رواية هذيانٌ بين جمرٍ وجليد ..(ارملة اخي المجنونة) الفصل الخامس وسبعون 75 - بقلم نورا ناصر

السلام عليكم
تكملة رواية هذيان بين جمر وجليد
التكملة الاولىٰ
نورا ناصر

°°°°°°●°°°°°°°

من السهل ان ينسىٰ ـﭑلـإنسان نفسہ لكن من الصعب ان ينسىٰ نفساً سكنتْ نفسہ ..

ْْ°°°°°°●°°°°°°

تجاوزتك وكملت
مجبر چنت مُو بطل!
غصباً عليه عشت
مِن انته مو يمي..
گلت إعله هجرك حلو
و گالولي عفية وكفو!
بس النتيجة شنو؟
گدام ناسي صدك انه ربحت الحرب
-بس إخسرت حلمي.
لـ رائد ابو فتيان

°°°°°°•°°°°°°°

بلقيس :- عزااا بعييينك آي والله آما صدگ انته متستحي ولك تريد تعرس وعمامك أثنينهم متبهذلين ...

واحدد بالسجن واللخ ماندري بارضه ووينه ؟ مدري عايش مدري ميت سوودة عليہ ... وعلىٰ عمري اكيد مووج الهه ايد باختفاءه والا ليش رجعت وخلته هناك مدري وين ما وين

رديتها بعصبية :- على كيفچ عمة كفرت خو ما كفرت ومااسمحلج تحاجيني بهالطريقة هاي اني موو زعطوط كدامج ..

وبعدين ترى هو ورى ما موج رجعت لبغداد هو جان يخابر وجان اكو اتصال بيناتنا ليش بكلشي وبكل مصيبة مخليه موج

ريلام ظلت تجرجر بيه .. تريد تهديني لان فقدت ..

وهيه وكامت واني هم كمت وتحجي بنتر ..
_ اي تعال اخذلك راشديين شمتاني ؟؟ وظلت تفر بيدعا انوب تحول من ملازم صارلي محامي لموج

ريلام كالت ااءءااا لا مام مہيب ميقصد واالله بس اهدي ..

ريلام تحاجيها ولازمة بذراعي .. تهدي بيه ..

سحبت ذراعي منها ووجهت كلامي لعمتي بعصبية ..
لا العفوو موو هيج بس اي انت يا عمة دوومج تفهمين
الكلام من ذيله متنطين مجال ابد اني مرايد اسوي عرس جبير وفخم هيه بس تلبس بدلة واخذها ونتزوج بالفندق

واذا صرت محامي مثل متكولين اي اصير محامي للحق شكو بيها مو غلط ولا باطل

كالت وهيه تهز بيدها هله هله تريد تاخذها سكاتي ليش يمممه ؟ فصلية خووو ما فصلية ؟ وهيه هالاخر وحدة راح تتزوج عندي قابل عندي وراها العشرة ؟؟

اي وعود موج حق واني باطل انتوا دومكم هيجي ويه الغربة تصفون علينا ..

وجهت اصبعي السبابة باتجاهہا بتہديد ...
_ شووفي عمة اني ادري بہي سوالفج تردين تخربين الخطوبة بس والله لو تنطبك السماء على الارض ماتخرب واتزوجها اتزوجها فلا تحلمين بانفصالنه انصحج .. وهسه يله اودعناكم ..

_ تعال اشو انته فد نوب ماتحترم ولا تحشم الي كدامك عمتك واكبر منك .. أني اكوول لابووك يطيح حظك ...

تنفست بضيق وهيه غمتني وطلعت من الاستقبال ..

باوعت لريلام جانت ملامحها منزعجة .. واني هم جنت معصب وعيوني براسي ، شحيت نظراتي منها ..
وتنفست ...

كالت على كيفك اعصابك هيه تحاول تستفزك بس والله اني مراح اصير لغيرك اصبر ليش خايف انته ..

رديت احرك الدنيا والبيها اذا صرتي لغيري والله ..لاتكوليها على لسانج هاي الحجاية ..

خلت اديها على خدودها بفزع اني اصير لغيرك من امداني ..

سحبت اديها من خدودها وبوستهم .. وهيه ابتسمت ابتسامتها المرحة الي تسعد گلبي

وبعدها اديها بين اديه واتحسس بشرتها الناعمة بأصابعي سألتها وينها هاي بيبيتج المراة الخيرة كل مرة موجودة وماتقبل على امچ وتردهه ؟

جاوبت راحوا هيه وجدو للعمرة ..

كلت هذا هم حظي .. ردت ببتسامة :- شبي حظك ؟

كتلها واني ارد الها الابتسامة :- يخبل وانتي مرتي

حضنتها وخليتها على صدري اوووف كون اخذج واشرد بيج هسه ونرتاح من ضيم امج وعجرفتها

وخرت من صدري كالت اشش لا تسمعك ..

