رواية هذيانٌ بين جمرٍ وجليد ..(ارملة اخي المجنونة) الفصل السادس وأربعون 46 - بقلم نورا ناصر

السلام عليكم
رواية هذيان بين جمر وجليد
البارت ٤١
نورا ناصر

*******

أنا إمرأة مجنونة..
من فرط الالم لا امتلك شعور التأني..
فأينك انتَ عني .. تكاد الروح تخرج مني..
بين تسلطك وغرور شخصك..بين الحب والحنان..
لم اعد اعلم ايُها انت ! الجلاد والعاشق الولهان..
أعني ع قلة الحيلة..وضعف الحال..
انا الرقيقة بين أنياب الذئاب لم ترحمني..
مزقتني .. اهلكتني إلى الهاوية دفعتني..
سباق وهروب وعزف وجنون تتراطم وتتراقص الافكار ع جراحي.. أنت دائي و دوائي..
بقلم smsma89

♡♡♡

شرار ..

جان يسطر الاحرف بتعب ووهن . ... م ه ي ب ....

خليت ايدي على كتف وابتسمت ..
لاتخاف عليه طلع بالسلامة وان شاءالله الله ينطيك طولة العمر وتشوف احفاد احفاده .

غمض عيونه وجر نفس بارتياح .. جوه عيونه ازرك وداخل عيونه أحمر طوخ .

بعدها نقلوا لغرفة ثانية ، عدلت كعدته هو راد يتجى وبقينا يمه اني وحسان وانطيت خبر لأمي وللي بالبيت كلهم ، خابرته امي وظلت تحجي وياه وتبجي ممصدكة وهو يطمنها وكوة يحجي .

وره ساعة دخلوا
مهيب ولهيب حضنوا ويبوسون بي براسه واديه .
تدفقت معالم الحياة لوجوههم بعد ماكان يغزوها الخوف على ابوهم ..

مرت الساعات وظلوا الناس يجون يشوفونه ويتحمدوله بالسلامة .

من ابرز الحضور الي زاروه بيومها هم عائلة ابن عم ابويه اللواء ابو رافد واولاده اثنينهم رافد وقيس وبنته المحامية ختام .

جانت ختام وجهه مستبشر ونظراتها تتفحصه بنهم ..

واول ماسلمت عليه كالتله بقلق ومبتسمة وعيونها
عليه حمدلله على سلامتك خوفتنا عليك هواي .

ابتسم مجرد ابتسامة وظل يدور بالوجوه عرفته يدورها .

باوعت لحسان وهو بدوره هم باوعلي وقوس شفته ورفع حاجبه بمعنى شكو .

اشرتله براسي نطلع بره ، هو استجاب وطلعنا اثنينا
وكَفنا يم الباب واني اضرب بكفوف اديه بأسف وقلق وقلة حيلة .

كلت لحسان اعتقد بدأ يدور عليها ويسأل ليش ما اجته هسه شراح نكله ؟

رد شنو نكله بعد نكله الحقيقة اخذها اخوها وراح بيها لكركوك لان ماكو امان عليهم هنا .

_ انجب تريد تورطنا انته انوب يروح يتخربط مرة ثانية مو زين الضغط والتوتر هسه ولا العصبية .

وشغلة ثانية احنه لهسه ما متأكدين هم بكركوك لو لا .

وبعدين راح يكول ليش ماحميتوهم انتوا مو زلم ؟ مو رجال ؟ كل واحد شواربه اثخن من ذيل المطي .

_ لعد شتريد اسوي بالله ؟ نجذب عليه ؟ بالله دز عليها
و طلب نجيبها اله ؟

تنهدت : مادري هسه مادري شوف جماعتك استعجلهم خلي يجيبون خبرهم بسرعة واليوم .

_ اكلك ماتنجب وتاكل تبن وتفكر زين هيه قابل كركوك ورة بيتنا ؟؟ حتى بسرعة تريد يجيبون خبرهم وانته ماصارلك كم ساعة من انطيتني العنوان !!

اصلا بعدهم ماطلعوا وتدري الطريق لكركوك شلونه داعش وارض عمليات تحرير المناطق ....

مسحت على وجهي طلع مهيب ووياه لهيب
سأل مهيب : ها شبيكم ؟ واحدكم وجهه وجه النعال مايبشر بخير .

رديت بنتر : حرك عقلك عقل النعال واعرف بشنو نفكر هو اكو غيرها مرة ابوك الي ولت وماحسبت حساب رجلها مريض وبغيبوبة توكف وياه
دارتله ظهرها ومشت .

حسان كال بضحكة اي والله وكلت شرار طلعت تعرف الاصول عبالي روسيا غيرتك .

