السلام عليكم
رواية هذيان بين جمر وجليد
الفصل السابع ..
************
مؤسفٌ لقلبٍ غرقَ في هواك ..
أن تجرفهُ إتهامات الهذيان الى وادي الجنون
أَودعتني من بين ثنايا الحياة ألمٌ
ولُجمتُ.. بسيل دمائِكَ المغدورةِ..
تمزقت حناجري تحتَ ظُلمهم...
ولازِلتُ أغدوا لنيل حق دمائكَ المسفوكةِ..
أيا راحِلٌ أرقد بسلامٍ في حجركَ...
ودع هذيان الجمر يحرق احشائي بهداوةٍ
بقلم .. #حفصه_الهاشمي HafsaHafsa710
********
موج .. اني بسرعة كعدت يمها على الكاع طوقت كتفها بيدي اليمين درت وجهه وخليت ايدي على حلكها كتمته وظليت اهمس بإذنها : سكتي حبابة لخاطر بابا شكتلج اني شكتلج خطية وراه عملية .
هي سكتتت بس تحصر بأصابعها حيل ..
والشيخ يباوعلها بنظرات فاهمها ...
كمت على حيلي وباوعت للشيخ جان بصفه كاعد شرار
كتله عمو من رخصتك اختي مريضة حيل ومحتاجه مداراه هالفترة ولازم اكون قريبة منها اني .
كال اي ابقي هنانه يمها وين المشكلة اعتبري نفسج ابيتج .
لا عمو ما اكدر ابقى هنانه اكثر ، منا بابا مريض ومنا اني هم عندي مسؤؤليات ثانية وشغل .
خلي تروح احنه ما جابرينها تبقى بس الطفل نريده بيناتنه ثاني شي هي ما مؤهلة لتربيته وهي بهالوضع .
بابا كال شون حجي هذا شيخ ترى هو طفلهه وهي امه شنو يعني قابل تكدر تأذي ؟
جاوبه الشيخ انت مافهمت عليه ابو احمد انه ماكلت تأذي بس كلت مامؤهلة حتى تربي مثل ما احنه نريد نربي .
فرح....>حسيت نفسي راح احتنك بالكلام الي كابتته وماكدر اكول كززت على اسناني .
لزمت ايد بابا وكلتله خلص بابا هذا هو اني راح ابقى هنانه .
وكملت الكلام بقلبي : من اليوم اعلن تمردي على هذا البيت كله وعلى سكانه الاغبياء وراح اعلمهم فرح منو؟
يردون يظلموني ويسجنوني بس هم حيشوفون العكس مني مو يكولون عني مخبلة فعلا اني راح اعلن جنوني الرسمي ولا على المجنون حرج .
كمت على حيلي باوعت للشيخ من ورى النقاب
وحجيت : انتوا ردتوني ابقى هنانه وتحملوا النتيجة .
هو هز راسه بتفهم ونظراته كلها تحدي .
حضنت بابا وودعته واحمد حضني وبوس راسي
وراحوا واني صعدت ويه موج فوك كتلها ليش مرحتي وياهم ترى اني زينة مابيه شي ولازم اتعود وارضى بقضاء الله وقدره .
باوعتلي واحتضنت وجهي باديهه : لا عمري ابقى يمج بس الليلة وبيوم عملية بابا اروح وان شاءالله انت زينة .
هزيت راسي بأي ، رحت للكنتور فتحت باب الكنتور شفت ملابس حمدان ماكو ، صرخت .
هي اجت تهدأني ..
ولج وينهم وينهم ملابس حمدان منو اخذهم احجي موج احجي ؟
على كيفج فرووحة حياتي ملابس ميت مايصير تبقى موزين يكولون وانت عندج طفل اخذوهن تصدقوا بيهن .
وماخليتولي قطعة قطعتين اخليهم لدانيال من يكبر يلبسهم اشوفهم عليه ملابس ابو لو اشم ريحتهم من انام ومن اشتاقله ليش يا ظلام لييييش .
موج راحت للكنتور طلعت غترة كالت هاي موو اله ؟
احتفضي بيها ومدتها الي .
اخذتها بعنف وشمرتها على الكاع بقووة
وصيحت واني ابجي
ولج لااااااء مو مالته مو وووو مالته .
هي حارت شون تهديني راحت ضمت الغترة بالكنتور ويه ملابسي واني استسلمت لألامي وعذابي .
اجت كعدت يمي تمسح بدموعي وتبجي ويايه
فرح متدرين دانيال شلون يفرفرح من يشوفج خطية حني عليه صار شكد مماخذته لحضنج ممنومته ممنطيته ممته من ايدج ، حياتي الله عوضج هالطفل خطية والله يكسر الخاطر اخذي حضني ونومي يمج شوفي شون ترتاحين .
رفعت راسي اباوعلها بسخرية : هه ارتاح !!! منين تجي الراحة بس والله اني اعلمهم كلهم لا عبالهم هسه مات حمدان اصلا حمدان هم مجان يدافعلي اني متعودة ادااافع وحدي .
على كيفج ويه نفسج لاتضيعين حقج بلسانج فرررح حبابة .
شحدهم يضيعون حقي والله ميدرون شسوي والله اني كولشي اكدر اسووي .. عضيييت اصبعي حيل
هي طلعت اصبعي من حلكي .
