رواية هذيانٌ بين جمرٍ وجليد ..(ارملة اخي المجنونة) الفصل الثاني وثمانون 82 - بقلم نورا ناصر

السلام عليكم
اليكم أخر احداث الرواية وان شاء الله يكون اخر شي ينزل بيها و هنا نغلق منافذ الحكاية ونترك ابطالنا يعيشون حياتهم ونتمنى الهم كل الخير والسعادة ولكم بالمثل ..

√√√√√√√√√√•√√√√√√√√√√

ضاگت الدنيا و اجيتك طير متوازي اعلى عِش
{ايهاب عيال الظالمي}

√√√√√√√√√√°√√√√√√√√√

چنه راجعين  من عرس احمد اخويه بعدما طلعنا من القاعة وزفيناهم للفندق ...

اني وحسن  صعدنا بالسيارة وي احسان  هو يوصلنا للشقة ..  جان بس ساكت مو من عوايده  واني فرحانة وتونست بالعرس هواي ، اخويه الوحيد اليوم زفينا وفرحانين بي كلش

باوعتله كتله ليش ساكت حبيبي
باوعلي ابتسم حسيت بنظرته عتب
گال ماكو شي بس نعسان

عرفت هو ضايج لان يريد نتزوج بس اني داأجل العرس ..

تحسرت وسكتت شوي وگتله ضايج لان احنا ماتزوجنا
كال بنبرة عتب مو مهم اني ضايج المهم انت حبيبتي فرحانة

ابتسم ولزم ايدي عصرهه وبعدهه بلحظات تركها
بقيت احاول احجي وياه الطف الجو و هو جان يجاوب بس باختصار واحسه مجبور ع الابتسامة والحجايه فعلا ضايج بس ميريد يلومني ويضوجني واني فرحانة ويتحجج نعسان وكل شوي يسوي روحه يتثاوب حتى ياكدلي هو نعسان اللوتي

باوعت على حسن شفته نايم على الكشن حبيبي فديته واني هم رجعت راسي وغمضت عيوني

حسيت على صوت احسان يگعدني فتحت عيوني ثواني يله استوعبت اني وين
سمعته ضحك
كال والله لو ماخذج لبيتي ومنزلج من السيارة ومنومچ  بغرفتي ونايم وياج هم مجان حسيتي

اني منا منعسة ومنا هو كلامه جريء طارت النعوسة وصحصحت

فتح باب السيارة ونزل اخذ حسوني شاله واني نزلت اتعثر بالكعب شعلوه سديت باب السيارة ومشيت وراه

وصلنا للشقة موج وفرح واصلين قبلنه حيبقون يمي الليلة عمود باجر نستقبل العرسان يجون من الفندق .

اخذت حسوني منه بباب الشقة دك الباب سمعهم ديفتحوه بسرعة  باسني من راسي بدون ميخلي عيني بعينه وكال تصبحين على خير وراح وعيوني تتابعه الى ان نزل ومالتفت الي ضجت حيل

رحت شفت جهال فرح محتلين الغرفة الله يحفظهم وحتى ماكو مكان لحسوني وخطية موج فارشة جوه  وخالتي نايمة على سريرها وفرح مدري وين اتوقع بالحمام

خليت حسوني على القنفة الي بالصالة .. وغطيته ورحت غسلت وبدلت .. فرشت بالهول النا اني وحسوني تمددت وافكر بي واتگلب ولا چني ذيج الي ماقاومت رغبة النوم بالسيارة
اخذت التليفون ورحت لغرفة احمد وخابرته اول رنة ماجاوب ظليت الح بالاتصال يله اجاني صوته ..
كتله هاا خما نايم وكعدتك
كال لا كاعد

جاوبته لعد شعجب ما نمت مو ع الاساس نعسان ؟
كال هسه طلعت من الحمام وهسه راح انام
انت متريد تحجي ويايه زعلان مني ادري بيك
گال انين انت مو شبعتي نوم بالسيارة متحسين بيه الخاطر الله نعسان
لا انت مو نعسان انت زعلان
اي زعلان ارتاحيتي
انت ليش متعذرني ؟

بعد ما جر حسرة كال بنبرة هادئة ورجاء :- لچ هو أني شعندي غيرج اني شخص طاويته الدنيا ولافته وشامرته يمج
رمشت بعيوني وتنهدت ...

وهو كمل بحماس :- ... وبعدين كافي صار هواي گاعد وساكت ترى ارجع للدياحة والانحراف اذا متجين يمي

بصدمة حچيت وياه :- إحسان انتَ صدگ تحچي ؟

كال أي صدگ إله أرجع للشرب والسكر والعربدة ...

ا اريد احجي قاطعني گال ها وحتى اخوتي اورطهم وياي واخلي خواتج وجوهتهن فالته

گتله بشوية عصبية يعني شنو هذا تهديد ؟

جاوب شنو تردين تعتبريه اعتبريه

گتله بفتور :- اي بس التهديد مو لغة العقلاء ...

گال بصوت عالي منو كلج اني عاقل يا گوا؟••گالج هذا ؟؟

عرفته راح ينزل عالترابي بسرعة بسرعة گتله
إحسان اني راح اخابر صديقتي اخذ منها المحاضرة قبل متنام 

كال  بغضب مكتوم امشي روحي لمحاضرتج يله
الله يوفقج ويطيح حظي
عضيت شفتي وهو انهى المكالمة .....

من ختمت المكالمة وياه ماعرف شصار بيه ضجت تفاعلت بداخلي احاسيس ، انقهرت عليه ، واحتاريت بروحي وبدراستي ...

هو من عقدنا محكمة لهسه يلح يريد اليوم قبل باجر نتزوج وصادف وراهه محرم وصفر ووره مخلصوا اني اللتهيت دراستي صعبة وماكو اي فرصة افرغ نفسي لتحضيرات الزواج ابد وبنفس الوقت كولش داضوج من الحاحه ..مو منه اضوج ابد ماضوج منه لان احبه
دااحس نفسي راح استسلم وشلون ويه الدوام احس دخت وصدعت من التفكير

رحت للغرفة شفت موج كاعدة تحجي وي شرار بالفون بقيت اباوع عليها وفرح نايمة

موج  ختمت المكالمة واجت وياي وكعدنا بالصالة نحجي وحجيتلهه
كالت انت شبيج مخبوصة على كيفج
-مو داكلج زعل زعل ويلح
-ههههه هسه انت مخبوصة لان زعل لو لان يلح

-يعني اثنينهم بس والله لح لحة مالحوها الملاحيح بتاريخ الملحة

طكتها ضحكة بصوت عالي: اي مو هو يشوف نفسه ماوراه شي فارغ خطية ويحبج ويريدج يمه وانت مخبوصة بدراستج وتشوفين المسؤولية راح تزيد عليج .

