رواية هذيانٌ بين جمرٍ وجليد ..(ارملة اخي المجنونة) الفصل السادس والعشرون 26 - بقلم نورا ناصر

السلام عليكم
رواية هذيان بين جمر وجليد
بارت ٢١
نورا ناصر

_أنطفئت وأنخمدت نيراني بألـم السنين حتى أصبحتُ كالجليـد ولكن جمـرك أذابني و كـنت شراراً من نـار
أشعلتني مجـدداً حتـى أصبحت كـتلة من نـار بسـببك أحـرق كـل من يقترب منـي ولكـنك الوحيـد الذي بوجودهِ أزداد وتزداد شرار نيراني
_ أنتي أمواجي الهابـة عكـس الريح التي تعصف وتدمـر بقاياً حصوني
التي صنعتها سنـوات عِجـاف حتى لا تتهـدم وأبقى قوياً
ولكـن كـنتي أنتي هي الرياح التي أتت بعكـس السفينه وهدمتنـي
من جديـد بأمواج حبكِ وهـكذا تعادلنا
_ كيف تعادلنا
_ أنتي أمـواجي وأنـا شـراركِ...
بقلم الكاتبة hoha17

******

قيدني بقووة جانت عيوني بعيووونه التصاقي بي خلاني احس بحرارة جسمه الي تحولت لجسمي والهبته ، خلت شراييني واوردتي تتحول
الى بركان من الحرارة . وانفاسيى انترست بريحة دخانه وعطره الرجولي .

ملامحي متعصبة واني اباوع لوجهه برفض من قربه
واحس بخطر .. بعدت نظري منه ، وظليت احوس اريده يعوفني واصيح عليه بصوت مبحوح من الخوف والحيرة ..

_ اتركني لهيب اتركني ..
هو كلما اتحرك يشدني اله ويلزمني بقووة اكثر ويثبتني على صدره ..

ظل يهزني حيل وهو مقيدني ..
ليش اتركج هااا ليش مو المفروض انتي مرتي واني زوجج وطبيعي يصير بيننا تقارب انتي من شنو خايفة هاي سنة الحياة !

رجعت باوعت لعيونه وجان وجهه قريب مني واني اتنفس بصعوبة ، انفاسي تلفح وجهه واحسه يتلذذ باستنشاقها وتزيد رغبته اكثر .

رديت عليه وحروفي مبعثرة : انته انته مو كلت لبيبي ميصير تتقربلي! يعتبر اغتصاب ! ليش مدتلتزم بكلامك وينها ثقافتك الغربية الي صارعنا بيها!

ضحك ضحكة قصيرة بسخرية وكال
_ هه هم عبرت عليج هاي! جنت ناصب بيها على بيبيتي وانت يا ام عقل الفارغ صدكتيها .. اذا تردين تمشين على الثقافة الاوربية العذرية لحد الان عار بالنسبه الهم

رديت : اي مو ساقطين وكو*** اني مرة عراقية وخلي ثقافتك الغربيه الك واصفى على راي مو كلساع راي ترة دخت منك .

رد برفض : معليج بأرائي وهسه اريدج اعتقد من حقي موو؟
ورفع تك حاجبه ..

هزيت روحي احاول ابعد منه من دون فايدة ..
صكيت اسناني وحاجيته : ماريد ماريدك لهيب اتركني لهيب اتررك .

قربني منه اكثر وشفتي بعد شويه تطخ بشفته حسيته يقاوم رغبة قوية بالتهامها .
كال وهو مخنزر عيونه : ليش بعدج تحبييينه مو احجي لاتستحين اصدقاء احنه....

غمضت عيوني وحركت راسي برفض
لاء مااحبه مااااحبه ترة هواي لحيييت هوواي .

بأنفاس مخطووفة وسريعة سأل : ليش لان خذلج ؟؟؟
ماوكف وياج ؟ لمن ابوج انطاج الي!

اتسعت نظراتي واني اباوعله ، ديحاول يستفزززني
_ لااتحاول تفسر الامور على هواك لااتحاول
ومديت اصابعي القريبة من صدره وخرمشته ..

انصدم وتفاجئ من تصرفي .. باوعلي بغضب .
ودنك باوع لصدره ولمكان اضافري الي خدشت بشرته ..
ورجع باوعلي بوعيد ..
هز راسه مثل الي يهدد ، عض شفته بقسوة
وهمس بسيطة ام خدود

مددني على السرير وخلى راسي على المخدة
كرص خدودي حيييل باديه . توجعت وعطت ، انتفضت وتبعثر شعري ..