انهاريت اني شششفتي علي شفتي ؟ شلون ساكت على كتال اخوه ولا يحجي ولج دا يدقني يددددق يموووتني يمووووتني بسكوووته .
ع عل على كيفج فرررح حتوكعين عمري على كيفج هوو غير ميدري منو كتله لو يدري ياخذ حقه والله هو هذا حماج حقاني .
لالا انجبي موج انجبي ولاتحجين حجي متعرفين علي كلش زين يدري منو كتل حمداان كلش زين بس هوو ساكت ساااكت اخخخخ .
فرح شون عرفتي يدري . لا تفتين من يمج ومن كيفج وتهمين بختج وتتهمينه .
عيووونه اعرفه من عيونه داااهية هذا داهية والله عرفته من نظراته يعرف كولشي بس ساكت ساااكت اخخ ليش تسكت ليش ؟
يسكت عن دم اخو مو من شيمه مستحيل فرح اهدي .
لا اكو شي ثاني ما اعرفه ولا زم اعرفه لاازززم
جابتلي العلاج شمرته على الكاع انفتحت العلبة وكع منها الحب وهي دنجت تلم بي .
واني اطرافي نملت واذني صار بيها صوت وشه ودوائر سود تكونت كبال عيوني عرفت راح تجيني نوبة صرع
انفاسي انخطفت خطف مني ثواني معدودة ماحسيت بنفسي بعد .
موج .. اجتهه نوبة صرع صارت اطرافها تهتز لمدة ثوني خليت بحلكها لعبة من العاب دانيال حتى لاتعض لسانها عرفتها تعبت .
بطنها فارغة وعلاج كوة تاخذه ... واليوم اصلا لا اكل ولا علاج .
متت قهر عليها يربي اختي تعذبت هواي ندمت لان اخذتها وياي للكلية وشافها حمدان .
هي جانت بالخامس الاعدادي وتخبل عليها هو معيد بالكلية .
عيونها وواسعة وبياضها ناصع وبشرتها تجنن صافية تعتني بيها ، شعرها اسود بلون عيونها ورموشها الكثيفة
جمالها العربي الأخاذ غافي بملامحها يجذب اي بشر يشوفها .
اووف ياريتني مااخذتج ويايه ولا خليته يشوفج بس كل شي مقسوم عليج يابعد عمري .
تحسرت واني اتذكر ، بيدي علبة الدوة الي وكع ع الكاع احسه تلوث بعد ماينفع .
وهي استسلمت للاغماء ونامت . واني ابجي ودموعي
توكع عليها واشهك ، غطيتها وبستها على راسها .
طلعتلي من ملابسها السودة قميص اسود وبنطرون هم اسود ، هي شوي مربربة مو ضعيفة ، ملابسها عريضة عليه ، لبست وخليت شال اسود على راسي ونزلت جوة ، اريد اطلع اجيبلها علاج واستحي منهم اكللهم .
نزلت بعدهم عدهم خطار وبيتهم هوسة ، طلعت من باب الكراج ودااطلع من البيت ، سمعت صوت ع الجامة مالة الشباك التفتت شفته شرار .
فتح الشباك كال وين عيني ام بنطرون ؟ ترى المضيف كدامج متروس زلم عيب ادخلي ماعدنه نسوان تطلع .
انصدمت من كلامه كتله ترى اني مو من نسوانكم اني خطار عدكم
قاطعني وين موليه
بصدمة جاوبته نعم ؟؟ انت ليش ماتحترم نفسك ترى مااشتغل عندك هيج تعاملني .
شكد عررررمة فوووتي جوة ولا تناقشين الي اكوله الج سوي بدون نقاش .
درتله ظهري هذا النقاش ويا عقيم ليش اجادل واخسر احترامي لنفسي .
توجهت للباب مال البيت الجبير وداطلع سمعته اجه وراي يصيح اوكفي اوكفي انطي عطوة خليني اللبس نعالي ع الاقل انت وين رايحة ؟ مو كتلج ماعدنه نسوان تطلع
رايحة اجيب علاج لاختي حضرة جنابك وللمرة الثانية اكولهه الك اني مو من نسوانكم
ان شاءالله تصيرين من نسوانه ليش لع ؟
كال هيج رافع حاجبه .
اما صدك مايستحي كلت اسم الله
ليش شبينه مانعجبج ؟
العفو ممكن تتركني اطلع
كتلج لاء ومدام انتي ابيتنه ماتطلعين من دون محرم لا الناس الي بالمنطقة يشوفوج طالعة من بيتنه وينتقدونه شكلك بيت الشيخ تطلع منهم نسوان وحدهه ومفرعة .
مفرعة شنو احترم نفسك
هو انت تسمينه هذا حجاب الي لابسته وعطوبج طالعة
تنهدت اللهم طولج ياروحي .. ظليت ادور شي اركعه براسه باوعت على سندانه كلش جبيرة تمنيت اتحول هالك الرجل الاخضر واشمرها عليه وافلش صماخه المصفح .
ظليت اباوعله باستهزاء زين هذا شون حيجيب مرته الروسية هنا يجيبها منقبة!!!
