رواية هذيانٌ بين جمرٍ وجليد ..(ارملة اخي المجنونة) الفصل الثامن 8 - بقلم نورا ناصر

السلام عليكم
الفصل الخامس
رواية هذيان بين جمر وجليد ..
نورا ناصر .

****

قضيتي..ضاعت بين صدق وكذبٍ..
بين عشق وخذلان .. بين حبيب و عدو..
بين سهام أصابت قلبي .. لم استطيع تميز سهمك
سهم غدر مغلف بكذبة حبك ..
طعنت قلبي.. لم تندثر جراحاتي.. اضلمت دربي
و اجهلت غاياتي.. أطفئت نور عمري.. واسقطت راياتي.. في شراع الحب  اعليت راياتي.. سقطت انا وهدمت بناياتي.. اتعبت قلبي.. و رافقني حزني وأهاتي..
بقلم smsma89

****

موج ..

انو اخذت داني وراحت تسكته بالغرفة وفرح يم الشيخ ديحجون ، بابا واحمد يم الدكتور ، وخالتي بالمطبخ كالعادة ، طلعت اريد ااطلع الزبل .
وقبل لا اطلع اسمع صوت هورنات .قوية.

خليت الزبل بالكاع ورحت طليت من الفتحات مالة السياج واشوف شرار نزل من سيارته وظل يصيح ...شبييك اخي سطرتنه طوووط ما طووط شكووو؟

نزل السايق من السيارة ومتعصب وعيونه براسه بحيث ركع الباب حيل وظل يصيح : ...ارييد افووت وانت مخلي سيارتك بالباب انتم متحسوون مدكولون هذا طريق مو كراج

شرار رد عليه ببرود وكسل واستفزاز : افاا اشو كلولي كراج اخي انت غلطان هذا كراج مو شارع عام يله توكل منا يله .

ظل يصيح الرجال : لك تضحك عليه ما عاش اليضحك عليه واني ابو اسد ..

رد عليه شرار ببرود وهو مكتف اديه ومتجي على بابا السيارة المغلق...الله يحفظلك اسد .

ذاك ظل يفرك بوجهه ويستغفر ويحاول يسيطر على اعصابه وبنبرة امر اردف : ديالله يالله وخر سيارتك لا افلشها على راسك وراس الخلفك هسه وبهالظهرية .

عاد شرار ثار بهاللحظة وتخبل وصارت عركة بيناتهم بالحجي اول مرة وشرار يصيح : اني تفلش السيارة على راسي تعال اطبطبك شويه حتى تتأدب ابو جلب مدري ابو عتوي .

ذاك شمر الجكارة من ايده وراح للشرار وهو يصيح اي افلشها افلشها .

وصل يمه شرار وركعه كله وكع الرجال لازم راسه
وشرار صاح : افااا ما عاش ولا تنست بي امه ليمد ايده على املاكي..

لطمت وجهي عزااا توي داروح اصيح لفرح حتى تكول للشيخ اخوه تعارك وجان اشوف الشيخ طلع وراه فرح تركض ..

‎
فرح .. طلعت وره الشيخ هو سمع صوتي دااركض وره
التفتتلي كال فوتي جوة .

عباله هنا مثل بيتهم المحصن جنه سور الصين العظيم ولامرة تكدر تطلع للباب او للشارع اله وياهه رجال .

اني مارجعت هو باوعلي بنظرة خطرة
مو جاي اكلج دخلي انت ماتفهمين الكلام روحي حضري نفسج حتى نولي .

كال كلامه وطلع وحرص على سد الباب قوي ولاحظت عصبيته من يسد الباب مدري بابنه قصير مدري هو الشيخ طويل زيادة عن اللزوم .

باوعت لموج تضحك عليه واكفه يم السياج وخاتلة وره الشجرة ، من شفتها رحت يمها .

كالت رجعي ولج يخوف هذا الامير ماينطي مجال رجعي للبيت لايبتلي بيج اني اسولفلج بعدين شيصير

تجاهلتها : ولج هو شصاير دفعتها واباوع ..

طلع الامير وصاح  : لك شرررار!!!!!!
شرار جان رافع   ايده يريد يضرب الرجال بوكس من شاف الشيخ ضربه راشدي خفيف ووخر عنه .

ترك الرجال وراح للامير كاله : شوف ابو مهيب قبل لا توبخني وترزل افتهم السالفه كلش محترم بهالعركة صرت بس استفزوني وداعتك .

الشيخ رد بسخريه ووعيد...اي اعرفك اصلا ضلمناك من سميناك شرار لو مسمينك هدوء برود

اصلا انت متحب المشاكل ..امشي لك اصعد بالسياره خلي اتفاهم ويه الوادم ...

شرار هز راسه بتفهم و راح متعصب وصعد بالسياره وركع الباب..

والشيخ راح للرجال الي جان واكف ومعصب ويمسح الدم عن وجهه كاله: عمي احنه ناس ما نعتذر اله اذا غلطانين بس انه اليوم اخووي غلطان لو على حق نعتذر منك وتريده يصير فصل عطوه هدنه عد عيناك.

وانه من اكلك هيج اعرف اخوووي غلطان لان هو شاب وغارته الدنيا..