رفعت رجليه وظليت اضربه ببطنه..
هبط عليه خله اديه جوه راسي ورفع وجهي اله
غمض عيونه والتهم شفايفي بنهم ....

ظليت اضرب على زنوده اريد يتركني بس هو ماتركني بدون مايطلق سراح شفايفي لزم اديه الثايرة ضده والمعترضة على افعاله وثبتهم فوك راسي بقوة اذتني وحسيت راح يخلعهم .

ترك شفايفي شهكت وهو باوعلي ثواني برغبة وتفحص يتفحص الاثار الي تركها على شفايفي ..
ثبت اديه بيد وحدة والايد الخ ، عضني من خدي
و بدا يجردني من ملابسي
وشفايفه تثبت ملكيته على رقبتي ومرة يصعد لخدي ويطبع عليها اثار عنفه .

غمضت عيوني بضعف وخوف ، ووجع قاسي يخترق قلبي ويخلف بيه ثقب عملاق من الالم ، الم سببه
الكلام الواكف بين حنجرتي ولساني وماكدر انطق بي .

شهكت وانهاريت بالبجي ، وصرت اشهك بصوت عالي
اخترق جدران الغرفة وهزها باصدائه ، حسيته وكف كل شي ، خله راسه على صدري ثواني
ورفعه .

ظل يباوعلي بشفقة كرهتها ، اعرف دموعي نقطة ضعفه .. تركني عدلت روحي واني ارجف ولميت روحي بقلق وخوف واباوعله نزل من السرير .

كمت بسرعة لبست ملابسي ودااطلع من الغرفة
لزمني وشمرني على السرير وتقرب مني
وكال بعصبية
ابقي هنا اني الي راح اطلع ..

هزيت راسي ولازمة دلعة البدي بيديه الاثنين واباوعله متوترة ..
ميل روحه عليه وعيونه بعيوني ..
كال بنبرة تهديد لا عبالج غشيم اني حاس متقرب منج البارحة بس انت ساكتة وضامة شي ..

هزيت راسي بقووة .. وبرفض ..
لزمني وثبت راسي : بس هذا سكوتج مو بصالحج
راح يعم عليج وانت الندمانة .

غمضت عيوني ونزلت دموووعي .. طلع هو واني كملتها بجي .. احس دموعي راح تنشف وعذاب قلبي
مايخلص ، شسوي ياربي !

سمعت صوت تليفونه يررن تجاهلته بس ظل يلح
كمت من مكاني ورحت شفته مخلي على ميز التواليت .. رفعته شفت المتصل ع هاء ..
ظليت افكر معقولة عهود ؟

باوعت للرقم اي والله نفس رقمها صح ماحافظته بس اعرف اخر رقمين!

غمضت عيوني وصكيت على اسناني بقوووة
مديت ايدي ورفعت خط وجاوبتها اجاني صوتها
بدلع وهيه ترد وتكول الووو !

تنفست بعمق واحس الم ببطني ويه جرة النفس الي ماطلع زين بسبب غصة استعمرت كل اجزائي .
جاوبتها : انتي متعودة تتصلين بي هيج وقت؟

جاوبت بدلال : هلا بهداوي بنت عمتو شلونج حبي ؟

_ جاوبي سألتج ...

_ لج شسويله هو ميشبع من سوالفي يتخبل عليه مبين عليج ممداريته !

_ يارخيصة ؟ ولج عيب عليج احترمي شيبات ابوج ترة لهيب ميباوع لأمثالج يمكن يتسلى بيج اي
بس عمرج مراح تصيرين اله غير انج للتسلية وبس!

كالت وانتي شنو ؟ خدامة اله موو؟ نسيتي نفسج من جنتي تغرين عمار اخوية وخليتي يحبج !

