رواية هذيانٌ بين جمرٍ وجليد ..(ارملة اخي المجنونة) الفصل الثامن والعشرون 28 - بقلم نورا ناصر

السلام عليكم
رواية هذيان بين جمر وجليد
بارت ٢٣
نورا ناصر

...

طلعني وصفني على السيارة ، ارجف والدمع عصى بعيني ، ويه ما سحبني وطلعني موج فتحت الباب ونزلت وانين بداخل السيارة كاعدة كدام وعدها دانيال تبجي وخايفة .

الفرع كله ظلمه نريد احد ينجدنه ماكو . وهم تعمدوا اصلا يوصلونه الهالمكان .

هو بقى لازمني واجه واحد من جماعته الي ويا فوت
موج للسيارة وبقى الباب مفتوح وسد حلكها وثبتها حتى لاتتحرك.

واني بقيت مقابيل حسان واحس اطرافي انتهت وراح شويه واوكع ، ظليت اتوسل بي .
حسان الله يخليك اتركنا الله يخلييييك .

ابتسم بسخرية ورفع ايده ضربني راشدي حييل صرخت ووكعت بالكاع .

فتح باب السيارة الكدام الي بصف السايق وظل يباوع على انين وعندها دانيال وذيج تنحب وتبجي ميتة من الخوف .

لزمها من ايدها ونزلها واخذ منها دانيال وهي بقت واكفة متحنطة مثل التمثال بس صوت شهكاتها طالعة .

بقيت بالكاع كاعدة احس راح افقد واتوسل بيه وارجف وهو مرة يباوع لدانيال مرة يباوع لأنين بنظرات وصخة .

باوعلها وركز عليها هيه خافت دنكت وزادت بالبجي
خله ايده جوه حنجها رفع راسها يباوعلها بتعجب..
كال هاي منو ؟

صرخت عوووفها ووخر ايدك عنها قذر يااا وصخ اترررركهه .

ابتسم : هاي اختج الصغيرة مووو ؟ بوووويه!!!! لج هاي صارررووخ شنو هالجمال ؟ تشبهج هاي فرح احلى من ذيج الزركة .

صيحت بصوت تعبان ومبحوح : اتررركها حسان معليك بيهااا اتركها طفلة هاي حرام عليك حرررام .

لزمها من خصرها وسحبها اله حد ما طخت يي ، ظل لازمها من جهه ودانيال من جهة ثانية .

باوعلي وكال يله اختاري اخذ منووو منهم ؟ اخذ ابن اخويه حبيبي مشتاقله لو اخذ هاي الحلووة تونسني الليلة ؟

شهكت بالبجي ودنكت للارض وتمتمت الله ياخذك الله ياخذك .

اجه يمي وسحب انين وياه ترك خصرها ولزمها بقوة من كف ايدها .
ظل يباوعلي وعيونه حمر .مبين مو بوعيه مبين شارب.
كال مو كتلج لا تتدخلين بيننا اني ونرجس ؟ ليش تدخلتي ها ليش تدخلتي ؟؟؟ ركض رحتي لحبيب كلبج واشتكيتي عليه مووو هسه يله لو اختار اني لو انتي تختارين .

جانت انين نظراتها تستنجد بيه ولسانها يصيح لمووج ... واكفة بصفه بخضوع وتوتر ..

جنت محتارة بين اختي وابني ياربي امتحانك صعب صعععب ..

مااعرف شلون موج تملصت من الي لازمها وصررخت
ووولج فرح خل ياخذ دانيال ابن اخو مايأذي بس انيين لا ولللج لالااااا يأذيها....

غمضت عيوني وشهكت
... كتله اخذ دانيال بس الله يخليك لا تأذي ابن اخوك هذا ...

قوس شفايفه ويباوع على انين يكصها كص بنظراته
وهيه ترجف وبس تريده يتركها ..
كال حرامات جنت اتمنى اخذج يمي نتونس . ودفعها من ظهرها باتجاه السيارة بخفة ولزم زندها وعصره حيل هيه خافت وزاد رجيفها .

وهو مبتسم بحقارة وكال نلتقي غير مرة يحلووة انت محجوزة الي عوضيني عن نرجس ..

وصاح فررح مو خربتي علاقتي بنرجس هسه غصبا ما عليج اخذ اختج بدل منها .

جان صوته يوصلني ضعيف واشوف دانيال بيده مستسلم اله ولازم بقميصه عبالك يعرفه رغم صارله كومه ماشايفه .

واني لا حول ولا قوة كاعدة ع الكاع وراسي ع السيارة واحس راح افقد الوعي وبس اتمتم واتوسل بي يرجعه الي وهو ولا يمه اخذه وراح .

حسيت نفسي دااوكع واوكع واوكع لحد ما استقريت بقعر الهاوية ، احس وكعت على راسي وانتهيت ..
ظليت اصرخ بهستيريا واريد ارجع ابني بس احس رجليه ثابتة على الكاع وما تتحرك .

اجتي موج اليه تهززني من اديه وتحاول تصحيني
فرح فرح موو وكتج هسه مووو وكتج لج كومي كومي نروح لبيت الشيخ كووومي لا تظلين تعوين وتنووحين مثل البومة .

مووج ..

كوة شلنه فرح وخليناهه بالسيارة اثنينه نرجف اني وانين وهي خربت .. كعدنا بالسيارة
انين كالت بخوف حبابه موج حركي خلينا نرووح .

رديت عليها بعصبية ولج ايدي ماتاخذ والله ولج خاف اسوي حادث ولج مادري احنه وين هسه .

موج انتي غير تنتبهين الله يخليج ليش دخلتينه هنا .

