رواية هذيانٌ بين جمرٍ وجليد ..(ارملة اخي المجنونة) الفصل السابع وستون 67 - بقلم نورا ناصر

السلام عليكم ...
هذيان بين جمر وجليد
الفصل اثنان وستون
نورا ناصر

***

لا تتردد في الحديث معي فربما كلمة منك ترمم هشاشة قلبي وأنت لا تدري!

***

*موج*

الايام الي قبلها جانت تباوع علينا واحد واحد .. اجه يمها الشيخ وكعد يمها ، جانت تباوعله وعيونها تدمع مبينة شوفتها مال فراگ ..

اخذ اديها بوسهم وراسها بوسه وبقى لازم اديهه
كاللها بيج شي تردين اوديج للطبيب ؟

هزت راسها وعيونها تدمع وكالت بقهر لا يمه ..

رد عليها اوديج للزيارة ترحين تزورين گبر الحجي ؟

كالت لا چم يوم ورايحة يَ يمه ..

لا يا يمة عمرچ طويل لاتگولين هالحچي هذا وتعورين گلبي عليچ ..

يا يمه الموت اولها وتاليها .. يمه ابو مهيب إلهيب الگو** صارله جم يوم ما اجه يشوفني رزله بلجن يحس وانه موصيته لا يگطع مني ....

رد عليها بضحكة حنونة .. تدللين ارزله والوي اذنه هم بعد .. انتِ بس أُمري ..

كالت بنبرة توسل يمه إخيتك ......

قاطعها : الله يخليج يمه بلا هالسيرة شنو نسيتي شسوت اخر مرة هيه وبنتها وشون تبلت على مهيب بلوى اكبر من راسها والولد انتِ مربيته على ايدچ وتعرفين اخلاقه

كالت ميخالف بس خليها تحضر فاتحتي ولا تحرمها منها وتخلي الناس تحجي علينها

يمه ليش هالسيرة هاي اليوم الله يخليج عمرج طويل ان شاءالله

بعد عمري ابو مهيب انت مايخفى عليك وصية بني ادم واجبه انت بس كول ان شاءالله خلي بلقيس تحضر فاتحتي ولا تطردها .. كلنا نموت يا يمة بس كول ان شاءالله وگلبي ريحه

جر نفس بقهر وباس راسها وتمتم .. ان شاءالله ..

وحسان اخيك دير بالك عليه ربيته انه يا يمه وهو يحبني وكل يوم على راسي يجي يشوفني احسن من إلهيب الگ*** .. إله إسبوع ما اجاني ..

صار يمه ولا تشيلين هم .. لهيب تلكينه لا هي ويه مرته وبنته حسان ماعنده شي دايح نهار كله حتى الصيدلية مالته مخلي بيهه واحد وهو مايكلف نفسه يلزم شغله بنفسه شبعااان ومتعافي ..

ميخالف يمه علمه ولا تتخلى عنه ..

اعلمه يمه! اذا هو صار كبر المطي انه الساني طاحت منه وصلة من الحجي والنصيحة وهو راكب راسه ومية بلوى طلعته منها

وبعد زحمة اضربه بعد مايجيب نتيجة الضرب خلي هو يتندم بعدين ويطيح حظه

لزمت ايده وايدها جانت ترجف وهيه تترجاه ..
لا يمه ادخيلك لا تضربه حِنين حسان مايستاهل

هو هز راسه وكال الها صار على امرج لخاطرج .. وباس ايدها وخلاها على جبينه مثل النعمة

وكملت .. فريحة كللها خل تبريني الذمة خاف حجيت عليها لوعت گلبها خذت غيبتها وانه باريتها الذمة همين

وها انته تكللها ماريد مويجة تكلها اريدنك انته بلسانك تگلها ..

سمعتي مويجة مو دگليلها ..

اني جنت مقهورة حيل وواكفة بنهاية السرير مالتها وهو الشيخ كاعد بصفها .. واسمعها توصي متت قهر عليها

هزيت راسي بقهر وغصة بروحي منعتني من الكلام ..
طلعت من الغرفة خجلت ابقى ودموعي على خدي ..

هو لمن طلع كال تعاي بويه عندي حجاية وياج ..
رحت يمه دنكت راسي كول عمو تفضل .

رد ديري بالج على الحجية بويه مبينة تعبانة وخابريني اذا تعبت ..

جاوبت ان شاءالله عمو بدون ماتوصي ..