ديلله خل تسمع اني رايح هسه

متبقى للغدة ؟

لايمعودة خاف امچ تخليلي سم وتزوجج لغير واحد واني اظل اباوعلج من الجنة واتسحر عليط ...

ضحكت :- يعني ضامن الجنة حبيبي ؟

_ اي غير راح اموت بحبج شهيد ...

_ اسم الله عليك ياروح وروحي والله لو تمطر زلم غيرك فلا يحلالي ..

كتلها اممم الله اعد ... ولج اطيح حظج غيري يحلالج لو مو تمطر زلم لو يصير فيضان مال زلم

ضحكت وكالت .. ترى هيه بس حاقدة عليك عمود هيام مو اكثر

_ هيام هيه الي جابته لنفسها وهيام فد وحدة طايحة حظ بس امچ مجاي تستوعب هالشي الا لمن توكعها بمصيبة

عكدت حواجبها بانزعاج :- شبيك مہيب اليوم نازل على اهلي مرة امي ومرة اختي اني شعندي غيرهم وانت تحجي عليهم

لزمتها من خصرها وقربتها الي وهمست باذنها
انجبي عندج اني لوو اني موو بعينج ولج ؟

خلت اديها على صدري وتعبث بدكم قميصي
وتباوع على اديها وخجلانة :- انته بعيوني وگلبي ...

بستها بخدها حييل وهيه ابتعدت عني وايدها على خدها

:- عزااا مهيب لاتجي ماما

بستها من خدها الثاني كتلها :- وهاي على عناد ماما ...ترضاااها يربي عاشكها وامها واكفتلي بالبلعوم عظم

كالت هسه انته ليش مستعجل ع العرس خليني اتخرج من الكلية حتى بعدين اصير بس الك واتفرغ الك ...

كلت اي وبعدين هم خاف راح تتعينين وهم مستفادينا شي ...

يعني شنو افهم من كلامك متخليني اتعين اذا اجتني الفرصة ؟

لا طبعا اخليج لو اريد جان من هسه بطلتج من الكلية بس غير راح تصيرين مدرسة ومربية اجيال وهنياله الجيل الي راح يتربى على ايدج .....

ضحكت وكالت بحماس حبيبي ..
بستها بخدها وطلعت من يمهم ..

طلعت ضايج روحي بخشمي .. فريت السيارة وتوجهت للسجن ازور عمي حسان ..

رحتله استقبلني بابتسامة وهلا بالضلع وهلا بابن اخوي ..

اول ماكعدنا نحجي سألني على شرار ..
هزيت راسي بأسف كتله والله مانعرف عنه شي ..

رد : وسفرة لهيب لروسيا ما ثمرت شي ؟
هزيت راسي وايدي على وجهي ...

هو كال :- باع مهيب شرار عتوي بتسع ارواح مو سبعة ويكدر يطلع نفسه من اي مأزق ترى شرار مو شوية بس هو اكيد لو ضايج من حجي علي الدر خاف يرزله لو حتى لا يطلك مرته عمود دعوة الطلاق الي رافعتها عليه ..

باوعتله بقلق :- انته هيج تشوف ؟
هز راسه بحزم :- اكلك اخذها مني ... وخله ايده على صدره ..

مددت ايدي وكتله والله ياريت .. والله بالنا يمه ولا ليلنا ليل ولا نهارنا نهاررر ..

واني كلش خايف على ريلام ماريد ابقيها بعد يم امها الصراحةة خايف عليها من هيام لان هاي تعلمت تمشي بدروب موزينة سحورة ومدري ايش خاف تسمطها بسحر وتعال يا عمي شايلني

كال بس اطلع افصم ظهرها فصم .. احنه هم انطيناهه عين هوايه

بعديش هالحجي بعد ماطلعت عينها الادبسز ..
كلت هيج وصرت انفخ ..
كتله اي صدك جليبلك اخبار اله بشدة ..

رد .. اي بشرفك احجي شكوو ؟،

جاوبته . .. اخت احمد الصغيرة تطلقت ...

رد .. بنبرة غريبة وببحة .. " أنين" ؟

ابتسمت ... بالله كوول اسمها مرة ثانية
..

عاط اننننجججب كمل اي هاي الاخبار السنعة الزينة يله احجي شكو بعد

اي وصار عدها ولد

الله يطيح حظك انجب وولي من وجهي ..