خدامة شريفة احسن منج
جذبتي الجذبة وصدكتيها مو ؟؟ لمن كتيله اني وعمار اخوج عدنه علاقة تطعنين بيه من وراي حتى عمود شنو ؟ يظل يريدج! ولج تحلمين مجرد حلم! انت حتظلين رخيصة ويجي يوم مو ينطعن بشرفج لا وانما تنفضحين لان ممحتاجة طعن لان انتي اصلا ساقطة

ظلت تضحك ليش ظل يشك بيج ؟

سديته بوجهه تمنيت اكسر التليفون بس مو تليفوني مالته ، سفطته على الميز واحس قلبي مكسر لأجزاء مو بس مكسور ، اخذت قلم الحمرة من الجرارة وخرت المفرش مال الميز ورسمت عليه قلب مكسور وكعدت ابجي .

سمعت الفون يررن كمت شفتها عهود تتصل بي شكد حقيرة وصلفة مالي خلكها ابد جان لاهلها وفضحتها
بس اني واكعة بهمي هسه مالي واهس لأي شي .

اخذت التليفون وطلعت من الغرفة ادور عليه
دورت بالصالة ماشفته ، فتت على الممر مال الغرف
شفت مهيب طالع من غرفته باوعلي وابتسم
كال ها هداوي تدورين على رجلج مو ؟

تصنعت الابتسامة ودنكت متوترة وهزيت راسي بخجل
هو كال تلكينه بغرفتي .

همست شكرا .. ورحت لغرفته فتحت الباب شفته متمدد على سرير مهيب ، اديه جوه راسه
وصافن على السكف .

حس بوجودي ، رفع راسه يباوعلي باستغراب وتساؤؤل
تقدمت كم خطوة وصرت يمه ، شمرت تليفونه على صدره ونترت بحدة هاك هاي جاي تخابرك حاجيها راح تموووت .

وطلعت بسرعة وكوة اتنفس ماعرف ليش سويت هيج انتقمت منه مني مااعرف بس احس الم قوي ينهش بيه .

رجعت للغرفة وكفت كبال المراية واحاول التقط انفاسي ، باوعت لرقبتي كلها اثار بنفسجية خليت ايدي عليها امسحها بقووة وابجي بقهر وحرقة .

فرح ...

اباوع لموج شون تجمع اغراضي وتلملم ملابسي وحاجياتي ، نزلت دمعة يتيمة على خدي مسحتها
وتذكرت قبل سنتين ونص لمن اجيت عروسة هنا فرحانة تزوجت حبيبي اخذني رغم انوف الكل
لكن شون صدمة انصدمتها بليلة العرس خلت الخوف مسيطر على كل ايامي االباقية .

كل عروسة تخاف من ليلة العرس بس تخلي املها بزوجها يعاملها انثى رقيقة يقدر خوفها كونها تجربتها الاولى .

واني كنت حالة خاصة بسبب نوبة الهلع الي تنتابني لمن احس نفسي راح اتأذى ، هو ماقدر هذا الشي
رغم اني كتله عندي مرض الصرع واخاف ..

جنت ابجي واحاول ابعده عني اريد ينطيني فرصة
بس هو جان عصبي ومتوتر ويريد بس يخلص .
عبالك حيحصل جائزة . جانت اسوء ليلة بحياتي
بقيت في حالة اغماء لمدة ساعات وهو ولا على باله
اخذني اثناء اغمائي ولا اهتم الي ابد .

بعدها صارت العلاقة الزوجية بالنسبة الي كابوس
وهو ماحاول يصلح غلطه ابد ولا تحملني بالعكس .
راح وتزوج عليه بالسر واني كل ظني يحبني وصابر عليه .

هه ضحكت على غبائي فعلا مجنونة اني مرة اضحك مرة ابجي ، تنفست الصعداء من شفت موج خلصت .
نزلنه جوه وشفت السعلوات تمنيت اكلهن باسناني اكل بس كل قوة مابيه .

وانقهرت على حالي لان لساني ثكيل ماكدر اعاركهن خاف يتشمتن بيه بس همزين موج ماقصرت وياهن بعد عمري..

خابرت الشيخ واجاني صوته باستعجال ..
سكتت لحظة شبي مستعجل ؟ معقولة كاعد يم ختام! بالمكتب اي يمكن صارله جم يوم ماشايفها اكيد يستعجلني حتى يكمل حجي وياهه .

واني صافنة وافكر اجاني صوته : راح تحجين لو لا ؟ احجي فرح شمحتاجة ؟؟

جاوبته : ها ءء ا اني ترة رايحة لبيت اهلي انته مو عدتني اروح وتخليني على راحتي ..
ويه ما اني دا احجي حسيته جر نفس و زفره .