شرار فتح الجام مالة السياره وطلع راسه
وكال.. لا والله ما غلطان وما غرتني الدنيا نااس متستحي وتريد بس فصوول

رجع عليه الشييخ وضرب باب السياره بقبضة ايده ومن بين اسنانه ولك اسسسكت ولك اسكتتت
‎انه كاتلك كاتلك شرير لا ما دفنتك بيدي ما اطلع دووومك مفشلني‎

الرجال كال : روووح شييخ لا اريد فصل ولا شي اني حقي اخذه لو بعد سنين .

وحرك سيارته وراح .. نزل شرار من السيارة وظل ياشر للشيخ ويحجي : دشوف ابو مهيب شوف شكد مسافة موكف السيارة اني عن الشارع وجان يكدر يفوت بس ناس مدري شونها .

الشيخ جاوبه بغضب : صف السيارة منانه بصف الحايط علما تخلص مرة اخوك تحضير اغراضها ونولي لاتسويلنه مصيبة ثانية .

دك الباب الشيخ وديفوت مرة ثانية ، شافني طلعت من الحديقة ، حسيته مل ينطيني اوامر ومانفذها ، عبرت الحديقة وصرت بالكراج  رحت صرت مقابيله .

اعصر باصابعي واحجي : شيخ احنه بعدنه ماكملنه كلامنا اني ماريد ارجع اصلا حم

قاطعني جاوبني براس شامخ وعنيد  : بالبيت نحجي فرررررح جيبي ابنج وتعالي يله كلامي مااكرره رايح للسيارة انتظرج مفهوم .

ان شاءالله انت تفضل اكعد بالاستقبال بس بين ماا انطي لداني شي ياكله توة كعد وجوعان .

طب بالاستقبال بدون ميجاوبني واني رحت للغرفة اجمع اغراضي  ، اجتي موج يمي بعدهه تضحك عليه : لا ماصدك فرح المخبلة هيج سايكين عليها .

دفعتها  دوووخري عني وروحي بدلي لدانيال خلي اولي اجمع اغراضي اني .

_ هاا خضعتي استسلمتي ؟ بسرعة بس خزرج الامير الوسيم . مادري بيج هلكد تخافين لو مشتاقة لحمدان
"وغمزتلي"

_ عابت ليسمعج عيب ترة عنده قوة سمع مو طبيعية
وكملت بحالمية اخخخ منه حمدان موجع كلبي والله حيموتني صح مشتاقتله بس حيل خبيث لا سال عني لاسال عن ابنه   .

_ اي وانت حترجعيله اصلا انت لا كرامة ولا كبرياء وكرامتج صايرة حفاضة بامبرز .

فتحت عيوني على وسعها ، وعضيت شفتي ..

_ ترة هو اول ماوكع بابا  اجه شاف بابا وخطية انطاه خوش مبلغ احسن من عمو ابو سالم .

التفتت عليها : صدك  حمدان اجاكم ماكال؟

هي كملت كلامها : لج لا ياحمدان الشيخ وهم دائما يخابر بابا ويطمئن عليه احسن من رجلج .

دنكت اخلي اخذ  الاغراض من السرير وادحسهم بالجنطة وهي يم راسي تكرك جاوبتها : ترة حمدان هالايام نفسيته تعبانة معذور لاتعتبون عليه ، صديقه ميعرفون وينه ويومية لمركز الشرطة مجرجرينه وهم حسان الكلب الحقير هواي يتعارك ويا ويضغط عليه .

_ اي وبعد الشيخ بعثنه لطبيب قلبية .

_ بس لا دزكم لشرار هههه ترة شرار ممخلص دراسته الطبية

_ لج لا مو للطنطل شرار ..

هذا خوش طبيب ظل هواي يمدح بالشيخ ويكول اني مديون اله بحياتي الشيخ واكفله خوش وكفة  .

_ اي عيني يوكف للكل هو بس اني ميخلصني من علتي حسانو .

_ اانتي مجفصة ويه حسان شيسوويلج بعد مو تكولين طرده من بيتكم بعد شنو يريد يسويلج يكتله ويدفنه وهو اخو وانت لسانج متبري منج .

_ اشو كلبتيلي محامية وصرتي بصفهم شجاج عليه انت اختهم لو اختي ؟

_ حجاية الحق تنكال . ويله لاتأخرينهم عيب .

_ بس خلي ارتب الاي لاينر شوية ..

_ كلشي مابي حلو وانت كل عين بكد الكرة الارضية هسه بس ترجعين تطوخين عليه تصيرين جنج باندا .

_ على كيفج لاتحسديني ، صلي على محمد

موج ... : اللهم على محمد وال محمد ..

دنكت اخذت جنطتهه  وطلعت قبلها دااودي الجنط مالتها للسيارة وهي دتكمل وراها  تغسل لابنها وتسويله ممة ..

رحت للسيارة جان شرار كاعد ، رحت دكيت عليه الجامة ، باوعلي متعصب ونزل الجام .
وبنفاذ صبر :خيير بس لا دكولين اسفط بغير مكان هذا مو كراج.

