رواية هذيانٌ بين جمرٍ وجليد ..(ارملة اخي المجنونة) الفصل الثالث وسبعون 73 - بقلم نورا ناصر

السلام عليكم ..
هذيان بين جمر وجليد
النهاية
نورا ناصر

تمت ....
أضع النقطه فيأتي من خلفي ويركلها
هذا الرجل لا يريد لقصتنا ان تنتهي.
_بثينه العيسى ...

فرح :

باوعلي وابتسامته بيها مية فكرة شيطانية تلوح بكل ملامحه ..

لزم حنجي وعصره ويحجي بثقة : انتي الي مااستبدلج ولا اطلكج ولا اتزوج عليج حتى لو خطئتي وقسيت عليج اسامحج واحبج مرة ثانية .. عشكتج وقفلت باب كلبي ...

كلامه خلاني اضيع ثواني وبعدها رجعت الدهشة لملامحي ، وهو ظل يراقب الذهول بعيوني ..

تمتمت : احمد يعرف انته ممطلك ؟

هز راسه وكال اي نعم

وكفت على حيلي :- يعني هاي لعبة لعبتوها عليه انته وياه ؟ شنو اني بنظركم مخبلة وماافتهم بمنو اثق اني بعد اذا انته واخويه متفقين عليه

حك راسه بضجر وتعب :- هسه شنوو تردين انتي؟؟؟

شوفي هيه وحدة من الاثنين لو انتي تكبرين عقلج وتفهميني ...

لو انه اصغر عقلي وافهمج ... بغير طريقة ماراح نكدر نعيش يعني لازم اكو تنازلات من الطرفين ...

وكفت وكتفت اديه ... كتله اني ضحيت هوايه بعد مااتنازل ابد ...

طلباتج شنوو ؟ ست ام جاسم بس كوليها على عيني وراسي انفذها الج

ظليت منطيته ظهري ومكتفة اديه .. ارفع حاجب وانزل حاجب شنو طلباتج يم جاسم شنوو طلباتج !!

حسيته اجه حظني من ورى وقربني اله ، ظهري طخ بصدره وشفافه على خدي تلعب لعب ...

همس يم اذني ها مطولة بالتفكير ؟ ماعدنا وقت وتعبانين امشي ننام والصباح رباح ..

رمشت بعيوني وووين ننام ....

فوك غرفتج صارلها سنة تنتظرج ماصعدتي شفتيها ؟

فكيت روحي منه :- لا ماصعدت اللتهيت ويه اختي ..

مد ايده لراسه وظل يعبث بشعره
كال :- اي خطية صدك شلون صارت ...

تعبانة علي تعبانة الله لايوفقه الحقير وهسه شراح يصير وشون ويه احمد يبقى بالسجن!!

كال اي والله متستاهل عمها شكد مدح بيها كال خوش بنية وصوتهه مايطلع

ورفع تك حاجبه وكال عكس بعض الناس ...

سويت شفايفي بووووز وصرت احركهم معاجبني
كتله اي الله بلاك بلوى بيه شسوي تريد طلكني واخلص

لف ايده على اكتافي ومشى بيه لحد الدرج ..
كال احلى بلوى والله

ومد ايده لشفايفي ولزمهن بأصابعه ويضغط عليهن ...
وكمل كلامه چا غير احبنج چا غير اعشكنج وشون ترديني اطلكنچ ..

واحنه على الدرج جاوبته واني ادفن راسي بذراعه الي محوطتني :- غير اريدك ترتاح مني ومن هوستي بس انته ماتريد شسويلك اتحملني لعد ..

اتحملج بوويه اتحمل ، اتحمل كل شي الا بعدج عني ، تعودت على خبالج وصرت مخبل مثلج انه ..

ضحكت وصلنه للغرفة .. فتح الباب و الضوء ووكف مقابيلي يتأملني بشوق ولهفة ...وحاجزني بين اديه ..

ابتسمت بعيونه ، ومديت ايدي غرستها بشعره واباوعله بضحكة ، اخذ ايدي طلعها من شعره وباسها وكال والله هذا الشيب كله بذمتج انت شيبتيني وانتي عجزتيني

مشيت خطوات بداخل الغرفة ... واني اتأمل فخامتها وترتيبها ..

كتله جان زين اذا بس على الشيب اني من وراك احتركت وبعدها اثار الحرك بيه

اجه حظني حيل .. وكال اي هاي الي ماراح اسامح نفسي عليها ووعد ان شاءالله نسافر وتتعالجين ..

لا اني دا اسوي جلسات علاج وان شاءالله مبقى شي ويروح نهائي وان شاءالله مراح احتاج للجراحة لأن اخاف منها..

اخذ اديه ظل يبووس بيهم .. كتله مجوعان اخليلك عشى ؟

كال اي والله جوعان واريد اشبع منج ..

ابتسمت .. كتله اغير ملابسي واجي ...

هو راح تمدد على السرير ..

واني رحت غيرت ملابسي وغسلت ، وكفت ع الميز فتحت شعري وهو اباوع عليه جان يطكطك بموبايله مدري شعنده ..

خلصت ورحت يمه .. عاف التليفون وسحبني عليه .. ظل يباوع لوجهي قريب من وجهه ويحرك اصبعه الابهام على بشرتي وصافن بعيوني ..

خله اصبعه الابهام على شفايفي كال :حاطه حمرة ؟

ها اي شفتهم هناك ع الميز مسطرات عجبني اخلي منهم

ابتسم ابتسامته الي توحيلي بأنه راح يسوي شي منحرف واخذ شفافي بين شفافه ..

بعدها لمَ وخر عني رجع ابتسم .. كال وهاي خربتها الج الحمرة

كتله بانفاس لاهثة سريعة :- عادي اني تعودت عليك مرة تخرب حمرتي ومرة كحلتي لمن تبجيني ..

ضحك ... وظل يبوس بعيوني وكال هاي بوسات خل تسامحني عيونج الي بجيتها واذا انه خربتلج حمرتج والكحل ترة انت خربتيلي عقلي وكلبي ..

كعدت الصبح على بوساته على راسي ، فتحت عيوني استوعبت اني وين وظليت اباوعله بتك عين لأن منعسة ..

كال كعدتج موو ؟ سامحيني بس ممصدك انتي يمي وبحظني ..

