هذيانٌ بين جمرٍ وجليد ..(ارملة اخي المجنونة) الفصل السادس وثمانون 86 - بقلم نورا ناصر

هذيان بين جمر وجليد
الاخير
نورا ناصر

عليمن هيج محتار...مابين عشكج ومابين روحي...
كلتلج من قبل وهسة اكولها وياج انسه همي وانسه روحي...
يبت كلبي المثلج يمي ماصار..لا بالشباب لا بالكبر...
كلبي متيم بيج وعاشكج لحد ما تطيح وركة عمري ويحطوني بالكبر...
اي اي يعني واذا شيخ وامير...هيبتي بيج يمن تسوين كل المضى والقضى والجاي وكل فرحة بهالعمر....
لفرح وعلي ... بقلم الكاتبة asawir-altamimi95

شرار :

flash back ....

اتمنى لو انكِ موتٌ حتى يصبح اللقاء يوما لابد منه ...

.
.
.

بعد ما عرفت الي صار ويا موج ، ايام اني ادور عليها ، وشفت اسمها وتقرير طبي عن حالتها باحدى المستشفيات ، صعدت بسيارتي واني افكار تجيبني وافكار توديني ، موج مستحيل تسوي هيج ومستحيل تاخذ علاج وتقتل طفلنا هيه جانت فرحانة بي ورايدته

رجعت للشقة جانت فارغة ، محمد بالمدرسة وامه بعيادتها ، دخلت لغرفة موج ظليت اباوع عليها انتبهت على الادوية مالتها مخليتهم على الميز

اخذت علب الادوية فرغتهم على الميز ، باوعت اكو اختلاف وموج غبية ممنتبهة اكيد وهيه شمدريها بالادوية

اكيد حامل ودايخة تاخذ علاجها تطلع او تنام ومتلاحظ الفرق ...

المجرمة نيفرا مخلية عقار سايتوتك ويه الفولك اسيد
انفجعت وفتحت عيوووني مصدووم ..

كان من الممكن ترووح بيها وتوصل حتى للموت وتموت
بسبب نزف شديد يسببه الها هذا العقار كلش خطير
لا سامح الله بس الله ستر

كسرت شكو شي كدامي ، اريد بس اهدي نفسي ...
كعدت بالكاع الهث وعيوني براسي

طلعت من غرفة موج ، رحت للصالة ، اخذت تليفوني خابرت نيفر وسألتها واحاول اسيطر على نبرة صوتي لاتشك ضاملها ضميمة ..

كتلها شوكت تجين للبيت ؟
ردت بالروسية انا في طريقي للمنزل الان ..
كتلها واني صاك سنوني انتظرج ..بصوت ماوصل الها ..
كملت اوكي اني هم ...بالبيت ..

سألتني شبي صوتك ؟؟ لكيت موج ؟ عرفت عنها شيء ؟
رديت عليها لاء ماعرفت عنها اي شيء ..
ختمت المكالمة وبقيت انتظرها ..

حضرت كاميرا فتحتها حتى اصورها وانتزع اعتراف منها .. يفيدني بالمحكمة ..

سمعت صوت القفل يدور بالمفتاح ركضت تلكيتها هيه فتحت الباب وسدته واني كمزت صفكتها راشدي وكعت بالكاع تعيط وتتساءل عن سبب تصرفي

لزمتها من شعرها سحلتهه وكفتها ولزمتها من زندهه لحد مكان الي مثبت بي الكاميرا ... وهيه تسب وتغلط بيه وتفشرررر بلغتها ....وويا كل هذا تسأل عن السبب ...

ركضت ع الغرفة اخذت علاج موج ورجعت شمرته عليها .. سألتها بعصبية
هذا انتي الي عبيتي ؟؟؟؟ انت الي قتلتي الطفل ؟

لاحت ابتسامة بطرف شفتها وكالت بلغتها
هذا يعني بانها اجهضت ؟

صكيت سنووني اريدها تأكد اعترافها حتى انقض ٦ليها مثل الي ينقض على فريسته .....

صررخت بصوووت عالي واني كووة عليه محافظ على المسافة الي بيني وبينها :- لييييييش قتلتي ليششش؟

ردت بانفعال :- لانه يشكل خطرا على ابننا ويجب ان يموت ايها الخائن ......

هزززيت ايدي بتهديد :- انتِ استغليتي وضيفتج لقتل روح وعرضتي حياة انسانة لخطر الموت وهذا الشي مخالف للقانون وراح تاخذين جزائج وراح تتعاقبين ...