ورجع سألني على فرح .. جاوبته زينة الحمدلله الصبح خابرتهه كال اخذت علاجهه؟
كتله اي والله عمو دتاخذة الله هاديهه هالايام وان شاءالله خير ..

همس ان شاءالله ووصاني على أُمه وطلع .. هو يومية يسأل على فرح واذا اكوله لسه ممخابرتها يكول خابريها كدامي ويسمع صوتها

وهيه الخبلة تجفص وهو يضحك بصمت عليها واحس نظراته تتبدل لمن يسمعها ..

واني اظل محتارة وخجلانة لا اكدر اكوللها سكتي فشلة منه ولا اكدر اكتم ضحكي ..

عاد هو من يسمع صوتها بخير ولسانها بعده بخير يخلي ويروح وابقى اني اعض بأصابعي ..

خابرنا شرار .. وفتحت كام وشاف امه واجت مرته وابنه حمودي سلموا عليها وهو عرفني عليهم

يكول لمرته هايه موت حتجي يمنه بشهر التاسع مبقى شي

هيه تسميني مود وابنهم يكولي مون وشرار موت .. عائلة مستشهد عدها حرف الجيم هذا هم حظي اني ..

بعدها طلبت تخابر بلقيس .. واني ماعندي رقمها اتصلت على ريلام دا احاجيها واجاني صوتها

شنو عيني تستنكفين تخابرين على رقمي .. ؟

جاوبتها لا ابد ما استنكف مو طبعي هذا بس ماعندي رقمج

جان طلبتي رقمي من ريلام وخابرتي صعبة عليج هاي يا المثقفة يالمتعلمة لو بس فالحة باللسان

ترى اني مو لسان ... لا!!! اني اكدر اسكت الج وماارد على اسائتج بس عيب من باب الاحترام ارد عليج وابرر ومااتجاهلج وعلاج الجاهل التجاهل واني ممعتبرتج جاهلة

تنهدت وكالت وبعدين امي مو عدها تليفون ليش مادكيتيلها الرقم

هيه اصرت اني اخابركم من تليفوني وما ارفض الهه طلب ..

كالت اي حنينة مثل اختج ..

اي والله حنّّّان احنه رغم كل شي ما نحقد وقلبنا يبقى ابيض ..

اي تعرفيني بيجن دنطيني أمي خل اشوفهه شتريد ..

مشيت بالتليفون ورحت للغرفة مالة الحجية واطيتها التليفون جانت كاعدة يمها ام حسام .. خليت الفون بيدها وطلعت لعبت نفسي من بلقيس الله يساعدج فرح شون تحملتيهم ..

هاي كلها جانت خلال اسبوع وهيه تمشي وتوصي وتودع ، انتكست حالتها سكر صعد والضغط ودوها للمستشفى ورجعوها للبيت مقبلت تبقى ..

اجوها حبايبها ، بلقيس جتي شافتها وجابت هيام وياهه وجانت مخطوبة وبس تحجي بخطيبها ...

هدى همات اجتي عود تبقى يمي وتساعدني لان وحدي بس بنتها تستغرب من الخطار وكضتها بس بجي كولشي مستفاديت منها اخذت بنتها وراحت ..

الى ان اخر يومين صار اكلها قليل وكلامها قليل ..

احنا كلنا مافاركناهه ابد ، والشيخ ترك معظم اشغاله وكابلها ، يطب يطلع يبوس بيها وشرار حجز وديجي بس قبل جيته بليلة وحدة بس

جانت هيه تعبانة حيل وام حسام جانت ماكو بنت اختها ابنها مريض وراحت نامت وياهه مستشفى ماعندها احد

بقيت بس اني وياهه وجنت خايفة حييل وكلساع اخابر شرار واستعجله بالجية وهيه مقبلت احد ينام يمها غيري اني

بقيت سهرانة يمها ، خابرنا شرار حجينه وياه بس هيه جانت مستمعة مابيها تحجي وعدها يرجع يشوفها

الشيخ اجه كعد يمها واولاده وحسان وبعدها راحوا ناموا

غفيت اني شويه ولمن گعدت جانت متتنفس وعيونها مفتوحة ، انرعبت من شكلها ، ظليت اگعد بيها متگعد اتوسل بيها ماكو

على عياطي والبجي اجوي كُلهم والتموا عليها يبجون الشيخ غمض عيونها وغطى وجهه ووماقبل احد يشيلها هو شالهه واخذها للمستشفى يسوولهه شهادة وفاة وهم كلهم راحوا وياه

بقيت اني وحدي ومنهارة وميتة من البجي ومن الخوف واحس روحها بيه مجلبة وعيونها المفتوحة بعدها كبالي وروحها تحوم بعدها ابيتها هذا

حضنت روحي وابجي و تليفوني فوك باقي بالغرفة يشحن من البارحة اخاف اروح اجيبه ، طلعت ركض من الغرفة وكعدت بالصالة ورجعت ظهري ع القنفة وحضنت نفسي وابجي ..