جاوبته واني اكعد .. عادي شكد الساعة هسه !
رد .. بثمانية هسه اذا تعبانة ردي نامي

واني اوخر البطانية كتله لا اروح اشوف اختي البارحة جانت تعبانة ..

كال اي روحي شوفيها ومن تصير زينة عندي حجي وياهه ..

نزلت من السرير تمططت وتثائبت وسألته عن احمد ....
كال صعدوا محكمة قبل شوية .. لتخافين عليه مهيب يمه ودزيتلهم محامي وولد عمتج وخالج هم يمه وحتى ابن عمج سالم هم هناك .... وان شاءالله يطلع بكفالة

هو الرجال ابو حسين خوش رجال بس ابنه ماقبل يتنازل .. الا من تتحسن حالة عمر

يعهي عمر شلونه يعيش لو لا

رد اي بويه البارحة سووله عمليه عنده نزيف داخلي براسه وكسور باديه ورجله .

وانين اختي شنوو مصيرها علي البنية حامل

كال بعد تنهيدة .. ان شاءالله نحاول نصلح بينهم الطلاق هم مو حل من اول مشكلة ..وبنفس الوقت مو إجبار اذا كان ماكو توافق بينهم فلا هيه ولا هو يجبرون نفسهم على إهدار العمر بشي مابي نتيجة ...

بس المشكلة اكو طفل بينهم ولازم اثنينهم يخلونه اولوية لتفكيرهم و يفهمون انو هذا الطفل ماله ذنب بمشاكلهم واذا صار طلاق راح يتشتت الطفل وينحرم من واحد منهم

فركت وجهي اووف ياربي يمته نستقر يومية مشكلة والله تعبنة عفية علي خوو ميضربوه اخويه بالسجن

رد ... لا شحده الي يلزمه وصينه عليه هناك والولد ماتركوا وحدة همين لتخافين ابووويه

ابتسمت ... بعد رووحي انته والله .. شوكت يجون الجهال اشتاقيت الهم

كال ... هسه اخابرهم .. هزيت راسي .. طلعت روب من الكنتور نفسه مال سيت النوم الي لابسته ، اسود وحاشيته دانتيل احمر ..

علي تارسلي الكنتور ملابس واكثرها ملابس نوم .. يريد يجدد شبابه العرندس

ودااللبسه واتمطط ورحت يم المراية رفعت شعري وربطته ..

سمعته يحجي بالتليفون هاا بوويه لهيب جيب عويلك وتعال اليوم ام جاسم طابخة خوش باجة طيبة

باوعت عليه مستغربة هو انتبه عليه غمزلي ويحجي ويه لهيب ..

ابتسمت ... وكتله يله هلا بيهم مشتاقتلهم كلهم والله ..

نزلت جوة غسلت وجهي .. وركضت للغرفة مالة الجهال الي بيها نايمة انين ..

فتحتها شفتها كاعدة حاظنه رجليها لصدرها وصافنة وجهه خالية منه الحياة وشاحب ومبينه متوجعة

شصار بيها خطية جانت وردة مفتحة تجننن .. احنه الثلاثة الاخوات ارتبط مصيرنا ويه هالعائلة واخذنا نصيبنا من العذاب والأذية ...

وأنين اخذت نصيبها لان حبت احسان ورادت تنساه وافقت على عمر وهذا جان اكبر غلط سووته ..

رحت حضنتها واعدل بشعرها .. وابوس براسها ..
سألتني على احمد .. كتلها الي كاله الي علي ..

وكالت بغصة وعمر شلونه ؟
رديت بعد تنهيدة فرج :- علي يكول زين مسويله عملية وطالع منها الحمدلله ..

هزت راسها الحمدلله ..
سألتها تحبيه ؟ خايفة عليه !

ردت .. لا عمود احمد ..

وسكتت شوية وكالت هم عمود ابنه الي ابطني ..

وشلون وياج هسه انونه ؟ ترجعين لعمر لو شلون ..

ردت بيأس : عادي اذا تردون ارجع ميخالف ..بس يطلع احمد اهم شي

حبيبي احنه مانجبرج على شي ابد واكيد الي نشوف بي مصلحتج نسوي الج

اهم شي يطلع احمد لان بسببي انسجن والله فرح اني ماردته يعرف والله بس هو شافني من جنت داروح للمدرسة

ياعمري شكد تحملتي ولا يهمج ان شاءالله خير كومي غسلي وبدلي ملابسج .. اليوم رح يجون لهيب وهدى يمنه ...

كالت بتوسل ميخالف انام ! والله مالي خلك والله

ميخالف نامي بس اكليلج لكمة تاكليها ..

اي اكل بس موو هسه بعدين هسه انام شويه ، اني كاعدة من الثنتين بالليل والله واستحيت حتى اطلع من الغرفة لان سمعت صوت عمو علي هنا

لاتستحين ابد بس هو عنده حجي وياج وكل شوي يسأل عنج ..

اي اي احجي وياه بس مو هسه فدوة ..

براحتج بس خليني اسويلج اكل تاكلين ؟؟؟

لالا ماريد والله شبعانة قهر مالي نفس وماريد هماتين خاف اتقيء واضوج

بعد عمري وينج ووين هالقهر هذا بعدج شكدودتج سوودة عليه ..

تمددت والرجفة مال القهر والشهكة بيها غطيتها وطلعت ..

صعدت لبست تراك ونزلت جووة للمطبخ شفته جايب ريوك مخلي على الميز واكو علاليك على السنك رحت فتحتهم وطليت بيهم شفتهم باجة ..

يدلل العرندس نطبخله باجة ليش لاء،..... يتدلل العرندس وعويله ..

تريكنا اني وياه وبعدين تشكلت رداناتي وبلشت اسوي الباجة هو اجه كال جبتها نظيفة حتى لا تتعبين بيها بس احب اكلها مطبوخة من ايدج ..

كتله لا عادي فدوة الك التعب ... ابتسم
كتله حتبقى يمي اليوم ؟
جاوب بابتسامة : اي اليوم كله الج بعد شتردين ..
_ اريدك سالم ..

طلعت الباجة هية نظيفة ومسموطة بس اني هم رجعت سمطتها سمط

شكلت الصوندة وخليتها بخشمها واذاناتها ... وغسلتها ...