-اي موج وشسوي ؟
-اتفقي وياه شبيج
-اي اتفق وياه خاف نفس الاتفاق مال نتزوج ورة التخرج وهسه بعد ممتخرجة ويريد نتزوج

-باعي انت كليله اوكي نتزوج بس لازم تقدر ظرفي وانتَ دارس صيدلة من قبل وتعرف شكد صعبة ، خاف اقصر وياك لازم تعذرني ...حاچي بهدوء وتناقشي وياه

-لا اني كبل انهيى النقاش واتحجج بغير شي لان انت متعرفينه يعصب وينزل ع الترابي

-ميخالف بس بكل خلاف لازم واحد معصب والثاني هادئ صدگي ورى ميهدأ راح يحس بغلطه ويرجع بس اذا انت هم معصبة راح يضيع حقج واذا على العرس وتحضيراته اني وياج مااتركج شبيج هي كم يوم قابل شگد راح ياخذ منچ وقت ومو اله تطلعين امتياز هالسنة ، ترى هو هم خطية گضى حياته لوحده يريد زوجة يمه تشاركه ايامه وهو مناقصه شي هسه بس وجودج يمه .

بعدهه ختمتها ويا موج راحت نامت واني مجاي نوم رحت سويت گهوة وظليت أقرأ الى ان صارت بالوحدة طفيت كلش رحت خليت راسي عالمخدة وفكرت بي الى ان نمت ..

يوم ثاني اجو العرسان من الفندق ...
وراها معزومين ابيت فرح هي العزيمة للعرسان بس هي عزمتنا  كلنا ، جان  يوم جمعة ولمة حلوة وهو ع الاساس يجي عليه ونطلع سوى ...متفقين من قبل العرس
بس اتوقع هو بعده زعل  ! يخابر يسأل شونج شخبارج باختصار ويسده .. ومدري يجي مدري لاء .

كمت من الفراش رحت غسلت والعرسان بعدهم نايميين  ..
مااشتهيت اكل شي غسلت وجهي وكعدت بالغرفة محتارة ماادري يجي احسان لو لا لأن البارحة زعل هو عليه

ردت اتصل بي بس الكرامة شادة حيلها وراكبة راسها ومتقبل لان يعاملني بجفاف

فكرت ابدل وامكيج .... اجه خير على خير ما اجه اطكطك سنابات وارجع انام مخسرانة خسارة

بس فرح راح تگرع راسي بالاسئلة ليش مااجيتي وليش وشلون وشبي حسان وياج وسين وجيم عبالك محقق والله حيرة
من بين كل هذا بقى بالي يمه وگلبي عليه وافكر بي ..

سمعت حركة بالشقة هذا اكيد احمد كعد او دينا ، دا اريد اطلع للصالة سمعت صوت الباب تندك وراها سمعت صوت احسان ..

ابتسمت همزين مزعل واجه عليه
كعدت حسوني وطلعت غسلتله وبدلتله وانطيته كلاص حليب وبسكت وكعد ياكل ورحت اني بدلت ملابسي وطلعت غسلت لحسوني وبدلتله ورحت يمهم بالصالة ... رحت كلت صباح الخير وبقيت واكفة

هم اثنينهم ردوا وهو رفع راسه يباوعلي
وسألني بنبرة مبطنة بزعل كال ها خلصتي نروح
هزيت راسي اي نروح ماعندي شي خلصت .. بس لحظة .. دخلت على ديون للغرفة شفتها كاعدة تمشط .. كتلها رايحة اني محتاجة شي قبل ماروح؟
كالت روحي حبي وراكم نجي احنا
وانطتني بوسه بالهوا واني هم بستها واخذت حسن وطلعت ..

طلعت ويا اني وحسوني ، هو لزم ايد حسن ومشى كدامي ويسولف وياه واني خففت بمشيتي وغرت كل مرة يلزم ايدي هالمرة مبينه الطنكورة الزعلانية عليه ..

ظلينه هيج اني امشي على بيض وهو خطوة بمكة وخطوة بعكة

وصل لباب العمارة والتفت عليه وكف و ابتسم
كال عبالي رجعتي للشقة ديله يمعودة
كتله بزعل ترة انت الي تمشي حيل ...

كال ها يعني اني دايسلهه ؟
جاوبت اي
كال ديله يله تعالي اشوو
ولزمني من ايدي ويدردم
يكول جاي امشي ويه اثنين جهال اني .
ابتسمت ..

دخلنا للسيارة بقى ساكت وحركها
كل شوي اباوع عليه وهو يحس بنظراتي عليه
هم يباوع.. اخر شي ابتسم بتك خد ودار وجهه

واني
كتله مو زعلان انت شعجب اجيت عليه ؟
باوعلي وابتسم ورجع باوع للطريق
كال حتى لو!!! ازعل اي بس ماازعل بعيد عنج ابقى يمچ

- يعني شايل عليه زعل بگلبك ؟

كال ؛-والله صراحة گلبي المصخم يحبچ مابي ذرة مكان يشيلج زعل بس حب

ضحكت وعيوني صارت تدمع ... كتله فدوة لتلح عليه خليني على راحتي شويه

كال :-بصوت عالي حقي واريده واليسكت عن حقه شيطان اخرس طالبتني طلابه شرايد اني اريد اعرس كفرت خما كفرت!

-بس ماتلومني خاف اقصر وياك واللتهي بامتحاناتي

كال ؛ لج قاابل بكلشي اني بس اريد اصبح بخلقتج
نعمة الله أنتِ وهي نعمة الله تندفر لو تنباس

ضحكت .... واباوعله هو يسووق ويحجي
كال هاي اللحظة منتظرها على احر من السطح بالصيف ...اصبح بوجهج وينزاح تعبي

واني اضحك كتله هذا هو بس يرجعون شرار وموج من الاردن حيروحون علمود العلاج .. نتزوج منا لذاك الوقت اني مخلصة كل شي

كال اووو خوو هذا المطي شرار عرسه ويه عرسي ..

كتله شبيك حقهم يردون طفل واني مااكدر اتزوج وواختي ماكو انت تكدر تتزوج واخوك مسافر

كال لا عاد اخوي الزود شرير الهيبة

خطية يردون طفل يونسهم

كال بطرانين ...