غير ردت اضيعهم شمعرفني ولج حصرونه حصرة الجلب بالجامع الله ياخذهم ولج مسلحين عدهم مسدسات وهذا حسان مبين شارب لسانه ثكيل ويمسلت بالحجي الله ينتقم منه .

مووج خوفني هذا من لزمني والله نبت اصابعه بخصري حيل مووتني خوف والله حسيت راح افقد

ضغط ع اسناني : الله ياخذه ..

اكولج اذا اخذني شنو يسوويلي هاا كال يريد ياخذني خفت موج خفت ..

جريت نفس .. واني احاول اكعد بفرح
كتلها : يااكل تبن لتخافين عمري ...

انين كالت خابري احمد خلي يجينه هاي فرح سودة بعد ماتكعد خلي نوديها للمستشفى .

طلعت تليفوني والله عقلي واكف فد نووب حتى ما اكدر افكر ، خابرت احمد مايرد تنرفزت وجيت اركع الفون ..

سألتني انين بترقب : ها ميجاوب ؟
هزيت راسي بنفي ..
كالت يمكن هسه هو بالبيت مو كناله نتأخر بالحفلة لاتطلع ابقى يم بابا وخالة .

اكيد طلع وراح للكوفي بس يتصل بي سالم لو واحد من جماعته يطلع ولا يهمه .

شويه وكعدت فرح كالت لا ترحين موووج لاترحين حبابه خلي نبقى هنانه بلكي يرجعه الي .

صيحت عليها ولج كومي كووومي خابري حماج الشيخ خلي يشووفولنه حل كوومي .

تحجي بتعب ووهن ولسان ثكيل
انطوني جنطتي وطلعولي تليفوني وخابرولي على العرندس مسميته اني خلي احجي ويا .

انين طلعت تليفونها وهي كعدت عدل بالورة مالة السيارة وخلت ايدها ورة عنقهه ميلت راسها وطكطكة ركبتها .

اتصلت على الشيخ واحنه لازمين الها التليفون وفتحنه السماعة . بس كال الو هي انفجرت .. تستنجد بي بنحيب وقهر مال قلبها .

صاحت تبجي وتشهك : عليييي الحكني حسان اخذ ابني اخووك اخذ ابني رجعليا رجعه ررررجعه .

جاوبها بنبرة متوترة ويحاول بجهد التحكم بنبرة المنفعلة . بس اهدي فرح وفهميني لاتصيحين اسمعج اسمعج موو اطرش كليلي انتي وين هسه هاا؟

صررخت مادري مادري بالشارع بالشارع رجعي ابني رجعه علي ليش تكوله اني كتلك على نرررجس ليشش .

صاح بعنف وقسوة : ولج شسوين بالشارع بهالليل هاا ؟ جاوبيني وين انتي .

انهارت وجفصت وتريد بس تعارك اخذت منها االتليفون واحاول احجي بهدووء . بس هي وين تخليني اسمع شي بس تولول وتنحب .

نزلت من يمها بالورة وكعدت بمكان السايق
وجاوبت واني انزل ..
شلونك عمو اني موج اخت فرح اعذرها تعبانة متعرف شتحجي ..

جاوب بهدوء مصطنع : بويه انتوا ووين وشسوون بالشارع بهالليل ؟

جاوبته بقلق : عمو راجعين من حفلة صديقتها احنه تبعنه وقطع علينه الطريق وتهجم علينا اخذ دانيال غصب وراح ..

كال بنبرة يطمأني بيها : سهلة بويه سهلة احنه حقكم ناخذه الكم وهذا مهيب وياج وصفيله الطريق الي انتوا بي حتى نجيكم .

جاوبته : ماتقصر عمو ..
لحظات واجاني صوت مهيب للحظة حسيته شرار هواي يشبه نبرة صوته ...

ظليت اوصف له المكان الي احنه بي ..
كال تكدرين تحركين السيارة وتطلعين ع الشارع العام خاف المكان خطر عليكم وبين منجي احنه ..

رديت : والله ماكدر ايدي ماداتاخذ سياقة والله لو تدري شسوو بينه حتى اسلحة خلوا فوك روسنه وهددونه بيها .

اي والله حقكم اعذرينه ومسحيها بوجهي ، بس الشارع العام مو بعيد غليكم اطلعوا من السيارة قفلوها وتمشوا لا تبقون بهالمكان وحدكم .

جاوبته واني اباوع لفرح : مادري والله
فرح تكدرين تمشين ؟

هزت راسها بقوة ورفض وحجت وهيه تنحب
لاء مابيه رجليه مااحس بيهم .

هو وصله صوتها لأن يلعلع ..
كال تمام ابقوا بمكانكم وقفلوا السيارة هسه احنه جايين مبقى شي ونوصل صرنا على الطريق .

كتله اوكي وسديت وختمت المكالمة ، باوعت على فرح
وحاجيتها بحده يعني هيج غبية مثلج مشايفة تدرين بحسان عنده عيون وجواسيس بالبيت رحتي حطيتي روحج بالنص بينه وبين نرجس شكوو نارهم تاكل حطبهم شعليج انتي !

صيحت سكتي سكتي انتي ولتكعدين تلوميني هسه دشوفيني بوضع اتحمل ملامة ؟

درت وجهي و حكيت راسي ..غمضت عيوني بملل
وكتلها واني اطمئنها : يله يله كافي لاتخافين هسه يجي حماج الشيخ ويرجعه الج وبعدين هو عمه مايأذي .

عاطت وتضرب على رجليها : ولج سكران سسسسكران شبييج انتي شبيييج ماتفتهمين خاف مايدري برووحه ويأذي .

هزيت راسي وتمتمت يربي شحاجيهاا خل اسكت اني احسن دا اجفص احس روحي مااكدر اتملك اعصابي .