يعني هسه اتصورك مرة ورجلها بالغيبوبة راح تكابله وتكعد تره هنه النسوان مشعولات صفحة كلهن ماعدهن وفه .

لهيب بسخرية : انته متأكد يفكر بمرة ابوي لو يفكر بموته ترة هم خلته ومشت ومافكرت بي .

رديت بعصبية : انته الثاني انجب وانلصم هم لا تنسى ترة بس يعرف بموضوع ولادة مرتك ماراح يرحمك وكول ماكال هاي اذا هو يعرف واحنه لا .

راح ارتجى ع الحايط وزم شفايفه
وكال هسه اكله مخايف اني بس خل تطلع هاي من يمه اشو جلبت وصار ساعة تلغي .

كال مهيب اي والله تعبته ، ابوها واخوانها ساكتين وهي بس تكرك منين نجيبلها فرح تطردها .

باوعناله كلنا تالي كال هو ابوي قبل الحادث اتذكر
كال راح يطلكها لفرح بلكي هسه مايسأل عنها ع الاقل كم يوم بين منلكاهم .

وبعدين اني كلفت واحد صديقي ضابط يدور على أحمد ان شاءالله يلكاه وتنحل هاي الازمة .

_ و حسان هم كلف جماعة بس هسه لازم نتفق شنو نكله في حال سأل عليها وبلغ الي بالبيت كلهم بنفس الحجي همينه .

حسان : واحنه نظل نسطر حجي ونجذب عليه وبالحالتين هو راح يعرف وانته هم خو ما راح تجيبها بالعيني والاغاتي اكيد راح تجيبها سحل .

رحت ارتكيت ع الحايط وكتفت اديه
_ لا اني عندي طريقة ثانية اجيبها بيها ...

_ اي ولا تطول خطوبتك بعد كافي اتزوجها هالشهر واكسر ظهرها لا تظل تفرفر منا ومنا .

رديت : مالك شغل انته ..

_ يطبك طووب وحمس همين
وظل يفر ايده ..

ابتسم باستهزاء : والله عمي حظوظ ناس متزوجه مرتين وعابرة القارات همينه واحنه نريد نحظى بوحيدة وماكادرين مو هيج ولك مهيب .

هز مهيب براسه : صدقت ياعم حسان ..

هزيت ايدي عاد هنه شلونهن وحدة انكس من الثانية وتحسدني عليهن ..

لهيب كال خطية مربايتلك علة

جاوبته ايخسسن ماعاش الي يغثني اني اغث ما انغث ..

بعدها طلعوا من يمه اللواء وعائلته سلموا علينا وراحوا ودخل مهيب يم علي الدر وحسان جان يخابر رحت يمه
جان يحجي ويه خاله نفسه أبو أوس .

وكفت يمه واسمع حسان يكوله علي صحى وذاك يتحمد بالسلامة اله .

ختم المكالمة كتله شوف خالك هذا ديحاول يبرأ أوس ويتستر عليه ، لان من خلال حديثه ذاك اليوم لمن اجه لهنا يكول مامتأكدين منه هو الي ضرب مهيب وعلي .

لهيب كال لعد ليش شارد وها خاف يتلاعبون بنتائج التحقيق .

رديت عليهم اشك حلكهم غير ....

حسان كال شرار ماعليك من خالي كلامه لا يودي ولا يجيب عوف اوس عليه اعرف شون اجيبه وانته الك الصافي .

رديت عليه بتذمر : انته هم مالي ثقة بيك ..

رد بعصبية : انجب شرار لاتظل تنعثل صحيح اوس ابن خالي بس علي الدر ومهيب اقرب الي و اني اردلهم حكهم وخالي ما إلك شغل بي .

تركنا وطب يم علي وظليت اباوع للهيب اشوفه محتار
هو حس بيه دار وجهه ..
خليت ايدي ع الحايط و اباوعله كتله خايف من ردة فعله مو ؟

هز راسه ودار وجهه
رجعت سألته بعتب وحدية :- ليش سويت هيج انته ومرتك ؟

عض شفته الفوك ورفع حواجبه وزفر نفس
وكال بيأس الله بلاني بلوى شسوي ..

عكدت حواجبي : مرتك هيه هم ضمت عليك موو ؟ تريد تعاقبك ! لان عفتها وسافرت ماكو غير تفسير لهالشي لو اكو تفسير ثاني ؟ حضرتك ضامة علينه ؟
ورفعت تك حاجبي!

باوعلي بأسف : والله مووو وكتك هسه والله ...
ويريد يفوت للغرفة يم ابوه ، سحبته من ايده ورجعته ..

واردفت بتحذير : لا تجيب سيرة لابوك خلي تستقر حالته يله .