باوعتله ببرود وحجيت بنبرة جامدة
وممهتمة لعيونه الي تطلع شرار
_ افتح الصندوك دا اخلي اغراض اختي

جاوبني بنذاله...خليهن بالكاع من انزل اصعدهن

_ اخاف ينباكن افتح الصندوك واذا تريد اني افتحه

بملل رد : ديالله يابه مو عساس اغراض اختج ورث سليمان هنه كلهن خرجونتين .

بعصبية جاوبته : اكولك انت شبيك تعارك ذبان خشمك ومحد واكف بعينك ؟

جاوب وهو يتصنع القهر...واكف بعيني اشك حلكه اليوكف بعيني مو كالج عيني كراج ويوكفون بيها .

والله اني اول مره ادخل لمنطقة ناسها مو اوادم وروحهم طافره للستار شبيكم شويه ريلاكس لا زلمكم بيه خير ولا نسوانكم شمسوين والله غاضب عليكم الكلمه الطيبه صدقه

بدهشة وعيوني مفتوحة على وسعها
_ هاي احنه هيج؟؟؟  والله بحياتي مشفت انسان مثلك تقتل القتيل وتمشي بجنازته صدك لو كالو ضربني وبجه وسبقنه واشتكي .

ببرود وكسل...المن اشتكيت لخالتج؟

_ احترم نفسك ولا تجيب سيرة خالة على السانك

بنبرة سريعة : ديله مو عساس خالتج الاميرة ديانا .

_ اكولك انت ليش متحترم ويله افتح الصندوك تره صكعتني الشمس ابقى طول اليوم مكابلتك وواكفة ؟

_ شنو اشتغل عندج اشو مدري شوون تحجين ؟

طلع الشيخ وطلعت وراه فرح ، هو نزل فتح باب الصندوك وجاب الجنط وسفطهن وراح كعد كدام عاقل .

ولا عبالك مسوي شي ولا عبالك قبل شوي جان يكرك ولسانه شطوله الطنطل ابو راس المربع ابو خشم المخنفر .

                               ****

فرح .. حرك شرار السيارة ومشت بينا ، الساعة تقريبا ب١١ الصبح وشهر التاسع والشمس حارة ، عبالك راح اغفي نعسانة كلش ، بس لازمة دانيال قوي خاف اغفى ويوكع واستحي انطي لعمه .

الطريق طويل كلش
بين بيت اهلي وبين بيت عيالي ساعة تقريبا ويه
الازدحامات .

وصلنه للمنطقة الي بيها بيتنا وتوه داخلين بفرعنا
الشيخ اجاه اتصال وظل يخابر ، دااباوع للطريق خطف طفل صغير من كدام السيارة...

صرخخت شررار انتبه راح تدعمه شررررار ..

شرار بسرعة وكف السيارة واني متتت خوف احس قلبي وگف .

اريد اتنفس ماا اگدر خليت داني بصفي وظل يبجي
نزلوا اثنينهم واني بقيت كاعدة بالسيارة احاول اجر نفس ، اجه الشيخ فتح الباب الي يمي واني بس ارجف من الخوف .

كال شبيج شجاج بسرعة خفتي ولا عبالك لسانج شطوله .

سحبني من ردان الصاية مالتي ونزلني من السيارة
كعدت على الكاع وهو راح لدانيال اخذه .

كتله بانفاس مخطوفة : عفية خو ماصار للولد شي خو مامات ؟ بس كولي ؟

_ لا تخافين ماصار شي كعدي هنا واهدي
هسه اروح اشوف .

راح وبيده داني همزين سكت من شاله عمه الشيخ.

شرار .. جاي نمشي وجان يخطف كبالنه ولد صغير ووراه مرة هيه وعبايتها طايرة جنهه سوبر مان .

اجينه ندعمه وفرح صرخت شرار انتبه ..

وكفت السيارة بسرعة ..
ونزلت منها والشيخ راح لفرح وابنه خافوا  ..
المرة لزمت الطفل واكع بالكاع وسحبته بسرعة وتريد تشرد صحت عليها اوكفي ..

اندارت عليه وتسحل وتعت بالطفل  وتحاول تغطي وجهه بالعباية .

كالت مساك الله بالخير خوية اعذرنه طفل وكح شسويله ؟
.

عرفتها من االصوت ونص وجهه الطالع
هاية مرة زكي هاية ام المصايب يومية جايبة للمنطقة مصيبة .

بس هذا ياهو الي وياها هيه ماعدهه خلفة واني اعرف اهلهه واهل رجلها لان كلنا عشيرة وحدة ماعدهم هيج ولد .

كتلها بنبرة هادئة مساءالنور شعندج وهذا منو الي مخليته جوة العباية .

الولد انهار وظل يبجي
ويصيح اريد هدى  اريد هداوي..

خلت ايده على حلكة وكبتت صرخاته ..
وتصك اسنانها وتكله اسكت .

اجه علي الدر بيده ابن حمدان ظل يباوع
وذيج بس تريد تشرد ..

انتبه على الطفل هي سلمت عليه وظلت تحاول تسد حلكه
رد الشيخ عليها سلامها وكاللها منو هذا الطفل هدى  منو الي يريدها  ..

مرة زكي : خوية هذا ابن صويحبتي واريد ارده الها وكح ماينجرع امنته يمي وهسه رايحة ارده الها .