خاف مرته من الشيشان من هذول المتشددين كلش مو من روسيا جذب اشو كلش معقد . معقولة هذا متزوج روسية ؟
لا والله هذا يلاشيني ويلعب عليه هالطنطل هذا ابو خشم المربع ابو صماخ شكد مكروه خلي لا اطول ويا حجي هذا جذاب ومكار .
لعد روح انته جيب لاختي دوة واني راح اطب جوة ..
صدك جذب منج اطلعي اطلعي روحي جيبيلها دوة وهسه ادز وياج ابن اخوي .
لعد صارلك ساعة تهمبل شيسموها هايه بالله ليش ماخليتني اروح من الاول واخرتني.
اهمبل شنووو عيب بابا حافظي على الفاظج .
كلبت عيوني اللهم طولج ياروحي . هذا ناوي يجلطني .
وبعدين اني شكو اطيعه خلي يولي .
هو راح عود ديصيح لابن اخو ، فتحت الباب دااطلع صار بوجهي واحد .
والله من شكله مبين ملطلط بس شافني ابتسم وكال هلاووو .
تمتمت : اهلا بيك .
وسويتله مجال يفوت وطلعت هو كال موج مو ؟
التفتت عليه : انت منين تعرفني ؟
هه اعرفج اعرفج اصلا ليل نهار نايم ببروفايلج .
استغربت!!! بس ماحجيت والله راح يجلطوني واحد اغبى من الثاني خو ذاكه ابو راس قضية ثانية .
كال وين رايحة وحدج محتاجة شي اوصلج بسيارتي ؟
هزيت راسي بلاء " تسلم اني اروح " .
نظراته وصخه يربي ، شرار شكد غثيث ونذل وحيوان بس مو هيج نظراته ابد .
انوب وجهه املط مابي ولا شعراية لاشوارب لا لحية دربيلك كم شعرة استر على صخام وجهك شبيك
اووي عابت شعليه بي .
☆☆☆
مهيب ...
شفت ريلام بالحديقة طالعة تفر دانيال وتونسه
واني والله من اشوفها تتخربط اوضاعي وما ادري
شون اثبت الها حبي واطبق ملكيتي عليها .
ابستمت الها وهي هم ابتسمت ابتسامة بريئة ولطيفة .
اخذت ايد الطفل وخليتها على خدها
واني احجي وياه اكوله اضرب ريلي اضربها هاي المخبلة .
وارفع ايد دانيال وارجعها على خدها عود داضربها راشدي بيده الصغيرة الناعمة .
هي كالتله داني سوي تف لمهيب .
رفعت ايدي صفكتها راشدي بس بلا وعي مني اجاهه الراشدي قووي كلش .
رفعت وجهه الي وانترست عيونها دموع
رجفت شفايفها : ترى أذيتني مهيب شنو هاي دنشاااقة .
وكلبتها مناحة وبجي اريد اسكت بيها بس تبجي المطية ..
اخذت منها الطفل لان راح يوكع
وهي فاتت تكمل بجي .
باوعت لدانيال شفته مبرطم ويباوعلي كتله تففف عليك كله منك تعاركنه عود جاي نلعبك .
خليت اصبعي على شفايفه افك البرطومة مالته . وهو يباوع على البيت مكان ما فاتت ريلام .
ظليت احجي ويا : ها تريد تروحلها امك نمبر تو ريلام؟
خو انت كله عدهه يا كلب يا مطي نهار كله شايلتك ماتطيح من ايدهه ابد.
صرت احسدك ولك تخليك على صدرها وتبوس بيك وانت تجلب بملابسها وتنام على ريحتها .
واني لازم كفه الصغير وامسح راحة ايده بأبهامي
هو مرة يباوع لايدي ومرة ينتبه لصوتي ويتسمع
مادري يفهمني مادري لا.
بس حسيت براحة من حجيتله واخيرا تعرفت على شخص احجيله بدون ما يظل
يمسلت مثل شرار النذل.
يدري بيه احبها ويظل ياكل تبن مثل كل مرة ، اما هذا الطفل راح بس يسمع
وماراح يحجي .
ظليت اباوعله يباوعلي مستغرب رفعت حاجبي
كتله ها ولك ماترضى اتغزل بيها اطيح حظك اذا حطيت عينك عليها اذبحك خوش .
هو ابتسم ميعرف جاي اهدد بي ..
بوسته بخده شميت ريحته ، ريحتها لازكه بي
قربته اكثر الي وحضنته .
واني على هذا الحال شفت لهيب فايت من الباب
وشايل على ايده طفل يجي عمره اربع سنوات
او خمسة .
رحت يمه سألته : منو هذا ولك لهيب ؟
_ ما ادري لكيته بالشارع يبجي بس مبين تعبان بس شلته وكع .
_ وانت كبل دخلته ؟
_ اي غير كسر خاطري خطية .
_ خاف اهله بالشارع يردونه وهسه يدورون عليه
_ لك شبيك ماكو احد الشارع فارغ .
كال هيج وفوته جوه واني فتت وراه .
دخلنه للاستقبال كاعدين ابوي الشيخ وشرار واوس جاي يمنه خطار من شافو لهيب شايل الطفل كاموا على حيلهم ولهيب مدده على التخم وظل يشرح الهم شون شافه ووين لكاه .
كعد شرار بالكاع وظل يفحص الطفل ويجس نبضه
ابوي كال شرار هذا مو نفسه الولد الي جينه ندعمه كبل جم يوم ؟ الي جان ويه مرة زكي وكالت ابن صاحبتي !