بقينه بالسيارة واتصل مهيب على تليفونها ومرة ثانية وصفت اله المكان ، الشارع الي احنه بي ، بي بيوت وسيارات قليلة تفوت منه .

واخيرا وصلوا ووكفوا سيارتهم وره سيارتنا ونزل منها علي الدر وفرح عبالك طير وطلعوا من قفص فتحت الباب ونزلت هيه نزلة وهيه وكعه وهو ركض عليها لزم ايدهه وكومها وهي ظلت تشكيله وتعاتبه بنفس الوقت وهو يهدي بيها .

تحجيله شنو صار وهو مثبتها كوة من رسغ ايدها وهيه مجلبة بردانات دشداشته هو يصغي الها ومبين عليه معصب وشالها مخربط كلساع يوصل لنص شعرها وهو يسحبه الها دومها ماتلف الشال عدل ولا تربطه تخلي على راسها بإهمال والسلام .

كال الها وهو صاك على اسنانه امشي انتي وياي للبيت وانته مهيب وصل البنات لبيتهم واتبعني لبيت حسان .

مهيب هز راسه واجه باتجاه سيارتنه وهيه عاطت
ارووح وياك لبيت حسان اني .

سحبها من ايدها واخذها وراح للسيارة ..

اجه مهيب كال من رخصتج وخرت من يم مكان القيادة مالة السيارة ، سويتله مجال وهو فات جوه واني صعدت وره كعدت يم انو .

مهيب يذكرني بشرار نفس ضخامته بس مهيب بشرته تختلف ، وجعني قلبي ومعدتي ، ررن تليفوني طلعته كلت يمكن هذا احمد طليت بالشاشة شفته اوس شمرته بالجنطة بعصبية .

وصلنا للبيت ونزل من السيارة اعتذر وكال تصبحون على خير وراح .

دخلنه للبيت احمد سيارته ماكو دايح الذيب مالتنه
اتمنى يوم اخابره الكاه كله الفون سايلنت وبالكوفي .
تلكانه بابا انين ركضت حضنته وباسته ..

هو وخرها منه بحنيه وباس راسها وظل يطل بوجهه
قلبي نغزني بس لا تكول كدامه كل شي والله بابا مايستاهل قهر وتعب من ورانا .

باوع بوجهه وكاللها هاي بابا شبيج وجهج مخطوف صاير شي ؟ وباوعلي وسألني مووجه شبيها اختج وذيج فرح وينهه ؟

ارتبكت شويه وابتسمت اخفي توتري جاوبته
ها بابا فرح راحت لبيت الشيخ هم عازمينها يردون يشوفون ابنهم صاير هواي ماشايفينه وهمينه عدهه شغلات ناسيتها يمهم تريد تجيبها هنا وبيتهم قريب على بيت نرجس كالت انزلها يمهم .

وبقلبي كملت ياربي سامحني على هاي الجذبة ..

كال باستغراب اشو ماكالت ولا حجت ؟

كتله بابا اني هم انصدمت والله تعرف بنتك عقلها مو بمكانه ..

جاوب لا بنتي لا هي ترة اختج مو صاحية ومريضة لاتكولين عنها هيج .

بلعت ريك هزيت راسي وابتسمت ..
وانين بعدها حاضنه بابا واجتها خالة خبزتها على ضهرها بصواب خلتها تجفل وتوخر وتباوعلها خايفة .

خزرتها خالة وكلتلها جلبتي خووو ما جلبتي وخري عن رجلي خنكتي ..
خطية انين ظلت تعدل بشعرها وبعدها مصدومة
الله لاينطيك حسان غضب الله على راسك ان شاءالله
تمنيت ايده تنكسر ولا يلزم انين .

رحت للغرفة وانين ويايه باوعتلها ولج شبيج خليتي بابا يحس تدرين بقلبه تعبان .

ظلت تفرك باديها ولج والله من شفته يله حسيت بالامان ماكدرت الزم نفسي وحضنته .

اخذتها لحضني وبستها براسها بعد عمري لاتخافين
..

كالت والله احس روحي طلعت من هو يحجي حيل يخوف وعيونه حمرة عبالك سهام مسمومة وتخترقني حيل ركز بيه .

ظليت امسد على شعرها ، غمضت عيوني
لا تخافين حبيبتي لا تخافين ميكدر يسويلج شي .

هزت راسها وجرت نفس اروح اسبح اني بعدهه الرجفة بيه بلكي ارتاح .

روحي حبيبتي ..

ضحكت ترة تليفونج مابطل يرن ..

هزيت راسي وجريت نفس بقووة طلعت تليفوني وهي طلعت بره شفته اوس جاوبته واجاني صووته ..
حسي شويه حسي شبييج جاوبيني شوفي شكم مكالمة ليش تخليني اجي لبيتكم ؟

عزا بعينك عزااا شسوي لافي لبيتنا عرفه ولفه احنه وياك ؟ صدك الي استحوا ماتواا ..

عاط زوجج زووججج اني المستقبلي ومن حقي وبعدين يله حددت موعد الخطبة الخميس الجاي .

صلوات راح تخطب الف مبرووووك ...شايف كل الخير فكيتني منك يعني! واخيرا ...

اي غير راح اخطبج ...

اكولك اوس مالي خلكك ترة هذا ابن عمتك العار حسان اليوم تهجم علينا عجيبين انتوا والله شنو من بشر كلكم عارات ولا واحد بيكم بي خير .

ها موج بدينا بالغلط وبعدين كليلي شبي اوس اطيح حظه والله .

اليوم تهجم علينا وبنص الشارع وحتى سلاح سحب بوجهنا .