عكد حواجبه وموعاجبه تلكأها وارتباكها وراها سالفة عوجة مبين ، اعرفها هالحيزبونة مايجي من وراها غير وجع الراس .

كاللها بنبرة عصبية : ديري بالج عليه مو زين مااندعم شيفكج من أهله .

ظلت تعت بي وهو يبجي ونظراته كلها تستنجد بينا

الشيخ كال  لعب الفار بعبي وهسه اظل احوص اريد اعرف سالفتها شنو .وشنو من مصيبة جديدة جايبة .

وانت سوق عدل وانتبه شجاك ؟ هاي جم مصيبة سويتلنه اليوم .

_ والله ماشفته اله خطف كدام السيارة همزين ماتعور ترى مالي ذنب هالمرة .

راح طلع بطل مي وانطاه لفرح مدري شبيها بسرعة تخرب وهي بالبيت لسانها شطولة مترين اله شوية زايد.

                         *****

اني عندي نوبات هلع تجيني اذا حسيت بنفسي راح اتعرض للخطر او للالم او اي احد كدامي يتعرض الهالشي فاخاف كلش هواي وما اسيطر على نفسي .وهالشي اله علاقة بمرضي .

لمن عرفت الطفل مابي شي ارتاحيت شويه بس احس اطرافي يرجفن بعدهن ودوخة براسي تخلي كلشي كدامي يفتر .

... اجه الشيخ انطاني بطل مي فتحه وظل يفرغ على اديه غسلت بي وجهي وانطاني شربته كله احس ريكي ناشف .

كال ها صرتي زينة ؟ يله اذا احسن فوتي للسيارة واذا مابيج حتى نوديج للمستشفى .

هزيت راسي بتعب ، خليت ايدي ع الكاع حتى ايدي مبللة والكاع تراب صارت طين .

ا الشيخ انتبه عليه انطاني كلينكس من السيارة ، مسحت ايدي ودخلت بالسيارة .

وهو سد الباب وبقى دانيال عنده ، دخل شرار
كال سلامات فرح ترى مو انتي االي اندعمتي
الولد وهم مااندعم بس فات من كدامنه شبيج بالبيت لسانج شطوله.

مدري شبيهم عليه اليوم واحد يكبس واحد يرفع
متذكرين لساني اليوم .

ادري شبيكم واحد يكص
لسانه مايحجي مايتخربط مايوكع اااف .
كلت هالكلام بقلبي ماريد تروح الهيبة المرضانية الوكعانية .

الشيخ كاله شبيك ماتشوف انته ..
_ والله شيخ اشوف  بس هي السيارة ماتعرف تمشي عدل .

ضحكت اني والشيخ ضحك بهدوء ضحكة قصيره بس هيج "هه" بس صوتها مسموع .

وصلنا للبيت اني شويه زينة الشيخ سألني بيج تاخذين ابنج لو اصيحلهم يصعدونه وياج ؟

جاوبته اي اي واخذته منه . واجه شرار جايب الجنط
وفات قبلنا صعدهم فوك ، الشيخ دخل للمكتب مالته
واني فتت من الصالة دااصعد فوك واشوف حسان كبالي .

انخلست خلسة معدلة منا اني توه متخربطة وتوه واكعة وعلاجي ما اخذته وحتى نسيته يم اهلي
ومنا هذا الغول صار كدامي .

كال شجابج انت ؟ مو ع الاساس راح يطلكج حمدان شجابج شرجعج ؟

جاوبته بعناد : اخوانك جابوني ورجعوني لاهلي شعليك انت حمدان يطلكني ميطلكني شخصك انته ؟وبعدين انت مو مطرود منا ؟ ترى الشيخ بمكتبه  هسه يجيك .

ظل يأشرلي باصبعه السبابة والوسطى على شكل مكص
والله اذا ماكصيت لسانج بيدي مااطلع ابن خشن اني .

رجفت من تهديده وتصنعت القوة
_ ماعاش الي يكص لساني لايغرك ضعف اخوك ترى اني مو مثله تمام وماعندي شي اخسره يريد يطلك خلي يطلك بس ابني اخذه .

... كلت هالكلام غصباً عني ماريد اتطلك اعرف حمدان فترة وتتحسن حالته اتمنى جنت بس اتمنى .

ضحك بسخرية : اذا ماا اخليج بحسرة ريحة الخبر عنه
مااطلع حسان .
يحجي ويأشر على دانيال .

ودانيال يضحك له وميفهم شسالفة ، اخذته لحضني حيل .

_ مو بكيفك الشيخ مايخليك لاعبالك تهديداتك تخوفني ماتايهة الك اني .

_ ههه مستكوية بالشيخ ولج شنو عندج ويا ؟ ليش تخليني اشك .
وظل يغمز .

صكيت اسناني حييل : لا يا ...
ظليت اتنفس بصعوبة الحقير شعباله اني شنووو .
ماكدر اتحمل اوكف يمه ابد ، اخذت ابني وصعدت فوك . وانفاسي متسارعة . حسيت الدرج صار طويل
كلش كوة وصلت لغرفتي ، شفت الجنط يم الباب مخليهن شرار .