اجتي تزحف ولزمتني من رجليه وتصرررخ
لالا انا اردت ان انقذ زواجنا وطفلنا اتوووسل اليك الا مهنتي ، خذ محمد واترك لي عيادتي انا متأكدة بانك سوف تهتم به جيدا و لن تأخذه و تعود به الى العراق صحته لا تحتمل ذلك لكن اترك لي وظيفتي ارجوووك ...

ظليت ادفر بيها واضربها واصيح اي اي هو هذااا ااي يهمج تبيعين حتى ابنج عمود شكم روووبل مووو ؟؟؟
لااا والله الا اخسرررج كل شي كلللل شي ....

ضربتها حد مااحسيت راح تنتهي بين اديه ، اخذت الكاميرا وتركتها تتوسل ...

ونزلت لسيارتي سقتها واني نار مجتاحة كل دواخلي بقسووةة ووينج موووتي وووينج .. محتار وادور عليها وكلفت زميلي بالجامعة يجيبلي عناوين زميلاتها ووين ساكنين ..

اجاني اتصال منه ... وانطاني عنوان العمارة الي هم بيها .. ومن لزمتني الشرطة انسجنت ومن دفعت الغرامة وطلعت جانت موج مسافرة ونيفرا ماخذة ابني ورايحة لغير ولاية ...

حسيت تحطمت بهاي الفترة ، شكل عندي الضغط ... موج كسرتني من خلتني ورى ظهرها ونيفرا خطفت ابني ...

اخوها الكلب دز عليه عصابة قتلة مأجوريين لحتى يقتلوني بس نفذت منهم بأعجووبة .. ولجأت للشرطة ..

بقيت ايام ادور على ابني وخطر حياتي مهددة واني بغربة ، الى ان اجاني اتصال من مركز الشرطة يبلغني انو هم عثروا عليهم

رحت اخذت ابني ملهوف وجانت حالته تعبانة ممصدك حضنته واديه الصغيرة الي تعبها المرض محوطتني ويضحك ويسولف وياي

من البداية امه زرعت اباله فكرة انو اذا اتركه يموت لذلك هو يخاف يفقدني يخاف من الموت ..

وبدأ مشوار المحاكم جلسات الطلاق والتنازع على الحضانة ، المحامي مالتي قدم هواي ادلة الي عندي تدين نيفرا منها اعترافها بقتل الجنين وتقرير الطبيب الي اشرف على حالة موج بالمستشفى ...

ادينت نيفرا واخذت جزائها وحكم الحضانة اخذته لصالحي ...

بذيج الفترة واني جنت مشغول ادور على ابني عرفت بموج رافعة عليه دعوة طلاق ... دزيتلها رسالة وحدة بس واكدت الها بيها انو اني ما اطلك ..

اخذت ابني وطلعت من مو سكو ، بهاي الفترة هو مايكدر يمشي ، اله على كرسي متحرك يكعد ، السرطان تعبه هواي ..

جنت افتر بي بين معالم مدينة سانت بطرس بيرك .. واني اوعده بس اخلص علاجه هنانه نروح للعراق هناك راح يكون عندك اصدقاء وحجيتله على دانيال ديما وفاطمة وشوفته صورهم

يسأل على موج على امه وعلى بيبيته امي وام امه .. هو يفتقد امي اني مكتله ماتت هو يخاف من سيرة الموت .. كتله ان شاءالله نرجع للعراق وتشوفهه بس تتعالج ..

قطعت اتصالاتي بأهلي ، اريد اعاقب موج بغيابي ، وتعبت من ملامة علي الدر واني بحالة صعبة وابني كل فترة ينتكس ويفتقد امه ..

سلوتي الوحيدة والي بقى منها هيه كلادتها الي ظلت يمي كلادة خارطة العراق كل اغراضها بقت بالشقة واتي طلعت لغير مدينة ...

جنت اطلعها واللعن الساعة الي قررت بيها اطلع للدراسة بروسيا واتزوج من روسية مدري اللعن الساعة الي شفت بيها موج وحبيتهه وتأذت بسببي ...

هواي ناس متزوجين ومستقرين الا اني وحظي بس اني اعترف ماعرفت اتصرف وحبي لموج عماني وانانيتي ورغبتي بالحصول على كل شيء اريده دفعت ثمنه ...

وباقي بس ابني واريد من الله يبقي الي لان خسرت كل شيء ..

مرت فترة ، رجعت لموسكو عمود عندي شغل بالوكالة مالتي .. رحت قابلت صديقي الي سلمتله الوكالة ..
كال اجوا هواي سألوا عنك ومن بينهم شخص كال انو اسمه لهيب وهو يصير ابن اخوك ...