الى ان ورى ساعة اجت بلقيس تصررخ وتبجي ووياهه عمتها وبناتها واني وحدي اجيت اتخبل والله

حضنت ريلام وظلينا نبجي اثنينا منهارين .. كعدنا على الكاع والتمت الناس علينا .. ريلام بعز بجيها سألتني
خابرتي خالو شرار عرف بيها ..

مسحت دموعي جريت نفس بقهر هزيت راسي ورجعت لدموع تجمعت بعيني وبغصة جاوبتها
لاء ماكدر ريلام مااكدر اكوله وصااني عليها كوومة كل يومية يوصيني حد البارحة هو يوصي خاف قصرت ياربي ..

خلت اديها على اديه كالت هسه يكلوله اكيد .. وانت اكيد مقصرتي كومة مدحت بيج كدام ماما الله يرحمها ...

لليل اجه شرار فات ع الغرفة اني جنت متمددة لان تعبت اليوم حيل وجانت ريلام يمي ..

جانت عيونه حمرة ومنهار حضنه اني وريلام وصرنا نبجي احنه التلاثة سوى وجان هو يلوم بروحه لان اختار البعد عنها وماتت وهو بعيد عنها

عافتنه ريلام وطلعت واني رجعت حضنته اهدي بي بس دموعي زادت حتى اختلطت ويه عرق رقبته ..

* فرح *

موج الهه كم يوم مقصرة باتصالاتها ، الحجية مريضة وهيه ملتهية وياها بس االيوم ابد ماخابرت

كعدت الصبح خابرت عليها ماجاوبتني بقيت قلقة عليها كلش هواي ..

انين نايمة جانت والجهال نايمين واحمد بالشغل ، گلبي گرصني وخايفة لا صاير شي وهيه بالعادة بسرعة ترد

ظليت اخابر على ريلام ومهيب ولهيب وهدى وحتى شرار محد ميجاوبني حيل خفت وظليت كل شوي اتصل بانعدام صبر

بس علي ابد مافكرت اخابره بعد ما مرت شهور اخر كلام بيننا لمن كال مطلكني غيابي كبريائي ما سمح لي اخابر عليه بعد ابد

للظهر بعد ماتحملت ابد خفت لا صاير شي عليهم كلهم والوضع مو تمام والموت اسم الله بالجملة وهم ماشاءالله شون المصايب تحبهم وتريد رضاهم

افكر بأُختي وافكر بعلي هم اخذ جزء من تفكيري لا صاير بي شي . ماكدرت امنع قلبي من التفكير بي

احسن شي اتنازل عن كبريائي واخابره بلكي هو يرد عليه

انين جانت بوقتها كاعدة وشافتني محتارة كتلها محد يرد على مكالماتي ... كالت خاف الحجية توفت ..

كتلها بتوتر مادري ماادري الله يستر واذا ماتت الله يعينهم على مصابهم بس غير يجاوبوني معقولة كلهم ملتهين

ردت .. اي تلكيهم كلهم ملتهين هسه خاصة اذا االيوم اول يوم وهماتين هيه خطية جانت مريضة قبل فترة ..

باوعت عليها .. اخابر ع الشيخ تحجين وياه انتِ ؟

بلعت ريك لا ولج استحي والله انتِ خابري شبيج ؟

هزيت ايدي ورفعتها ونزلتها بعصبية .. ودكيت رقمه ..

مرة مرتين .. اجاني صوته ارتاحيت لان سمعته بس جان حزين ومبحوح ..

وجهت اله كلامي بتلعثم وارتباك ولهفة..
شلونك شيخ شون صحتك شصاير يمكم اشو اخابر محد يرد ان شاءالله خير ..