_ يعني شون تريدني اصدمه بالبيت لمن اخلي الطفلة بحضنه ؟ تحجي صدك انته ؟؟ خلي يعرف هسه كبل لا ناخذه للبيت

صكيت سنوني واني اوجه اله كلامي بعصبية ...
_ ع الاقل مووو هسه . قبل لا يسمح له الطبيب يطلع يله تحجي .

هز راسه وفات جوه .. واني فتت وراه ..
ظلت عينه على الباب اتوقع ينتظرها تدخل عليه بأي لحظة ..

بعدها انطوه مسكنات ورجع نام ..

هدى ..

لهيب اخذ مهيب اخوه وراح لعمو بالمستشفى واني
رحت سبحت ورجعت شفت ديما نايمة بعدها
كابلتها وكعدت اباوعلها شويه سمنت صار بيها لحمة وصحتها زينة .

تذكرت اول ما اجيت لهذا البيت بعد ماطلعنا من المستشفى كلي اوديها يم عمته يريد يستجوبني
واني والله مالي خلك وماعندي شي احجي .

ظليت متمسكة ببنتي لازمتها حيل ومدنكة عليها ..مثل احتمي بيها ..

مد ايده يريد ياخذها بقيت تمسكت بيها واباوعله
بتوسل خزرني وعيونه تخووف لا اراديا تركتها اله واخذها .

اخذها وطلع بيها بره واني بقيت ارجف بالغرفة
باوعت للحمام رحت ركضت دخلت بي وسديت الباب .

سمعت صوت باب الغرفة انطبك حيل جفلت وعرفته اجه ..

صاااح ووووينج ؟؟

صووته خوفني خلاني عطت شترررريد!!!!
وبعدها خليت ايدي على حلكَي تندمت .

ظل يضرب على باب الحمام ويصيح
اطلعي يله لللج فتحي الباب ترة دقيقتين اذا ما فتحتي راح نضطر نغيره .

بصوت يرجف سألته ها ها ليييش؟؟ شنوو تقصد .

كال لأن راح اكسره عليج وعلى الخلفج فتحييي يله .

وكفت عدل اتضاهر بالشجاعة بصوتي
لهيب كل الي عندي كلته الك والله ، اتركني الله يخليك اتركني حباب تعبت والله واني تعبانة هماتين بس الله يعلم الي مريت بي الله يخليك اتركني ارتاح ع الاقل هسه بس .

ظل يضرب على باب الحمام بقووة افتحيي للج فتحييي يله .

تنفست بقوة شنو يريد يسوي يعني!!!!! خلي افتح اله االباب يريد يضرب خل يضرب يريد يموتني خلي يموتني طكت روحي والله .

فتحته واباوعله بتعب ..
ايد خلاهه على ركبتي من وره ، وايد لزمني من ذراعي وسحبني وطلعني من الحمام .. ودفعني لنص الغرفة

وكفت اعدل بشعري الي تكوم على وجهي بسبب دفعته العنيفة الي واباوعله بعصبية وكره ..

وهو يباوعلي وعيونه نار من العصبية ..
زفر بعصبية ويأس وهو يسألني باختصار
_ منووو ؟؟

ارتبكت من سؤاله لان ماعندي إجابة انطيته ظهري واني اعصر بأصابعي ..
كتله شتقصد لهيب؟؟

لزمني من كتفي ودارني عليه بعنف
انتي تعرفين منوو اقصد منو الي صخم وجهج ؟؟

رديت انته ..

رد بتهديد هدى لا تلعبين عليه ولا تختبرين صبري ..

ظليت اضرب برجلي ع الكاع وابجي والله والله انته ومحد غيرك ...

عهود حشت راسك بكلام غلط عني اني مووو هيج والله والله ..

تقرب مني ولج لعد شون تفسريلي تصرفاتج هاي ؟؟ فسريها فسريها يله اريد تفسسسيير؟

باوعت لعيونه مباشرة وحجيت بتوسل
_ جنت خايفة منك لاا اكثررر ....

وخليت اديه على راسي بجزع
كافي تلح كااااافي كااااافي اني والله شريفة والله وبس انته لزمتني ....

اني ام بنتك هسه ولازم تصدكني واذا ماتكدر تتقبلني طلكني وخليني ارجع يم ابويه احسن

اجه لزمني من زنودي ويباوع بوجهي ويفح بعصبية ويهز بيه ..
والله يا هدى اذا متكوليلي منووو لشوفج ايام سودة بحياتج مشفتيها .