شنوو بطرانين يعني يردون طفل بطرانين يعني انت هسه ماتريد طفل مني ؟ اذا تزوجنا ؟

-اي اريد بس هو يجي مو اروح اهجولج بالدول حتى احصل عليه ، رزقني الله الحمدلله مارزقني هاي الي مكتوبلي اعيشه بعد شكو

:وبعدين تعالي اگولج اشو مبين كاتلة روحج ع الطفل يعني الطفل مراح يلهيج عن دراستج ؟ بس حسان المگرود اخذ وقتج ...

دييله اعتبريني ابنج ؟ اعتبريني اخوو لحسوني وبحبحيها شويه انين خاتون حرم حسان المصون

وباوع بالمراية الفوك على حسوني كاعد ورى وكال مو هيج حسوني بابا ؟

حسوني جاوب ببراءة اي بابا ...

ضحكت حييل شلون لوتي وفراهه عليه

كال هو حقه شرار ابنه جبير متعود عليه وتوفى ويريد طفل يلهي شويه لان ذاك مينسي وجان متعلق بي وهم العمر يمشي بس اني گتله اصبر شويه بعد هم مصار سنة من رجعوا لبعض بعد وكت عالعملية ....

گتله :- اي بس على فكرة ترى انت فاهم غلط اني اريد يتأجل الزواج صح بس مو لان انت راح تلهيني عن دراستي لاء بس ماريد اقصر وياك بشي

غمزلي وكال علينا هالكلاوات
ضحكت بكيفك لاتصدگني ...
لزمت ايده وتشابكت اصابعنا وهو ديسوق ...
- ترى دراستي مو اهم منك .
شال ايدي وباسها ...وهو ساكت

وصلنه لبيت فرح واحنه سوالف احس براحة لان ماكمل طنگورته عليه ... كلش اضوج من يزعل

حسان جان يدك بالجرس بازعاج كتله...على كيفك يمعود على الرنه تكعد الميت من كبره لا تفزز الجهال خاف نايمين

رد بخبث يحجي وضاغط اصبعه على الجرس :
اريد افزز شياطين فريحه

سمعنه صوت دانيال وهو يصيح : ومرض مرض اجينه منووو صدعتونه مشايفين جرس

باوعلي واشر ع الباب :- استلمي تربية اختج

ضحكت. :- والله حقهم ركصت حتى الكاونتر..

فتح دانيال الباب وهو يباوع مصدوم من احسان واحسان يباوعله بعتب

ضحك دانيال فشلان كال ههه هاا اي عمو اجيتو عبالي جهال الجيران يلعبون بالجرس

رد عليه حسان بغرور..:صار ساعه ادك ما تفتحون خاف احد موصيكم ما تفتحون الباب؟؟

كال دانيال...لا بس ماما كالت افتحو الباب ماكو غير حسان المرعوص اجه

باوعلي كأن ما صدك لكه كلام يحجي بي كال...شفتي شفتي اختج المرعوصه شتدكول عليه عرفتها فريحه ما تحبني لو ينزل بيه الامر الإلهي

طلعت فرح وهي تضحك..ها جيتو اهلا وسهلا طبعا كتله دانيال هذا عمك حسان اجه روح افتح الباب حتى دكته للباب سمفونية هههه

باوعلها بنص عين وگال :- ...علينا مو حتى عرك اشترينه

سلمت عليها وهو هم سلم ودخلنه و دخل قبلنا يسولف وي دانيال وفطومة

همستلها  فرح بعدج تكرهين حسان؟
كالت..انجبي لا ولج احبه لان مخبل مثلي ...

ضحكت وكعدنه جوه بالاستقبال  وهي راحت تجيب مي  ..

هو يدور الزله على فرح كال : هاي التحفيه ديكورها محلو وين الذوق جايبه بزازين رافعات اديهن
شنو جاي اسلبهن لو اعتقلهن

ضحكت اني كتله ...لا مو رافعات اديهن ذن ديسلمن
باوعلي بصدمه...لا بشرفج هسه هالبزازين جاي يسلمن علينه
ابتسمت اي

ضرب ايد بيد وسفه عليك خويه ابو  مهيب تالي عمرك شيوخك تستقبلها بزازين فريحه وتسلم عليهم
لا وابو فاضل دقيقه ما يضلن هنا
تعصبت اني وگتله :- ..طلعت انت تتحارش بيها مو هي المسكينة

رد عليه:- ...والله اختج ما عندها ذوق جايبه بزازين وجايه

هن صدك جانن التحفيات عباره عن قطط وحده رافعه ايدها تسلم والثانيه مدري شنو من حركه والثالثه تسوي باي باي

اخذهن وكام على حيله وراح صوب المطبخ كمت ركضت وراه وهو حطهن على الثلاجه

كلتله فرح هاا حسان شكو
ردبثقه..ماكو شي بس عيب هذن التحفيات بالاستقبال وكل ذوق مابيهن خليهن يمج بالمطبخ يونسوج

شفت فرح تعصبت وهي لازمه الجفجير وتكول ايبااه شعنده ابو الذوق !!

ظليت اعض الها الشفه واتوسللها بنظراتي
سكتت الخاطري

بهالاثناء اندك الباب بهدوء ... هي تباوع لحسان وتكول اي اجت الناس الراقية الي تدك الباب بهدوووء واحترام وماتزعج العالم. .  وخلت وطلعت تصيح لدانيال يفتح الباب . 

وراها گعدنا بالحديقة واتصل عليه رقم غريب هذا جان عمر كلما احظره يتصل من رقم غريب ونوب هسه يمي احسان كلش انحرجت وبقى يتصل
احسان كال جاوبي ؟

خليت التليفون بحضنه كتله انت جاوب رقم غريب هذا
هو ماصدك اخذه بسرعة وفتح خط
وصاح بصوت عالي الوووو
ماكو رد الظاهر
رجع صاح الوو متحجون
اني من يمي خفت من صوته العالي

سمعته يگول نجلاء منو ؟ اي رقم انين
هاهيه وياج
وانطاني الفون
تنفست وعرفتها مرة عمر

سلمت عليها خطية جانت تلهث يمكن خرعها احسان هههه

ظلت تحجي وياي شلونج شخبارج شوكت تتزوجين
كتلها قريبا ان شاءالله
كالت اي تزوجي احسن الزواج ستر خاصة الج
صكيت اسناني وكتلها وعيني ع احسان مستورة الحمدلله
هو رفع تك حاجبه

كتلها بنفاذ صبر امر خدمة
كالت عمر راح يجيب الجهال ويجون يشوفون حسوني كلت انطيج خبر تحضرين نفسج تطلعين وي خطيبج تكولين لأخوج ليطلع حتى يطلعله