كال بانكسار ماتت امي .. فرح ماتت .. وكبل لا تموت وصتني اكلج تبريهه الذمة

يا عزااا الله يرحمها وبقية بحياتك شوكت ماتت ؟

رد بعد حسرة .. البارحة بالليل واحنه نايمين وانه كبل نص ساعة رجعت من الدفن عود تعاي للفاتحة خوش اذا مو لخاطري لخاطر اختج ترة موج منهارة لان تعلقت بيها

اي والله اجي ان شاءالله اكيد اجي والله يجعلها اخر الاحزان

كال اخر الاحزان يعني انه اموت وراها موو

رديت بسرعة لاااء اسم الله عليك حبيبي ..

حبيبي داانيال وخر عن التلفزيون لا تنتل ..

دانيال الخبيث كال ماما اني دابني ع تلفزيون

ظليت اعض بشفتي اني متوترة ومدري شون اجت على لساني كلمة حبيبي بس كلامه اثر بيه .. ختمت المكالمة وياه بسرعة وخابرت احمد

وكال حضروا نفسكم نروح لبغداد ..

كعدت ابجي والله هيه صح اذتني بس بعد هذا موت وتندمت ماخابرتها وحجيت وياهه قبل لتموت وقهرني لمن كال تريد ابريها الذمة يعني متندمة ع سوته بيه

تذكرت ايامي وياهه اول ما اجت عود تخطبني بس هيه لا اجت ترزلني ورادت ابتعد عن حمدان ولو ماخذة كلامها بذيج اللحظة جان احسن الي والله وجان كل هذا ماصار الي .

حضرت الجهال وانين ساعدتني .. طلعنا العصر من كركوك وصلنا بالليل لبغداد ورحنه لبيت خالو وهناك استقبلونا واني تعبت بالطريق حيل قررت ابقى يوم ثاني اروح لبيت الشيخ بس احمد راح ويه ولد خالو

يوم الثاني من الصبح كعدت واني وانين لبسنا للجهال ملابسهم واخذنا ابن خالي وويانه مرة خالي همينه

ومرة عمي ابو سالم خابرتها كتلها ترحين ردت لا رحت اول يوم ماروح بعد

ورحنه للقصر صار كومة مجاية اله ، فتت واحس صوت عمتي يرن بأذني لمن تصيح عليه وتكولي مخبلة زدت بالبجي شكد قصيرة الحياة واحنه خابصين روحنه عليها

ياريت هم دايمة النا ... ماتدوم اله لباريها ..

ظليت اتلفت اريد اشوف بس هو وين اكيد بالديوان والناس كوومة وبكل مكان وفاتحة كولش ثگيلة

دخلت وجان صوت البجي والعياط يررن بالبيت كله وكدرت اميز صوت بلقيس وهيه تبجي وتلووم
يمه بعدوووني عنج يمممه سوودة عليه يمممه مامتي على ايدي يمممه مامتي على ادين ولدج متي على ادين الغربة

هزيت راسي بعدم رضى ، الغريبة التحجي عنها مثل السمچ مأكول مذمووم نيالها موج على قوة التحمل العدها

دخلت قبل انين ومرة خالي وراية ، اني جنت ملثمة وجهي محد عرفني وجانت الملا تقرا والبنات يوزعن مي سمعت صوت يمي وبلهفة داااانيال حبيبي ويامنووو اجيت

التفت شفتها ريلام مخليه الصينية بالكاع وجانت مدنكة على دانيال تبووس بي

ضربتها على كتفتها وبدون ماشيل اللثمة مالة الشال من على وجهي

هي باوعتلي صحتها باسمها عرفتني كالت اسمي بلهفة وصوتها مبحوح من البجي فررررح ..

حضنتها وصرنا نبجي اثنينااااا بقهر وحركة راح يصير سنة ماشفنا بعض بس لمن علي رجع تليفوني خابرتها وتواصلت وياها ..

كالت مجنت اريد التقي بيج بهيج وضع والله قهر بيبي ماتت فرح والله هيه جانت حنينة عليه وتحبني

تمتمت وفوتت ايدي مسحت دموعي الله يرحمها .. وراية دخلت انين ومرة خالي وسلموا

واني رحت ادور على موج شفتها ماعدة قريب ع الملا وتبجي بصوت مسموع

حضنتها حييييل وهيه باوعت وعيونها كلها دموع معرفتني ظلت صافنة عليه همست يم اذنها اني فرح .. مووج اني فرح

حضنتني وظلت تبجي بصوت مسموووع اكثر وتحجيلي عليها والي صار بيها قبل متموت وشون جانت توصي وشون رادت ابريها الذمة وتحجي بقهر
ورجاء ابريها الذمة فرررح ابريهااا فدووووة والله هيه طيبة وقلبها اطيب والله ..