كتله بابتسامة شقية :- ها اكمل لو بعد كافيى متريد تعرف اسمه ؟

الابتسامة شكت حلكه:- اي بشرفك شنوو اسمه ؟

رفعت تك حاجبي وكلت امممم اسمه مو غريب يشبه اسم مدري منوو ؟؟

دفرني دكول لا اشگ حلگك هسه!!

خليت ايدي على حنجي اتصنع التفكير ودفرني مرة ثانية ..

كتله اصبر شبيك خل اتذكر .. وشكيت حلكي بابتسامة
وكتله اسمه حسن يشبه مدري منوو

هو دار وجهه واحس ملامحه تغيرت ..
كتله يله من تطلع اخطبها وتزوجو وعيشو عيشة سعيدة ..

التاف عليه وكال ومرة ابوك السعلوة الي مركبتلها راس شيطان وين تخليني بحالي ..

رديت لا ترا والله فرح طيبة وعلى نياتها ...

كال اي طيبة وعلى نياتها وخربتلي علاقتين وفشكلتهن لو مو طيبة شسوي اصلا هاي ابليس تغطك بالشط وتطلعك يابس

هاي شبيك عبالي صفيت حسابك وياهه اشو بعدك حاقد ...

اي والله كبرت بعيني من دارت فطومة برووح امك مهيب عينكم على فطومة بالله دانيال ابنها ما تأذي بس خاف يوزها الشيطان ...

اطمئن ابووي لو ما يعرفها عدل جان ماامنها عدها وهيه كلش مداريتها ترى وبعدين على طاري اختها انته ما خطبتها ولا حاولت

دنك راسه ؛- اي صح جنت خايف عليها من نفسي جنت تايه بانتقامي وحاقد على فرح ومن صدك خفت ائذيها ..

بس من سمعت بيها انخطبت دزيتلها رسالة اريد اكوللها لتستعجلين بس هيه ماردت وبعد فترة عرفت تمت خطوبتها ، كلت اجت قسمتها والله يسعدها متوقعت زواجها فاشل وتتطلك بالعكس تمنيت الها كل الخير والبنية حبابة وفقيرة مالهه اذية ..

ضحكت هاي شون عرفت عنها كل هالشي اني الي اعرفه ماعندك علاقة بيها

ضحكت بتوتر كال عرفت وخلاص واريد منك توصلي رسالة الها انطيها لريلام وهيه بدورها تنطيها الها

رديت ... انت على شنو ناوي!!!

معليك وصلها وخلاص ...

وفعلا كتب الرسالة ، اخذتها ورجعت لبيت بلقيس شون عين صلفة اني ولا اتوب منها

احب اخليها تعصب بلكي يرتفع ضغطها وتنجلط واخلص منها لو اني راح انجلط قبلها من ورى سوالفها
وهيه واحد منا لو اني لو هيه ..

وصلت يم بيتهم طلعتلي هيه ومعصبة .. شادة حزامها والشر بين عيونها ..

خلت ايدها على خصرها وكالت :- خيرك شوو رجعت ..

تحمحمت بغضب :- وشكوو بيها اذا رجعت شنو تردين تطرديني ؟

ردت :- اي اطردك لان دومك مقلل احترام وياي ..

عدلت وكفتي اكلج عمة بنتج تحبني واني امووت عليها انت ليش واكفة النا حجر عثرة بس اريد افتهم شنو هالحقد هذا

هيه تريد تحجي فركت وجهي وكتلها مووو موضوعنه هذا اني تأخرت على صوتنا اجتي ريلام وكفت يم امها وتباوع ..

كتلها اجيت على ريلام ابوي عزمنا على العشاء

كالت هاا ابيت خبالو ؟

باوعت عليها مقلص عيووني :- خبالو وكلبها طيب ماتحقد وما مأذية احد ومرة الشيخ علي الدر وازيدج من الشعر بيت ترى هيه مو مخبلة انتوا تشوفوها مخبلة او انتوا الي خبلتوها بسوالفكم ..

ظلت تفر بيدها .. ريلام تفرك بيدها وتباوع عليها
هاا ماما ارووح ؟

هيه غمتها وكلتلها رووحي ..

وفاتت جوى ..

ريلام ابتسمت وسحبتني من كف ايدي وشبكت اصابعنه كالت فووت بالاستقبال ابدل واجي ..

كتلها مو تتأخرين تترى ما اتحمل ابقى بمكان وامج بي ...

خلت ايدها على حلكي اشش لا تسمعك

اخذت ايدها بوستتها ..

كالت عزاا لاتشووفك ..

دفعت ايدها بخفة شطلعت هاي وبعدين اني مااخاف ترى ..

بابتسامة فديته الميخاف ..

ديله رووحي بسرررعة ولتتأخرين

اشرتلي باصبعها الابهام والسبابة وكالت طلللقة ...