تملصت منه بألم واني اروح اكعد ع السرير لأن رجليه بعد متحملني باوعتله واحجي بجي وارجف
الي يسمعك مشايفة بحياتي ايام سوودة اني شتريد تسوي سوي مخايفة لهيب اني شفت اشكال والوان وتهديدك هذا ميهمني ولا يخوفني شتريد تسوي سويي.

اجه يمي ركع الجرباية برجله وميل روحه عليه
لزمني من شعري حيل ويجر بي ..
ولج احجي ليش تتسترين عليه لييييش بعدج تحبي؟

اريد اوخر ايده من شعري توجعت بس هو لازم قوي
حاجيته بألم وهو لازم شعري
ممتسترة ع احد اني اتررركني شراح تستفاد من هيج تسوي . ...

ظل يجر بيه حيييل ويكول عمااار مووو عماار اخو عهود هو موو ؟؟ ليش متحجين ..

لا لا ماعندي شي ويا ماعندييييي ليش تصدكها ماعرف شنو حشت دماغك بس تره جذابة هيه جذاااابة .

خله ايده على ركبتي يخنكني ويهز براسي وشعري بين اديه يريدني احجي ..
كتله موجوعة اترررركني والله ماعندي شي اكوله عووفني اريد اريد اروح لبنتي تريدني هسه..

عليك بابوك اتركني بروووح امك اتركني .

تركني وهو يدفعني دفع وطلع من الغرفة ..

بعدها جبرني انام جوة يم عمته وحبوبته
اخذت اغراض بنتي ورحت نمت جوه يمهم

بحجة اني ماعرف للطفلة وهم يعرفون ..

الايام البعدها اشوف الحقد والكره بعيونه كلما طخت عيني بعينه .

ومجبورة اتحمل مزاجه السيء مجبورة بدون ذنب اني ..

شرار ...

يوم ثاني واحنه كلنا يم علي باوعلي كال بصوت متعوب ..
_ شخبار فرح وإبنها ؟ تسألون عنها ؟ تروحون تمرون عليها تشوفون احتياجاتها لا ؟؟

كلهم دنكوا واني رديت عليه اي اي اطمئن شيخنا اكيد شون نعوفها والمهم هسه انته صحتك لاتفكر بآي شي كله تمام .

ظل يباوع للكل بريبة وشك وممرتاح من ردة فعلهم وملامحهم .

عكد حواجبه وتنفس بتعب
وكال بصوت مستفسر وعيونه تتجول على كل واحد منه : اكو شي ضامينه عليه شبيكم ؟

ضحكت بانفعال ورحت يمه لا عليمن نضم عليك ...
قاطعني : فرح شبيهه ؟؟

حسان رد عليه : مابيها شي شيخي والله بس اخوها اخذها وراح لكركوك هيه واخواتها يم اقاربهم ..

خله ايده على قلبه ويباوع بعصبية ..
وعاط وهو تعبان شووون تخلووونها تروووح شلوون ؟ شنوو مخلف وراي انه زلم لووو غمااان شسووويلكم ولكم هسه شسوووي؟

تقربت منه كتله بتوتر شيخ بس هدي!!

عاط بيه من بين تعبه وخررر لك وووخر وفوكاهه تجذب عليه شرير ؟؟؟

كتله شيخ اعذرني خايف عليك نجيبها الك من جوه الكاع بس هدي .

رد بعصبية : اكل تبن والصم يله ورووح كل للطبيب خل يكتبلي خرووج خلي ارووح وراهه .

حسان كاله بتلكأ يباوع لعيونه ويدنك متوتر
_ مو احنه لهسه ماندري بمكانها وين بالضبط ...

فتح عيونه على أوسعها مصدوووم
وفح بعصبية : ووووولكم انتوووا شنووو تردون تخبلوني غماان انتوا لو زلم بس اريد اعرررف اذا ارميكم كلكم احد يلومني ....

رد حسان بتوسل والله شيخي حاوولت ارجعهن بس اخوهن الاغم أحمد ضربني ......

عاط بعصبية اننننجب وسد حلكككك وهم الك عين تحجي شووون تخلي اخوها يضربك لو انته زمال زمااااال ومربووط لا نفع ولا دفع ..

كلكم طلعوا برة ماريد اشووف واحد منكم كدااامي بس مهيب يظل طلعوووووووا .

مهيب ..

طلعوا كلهم بقيت يمه اتوسل بي يدير باله على نفسه بس هو ولا مهتم الي وكلامي ، كتله خلي اصيح للطبيب بلع ربك بصعوبة وطلب يشرب مي بس ....

اخذت المي من على الدولاب االي بصف السرير
فتحت وانطيته يشرب ، مقبل اشربه اصر هو يشرب بنفسه ....

