رواية هشاشة قلب الفصل الثامن 8 - بقلم هاجر قاسم

الـسـلامُ عـلـيـكـم 🌻🌼

#هشاشة_قلب

#الــبـارت_7_

#الكاتبه_العباديه                             #alabadyia_09

      
‏‏إعلمي بـأن أنانيتي وحبي الـغريب وطبعي
السيء يؤذيني قبل أن يحـزنك فإغفـري
لي دائـمًا.

                ~~~~~~~~~~~~~

ثُرىٰ

دخلت للبيت وصافنه بحركاته وكلساع الزم زندي وأتلمس مكان قبضة إيده !

اتذكر شكله وملامحه من گتله راح أبطل رأساً إنتفض وعصب !

آني وين اكدر ابطل ومااشوفه ومااترزل منه النوب المشكله مو هنا المشكله رزالته صارت حلاوه .

إجواء البيت ضاربهه عمود كهرباء ومنتوله مااعرف شصاير كلهه گالبه وجوهه واني مالحيت اسئل .. ملتهيه بظيم الرزايل .

اجيت اتغده لا نهى ع السفره لا تقوى ولا مروه حتى إسماعيل ماكو !

بس اني وامي وحسن وحمزه !

- اكلكم شصاير شنو ماحاسبيني فرد من هاي العائله وضامين عليه شنو خطوبه شنو الموضوع؟؟

امي كالت

- نهى إنخطبت !

- ياااا صدگ ؟؟؟

- اي صدگ

- چا شبيكم گالبين وجوهكم

- هيَ تعاركت وي إسماعيل

إسماعيل يتغده...
من امي حچت خله وگام ووجهه محتقن صاير ناار !

ركضت للفرغه لگيت نهى تبچي وتقوى تهدي بيهه ويمهن مروه لازمه الكتاب وتباوع عليهن ..

حطيت قبضتي على خصري وحجيت بنتر وحرگه :-

- شكو شصاير شبيجن ماتحجن مو اختجن اني لو لا ؟؟ ضامات عليه وكل مااسأل تدورن وجهچن عني من شوكت هذا الحجي ؟

مروه.. اوگفي اوگفي اكلتينه وشربتينه بلسانج خل نفهمج لحظه

- يلا فهمني بسرعه

تقوى.. إگعدي

گعدت بالكاع وتربعت وسرفت رداناتي عبالك اريد ادخل ملحمة گلگامش .

مروه.. راح تهجمين علينه لو رراح نحجيلج؟

- اثنينهن حضرن روحجن بأي لحظه اهجم

نهى إجت حطت راسهه بحضني وصافنه ع السگف .

دنگت عليهه بستهه بخدهه وسألتهه :-

- شبيج غير تحجين؟؟

غمضت عيونهه بهدوء والدمعه تنزل من طرف عينها .. هزيت راسي لتقوى وسألتهه كالت :-

- جايينهه خطابه وإسماعيل موافق من يمه ومنطيهم موافقه وبعطلة نصف السنه الخطوبه يعني بعد إسبوعين !

- ونهى ليش مموافقه وأسماعيل شلون هيج يسوي بدون مياخذ رأيهه ؟؟

- عباله توافق لان الولد الجايهه خوش رجال وزين يعرفه جان قبل المدير مالته وگايلله إلهه بيت وحدهه ودراستهه تكملهه والولد مكمل كليه ومتعين بصيدليه !

- ياا .. كلش زينه القسمه بس نهى بعدهه تفكر بوليد موو؟؟

دنگت وهمست

- اي

دنگت عليهه

- نهى إلى متى تفكرين بيه يعني ماسوالچ عبره من خلاچ تنرهبين ومسوي عملته الا شويه لو ما هذا الشخص ساعدج وحتى موج إنسحبت شفتيها ع الاقل مابررت موقفهه وبهالتصرف ثبتت هيَ متفقه وياه راح يصير شهرين للسالفه وهيَ ماكو فص ملح وذاب !

نهى.. ثريا إذا مامجربه الحب لاتحچين هيج

- ياا صدگ آني مجربته لو لا؟؟

مروه.. ثول اكو واحد مايدري بروحه مجرب لو لا؟

- والله مدري يمكن مجربته ويمكن لا ؟

كلهن إلتمن عليه حتى نهى تربعت من گلت هيج !

ظلن يباوعلي ونظرات الشك بعيونهن !