باوعت عدها اسنان ، دورت بالكاونتر على شي اكسرهم بي مالكيت

تخصرت وظليت افكر شلون اسوي هسه ... حاولت اكسرهم بالسجينة ما كدرت مايتكسرون الراس كله عظام ....

رحت للحمام اكوة فرش اسنان جديدة ، وخرت عنها الغلاف ورحت فرشت اسنان الباجة

دخل عليه علي وشافني داافرج باسنانها فتح عيونه
درت وجهي عضيت شفتي يا هسه يكول هاي صدك مخبلة

كال هاي شنووو صدك جذب

لعد غير ماكو شي اسطرها بي لا ساطور لا جاكوج

ضحك وراح طلع ايد حديد الي يهرسون بيها الثوم وطلعها يخلي السجينة على السن ويقلعه

انكلب طبيب اسنان شيخ بي كل الخير والبركة .....

اكلك علي ....

رد بابتسامة :- يا نظر عين علي ..

اشوو البيت نظيف مابي ذرة غبار شعجب ...

كال ماتبطلين شكوكية انتي ، والبيت مبين عليه مسكون ؟

هزيت راسي بمعنى لاء ..

رد .. عبالج جايب بي مرة هنا ؟

هم هزيت راسي ..
وكتله :- ها ها شيخ صرت تشكك بالنوايا ترى هو مجرد سؤال ...

رفع تك حاجبه :- من عاشر القوم بعد ...

ضحكت خجلانة ودنكت .. ورحت كملت الاكل بس بالي يم احمد ويم انين ويم موج احسها موزينة هالايام ... وبالي يمها ..

بعدها اجو هدى ولهيب والزعاطيط وياهم ... مشتاقة الهم كلش هواي ...

للظهر اجانه خبر طلع احمد من السجن كلش فرحنا

اني بالي جان يمه حتى اكل كووة اكل ...

وبعدها مدينه السفرة وجانت خوش كعدة كعدنا نتغدى بالحديقة ، الجو حلوو والباجة طيبة ويه البصل الاخضر والنارنج مدري الرارنج ...

انين ابد ماطلعت من الغرفة وبقت بيها وهدى اصرت تشوفها اخذتها ورحت يمها

هيه جانت حالتها حالة وحتى مطفي الضوة والغرفة ظلمة وهيه عيونها مورمة من البجي

فتحت الضوء وهيه كامت سلمت على هدى .. وكعدت يمها تصبر عليها ..

كلتلها لاتضوجين نفسج انت حامل اهم شي صحتج .. اني هم نفسج وبعمرج شفت الضيم والقهر والله فرجها عليه انتي هم تفرج عليج ان شاءالله ..

انين تباو؏ عليها بإنصات ودموعها على خدها خطية ..
وتمسح بيهم كلما يوكعون ... وتهز براسها ..

بعدها راحوا هدى ولهيب .... واني رحت يم انين ..

كتلها كافي هيج تسوين بنفسج فدوة خطية علي ماقصر وهسه احمد طالع وجاي بالطريق كومي اكلي شويه ..

مااشتهي فرح والله مااشتهي رغم كلش فرحت بطلعة احمد الف الحمدلله خلي يجي واشوفه وناكل اني ويا ..

خليتها على راحتها وطلعت .. هدى خطية ساعدتني هواي بغسل المواعين والتحضير .. لذلك مجنت تعبانة

بس منتظرة جية احمد بفارغ الصبر ..

رحت للحديقة انتظره وعلي راح يرتاح شويه والجهال دانيال وفاطمة فتحت الهم التلفزيون ..

صار وقت قريب المغرب دخلت جوة .. علي راد جاي صبيت اله شرب واني رجعت الاستكان للمطبخ غسلته وخليته بالكاونتر

طلعت شفته يم باب الاستقبال يفر بسبحته ومبين يريد يطلع ، ركضت لزمته من ايده هو جفل ..

كتله ها وين رايح موو كلت حتبقى يمي ..
هز راسه شبيج اريد اطلع اشتم هوى

اي اي اني الكعدة يمي تخنك موو

كرص خدي .. ماتتوبين من سوالفج ولج هنا بالحديقة وين مولي ..

ضحكت هاي سوالفي راح تخليك تكرهني موو والله ..

رد وهو يتقرب مني ماكرهتج ذيج الايام اكرهج هسه !! وبعدين الي يحب مايشوف عيوب حبيبه

كتله اي بس يجفل منها هسه اني جفلتك اكيد بعد متكعد يمي هنا مو حتشرد

لزم اديه لا والله كل يوم يمج ان شاءالله بعد ماعوفج ولا اتركج ..

ابتسمت على كلامه والفرحة شقت طريقها لقلبي وخلته ينبض سعادة ..

لليل اجوي احمد ومهيب ، حظنت احمد خطية شصاير بي بس همزين علي مقصر ليلة وحدة وطلعه .. واخذته يم انين هيه شافته وزادت بالبجي وتتعذر منه

تكوله بسببي انسجنت ..
هو بوس راسها كاللها والله الي يمد ايده عليج اكصها اله يولي شنو هذا يضربج واني موجود .. لاتخافين ولا تضوجين ارتاحي والي ترديه يصير ..

بعدها راح غسل وكعد يم مهيب يحجون كتلهم احطلكم باجة

الشيخ كاللهم خوش باجة تفوتكم من ايد ام جاسم

مكالوا لا صبيت الهم وكعدوا ياكلون اثنينهم وبعدها مهيب راح وبقى بس احمد والشيخ صاح ؏ انين وظل يحجي وياهم بالموضوع

كللهم انه ترخصت من عمها وكتله راح اخذها لبغداد لبين ماتهدا الامور ..

احمد كال خلي يولي خلي يطلكها شون يمد ايده عليها ...

علي كله لا بويه مو هيج اكو طفل بيناتهم راح يصير خلي اختك هنا لبين ما تصفى النفوس وتهدأ وبعدين يصير خير ان شاءالله ..

علي ظل يسأل بيها عن السبب والي وصلهم لهاي الحالة

انين كلتله والله عمو اني مردت نوصل لهالحال والله اشوفه يخوني وكدامي واكثر من مرة وسكتت ..

كال جاا انه والله ماخاين وروح امي الجماعة سووني غصب خاين وهجموا عليه هجوم مباغت ...