وانت شسووين بنص الشارع وبالليل شعندج ؟

معليك انته معللليييك خوش مو حددت الخطوبة بدون ماتاخذ راي اني هم مااخذ رأيك .

غصبا عليج تاخذين رأي ..

اوس هيه مو غصب والحب مو غصب يااخي اتركني لحال سبيلي الله يخليك .

هاا غيرتي رأيج ترة مو من صالحج ومايفيدج هذا الحجي خطوبتنا الخميس وكافي تماطلين صبرت عليج كلش هوووواي ولا تنسين التعهد الي انت موقعة عليه اكدر ادخلج للسجن مرة ثانية .

غمضت عيوني بملل ورديت عليه : اذا تريد ارجعلك فلوسك بس اصبر عليه واتركني اروح لحال سبيلي مو كوة هيه اوس حرام عليك .

اكلج موج امج الله يرحمها متوفية موو ؟

شعليك بأمي اني وين وانته وين ؟

جاووبي ..

اي ميتة .. وكملت بقلبي عساك تلحكها بس كون لجهنم لان امي بالجنة وتعتبر شهيدة ..

زين عندج بس احمد اخوج موو ؟ والله يخلي هو الاخ يصير حزام ظهر لاخته وسندها تحبين اسفره يم امج واحد يونس الثاني لو منو تختارين اسفره ابوج وحدة من اخواتج اختاري ولا تستحين .

شهكت الله ياخذه كتله : لوين وصلت انته وصلت بيك تهددني هيج عبالك راح احبك وانت بهاي سوالف اوس! راح تخليني من صدك اكرهك والله .

المهم صيري حبابة ولا تعانديني الله يخليج ولا تجبريني اذيج ولو اني مايهون عليه اذيج بس اكدر
اذي احد قريب منج .

غمضت عيوني بقهر يربي ويا من متورطة اني الله لاينطيك شرار الله لايوفقك . كلها منك .

فرح ...

اخذني الشيخ علي الدر وصعدني بالسيارة ، السيارة عاليه كوة صعدت واني ارجف . وابجي وانحب ..
حرك السيارة وطلع بينا ..

رأسا مد ايده طلع تليفونه وخلاه على اذنه
وظل يخابر واني اباوعله بترقب
كتله دتخابر حسان موو باوعلي بنظرة مستنكرة وعصبية ..

اخذت التليفون من ايده وفتحت سبيكر
وهو ظل يصيح وكف السيارة واخذه مني ولج استجني اكعدي شجااج تخبلتي شجااج !

رديت ابني هذا ابني شون تريدني استجن واكعد وبعدين انته ليش ليش تكوله اني كتلك على نررجس ليش ؟

جان يريد يجاوبني بس اجااه صوت حسان
كال ولك حسان وانته ولك هاا ؟

رد عليه اني توقعتك تخابرني شيخي واني هسه بالبيت ويمي ابن حمدان ...

صررخت حسان حقي .. بعدني ممكملة مد ايده علي الدر لفها داير مداير راسي وسد حلكي حيل وبيده الثانية يحاجي على حسان .

كاله جاييك احنه ابقى مكانك لا تطلع ..

هلا بيكم شيخ ...

غلق التليفون وبعده ساد حلكي واني بس احووس .

وخر ايده وكال معصب اكلج بويه انه طرطور هنا؟ حتى صوتج يعلى على صوتي ولج انه ولدي اكبر منج الاخزره اخلي ما يعرف يمنته من يسرته بس الضاهر انتي هاي تربيتج ومتعلمه ترفعين صوتج كدام الاكبر منج ومبينه لا انتي محترمه اب ولا محترمه اخ

من اكلج صمي حلكج حطي بي تراب واسكتي ولا تخليني اطلع من طوري وانه واكف وياج ضد اخووي و جم مرة كايلج لاتطلعين كبل لا تشيريني ليش ماتاخذين الحجي هاا ليش ماتاخذين ؟

بلعت ريك مصدومة من رزالته تمتمت
انته مو كتلي انتي حرة نفسج

عاط ... حرة نفسج بحدود شعندج بهالليل تفترفن بالشوارع انتي وخواتج وانتن بس بنااات ها ولج..

وانته ليش ليش تكول لحسان اني كتلك على نرجس ؟

هز راسه باستنكار : والله انت لا لبوة ولا بلوة انت عبوة اي والله عبوة ناسفة ومخلينها بيد واحد اغم وين ماجان يفجرها .

اريد احجي سكتني وكال مااااسمعلج حس سكتي راح اوديج للبيت الجبير وتكعدين والسكتين افتهمتي ..

نبرة بجي : لالالا اروح وياك والله اروح اجيب ابني اني رجلي على رجللللك ...

ظل يضرب على الستيرررن بقوة ويشمر باديه بعصبية
ياااربي منك الصبر منك صبرني على بلووتي .

درت وجهي ع الجامة وسكتت عرفته معصب حيييل واني مالي طاقة للكلام بعد ..

وصلنه لبيت حسان نزل هو واني نزلت وراه
رجع عليه لزمني من عكسي بعصبيه و
غضب حارق من عيونه ..
وكال
بنبرة حادة وضاغط على اسنانه رجعيي للسيارة ..

بنبرة نحيب طفوولية : ما ما ماااا ارجع ارووح وياك ابني ابني هذا علي كلبي راح يوكف خليني اجي وياك اخذه وارجع حباب .

بنتر كال امشي .. تبعته و مشيت وراه بخطوات مترددة خاف يسوويلنه شي حسان لو مسويلنه فخ
ياربي خاف اذى ابني يا اللهي سترك .