قاطعني : ها بدينا ؟ راح تسحبين اقسام وتبدين ترمين صلي مو ؟ بويه افتهمنا افتهمنا روحي وين تردين تروحين روحي وديري بالج على ابنج وعلى نفسج همين واي شي تحتاجينه انه حاضر .

حجيت بسرعة لا ان شاءالله ما احتاجك ،ءء اقصد ما احتاج شي وانته اكيد موجود وما تقصر يعني اذا احتاجيت شي .

كال بتكبر ... اي هم زين .

رديت همزين شنو ؟

كال : زين تلاحكتي روحج كبل لا تجفصين ..

حسيت فشلت خاف يغير رأيه ويعاند ويكول ابقي جاوبته بلكئ : هااا شيخ لا لا بالعكس اني دوم بحاجتك بعد ربي وادري بيك ماتقصر...

رد بسخرية : هاااا ولج انتي بلوووى مو لبوووة شبساع فريتيها عليه .. ‏دومج راسج يابس ورافعه ومبسطه بكبريائج وكاعده‏ .

رديت بتحدي : ايييي طبعا اني انسانه اهم شيء عندي كرامتي وكبريائي ومدام الله موجود ان شاء الله ما احتاج اي واحد..

رد بغرور...بس ينرادلج خيال ياااا أم جاسم ..

جاوبت بصدمة ...ام جاسم شنووو عفيه شيخ دا احس نفسي امك لا دكول ام جاسم كول ام داني .

رد : لا والله امداج امداني شنو هسه انت غلستي ع الخيال انتبهتي ع الغمة .
هسه هم الوادم تسمعني تكول شماله الشيخ يغم بروحه خلينه على ام جاسم احسن .

ءءء دا اجاوب بتر كلامي ..
وهسه عوفينه من هذا الكلام وهل الاسامي المابيهن بركة وين ما تردين الله ومحمد وعلي وياج واذا تردين السايق يوصلج لأي مكان تردين ، بس ديري بالج على وليدنه وديري بالج كون اريدنج نچرة ما تتقشمرين وتدرين بالج على نفسج .

وكمل بهدوء : اكو ايه قرانية تكول ..وامرهم شورى بينهم .. اليصير وياج شيريني بي اعتبريني ابووج اخووج عمج اذا تردين تعتبريني ابو ابنج الي يحلالج .
وان شاء الله انه سيف ودركه بوجه كل واحد يغثج

حسيت فشلت من كلامه تشكرت منه وسديت المكالمة ومشاعر مختلطه تلاحقني يالله احسه مو راحه وكلامه مبطن احس عنده غاية .

موج كالت شكوو شبيج ؟ شبي الشيخ ؟
رديت بلعثمة : ها ماكو بس هالايام مسميني ام جاسم تذكرت جيرانه ام جاسم تبيع مخضر ومره صارت بالرشاشات من وراها عمود كيلو طماطه تتذكرين مو وضحكت .
ظلت تفر بيدها واني صفنت ..

موج ..

دخلت بالسيارة ويا شرار وكعدت ورة وتعبت ريحته بانفاسي ، كوة عليه تحملت ..
مشاعر مختلفة اجتاحتني مرة احس بيأس مرة احس مقيدة بأغلال مشاعر ثقيلة على قلبي وروحي اتمنى انتزعها بكل قوة ، اتمنى اثقب قلبي واخلي هالاحاسيس تمر من خلاله .

اندار علينا كال شنو اني السايق مالجن وحدة منجن تكعد كدام يله .

جاوبته فرح اووو شرار اني بعد كعدت شيكومني مابيه بروحي تعبانة من وراكم ومن ورة اذيتكم .

جاوبها وعينه عليه واني اباوعله وانصي وادور وجهي وقلبي احس يريد يشرد من مكانه ويروح اله .
شنو شنو شمسويلج احنه قابل كاتلينج بصوندة ؟

لا حبسني اخوك بالسرداب مال موتى وانجلطت مو دكتور انته ما تلاحظ ..

ضحك لابشرفج ..

اي اضحك اضحك شكو عليك ..

يحجي وياها وعينه عليه ، كلساع اخزره وادور وجهي ..

كال يله عاد انتي ماتجين تكعدين كدام تعاي ولج موت انتي كعدي .

خزرته وصكيت اسناني ، رفعت شعري ليفوك بعصبية ..