كلهن حچن سويه

- أحچييي

- يمه يمه شنو هاي شأحچي شأگول؟؟

مروه.. شكو شصاير منو هذا تعيس الحظ؟؟

- ياا .. اسم الله برّد تعيس النوب قصدج اني تعيسة الحظ وهوَ مثلي تعيس حظ

تقوى.. غردي حبي غردي نسمعج لاتلوفين الموضوع

- شأغرد كلشي ماعندي خلصت توزيع خلصت القيمه يلا كلمن تاخذ گدرها وترجع لااهلهه

نهى.. مادام كلتي مجربه اكو إنَّ ف غردي قبل لاتغردين غصب عنج

- ها والله كـ إعجاب ورزايل إي بس حب لا بعدني ماواصله لهالمرحله

تقوى.. وصلتي حبيبتي وصلتي

سولفتلهن من طأطأ للسلامُ عليكم .

من خلصت السالفه ظلن وحده تصفن بالثانيه .

- ماتحجن ووجع

تقوى.. حبيبتي هذا مايدري بمشاعره شنو ف إحتمال قوي يمشي وره إحساسه يعني مايخطط شيگول ولا يدري بنفسه وانتِ لاتروحين زايد لان هيج شخصيات ممحروزه شبيها ف ابقي بعيده .

مروه.. انتِ كل عقلج هذا دكتوووور جامعي يحب وحده مثلج مستحيل

ثُرىٰ.. ليش مستحيل يمه شناقصني؟ اشو وجهي گطن وشفتي زعنونه ومچكلمه تچكلم وعيوني وساع بعد شيريد يمه على حوره هسه هوَ

صاحت نهى

نهى.. وحماد نفسه شيرادله؟؟؟؟؟؟

اثنينهن صاحن

تقوى،مروه ... رفسسسسسه

يركضن وراي يردن يرفسني واني انطيتهه اللهيب اركض وماكو .. اصعد ع الچربايه وانزل للگاع صرت طرزان بثانيتين مالزمني ابد ثُرىٰ الطرزان بعد منو يلحگهه .

تعبن وظلن يلهثن واني واگفه ع الجربايه مثل القرد ولا تعبت ضحكنا على حالنه وقررت نهى توافق وتعتذر من إسماعيل لان مصيحه بوجهه وكايلتله ماتكدر تجبرني ولهذا السبب نشوف اسماعيل هاليومين معصب ومايتحاجه كلشي ولا وحده من عدنه يتسودن .

              ~~~~~~~~~~~~~~

ظليت الليل كله قلقانه شلون راح اشوفه وشلون نظرات الطلاب إلنه اني ونرجس وشلون وشلون ؟!!

ظليت كاعده ماغمضت عيني لحظه لما صارت بالـ6 كمت حطيت الماي بالقوري وتمشيت شويه بالحديقه وآني اسمع اصوات زقزقة العصافير فوگ الشجره وبرودة الجو تلفح بوجهي الجو هادئ وبيه نسمة هوى بارده قطرات الندىٰ مزينه أوراق الشجر .

اخذتلي شويه بالمرجوحه علما يفور الماي ودخلت حطيت الچاي المهيل .

گعدوا اهلي وظلينا نتريك مشتاقه لهاي اللمه صار فتره طويله يوميه اطلع بدون ريوگ من وره القاسي .

كملنا وطلعنا كلمن لدوامه .. وصلني إسماعيل وتمشينه للجامعه ودخلت .

لگيت نرجس وظلينه اني وياهه نسولف .. إقترحت عليه نصعد للطابق الثاني ورحنه سويه..

چنت لابسه تنوره كلوش... كلش جبيره كلوشتهه وقماشهه ثخين وثگيل وحتى طويله عليه .. بس اصعد الدرج اتعثر وتنعاد طفولتي المأساويه ..

شلتهه وظليت اباوع لرجليه واني اصعد الدرجات .. وشايله التنوره بإيديه ونرجس تقلد عليه

- ولج شايله تنورتج چنچ عروس

- اي خايبه من اصير عروس مو اني اشيلهه اكلهم انتم خداديمي شيلوهه الاميره ثُرىٰ مكيفه بالعرس لو تروح تشيل بدله

- ههههه بس كلوشتهه كلش جبيره

- اموت ع الكلوشه تدرين كلت لتقوى تخيط القماش بس كلوش هاي مترتين ونص كلوشتهه

- يع هواي

كملنا الدرج وإحنه نسولف ونضحك ونباوع بالتنوره .. رفعت راسي واشوفلك ابو الرزايل واگف يم باب القاعه المقابله للدرج ومنتكي ع الباب مكتف ويباوع بينه بنظره عجبتني ويضحك بهدوء علينه .!