الشيخ دك الباب بعصبية وكوة متمسك باعصابه
قبضة ايده عاصرها حيل ..
واني واكفة بصفه واباوع له ..
باوعلي وطل الشر من عيونه ، خفت وانكمشت على جسمي كدام نظراته .

اني اليوم جنت منظفة وجهي من الشعر وحافه حواجبي ومخلية مكياج خفيف .. وبهالوقت جان على وفاة حمدان عشرة اشهر .

دنكت وخجلت من نظراته ، سمعته كال باوعيلي!
فتحت عيوني متفاجاة وهو كرر كلام كال تسمعيني ؟ باوعيلي كتلج .

باوعتله بعناد وتحدي هو كال ضربج ؟

عضيت شفتي وكتله اي حقير وكلب ضربني على وجهي .

هز راسه ودفرر الباب برجله وبقوووة ..

اجه صوت حسان وخطواته ومبين يركض ..

فتح النه الباب واني هجمت عليه لزمته من ياخته وصرخت بوجهه وين ابني ولك ووووينه ؟

لزمني علي الدر من اديه وفكهن من ياخة قميص حسان وبعدني عنه بقسوة وعصر اديه حيل ورجعني خطوات لوره وهو يدفعني بشوية عنف وقسوة .

وكف حسان يباوع للشيخ ونظراته القاسية
كال بخوف ومبتسم والله شيخي توسلت بيها اشوف ابن اخوي طاك كلبي عليه راح يصير سنة ماشايفة ولا قبلت اضطريت استعمل وياها هاي الطريقة .

صرخت جذااااب والقران جذااب
باوعلي الشيخ وبنظراته يسكتني وعاض شفته ومقلص نظراته .

اباوعله واهز راسي واهمس بتوسل والله جذاب والله

تقرب من حسان ودفعه الشيخ من كتفه وبقووة وكع بنص الكراج من بيته
وعاط الشيخ بصوت عالي وكال عبالك تعبر عليه سوووالفك مووو ولك ؟ الولد ابن حمدان وووينه ؟

جاوبه وهو ع الكاع ونظراته عليه بحقد وكره
جوة بالبيت تفضل شيخنا لا توكف بالبا ب .

عاط بي روووح جيبه وتعال ..

هز راسه باوعلي بنظرات اخيرة وطب جوة

الشيخ بنبرة امر : روحي للسيارة صعدي هسه يجيبه ويجي ..

خل يجيبه اخذه وارووح ..

باوعلي معصب من عنادي واني دنكت خوف من نظراته ..

طلع حسان من بيته ووياه دانيال وجان بيده العاب وساكت عنده ..

رحت دااخذه منه لزمني الشيخ ورجعني لمكاني وراح هو اخذه وانطانيا .. وكال روحي للسيارة وانته حسان امشي جوه عندي حجي وياك ..

ضحك حسان ببرود وكسل وجاوب اي اي قصدك كتل مو حجي بس والله تعودنه وكتلك هذا سووانه زلم ماتسكت عن حكها ...

جان يحجي ويباوعلي بتهديد ..

علي الدر كاله : اهااا سويتك زلمة تتمرجل على النسوان ولك نذل ؟

دنك حسان ويهز براسه والتفتتلي علي
وكال شوو واكفة شنو كتلج قبل شوويه ؟؟

رديت بتحدي وعناد ونظراتي على حسان
-: اريد اشووفك شون تكتله اريد كلبي يرتاح والله مموتني ..

عض شفته بقسسسوة وصرخ بوجهي...ولج فريييييحه امشي وروحي من خلقتي لا اربطج انتي وحسان واكصبكم كصب .. ماريد اكرر كلامي فرررح بسج عناد وروحي للسيارة يله ..

درت وجهي واخذت ابني ابوس بي حيل واخذت من ايده الالعاب وشمرتهن ع الكراج وطلعت ..

كعدت بالسيارة وبقيت كاعدة اتمنى اشوف شون يكتله ويعاقبه بس مايقبل علي حرامات .

سمعت صوت تليفوني يررن جاوبته جانت موج
حجيتلها كل شي وهي كالت احجي ويا بابا وكوليله هالكلام لان احنه ماكناله شنو صار نخاف عليه ..
كتلها ماشي .. وخابرت بابا وحجيت ويا واعتذرت منه ..

تأخر علي واني فضوول كتلني نزلت من السيارة ورحت للبيت ، فتحت الباب وفتت جوه
جان االباب مفتوح دخلت شويه واسمع صوت علي يصيح ..

ولك ادبسز و تروع امه عليه انت ما جاي تشوفه انت خطفته لو ام جاسم مشتكيه عليك وتاهمتك بالخطف هسه انت خايس بالسجن .

ضليت اضرب على فخذي هم كال ام جاسم هم كال والله داقني ..

واشوف علي الدر كبالي كال المفروض اسميج أم فاضل مو ام جاسم لان حيل فضولية ..

جفلت وطلعت اركض كدامه .. وهو رجع يم حسان
يمكن حس بيه واكفه وطلع ..

بقيت واكفة شويه شفت بيده عكاله دخلت للسيارة بسرعة وعلي الدر دخل وراي معصب كلش وبس ينفخ خفت منه وفتحت الباب داانزل واكعد ورة

حسيت ايده تحفر بكتفي وصوته يخترق اسماعي بعنف .. كعدي هنا وين نازلة انت شنووو فقدتي عقلج فد نوب لوو شنوو ..

سديت الباب بعصبية ركعته ركع وكتله اي مابقالي عقل من وراكم من ورا اخوك موتوني موووتوووني .

كال لا والله من وراج ماتعرفين تتصرفين لا تعرفين تشاوريني من تخطين خطوة ..