ظليت امسح دموعي واهز براسي .. وساكتة ماعرف شنوو احجي ضاع كل الكلام والحجي من حلكي وظليت بس ابجي ..

بقيت كاعدة يمها والملا تقرا استغربت موج شكد حزنانة عليها ومقهورة وتبجي ، اني صح بجيت بس بسرعة سكتت بس هيه موج حيل متأثرة

يمكن هالاشهر هاي الي بقت يمها شافت وجه ثاني الها اني مشايفته وهيه موج بطيبتها كسبتها

تذكرت من علي قارني بموج وكال حسها ماينسمع وتذكرت قبل لمن جانت تكولي هديني على عيالج سايكين عليج وهواي منطتهم مجال لعد هسه بلقيس مو تحجي عليها اشو مابرزت عضلاتها عليهم خلي تهدأ واستجوبها ..

لهيب...

لمن شفت التقرير انصدمت صدمة عمري وكرهت نفسي شكد جنت غبي وليش مافكرت بهذا الشي من قبل

تذكرت توسلاتها وهيه تكول والله محد لازمني بس ماعرف ليش ماكو عذرية

اباوع للتقرير مال الدكتورة كاتبته بمستشفى الولادة يثبت انو هيه غشائها مطاطي وتمزق اثناء الولادة

احتاريت شنو اسوي ، ضميته ورجعت للبيت شفتها لازمة ديما وتلعب بيها وتضحك

لا اراديا رحت كعدت يمها حضنتها من ورى وبستها بخدها وركبتها

هيه وخرتني منها بسرعة وبقت عين عليه وعين على اخوها وترسلي نظرات تحذيرية بعيونها

وصكت اسنانها وتكولي عيب لهيب كدام علاوي ترة يفتهم ..

تقربت يم اذنها همست الها هداوي احبج ولج احبببج ..

ظلت تباوعلي باستغراب .. والله مدافهم عليك اشو طلعت وطبيت متخبل عليه متوازي شبيك

ضحكت وكرصتها من خدها لا حبيبتي ليش اطلع وحدي لو ويه جماعتي الهتليه اطلع ويه عائلتي احسن وكومي هسه حضري ديمه وعلاوي نطلع نتعشى وبعدين نروح لبيت اهلي لان الحجية تعبانة خطية ..

بعدها ممقتنعة بكلامي تباوعلي نظرات ماتتفسر وكامت اخذت ديمه واخوها واني ظليت افكر شلون امهد الها الموضوع واشرحلها وهم عاجبني اسويلها مفاجئة حلوة تستاهل تعبت وياي ..

هي خطيه ما صدكت راحت تركض وهي تصيح...ولك علاوي الحك بدل ترى لهيب مزاجه يتغير بالثواني لا انوب تروح علينه الطلعه واصير مثل الي لا حضت برجيلها ولا اخذت سيد علي...

راح علي يركض وراها وهي شايله ديمه ضحكت عليها من گلبي احس بسعاده وفرحه مو لان التقرير اثبت هل شي لان هذا دليل براءة هدى...هذا الشي الصالحها مو الصالحي

شويه وطلعت لابسه تنوره سوده وتشيرت اسوود وشال اسود كلش حلو ونازك

قلصت عيوني باستغراب...هديوه صايره عندها ملابس،وتتانق وتلبس هاي منين تجيب شو هي لا تطلع لا تطب بس لا تشتري خدمة توصيل ...

لو تشتري من هاي جيرانه بالقسط والله هدوه كلشي تسوي من وراي بس يالله ميخالف المهم تبذه نفسها وترضيها..

واني اكول فلوسي مخلصه اثاري هديوه لاكيتلها سوك تجاري بصفي وتشتري وترجع ليوره...

اني هم رحت بدلت وكملت واخذتهم وطلعت جانوا حييل فرحانين واني كل شويه معدل الياخه ومتباهي بنفسي

حلو والله واحد من يحس نفسه مسؤول عن عائلة ومدللهم وممقصر وياهم يحس نفسه رئيس دوله وباذل جهده حتى يسعد شعبه..

حسيت نفسي اليوم خليفه ابن زايد وهديوه اليوم الامارات وهيج مدلله...

ضحكت على تفكيري اووف لو تدري هديوه وتدري اني حاس مدللها جان طلعت اللسانها الي اطول من برج خليفه وضلت تعد وتسفط...

