع بينكما في خير..

بيشيلني نوح ويلف بيا بفرحة

نوح : انتي عارفة انك أعظم انتصارتي يا حبيبة امبارح وحبيبة الوقتي وحبيبتي لبكره ولآخر وقتي

وبتشتغل أغنيتنا اللي بنحبها سوا وبنرقص عليها

جانا الهوى جانا ورمانا الهوى رمانا

ورمش الأسمراني شبكنا بالهوى

آه ما رمانا الهوى ونعسنا واللي شبكنا يخلصنا

دا حبيبي شغل بالي يابا يابا شغل بالي

عدينا يا شوق عدينا

على بر الهوى رسينا

دا العمر معاه وهوايا هواه

زوق يا نسيم خطاوينا

ويا نجوم السما ضمينا

وخدينا بعيد وحدينا

وخلينا كده علي طول ماشين

آه ما رمانا الهوى ونعسنا واللي شبكنا يخلصنا

دا حبيبي شغل بالي يابا يابا شغل بالي

🌹🌹🌹🌹🌹🌹🌹🌹🌹🌹🌹🌹🌹🌹

💚