من شفته نزلت التنوره ودنگت راسي حيل بحيث ماشوف منه شي .

مرينه من يمه ورحنه نفتر .. سألت نرجس :-

- شبيه يباوع بينه هيج؟؟

- خايبه من نزلتي راسج وماباوعتي عليه نزل إيديه وعگد حواجبه مزعوج

- بعد يحلم بنظره مني

- ايباا على الاساس ميت عليج بس تبقين على كلمتج ؟ واذا هسه اجه للمحاضره وسحلتي روحج شتسوين؟

- لا لا بعد التوبه ماكو سحل هسه اجه دوره اني اسحله

- هلو هلو صار اللعب الجد

صار وقت محاضرتنه وردنه ننزل لجوه .. اني احب انزل الدرج ع السريع عبالك عندي سباق ركضت قبل نرجس انزل بسرعه واباوع بالدرجات أي شخص يصير مقابيلي مااشوفه ..

نزلت ركض ونرجس وراي تصيح .. مااحس اله راكضه رجلي مثل القرد أگمز ومجلبه بالمحجر والاتعس من هذا گصه بگصه وي ابو الرزايل .. هوَ صاعد يركض واني نازله اركض .. سانتيمين وانلزگ بوجهه .. فتح عيونه على وسعهن وبحلق بوجهي !

رجعت وجهي لوره ورحت على الجهه المعاكسه .. كملت انزل بهدوء .. نرجس بهاي الحاله ماتكعد ظلت كلساع تلتفت عليه تشوف ردة فعله وتوافيني بالأخبار .

اول مانزلنه سألتهه

- ها شنو ردة فعله

- ظل واگف بمكانه ووجهه علينه ويباوع بيج شلون تمشين او إحتمال مركز ع الشسمه

- صخام بوجهج مامبين الشسمه التنوره كلوشه مغطيته

- الله أعلم بعد

إجه هوَ وآني مقرره اليوم نظره ماانظرله كله اركز بالدرس . وشعنده صاعد للطابق الثاني يريد يصيحنه شنو ؟؟!

من دخل سلم علينه حتى السلام مارديته عينه تخزر بيه وهز راسه .. ظل يشرح وآني مركزه بالشرح نظره ماانطيته كله بسببي سحلت روحي عليه .

كاللنه إنقلوه الكتبته .. اني ظليت انقل وهوَ لازم قلم بإيده ويتمشى كل كرسي يمر من يمه يضربه بالقلم وهاي عادته المزعجه .. وصل لكرسيي ظل واگف وآني مارفعت راسي ظليت مدنگه وانقل .. ضرب كرسيي بالقلم وسمعت تنهيدته .

إستمر يضرب بالكراسي وبس صوت القلم مسموع واني اتخبل من هاي الحاله تقلقني هيَ وهز الرجل ..

نرجس ظلت تهز برجلهه وهاي العاده أتخبل منهه وكل مره من تسويهه احط إيدي عليهه واظل اگرص بيهه .

ظلت تهز برجلهه حيل وآني مديت إيدي جوه الكرسي وتگرص وتگرص وهيَ تتألم بسكته لان گرصتي سم مثل مايگولون .

نرجس.. ثُرىٰ إيدج والله اندمج إيدددج اخ رجلي .

- حتى بعد ماتهزين

بعدني احچي وياهه وإجاني الصوت

- يلا ثُرىٰ گومي إشرحيلي

وگفت بغباء كلت

- هااا ؟؟

- إشرحيلي

- اي هسه

هذا شبيه حاط راسه براسي حسره عليه احچي وي نرجس لو أغفل عنه يگومني ..

ظليت اشرح واني واگفه حسيت بإيد تسللت لرجلي بهدوء .. لحظات وروحي شاغت گرصه مو طبيعيه كارثه سم سم .. وگفت شرح وعضيت شفتي قوي وعصرت عيوني حيل .. كاللي :-

- كملي ليش وگفتي ؟!٣

كملت شرح وهيَ مستمره تگرص وراسهه ع الكرسي حيل عود تكتب وإيدهه على زري وتگرص بيه .. حاولت اوخر إيدهه كلما اوخر رجلي لجهه تجي وراي .. اخر گرصه كرصتنياهه بعد ماتحملت عطت بصوت عالي :-

- اخخخخخخخخخخ

كلهه إلتفتت عليه ومصدومين .. هوَ إجه يركض وگف يمي وصاح بصوت عالي

- شكووووو؟؟؟؟

نرجس صار لونهه ليمونه وآني رجلي مأذيتني متتت من الوجع گرصتهه موت .