شرب وشمر البطل عيونه زادت حماره وانفاسه لاهثة
يجر نفسه كوه مثل اسد جريح ....
باوعلي كال ابنها وياهه لو راحت وحدها ؟

جاوبته بتحفظ : وياهه شيخي بس واالله احنه م

قاطعني بحدة : تذكر وياي مهيب اخر مرة هيه مو جانت عند اهلها والولد بالقصر ؟؟

يابه أني بعد الحادث بأسبوعين طلعت من المستشفى لأن عمليتين سويت والي عرفته هي جايه للقصر ومتعاركين النسوان بيناتهم وهيه ماخذه ابنها وطالعة ....

هز راسه غمض عيونه وجر نفس ...

كال خابرلي على عمتك اريدها تجي حالا للمستشفى خلي واحد من المطايا البرة يروح يجيبها .

وماريد اي واحد منهم يدخل عليه الا اذا جايب خبر عن فرح مفهوووم ؟

هزيت راسي بطاعة طلعت تليفوني خابرت على عمتي وبلغتها تحضر نفسها تجي للمستشفى ......

****

فرح ..

الساعة ١١ الصبح .. كاعدة ومخليه ايدي على بطني وصافنة ، شي بداخلي يرفض اطلع منه واخذ الاطفال بعيد عن اهلهم .

عرفت من فترة علي الدر كَعد من غيبوته ...

بوقتها فرحت حيل كلش حيل وسجدت سجدة الشكر بس سمعت هالكلام من أحمد .. حتى هم تعجبوا عليه ..

وبعدها توضيت وصليت صلاة الشكر ودعيت واني بين ادين رب العالمين بأن يحفظه ويكفي شر بني أدم ويمد بعمره ويطوله ..

والله اشتاقيت أله والله .. صرت احس نفسي ببعده ميتة بقلب ينبض .. حياتي مالها طعم .

ضكت الموت بقربه مية مرة بس اهون من الحياة بعيد عنه ..

ولا دا اكدر انساه لحظة وحدة ومايحتاج احد يذكرني بي وهو يسكن كل ذرة بدمي
حتى قسوته عليه مانجحت بنزعه من قلبي وافكاري..

واذا نسيت شويه او انشغلت يرتعش قلبي ويذكرني بي...

اشتاقيت لصدره وحرورته
وحضنه الي يوسسعني ويوسع مشاعري
ويوسع حبي كله ...

تحسرت وباوعت لدانيال نايم على بطنه وبيده موبايلي وصوت علي الدر وصل لاسماعي وزلزل كياني .

غمضت عيوني وتحسرت يا ألله ، زحفت مثل الطفلة ورحت طليت بالشاشة مالة التليفون ..
دانيال مطلع فديو ويباوع عليه
الفديو بي علي الدر يلعبه ويحاجي ...

لا ووووالف لا اااا اني اترك علي لختام ؟تهي بهي
وتظل تغري بالاصفر والاخضر!!!

ومن تلبس اصفر تطلع جنها قوطي نيدوو لالا قوطي النيدو سمين هيه ضعيفة وطويلة تطلع جنهه الف دينار ملفوف بالعرض وصاير بالطول ..

لو من تلبس كوستمها ألاخضر تطلع عبالك دتسوي كمين للطلي ..

لمن يجي احمد احاجي يرجعي لبغداد ونفهم علي على أسباب طلعتنا أكيد هو محيخذلني وحيتفهم ويسامحني ومراح يفرط بيه ..

حسيت على دانيال يسحب بطرف ملابسي ويبجي
اخذته لحضني واباوع بوجهه
واسال بي ها حبيبي شتريد ؟؟

كال ببراءة وهو معبس وضايج كاعد من الصبح ومكعدنا ويا كلنا
. أريد مووزة ...

يموت ع الموز ويتخبل عليه عبالك قرد ..

عفته ورحت للمطبخ موج جانت دتطبخ فتحت الثلاجة مابيها موز ...

احنه عبالك استقرينا هنانه اشترينه اغراض على كدنا لان محتاجينها ..

سألت موج اكو موز لدانيال ؟ لو خلص .

باوعتلي والتفتت خلت التبسي بالفرن
كالت لا والله ما اعتقد اكو جان وصيتي احمد يجيب ويا لمن يجي .

خابري يجيب ويا نسيت اوصي ..

هزت راسها واخذت فونها طلعته من جيب التراك وظلت تخابره ..

هو احمد بس هيه انطاهه سيم كارت جديد تتواصل ويا لمن يطلع خاف نحتاج شي وممنوع تتواصل ويه اي شخص ثاني .

طلعت رحت لصالة شفته دانيال لازم الفون يباوع بي اخذته من الكاع وحضنته باوعلي
وكال مووزة .