هو كال على كيفج لا يوكع شعرج وتصيرين كرعة ..

طخيت فرح بيدها كالت اووي شبيج وولج شبيج قربت منها وهمست يم اذنها سكتي حماج لا اشمر ابنج من الجامة هسه .

صيحت اووي وابني شعليه انتي ويا ..

همست لج يا مطية اني اختج منو اولى اني لو ابنج ؟

كالت بسرعة : روحي كعدي يمه وفضيها .

هو كال اي يله تعاي كعدي هنا ردي عني الوحشة والضوجة .

اي مو اني البيبي ستر مالتك يله اخي يله عيني ترة هواي ورانه شغل مفارغين حرك من رخصتك .
كلت هيج ودرت وجهي ..

هو اخذ داني من فرح وكعده يمه كدام
عاطت فرح لا شرار عليك الله جيبه لايوكع والله قلبي خلصان مابيه حيل بعد .

كال لعد وحدة منجن تكعد كدام ..

كالت فرح روحي كعدي كدام خلي يفكنه ..

عصبت : اكولج خلي حماج يوديج واني نازلة اخابر احمد يجي عليه .

فتحت الباب الي يمي هو نزل بسرعة وصرنا بمواجهة بعض ، درت وجهي منه بسرعة
صك اسنانه وكال صعدي ..

رفعت تك حاجب ورجعت صعدت يم فرح
ياربي شكد مكروه شرار مكرووه وكوة رجع داني لفرح وحرك السيارة وكلساع يباوعلي بالمراية واخزره ولا يتوب .

وصلنه للمستشفى ودخلت فرح للدكتور ودزوهه على الرنين وبقيت يم الطنطل اني وداني .

كلما اروح مكان يجي يمي ويسوي نفسه يلعب ابن اخوه ويكصني كص بنظراته ، حسيت رجليه حاملتني بصعوبة واني بحاجة يائسة للابتعاد عنه .

صكيت اسناني بقووة وكتله : ممكن توخر منانه وجودك بصراحة مزعج كلش .

ترة اني يم ابن اخويه مو يمج شكو دازعجج بالله ..

وابن اخوك عندي واني خالته لتنسى هالشي ..

ماتشوفين نفسج هواي متكبرة وانانية ومغرورة بنفس الوقت فكيها شويه وانطي فرصة

اندرت عليه كلي وصرت كدامه : والمن انطي فرصة بالله الك ؟

اي شكو بيها اني من وكعت عيني عليج عجبتيني شفت بيج معظم الصفات الي اريدها بالمرة .

وهذا الكلام هم كلته للروسية ؟ وتقشمرت بيك وقبلت تتزوجك !

ضحك : لا بصراحة بيني وبينج الكلام بما انهو راح نصير زوج وزوجة واكيد بيننا اسرار وكذا ، ترة الروسية هيه الي خطبتني مو اني .

غمضت عيوني بملل و جريت نفسي تمتمت يربي تافه وسخيف وقربه مني راح يسببلي شلل احس دمي صار بركان ويجري بيه ..

هو اخذ ايد داني وظل يبوس بيها ويلعبه وهو بيدي
انطيته دانيال وكتله خذه .

كال لا لا خلي بيدج .. وكمل بجدية
يعني ماكو امل ؟

لشنو ؟

يعني لاتغشمين نفسج صارلي ساعة شدا احجي ؟ اريد اتقدملج يعني شوفي بعد كم يوم من نتزوج واني اصير دكتور اطلع من غرفتي بهاي المستشفى اشوفج جاي هنا تنتظريني اخذج ونروح سوى للبيت فكري بيها هاي راح تصير مرة الدكتور شرار ..

بقهر جاوبته : ممستعدة اخلي اتزوجك واخلي حياتي تتعقد ..

وليش تتعقد كتلج اني منتهية علاقتي بمرتي ونتطلق قريبا جدا .. ثاني شي يالعكس حياتج مراح تتعقد رح تصير سهلة وبسيطة وانتي متزوجتني .

رديت بعناد : ماريد شلزكت انته كتلك اريد شخص اكون اني الاولى والاخيرة بحياته انته اكيد لمن اتزوجك مراح تكون ملكي لوحدي عندك ولد وامه موجوده واكيد بين فترة وفترة تروح تزورهم وماعرف شراح يصير بينكم اكثر .