شرار وهو يفحصه رد والله ما ادري ابو مهيب ما اتذكر بس هذا البوتاسيوم عنده هابط نبضاته سريعة وعنده اغماء لازم نودي للمستشفى يخلوله مغذي .
ابوي : انت خو فد نوب ذاكرتك ذاكرة سمجه كل شي ما تتذكر كوم ودي للمستشفى وانت مهيب خابر على زكي خلي يجي خلي نشوف موضوع الطفل هذا شنو ؟
ضحك شرار : والله مو بس ذاكرة سمجة ذاكرتي صايرة ذاكرة ذبانة على هالوضع الزفت هذا .
لهيب وهو يخلي ايده على كتف شرار
_ فكرك وبالك مو هنا عمي ارجع وياي لروسيا وهي تفض وترجع طبيعي .
شرار : عود يصير خير
كال هيج وشال الطفل وطلعوا من الاستقبال واوس ودع ابوي سلم عليه وطلعنا وراهم رحت وديت دانيال لعمتي ريلام ماشفتها ولهسه كلبي يعورني عليها لان ضربتها راشدي .
لزمت تليفوني وطلعت جهات الاتصال حتى اخابر جيرانه زكي.
واني بالكراج قريب منهم طبت موج ، شرار جان يخلي الولد بالسيارة تقرب منه اوس وهمس له
باع شرار اجت القنبلة ويقصد على موج .
طلع شرار من السيارة وحجه وياه بحدية
_ يله اوس فوت خلي نودي الطفل للمستشفى وانت امشي ويانه .
اوس جاوبه : لا شرار ما اتفقنه هيج احنه خلي واحد من الولد يودي الطفل وانت امشي وياي للمطعم .
_ دنجب اخوي توى ميت تريدني اروح للمطعم وانركل وهنا ناس جايه رايحة اكعد عاد اوس مو وكته هالحجي .
☆☆☆
موج .. مالكيت صيدلية رجعت مشي للبيت شفت شرار ومهيب واوس بالكراج يردون يطلعون ، هذا الاملط اوس يباوعلي نظرات اوصخ من حذاءه ومبتسم ابتسامة عود ديجذبني بيها .
تمنيت الكمه بوكس على عينه اطفيها اله حتى بعد لايباوع وبوكس على حلكه
اطشر سنونه واوزعهم على الحديقة حتى لايضحك بعد هيج .
لالا اني مو طبيعية شعور الرغبة باستخدام العنف متزايد عندي جنيت تخبلت بالفترة الي ظليت بيها هنانه .
خلي ابطل اخذ كورسات كونغفو احسن لا اسويلي مصيبة وانوب يفصلوني منين اجيب فلوس المرحوم ماخلى علينا فلس ، اخاف ياخذوني فصلية انوب بدل الفلوس .
داافوت طلع شرار من السيارة الورى لان خله ولد بيها ماعرفته منو وكف كبالي وتخصر وسد عليه الطريق .
كال ها حصلتي علاج لاختج لووو لاع ؟
جاوبت لااا ماحصلت ..
_ اي انت شكد عرمة و راسج يابس مو كتلج ابقي ادز وياج واحد من الولد حييل بيج وتستاهلين .
جاوبته متفاجأة : نعم ؟؟ ترى اني ما اخذ الاوامر من حضرتك خليها ابالك هايه . ولتتجاوز عليه احذرك ها .
_ لج بابا ممتجاوز ممتجاوز هايه حقيقتج .
اخخخ عصبببت منه حيل بس سيطرت على اعصابي قابل اني فرررح درتله ظهري دا ارووح ، تفاجئت من لزمني من كتفي .
التفتت عليه خزرته منو سمح لك تلزمني لا تعيدها عيب عليك .
ببرود ولهجة لا ابالية من ردة فعلي وهو يشعل الجكارة
وينفخ الدخان باتجاهي
_ انطينه اسم العلاج نجيبه ويانه بدربنه فد مرة .
بعصبية فتحت جنطتي وطلعت العلبة ومديتها اله اخذها وراح . مو طبيعي ابد ابد مستتتتفز.
فرح ... حسيت بلمسات ناعمة على وجهي تبعد شعري تخلي ورى اذني همست واني مغمضة 'حمدان'
فتحت عيوني شفت حالي متمددة على السرير اطرافي احس مخدرة عبالك مشلولة حسيت بشفقة على حالي .
شويه شويه رجعلي نظري شفت ريلام كاعدة يمي وهاللمسات الناعمة الها . انتبهت على عيونها حمر مبينه باجية .
كعدت وهس ساعدتني اكعد همست الها شبيج باجية ؟
انطتني كلاص مي ساعدتني اشرب .
وكالت ماكو شي بس دااتشاقة ويه مهيب وضربني راشدي .
بعصبية ضربج لو شنو ؟
لا عود ديشاقة بس هو شقاه ثكيل .
مهيب حيل يحبج .
ابتسمت هه ادري بس اني توجعت وضجت على نفسي وبجيت .
افهميني ريلام مهيب يحبج يحبج مو كأخت لا غيرها يحبج حبيبة ويتمناج زوجة .
فرح انت دتهذين ؟
هزيت راسي بتعب واحس اجفاني راح تنطبك على بعضها احس نعسانة .