قاطعتها كتلها اكولج اني ما اطلعله تره منو كلج اطلعله تره خطيبي ميقبل واني هم ماريد وثاني شي هو يتفق وي احمد ويجي اني معليه تمام هيجي فأنتي ارتاحي وخلي ابطنج ركيه صيفي على كولة المصريين
جنت عصبية احجي وياها وانا نادرا اعصب بس هاي تغث كلش حچيهه يضرب بالعظم

ختمتها وياها واحسان رأسا حضني وباسني
كتله احسان احنا بالحديقة ليشوفنا احد احجي واطل على الشبابيك
كال بمراوغة واذا ؟

انت متستحي متخجل يشوفنه احد بهالوضع
كال البوس والحضن ميريد واحد يستحي ويخجل تؤ ميتراهمون شايفتلج واحد يبوس خجول ؟

كمت من يمه كتله اروح اخابر احمد اشو تاخروا
وهو يكول وراي من النهاردة مفيش يمه ارحميني اني اعلمج

موج

رحنه لبيت فرح يوم الجمعة ومعزومين ويه احمد ودينا  ، دكينه الباب طلع دانيال ورواء بالحديقة جانوا ....

اجت رواء بنت فرح تركض تكول لشرار
عمو عمو هاي ماما طابخة راس چلب ع الغده

اني خربت من الضحك ... وهو شالها يبوس بيها ويكوللها
والله عمي هي امچ كل شي يطلع منها تطبخ راس جلب تطبخ راس مطي كلشي نتوقع ...
گمت گرصته مقابلة على كلامه يريد يرجع يكرصني ابتعدت بسرعة ..

دخلنا جوة سلمت على الشيخ ورحت للمطبخ
شفت فرح لاهية دتطبخ بوستها
وكتلها شكالت رواء بنتها
شهكت وكالت والله باجة باااجة مالة هذا رجل الهايشة شسمه نسيته والله هذا شرار  اكيد صدگها موووو ؟

ضحكت اني وهي عضت اصبعها وكالت اخخخخ منج ام لسان وين ترووحين مني اليوم
وذيج رواء تطل عليها من الباب وتضحك ...

وهي كالت باستسلام هو أني اكدر عليج بنت ابوج بعد هو انت عمج منو عمتج منوو

تخصرت كتلها بالشقة يااعم تقصدين هااا

كالت هااا واحد عنده سوالف

عگدت حواجبي و وتحركت بكل جسمي
و سوالف شنو ؟
كالت سوالف خير يمعودة هو اني اكدرلجن انت وذيج حسرة على وحدة تجيب سيرة رجالجن
بستها بخدها حييل وتشكلت اساعدها ..

بعدها فرح طلبت من شرار يروح يشوي السمچ
وگف بالمطبخ ظل يصيح عليهم محد اجه
فاتت ريلام كاللها
رجلج ابو دماغين وينه ؟
جاوبته هناك خالو  يخابر صاحبه
كاللها انت متأكدة صاحبه مو صاحبته.

فتحت عيونها لا خالو  ماعنده هيج سوالف
جاوبها تعلميني بي
كلتله بلوم خالو شبيك ويه زوجي
ظل يفر بيده زوجج زوج جواريب هو هذا

طب لهيب وبيده ابنه كاله تعال ولك انت امشي وياي نشوي السمچ يله
كله روح انت مابيه حيل اني
رد عليه شرار شبيك مابيك حيلك حيل چلب وبعدين عمكم ابو العرك وينه

بدخلة حسان كله بس لا تقصد عليه اني اشرب عرگ هو منو ابو العرگ غيرك انته جنت بروسيا وتشرب

لعد وين جنت هسه ....

اجه مهيب كاله جانوا هو وابوي يتفقون على موعد العرس

كال صلوات واخيرا انفكت الچبسة يمكن حسان حبل من الفرحة لان راح يعرس  اصلا يومية يجي يمي يبجي يريد يتزوج واني اسكت بي

جاوبه حسان اني اجي بعد يمك من امداني ...

المهم شرار اخذهم حاصل فاصل وخلاهم يروحون يشون السمج وهو فات جوه يلعب ويه الجهال وهم خبصهم وتعاركوا ونصب على دينا واحمد وهم مخلاهم بحالهم ...

اخر شي كاعدين على الغده كلنا وفرح بعدها بالمطبخ تحوس... صاح شرار على رواء كاللها رؤؤؤ ماما شطابخة ؟

بنت فرح كالت...ماما مسويه جلب لعمو حسان

انصعق حسان من مكانه...بووووووويه فريحه تريد توكلني جلب  

ضحك الشيخ كله...لا يابه ترا هي رواء كل انواع اللحوم تسميهن جلب

باوعله بشك...فدوه شيخ مرتك مو امان خاف صدك طابخه جلب ...

رد عليه الشيخ بغضب...ولك شنو ما تستحي تالي عمري اوكل ضيوفي جلاب صدك جذب

شويه ودخلت فرح شايله صحن طويل بي تشريب مال باجه وعليه راس الباجة

كالت هذا الراس الحسان خصيصا حتى لا يكول فرح تكرهني

حسان انهبط اول مره تهتم بي فرح كال بقلق :-...ما احب الباجه اكل خبز وخضرة

وشرار ولهيب ومهيب يضحكون عليه...لا شو اليوم تاكل باجه

فرح بشك كالت شكو شبيكم ؟

ضحك شرار...بنتج دكول امي طابخه جلب

فرح..عزا  كون هاي موتتني شكو شي بي لحم وكالت جلب لج ماما عيب شلون ناكل جلاب

خلت الصحن گدام حسان وكالت تفضل عريس

احسان كال اخذي خلي كدام اخوج هو العريس مو اني  ؟

احمد كال لا ياابه هاي مخصوص الك اختي تدري بيه مااحب الباجة

فرح كالت  بعد شتريد داادرايك اكثر من اخويه
وهو حسان يباوع وبايك طن هوا
وهو لازم الراس يقلب بي يمنى يسرى كال..جنه وجهه جلب ولا جنه راس غنم

ضحك شرار كله..جنه جلب بوليسي بس مجبور تاكل حتى تعزز الثقه بينك وبين فرح

دانيال كال عمو جيرانه عدهم هاسكي

صاح لهيب همزين ماحب الباجة ولك هذا الهاسكي مال جيرانهم
ويباوع لهدى مو كتلج لا تاكلين توبي من الباجة ترى مرات يسوونها من الجلاب

الشيخ كال اكول انه هالايام مااسمعه يعوي الچلب مال جيرانه

حسان ظل يبلعم ومهيب كال هاا يابه طلعتوا متفقين توكلونه چلب مو بالله

كال الشيخ لا يابه شببك ويله سموا باسم الله ولا تحجون ع النعمة ... هو اكو احلى من الباچة

كال حسان بس مو باچة چلاب ... وقربها  يم انين كاللها تاكلين؟؟  ... هزت راسها برفض و  مبتسمة ...
وحسان سواهه صدك ومااكل الباجة اكل سمج ..