سكتت ودنگت .. عاط بيه بعلو صوته

- ماتحجييين شكوووو؟؟؟؟

- لا أستاذ ماكو شي

- ليش عطتي؟؟

دنگت راسي وسكتت

- إلىٰ متى أتغاضى عن تصرفاتج انتِ طفله طفله خبلتيني هاي الطلاب كلهه بكوم وانتِ بكوم بس اني منا وهيج اعرف اتصرف وياج .

ظليت بسكتتي وداخلي ينزف مدنگه وشفتي ترجف أقل رزاله مااتحملهه داخلي هش .

بقيت واگفه .. عاط بنتر

- إگعددددي

گعدت ومدنگه ألعب بأظافري ووجهي نااار تطلع منه أحس روحي راح انفجر .

ظل يشرح واني حتى راسي مارفعته ولا ركزت بكلمه من الگالهن .

خلص وقت محاضرته وطلع .. خليت وطلعت حتى نرجس ماحچيت وياهه وحتى هيَ تباوع بيه مستحيه . بس اني علت بيهه ماعليهه هيَ .

طلعت من الكليه وظليت واگفه بالشارع انتظر إسماعيل بعد ساعه يلا يجي عندي إستعداد اوكف ساعه كامله وماادخل للكليه .

ظليت واگفه ع الشارع بس رجعت لوره عن السيارات ..

شويه ووگفت يمي سياره مظلله سوده عرفتهه سيارته !

فتح الجامه وباوعلي وجهه معصب وحواجبه معكوده

- ليش واگفه هنا؟؟

درت وجهي ع الجهه الثانيه ولا عبالك اشوفه !

نتر بصوت شبه عالي

- داحجي وياج اني لو لا؟؟؟؟؟

غلسست ووجهي محتقن وحواجبي عاگدتهن وعيوني نااار تطلع منهن اول مره اكون بهالعصبيه .

عاط بصوت عالي فززني

- ثُررررررىٰ

عصرت عيوني وكتله

- بس اني مو بالكليه هسه .. ولايجي اخويه يشوفني إستاذ اني ادبر حالي

- ليش ششايفتني صاحبج مثلاً ويشوفني اخوج؟؟ ولأن اني إستاذج أأمرچ هسه تصعدين

- حشاك بس ماگدر اصعد ويه واحد غريب !

ظل يباوع بيه بعصبيه كال بنتر والحرگه باينه بصوته

- هم صدگ غريب ! .. بس نصيحه روحي إنتظري إخوج بالكليه لان التوگف هنا يكولون واكفه للشباب

- ياا عزا

- اي هذا العناد بعد

خليت ودخلت للكليه وهوَ ظل واگف لما شافني دخلت يلا راح .. رغم محذرني إسماعيل مااطلع بره الكليه كل مره هوَ يوكفلي يم الاداره واني اطلعله .

انتظرت لما إجه إسماعيل وطلعنا للبيت ..

لگيت البيت مخبوص وكلهه تحضر لمهر نهى ! الجمعه هاي وإحنه امتحاناتنه الاحد مال نصف السنه والجو بارد والصوبات بكل مكان الله أحلى شي المناسبه تصير بالشتا اذا تصير بالصيف المكياج يسيل البوخه تصير تكتل .

دخلت البيت مفروش فراش شتائي والصوبه النفطيه مشغوله وملتمين اهلي حاطين الخبزه ع الصوبه ويحمي بيهه حمزه والگدر يمه يحمي ويحط .. ركضت بدلت وإجيت اركض لابسه تراكي الشتائي وارجف برد .

- حمزه اني خبزتي اريدهه مكسبه مو تتگروط

حسن.. ولج مو تجواعه هاي غده غده

- ميخالف احب الگرواط

حمزه.. عليكم العباس بعد سموهه الگرطه لان تگرط خبز يابس

- عززا والله اليصيحلي هيج العب لعب

مروه ظلت تصفگ وتصيح

- الگرطه .. الگرطه هه هه .. الگرطه الگرطه

ظلوا يصنفون عليه واني اتحرگن النوب بس  الگرطه عليه .