عيون احمد وانين صارت عليه واني درت وجهي وادردم يبووي مو شيخ انتقام بيك كل البلا انسى شصار لو نسيت الماضي البائس ..

كملت أنين كلامها عمو والله حتى لمن ضربني اني ماجيت لاهلي ولا حجيت بقيت بغرفة اخواته ..

باوعلي علي مقلص عيونه ووجه كلامه لانين : شعجب ماتعلمتي من ام لسان ..

هم باوعولي انين واحمد واني عضيت شفتي
كتلها اي ولج اني لو منج اشمره من فوك البلكون ..

علي كال تشمرين منوو ام جاسم ....

هو رجلها غير لو كايلتلي اروح اشمره ومايرفلي جفن ...

هز راسه وبنظرة عدم قبووول ..

وحجه ويه انين : لا تصيرين خوافة بنيتي صيري شجاعة دافعي عن نفسج خوفج هذا يشجع الزوج على معاملتج بابشع وارخص الاساليب واحقرها كوني قوية واتخذي قرارج بنفسج

..

احمد كال خلي يولون تكعدون تتفقون سوى ع الانفصال وتنفصلون وكل واحد يذكر صاحبه بخير ولو مايذكره احسن ...

رد عليه علي : صح الطلاق هو نجاة للطرفين بحالة وصول الحياة الى مرحلة لا تحتمل بينهم

بس هم لازم يكون آخر الحلول مو أولها وبعض الأسباب تافهة ما تستوجب الطلاق ...

كال احمد : شيخ مو دتكول هو يخونها ويضربها وهاي كدامك وجهه مشوه ..

بويه بيناتهم طفل ولاتنسى بعدهم باول الطريق ...

الطفل اني خاله اني اربي ابوه ماعليه العتب والوسفة مدام مد ايده عليها وضربها وخانها وهيه حامل ...

انت هسه معصب وضايج من تصرفهم اهدأ ولا تاخذ قرار وانته بهاي الحالة ..

مقصرت شيخ اني كلش اشكرك تعبتك وياي والله ..

لا يابوي لاتكول هيج انت بحسبة ولدي وانه الك سند وعزوة

احمد باس الشيخ على راسه وتشكر منه هواي ..

كال اني اترخص اروح لبيت خالي ..

خليك هنا بويه ابقى يم خواتك ..

لا والله وعدت خاالي اروح يمه .وباوع لأنين
. انين تجين وياي ..

هيه باوعت عليه .. كتله لا عوفهه تعبانة خطية .. محتاجة مداراة بقيها يمي ..

بوسنا من راسنا ودعنا وطلع خطية يستحي يبقى يمنه ..

أنين :

مرت الايام أحمد نقل اغراضنا لبغداد واجر شقة النا وكعدنا واني انتقلت وياه وخالة هماتين جبناهه يمنه ..

عمو ابو حسين يجي يشوفني ويطمأن عليه وكناله انو اني حامل .. وفرح خطية بس عمر ابد ما اجه ولا شفت وجهه .. ولا خابر ولا سأل ..

بعدها وجان عليه خمس أشهر اجوي هم بيت عمو ووياهم سوزان ويردون يرجعوني بس عمر موو وياهم بس عمه وعمو وسوزان ..

واحمد استقبلهم واعتذر من عمو مو عمود شي بس هو طيب قلبه حيل ..

واتفقوا نرجع واني وافقت ارجع لعمر بس عمود الطفل الي ابطني شنو ذنبه احمد يبتلي بي خطية هم يريد يعيش حياته يتزوج واني كله افكر بي

حضرت اغراضي وكولشي عمود ارجع لعمر وهم هماتين لمن جان عمو يجي جان تليفوني وملابسي ..

بس الصدمة جانت لمن دخل احمد وعيونه براسه ومعصب ... كال عمر خطب!!!

انصدمت صدمة عمري لدرجة مو كادرة اوكف على رجليه ابد خاف جذب!!

لا والله خطب الكلب الحقير النذل اني اعلمه ..

ركضت عليه لزمته فدووووة احمد عووفه يولي نذل حقير ماعليه العتب

كال لاااا اله اطيح حظه ...

اني ركض خابرت على فرح وهيه كالت للشيخ والشيخ خابر على احمد وهدئه ..

كاله العيبة طلعت منهم خلي يولون وغصبا عليه ينطيها كل حقوقها

اني بهاي اللحظة كرهته وكرهت حتى ابنه ابطني ..

وراها اجه ابوه يتعذر ويتأسف وكال انجبرنا والبنية اهلها عرفوا بعلاقتهم واضطرينا نروح ونخطبها ..

كتله اي عمو الف مبرووك بس خلي يطلكني ...

رد ... لا بويه انتي بنيتنا واحنه ننتظر بس ترجعين النه حتى ينور حفيدنا بيتنا

لا عمو ماارجع وحفيدكم هم اخذووه مااريده ..

من رجع عمو لكركوك ... خابرني عمر بالبداية يتوسل انين اني احبج وكل هذا سويته حتى تحسين بيه انتي بس ارجعي الي واني ما اقصر وياج ...

ضحكت كتله انته تكدر تفتح بيتين ؟ هو اني جان حسرة عليه الربع اشتري بي اندومي انوب بيتين تفتح ووين تخليها المحروسة بالشقة ووياي نفس الغرفة

هو ضاج كال والله وطالعلج لسان يا ادبسز اله اجرجرج بالمحاكم وتحلمين تشوفين الطلاق وابني اخذه منج واخليج معلكة ...

كتله اخذه ابنك ماريده وماريد شي يربطني بيك وطلكني وغصباً عليك ..
وسديته بوجهه ..

الايام الي بعدها .. اني كارهة روحي وحتى ماراجعت طبيبة بس مرة وحدة واخذت سونار كالت مايبين كلت بعد احسن وقررت من المستشفى انطي الهم ماريده ..

وجنت اتخربط وماقبل اروح للطبيبة خالتي تسحلني سحل للمستوصف الي يمنه اله اروح ويسوولي لقاحات ويجيكون دمي وضغطي واني ابد مجنت مهتمة بالحمل ابد ..

وبعدها صارت عندي ولادة .. اخذتني فرح وخطية على حسابهم مستشفى اهلي ..