ضحك هاي وين راح بالج انت تسوين من الحبة كبة
وشدعوة راح تلكين هيج واحد يابه ؟

اني هاي المواصفات الي اريدها واذا مالكيت مو فد مشكلة بالتالي اني سعيدة بحياتي مو بحاجة لرجال يكملني اني كاملة الحمدلله وعندي شغلي وداعيش منه واهلي موجودين الحمدلله .

وتبقين طول عمرج وحيدة ترة محد دايم لأحد ..

لأ اكيد ماراح ابقى هيج ما اعرف شمكتوبلي ..

دار وجهه حسيته ضاج ومل من اصراري بس اني فعلا تعبت من هذا الانجذاب ياريت لم يشوفني ثابتة على رأيّ يتركني ويغير رأيه حتى اكدر اني انساه .

طلعت فرح ورجعنا للبيت ، تعبت هي كوة دخلتها للبيت ورجعت اخذت داني من شرار باوعت لعيونه
شفت نظرة وداع ، ضجت حيل وتعبت لاول مرة احس نفسي ضعيفة .

فرح ..

انطوني موعد لنتيجة الرنين ورحنه للبيت بس اني خجلانة من بابا حيل شلون راح اواجهه يربي قويني والله خجلانة احط عيني بعينه خجلااانة .

وصلنه للبيت واني بس ترجف ، دخلت للبيت بمساعدة موج ودانيال بقى يم شرار ، بين ما اني فتتت .
شفت بابا بالصالة كاعد هو شافني جانت بعيونه نظرات عتب ، كوة وصلت اله حاولت استخدم كل قوتي واوصله واوكع يم رجلينه خليت راسي على ركبه .

بابا عنوان للطيبة والحنية ، عمري ماسمعت منه كلمة ولج ... ظليت ابوس بأيدي وابجي ماحجيت شي ولا طلبت السماح منه ماريده يسمع صوتي ويتعذب اكثر مما هو تعبان ومتعذب .

هو ظل مخلي ايده على راسي ويحجي
اني مازعلان منج بنتي بس خجلان من الشيخ الرجال مامقصر ويانه ووياج مايستاهل هيج تسوين . لاتبجين فرح عيونج الحلوة ماتستاهل بجي اني عصبت وتأذيت شويه وهذا هو بنتي ماريدج تبجين بس استفادي من اخطاءج ولا تكررينها ولا تستعجلين بنيتي .

هزيت راسي .. مرت ايام طلعت نتيجة الرنين
تضخم بالشريان الامامي للمخ والدكتور كال ضروري عملية قسطرة للمخ .

حمدت الله ودعيت يشفيني ، بهاي الفترة الصداع ماتركني ، عشت ع المسكنات ..
كاعدة بالصالة اجت انين بيدها تليفوني
كالت وهي تغمز ها فرح منو عرندس ؟ حبيبج ؟ صرتي تحبين مرة ثانية ! وحبيبج مسميته عرندس حتى لا نعرف ؟

كمت على حيلي متعصبة وموج تجر بملابسي تريدني اهدأ صرخت بوجهه طاح حظج ادبسز ولج شنو هالحجي منين متعلمته ، اخذت الفون منها وشمرته على القنفة .

باوعت لموج كتلها ولج هاي منين تعرف هالسوالف طايحة الحظ شوكت كبرت هاي ؟

كامت موج كالت ولج ردي على الرجال عيب عيب وعوفيها هاي قابل صغيرة ولج بالاعدادية هيه هسه ...

اخذت التليفون وانكطعت المكالمة كالت انين
شبيج شدعوة اخذتيني حاصل فاصل ! بعد والله اذا تأمرتي عليه وخليتي اشيل ابنج هذا ابو راس .

موج كلتلها ولج عيب تكولين عليه ابو راس رجال شكبره شكده .

هي جاوبته منيله رجال هو هلكدوته ..

جاوبته موج هو انت عليمن دتحجين ؟

جاوبتها على دانيال على منو يعني .

تلعثمت موج كالت ياا عبالي على عمه ..

شجاب عمه بالنص شبيج موج ؟

مدري شبيها موج كعدت ع القنفة وخلت اديها على وجهه وفركته وكالت ماكو شي غلسوا .

طبت خالة وبيدها طاوات ظلت تصيح علينا
الله اكبر عليجن ولجن دوختني اريد اخمد ماكدر من وراجن بس تتعاركن وتصيحن شوون وياجن شوون .