خلصت العزيمة والله تونسنا حييل ...  ورحنا كل واحد لبيته ...

يوم ثاني دخلت للمطبخ الصبح وكلت صباح الخير
بلقيس كاعدة على الكرسي لابسة عبايتها مبينه تريد تطلع  كالت صباح النور ام غايب وطكتها ضحكة ...... ههههههههه‍

كتلها متفاجأة :- أم غايب ؟!

گالت اي  هي كل وحدة ماتجيب اطفال يسموها ام غايب .
ريلام ماقبلت على امها وكالت ماما شبيج ترى مصارلهم سنة من رجعوا  ....

وهدى انقهرت لزمت  شعري وكالت  لا شسالفة بعده اكو امل اني عمتي عمرها 50 سنة حتى كاطعتها وداخلة سن اليأس والله رزقها طفل ،وهو الله الي يتكفل برزق عباده

ريلام كالت اي صدك ماما بعد لاتكوليها

جاوبتها انجبي انت لسانج يرادله كص لاعبالج عرستي وخلفتي مااكص لسانج

مهيب خله استكان الجاي وجاوبها عمه مرتي محد يكص لسانها بس اني اكصه ومد لسانه لريلام الي تباوعله فاتحة عيونها على اوسعها

كالت بلقيس لمهيب ديله كوم وديني لبيت هيام وانت يمه هداوة طلعي جدر الدولمة وهذني العلاليك يم السيارة فدوة اروحلج

ومهيب كام على حيله وكاللها والله عمه اني حالف ماروح لبيت هيام خلي هدى تكعد لهيب يوديج
طلع وهي ظلت تدردم وراه

واني كل هذا وواكفة مصفصفة بمكاني بعدها كلمة ترررن رن براسي ...

دخل عليه شرار للغرفة شافني ابجي
حاول ويايه كتله ضايجة ...

كال: انت تبجين علمود طفل مو ؟ لو سامعة حجايه ليوم ؟
سكتت بس القهرة بنص روحي ولساني انربط
ظل يتلمس خدي بأصبعه الابهام وباقي اصابعه جوة حنچي
ويكول ميخالف اني ابنج وانت بنيتي شكو بيها اذا ظلينه من دون جهال

‏وخرت عنه رحت لميت نفسي وكعدت عالسرير
‏اجه هو كعد يمي اخذني لحضنه
‏وانيى احس الدنيا كلها تابوت ومحبوسة بي
‏خله حنچه على كتفي ويهمس بأذني
‏شنو رأيج تفتحين الجم مرة ثانية ؟ مو احسن حتى تلتهين ؟

‏هزيت راسي واني اتملص منه اريد ابقى لوحدي شرار عفية اتركني
‏لا ماتركج تردين تضوجين ضوجي بس لا تضوجين بعيد عن حضني
‏لاء هسه اتركني ترى والله احجي حجي اضوجك بي

كال ‏ميخالف اني قابل

‏لا بس اني ماريد اتندم عوفني انت مالك ذنب أني اليوم نفسيتي تعبانة ومتأزمة
‏جنت احجي بحرگه

‏هو هز راسه وبهدوء تركنيى وابتعد عني
‏واني اخذت حاجاتي وگبل للحمام

‏سبحت وطلعت ماكو بالغرفة هو جنت مرتاحة شويه وانقهرت حاجيته بعصبية .. بدلت ملابسي ورحت طليت عليه من البلكون شفته بالحديقة يدخن ويفتر ومبين متوتر ومقهور
‏سودة عليه حبيبي هسه هو شنو ذنبه !
.. قررت امشط شعري وانشفه واروح يمه

‏وفعلا ماطولت دقايق مشطت ونشفت شعري ولفيته بالشال ورحت اطل عليه شفت يمه مهيب ولهيب ومسوين گعدة ويمهم نراگيل ابتسمت اكيد هسه هم يطلعونه من ضوجته بس ادري بي باله يمي هسه ويفكر بيه وميرتاح

‏رحت للغرفة انتظرته يجي ماكو تأخر رحت طليت شفته كاعد وحده ينرگل ، نزلت يمه شافني ابتسم كال هذول الطليان كل واحد راح ليم مرته .. وكفت قريب عليه

‏كتله يله الجو حار ترى هنا شنو مااحتريت؟
‏كال لا حلوة الاجواء هنا عادي
‏لزم ايدي عصرها كال راحت الضوجة لو بعدج ضايجة ؟

‏هزيت راسي لا زينة هسه الحمدلله ...
‏كال فوتي جوه هسه جايج بس ادخل الاغراض ذني
‏كتله اني هسه اساعدك
‏دخلت الاراگيل ورحت للغرفة هو راح للحمام

‏دخلت لبست ملابس هو يحبها يسميها ملابس من غير هدوم ههههه‍ وفوگاهه روب ورفعت شعري ليفوك رشيت عطر وكعدت انتظره
‏هو اجه كعد يمي

‏كال قررت اخذج عمرة شنو رأيج بما انو أنت ِ. هالايام متدينة صايرة
‏ابتسمت . فرحت وخجلت من ربي بنفس الوقت لأن اني حتى سورة البقرة تركتها هالايام بلحظة ضعف ويأس وقنوط .

‏هو لزم حنچي كال هاا شنو رأيچ ؟
‏جاوبته أي يهدي الله من يشاء بغير حساب
‏كال الله يهدينا كلنا
‏

وفعلا اخذني عمرة وصلنا لمدينة الرسول محمد صلى الله عليه واله وسلم ... جنت احس بالامان والهدوء حسيت براحة محاستها من قبل حتى نسيت اني على شنو جايه هنا جنت قاصدة الديار المقدسة ادعو ربي يرزقني طفل بس هناك حتى هالمطلب نسيته ...جنت اطلب من ربي اللقاء بالرسول بالجنة ..

هناك  جان عالم مختلف ، احس نفسي بداخل بقعة من النور والضياء واني بحضرة الرسول محمد نبينا وشفيعنا يوم القيامة حتى دموعي جان الها لذة واني ابجي واصلي بحضرته ... التفكر بعظمة الخالق والخشوع تسلل لاعماقي مابين الحلم والواقع ، تعلقت بالمكان
وحسيت السعادة محاوطتني من كل جانب ..