طلع بالتلفزيون لقطه ..  قطعه مكتوب عليهه (آه يازينب) ردت انصب على أمي گتلهه :-

- ماما شنو هاي الكتابه؟؟

باوعت بيهه وهيَ تصب .. صبت التمن بالماعون وگالت بثقه :-

- واحد وخمسين يازينب

هيَ گالت هيج وإحنه تمددنا وظلينه نرفس من الضحك قرت الـ(آه) واحد وخمسين متنا متنا وإسماعيل كلساع يخزرنه لما عاط بينه

- اسكتوووو شنو تضحكون عليهه احسن من عدهه انتم؟؟؟؟

كلنه إنلصمنه وصار الجو هدوء بس اني كلساع تفلت ضحكه مني وإسماعيل يخزرني يخلي الضحكه تغص ببلعومي .. ظلينه منتظرين التمن يبرد لان اذا اكلناه حار مو زين ع الامعاء يتلهوگ هاي كلهه معلومات امي وقوانينهه .

اكلنا وشربنه چاي وگمنا ننام .

دخلنه بالغرفه سألت تقوى على هذا الولد السيد گالت :-

- طلع جذب ماخاطب

- يااا صدددددك

- اي والله دعايه لان ابوه گالله اخذ بنت عمك وهوَ ماقابل طلعت عليه دعايات والنوب ذني يكللي معزومه واني نسيت هنه خصمي ويكرهني

نهى صافنه وإيدهه على خدهه

اشرت لتقوى وسكتنه هيَ حست على نفسهه وإبتسمت جذب

ثرى.. شو صافنه؟؟

نهى.. دافكر بوليد وموج اختفوا مثل فص الملح معقوله يضحك عليه طيلة هالسنتين وإحتمال خطه من عدهم يسحبني وياخذ شرفي ويذبني يختفي مثل هسه لو ما هذا الولد جان رحت بيهه

- صوجج ثقيتي.. ونهى تره انتِ راح تصيرين على ذمة رجال ثاني ف لتفكرين بيهم

- لا لا ابدد بس اعقد خلاص لا موج ولا وليد بس مو هينه سنتين يثريا سنتين ماغزرن بيه؟؟

- ماغزرن ..وانتِ تقوى شنو علاقتج بهذا تره مايصير تبقون هيج

- لا لا ادري شبيج اصلاً مااحچي وياه وصللي هذا الكلام بإيد إخته وبعد التخرج يجي يخطبني

                 ~~~~~~~~~~~~

إجت الجمعه تركض ركض عبالك يركض وراهه حصان .. الايام ركض ركض وكله من عمرنا.

مخبوصين ونحضر لان ذوله الخاطبين نهى شويه طاگين رغم امي ماموافقه من هالناحيه دوم تگوللنه لاتاخذن اعلى منجن تتعيرن ولاتاخذن انصه منجن تحتاجن اخذن بمستواجن.. وهاي كلماتهه ماانساهن بحياتي

إجو عيال نهى المستقبلين ورتبناهه وحفيت وجهه ولبست فستان طويل نازك بيه نجمات صغار وضفرتلهه ظفيره فرنسيه وخلت مورد خدود وشويه قلم كحله .

ظلوا يتفقون وإسماعيل شرط يتشاوفون .. نهى ظلت ترجف ومتوتره تروح وترجع وخايفه لزمت إيديهه مثلجات

- شبيج خايفه ماكو شي ان شاء الله

- راح اموت من الخوف حيلي باد

- روحي شوفيه وتعالي قابل رايحه للجبهه

دقايق وصاح عليهه إسماعيل حطت شال على راسهه وراحت خايفه ..

ظلينا احنه نسولف ونهى بعدهه يمهم !

ظلت ربع ساعه وإجت نهى ترجف والوجه اصفر ليمونه .. تهفي على وجهه وتسحب انفاس بصعوبه

- شبيج يمه هاي شنوو؟؟

نهى.. ماجاي اصدك ابدددد

- شكو!؟

- وو ..وليدد نفسه العريس تصدكين؟؟

- يااا عزا

ركضت جبتلهه ماي وشربته وتبجي حضنتهه حيل وهمست

- شبيج غير انتِ تحبيه وهاي صار من نصيبج

- لج ثريا اول ماشفته تذكرت حالتي جوه إيديه وشصار بيه ردت اموت كل لحظه سواهه وياي صارت مقابيل عيني أشمئزيت مااريده مااريده خل يجي إسماعيل وخل يرفضهم والاتعس من هذا كله موج متكركحه وتصيح بيه تريدني اروحلهه بعد السووه بيه