تؤ ريلام مااهذي منتبهة عليه اني .
فرح انت شتحجين امه مرضعتني حرام هالحجي اني اخته .
معليج بحجي بيبيتج المخرفنة ترى مو شرط اذا رضعتج مرة او مرتين لازم تصيرين اخته اكو شروط .
اي اعرف لازم رضعات مشبعة وعدد محدد بس عمة هسه ماتت من تسع سنين واحنه شون نعرف شكد رضعتني ؟ خاصة اني ربيت عدها هواي .
اسألي خالجججج المصون الشيخ علي .الي يريد يحرمني من ابني .
خالو شمعرفه وبعدين لتكولين هيج مستحيل خالو يحرمج من ابنج مستحيييل .
هه اي مستحيل ولا يكدر لا هو ولا الاكبر منه . صدك هو وينه دانيال .
اخذه مهيب مني واني جيت اتطمأن عليج . هسه اروح اشوفه واجي .
هزيت راسي وهي طلعت ...
بقيت وحدي اتأمل السكف واتذكر كل ذكرياتي بهاي الغرفة وي حمدان مانكر جانت علاقتنا متذبذبة بس هو هم جان يحبني.
نضحك نسولف نشاقة سافرنا اني ويا احس تدللت على ايده اول اشهر بس بعدين بدت االمشاكل ويه حسان وهالشي صح أثر على علاقتنا بس ضليت احبه ويحبني ماردت اخسره ردته ويايه طول العمر بس الموت اخذه مني بسرعة البرق .
دخلت موج تنفخ وضايجة ووجهه معقوج .
سألتها شكو شبيج ؟
اكولج هذا شون متحمل نفسه ؟ بس كوليلي شلوون اخخخخ لو بيدي ارفع رجلي واضربه بطرف حذائي جوة حنجه واخلي الدم يتطافر من حلكه وخشمه .
ياا شبيج موج فهميني منو متعرضلج ؟
شحده الي يتعرضلي بس هذا الطنطل مالكم ضوجني حيل مستفز حييييييل .
ولج منو الطنطل احجي ؟
شرشبيل .
موووج ؟
شرار .. كزيت اسناني وكلت اسمه ..
ابتسمت ياا كلساع تجي وحدة مضوجها واحد .وتجي تشكي وتبجي .
يخسي يبجيني . كالت هيج بغرور وحركت شعرها .
منو بعد اجت شكت يمج ؟
ريلام ..
شبيها ؟
ويه مهيب... حكيت راسي واني هم مشتهية اتعارك ويه فد واحد .
دخيلج ويامن تردين تتعاركين ؟ كعدي وسكتي انت لازمة عدة
وي علي اتعارك واطلع حركة گلبي وضيمي كلها بي .
هو شنو ذنبه وشنو سوا ؟
ماشفتي يريد يحرمني من ابني ؟
اجت كعدت يمي خلت اديها على اكتافي
وبنبرة حنية واقناع : حبيبي فرح هو مكال يحرمج منه وياخذه منج هو خيرج بين تبقين يمهم وتربين ابنج وياهم وبين تروحين وتعوفينه يمهم . والقرار الج انت .
مو من حقه افتهمتي لا تكعدين تبرريله موجه .!
ما ابررله بس
قاطعتها : ديعذبني علي الدر سكوته هذا يمرمرني تمرررمرررر اريد اعرف ليش ساكت ليييش عن كتال حمدان؟
لججج شمدريج ساكت وميسوي شي قابل انت ويا يمه .
تمددت اجت يمي تمددت بصفي وخليت راسي على كتفها وهي تلعب بشعري سبلت عيوني حسيت براحة .
كالت فروحه لاتضيعين حقج بيدج حبابة ميصير هيج .اني باجر لازم اروح بعد ما ابقى هنا ما اكدر راح اوصي بلقيس وريلام عليج عفية ديري بالج على نفسج ولا تتعاركين اسكتي بس هالفترة نشوف حل مو كلشي بالصايح والعصبية اكو شي اسمه سياسة .
موج تتذكرين لمن مرة اجتي خالتي للبيت وضاربيها بحجار بوجهه ؟ وجهه يصب دم
اي عمري اتذكر خطية جانوا جهال المنطقة يركضون وراهه يصيحون عليها مخبلة .
وبابا جان ميقبل تطلع وهو من يطلع من البيت يروح للشغل يقفل الباب مرة طلع ونسى الباب مفتوحة واحنه نايمين وهي طالعة والزعاطيط يركضون وراهه ويصيحون مخبلة .
جان عمري بوقتها عشر سنوات مليت واني ادافع لخالة ومن شفتها اجتي تنزف وتكول ابن نجم ضربني وجمع عليه زعاطيط المحلة كلها ، اني جنت اباوعلها واحسها استعادت عقلها شويه بعد هالضرب وبابا جابلها المضمد للبيت خيط وجهه .
طلعت بلحظتها مندفعة حيل ومقهووورة من ابن نجم شلت حجار بيدي وظليت اشمر على بابهم هو طلع بيده طابوكة نيمها براسي ومن ذاك اليوم ولليوم واني اعاني من الصرع .
موج اني جنت كلش انقهر من اشوفهم يحجون على خالة امووت قهر وهي خطية متدافع لنفسها متكدر عقلها مو تمام .