اخذتهم للالعاب هدى هي واخوها خطيه فاقدين لهذا الشي فرحانين وهدى رجعت عبالك طفله تلعب بكل اللعاب ..

واني صرت ميري الهم شايل ديمه وافتر وراهم وافعل الكارت وادفع فلوس...

بعدها علاوي راد يرسم على وجهه عند الرسام ما خليت هالشي بنفسه رسمو على وجهها وعلى وجهه ديمه...

وانوب اخذت عشيتهم بالمطعم واشتريت الهم شعر بنات وهم مكيفين ياكلوون براس الزوج ...

تنهدت لا ليش زوج هم عائلتي من اشوف الفرحه بعيونهم افرح تلقائيا...ربي يسعدهم..

نام علاوي بالسياره هو وديمه واني استغليت الفرصه كل شويه وتسللت ايدي على رجل هدى او خصرها..

وهي كل شويه وكمزت وصاحت...شبييك لهيب اخرفيت

باوعتلها بعتب ...طاح حضج وجهه رومانسيه انتي

سكتت رجعت لزمت ايدها وبستها ضليت لازم ايدها وهي مستغربه مني ولو هو اني مستغرب من نفسي شهالحنان العندي وين جنت ضامه...

بس لا هذا هو اني لازم ارجع ويه هدى مثل اي زوجين واعوضها عن ايام الحرمان الي صارت من قبل...

وصلنه البيت ابوي دخلت هدى وهي شايله ديمه واني شلت علاوي لان ناموو بالسياره...

وللاسف بعدها توفت الحجية وانشغلت بالعزاء مالتها ...

ريلام ...

جان المفروض يجي يخطبني مهيب بس الي صار ابد مو بالحسبان يوم ثاني صحينه على وفاة بيبي خطية ..

جنت طالعة برة المطبخ دااخلي كاسات المي السفري بالحاويه وشفته اجه ، لابس دشداشة سودة ولاف الغترة على ركبته تقرب مني وكال بقيه بحياتج ..

جاوبته مرتبكة .. بقية بحياتك انته حياتك الباقية ...

كال شفتي الحظ جنت ناوي اجيب حبوبتي وابوي واجي اخطبج والله جنت اتمنى تحضر عرسنا ريلام راحت

بلعت ريگ وغصة ومديت ايدي مسحت دمعتي الله يرحمها اني همين والله جنت اتمنى تبقى موجودة ع الاقل تأثر على أُمي حتى تقبل

هو قرب مني كال شوفي تنزفين لغيري هاي كطنة وشيليها من اذنج

اباوعله بحب وهو عيونه الحمرة بعيوني .. واسمع صوت هيام ورانا كالت شعندج طالعة امي دزتني اراقبج طبي لا اروح اكللهه

هو خزرها كاللها انجبي وفوتي جوة لا اجي اطيح حظج هسه

ردت لا تتجاوز ترة اخلي خطيبي يطيح حظك ..

هو تقرب منها هم روحه واني لزمته من ايده
وهو يحاجيهه بعصبية وخطيبج يدري بيج تفترين على بيوت المشعوذين والسحرة لوو لاء ؟ لو يحتاج اكله اني ؟

انزل لمستواج واصير ساقط وگ**د وترة عندي دليل عليج لا عبالج ما استخدمته ذيج المرة اكلي طن تبن وسدي حلگچ احسن

هيه وجهه شحب ودارت وجهه وطبت جووةة وهيه تتلفت وتبلعم

كتله واني اسحب بايده مهيب اتركهه عوفهه حباب الله يخليك تولي انت ماتدري بيها شسووي هسه تحتار شون تنتقم

كال لا تخليني اشك حلكها سكتتت الها هووواي كلش هوواي

فلتت ايده شفته معصب وحيعلى صووووته ويفضحنه كتله اني رايحة باي

سحبني من ايدي حيل وخزرني ووين موليه بعدني ماخلصت كلامي وين شاردة

كتله مووو وكتها موو وكتها دخييلك .....
وتركته وفتت ..

أنين ..

بعد خطوبتي جنت احاول اتقبل عمر .. صح حياتهم بسيطة حيل بس هذا كله مايهمني واتذكر المثل مدري شيكول اخذي اصيل ونامي ع الحصير ..

هو كلي فتحي فيس وراسليني منه انطاني حسابه ..
اني جنت حاذفته وهو نفس الحساب ماعندي غيره ..