راحت بدلت واجتي فدوة العينها شكد حلوة احبها وكون اضمها بگلبي ..

صعدنا بالسيارة .. كتلها حبيبي رايحين لبيت اهل فرح وهاي الورقة اريدج تنطيها لاخت احمد الصغيرة أنين ..

فتحت عيونها مصدومة عزااا شعندك تتراسل وياهه ؟؟

هاي شبيج تشكين بيه لوو شنوو وضعج وبعدين هاي من خالج إحسان الها ..

ياا شعنده خالو حسان وياهه ؟؟

مابينهم شي انتي انطيها الامانة ومعليج تمام ..

هزت راسها تمام ..

اخذتها ورحنا لبيت أحمد ، اني بقيت كاعد يمه وهيه راحت يم اخواته ..

وبعدها ترخصنا وطلعنا ..صعدنا بالسيارة كالت تمتمت المهمة ..
ابتسمت العا بعد عمري وهسه شنسوي ؟

نروح للبيت ....

رديت بعنف :- لااااع نروح لبيتنا راح اخطفج من امج ..

خلت اديها على خدودها :- عزاااا ....

جريت اديها وبستهم ..

كالت صخام احنه بالشارع

كتلها ظلمة محد يشوف هسه نروح لبيتنه نكعد شويه ولج اريد انفرد بيج من اجي لبيتكم امج مكابلتنا وكاعدة ..

اي شتريد منها تخاف على بنتها منك ..

وشسوي اني الج وشماسوي هم حلال ترى ..

وبالليل اشو انام على صوتك هذا هم ميكفيك

ضحكت ورفعت حواجبي ونزلتهم وكتلها مايرويني ...

ضربتني على زندي وضحكت ..

حركت السيارة .. خابرني لهيب
ولك عمتك بلقيس كالبة الدنيا عليكم وين وديت بنتها

ليش شكوو شصاير ووين اوديها يعني ترى هيه خطيبتي

اي مو انت كايل الها رايحين لبيت فرح وهيه فرح عدنا

وهيه شدراهه فرح عدكم

مخابرة هدى وسائلتها منو عدكم هدى مجاوبتها عدنا فرح

بس لا مرتك تشتغل جاسوسة عند عمتي!!!!

انجب هيه دووم تخابرها وتسأل عنها بس الظاهر فلمك احترك اليوم ...

ديله ولي ولي جايين للبيت احنه ...
سديته من لهيب باوعت لريلام وينه تليفونج ؟

نسيته بالبيت شكوو شصار !!

ماكو بس امج هواي اتصلت عليه من جنت يم احمد ومجاوبتها .. ومخابرة على هدى ومحترك الفلم كله ..

عزااا وديني للبيت مهيب بسرعة ...

دوولي شكد تصرفين عزااا نروح لبيتنا هسه نتعشى وياهم وورى العشى ارجعج وكوليلها جنه بالموول ..

هزت راسها متوترة طمنتها متخاف وانطلقنا لبيتنا اول مافتنا هيه شافت فرح والجهال كعدت يمهم لا ساعة ولا ساعتين واني عود اريد انفرد بيها واخذ راحتي بس هيه حظوظ

اخزرها ائشرلها اطكها مسامير ولا تهتم فاقدة ويه الجهال دانيال وديمة وفاطمة وتلعبهم

اني اعلمج الا احرمج من الجهال خمس سنين ماخليج تخلفين بسيطة ...

بعدها وصلتها للبيت وامها كلبت الكون حاولنا نقنعها احنه مفتهمين غلط العشى بالقصر واحنه جنه بالمول متقنع

فرتها عليه وكالت رحت سحلتها بالمول وممشتريلها شي شكد بخيل انته ...

ريلام كلتلها لا ماما نسيتهم بالقصر

اني دنكت على ريلام شاورتها .. حياتي دخلي بغرفتج وسدي الباب الا ان الله يفرجها اخاف عليج اني ... وطلعت منهم ..

أنين ..

راسلني عمر .. اني ارد عليه باحترام وهو هماتين لان يظل ابو ابني وهو يسال عن ابنه اغلب الاوقات وحتى احمد يعرف بالموضوع ...

كال انين لشوكت ابقىٰ هيج وابني بعيد عني!!

يعني شسوويلك عمر شسوويلك!!!