دااطب سمعت صوت حمدان يصيح بالتليفون
جنسية وسويتلها مبلغ بالبنك وخليته باسمج
بعد شكووو هذا مووو كافي ؟

انصدمتتتتتتت هذا شديحجي ؟

عاط دانيال وهو فتح الباب مال الغرفة بسرعة
وجهه محتقن وعيوونه حمر التليفون على اذنه
لمن شافنه كال شجاابج ؟

دخلت لان حسيت بعد ما اكدر اوكف على رجليه
ضربتين على الراس توجع توجع حييل
تهديدات حسان والي سمعته من حمدان
حسيت نفسي ضايعة وتايهة .

خليت دانيال بالكاع وهو سد التليفون ...
اتصل تليفونه مرة ثانية ، غلقه بعصبية
وسفطه على الميز بقوووة .

باوعتله واني كاعدة على السرير وتعبانة حيل
وقلبي يبررله اي يبرررله لان احبه احس هو مو
بوعيه هالايام تايه ضايع ابررله كل شي بس
ما ابرر له الخيانة .

كتله اجاوبك على سؤالك وتجاوبني على سؤالي ؟

لا تجاوبيني ولا اجاوبج فرح انت ليش ماتفهمين ؟
جيتج لهنا غلط حسان حاقد عليج انت تسببتيله بهواي مشاكل منها البنية الي يحبها اهلها رفضوه وهو ماجاي ينساهه ومنها علي طرده من البيت وبسبلج هم .

هذا هو جوة حسان يطب يطلع محد يحاسبه

ماعليج هذا بيت ابو لاتتدخلين

معليه بس انت ليش ماتكدر تحميني منه ليش.

احميج بس ما اضمنلج ردة فعله .

منو هاي الجنت تخابرهه ومسوي جنسية ومبلغ بالبنك .

ارتبك ووججه ظل ينقط عرك : هاي رحاب .

^ رحاب منو ؟

رحاب بنت اختي بلقيس شبيج ؟

اي شبيها من زمان ولدت ومو عدهه زوجهه هو ليش ماسوا جنسية ومبلغ البنك شنو ؟

_ انت ماتفتهمين لو اشرحلج منا لباجر .

_ لا اشرح افتهمك .

_ مو صار غلط بجنسية بتها سويتها الها اني عن طريق صديقي وتريد تخلي مبلغ بالبنك انطته الي هم خليته الها هسه دتسالني صاير خطأ بالجنسية عصبت عليها وصيحت وهاي كل القصة .

سكتت بس ممقتنعة .. هو ظل يدخن بشراهة وعبالك هموم العالم كلها على ظهره ، رحت اقتربت منه : حمدان مشتاقتلك انت ليش مبتعد عنه هالفترة ابنك ابنك اني اولي يطبني طوب اله ابنك خطية لااشوفك تشيله تلعبه تحاجي عمامه اكثر منك يشيلو صار يكللهم بابا .

جر نفس بعصبية : فررررح هموم الدنيا كلها على راسي صرت افكر انتحر واخلص الله يخليج شتحجين انتي شتحجين .

شهكت انته ليش هيج تكول ليش ايمانك ضعيف اتقي الله حرام عليك حمدان انت خايف من شي ؟ حسان مهددك بشي اله ايد باختفاء سامر ؟ بلغ عليه الشرطة بلغ الشيخ اخوك هو يحلها ولا تظل هيج .

باوعلي بنظرة ماعرفت افسرهه اخذ تليفونه وجكايره
وطلع من الغرفة صاير ميتحمل حجاية مني ابد ..
بس ادخل للغرفة يطلع . مطبق المثل اذا حضرت الشياطين غابت الملائكة.

اخذت تليفوني واتصلت برحاب بنت بلقيس دااسئلهه عن الجنسية ومبلغ البنك ، اتصلت بيها طلعلي مشغول .

دقايق وكبة العيطة جوة حمدان وحسان وعركتهم كبة للستار . طلعت من الغرفة شفت شرار طلع من غرفته راح يركض ، نزلت حتى نسيت ابني بالغرفة وحده.

شفت حسان ضارب حمدان وهو مدد بالكاع وجهه
بي دم ، الشيخ فتح الباب وطلع من المكتب مالته .
حضنت حمدان خليته على رجليه امس دم وجهه
وصرخت على حسان : يا نذل ياحقير الله ياخذك الله يكسر ايدك واردفت بقهر وصريخ : ليش تضربه ؟

هو رفع ايده وكال انجبي معليج انتي ، اني واخوي
اجاه راشدي من الشيخ ، راشدي معدل .

احجي عدل ووولك انت ببيت محترم ماريد اسمعك تغلط على حرمة اخوك .

ظل يصيح ماتشوففه شون تجاوز لو ماكادر بس عليه انت ليش تدافعلها تدافع دفاع  مستميت عن هل*

الشيخ برقت عيونه بعنف مكتوم .
وبتنبرة تهديد رهيبة : حسااان دير بالك تكمل والله اذا كلتها تندم على ااساعة الي نولدت بيها .

هسه كبل لاتولي تطلع من هذا البيت  مطرود
احجي ليش ضربت حمدان .