من ذيج الايام واني ما احب اشوف احد مظلوم وخاصة اني ماريد احد يظلمني مدام اكدر ادافع لنفسي خلص كل الوسائل ممكنة لساني عصبيتي جنوني ماراح ادخر شي .
بس هيج تضيعين حقج اكو عقل واكو منطق هو الي يحكم تكدرين بكلمة تنصفين نفسج وترجعين حقج مو بطولة اللسان .
كمت وانفتح بشعري وكع بحضني رفعته واباوع لموج متمددة وابتسمت : هم يكولون عني مخبلة ام علي الدر تكولي ربتج خالتج المخبلة وصرتي مثلها وعلي هه علي تدرين شيكولي ؟
كعدت موج وسندت جسمها بعكسها : شنو ؟
علي يكولي محتاجة طبيب نفسي تتصوري
هزيت راسي اضحك .
هذا مو معناه انت مخبلة او مجنونة لا ترى هو مثقف ويفتهم بس يريد يحل العقدة العندج .
لالا خلي اشوفه الخبال على اصوله وغمزتلها .
هزت راسها بعدم رضى .
****
مُهيب ..
دزينه على زكي و مرة زكي هم ماعدهم جهال .. اجونه اثنينهم واستقبلهم ابوي بالديوان مالته
وحبوبتي هم اجت كعدت ويانه وابوي مسبقا حجالها الوضع كله .
ابوي كاللهم شنو السالفة خويه بعدج مارجعتي الولد الجان عندج لأهله ؟
هي غطت نص وجهه بالعباية وحجت بارتباك
: يا ولد شيخ ؟
جاوبها ابوي بحزم : لا تظلين تبيعيهن عليه ملاعيبج احجي شنو سالفة هذا الولد ؟ رجلج يدري بي لو نايم ورجلينه بالشمس .
ظلت ساعة تنكر ماعدهه علم بالكلام الي يحجي ابوي وتمتمت بالحجي .
ابوي كالي اخابر على شرار واشوفه وين صفى بي الدهر وشلونه الطفل .
خابرته كال جايين بالطريق خلوله مغذي وكتبوله علاج
الطفل عنده سوء تغذية هبوط بالكالسيوم والبوتاسيوم وفقر دم .
ختمت المكالمة ويا وكعدنه ننتظره نص ساعة واجه وزكي ومرته كلساع يردون يكومون يروحون لبيتهم وابوي مايخليهم .
دخل شرار وويا الطفل وهمزين صاحي وحالته احسن من قبل شويه ، ابويه اشرله وهو راح يم ابوي
شاله وحطه بحضنه كاله شسمك باباتي ؟
هز راسه يباوع على زكي ومرته وخايف.
ابوي لزمه من ذقنه ودار وجهه عليه
باوعلي ابني احجي وياك ولا تخاف من احد
انت شسمك ؟
جاوب الطفل بلعثمة : اسمي علي ..
ابوي ضحك كاله انه هم اسمي علي بس مركب جدي سماني على القصيدة الي يُمدَح بيها الامام علي عليه السلام " علي الدر والذهب المصفى وباقي الناس كلهم ترابُ "
هز راسه الولد مبتسم على ابتسامة ابوي المطمئنة اله
كمل كلامه ابوي : ابو حسين انت تعرف هذول منو ؟ واشر لزكي ومرته .
هز راسه بمعنى إي .. بس الطفل مبين حيل خايف .
لمن يباوعلهم .
عاطت المرة جذاب لا اعرفه ولا يعرفني .
رد عليها شرار هوب هوب حجية لو ما احنه شايفينه عندج واجينه ندعمه لو ما الله ستر ؟
هي دنكت وسكتت ورجعت خلت العباية على حنجهه .
الشيخ : انه سألته سؤال ومو ناسي من شفته وياج بس اريد اطلعج جذابة وهسه كليلي منين جبتي هذا الولد يله بسرعة .
ساكتة ومدنكة ابوي صاح زكي ماتحجي منيلكم هذا الولد وشمسوين بي احجوا لا اخلي هو يحجي .
هي كالت ابنه جايبينه احنه والله خلفناه بس ضمينا مانريد احد يحسدنه عليه تتذكرون شون مات ابني وهو صغير سودة عليه .
وظلت تتصنع البجي .
كام زكي كال شيخ هذا لا ابني ولا اعرررررفه . هي مدري منين جابته وخلته بالبيت .
الشيخ : وانت شنوووو موقفك ؟ ما سألتها منين جبتي وشيسوي يمنه ؟
زكي : ها!! لا ما سألت والله شيخ .
شرار بابتسامة : غلست يعني ؟
هو هم اخذه الواهس وضحك ههه اي ههه والله .
شرار بعصبية : خاب انته رجال زوووج جواريب لا والله مو زوج فردة جوراب مشكك ومعفن .
الشيخ : رجال شكبرك وشعرضك مرتك جايبتلك ولد ومخليته ابيتك ماكلت تسويلك مصيبة تجيك بلوى بسببه ماسألتها منين جابته .
_ شيخ والله ماترد وماتاخذ حجي مخبلة مخبلة ..
_ حيرتنه وياك حجيت وياهه انت وما خذت حجي لو لا ؟ احجيلك حجايه بيها خير .