شسوين يعني ارجعي خلي ابني يعيش يمي ميصير هالحالة

جاوبته :- انته صدك تحجي اني مو ردت ارجع الك وانته رحت خطبت اني مستحيل ارجع الك مستحيل لا تفكر ابد

كل الي احنه بي صوجج انتي ظلمتيني وظلمتي ابني وبعدتيه عني والله مراح اسامحج ويومية اتحسب عليج

واني شكوو واني شنوو ذنبي ها شنوو ذنبي ع الاساس انته مغلطت مخنت مضربتني واذيتني

انت قبلتي بيه وانت مرايدتني هذا جان ذنبج

صح بس اني مقصرت وياك وقايمة بواجبك انت االي منطيت فرصة الي مامرت اشهر من زواجنا الا وانت خايني

ليش مشفتي نفسج شون تتعاملين وياي كوة تضحكين كوة تسولفين باردة جنج قالب ثلج ردت احرك مشاعرج تجاهي

اي هسه بعد هذا فات وقته الحجي صار ماضي انته هسه متزوج بعد شكو وهسه يصير عندك طفل وتلتهي بي

مديصير صار شكد متزوجين مديصير وبعد شغلة ترى اني انجبرت اتزوجها لان اهلها عرفوا بعلاقتنا واني انجبرت اني احبج الج ارجعي انين لا تتعبيني

شون تحبني واني باردة وياك وبعدين اني ماارجع على ضرة مستحيل ولا اطلب منك تطلكها خطية شنوو ذنبها ولا انت الي تكدر تفتح بيتين

لا اكدر والله اكدر اني هسه تعينت وراتبي زين مو مثل قبل ادري عانيتي هواي وياي وصبرتي ولا حتى تذمرتي بس هسه الوضع مختلف

لا عمر لا حظي واعرفه بس ارجع للك يبطلوك من شغلك ع كولة امك رجلي خضرة ههه والبنية هاي اكيد ع عينها الرزق اجاك دير بالك عليها واذا متخلف عالجها ويصير عدكم ان شاءالله وابنك يمته ميعجبك تعال شوفه ..

وبعد ماكدر احجي وياك اني مدام مفكر ترجعني ، لازم تكطع الامل ما ارجع اني ، واي شي عندك كوله لأحمد احسن إلي وإلك ..

طلعت من الغرفة واني ضايجة حيل .. شفت موج بالصالة لازمة حسوني تلعب بي وتضحكه وهو يضحك الها وهيه تبوس بي

ميتة قهر عليها اني ذيج الفترة هيه كله مكتئبة وضايجة واغلب الايام تخلي ياخذها تروح يم قبر بابا تبجي حد ماتغفى ع القبر

بس هالايام زينة شوية ومتعلقة بحسوني هواي خاصة هو ديكبر حبيبي وبدت سوالفه تصير حلوة ويونسنه ..

رحت كعدت يمها واني جريت حسرة .. هيه انتبهت كالت شكوو شبيج .. !

جاوبتهه بعد تنهيدة :- جنت احجي ويه عمر وضوجني بالكلام

موج بتساؤؤل :- شنوو يريد بالله ؟

جاوبت بانفعال يريد ارجع اله يكول انتي حرمتيني من ابني وظلمتيني ويتحسب عليه ..

هذا شبي ترى يحجي عشرة بالشهر انتي ممجبورة ترجعين اله وهو متزوج هسه

كالت الكلام بغصة ودارت وجهه ..

اني مخلية اديه بحظني واعصر بأصابعي ..
اي ما ارجع مستحيل هيه مرته لأن ما خلفت يريد يرجعني ميروح يعالجها مو احسن اله ..

معليج منه الاسبوع الجاي تبلش المدارس رجعي داومي احسن ولتفكرين بي ولتخلين ابالج غير تاخذين الشهادة الشهادة بس هيه سلاحج وبس

لا عفية ما اكدر اترك حسوني خاف اسم الله يصير شي وهو يكول عايفته وتداوم وانوب خاف ياخذه مني ..

ردت لا ولج اني يمه شنوو شغلي اني اهتم بي واخلي ابطن عيني ..

ورفعته بين اديها وتبوس بي وتضحكله .. وهو يضحك ..

كالت ولج رجعي داومي مكافي سنتين فاتتج وانتي مماخذة شهادة السادس ترى الايام والسنين تركض ركض ومتشوفين روحج الا وانتي عبرتي التلاثين سنة وممثمرة شي ارجعي درسي هالسنة ولو مهما يصير لا تتركينها بعد

لا هلي تمر كم سنة يكبر سوونه وادرس سادس خارجي احسن خاف اهمله ماريد ..

وظلينه تناقش وهيه تقنع بيه .. بعدها المغرب اجوي النه مهيب وريلام تفاجئنا بجيتهم عبالنا جايبين خبر من شرار وموج خطية جانت كاعدة يمهم على اعصابها عبالها شي من شرار بس هم كالوا جايين نشوفكم ومجابوا سيرته ...

بس ريلام جانت تباوعلي بطريقة غريبة حسيت عدها شي يخصني ..