بمكة جان الشعور مختلف حسيت بالقوة واني اصلي كدام الكعبة الشريفة الي جنت اصلي باتجاهها  بدون ما اشوفها بس اليوم اصلي واني مقابيلها فعلاً وجنت بهذه اللحظات قوية وسعيدة لدرجة البكاء .

شرار جان عاقل طول الرحلة بس على جبل احد مكدر يلزم نفسه ومايلطف الجو وظل يوصفلي شلون المسلمين جانوا واكفين على الجبل واللتفوا عليهم الكفار بالمعركة وغدروهم وهو اصلا ابو الحملة كال ممنوع تصعدون بس هو مياخذ حجي وانكلب عليه مدرس تاريخ واسلامية ويشرحلي ....
رجعنا لبغداد واني احس تغيرت تغيير رهيب الامان والهدوء سكن روحي ومافارگها ..

أنين :-

صرنا نجهز للعرس واني مدري شبيه توتر خوف ودموعي بسرعة توكع على خدي اباوع لحسوني واحضنه حيييل فكري كله وياه وبمستقبله واحجي وياه ليل ونهار ...

حبيبي اني احبك مراح اعوفك او اقصر وياك انت قطعة من روحي ..  مااعرف شبيه مقهورة عليه خايفة من نفسي عليه اوعده بداخل نفسي حتى لو يصير عندي اطفال من احسان واني احبه راح يبقى الك نفس المكانة نفس المعزة نفس الحب

اطلع اجهز لزواجي فكري كله يبقى يمه رغم اخلي يم دينا او فرح بس احس مقصرة وياه ونفس الوقت ماريد اخذه وياي للمول اتعبه بالفره

خوو احسان موعت اذانه بهالموضوع اسأله انت تحب حسوني مو ؟ انت تحب الجهال ادري بيك
وحسون امانة يمك وانت تكفلت بي وهو يحلفلي يحبه ويكول هذا ابني مو كافي حتى  اسمه مشتق من حروف اسمي وهو ابنج يعني ابني واني احبج واحب ابنج و اني هم واثقة منه ومطمئنة بس مدري شبيه مقهورة عليه ...

موج تكولي هو مو اول طفل مراح يعيش ويا ابوه الحقيقي واحسان يحبج ويحبه كافي تفكرين التفكير يكبرج ويتعب بشرتج وراج عرس 

اني احب كلام موج يطمني هواي .. 

خابرت احسان قبل الحنة بيوم
كتله يعني ضروري نسوي عرس وقاعة وهوسة
كال بنبرة حزم اي ضروري اني احبج واريد افرح باليوم الي راح تجين بي يمي واريد ارگص للصبح

ضحكت كتله خوش انت اركص واني انااام
كال شحدج والله ولا تنامين حارمتني منج صار شكم شهر وتردين تنامين دااااا عند اااامك

كتله امي متوفية يعني شنو اروح انام يمها بالمقبرة
كال انجبي لج اسم الله عليج .......

كتله بعصبية انت تگول
كال يلللله دااااا عند خالتك ارتاحيتي واكفتلي ع الحرف شبيج عبالك جابريج عليه

هو من ناحية شبيه اني صدك مادري شبيه ومادري شنو اريد .....

قبل ماروح للصالون لزمت حسن العب بشعره وابوس بي وموج فوك راسي واكفة يله ويله وحنتأخر

كتله حبيبي تروح ويايه لو تبقى يم ماما فرح
باوعلي كال انت تتأخرين ؟
كتله للعصر بس
باوع بتفكير كال اني احبج ماتزعلين
هزيت راسي بمعنى لا
كال دانيال كالي حيجيب صعادات اريد اشوفهم
هو يموت على جهال فرح وكلش يحب يبقى يمهم
بس اني مية مرة سألته تروح ويايه لو تروح وي فرح
موج تكولي صدك جذب وين تاخذينه للصالون من الصبح للعصر ديله شبيج يتعب يضوج انت تدرين بي شكد يحب يبقى يم الجهال دكومي يله

كمت وياهه اباوعله الليلة شون راح اتركه اني من ولادته لهسه متاركته ولايوم وهو عبالك حاسس انو ملازم يبقى ويايه الليلة مچلب بفرح وداني

بالصالون الكوافيره تخليلي مكياج وعيوني تدمع فرحانة على متوترة يمكن هذا اليوم اكثر يوم جان باحلامي ولهذا الشخص الي شكد تمنيته وشكد دعيت من ربي يفكه من سجنه ويصير من نصيبي شكد جان گلبي هووسة عليه حمدت الله على تحقيق امنيتي ودعيت يوفقنا ويسعدنا

جان المكياج نازك وهادئ ومو هوسة وبس بارز ملامحي

من طلعنا من الصالون ورحت اله جاي يستقبلني بباب الصالون وبيده بوكيه  الورد اني مدري شصار بيه اجيت اطلع گبل لو ما موج وگفتني وظليت اهفي على وجهي من شدة التوتر

هو اجه تقرب قدملي بوكيه الورد وظل يبوس بيه وجان يعلچ مدري شبي يمكن متوتر مثلي لا والله مااظنه متوتر شبعني بوس المجرم  المنحرف اخذ اديه بوسهم وخدودي اربع بوسات وعلى راسي واخر شي همس باذني اشتعل يومچ على  هالجمال هذا كله الي ؟ والله ولا مصدگ ....... !

اباوعله واضحك طالع حلو حتى عيوني مدتشبع شوف منه
رجع همس باذني وهو يباوعلي بلهفة ونظرات جريئة كال والله صدك حجايتج احنه شنسوي بالهوسة لو نروح من دربنا للفندق هواي احسن نوفر وقت

باوعتله بتوسل يااا احسان صدك تحجي يمعود دكول غيرها

كال ولج انطيج عيوني تشوفين روحج بيهم هسه ؟؟

وصاحولنا وطلعنا خليت ايدي بعكسه ومشينه جانوا شرار ومهيب ولهيب جايين وياه وسووله هوسات يم باب الصالون كلبوا الجو واخذونا سوينه جلسة تصوير وانطلقنا بعدها للقاعة

هناك اول مافتت ادور حسن واني بمراسيم الدخول
للكوشة عيوني تدوره وگلبي يدگ اريد اشوفه عبالك سنة مشايفته .... اول ماكعدت بالكوشة كلت لموج تجيبه وهو جان يكمز ويه الجهال

فرح تباوعلي وتبجي وهي طالعة تجننن واحسان شافهه كلي هسه اذا بجيتي اخذج واطلع
كتله والله مو بيدي هي الدمعة وحدها توگع
كال لعد خلي فرح تطلع
باوعتله بصدمة يااا صدك تحجي
كال والله أني متوازي الليلة  بچي ماريد گتلج ...