- نهى إذكري الله انتِ تحبيه بعد ليش هيج تسوين؟

- لعنة ع الحب .. المهم مااريده مااتزوجه

- هسه بس تهدأين وتفكرين زين تتندمين

- ماادري

- نهى الحب الأول ماينسي وانتِ قابليه وشوفي ليش هيج سوه شارب لو شصاير

- هيَ عوزي يشرب واقبل ييه

- نهى لاتتسرعين فكري فكري

راحوا وأسماعيل فار وطاير بيهم ويمدح بيهم وبأخلاقهم .. نهى ترفض وإحنه نقنع .. لما گعدنا وياهه واكدنالهه إستحاله تنسى وليد وتشوف السبب قبل الخطوبه النوب ترفض وتتندم .

دزيناهه بالدفعات لاإسماعيل كالتله اريد احجي وياه وإسماعيل ماحچه شي أنطاهه موبايله البلاستيكي وإجت تضغط على إتصال وتوخر إيدهه .. اخر شي ضغطت وقوت نفسهه وطردتنا الحقيره تخجل عشتو ..

نهى.. حطيت إيدي ع الاتصال وگلبي يرجف يدگ مثل الدمام .. اول دگتين جاوب

- الوو .. هلو إسماعيل شلونك شخبارج

بلعت ريقي وحچيت بنبره هادئه

- الوو .. هاي آني

- نههههههههى؟؟؟؟؟؟

- اي

- اوگفي راح اتصل ردي عليه

گطع الإتصال وأتصل عليه الظاهر ناوي يطول الأخ .

- الوو نهى وينج

- ها وياك

- شلونج

- زينه

ظل ساكت ويتنهد

- لاتسكتين احچي خل اسمع صوتج

- ليش تقدمت وانتَ تعرف نفسك شمسوي وياي ؟؟

- نهى إذا اگلج السبب وعد متعوفيني؟؟

- ليش منو كال اني وياك هسه؟؟

- نهى إحنه حبنه چبير لاتخربينه بأخطاء رعنه

- تذكر الموقف الخليتني بيه وانتَ تعرف شنو شعوري

همس بصوت خافت :-

- مااتذكر شي !!

- شننوووووو؟؟؟؟

- اي نهى مااتذكر شي رحمه لااهلج لتنصدمين بس جنت شارب !!

- عزززااا ومتقدم تريدني اقبل بشرّاب؟؟

- لج نهى ياشراب اول مره احطه بحلگي وصرتي گدامي

- إحلف

- والحُسين وداعة اهلي كلهم وداعتج هم من شفتج تخبلت مااتذكر اي شي بس صورتج بالفستان عالقه ببالي

- باي

- وين اوكفي خل اكلج اني مو مدمن لاتخافين والله بعد ماحطيته بحلگي ابدد واكلت المقسوم من عمي

- هذا عمك الي دخل؟

- اي

- لو ماهوَ اني منتهيه

- اني موجود ليش تنتهين؟

- وموج شنو موقفها تعرف لو لا؟

- قسم بالله قسم لا موج ولا غيرهه واصلاً موج مامدخلهه بعلاقتنه غير اول مره ردت اصارحج غمزتلهه ومقابيلج هم وموضوعنه مافاتحه وياهه

- ماادري

- موافقه حبيبتي مو؟؟

- حبيبتك شنو النوب؟

- مرتي قصدي

- منو كال؟

- اني

- شهالثقه

- تربيتي انتِ يابه

- هههه

- فدوه للضحكه

- خل اروج قبل لاتدخل بالعميق اعرفك ماتكعد

ظل يضحك من اعماقه وسلم عليه وراح ..!

لزمت گلبي ينبض سريع كلمتين منه غيرن حالي !

ماشكيت بيه لان القسم الي قسمه يكسر الرگبه ..

انطيت الموبايل لااسماعيل وسولفت للبلاوي ونصبن عليه .

                ~~~~~~~~~~~~~~~

ثُرىٰ

داومت اول يوم إلامتحانات مادة القاسي اول يوم علمود يصحح من وكت ومايداوم بالعطله ..

كلش قلقانه خصوصاً درجتي حرجه بس مال شهر واحد ..