ولمن ولدت واني بعز المي تذكرت إحسان ودعيتله الله يفرج عليه ويفك أسره مو يكولون عند الولادة يستجاب كل دعاء ، اني نسيت نفسي نسيت اهلي نسيت الدنيا كلها وتذكرته هو

ولا راح انسى لمت نقذني ولا راح انسى گلبي الي حبه بيوم ...

سمعت صوت طفلي وهو يبجي لمن طلعته مني

رفعت راسي كتلها شنوو ولدت كالت ولد جبتي ولد ...

هنا اني استعزيت بي وغيرت قراري مستحيل انطي الهم ..

كالت شراح تسمينه ؟

ضحكت متوجعة أحسان

كررت احسان ؟

جاوبتها حسن حسن ... مشتق من اسمه هالتلث احرف ..

بعدها بدأت المعمعة مالة الطلاق وبهالوقت جان عمر متزوج بس اني جنت خايفة لا ياخذون ابني مني ..

بس عمو الشيخ علي الدر كال الحضانة من حقج انت حتى لو تزوجتي هم الج شرط زوجج يتعهد بابنج بالمحكمة ..

اني ماريد اتزوج بس اطمنت لكلامه ..

وانفصلت عن عمر بفضل علي الدر هو وكفلي ...

عمر طلب يجي يشوف ابنه واجه شافه وجان جايب مرته وياه ...

مدري عود يحرك كلبي مايدري انو كلبي من ناحيته حجر ...

موج :

الدمع حفر خدي واني وحيدة وغريبۃ ، حرگۃ گلبي مجاي تنطفي ..

شگد الجو بارد بس نار گلبي طاغية على كل شي كل شي بيه ..

هنا حسيت بنهاية عمري وأنو حياتي توقفت هنانہ ..

حبه ضعفني وخلاني بزاوية ضيقة ماعرفت شون اطلع منها ..

بعز المرض بعز البعد جنت بملئ الحب والكبرياء افتقده ..

افتقد اهتمامه لمن اتمرض جان يوكف على راسي يهتم بيه ويداريني ..

افتقده وماريده واريد اشرد منه ، مشاعري متضاربة تعبتني احس بيني وبين الجنون خيط رفيع ..

اني ما أكدر الا ان اعشقه بوقت لازم امحيہ من داخلي ..صرت ابقىٰ علىٰ حبہ ..

جنـت احس بالأمان يمـہ وفقـدتہ واني بحضنـہ وفقدتہ ..

اني بسببہ كل مسامۃ بجسمي تبچي وتتألم ...

اني ممقہورة من الي صارلي .. ولا ضايجۃ من لحظات ضعفي .. وبس !!

لا الي قاهرني اكثر انو ماكدر يحافظ عليہ ولا وفىٰ بوعده بالحفاظ عليه وحمايتي ..

اساله وهو بعيد عني ..ليش شرار ليش خذلتني ، ياترى تسمعني وتعرف معاناتي وشكد اني دا اتألم !!

بلحظة مثل الي جان يبني قصر وانهار بلحظة وطلع كله قصر من الوهم او حلم وردي بلحظة صار اسود

كلها جانت عبالك لحظة وحدة .. مو أكثر ..خذلني وتعبني بكد ماحبيته ..

وكأني منذورة للحزن والألم والعذاب ، والحزن دومه مستعمر عيوني ملئها دموع وقلبي وحنجرتي الي ملئها غصات وعذاب ..

سمعت صوته المتعب المتهالك ، رجليه صارت تطخ ببعضها والرجف صار محتل كل جسمي

فجأة شفت نفسي بأحظان عاصفة جليدية مو كادرة اطلع منها ..

سمعته يصيح بانفعال طاغي ومبين على صوته شكد تعبان ...

لدرجة واني بهالحالة رق قلبي اله ثواني وبعدها تمالكت نفسي ورجعت حقدت عليه...

لان الي اني بي بسببه هو خلاني بوسط براثن مرته المجرمة

جان صوته يهز الشقة هززز > : موووج موووج وووينج مووووج

واسمع حنان وشيرين يحاولون يوكفوونه ..
وشيرين تكوله اطلع اطلع لا اطلبلك الشرطة اااطلع ..

رد عليها بعصبية وانهيار :- اني الي اطلبلكم الشرطة واتهمكم بخطف مرتي منوو سمح الكم تاخذوها مووووج موووج وينج ..

كلتله حنان :- احنه ماخطفناهه جبناهه هنانه بارادتها انتوا الي قتلتوا طفلها وانتوا الي حابسيها وهيه تريد ترجع للعراق اتركها كافي الي شافته منك .

رد عليها بغضب ... لتحجين بشي متعرفي مفهووم وهسه يله طلعي مرتي وينها وكلكم راح تتحملون المسؤؤلية منو سمح الكم تاخذوها انتوااا منووو؟

سمعت صوت ابواب بالشقة تنفتح وتنسد بطريقة فوضوية عرفته ديدور عليه هو ميهمه شي اذا عصب يجي ويهجم

اكيد حيوصلي ، اني جنت منهكة االقوة ، كاعدة بصف السرير ، ومرجعه ظهري عليه ...

خايفة حيل احس نفسي وحيدة رغم البنات مقصرن ودافعن عني هواي بس ابقى غريبۃ

دخل للغرفة وعيونه تدورني ، واني حاظنة نفسي واباوع عليه بخوف وترقب ، هو لمن شافني فززززز

اجته شيرين تدفع بي وتصرخ بووجهه
اطلع براا اطللع اتركها مابدياك اطلع

وهو هم يدفع بيها بطرف اصابعه ويبعد اديها عنه
وبدون ميباوعلها وملامحه الغضابة تترجم نيران المتوقدة بداخله ويصيح عليها ...

وخري مالج علاقة ، اعلى مابخيلج اركبي مررتي هاي مررتي مااسمحلكم تاخذوها ..

بعد ماتخلص منها ماكدرت اله راحت طلعت وحنان هم مدري وين ...

خفت لا يخابرن زياد وتصير مصيبة كلش كبيرة اني في غنى عنها والي صارلي كولش كافي ..