لمن فتحته شفت رسالة من حسان كاتب "أنين"

انعصر قلبي عصرة احسها دمتني شمرت التليفون وبس اتنفس سريع مااعرف شنو جان يريد مني

جانت الرسالة قبل خطوبتي بأيام قليلة .. حذفت المسج ودست على قلبي ..

وتواصلت ويه عمر وتعرفت عليه اكثر .. بعدها صارت وفاة الحجية ، ترخصت منه ومن عمو الي هو ابوه وكتله اني حروح لبغداد عمة اختي توفت ..

هم مكالوا شي وعمو ابو حسين همات اجه للعزاء وسوى الواجب .

ولمن رحنه لفاتحة مرة ابوه شفته من بعيد لابس دشداشة سودة ولاف الغترة على راسه

بس هو ما اعتقد شافني لان اني بسرعة دنكت ودحست روحي بمرة خالي لان فرح راحت تركض جوة واني بيدي فطومة ..

فرح ..

تلث ايام الفاتحة اني ما شفت علي ابد .. جنه نروح ونجي ع القصر ما ابقى .. وما احتكيت باحد .. شفت اهل ختام بس هيه ما شفتها تعجبت ليش ..

بس تسمعت لكلام رنا اختها تتعذر من بلقيس وتكوللها اختي مسافرة عدها عملية سوت لخشمها عدها جيوب انفية

بس هيه جذب خو ماكو اسهل من الجيوب الانفية يسووها هنا بس هيه راحت تعدل خشمها وسمطته بعملية تجميل ..

بس لا عرفت اني وعلي مطلكين تركص بجفية والله فلك فلك ....

صعدنا اني وموج فوك .. سالتني عن انين كالت وينها ؟
جاوبتها مقبلت تجي وخليت الجهال يمها احسن بعد حتى لاتشوف حسان ترى والله هو حتى لو انه متلثمة هو يباوع ويدورها

كالت انتي سكتي فرح لاتخلين هالشي ابالها وكل شويه تجيبين سيرته ترى هيه مراهقة وتعلقت بي خلي تنساه هسه هيه مخطوبة

رديت عليها ما اجيب سيرته والله بس كدامج بس احس .اني هو يدورلها .

وبعدين تعاي تذكرين بداية زواجي تكوليلي سايكين عليج عيالج اشو هسه بلقيس تعد وتصف ماتحجين وياها

حكت راسها فرح شبيج اني جنت اقصد حمدان وبعدين بلقيس اعرف شون اردها واسكتها وثقي لو شرار يعاملني نفس ما جان حمدان يعاملج لا اطيح حظه والله

ترى حمدان هواي استغلج وانتي جنتي ذايبة بحبه ترى ماكو مقارنة وبعدين صدك ماحاجيتي بلقيس وكتيلها بقية بحياتج

كتلها لاااع ماريد ...

ولج حرام لا تشيلين بكلبج هذا موت

مشايلة بكلبي بس خاف اعزيها وتفشلني ..

وعلي الدر ؟

ارتبكت .. بالتليفون عزيته اول يوم .. واريد اشوفه احاجي عمود الطلاق

نترت بيه موو وقتهه هسه فررح موو وقتها اجليها ..

بس ينطيني صورة لعقد الطلاق مراح يخسر .. هسه هو وينه ؟

مادري خلي اخابر شرار واسأله ..

هزيت راسي اعصر باديه اني لابسة جفوف سود .. عن لاتبين اثار الحرق .. بعدها مارايحة واني بيضة وهيه جوزي فاتح ووردي صاير فرق بينها وبين لون بشرتي ..

موج كالت لشرار فرح تريد تحجي ويه الشيخ وين تلكاه ..

ظلت تسمع اله وتباوعلي .. بعدها غلقت الخط
و كالت عشرة دقايق و نزليله للمكتب يكوول ..

.

اسگيني موعد
خل أشد حيلي و اگوم
خل اذب اسنيني و بفَيَك اشب

طبعي عنبر و اشتهيك
و لو طبعك بـالوصل نآگوط حب

.

ظليت اتنفس سريع وتوترت ، ظليت احك بوجهي ، موج لاحظت عليه توتري .. كتلها شبيج هيج تباوعين وحتى تفوتين وياي ..

كالت لاااا عيني لاااا شسوي رايحة وياج انوب يفشلني ويكول خلينه وحدنا معليه روحي وحدج ....