جاوبتها خالة شبيج هو انت يمته نايمة مو بالمطبخ دتطبخين صارلج كاعدة من الوحدة بالليل .

رفعت خالتي ايدها وجان تشمر الطاوة همزين ما اجت بوجهي جان سويت عملية لوجهي مو براسي وظلت تجيب مواعين من المطبخ وتشمر علينه واحنه كلنه دخلنه للغرف وكملنه عركتنا هناك بس بصوت ناصي .

تذكرت علي خابرني ومارديت شكد فشلة كله منها انين صيحت انين انين روحي جيبي تليفوني ظل ع القنفة .

اجت متخصرة لا تكولين انين كولي انو تعلمي من موج
ماحب هالاسم دخييلج فرح .

اووو انت من جابتج ماما ماتت وسماج بابا انين لأن .....

حسيت على موج تطخني ماتريدني اكمل وانين وجهه شحب ، كمت حضنتها عمري ولا يهمج وبستها
اكولج انوو ولتجيبين تليفوني اني اروح اجيبه حتى لو احصلي طاوة من خالة ميخالف .....

طلعت وعفتهن يربي لساني مال كص وكباب وتكة بس اجفص ...

اخذت تليفوني وخابرت الشيخ اجاني صوته ..
شلونج فرح ؟

ها زينة الحمدلله اسفة بس ماسمعت التليفون جان بعيد عني .

ميخالف المهم طلعت نتيجة الاشعة مالتج لو بعدهه ؟

اي طلعت ..

اي؟؟

عندي تمدد بالشريان الامامي للمخ وحسوي عملية قسطرة بعد شهر ان شاءالله ..

زين احنه جايين الكم العصر انه والحجية .

ها هلا بيكم كل الهلا .. ختمت المكالمة وخليت التليفون يربي حتجي امه وتسمعني كلام يسممم اكيد ..

العصر جابهه واجه دخلت سلمت عليهم هو جان يتابعني بنظراته القوية عبالك اله سنين ماشايفني
لا والله عبالك ماشايف مرة ....

انطيته دانيال وسلمت على الحجية وكعدت كبالهم
توي كاعدة كال اشوفج متحسنة الحمدلله ..

هزيت راسي بأي .. كال جيبي النتيجة مال الاشعة اصورها ادزها للدكتور خلي يشوفها هو حاليا مسافر ..

كمت جبتها وانطيتها اله اخذها عنده ، بس ضجت من تصرفه احسه يتملكني بكل شي وعبالك مسؤؤل عني .

الحجية كالت من ورة خشمها حتى من طلعتي لا كلتي رايحة لا شي ...

دنكت راسي وبابا جاوبها عذرينه حجيه ووجه كلامه الي ليش بابا ماكلتي هي هم مثل امج ..

سكتت وبداخلي تمتمت صح مملحكة على امي جنت طفلة بس هي شجابها على امي عمرها ماكانت مثل امي ابد .

الشيخ كال معذورة ام دانيال جانت تعبانة حجية ومن الطبيب لهنا والا هي مايفوتها هيج شي .

هي كالت اي شيخ صحيح بس انه والله روحي ملهوفة على هالوليد ودارت وجهه مني ..

كال : ان شاء الله يمته ماتردين اجيبج تشوفينه تدللين ..

جاوبته ماتقصر عساك دوم سالم ..

لمن رادوا يطلعون تبعتهم خالتي ولزمت علي الدر من ايده هو التفت عليها باهتمام
كالتله شيخ وين رايح ومخلي مرتك هنانه اخذها وياك بس تهومش وتعارك وتكتل بناتي .

سمعت ضحكته وجان اركض اطب جوه .. ليش هيج خالة ليش ..

موج ..

من يوم الي وقعت العقد سلام بعد ابد ماشفته بقيت بنفس القاعة واصلا ما انتقلنه بس هو كلي راح انقل الاجهزة القديمة ابيعها ، نقلها وبقت القاعة فارغة من محتوياتها .

البنات نصهن بطلن واني محتارة ظليت شكد حاولت اوصله ماكو ، اتصل بي ما احصله جهازه فد نوب مغلق .

رحنه اني واحمد وسالم للمنطقة الي كال بيتهم بيها
كومة سألنه عليه ماكو واحد يعرفه ..