اجه تقرب مني بسرعة خاطفة ملهووف ومتوتر
شمر نفسه يمي سحبني من اديه

وبنبرة متوسلة وجهلي كلامه : موج مووج حبيبتي ليش هنانه انتي ليش هااا ليش جيتي هنااا وين تليفونج ليش مغلق ليش ماخابرتيني

اباوعله بقهر وعيونه بعيوني المليانة دموع ..
سحبت ايدي منه وخليتها على بطني مكان امومتي المقتولة ...

كوة قويت نفسي وحاجيته بنبرة مجرووحة ومرتعشة ..
_ ش رار شرار قتلتوا ابني قتلتوا اااامووومتي كله منك كللله انت حقير اناني نذل

يباوعلي مصدووم ومحتار ... ويحظن وجهي بأديه ..

كتلك بعدني عن مرتك مقبلت ماافكرت بيه فكرت بنفسك وبس همك مصلحتك وبس

اذيتووني مووتوني ماريدك روووح رووح خليني ارجع للعراق اكسب اجر بيه واتركني كاافي الشفته منكم كااافي

زفر بقهر ورجع لزمني كوومي وياي والله اخذلج حقج ثالث ومثلث والله موووج اني ابد مااقبل بلي صارلج والله ليش هالفكرة الي ماخذتها عني

ماريد ماريد ، اريد ارجع للعراق فدوة شرار كولشي ماريد منك اني اعترف غلطت لمن جيت وياك ودخلت بيت مرتك وخدعتها اني مذنبة ودفعت الثمن مجان لازم اجي

فرااكك مررر وقربك عذاااب واثنينهن واحد ، اني جربت الاثنين ومايفرق عندي شي بعد كله واحد ، اريد ارووح يم اهلي فدوة اتركني اتووسلك عووفني

كال باستجابة : اي اي اووديج والله ارجعج للعراق وارجع وياج وابقى يمج وطز بكل شي والله مابدلج بالكون اني

وبسرعة سحبني حضني ويبوووس براسي ويقرب بيه لصدره اكثر كلما حاولت اتملص منه يشدد باديه على جسمي وكأنه يريدني افرغ مشاعري بحظنه ..

ولج ليش هيج سويتي بيه ليييش!!! هيج تخليني وراج!! زوجج اني زووجج عبالج ارضى أذيتج اني

دفعته بقووة مني واني اصيح بصوت فزع متحشرج
... وخرر شرار وخررر ابني مات ابطني ماااات مرتك ماعرف شسوتلي مااعرف شنوو خلت الي وشنو حقنتني

خلتني افقد الوعي وحقنتني ابرة ماعرف شنوو بيها وحتى الدواء هماتين جان متبدل ويختلف عن اول مرة جنت اخذه

كملت بنبرة بجي :> متوقعتها هيج تسوووي بيه ابد اني بعد مااخلف رحمي متضرر كلش هواي اتركني اني هم ماافيدك بعد

رد .. بتوسل والله اخذلج حقج منها والله ، تخلفين والله تخلفين اعالجج وحتى اذا ما خلفتي هم ماتخلى عنج واريدج يله كوومي وياي كوومي ...

رجعت دفعته :- ارتااحيت هسه مووو ارتاااحيت !! انت مجنت رايدة هالطفل اخذووااا مني راااح بعد مااايصير مايييصيير

خلى ايده على حلكي اروحلج فدوة لتكولين هيج ولج والله حقج ماتدرين شصاااار بيه واني ادور عليج ..

ماتدرين شصار بيه من عرفت الي صار الج هو بس ابنج !! بس انتي فقدتي هذاا هم ابني شبيج مووج

كوومني من الارض واني ارجف ومثل الحمامة المتصاوبة وتهوي من الارض للكاع مااسيطر على نفسي وواكفة وعيوني ثكلانه من الحزن والبجي

واتمتم ماروح وياك ، لشقتها مارروووح المجرمة انوب تقتلني هالمرة ومايرف للهہ جفن

ولو.... شهكت ... ...وحجيت اني ... اني ميتة شراررر ميتة بسببكم اني ميتة

هو يكوول اسم الله لاتكولين هيج والله ماوديج يمها اطمأني لااا والله صدكيني اصبري بس اخذ حقج انت ساعديني هم

كعدني على السرير ..
وهو نزع الكوت مالته ولبسنيا ويخلي الكبوس مالته ع راسي واني ارفض وادفع بي ماريد اروح وياه

واحنه على هالحال دخلت شيرين وحنان ووياهم الشرطة ويحاجوهم بالروسية ويأشرون على شرار ووهو وكف مصدوم ...

بسرعة اجو عليه اللتموا و ثبتوا كلبجوا اديه وسط صياحه ومقاومته ...

واني وكفت واحس نفسي صرت انزف بغزارة ..

وكعت من على طولي على الكاع واحس بدون حول ولا قوة بين واعية وبين لا .وكل محاولاتي للتماسك انهارت فجأة ..

. واسمع صوت صراخہ وحتى ماكدر اترجم الكلام الي يكووله والي جان يوجهه للشرطة بالروسية حتى نسيت الي تعلمته كله ..

بقيت حاظنه البالطو مالته وابجي واباوع ع البنات بعتب بس ما اكدر احجي لساني ثكيل ...

اخذوني البنات للحمام وغسلولي لان نكعت .. رادوا ياخذوني للمستشفى او يتصلون بالاسعاف بس اني رفضت اطلع من الشقۃ....

نمت من التعب ... ولمن كعدت جانت دموعي ناشفة على خدي وعيوني كوة افتحها من التعب ...

خلص جوازي وجابه الي زياد ...وحجزلي رحلة لبغداد .
قررت اخلي بمكان قلبي حجارة وما افكر بشرار ابد

استغل الفرصة وارجع للعراق واترك كل شي ورايه وحتى ماريد اشتكي على نيفرا جنت بحالة يأس حيل مابيه حتى اخذ حقي جنت مثل الرماد ..

خليها هيه وشرار ينجازون الله ياخذلي حقي

مافكرت بشرار هو بالسجن ويكدر يطلع نفسه وهاي مو اول مرة ينسجن

بس اني شون اطلع نفسي من سجنه!! متأكدة راح يقنعني لمن يطلع ادري بروحي ضعيفة كدامه

فتحت تليفوني وخابرت على أحمد وحجيتله كولشي ...

انصدم وتخبل وظل يحجي على شرار ..

كتله احمد راح ارجع لبغداد بعد ما اتحمل ..