الىٰ ان كلتلي ممكن تاخذيني بس اعدل مكياجي حتى نروح احنه مجايين نطوّل ..

موج كالت الها ابقوا ع العشى وين رايحيين ؟

ردت لا والله بس جينه نشوفكن ونروح صار هواي مملتقين ومشتاقين الكم ..

ردت عليها حبيبتي انتي احنه اشووق ...

واخذتها رحت للغرفة بس دخلنه هيه طبكت الباب عدل ومدت ايدها لجنطتها مدري شنو تدور واني اباوع عليها بترقب .

بعدها طلعت ورقة كالت هاي رسالة من خالو إحسان الچ اقريها لـوحدچ أحسن ..

انصدمت واخذتها منها بسرعة وقلبي ميعرف ينبض لو ينفجر وضميتها بصدري وكأن ماكو مكان يليق بيها الا جنب قلبي ممصدكة وصلتني رسالة من أسمري الي متعبني ..

.. واني كل ليلة قبل لا انام اصلي ركعتين وادعي الله يفك اسره مو عمودي لا والله بس ميستاهل ينسجن وهو الي نقذني من سجني ..

طلعنا اني وريلام ووهيه وكفت يم موج وسألتها
صدك موج ماكو اخبار عن خالو ماراسلج متواصل وياج .. والله قلبنا مثل النار عليه ..

موج دارت وجهه وتنهدت واكتفت بكلمة لا ..

ريلام بهمس :- الله كريم ان شاءالله يكون بخير ..
موج سكتت واني كلت ان شاءالله ..

فرح ..

جنت مخلصة شغلي وكاعدة بالصالة والجهال يلعبون بغرفتهم .واني اقرا كتاب وفجأة تعاركوا على لعبة ..

وطلعت فطومة تمشي ورى دانيال تحاجي وتسوي اديها هيج 🙏 مثل حركة توسل ، بليز داني اني تفلة انتيني اللعبة اني تفلة ..
عود طفلة ..

وتتوسل بي اردوك عود ارجوك ...

هو يكللها بعصبية لاء انتي مو تفلة بس حسوني تفلة
يقصد ابن انين ..

وهيه هم تعصبت الكيوت فديتها تحجي بدلع وعصبية
بيييك انته بييييك
عود شبييك شبييك ...

واني خربت ضحك عليهم ، وهم معلمتهم كلمات بالانكليزي وهواي يستخدموها .. بليز ونو ويس واوكي ..

رحت قنعتهم يلعبون سوى ، باللعبة جانت بيانو صغير ويطلع موسيقى .. وهم عاد بقوا يلعبون وشوية طلع كارتون الخروف الظريف هم يسمونه غنماتي وكعدوا يباوعون عليه ..

واني اجاني مسج ع الوتساب .. فتحتها من رقم غريب ..

كاتبة الي بيها اني سحر اريد اشوف بنتي صوريها الي ع الاقل حرام عليكم انتوا شنوو هالظلم هذا ..

اني شفتها وصفنت بالفترة الاخيرة تعودت ما اضم على علي شي ابد .. اي شي اريد اسوي حتى لو مهما يكون اسمع منه يله اتصرف

هيه ظلت ترسل رسايل ومانطت مجال ..
حتى اخابره واخذ موافقته ..

كتبتلي الله ياخذج شكد حقيرة ما اتعضتي حرمتيني من بنتي والله شسوه بيج ، حركج وموت طفلتج ببطنج وبعد كلما يصير بطنج طفل هم يموته واخذيها مني حووبتي ما تتعداج

ظليت ارجف اديه كوة سيطرت عليهم كووة الفون يوكع من ايدي اله شويه تماسكت وصفنت

يمكن صدك كلامها صحيح انوب بس يصير طفل ببطني هم يموت ، دمعت عيوني وانقهرت

سمعت صوت سيارته فاتت للكراج ، عفت التليفون خليته على القنفة ورحت غسلت وجهي بسرعة ونشفته ورحت استقبله من عند الباب ..

فتحتله الباب والجهال هم استقبلوا بوسني ودنك بوسهم اثنينهم

حاولت ابتسم بوجهه بس هو يعرفلي عكد حواجبه
شبيج بوويه عيونج مو طبيعية ..

دنكت واخذت منه الجنطة والبشت مسفطة ومخلي على ايده هو
كتله انته تعبان هسه ارتاح وبعدين ورى الغدة احجيلك ..

سحبني من ايدي لا والله ما أرتاح ولا تمر لكمة من زردومي وانتِ ضايجة ..

واخذني للصالة من كتفي حاضني .. كعدنا على القنفات .. شوفته الرسايل
عكد حواجبه هاي منين الها رقمج ..