يعني شنو تريد اطلع منا لهنا اكولك ترة هيج هواي

لعد احسلج هذا ااي صار بالليل وبنص الشارع بس كليلي ؟

انت ليش ماتخلي حد لاخوك خليله حد وهو مايتجاوز حدوده بعد ..

شنو تردين احفرله كبر واطمه اكتله تردين ؟ شوووفي الحقد وين وصله بس شووفي ..

هيام هيام توصله اخبار البيت كله خليها حد وكفها عد حدها مالازم تكتلهم بس سكتهم كص لسانهم .

انووب درتي على هيام مووو ؟ ديلله شحطلها وتطيب

حرك سيارته سألته وين ماخذني رجعني لاهلي ..

ما الج رجعة لاهلج بعد تردين وياي للقصر تكعدين وتسكتين .

مارجع للقصر اني اصلا متعذبة بي حتى الحمام مابي مي حار انزل جوه اسبح ..

ولج فريحه شلج بيها ماكو مي حار وين كاعدين بالعصر الجاهلي ولج قصر مابي كيزر يالبلوه ..

ءءء اني طلعت من بيتكم واستقريت بيت اهلي بصفتي شنو ارجع لبيتكم ؟

كال بصياااح : مرتي بصفتج مرررتي اعقد عليج بعد شنووو الصفة الي ترديها حضرتج ؟

رديت بتلكئ..ممم مرت مرتك منوو ياا شنو شكو شنو ..
مرتك ..

رد : والله يام جاسم انتي وكحه وعقلج ينرادله فرمته تسوين مصايب وتحطين نفسج بمواقف بايخه وانه من اكلج استشريني ضاربتني بعرض الحايط .

وانه اخاف على ابن اخووي هالمسكين تبلينه بسبب طيشج واخبالج انتي ينراد الج خيال تفكرين بي قبل لا تسوين الغلط

_ شنو السالفه اي اغلط اني اي اغلط لان اني مدري شبيه بس اني ما اكدر اتزوجك لان انت مو صغير اكيد ما نتوالم

رد بعدم مبالاة...والله يعني نتوالم لان انتي محد يكدرلج بس ربج وانه ولو ننطيج مجال هذا العراق تهجمينه ولو هو مهجوم

رديت بعصبية
_ لا والله كول اني افجر واني سقطت النظام بعد

رد بتذمر : هسه عوفينا من هلاكلام موافقه لو لا خليني احل هالموضوع لان عندي مواضيع اهم

باوعتله بقهر ودمعه لامعه بعيوني وغصة بحلكي
_ احس نفسي عله على كلبك احسك مان عليه

باوعلي بابتسامة ذايبة : .لا بويه عسل والله عسل

نزلت راسي بخجل وتوتر وبوست داني
_ لخاطر داني اني موافقه..

ركز بالطريق ومبتسم...بعد عمه سبع من هسه فايد عمه احسن واخير من حسان وشرار ..

بتساؤؤل :- ...تستشير ولدك ..

يجاوبها...شنو بويه انه ابوهم لو هم اليحجي اكص لسانه وحطه كلاده بركبته وانه رجال واعي والي كلمتي ومحد يفرض رايه عليه استشاريت او لا انه البراسي اسوي .

بلعثمة جاوبت ...مو اخاف ما يقبلون ..

الشيخ بابتسامه...افاا تخافين ما نتزوج

بصدمه.رديت ..لا مو هييج فهمتني غلط اخاف تصير مشاكل ويرفضون

جاوب وعينه ع طريق ...اي بويه لا تخافين ما يرفضون حطي اديج ورجليج بماي بارد اتزوجج اتزوجج بس لا تخافين .
انه رجال كلمتي ما اثنيها و ولدي مو مثلج ما تردين وما تأخذين الكلمه ولدي من اكول كلمه هاي هي بعد عدهم مستند لا يناقشون ولا يحجون .

...سكتت بعد اي كلمه ما حجيت شنو احجي وفرها عليه عبالك ميته عليه رجال خداع مراوغ طلعني خايفه من ولده خاف يرفضون وعباله اخاف منهم يرفضون والله مو قصدي اني بس قصدي تصير مشاكل وكل كلمه احجيها يفسرها بقاموسه وبكيفه وعلى هواه .

اندار عليه ارجعج لبيت اهلج هسه وباجر اجي اطلبج من ابوج .

رديت لالا اروح وياك للبيت وباجر رجعني لاهلي مو كلنه لبابا احنه راح ابات يمكم .

كال زين ..

بتت ببيتهم ويوم ثاني رجعت لأهلي ووره كم يوم اجه هو وامه وطلبني من بابا وحددوا موعد للزواج والمهر وكل شي .

موج ..

اجه يوم الخميس واني ميتة قهر احس ينتظرني حكم الاعدام لافرحانة ولا متونسة واحس كتلة من الظلام تحيط بيه من كل جانب ..

الحفلة جانت بقاعة فخمة اهل اوس حيل طاكين
واني احسهم قتلة مجرمين احس اليوم انقتلت على اديهم من يصفكون ويركصون ..

لبسني الحلقة واجه ديبوسني درت وجهي عليه وخزرته همست يم اذنه تريد افشلك كدامهم ؟؟

صك اسنانه وخزرني وابتعد عني ..
مااعرف شون خلصت الحفلة احس دمي يفوووور وميتة قهر ..

رجعت للبيت ماريد اشووف احد قفلت الباب وكعدت وحدي رغم محاولات اخواتي كتلهن اريد ابقى وحدي ضايجة ..

بدلت بجيت هواي وبعدها سكتت من وحدي
فتحت الفيس وعلى صفحة شرار صار هواي
مافاتحة صفحته جنت اجبرر نفسي ما افتحها
بس هسه اتمنى اشوفه عايش حياته حتى بلكي ماافكر بي بعد .