كال شون ترجعين بهالحالة هاي ولوحدج انتظري افيز جوازي واجي اخذج

كتله لالا مااصبر وحجزت طيران راح ارجع ماانتظر وانت استقبلني بالمطار ...

كال اروح لبيت الشيخ واكللهم واخلي لهيب اذا يكدر يجي ...

رفضت بقووة وعصبية ماريد منهم شي دخيلك احمد اني اريد بس ارجع واذا شرار طلع من السجن مستحيل يخليني ارجع

شنووو بكيفه سجن هو خوو ما سجن ... هو يتجرأ يحجي بعد الي صارلج بسببه هو بي خير ما خلاج ويه مرته وهو كلش زين يعرفها اكيد اكو واحد مايعرف مرته ولج انتي شوون قبلتي شلوون

هو راد ابقى كدام عينه يكول ائمن الج بس الي صار اني دفعت الثمن ... احمد ماريد اطول عفية والله تعبانة وما اكدر حتى احجي والله

وانتي شون ترجعين وهيج تعبانة موج لاتعاندين خليني اجيج

كتله بعصبية .. وهو خطية متحملني لان ضايج عليه
احمد موعد طيارتي باجر الله يخليك لا تلح والله اجي وماعليه شي ..

بعدها ..... ودعت احلامي الوردية الي اجيت لموسكو محملة بيها لاء مو ودعتہا انما دفنتها ورجعت لبغداد ...

رجعت واني فارغة خاوية من امومتي ومحملة بدموعي والخيبة وبس

مبعثرة مشتتة ومحتارة ووحيدة مثل غريق صغير لا حول اله ولا قوة

امشي بس احس .. ميتة وبعده موعد دفني مو وقته ..

زياد وشيرين وصلوني للمطار تشكرت منهم هواي
كتله لزياد ان شاءالله اردلك الدين هذا كله بس ارجع وانت بس كولي شكد تكلفت ادزهم الك

كال لا والله فدوة الج ولا تهتمين بيهم ...
وكمل بضحكة :- بس اريد البالطو مالتي الي انطيته الج بذيج الليلة

مكدرت حتى ابتسم جنت بائسة تحركت شفايفي بشبه ابتسامة وبعدها رجع العبوس لوجهي

كتله والله اسفة مصارت فرصة ارجعه الك بس بقى بالشقة مالتهم تكدر تروح تاخذه منهم

كال اي اخذه والله يبقى ذكرى منج ..

هزيت راسي ودعتهم ومشيت حتى اغراض ماعندي هوايه ، يادوب البالطو مالة شرار وجنطتي وتليفوني وشوية اغراض ...

وصلت لمطار بغداد .. سلمت جوازي لسلطات المطار لانه جواز مرور مؤقت ومشيت ..

استقبلني احمد حضنته ودموعي الي جنت كابتتها طول الرحلة غافلتني ونزلت صرت ابجي بلا وعي وكووة تماسكت .. بعدها اجر تكسي ورجعنا للبيت ..

الايام الي بعدها ومن رجعت لبغداد ، بقيت نايمة بالمرض اني ، النزف استمر اشهر والام بظهري وبالحوض ومبقت دكتورة تعتب ..

التشخيص اثبت وجود تمزق بالرحم و تليف بعنق الرحم وكل الدكتورات يحذرني من الحمل يكولون هم حيصير اجهاض .. بسبب ضعف عضلات الرحم

رفعت دعوة طلاق على شرار بس هو جان مجهول عنوانه ، لذلك المحكمة دزت كتاب للهجرة والخارجية والاجراءات تطول

هو بيوم الي عرف بدعوة الطلاق دزلي مسج
وسفة عليج خيبتي ظني بيج شون تخليني وراج وتتركيني هيج!! كتلج اخذ الج حقج أني بس انتي تصرفتي من كيفج وخلي ابالج طلاااك ما اطلك ..

من بعد هذا المسج شرار اختفى نهائيا ، حتى اهله يدورون عليه وهو ماكو ...

دزوا لهيب لروسيا وراه وهو ماكو فص ملح وذاب ....لا هو ولا إبنه ...

اما بدت برحلة ترميم نفسي والبداية من الصفر لان جان كولشي صفر نفسيتي حياتي معنويا ماديا اني صفر واني من نوع احب اعتمد على نفسي بكولشي بس وجود شرار بحياتي ضعفني وجان لازم ابدي من البداية ...

العراقيل جانت هوايه ... الدكتورة منعتني من الرياضة ومن مضادات الاكتئاب لذلك جنت اجاهد في سبيل ارمم نفسي بنفسي ...

لهيب..

دخلت وسديت الباب بقوه بحيث حسيته نشال من مكانه

عاد هو مهيب عاط بيه...الباب البااااب

تقربت منه وضربت اديه علئ المكتب بغضب...انت بأي حق تضم عني قاتل زوجتي

رفع راسه بغرور وباوعلي بنظرات بارده...وانت بأي حق تدخل هيج المكتبي وبعدين اني من حقي اني ضابط شرطه قابل مهندس

تعصبت...انت لا تضل تضحك عليه ترئ انت اخووي يعني مو حلوه منك تستغلفني وتستهين بيه يعني حلوه وانت اخوي

رجع ضهره علئ المكتب...اهوو لهيب ترئ ما يلوگ الك تتمسكن ارجع الاصلك والغرورك جنك واحد حبيبته ضاربته بوري

لزمته من ياخة قميصة وسحبته ناحيتي...انت لا تضل تضحك عليه ليش تتصرف من كيفك ليش

دفع اديه بغضب...اكلک شنو اني ضابط جيس حب وبعدين لهيب فهمني انت منو وزير الداخليه ولازم اتصرف بامرك

وبعدين يا اخي يا حبيبي هذا مجرم وقاتل واعتقلناه يعني هذا شغلنه افهمك يا ابو ديمه لو شنو ؟ انت ما سامع بالقانون ؟

كعدت علئ الكرسي وجريت نفس قوي ...بس،اني جنت اريد اني اضربه اذبحه اكله بسنوني والله هذا عيشني ايام بحيره شوفني الموت صعب اشوف مرتي بين الحياة والموت وقاتلها يسرح ويمرح وهي تعرف وما دكلي وانوب مو بس هي تعرف انت هم تعرف صح اعتقلته بس كلبي ما شفئ

باوعلي وغمض عيونه..المصلحتك لهيب يمكن تتهور وتروح تتورط اني رجل شرطه واعرف شلون اتصرف واخذه بالقانون

ولا تخاف عاقبته وضربته وحاسبته والله اكثر منك حاسبته والدعوه ماشيه وراح يصعد للقاضي وينحكم والله اخلي يتمنئ الموت وما يلگاه ..