امداااج انتي اخت انتي هسه لو جايبة وياي دانيال يعجبني بالفزعة والله ...

عفتها وطلعت من غرفتها وخليت اللثام على وجهي ، مهتميت للكل لمن يباوعولي .. ماريد اشوف نظرات الشفقة بعيونهم ..

خلي يباوعولي بازدراء لان ما اشيل اللثام من على وجهي بس ماريد نظرات الاستعطاف ..

شفت ريلام شايلة صينية بيها جاي وجايه من يم الاستقبال .. حاجيتها كتلها خالج اجه ؟

هزت راسها وردت اي توة فات للمكتب .. هزيت راسي ورحت وكفت يم باب المكتب ، خليت ايدي على المسكة مالته وتذكرت كل المواجهات الصارت بيناتنا هنانه ..

من لمن جنت على ذمة اخوه وبعدها ارملة اخوه ووراها مرته ... الايام تمشي بسرعة مو طبيعية ابد

بعدت ايدي من على المسكة وطخيت الباب وسمعت صوته بعد كحة خفيفة وهو يكول تفضلي ..

فتحت الباب وفتت وكلت بهدوء،.. سلام عليكم شيخ شلونك والبقية بحياتك ..

بقى صافن على وجهي واني مخلية اللثام .. بعدها دنك راسه ع اوراق كدامه وهو يرد عليه سلامي ..

اهلا عزيزتي شلونج شخبارج الجهال شلونهم .. ؟

عزيزتك !! حجيت بقلبي حلوو خوش شغل ..

كتله بهدوء .. الحمدلله اني يا شيخ اريد اتناقش وياك بموضوع طلاقنا مايصير هاي اشهر مرت واحنه على هذا الحال وبما انه اني اجيت لبغداد لو سمحت اريد صورة للعقد مالة الكلاق واريد اعرف شوكت نطلق بالمحكمة ..

خله ايده على جوانب كرسيه وكال والله غاليتي صورة عقد الطلاق بالشركة مو هنانه وانه توه دفنت امي ما الي خلك اروح محاكم

اي انته لا تتعب نفسك اني ارفع دعوة انت بس طلك حتى انت ترتاح واني ارتاح

كام من كرسيه واجه باتجاهي ، لزكت روحي بالحايط واني اباوعله بخوف ، ظليت اتحرك باتجاه الباب وهو اجه حصرني بجسمه الضخم

كال ام جاسم تريد تتزوج لوو شنوو المووضوع ..

ارتبكت كتله اتصنع الثبات ... اي اي شكو بيها قابل ما اعيش على ذكراك كلك مرحلة من حياتي تمر وانساها ..

رد ببرود هاا الف مبروك فرحتلج والله وبعد منوو سعيد الحظ ؟ يستاهلج لا ؟

ظليت اتنفس سريع ورجليه صارن يرجفن .. مديت ايدي للباب اريد افتحه واطلع هو خله ايده على ايدي وسحبها خفت منه مو حرام هلكد يتقرب مني واني طليقته!!!

ايد مقيد ايدي واللخ يريد يوخر اللثام عن وجهي جنت هادئة واحجي وياه بهدوء بس هو استفزني عطت بوجهه وخررر عني علي والزم حدوودك وووياي ..

وخر اللثام بعنف وكرص خدي وكال اي والله رجعت لبوتي تخرمش مرة ثانية وهيج انه تطمنت عليج ...

صكيت اسناني درت وجهي عنه والحايط احس راح اطلع منه على كد ما دحست روحي بي وهو محاصرني ..

خله ايده على وجهي ودارني عليه اجت عيني بعينه
بلع ريك كال خليني اشوف انه اريد اتعذب ..

دفعته وانهاريت وكعدت بالكاع ابجي .....

بعد اسبوع من وفاة الحجية ، اني ابقى ابيت خالي .. وهو وعدني ياخذني ازور قبر بنتي .. خليت ابن خالي يوصلني للقصر مالتهم ..

وصلني وراح واني فتت جوة الحراس فتحولي الباب ..

توجهت رأساً لمكتبه .. طخيت الباب واجاني صوته يسمح للطارق بالدخول

بس مجان وحده سمعت صوت انثوي يمه ..

وصوت مو غريب عليه ..

فتحت الباب واشوفها كاعدة يمه !!!

يتبع ...

منوووو 😬😮😮😮 ؟!

بنات خاف متعرفون ترى اقتربنا من النهاية ...