خبللني اريد  انتحر واريد انتحر كلساع وعادهه الجبان صاير رچيچ ولا يتحمل المطي كلها من مرته الله يعلم شمسويتله سكطته تسكط اكيد طاكته بسحر مخليته مايندل دربه .

شهكت شهكة مسموعة دااحجي بس الشيخ سكتني بنظراته سكتت وايدي على صدر حمدان افرجه والشيخ طرد حسان بره وكله تحرم
عليك دخلة هذا البيت بعد سواء موجود انه او ماموجود لان انت راعي مشاكل واحنه ناس مانحبها ونريد راحتنه .

شرار اخذ حمدان وصعده فوك بغرفته مثل ماطلب هو راد يروح لغرفة شرار مو لغرفتنه واني تبعتهم بس رحت لغرفتي .

شفت دانيال ميت بجي حضنته حيل وظليت ابجي واسكت بي  .

العصر اجه حمدان للغرفة كال حضري نفسج ابوج متخربط اوديج لاهلج .

شهكت : يمممه ابوويه حبيبي عزااا شبي انتظر خل اخابر موج .

لاتخابرين ولا شي كتلج امشي اوديج لاهلج .

حمدان بابا مابي شي بس انت تريد توديني لاهلي مو تريد تخلص مني ؟

ظل يفرك بكصته وراح كعد على الجرباية ومدد ودار وجهه انطاني ظهر ، صرت اخاف منه ، الله ينتقم منك حسان شسويت بي دمرته .

اخذت دانيال ونزلت جوة
شفت ريلام وهيام وامهم والحجية توهم جايين من بيت رحاب سلمت عليهم وكلمن راح لغرفته وريلام اخذت داني تبوس بي وتلعبه .

رن تليفوني بيدي شفتها رحاب تتصل بيه
جاوبتها سلمت عليها
كالت شفتج متصلة بيه ؟
حجيتلها سالفة الجنسية والمبلغ
حسيت بتوترها من جاوبتني تأكد كلام حمدان .

طابخينها سوى بس مصيركم اعرف اليوم باجر لازم اعرف .

احس نفسي متخبطة حيل ، مداافهم شي  احس نفسي بملحمة بين المشاعر والعقل ، شكد اناني حمدان ولايحس بيه ابد ابد يريد يتخلص مني بآي طريقة.

ولايفكر حتى يحميني من تهديدات اخوه
لعد ليش تزوجني ليش  كتل نفسه عليه .

واني الغبية  فرطت بكلشي علموده ، حريتي حياتي دراستي صرت ملكه وبس .

تالي يتخلى عني بسهولة وين رجولته بس اريد اعرف
شكد اتمنى اعصر گلبي واطلع حبه مني بس هيهات
ما اگدر .

وارجع وابررله تعبان ونفسيته متمدمرة ومن هالكلام .
وهو يحبني اني متأكدة .

فترة وتعدي ونعيد امجاد حبنه ونرجع احسن من الاول . اقنع بنفسي واكول هالحجي ، وداخلي يكول هذا كله هراء وهواء في شبك .

                          ****
ورى يومين بس وخلال هاليومين ماشفت حمدان غير بس كم ساعة ، حدث قاد عقلي للجنون والهذيان ، فعلا جنيت لم وكع عليه الخبر مثل الصاعقة ، صرت مجنونة ماغرف شنو احجي وائلف واكول وكدام كل الناس على اثر الخبر المؤلم الي اقتحم اسماعي وحولني الى مجنونة رسمي .

                          ****

نزل من السيارة جان راجع من طريق طويل طريق مليان الم ووجع مبرح ، خلى قلبه ينزف لساعات من الالم والحزن ، نكث البشت مالته عن تراب المقبرة

المقبرة الي سلبت منه اخوه قطعة من قلبه ودمه ولحمه دفنه مقتول وميعرف منو قتله

تحز بنفسه انو امير ال(***) وشيخ والكل تشهدله يجيب حك الوادم من حلك السبع وبس مو كادر يجيب حك اخوه وحكه

دخل للديوان وتلكوه الوادم يقدمون اله العزاء
رجال من كل العشاير جايه من كل حدب وصوب

تخلل لاسماعه صوت الحبيبة الي تنوح وصوتها يقترب منه ، ضجة عاليه وصياح نسوان وزلم يتعالى

كام على حيله المهدود فتح الباب وصارت بوجهه
شعرها الاسود الداكن المنثور مفتوح و واصل لخصرها وجهه مخرمش ومدمى

النسوان لازميها من ايديها وهيه مثل اللبوة الجريحة
االي فقدت شبلها تصارع لحتى توصله .

من شافها بهذا الوضع دار وجهه منها وصاح بعالي صوته
انسسسستري .......!!!!!

انفرجت شفايفها لتطلق صرخة انسسستر مووو؟
حركت روحها من اليمين واليسار وتحررت من النسوان الي جانو مقيدينها ...

ووصلت للامير وصارت تباوع بوجهه وتحجي بصوت ابح وحنجرة مجروحة بسبب الصرخات الي اطلقتها ع اثر مقتل زوجها . .