كتله ماكو والله يجي خالو احمد ويجيبلك موز
ظل ينفخ ويكوول اوووف لبي اوووف لبي ((اوووف ربي))

ضحكت عليه ورفعت راسي ظل يكرص ببطني
حييل واصابعه ناعمة بسرعة تخترق ملابسي .

وخرت اديه ولزمتهم ابوس بخده وهو ظل يعاند ويرفس بالزايد ..

لزمت بطني ووكفت شلته من الكاع حضنته
واهدي بي حبيبي انطيك كيكة شنو رأيك والعصر خالو يجيب موز ؟

شكد حاولت اقنعه مايقنع يهز براسه ويدفر مايريد

طلعت موج على صوته اخذته مني تريد تسكته
صفكها على وجهه نزلت كالتله موو صووجك صوجي اني اروح اسبح .

راحت طبت للحمام واني كعدت اسكت بي هو من يريد شي بعد هاي هيه وخاصة هالايام تعلم ع الموز يموت عليه من لمن فطمته من الممة لهسه ..

هو متخبل عليه ومزاجه سيء وعبالك حاس راح تجي اخت تاخذ مكانه ، مدري مشتاق لأهله الي متعود عليهم ولا ناسيهم لان صورهم فديواتهم بالتليفون ..

كتله اوكي هسه نطلع نشتري موز اني وياك ولا يهمك ..

طبيت للغرفة انين نايمة على وجهه ، غفت قبل شوية هم كعدت ويانه من الصبح ، نظفت الشقة وسوت كيك راحت خلته بالفرن يم بيت عمو ابو حسين ورجعت نامت .

اخذت صاية وشيله لفيت روحي ، وفلوس ولبسته قمصلته وخليت الكبوس مالتها على راسه ولبسته حذائه...

صحت مووووج طالعة اشتريله واجي مايسكت
بعد مادري سمعتني لو لا مادري بيها بس صوت المي جاي من الحمام ..

طلعنا اني وياه الجو بارد حيل كفخ بوجهي . عبالك احس علي يراقبني لفيت الشال عدل وحرصت ماتطلع شعره مني .

مشينه مسافة جانت اكو بسطة اخذت موز وجزر اتوحم ع الجزر ونهاري كله اكرررط بي ....

رجعت لازمة دانيال من ايده وحسيت بواحد يمشي ورايه ..

يدندن ويغني ويشمر حجي ..

التفتت عليه خزرته هو باوعلي وضحك وكال
كل هالجمال ولابس نعااااال .

باوعت لابسة نعال احمد انوب عزاااا لبست لدانيال حذاء ولبست نعال شون حظ ...

هو احمد رجله صغيرة مو كلش جبيرة يعني بس اني خبصني دانيال واستعجلت ..

انوب لابسه جواريت شتوية حمرة والنعال مالة احمد جلد جوزي هو مو نعال شحاطة .

وهذا يتحرش شون هسه والله تمنيت انزع الشحاطة واكفخه بي .. لو اشمره عليه

شلت دانيال وطررت للعِمارة حتى والله وجعتني بطني نص الطريق ونزلته وظليت امشي على كيفي واتلفت وراي .

ودانيال كلما شاف واحد لابس دشداشة وكال هذا بابا علي ..

حتى شاف رجال لابس زي كردي ولاف الجمدانة على راسه على راسه ظل كاسر ركبته عليه ويبجي يكول بابا .
واني انعصر قلبي عصر وبجيت ويا ...

وصلنه للعمارة شفت موج وانين وسوزان واكفات يم الباب وخايفات ويعصرن باديهن .

لفيت الشيلة مالتي على حلكي والتفتت يااعزااا خايفين عليه ويدورون يمكن قلقتهم .

اجتي موج تركض حتى شعرها مبلل خطية هسه تتمرض بسببي .

كالت بعصبية ووووين جنتي ؟؟؟ هااا وييين جنتي .

انطيتها العلاكة خليتها يم وجهه كتلها هاي رحت اشتري موز وجزر ..

خمطتها مني ولزمتني من كتفي واخذتني لفوك
وسوزان كالت راح اخابر امي راحت تدور عليج ..

تشكرت منها موج وهي راحت لشقتهم واني واخواتي رحنا للشقة ..

دخلت وظلت موج ترزل بيه هيج تقلقينا عليج ؟؟ ولج طلعت من الحمام مالكيتج متتت عبالي شو شصار بيج ليش هيج ولج لييييش .

كتلها واني انزع الشيلة اووووه شبيج موج قابل طفلة وبعدين صحت عليج وانتي بالحمام وكتلج رايحة .

ولج خابرت احمد تخبل تخبل وهسه جاي انتي شووكت تعقلين .