_ شيخ مو والله خايف من تبعاتها ومرتي مخبلة الله يخليك شيخ انه دخيل عندك رد الولد لاهله ومرتي المخبلة هاي اخر مرة بعد وعد ماتعيدها حجية ام الشيخ الله يخليج احجيلج شي .
حبوبتي : اي احنه هم عدنه مثلها مخبلة بالبيت بس ماتبوك جهال .
ابوي باوع لحبوبتي وكال احححم ..
ابوي رجع نظره على زكي ومرته كال احجولي سالفة الولد شنو وانه ماقصر وياك مادام طلبت تكون دخيل عندي بس خلي نرده لاهله اكيد هسه امه كلبها نار عليه .
كعد زكي وندسها بزندها وصك اسنانه وحاجاهه
احجي مصخمة الووووجه اااحجي ولج منين جبتيلنه هالبلوى .
هي كعدت تحجي وتعصر باصابعها جنت يم اهلي بشمال بغداد وطلعت منهم زعلانة وشايطة مرة اخوي عيرتني لان مااخلف .
طلعت وشفت هذا الوليد الحلو هو واخته طالعين يردون يشترون من المحل وعجبني شكله
اهله ما اعرفهم اني والله شاهد عليه بس گلبي محروگ.
سألت اخته كتلها منين هذا الوليد الحلو ؟
كالت خالة هذا اخوي واحنه امنه ميتة ومرة ابوي مأذيتنه .
كتلها اني ماعندي جهال هاي مرة ابوج متعافية خل تعتبركم جهالها .
كالت خالة اخذي مدام ماعندج جهال والله احسن من العيشة وي مرة ابوي .
كتلها واهلج شلون ؟ شراح تكليلهم ؟
كالت والله مايسألون اصلا مامهتمين .
دخلت اخته للمحل رحت جريته من ايده حيل وبسرعة صعدت تكسي وصعدته وياي هو اول دقايق بقى مصدوم بعدين ظل يصيح رجعيني رجعيني عوفيني .
ابو التكسي لاحظ وسألني شبي هذا الولد ؟
كتله يريد يبقى ابيت جده وانه مااقبل اخاف عليه وهو هالواحد .
سديت حلكه وثبته قوي وهو نام بحضني من البجي والصياح ومن ذاك اليوم الهاليوم هو عندي يومية يشرد وارده بس اليوم لا شرد وانت لزمتوا وهذا هم حظي ما مقسوملي .
الشيخ : انتِ صاحية صدك تحجين ؟ هسه لو طفل بالاربعين بالاشهر مو هذا ترى جبير ويفتهم مافكرتي عقلج وين جان ؟ ووين تروحين من الله ترحمين طفل من امه ؟ بلله اخته تجذب ؟
جاوبت : شيخ والله ماعنده امه والله اخته هيج كالت
والله تندمت يا شيخ بس شسوي فات وراح والندم مايفيد وخفت ارجعه لاهله ويسوولي مشكلة بقيته عندي .
ابوي باوع للولد كاله صح هالكلام ؟
ظل الولد صافن مايعرف شيحجي ؟
رجع سأله هاي المرة حجت ويه اختك شكالتلها .
هو هز راسه بمعنى اي حجت وياهه .
هز راسه ابوي ورجع باوع على مرة زكي
وسألها : وهذا شبي ليش وجهه كله كدمات تبسطونه انتوا ؟
_ والله شيخ مايقبل ياكل موتني ضربته .
_ شكد صارله عندج ؟
_ شهر وهذا الثاني بعد ماخلص .
_ لا حول ولا قوة الا بالله الله يساعد گلب أُبو هسه التفكير ماكله اكل انت شون سويتي هيج ماتكليلي ؟ انت بالله نص عقل زوجج هذا شبي .
زكي : شيخ الله يخليك اني مالي شغل والله هي مخبلة ماتعرف تفكر على كولتك نص عقل لا والله حتى عقل ماكو .
_ وانت من شفتها هيج ماعرفت ترد الولد لاهله ؟
_ خفت والله خفت شيخ .
_ يصير خير ان شاءالله خلي مرتك تدلينه على المنطقة الي اخذته منها نودي لاهله وانه اتوسطلكم يمهم بس خلي ياكل له لكمة .
اخذنه الطفل ورحنه للبيت حتى نسويله اكل ياكل كعدنا بالصالة .
ظلينه نباوعله حلو الولد كلش .
حجيت ويا كتله ولك انت شكد حلوووو .
لهيب كال بضحك اذا انت هلكد حلو اختك شلونها .
وضلينه نضحك .
تعدت هيام لهيب كاللها ريلام سويله بيضه وكلاص حليب
خل ياكل .
كتله هاي مو ريلام هاي هيام .
هي باوعتلي ضايجة وجاوبت لهيب مابيه كول لريلام تسوي .
تمتم لهيب كبر شكد مكروهه ولا اطيقج سبحان الله .
كمت كتله دير بالك على الولد ، ريلام يمكن بالمطبخ هسه اروح اكللها تسويله اكل.
هو اخذه لحضنه ظل يساله ها حبيبي جوعان انته .
الطفل هز راسه .
عفتهم دخلت للمطبخ شفت ريلام واكفة يم المايكروويف وظهرها على الباب .