فتحتها وياريت مافتحتها شفته منزل صورته
ضاحك ضحكته الرجولية اخترقت مشاعري مثل خنجر اعمى وخلت دقات قلبي تتسارع بالنبض .

كاتب ويه الصورة ادعولي شباب بعد ساعتين عمليتي محتاج دعواتكم .

انصدمت مسحت دموعي بقهر وصدمة .. انتبهت المنشور قبل شهر تقريبا ..

كمت فتحت الباب غسلت وجهي صار بابا مقابيلي
باركلي وباسني على راسي حضنته حيييل وبجيت ..
هو استغرب كال ليش تبجين بابا فرحي الولد فرحان بيج طاير طير ..

مسحت دموعي بابا اني ضايجة لان اتزوج واعوفك ..

جاوب بنتي هاي سنة الحياة لا تضوجين .

هزيت راسي هو راح واني رحت يم فرح هم طاكتها صفنة كعدت يمها سالتها بعد يومين عرسج موو ؟

كالت اي مستعجل العرندس ..

كتلها شبي شرار اشو راح يسوي عملية مدري شنو

كالت اي هو راح يتبرع لابنه بنخاع العظم لان عنده لوكيميا .

عضيت شفتي بقهر وعصرت الحلقة بيدي حيييل وطلعتها ....

فرح ..

الحجية اجت لبيتنا كالت انت بعد حافة ومعدلة مانحتاج نوصيج تعدلين روحج .

درت وجهي مهتميت الها وبعدين تذكرت كتلها كولي للشيخ خلي يأجلها ورة سنوية حمدان ..

كالت لا عيني لا كافي الناس اكلت وجهنا منو تلزمه يسألنه شعنده الشيخ ويه فرح وليش مايتزوجون وسامعين بينكم شي .

حجيت بعصبية هاي كلها سوالف حسان تربي
وتالي سكتتت ..

بلقيس كالت بعد حضري روحج باجر وشمحتاجة دزي علينا مانقصر ..

هزيت راسي وهم راحوا .. يوم ثاني كعدت من الصبح مسخنة نار نار كل جسمي كوة عليه لبست وبدلت وانتظرتهم يجون واني مطفية ..

اجو الصبح جنت لابسة فستان اسود ، بعرسي من حمدان لبست الابيض وماكعد حظي بلكي هسه عود يكعد ..

واليوم راح اصير مرة العرندس رسميا .
واصلا صرت لأن عقدنا قبل فترة سيد ومحكمة ..

بابا سلمني اله وطلعنه من بيتنه ..
داصعد بالسيارة هو صاح لمهيب ياخذ دانيال مني ..
اجه مهيب يضحك وكال واخيرا صارلج اسم

كتله شنو ؟
كال مرة ابوي ..
هو ضربه على كتفه ولك كللها ام جاسم

شكد اكره هالاسم كون هسه اكعد بالكاع واظل ابجي مثل الجهال ..

دخلت للسيارة واجه كعد يمي وظل يسوق
وانطلق لبيتهم ..

جان العرس سكته وهادئ بس عزيمة جبيرة كلش بحكم عرس الشيخ اليوم ..

بس اني مسخنه ومابيه حتى اكعد .. ترخصت منهم وكتلهم على وضعي ..
الحجية كالت كومي لغرفتج الشيخ مايخلص من خطاره لليل .

مسجون واطلقوا سراحه ، صعدت لغرفتي خليت دانيال بفراشه بدلت ملابسي هذا الفستان ثكيل
لبست غيره خفيف ورحت على السرير ونمت
..

توجه لغرفتها ودك الباب بعد ماسمع منهم انها مريضة دك الباب واجاه صوتها ضعيف وتعبان
_ تفضل ..

فتح الباب ودخل بهدوء ورزانة ، شافها نايمة على السرير بين النوم واليقضة ، تفتح وتغمض وتبلع ريكها
وتحك برقبتها باضافرها الطويلة المقلمة والمصبوغة باللون الاسود تحك ويصير اثر احمر على بشرتها الناعمة الناصعة .

لابسه ثوب اسود بربع ردن وكصة الصدر دلعة يزين عنقها كلادة بيها حبتين من اللؤلؤ الناعم ، على الصدر
القماش كله متككك بالطول وبارز انوثتها ، رغم الفستان طويل بس بسبب فوضوية نومتها كشف عن سيقانها .

تنهد وهو محروم من هالجمال الطاغي والانوثة الصارخة ، دار وجهه على سرير الطفل وظل يباوعله .

كعدت شفته منطيني ظهره وواكف يم سرير داني
لميت نفسي بسرعة ، اخذت الشال الي رابطته على راسي ومسويته على شكل بوند وخليته على راسي وصدري .

حس بيه وعيت اندار عليه وظل يباوعلي
سألته بنبرة متوترة شوكت دخلت .

رفع تك حاجب وعيونه تتفحصني
كال : دكيت الباب وكلتي تفضل ودخلت .

شحيت وجهي منه وكلت مادري بنفسي

تردين اطلع ؟ تساءل رافع حاجبه .

كمت وكفت على حيلي بقوة مهدودة

جاوبته : لا خليك يم ابن اخوك اني الي اطلع ..

لزمت راسي دوخة اجتني دااوكع لزمني من خصري باثنين اديه . باوعتله بخووف ورهبة ، حسيته يتحسس حرارتي .

ظليت اباوعله بلا حول ولا قوة وميتة خوف منه .

ايده الي جانت تتحسس جبيني صارت ترسم لمساته على بشرتي باصابعه ، الابهام مرة والسبابة مرة ثانية .