دخلنا للإمتحان والاسئله تكسر تكسر لا والله أظلم كلمة تكسر اذا اگولهه . سؤال ماعرفته لان جايبهن يتشابهن وظلت بگلبي اسئله عليه . اول ماإجه سأل الطلاب كلهم شلونهه الاسئله وذوله يگلوله سهله مكبرين راسه اخخ بس لو يگلي شلونهه الاسئله الا افشله واگله صعبه مثل وجهك هذا المغندب ليل ونهار .

..بعدني اسولف بگلبي وكال :-

- إي ثُرىٰ شلونهه الاسئله

گالهه وخازرني عيونه أحسهه تلمع من الخزر تريد تطلع عليه بلعت ريق بخوف وهمست :-

- سهله !!!!!!!!

سوه روحه مايسمع لان زاگطيني بأخير رحله كال ؛-

- ها شنو؟؟

رأساً گلبت عليه كتله :-

- زينه

يمه معقوله خلسني بخزرته .ولايگعد ابو خاولي

سكت ظل يوضحلنا وبيه طبع زفر هم.. مايقره الاسئله يگول انتم مو زعاطيط .. وضح كم سؤال وراد يطلع .. اني هذا السؤال كاتلني ولازم اسئله بلكي يوضحلي هذا ببداية الملزمه لو الي بالنهايه .. سألته

- إستاذ هذا السؤال الثالث شنو التريده بالضبط غير نفسه الي امتحنتنه بيه اخر إمتحان صفحه 50 يمكن ؟؟

فتح عيونه حيييل وخزرني عاط بصوت خله القاعه مخلوسه

- حچايه ووووحده اسسسحب دفترج وإمتحان ماكو احطلج صفر !!!!!

حچه ذني كلماته وطلع .. وإتجهت نظرات الإتهام كلهه عليه والمصيبه الاستاذ الاحبه وقار الاساتذه يراقب علينه وهوَ يحبني هم لان شاطره عنده .. إسمه إستاذ قاسم .

وجهي دخن ورأساً دمعتي طفرت ع الدفتر .

حليت ع السريع واني تتردد كلماته براسي .. كملت وطلعت بسرعه اول وحده بالقاعه اني كملت اريد بس اطلع ابجي .. الاستاذ كاللي تأكدي حلي عدل رفضت بعد .

طلعت من القاعه اخذت ملزمتي من الگاع اول مادنگت انحدرت الدمعه من عيني الحمراء .. ظليت ابجي وامسح بدموعي وكلساع تنزل وحده .

عصرت عيوني بإيديه حيل وبچيت واناشغ بالبجي .. حطيت الملزمه بالعلاگه هيَ وبطل الماي ومشيت بالممر واني اشگگ بالاسئله وابچي وشهگتي مسموعه .

امشي بالممر بين القاعات وفجأه مدري منين طلعلي .. لازم الاسئله بإيده ويفتر ع القاعات اول ماطلع يمشي سريع من شافني بطئ مشيته وعگد حاجبه مستغرب !

شگيت اخر جزء من الاسئله وضميتههن بالعلاگه وكملت مشيتي مدنگه مااريد اشوفه !

اول مامريت من يمه صاحني وهذا التوقعته

- ثُرىٰ ؟؟؟؟؟!!

انداريت عليه بس مدنگه

أردف

- شكو شبيج؟؟

- سلامتك أستاذ

- لا مو سلامتي دتبچين؟؟

- لا حساسيه

- شعجب طلعتي بهالوقت بعده هستوه مرت نص ساعه؟؟

- سهله الاسئله وحليت ع السريع

ظل صافن بوجهي ويرمش بعيونه

- من رخصتك استاذ

ردت اروح كال :-

- اذا تحتاجين شي كولي

- سلامتك

مشيت من يمه واني داخلي يغلي حرگه وقهر .. بس خل يفك ياخه عني وكلشي مااريد منه

إجه إسماعيل اول ماسألني شبيه وجهج انهاريت .. كتله مو زينه بالامتحان .

رجعت للبيت تكأبت ونمت ماكعدت الا بالليل قريت مادة إستاذ أحمد حباب ويجيبهه سهله واني اصلاً ناجحه عنده .

داومت قاريه على گد النجاح .. دخلنا القاعه وانصدمت بوجوده هوَ اليوم يراقب علينه مبين اليوم من بدايته شنو.

صاح اسمائنا وگعدنا بأماكننه .. ظل يفتر ويحوم ويدور يم كرسيي خبلني شكو شعندك جاي ابنل ابنل .