مدت ايدها لصدره بلا وعي ولزمته من طرف ملابسه
بقووة وظلت تحجي ؛- هااا دفنته شون انطاك كلبك مو اخوك هذا حمدان سمعت غسلته ليش غسلته ودفنته ليش مادفنته بدمه ليش ؟ شون نطاك كلبك تدفنه وهو مكتول وكتاله عايش وانته تعرفه واني اعرفه والكل بهذا البيت يعرفه ..

كالت كلماتها الاخيرة وهيه تفتح قبضتها عن ملابسه
صرخت يا عالم يا نااس چتال حمدان هناااا بهذا البيت

قبل لتكمل كلامها خلى ايده على حلكها وسكتها بقووة وجانت هاي المرة الاولى الي تمتد ايده الها وتلمسها

اشرلهم وامرهم يدخلونها للغرفة ويسترونها

اخذوها وسط صرخاتها المعتلة ، سحبوهه بقسوة وما اهتموا لعذابها ، دخلوها للبيت وللغرفه ، وكعت على الارض تربعت وكعدت تشيل ايدها وترميها على افخاذها بقوة مهدودة وضعيفة ، جسدها يهتز ويتمايل بدون ارادة منها ، شمرو عليها عبايه بس هيه نفضتها طلعن وخلنها ...

ورة دقايق فات الامير (علي الدر) رفعت راسها وشافته
نزع غترته وشمرها رفرفت و وكعت على راسها وغطتها
كلها لحد حضنها ...

صك اسنانه وحجى بعصبية عكس كل الغضب الي بداخله تأجج بريق عيونه وصارت ترسل ومضات شيطانية ماكدر يخفي الموت البطيء الي يشعر بي باعماقه...
_ اسمعي تبقين بمكانج وما اهيس الج نفس ولج انت شنو الي تردين توصلين اله بهاي افعالج خلي الفاتحة تمر على خير لا ماراح يحصلج خير

رفعت ايديها ووخرت غترته الي تلحفت بيها
كامت على حيلها ووصلت اله
صدح صوتها بمرارة وغصة ؛- خير منين يجي الخير واخوك مكتول ؟

_ اخر مرة اكلج انستري

_ انستر هو هذا الهامك شعري طالع ؟ اخوك حجبني وهسه اخوك مات واني ما راح الزم عدة ولا انستر على كولتك اله اذا اشوف قاتل حمدان ينذبح كدام عيوني

مد ايده باتجاهه يهدد ؛- ولج منهو كتاله شجاي تخربطين انتي ؟ انتي شفتي منو كتله بعيونج شفتي ؟

ماشفته بس اعرف الي كتله وبعد كل الي صار ترة كل شي واضح ، انت شلون انطاك كلبك تدفنه شلووون ؟

حجت هيج وهيه تضرب على صدر الامير بقووة
امتدت ايده قيد معاصمها بكفوفه وبعدها عنه

يريد يطلع مدت ايدها اله ولزمته من زنده
حسان حسان الي كتل حمدان ياشيخ اي اي هو والله ولازم ياخذ جزائه لازم تكتله

دار وجهه عليها وملامحه تشع غضب
_ ولج توني اجيت من دفن اخوي وتريديني اكتل اخوي الثانييي ؟

_ والله اذا ما كتلته انته اني اكتله ولو لو اعرف ابيع شرفي واخذ بثاره
جانت منهارة لدرجة متعرف شنو تحجي وشنو تكول

وصل الغضب بروحه لاعلى درجاته خزرها خزرة جانت تكدر من خلالها تشوف الموت يلوح الها من خلال نظرات عيونه

بعد لحظات عرف انو هيه خلص جنت وفقدت صوابها على اثر فقدانها لحبيبها الي بالموت يله تزوجها وبعد اقل من سنة ونص يودعها مقتول وسابح بدمه الشي الي خلى عقلها مايستوعب الفاجعة ابد

بس كلماتها البعدها اكد اله انو هيه جانت متقصدة تكول هالكلام
كالتله حسان تحرش بيه والمشاكل الصارت كدامك كلها تكدر تتأكد من الي دا اكوله

توالت الصدمات عليه هاي جنت وراح تجننه وياهه

اردفت ؛- عندي فديوات وتسجيلات بتليفوني كلها تفضح وتكشف حسان على حقيقته وانت شيخ وماره عليك هواي قضايا يعني تكدر تكشف القاتل بسرعة وتخلي ياخذ جزائه

بقى يراقبها بصمت متحجر  ميعرف شنو يكول لاول المرة ينتابه السكوت ونظرات عيونه الجليدية تطالعها ..

كملت كلامها وهيه تتسلح بابتسامة مزيفة وسط كل الالم ؛-  هاي اذا ماردت تكشف الحقيقة وتتستر على اخوك القاتل المجرم

_ انتي راح تظلين هنااا ، وأشر بسبابته على الارض
وكمل كلامه بحزم وصرامة ممنوع تطلعين من هاي الغرفة ..

_ لانك جبان راح تحبسني خايف لا اكشف اخوك القاتل شمدريني ما انته شريكه بالجريمة

مد ايده وخنكها من حنجرتها بققووة فتحت عيونها على اوسعها ، بسرعة وخر ايده منها وعافهه
اذا هيه جنت فما لازم تخلي يجن وياهه اصلا هو جان لازم يتعود على جنونها من اول ما وطأت رجليها هذا البيت ..