قوست شفايفي وهزيت اكتافي بعدم معرفة ..
هو جر حسرة وسحبني خلاني على صدره واديه بين اديه واصتبعي واصابعة متشابكة ..

كال لا تضوجين روحج بوويه هيه لو بيها خير ماتخليها عند الجيران وتطلع ويه صحب...
بتر جملته وظل يستغفر

وكمل كلامه بوويه ترى سحر بس تريد تأذيج وتغثج مو هامتها بنيتها هيه هم عدهه ولد وشامرته على عمامه

وانت ام فطومة مو هيه يا بوية الام الي تربي مو الي تجيب وانه اشوفج واشوف فطومة من تكعد من النوم وتطلع من الغرفة وانت لاهية بالمطبخ اول كلمة تحجيها وين ماما

حكيت راسي بصدره وحجيت بس شفت شلون تحجي !!! تكول حوبتها ماتت نوران ابطني يعني هسه اذا صار ابطني طفل هم يموت والله ما اتحمل

لا بوويه لا تكولين هيج .. وبعدين هسه انت لا تفكرين بهاي الافكار السلبية وعندج جاسم و فطومة نعمة من الله

وخرت من صدره اباوع بوجهه :- يعني شنو بعد ماتريد مني طفل ؟

اي بويه اريد بس هسه لا انت بعدج تعبانة ماصار هواي على عمليتج اخر مرة ارتاحي والجهال يحتاجون عناية

بالعكس مونسيني والله واخرب ضحك على سوالفهم وهسه راح يروحون للروضة واني ابقى وحدي اضوج ..

تحسر كال الله كريم يمتى مايجي هلا بي وكون يشبهج ويشبه خبالج

ضحكت :- بشرفك مو صايرة عاقلة هالايام!!

علي الدر :- احبچ ..بكل حالاتج
سألته بدلع:- شگد ..تحبني

رد :- بگد ما شالعة گلبي بخبالچ ...

كتله خلي ادزلها صورة فطومة خل يرتاح ضميري ..

كال وليش يأنبج ضميرج انتي شمسوي قايمة بواجبج واكثر بعد ..

ميخالف حبيبي ارتاح هيج ..

كال مدام ترتاحين دزيلها بوويه وانه كايم اغسل وابدل ..

راح واني دزيتلها صور فطومة .. بالطلعة مبدلة ..
ردت هيه طكيلها صورة هسه ..

رحت طكيتلها صوره جانت لابسة تراك بنفسجي واني امشطتلها ومسويلها ذيل حصانات اثنين والقراصات بنفسجي بلون التراك .

هيه ردت هاا رحتي عدلتيها ومشطتيها موو ...اشوفج تأخرتي

كمت حظرتها مبينه صدك تريد تغثني والباب الي يجيك منه ريح سده واستريح .. واني ادرى بنفسي وواثقة من روحي وفطومة بعيوني وبقلبي لان حيل تعلقت بيها وخايفة الله بيها ...

ورى ما تغدينا هو صعد للغرفة واني غسلت للجهال
و عزلت المطبخ .. وصعدت يمه شفته كاعد ..

رحت يمه ... ليش مانمت
ابتسم وكال منتظرج ..

مو تعبااان انته ..

رد :- شسوي هو جمالج يعيل ويتحرش بيه ..

ضحكت وتقربت منه حظني وباسني .. وانفتحت الباب هو دفعني عنه وكال وخري وخري اجو قوات الطوارئ صارت مداهمة ...

ضحكت ورحت للجهال وهو كال بويه راح انام شوية والعصر حضري روحج نروح للقصر هناك عندي شغل وانتي هم روحي يم هدى ..

كتله ان شاءالله والعصر اخذت الجهال ورحنا للقصر
فتنا من يم بيت ختام شفتها طلعت من بيتهم وتوجهت لسيارتها صايرة تسوق .. الله يوفقها ..

جانت لابسة كوستم كله لون واحد بلون العنبة طالعة جنها بطل مال عنبة ...

وشال زيتوني واني من شفتها اشتهيت لفة فلافل ووياهه عنبة وزيتون ..

عزاا صايرة اتشهى بس لا الي ابالي!!!

موج :

مرت الايام والاشهر .. وهو مختفي .. رغم محاولاتي المستميتة بالنسيان الا ان قلبي مايرضى ينسى ...

حاولت انتشله من قلبي وروحي الا ان حب ينمو من جديد مثل اظافري وشعري ..

صدى صوته يملي اذاني وشوفته ماليه عيوني ... وويه كل صفنة يمر وجهه عليه .. ويا كثرها صفناتي

مرة شفته بالحلم وكعدت على صوت المنبه اجيت اكسره الفون لان كعدني وحرمني من هالحلم ..