انفاسه الحارة تلفح بشرتي بشدة قرب وجهه من وجهه وكانه يريد يفترسني .

حسيت بهبوط بكل شي بيه وماحسيت غير واني مجردة من ملابسي وبس بالملابس الداخلية .

انتبهت لنفسي بين اديه وبالحمام ، وهو رافعني

ظليت اقاومه ، بس هو ظل يهدأ بيه ..

كال حرارتج مرتفعة ترستلج البانيو ماي وراح اخليج بي فد ربع ساعة وتطلعين .

حجيت بانفاس مخطوفة : اي اني انزل بي روح انته
هز راسه لا وخلاني بالمغطس ، سكنت وهدأت وغمضت عيوني واحس نظراته عليه متأكدة يباوعلي خجلت حيل ونزلت روحي بالمي اكثر .

فتحت عيوني ضجت منه خليت اديه على اطراف البانيو
كتله اريد اطلع كافي بردت .

طلعت وهو محضرلي المنشفة لفني بيها بسرعة واخذني لحضنه ، جان صدره كبير ودافي حيل ، قلبه نبضاته متسارعة وعطره يغازل حواسي .

صدره يعلو ويهبط كفيل بهدهدتي ويخليني انام ، بس يذكرني بوجوده ويمنعني من الاستسلام للنعاس الي احتل اجفاني.

وداني للسرير كعدت عليه ورجليه على الكاع
بس دايخة حيل والدنيا تفتر بيه سألته وين داني جاوبني اخذوا لتخافين عليه .

همست برجفة وخوف : - اطلع اني زينة ..

جاوب برفض قاطع :- لاء انتِ موزينة ...

كعد يمي وخر الخاولي مني ظل ينشف بقطرات الماي المنسابة من شعري على جسمي .

و يتحسس حرارتي .. لمساته شعلت بيه نار مأججة
واحاسيسي مقيدة برغبة جامحة بالالتصاق بجسمه تجنبت النظر اله لان حضوره يثير بيه نزوة جامحة تضعف مقاومتي لاغراءه القاسي ..
اخر شي استسلمت وخليت راسي على كتفه من الدوخة والاثارة .

احس بي مغناطيس يجذبني اله ، قوة جذب تفوق الجاذبية الارضية . واجتاح كياني مزيج من الاثارة والتأثر

وهو متلذذ بمزيج رجفات الخوف والرغبة الي اعترتني .

باوعلي بلع ريكه بصعوبة بسبب هذا القرب المهلك لحواسه الرجولية ..

مددني على السرير وصار بصفي ، عيوني الذابلة بعيوني الي تبث نظرات رغبة عميقة يستحيل السيطرة عليها .

مد ايده مرر اصابعه على جبيني بخفة وخفض راسه ، اخذ شفايفي ، حاولت اشرد ، شدد اديه ومقاومتي اله خلته يعصب .

حسيت تندم على تقربه بلطف مني ، سكتتني نظرات عيونه وخضعت اله .تقرب مني وجان واثق من عجز استمراري بمقاومته ..

بعد ماكام حسيت نفسي طالعة من معركة .. وعظامي مطحونة بيها . وصايرة حطام .

وهو يباوعلي وابتسامته بنشوة زادته وسامة فتاكة ...

حضنت نفسي واغطي بجسمي
كتله بنبرة ذابلة : لاتتوقع مني قبول واستمتاع بوحشيتك هاي ، تجربة ماريدها تتكرر ابد .

جاوبني بسخرية مرة ثاني راح اخليج تندمين على كلامج.

لا عفية مووو هيج والله أذيتني ..

اجه يمي اخذ خصري باديه وسحبني عليه ،،طبع قبلة طويلة على كتفي العاري . ورفع راسه همس بأذني
بحرارة ..
لعد اذا مو هيج علميني انتي .

حركت اكتافي احس لحيته تدغدغ بشرتي وكلت بصوت مهزوم اني اعلمك!

موج ..

مرت ايام واوس سألني صدك جانت عندج علاقة بشرار ؟؟

انصدمت منو كالك هالحجي شبيك انته حلمان ماكو هيج شي ؟

ابتسم وكال هاي تسريبات من بيت الشيخ تره ولازم اعرف صدكهه من جذبهه ..

كمت من يمه وطبيت لغرفتي خليته وحده يم خالتي هو مل من خالتي وخله وراح ..

خابرني وراها بأيام وكال عازمج حضري نفسج ..

رفضت وكتله ماريد حتى اشوفك بس هو كال لبابا وبابا حجه عليه وكال خطيبج ومن هالكلام ..

بدلت ملابسي وكعدت انتظره .. الى ان اجه جان يبتسم بنذالة عرفت ضام شي .

رحت وياه للسيارة يحجي ويايه مارد عليه ..

استغربت لمن دخلنه لمنطقة بيت االشيخ درت وجهي عليه مستغربة
هاي وين جايبنه ؟؟

باوعلي وغمز وكال بغموض هسه تعرفين ..

ظلت نبضات كلبي تتسارع بقووة واحس الدم يتدفق لراسي ويتجمع بي لدرجة اوشك على ااالانفجار ..

هيه دقايق وكفنه يم بيت الشيخ .. التفت عليه باستغراب وعصبية انت على شنو ناوي ..

باوعلي رافع تك حاجبه وكال كومي صعدي بالورا ..

سألته ليش ؟

ررن موبايله رفعه وتجاهلني كاله يله وصلت اطلع ..

ثواني انفتحت الباب وطلع منها شرار ..

يتبع ..

عفية اريدكم تدعون لخالتي وزوجها حيل تعبانين وبالعناية وانتوا ماتقصرون ❤💚