اهووو موج كافي بالله مو كتلج صيحت وكلت رايحة شسويلج اذا ماسمعتيني وشسوي لأنين اذا ماكعدت على صوتي نايمة جنها ميتة كعدي على صوتي شبيج .

ظلن اثنينهن يكركن واني رحت نظفت الجزر وغسلته ...

واجه احمد يرزل بيه واني كاعدة بالصالة بالكاع اني ودانيال هو ياكل موز واني اكل جزر ... واحمد موج يرزلون بيه وينطوني حكم ومواعض .

والله حتى اصبعي اجيت اكله من كد ممندمجة معبالي راس الجزر مخلص انوب ردت بعد واحد بس فشلة اكوم وهم ديرزلوني .

هذول مصدكين نفسهم هو علي الدر ماكدر لخبالي انتوا تكدرون اخخخ يربي شون بيه والله اكره روحي صايرة سود الله وجهي على هالخبال هذا .

انوب كاعدة اكرط ولا اناقش ولا احجي رغبتي بالنقاش انتقلت الى رحمة الله .

خطية انوب حتى سوزان وامها دخلوا بإنذار من وراي شمدريني هاي كله من انين من تنام عبالك ميتة ماتسمع ابد طالعة عليه .

حجوا وسكتوا واسمعهم بالمطبخ احمد وموج يتهامسون ادري ديحجون عليه ، سكتت شسوي اني غلط ادري بروحي وبعد فوات الاوان لمن اعرف هالشي غلط اتندم واظل اكل بروحي .

احمد فات نام ودانيال هماتين نام شويه وبعدها ع الغدة كعد وظل يعزف الموسيقى المزعجة مالته مال بعد الاستيقاض من النوم كالعادة .

راح احمد غسل وجهه واجه كعد ع السفرة باوع كال
اووو هم دجاج ياموج هم دجاج والله الدجاج راح ينقرض من وراج والله .

كالتله موج وشبي الدجاج ترة اكله صحية شبي ماعاجبك .

رد ومنو كلج اني ادور اكل صحي بالله متشوفيني راح انقرض .

انين كالت اي والله حتى الجلد تشيله منه موج يصير محلو يلعب النفس كل طعم مابي .

كالت موج ولج الجلد مو صحي ويسبب امراض شتحبين منه .

احمد كال اي والله موج هاي اكلاتج الصحية لا طبقينها علينا اني اريد الدجاجة غركانة بالدهن ..

ولو هسه لعبت نفسي من الدجاج كله الله والله مشتاق لطبخ خالتي الدووولمة مالتها اخخخ اوويلي لمن تسويها لاجعة ومرات تخليلها باكلة وضلوع ووياهه طرشي احمر اووويلي .

انين كالت والعبرة تخنك صوتها
_ يعني شنو احنه حنطلع منانه وبعد منشوف خالة ولا حتى نزور قبر ماما وبابا يعني نروح ومنرجع بعد ؟

اني بسرعة نطيت وكتلهم واني هم ما اطلع اريد ارجع لبغداد ما ابعد اطفالي عن اهلهم .

كلهم باوعولي واحمد كال سكتي بالله فرح احنه طلعنا بعد وماكو رجعة كافي ذل واهانة كافي الصار بيجن والله كافي نطلع نستقر بره احسن وائمن ..

لالا احمد ما اطلع علي يكطعني وذر والله يموتني اخذ الجهال واشرد .

رد بتحذير وقلق : واذا ترجعين هم مراح يرحمج ترة وبعدين اذا طلعنه لدولة اوربية هناك القانون يحكم محد يكدر يتقربلج ويأذيج او يحرمج من اطفالج .

لا احمد لاا ترة هو راح يعذرني احنه طلعنا لان فقدنا الامان من بعده وتهددت حياتنا .

احنه طلعنا بعد فرح كافي سدي الموضوع بس اطلعلج مستمسكات حتى لو تزوير نطلع كلنا وما نبقى كافي مالنه مكان هنا احنه بعد .

دنكت و كلت بحزن رجعوني اله وطلعوا انتوا

عاطت موج فرررح صدك تحجين ؟ لو ضارب واير عندج انصحج تأكدي منه .

كال احمد يانطلع سوى يا نبقى سوى ...تره والله اني لو واحد غيري متزوج ومستقر بلا هالبهذلة هاي بس غير انتن خواتي اريدلجن عيشة زينة وادري بيجن تعبتن هواي .

كتله وشمدرينه اذا ما بعدين تتزوج وتلتهي بمرتك وتتخلى عنه ..

اووو فرح شهالحجي هذا وبعدين الكولي حل هسه شأكل ؟ دجاج ماريد والله مليت منه والله .