احس قلبي ظل اله مثل الاسير .. متملك قلبي بشكل يسطع بثنايا ذهني المستعر مثل الضوء الاحمر الي يشير لمكمن الخطر ..

اني رحت لروسيا غركانة بغرامه وبعدها اكتشفت انو العالم الجديد الى رحت اله مو وردي بل حالك السواد فقدت على اثره امومتي ..

كعدت جان الجو بارد حيل ، تذكرت من مرة اخذني
و رحنه نلعب بالثلج .. وهو كل شوي يبوسني .. جان بس اني ويا .. واني ادفع بي اول بوسة يكولي هاي بوسة ثلجية والثانية يكولي اريد ادفي شفايفج والثالثة يكول اريد اضوك شفايفج وهنه باردات ...
مسحت على شفايفي وتنهدت ..

قضيت اشهر بالعلاج لان الاجهاض جان قسري لجنين عمره تلث شهور ببطني خلف اضرار بداخل رحمي

خضعت لعملية ترميم الرحم ، وعانيت هوايه بعد العملية وتأذيت .. لكن الوقت كان كفيل بشفائي بالاضافة للعلاج

علي الدر هو تكفل بمصاريف علاجي ، رغم رفضي ورفض احمد بس هو اصر ..

كال بويه انه مسؤؤل عنج بعد اخوي بس خلي اكلج وسمعي ولا تزعلين مني انت يا بويه غلطانة مايصير تخلينه ورى ظهرج وتردين

كتله عمو اني جنت مجبورة ارجع لان شرار مياخذ كلام مني وجنت متأكدة مية بالمية مراح يرجعني للعراق اني اعرفه كولش زين

احمد كله شيخ هو غلطان ليش يكعدها ويه مرته وهاي نتيجتها هو مسؤؤل عن كل الي صار وفوكاهه اختفى ..

لا بوويه هو حاجاني كبل لا نفقد الاتصال بي وكال انه اريد اخذ حكها بس هيه رجعت ليش رجعتي بويه وحدج وخليتي واحد غريب
يمشيلج بجوازج جان اشتكيتي ع المرة وتدرين بقانونهم هناك شون قوي

عمو اني جنت يائسة كلش وخايفة وحتى فقدت الثقة بكل شي حتى بي هو وحسيت نفسي وحيدة وغريبة
ردت بس ارجع يم اهلي ..

كلنا نغلط بويه وشيلي فكرة الطلاق من بالج ودعوى الطلاق الي رفعتيها سحبيها احسن هو مستحيل يبقى ويه مرته بعد الي سوته بيج اخذيها مني هاي ..

لا عمو اني ما اكدر اسحبها وما اريد استمر بهذا الزواج هو صح ميبقى وياهه بس حيبقى بروسيا واني مستحيل بعد ارجع لروسيا وهو كان غلطة ومحسوبة عليه ليش اخسر عمري وحياتي بالصبر ويا زواجنا جان غلطة وانفرض فرض عليه بسبب اوس الحقير

ماتوصلنا لحل واني رفضت اسحب الدعوى ..
عدت فترة .استعاديت نفسي .. وكتبت مجموعة شغلات لازم انفذها

اولها اشتغل واسدد ديون زياد ....
اشتري سيارة وافتح الجم الخاص بيه ..

ظليت ادور على شغل وتواصلت ويه صديقاتي وهنه مقصرن اشتغلت بروضة ..

واني اباوع على الاطفال واصفن عليهم وافكر بطفلي الي انتزعوا روحه من رحمي بالقوة ..

يا ترى جان ولد لو بنت جان راح يصير ابيض مثله لو بسماري راح يصير جليد مثلي لو جمر مثله ومثل اعصابه وخباله ...

بعدها بسنة ٢٠١٨ اني اشتغلت بجم .. وتركت الروضة لان ما اشوف نفسي الا بهالمجال وكلش احب االتدريب ..

نزلت من سيارتي الي اشتريتها من فترة وكولش فرحانة بيها ..

واني بطريقي للجم وداامشي ، حسيت بشخص يحاجيني :- من رخصتج وردة ..

اللتفتت عليه كتله نعم تفضل

ممكن دقيقة من وقتج اكو شخص يريد يحجي وياج ..

عكدت حواجبي منوو ؟؟

تفضلي للسيارة واشرلي بيده ، مشيت خطوات قليلة
وكفت كبال سيارة سودة مضللة وجان تنفتح الباب وينزل منها .. تفاجئت !!!

يتبع ....

التقيكم بالتكملة الثانية 😘

شوكت ؟
_ اكتبها ، اكملها وانزلها ...

الفديو جريء شوية 😬 بس انا احب هالمسلسل 😁طبعا اسمه الرحمة وشوي ينطبق على موج وشرار