تركها وطلع وصاح بصوت عالي ؛- وووينج ام رحاب
اسمعي هاي الغرفة بابها تنقفل والي بيها ماتطلع منها ومحد يحجي وياهه اي جنس مخلوق ماريده يتواصل وياهه مفهووم ؟

_ شيخ وابنها شلون ادخله عليها كتل روحه من البجي

_ لااء ديري بالج ترة ما معروفة تصرفاتها خلي الطفل عدكم وديرو بالكم عليه

_ واهلها شلون ؟ جاي يخابرون من البارحة لليوم ويردون يجون

_ خلي يجون هلا بيهم بس هاي محد يدخل عليها واهلها انه احجي وياهم ....

                             *****

موج .. اخابر على فرح ماترد مدري شجاهه ، قلقت عليها هواي خخاف بيها شي ، اتصلت على ريلام
جاوبتني تبجي
_ خالو حمدان لكوا بسيارته مقتول!!!

لطمت على خدي بقووووة وصرخت عزااا عفية ريام لاتكوليها تموت وراه فرح والله تموت هي تحبه والله تحبه لا اله الا الله انا لله وانا اليه راجعون .

عفت الفون وكعدت ابجي اجه بابا على صوتي
وخالتي طلعت من المطبخ .
بابا بنبرة تعب وخوف وهو يرجف سألني خيرج باباتي موجايه شكو شصار خواتج اخوج بيهم شي .

خليت اديه على وجهي وابجي ...
: بابا حمدان زوج فرح مات خطية انقتل .
وكع بابا على القنفة واختنك خطية وظل يبجي ..

ركضت فتحت كلبيته من فوك وظليت افرج بصدره .
وهو يبجي ويحجي : لا لا ابويه فرح بنيتي فرح
مو لرجلج الموت مو اله اليه اني اني جان اخذتني ياربي وخلصتني من عذابي وخليته الها يربي لا اعتراض على امرك .

يحجي بانفاس متهالكة نزلت يم رجليه كعدت
وهو رافع راسه وكوة يتنفس :حبيبي بابا عفية على كيفك ويه نفسك بابا لتكول هيج .
ولج انو خابريله لاحمد خلي يجي شوفي وينه .

تخربط بابا علينه والدنيه ليل ، اجه احمد ودينه بابا للمستشفى اخابر على فرح ماترد بقى بالي يمها الله يعلم بحالها هسه اكيد متخربطة وفاقدة وهي اصلا بهيج ظرف هواي تتأذى او تجيهه نوبة الصرع .

يوم ثاني بعد الظهر يله كدرنا نروح رحت شفت مرة عمو ابو سالم قبلي. سألته شفتي فرح ؟ وينه هزت براسها اختج منتهية فد نوب وتهذي .

رحت لريلام مدري هيام وحدة من ألتوأم بس من نظراتها مبينه هاي الخبيثة  سألتها عن فرح ودانيال
كالت سألي ماما معليه ..

البيت جان مخبوص نسوان مليان . وصريخ وبجي .
دورت على ام رحاب ولكيتها سألتها .

كالت اختج فضحتنه راحت للديوان تصرخ وتبجي
وتتهم حسان بكتل اخو .

اختج تخبلت والشيخ قفل عليها الباب بذيج الغرفة وميقبل احد يطب عليها .
الا بأذنه .

رحت وكفت يم باب الغرفة الي اشرت عليها داافتحهه مقفولة باوعتلها وهي اجت وكفت يمي .

التفتت عليها ااحاجيهه : شنو شنو ؟ يعني تبقى فرح محبوسة هنا بهاي الغرفة ؟

_ اي هذا امر من الشيخ .

_ ترة اختي مريضة واحتمال تتخربط وقلبهه يوكف وتموت بسببكم انتوا شنو من بشر فتحيلي الباب هسه بسرعة وكدامي يله .

جاوبتني : اكلج اشو انت فد نوب ماتحترمين احترمي نفسج ولا تصيحين ما اشتغل عندج والباب ماينفتح اله بأمر الشيخ وكلشي مايصير باختج لاتخافين تعيش تعيش كلنه حزنانين وضايجين على اخونه مو بس هي .

خليت اذني على باب الغرفة ماكو صوت لفرح بس لا مغمي عليها او اجاهه الصرع .

ظليت لازمة مقبض الباب
انزل بي واصعده بعصبية واضرب على الباب واصيح
عليها فرح فرررح تسمعيني جاوبيني حبابة اني اختج اني موج .

ماكو اجابة عصبت حيل والتفتت على بلقيس صيحت بوجهه : افتحي الباب ببسرعة كتلج لج اختي راح تموت انتوا شنو ماتحسون .

كالت سدي حلكج لا اطلعج بره هسه كتلج هذا الباب ماينفتح شبيج ماتفتهمين .

_ لاااء ماافتهم خوش وفتحي يله .لاااشتكي عليكم

اجانه صوت خشن اجش ، هاي شكو هنا شنو هالصياح شبيجن تصيحن ..

يتبع . 

نشرت هسه لان ما اضمن النت بالليل 😢😢😢😢😢🥺🥺🥺

والنشر بين يوم ويوم 💚