ظليت ابجي بنص الشارع ومحتارة واحمد يلوم بيه وسالم يحجي عليه وخله ورجع كال لا تورطوني .

وكفنا اني واحمد بالشارع كال هيج تورطينا موج ؟ صدك جذب منج ؟

ظليت اعصر بأصابعي مابيدي شي راح يخلص الشهر واحنه متفقين ويا ابو العقد اول شهر ننطي من ربح القاعة بس اني لهسه ممطلعة الايجار البنات بطلن مبقى اله القليل كلش لان اجهزة ماكو بس على التمرينات الي اني انطيهه الهم .

جنت بالقاعة حتى احس رجليه مشلولة من القهر والتفكير ، اندكت الباب لبست جاكيتي وطلعت شفته اوس والولد الي وقعنه العقد وياه .

انصدمت بقيت واكفة اباوع عليهم كلت اتصنع القوة
_ نعم!!!

تقرب اوس مني بضحكته الاستفزازية وكال
نعم شنو شوكت توفين ديوننا او تنطينه ارباحنه من المشروع الي احنه شراكة بي .

احنه ؟؟ وانته شدخلك ؟

جاوب هه ترة هذا اخويه وفلوسه هيه فلوسي ترة مر شهرين وانتوا ممسددين ولا فلس وهيج راح تعرضين نفسج للخطر .

بلعت ريك همسته اخوك ؟ مستحيل ، روحوا لسلام اني معليه .

داافوت للقاعة سد عليه طريقي
كال سلام مختفي وانتي جزء من العقد وانت لازم تسددينه ..

هزيت راسي وهو خله ورقة بيدي وكال ٥٠ مليون ..!!!!

اخذت الورقة منه بعصبية وظليت اباوع للورقة واهز راسي بقوووة لالالالا ٥٠ مليون ؟ مو هيج اتفقنا ماجان هالمبلغ انتوا اكيد زورتوا .

زورنا شنو ؟ مو بعينج شفتي سلام اخذه من عدنا او بالاحرى احنه اثنينه سلمناكم المبلغ واكو شهود وموجودين بعد ليش هالانكار ؟

سكتتت لساني انشل ..

هو كمل كال كدامج يومين سددي المبلغ والا ..

بلعت ريك واباوعله بقووة : والا شنو ؟

تنسجنين .... اخذ اخوه وراح ..

جيت اوكع لزمت بالباب .. بعد يومين يعني بيوم عملية فرح ..

ياربي ارحمني شسوي شسسسوي!!!

راحن البنات كلهن بقيت وحدي بالقاعة ، ابجي ارجف محتارة منين ادبر المبلغ منين يا اللهي ..

طلعت تليفوني ورحت على حساب شرار رفعت الحظر عنه شفته منزل فديو فتحته لازم طفل ويبوس بي بحنية وحب .. وصوت ضحكة انثوية يمه ..

نزلت جوة على المنشور الي قبله لابس ملابس شتوية ووراه اجواء ومكان مبين مو بالعراق وكاتب
على البوست وصلنا لأرض الوطن والموقع من موسكو .

رجع لمرته ترك بداخلي ثقل كبير ما اكدر احمله وبالتالي رجع لأبنه ولمرته ماتحمل اكيد ، جان يلعب عليه ويضحك واني الغبية غبية حمارة انعجبت بي وانجرفت بمشاعري تجاهه .... وبأول مشكلة تعرضت الها رايحة اطلب مساعدة منه!

رجعت الحظر وسديت الفيس ..

يوم ثاني اجه ابو القاعة طالبني بالايجار منين اجيب مليون الايجار ياربي منين! ادبر المليون بس ال ٥٠ مليون شون راح ادبرها لو ابيع عمري مادبرهه .

ظليت امشي ضايعة وتايهة سيارة تمشي بصفي انفتحت الجامة اوس ، وكفت لا اراديا باوعلي ووكفها
كال ها دبرتيهم ؟

سكتت ماعندي اجابة ..

نزع نظاراته وكال عندي الج خوش حل ..

بقيت ساكتة واباوعله اريده يكمل كلامه .

كال تزوجيني واعتبري مهرج ويخلصج من دخول السجن شنو رأيج ؟

يتبع ..

😂هاي تصاميم للقصة صممتهم layal28ali

وتكول هذا الدب شرار 😂

متابعة لحساب الكاتبة لطفا 😘 GHNAM_