ابتسمت وتوجهت الها امشي بهدوء لزمت شعرها مسويته ذيل حصان ولفيته على ايدي وسحبتها عليه .
عاااطت اخخخخ مهيب .. خليت كصتي على كصتها وخازرها : ولج بعدج زعلانة عليه ها ؟
خزرتني : وهيج جاي تراضيني مو ؟
_ جاوبيني يله ؟
_ امرك سيادة الملازم اجاوبك بس اترك شعري لان اذيتني كووولش وحتكطعه بيدك وابقى كرعة .
_ لا تحاولين ما اتركج اله لمن يكون جوابج يعجبني .
وتكوليلي مزعلانة عليك سيدي .
_ والله مزعلانة عليك سيدي وما ازعل منك بس انته هالايام دتجفص بمصاريني والله يستر من الايام الجاية .
تركتها ورحت كعدت على الكرسي كبال ميز الطعام
كتلها هالشي يعتمد عليج وهسه يله سدي الموضوع بديت اضوج وداشم ريحة طيبة خليلي اكل .
_ اي عود نحترم مزاجك سيدي
_ يله عاد لتلحين مكرووهة.
باوعتلي بنص التفاتة ودارت وجهه جابت صينية صغيرة وخلتها كبالي باوعتلها كتلها شنو هاي ؟
_ هاي بيتزا شبيك اني سويتها .
طكيتها ضحكة صدك تحجين هاي بيتزا والله ماعرفتها بيتزا اله لمن كتيلي .
ولج هاي بيتزا بس طاكينها قذيفة بحرب ايران .
تستهزأ حضرتك ولزمت الصينية تريد تشيلها
لزمت اديها اثنينهم وثبتتها على ميز الطعام
لتشيلينها اكلها امري لله غير جوعان وميت جوع .
كالت لاء متاكلها هسه اشيلها اشمرها والله .
بقيت لازم ايدها عيوني بعيونها خزرتها وولللج .
وهي بعدها معاندة تريد تشيلها .
سمعت اححححم باوعت للباب شفتها هيام تباوع بنظرات خبيثة وحاجبها الايسر يرتفع وينزل .
تركت ادين ريلي واني اباوع لهيام كتلها شكو ؟ هيج تباوعين ؟
ماكو شي بس ماما تكول عيب صوتكم شعلوة وتضحكون واحنه عدنه فاتحة وخطار يمنه شيكولون علينا فرحانين لو عدنه عرس ؟
خزرتها هذا الحجي منج لو من امج ؟
ارتبكت من امي طبعا ..
مو اسألها واذا جذب اطيح حظج والله .
هزت اكتافها وقوست شفايفها وبلبكة كالت اسألها شعليه اني .
كلت بسيطة واريد اكوم لزمتني ريلام من كتفي
مووو هسه اكعد اكل البيتزا ترى تبرد وتصير محلوة .
كالت هيج عين عليه وعين على توأمها تباوعلها بنظرات عدم رضا .
تنهدت وكعدت انتبهت على نفسي بسرعة استجابيت لريلام اووف يا ريلام ولج انت مثل الجكارة تحركيني واحبج .
كتلها ريلام سوي بيضة وكلاص حليب للطفل جوعان خطية .
كالت صار وراحت على الطباخ وكفت راحت يمها هيام وظلن يتبسبسن شويه وعلى صوتهن .
هيام كالت اني شعليه هي المرية كالت للهيب هاي منو تضحك هيج وصوتها عالي هو الفطير كاللها هاي هيام
واني توي فايتة من يمه كالي ريلام ومهيب كاله هاي هيام مايفرق بيناتنا بسبب ضحكج وتفاهتج خربت سمعتي .
ركعت الميز بيدي كتلها هاي هم تأليفة منج ست هيام .؟
تخصرت لا مو مني .
اوكفي عدل لا اجي اعلمج الاحترام من اول وجديد .
خافت من نظراتي واعتدلت : ليش ماتحجي على ريلام الي اربعة وعشرين ساعة ميانتها زفرة وياك .
باوعت لريلام بعدني معصب ودنكت هي راحت وكفت يمها كالتلها متشوفين خدي احمر ماسالتي ليش ؟
عطت ولج ريلام تعاي هاي شون ياكلوها ؟ البيتزا مالتج ؟
ضحكت واجت ظلت تقطع بيها وخلت قطعة كدامي
ظليت اكل بيها كتلها والله طيبة صح شكلها مو حلو ومخربط والحشو كله واكع منها بس عليج نفس كلش طيب بالاكل .
ابتسمت كالت الف عافية ، واني دنكت اكل بشهية مفتوحة حبيت نفسها بالاكل مثل ما حبيتها وحبيت كل شي بيها .
لشويه سمعتها عاطت متوجعة ومتألمة ووكعت بالكاع تصررررخ موجوعة .
فزززز كلبي وكل جوارحي لصوتها .
كمت ودفعت الكرسي حيل وكع وانكلب ، شفت هيام ابتعدت عن الطباخ خايفة وتكول والله ما ادري .
يتبع .
ترى والله مو قصدي الح على الغترة ببارت ٦ 😂هاي موج شسويلها 🙈😂
حتى ام اية UmAya40 اكتشفت كم غترة موجودة بالغلاف 😂
النشر بين يوم ويوم والقصة حقيقية واني احبكم 😘
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!