بعدها گمنا رگصنا شويه راح التوتر وحل محله هرمون السعادة

وركصنا سلو على انغام اغنية الكوكب
كون نصير اني وياك نجمة بالسما وغيمة

واحسان يغني بأذني بنفس اللحن كون نطير اني وياچ هسه للفندق ....واني اخرب ضحك على سوالفه

وصار وقت نروح للفندق حضنت حسن وشلته وابوس بي واريد بس ابجي
هو كال ناخذه ويانه ؟ وخله ايده على راسه تروح ويانا بابا ؟

هو سأله شوكت تجون
حسان جاوبه باجر ...
كال اني اروح ويه دانيال وماما فرح باجر اشوفكم ....

اخذته فرح مني واحنا رحنه للفندق ...

بس دخلنا للجناح مالنا بالفندق حضني بلهفة وحب وحنية  تصلب جسمي من شدة التوتر .. وصرت احس  بكل شبر من عضلاته ...حاوطته باديه واني هم فرحتي ماتتقارن بفرحته وحمدت الله هوايه لان سهلها عليه

هو  جان يحضني بقوة بعدها بدقيقة خفف وصار اكثر رقة ونعومة حبيت القوة والحرارة المنبعثة منه
صفن بوجهي وهمس احبج واصابعه على بشرتي....

واحنه على هالحال اندكت باب الغرفة هو راح فتحها واسمع مهيب يكوله هاك اعلف ادري بطموح البهايم علفها

هو رد عليه امشي ولي يا بهيمة ولا تلفي بعد

خليت ايدي على حلگي واضحك ... سمعت صوت الباب تنسد وهو اجه جايب صينية وعلاليك خلاهه ع الطاولة
نزع سترته وهم اندكت الباب

راح فتحها واسمعه يكول هاي شنوووو بعد
جاوبه لهيب هذا كباب ومقبلاته
كاله احسان دجيبوهن مرة وحدة شبيك حمش
وانسدت الباب بقوة

شفته اجه بيده صينيه ويدردم اليوم ذول ناوين يكفروني الليلة متفقين عليه ادري بيهم

اجاني كعدنا على السرير يريد يبوسني كتله تعال نطكطك صور عفية تبقى ذكرى

وهم اندكت الباب كال هذول اكيد واحد منهم شنو هالفندق الخايس هذا شون يخلوهم يصعدون كل شويه وراح صاح منوووو ؟

وفتحها واسمعه يكول شتريد انت اللخ ترا موو حالة هاي زقنبوووت مانريد

سمعت صوت شرار يكله هو منو جايبلك زقنبوت سم عساك مااكلت ان شاءالله

كله لعد شتريد فضني
جاوبه شرار جاي اوصيك على اخت مرتي والله اذا شكت منك اله اعلكك بساحة التحرير

كاله احسان متعصب ديله ولي ولي خوفك على روحك انت دير بالك على اختها ولاتظل  توصي

اني ميتة ضحك عليهم .... بعدها اجه يمي حضني مرة ثانية جنت ارجف رغم الجو حلو بس اسناني تصطك وحدها
حتى هو سألني اطفي التبريد
بس اني مااحس ببرد ولا حر جانت مشاعري مخربطة فرح على خوف على حب وعدم تصديق ...
ممصدكة هذا اليوم خلص على خير

غيرنا ملابسنا وتعشينا ....

وكفت ع الميز اجه يمي وخر شعري من يم اكتافي وشم رقبتي ودار وجهي عليه ... صار يباوعلي بجرأة طاغية ... كال اريد اشيلج
اني احتار شنو احجي احس راح اجفص گتله لا عفية خاف اوكع

كال افااا توكعين وانت على صدري ...

وفعلا شالني بخفة وثبات غمضت عيوني واني متشبثة بملابسه من يم صدره كال طلعتي خفيفة

ضميت وجهي برگبته انفاسي المضطربة تلفح بشرته

باسني بطرف شفتي  وحرص يطول البوسة
‏وعض خدي يتلذذ ...
حسيت قلبي يرتجف بداخلي واني بحضنه مسالمة
فتحت عيوني ببطئ ...

همس لتخافين مني اوكي ؟ تشبثت بي اقوة بعد
كعد على طرف الفراش واني على رجليناته ومتوسده صدره
وهو لازمني باحكام

مددني وصار يمي ...اني يمه يم حب حياتي يم الي راح يغنيني عن كلشي بالكون صدري جان يعلو ويهبط حسيت بضعفي وهشاشتي واني يمه حسيت بقوته تخترقني كلي وتغلف قلبي بحبه

متمددة كلي وهو سند نفسه بعكسه ويطل بوجهي ابتسمت وظليت ارمش وعيوني بعيونه مرة ومرة تتعلك نظراتي بالوشم الي على صدره الي صار  عاري ....

هو بس صافن بوجهي ثواني وقرب شفايفه من شفايفي واختلطت انفاسنا .... وايده جوه ظهري ظل يرفعني ويقربني اله اكثر ...

يمكن جانت احلى ليلة بحياتي اگضيها وياه
جان كلش هادئ وحنين ويايه  تمنيت سعادتي تدوم وياه وللابد ..

يكادُ حُسنكِ أن يُغوي ملائكةً،
فما تظُنين بابنِ الطينِ والماء !؟

فرح :-

دخل الشيخ مشتري طقم كامل دشداشة وعگال وعباية عنده مؤتمر .. لبسهن حتى يكدرهن ويتأكد من قياسهن فدوة لطوله يجننن طلع ...

راح يريد يغير ملابسه گتله اوكف ابو مهيب خلي اطكطك حرمل لايحسدونك الجهال هو ظل يضحك ...

سألته واني ايدي على صدره اعدل بالدشداشة مالته وهو عينه عليه ... منو وياكم بالمؤتمر ؟
كال وفد محامين وقضاة ..

كتله هم وياهم نسوان مو ؟
جاوبني :- اعتقد قسم القانون مختلط مو حكر على الرجال ..

التفتت على دانيال وكتله داني اكتب الي كاله ابوك وحط خطين تحت قسم القانون مختلط

هو كله جاسم بوويه ماعليك بامك لا تكتب ولا تحط خطوط

دانيال يباوعلي ويباوعله ومدري شعجب ساكت .. !

كتله اي شيخ ومدام مختلط اكيد ختام القانونية موجودة ؟
جاوب ببرود اي بلا شك اكيد موجودة ؟

شهكت وكلت داني اربع خطوط جوه بالتاكيد  موجودة ....