اجه أستاذ احمد قره الأسئله ووضحلنا شكد حباب وبي طبيعه يعضعض بشفته التحتيه حتى تبين السكسوكه المخضره جديد .

اني صحته لان عندي سؤال طفيت بيه . دنگ على ورقتي يشوف السؤال وابو الرزايل اجه يركض وكف على روسنه خزرته شفته مكتف إيديه لوره ظهره وماد راسه علينه مااهتميتله ورجعت احجي وي استاذ احمد .

كال استاذ احمد

- لا لا ثُرىٰ شنو هاي مخربطه

- ياا عزا ليش؟

- غلط ذني سؤال الصح والخطأ

- يا وهسه شلون؟؟

- ههه مادري

ظليت اتصفن واسوي حاس باس من ايد الزهره والعباس .. وهم طلعن خطأ .. سويت قالَ قيلو قفز الفيلُ وهم خطأ شلون يربي .

قبل مايطلع إستاذ احمد سألته

- أستاذ هذا السؤال عيده خل اتذكر شويه

- خايبه هيَ شنيه كلهن خطأ بس الاخيره صح !!

- يح اني كاتبتهن كلهن صح والاخيره خطأ هههه

- چا شگلنه

طرت من الفرح حليتهن ومامصدگه وهذا ابو الرزايل وجهه صاير بلون الدم من الحرگه يلا إحترء يحبيبي إحترء والله لورجيك مين ثرى

كملت اول وحده وإنطيته الدفتر .. كال المراقب الثاني

- ماراجعتي بابا

باوعت بيه عود بسمار

- لا استاذ الاسئله كلش سهله ماي واستاذ احمد هم ماقصر اكيد

رفعلي حاجبه وإبتسم مستهزأ كأنما يكلي تتحديني؟

رفعت حواجبي عود اقلده عشتو.. زين ماطاحن حواجبي كدامه .

خليت وطلعت من القاعه ..

..

استمرت الامتحانات وكلهن مجاوبه بس إنصدمت بأخر يوم . رايحه للأداره احاچي ست أسماء ولاگاني ابو الزرايل اول شي تشمت بيه بنظراته وبعدين كال .

- مبروك الرسوب ثُرىٰ

- شنوووووو؟؟؟؟؟

ضحك بإستهزاء

- شنو.. يابه راسبه صححت دفترج وشفته راسسسببببببه ودرجتج قريبه ع الصفر هه

خوش ضحكته جانت ههه هسه صارت تتقلص صارت هه .!!

من تذكرت اني راسبه وركزت رأساً بچيت لان صدگ ماحاله ونظراته زادت حالتي سوء .

طلعت وحتى ست اسماء ماحاجيتهه نسيت من وره الصاعقه .

وصلت لااهلي انحب وابجي ويقنعون بيه ع الدور الثاني واني انتفض وارجع ابجي انعاد وياي موقف الرابع ابتدائي .

صارت الجمعه واليوم خطوبة نهى واني مكركده .. اتفقوا الخطوبه تصير ببيت جداده لان بيتنه صغير ومايكفي معازيمهم .

راحت نهى للصالون بـ12 الظهر وبـ3 خابرتنه كالت اني ببيتهم وراح ادزلكم سياره .

الله يديم فرحتهه .. وليد دللهه ماخله شي مااشتراه وطاير بيهه .

لبست جبه فوگ فستاني الأصفر اللامع يوصل للركبه ومخصر ع الجسم .

حطيت مكياج وسحبت شعري على طوله وهوَ طويل حيل يوصل للورك .

طلعنه لكينه السياره بالباب .. وصلنا للبيت صلاوات يجنن عبالك ڤله النزاكه تشهد بكل مكان والترتيب والديكور بأي مكان .

ظلينا نضحك ونرگص وعقدت نهى ولبسهه الحلقات وهيَ فرحانه حيل .. والكل فرحان ومحد بالبيت غيرنا البنات ولعبنه لعب .. اني  عندي لبسه وياي ردت ابدل كلت لموج واخذتني للطابق الثاني .

دخلتني لغرفه كلش حلوه .. أخشاب تركيه وع الميز عطورات رجاليه وساعه وجل وترتيب لااخر درجه مثل بقية البيت هاي يمكن غرفة عمهه .

اخذت فستاني فرشته ع الجربايه ونزعت..

اول ماسحبت الفستان وتعريت انفتح الباب !!

ودخل شخص !!!!!!!!!!

يتبع..

             عـبـرات الـعـبـادي

                                   
                 alabadyia_09