وصدكني تاخذ حقك عشائريا وقانونا اذا تريد والقانون فوق الكل صدكني ممقصر

واصلا هنيالك علئ هداوي تخاف عليك ما حبت تورطك واجت انتخت بيه

رفعت حاجب بعدم رضا..لا تدلعها لا افلش وجهك

اشرلي بقهر...امشي اطلع برا لا اعتقلك ...

باوعتله من فوك ليجوه باستفزاز...ضباط تالي وكت

ضحك وهو يكتب...تروحلي فدوووه

هزيت ايدي...اروحلك ليش ما اروح تامر سيادة الضابط ...ضباط سته بالف...

خليت وطلعت واني اسمع صوت ضحكته عليه بعد هو صاى بيد الشرطه وهذا مهيب الكلب ما قبل لا اشوفه ولا ينطي اليه ولو مو من حقي اطلب هيج طلب بس عود اني كلت لان اخوي وكذا بلكي يكون واسطه اليه تالي كل شويه وهددني يعتقلني...

صح حز بخاطري علئ هدئ بس مجاي اكدر ازعل عليها ولا اكدر اضوجها وازعلها...

مر تقريبا تلث ايام جان كلامي ويه هدئ قليل رغم هي بررت ان الي صار المصلحتي

بس اني مو علئ هل شئ زعلت اني اريدها اتوب من هل سالفه هاي هي دوم ما تحجيلي دوم مخليتني وراها اريدها تحجيلي تتقرب مني تفتح اليه كلبها ليش تستعين بغيري وتضم عني...

شفته كاعده علئ الجربايه وضايجه عرفتها ضايجه لان اني شويه زعلان منها وهي ام خدود ما تراضيني لو اطك راسي بالحايط

عاد اني اتنازلت ورحت الها حضنتها وبست كتفها بحب هي فزت من مكانها وباوعتلي

من شافت ملامحي هادئه وتنم عن حبها ابتسمت بمرح ولفت اديها علئ رگبتي احتضنتها برومانسيه

همست بصوت يذوبها...مشتاقلج هدئ مشتاقلج

ضحكت بصوت مسموع ونزلت راسها كلتلها بترقب..تحبيني

هزيت راسها بنفي وهي تضحك

خزرتها بغضب مصطنع رجعت ضحكت كالت ...انت تحبني ؟

رديت عليها بكذب...اي احببج بس شويه مو هوايه

تعصبت وضربتني بعكسها ببطني حطيت ايدي علئ بطني بوجع...هاي ليش يعني انتي كلتي ما احبك ما حجيت واني من كلت احبج بس شويه اجاني قناص ببطني

جاوبت بانزعاج...انت مالك شغل بيه واصلا لا تثق بكلامي اني اذا حجيت شئ يعني العكس مثل الحلم بس انت لا تجذب...هسه تحبني لو لا ؟

بست شفايفها بعمق ورديت عليها...امووووووت عليج انتي النفس اليصعد وينزل انتي جنتي ودنيتي بعد لو كافي ؟

ضحكت...هههههههه لا كافي كافي حتخربط من غزلك

ضميتها الصدري واني اشبع انفاسي الهايمه بيها حجينه عن هوايه اشياء اتعاتبنه وتصافينه وشفت روحي ما تكمل الا بيها وهي ما تكمل من دوني

والحياة بدون مصاعب ما تكون حياة الله يقدرني واكدر اعوض هدئ واسعدها وياريت اكدر امحي رعبها لان لحد الان هي مثل الحاله نفسيه بيها من تعرضت للحادث لحد الان تفز مرعوبة تبجي وتتوسل يتركها

واني قررت اخذها الدكتور نفسي بس هي رفضت رغم احاول اقنعها ولازم اقنعها...

كل يوم اخذها بحضني ابوسها واطمنها واقره عليها مثل طفله مسكينه وكل يوم اتعلق بيها اكثر اعشقها اكثر اموت بيها اكثر...

ولحد الان منتضرين الحكم بحق الي تعرض الها وضربها واكيد شئ يرضيني ويرضيها لان هل شئ صار بيد مهيب ...

حـاء وبـاء
نسجت لتكون بين ادم وحـواء
حـاء حنيـني اليك
وبـاء بدونك لاحيـاة🥀

انتهت .....

الشكر كل الشكر لجميع الي قرا القصة صوت الها وتفاعل وياها ..

شكر لكل الي صمم غلاف وكتب خاطرة ..

شكر خاص للكاتبة الجميلة Smoo-1997 تعبتج نوارة عمري ❤❤

شكرا لنوارة الثانية noora-1995 على الدعم المعنوي وايضا الغلاف الجميل هذا

شكر لجميع ادمونات واعضاء كروب ورود وفراشات ..
Wyaam1990 jooorm
HafsaHafsa710 alraawih
شكرا shimoshimo1998 smsma89 على ادارة كتاب الخاص بالرواية ...

وايضا شكر لجميع الكروبات والبيجات والمواقع الي نقلت الرواية ..

احبكم كلش هواي واعتذر اذا قصرت بالنهاية بس ظروفي وصحتي الله اعلم بيها فقط ..

انضغطت حيل ولازم اتوقف عند هاي النقطة ..

الي يحب ينتظر التحديثات الي راح تنزل لاحقا وتخص احداث سنوات ٢٠١٧ ، ٢٠١٨ ، ٢٠١٩ ، ٢٠٢٠ ، وحتى ٢٠٢١ ..لان القصة مستمرة ليومنا هذا ..

والي ميحب ينتظر وحينسى الاحداث يحذف القصة ويقرا غيرها ماشاءالله ع القصص كلش هواي والمبدعين والمبدعات ربي يوفقهم كلش هواي همينه ..

نورا ناصر ..

٦ كانون الثاني ٢٠٢١ ...
١١:١٥ مساءً ..