رديت عليه بصدمة اكلك صدك هي مو بتركيا شعندها
رجعت تطرك للمؤتمر

نزع البشت طبكه عدل باتقان وانطاه الي وكال
والله مشاكل عائلية ورجعت

صرخت ...  جااااسم حط عشر خطوط جوه مشاكل عائلية عششششره

شبيها ختام زعلانة اخذها لتركيا بعد شتريد شلون لو عايشة عيشة امهاتنا قبل

جاوبني لا هي انسانة حرة وبعدين موو عيب الزواج يفشل ولا عيب تنفصل عن زوجها

كتله بحركة فصلوا رأسها عن جسمها شتريد بعد خليها كاعدة ابيت رجلها وتنجب ماعدنه نسوان تتطلك

هو ضحك كال شنو ولج بت عمج هيه وماعدكم بنات تتطلك ؟

شكو تشكيلك المدام ام قاط شعدها وياك وانت شكو تستمع الها وبعدين شنو ماعدها اقارب تشكيلهم بس انت ليكون ولي امرها واني ماادري

رد ببرود : لا مو وكلتني ضد زوجها ولزمت قضيتها

باوعت لدانيال وكتله بصوت شويه عالي يمه جاسم تشكك الورقة هي والخطوط وتبدي صفحة جديدة من لزمت قضيتها وتحط عشرين خط

سألني ببرود ام جاسم  شو صرتي مو طبيعية ؟

اي عيني هاي لو اني عندي قضية ماسويت وياي هيج اموت واعرف شعندك ويه ام قاط امووت

وشوف لا عبالك اني اغار وداعة عمري ولا اغار بس اموت واعرف شعندها تشكيلك اووووي حتى تنقهر عليها لان ام قاط عايشه بحالة تعسف

هو عافني  واني رحت اركض وراه ولزمته
اكلك لا تروح للمؤتمر و وعد بعد منا وهيج اسمي داني جاسم ها شكلت

رد عليه  بعد ما كرص خدي...كلت اروح لان هذا المؤتمر مهم بالنسبة لمسيرتي القانونية

رديت  عليه بقهر...اروح وياك واذا ما قبلت اوكل محامي ضدك وشرط اله
رجل ختام
هسه عوفنه العباس عليك خلي اروح وياك

وترا هااا اني عرضتي سوده ومصخمه اذا ما اخذتني حتى المؤتمر يفشل

وبعدين عود ليش ماتاخذني وياك ؟ خاف اخرب كشختك ؟
ليكون بعلمك اصلا كشختك ماترهم الا ويايه

كال بنفاذ فرح اريد اسألج سؤال  ؟

بسرعة كتله جواب گلبي

كال بس اريد اعرف شنو هالقابلیه لعندج بالكلام بحيث تناقشين نفسج وتتعصبين وتسالين وتردين

رديت بحزن اي شسوي اذا انت بس ساكت عود اني قصدي استفزك حتى تحجي بس شو انت حتى كلامي مايستفزك شسوي اشنق روحي حتى ترتاح ؟

جر نفس وخله ايده على كتفي وقربني اله وكال ام جاسم صدك كشختي ماتكمل الا بيج ادللي اخذج

گلت بفرحة عارمة  العباس عليك تاخذني ؟؟؟
اباوعله مبتسم بثگل ومكتف اديه ويهز براسه ..

واني كتله هسه اروح احجز ملابس بالبيجات اريد اكسر على ختيمه ..

ظل يهز بيده ويضحك عليه واني رحت حجزت ملابس حجزت فستان طويل اسود بالنص بي دگم من فوك ليجوه وعلى الخصر حزام

ورحت ويه موج للصالون وخلينا الجهال يم انين

سويت تقشير لبشرتي والكوافيرة كالت ابد لا تتقربين من الطباخ او الصوبة وخلي كمادات  ثلج لبشرتج
وجان الجو كولش بارد يمكن الدرجة صفر وصلت

واني اباوع على الصوبة وميتة قهر ماكدر اتقرب منها ونوب بيدي كمادات الثلج والجو اصلا ثلج ووجهي كولش ياذيني من التقشير وعلي يروح ويرجع يكولي ادري متوازية واصلا شبيها بشرتج بس انت متعافية ومتبطرة

هاي فوكاها بعد فوك ماريد ارفع راسه واطلع حلوة ..

ورحت وياه للمؤتمر وشفت ختام لابسة قاط زيتوني سترة وبنطرون سلمت من ورة خشمها وتطكطك بكعبها

واني كل شوي اهمس يارب كون ينكسر كعبها وتتفشل وجان اني اعثر همزين محد انتبه عليه بس علي عدلني وسندني وهمسلي انتبهي بويه شبيج

رغم اني مالابسة كعب لابسة فلات بس بعد صارت
رجعت الدعوة عليه الي دعيتها على ختام 

بعدها هو القى كلمة واني سحت على شخصيته وحضوره ياربي شكد احبه

بعدين طكو صور كلهم سوى هو والوفد وختام دحست روحها ووكفت بصف الشيخ وظهرها
بصدر الشيخ

خلتني افرفح وكبيت للستار بعز البرد هذا عركت واحتريت نار الغيرة اصلا تچوي...

ورى مخلصوا رحت يمه وهمستله بزعل
ماتحاضنتوا انته وختيمة وسوولكم جلسة تصوير

وزعلت عليه وهو ضحك وكال تعالي نسوي انه وياج جلسة تصوير

رديت عليه بعناد : مااأريد .. وظليت مطنكرة طول الطريق للبيت واني وياه بالسيارة گلبي محرووك ومفرفحة ... وهو يقنع بيه

اخر شي كال انت هيج تجبريني مااخذج وياي بعد لأي مكان
باوعتله كتله لعد اترك قضية ختام وقنعها ترجع لزوجها

طكاهه ضحكة وكال بويه فرح شبيج بطلي تصيرين عاطفية هذا شغل شبيج انتِ

ودخلنا للبيت جانوا الجهال بالبيت الجبير كلهم يم موج ...

كتله ليش جايبني هنا وديني يم جهالي والليلة اريد ابات ابيت اخويه

كال ببرود شنو يرضيج

كتله لو اني لو قضية  ختام

تقرب مني وحضني كال بهمس وشفايفه قريبة على بشرة وجهي :- لا طبعا انتِ ..

........

.... أنا كائِنٌ مُتناثِر ، إجمعيني بِـ قُبْلة وَاحِدة .

انتهت .

11 اذار 2022 يوم مميز بالنسبة الي 💕

تم النشر في 12 اذار 2022

احبكم كلش 😘🤍

نورا ناصر

بلا زحمة تابعوا قصة الكاتبة Resmalhade

وقصة الكاتبة  asawir-altamimi95