انين كالت اكو موز اكل يشبع بسرعة ...او اكل من الكيكة الي سويتها الصبح ..

رد عليها منو كلج اني دانيال القرد حتى اتغدى موز ؟

حضنت دانيال كتله لاتحجي على ابني ..

دانيال افتهم ديحجي عليه شمر الموزه هيه والكشر بنص التبسي مال الدجاج

وراح يكرص بركبة احمد لزمه احمد من اديه
ويبوس بخده لا حبيبي انته مو قرد انته سعدان لا والله شمبانزي لج فرح معقولة الموز هيجي ينفخة صاير دب ..

كتله صلي على محمد ترة من يوم الي فطمته من الممة خطية ضعف ..

هو وينه ضعف وووينه دشوفي خدوده عبالك واحد خاتل جوة بحلكه ومخلي خدودة هيج منفوخه..

اندكت االباب بهاللحظة وراح هو فتحها .. ونسمع صوت سوزان يم الباب وهو يكوللها تفضلي كالت لا شكرا .

سد الباب واجه بيده جدر صغير وخلاه بالنص فتحه وعاط الله ارووووح فدوة هذا الي جان يتمناااااه قلبي .

كلتله انين شوف حماتك بتحبك ع كولة المصريين اجتك من السما الدولمة .

كال هيه وينها حماتي وووينها مبتلي بيجن وببلاويجن من وراجن ماراح يصير عندي لا مرة ولا خلفة البركة بيجن .

كتله بلله كافي تمنن علينه وتعيرنه ورجعني لرجلي احسن .

شكد انانية لخاطر الله مايهمها بس نفسها .

موج كالت موجودة حماتك جووة شنو رايك جوه
وغمزتله ..

رفع راسه وكال شنقصدين

كالتله شبيها سوزان نخطبها الك وناخذها ويانه

كال ماكو عملية تصغر الوجه ؟

ردت موج والله شبيها حبابة واخلاق ونفسها حيل حلوة .

كال اي والله تعجبني حتى من اخذت منها الجدر احس ايدها ترجف وماتخلي حتى عينها بعيني .

كتله حلوة هيه وتسمن شويه يصير عدها خدود

كال يله انطيها الوصفة شيخة فرح

موج ردت ها اكول مبرووك .؟؟

عاط ولجن بيا حال احنه صدك تافهات امداجن دوولن خلي اكل الدولمة واكوم اخمد وهاي فرح ديروا بالكم لاتطلع حتى لو تربطوها .

كتله شنووو هايشة تربطووني صدك ماتعرف تحجي ...

رد اي والله اربطج والله لاتروحين تسويلنا مصيبة هو انتي تتوبين لا والله ماتتوبين .

دانيال شافه متعصب عليه ظل يكرص بي ويجر بشعره ...

وخره وخلاه بحضنه وربط اديه ويكوله والله اربطك ويه امك والله ..

هو وانين اكلوا الدولمة واني وموج اكلنا التبسي
هيه موج نفسها حلو بالطبخ بس تطبخ اكثر شي اكل صحي

واحمد يتخبل يريد طبخ خالة مليان دهن وشحم وليه المركة تصير غركانة دهن خاصة البامية الي تسويها رغم هيه خطية مو بعقلها بس طبخها حيل حلو ...

مشتاقتلها حيل خالة ولريلام وميتة على شوفتهم ...

بعد الغدة وتحديدا العصر اندكت الباب وفات عمو ابو حسين سلمنه عليه وكعدنا يمه ، موج قدمت اله كيك وجاي .

وكعد يسولف كال احمد ابني ترة قبل اسبوعين اكثر هيجي اكو جماعة جايين لشقتي القديمة ب***
الي ساكن بيها إبني حسين وسائلين عليكم .

فتح احمد عيونه على اوسعها شنوو عمي صدك تحجي ؟؟

اي والله يا ابني ...

وابنك عمي كايلة على مكانه هنانه لو لا ؟؟

لا والله ماكايلة بس ناسي يكلي هسه يله خابرني واجيت كبل بلغتك .

كام احمد على حيله مرتاح يفرك بلحيته
وباوعلنا وكال معناتها لازم نطلع منانه بأسرع وقت ..

يتبع ..

احبكم ومشتاقتلكم 🥺لكن ظروفي حالت بيني وبينكم واشكركم على تفهمكم ..

والي تجاوزوا عليه الله يسامحكم 😪

ادعولها خطية ٠👇

الاغنية تمثل حال شخصيتين بالاحداث الجاية☝️توقعاتكم منوو هم 🤔

تطلبوني تعويض اصبروا عليه اعوضكم عند وعدي ..