تنهدت اعرف خليتهم خايفين عليه ودزوا لهيب لروسيا يدور عليه ...

وكمل كلامه صديقي :- واجتك هواي طرود واكو وصلتلك رسائل من العراق خليتها على مكتبك ..

توجهت لمكتبي ، جانت رسايل من اهلي لان اكيد عجزوا يوصلون لتليفوني ...

ظليت افتح بيهم واقراهم ... رسايل من علي الدر مهيب لهيب وحتى من حسان ..

وبعدها شفت ظرف عالي شوية فتحته وشفت بي صور موج ويه زياد بلقطات مختلفة بنص الشارع ..
تملكني الغضب واسئلة تدور براسي ..

هذا الي صورهم اكيد هم عجز يوصل لتليفوني لان اني غلقت كل شي بهاي الفترة ...وهنا الحجي بعد مرور اكثر من سنتين من لمن طلعت موج من روسيا ورجعت لبغداد هذا شعنده بعده وياهه ؟؟

والي اعرفه هذا ابن مسؤؤل واولاد المسؤؤلين معروف عنهم مستهترين وكل شيء يكدرون يسوون ..

خابرت لهيب بسرعة لان ماا اأمن محمد يم اي احد وهو لهيب عايش بروسيا اكثر من خمس سنوات ويعرف يتصرف هنا ..

رجعت للعراق واني ورأسا اخذت عنوانها من مهيب واني بالمطار كال بس هسه مراح تلكاهه بالشقة هيه تشتغل بقاعة رياضية وهم انطاني العنوان ورحت عليها ..

من شفتها جنت محتاج كل ماعندي من صبر ، حتى لا اتنازل الها واكللها مشتاقلج ، تملكتني رغبة باحتضانها
بداخلي حرب بين كبريائي واشتياقي والعذاب سيد الموقف ...

بعد ما تعاركنا بالقاعة وتأكدت انو اوس ورى هاي الصور توجهت للقصر بسرعة ، دخلت وتوجهت رأسا لغرفة مهيب وظليت ابحوش بأغراضه ادور المسدس ..

فات مهيب للغرفة .. هاا ولك شدتسووي ؟
جاوبته بحدة اكل تبن وطلعلي مسدسك يله ...

اجه يمي واني يم الكنتور سحبني من زندي
كال بصدمة شسووي بي ؟؟

اريد اوولي لبيت أوس واريد زلمة مشورب يووكف كبالي ؟؟

رد شنووو على شنوو ناوي تريد تكتله ؟؟

كتله بصياح اكتله طبعاا اكتله اسفره لجهنم النار تريد حطب ...

رد بتهكم :- وهيه النار ظاله على اوس حتى تريد حطب مخبل انته اكعد واسكت ...

اجانه صووت هزز اركان الغرفة
تريد تكتل منووو ولك شرير ؟

بدون ماارفع راسي بقيت مدنك وعرفته صوت علي الدر ..
وكمل كلامه بانفعال :- انتَ شنوو ولك تريد تبلينا بلوى ؟؟ تريد تكتل هذا الحيوان حتى يحسبونه علينا زلمة ؟ ....

تريد تبلي روحك !! لو تريد تكتله وتشرد وناسي عندك مرة هنا ؟

جاوبته بتلكئ مرتي طالبة الطلاق ومايهمها اصلا ...

رد :- تجيها صحوة وترد الك ليش تعالج الخطأ بالخطأ ؟؟

صحووة!!! صارلها شكد مااجتها اشوو وبعدين انه ما اريد مرة خلتني ورى ظهرها ومشت

من سوالفك الزعطووط مايسوويها وكلي على شنوو كل هذا شبي اووس وتريد تكتله ؟

كعدت حجيت اله على كل شي ...

هو ظل يحاسبني ويرزل ويحجي عليه
ومال صوجك عينك على مالك دوة ، واكيد وصلت اخباركم لاوس وسوى هذا الشي ..

كتله كتلته على ايدي ....

رد انننجب وتكعد هنانه وامشي وياي بوويه مهيب نروح لبيت الحجي ..

كمت على حيلي كتله اروح وياكم اني مو زعطوط ولا راح افوتها اله هالمرة

لاا اشووو تبقى هنانه ولك انته سواياتك الها اثر بالتاريخ تريد تصخمها بعد هالمرة ما اسمح الك وحضر روحك حتى ترد مرتك وهذا امر ...

فركت وجهي ؛- شيخ اني اريد ارجع لروسيا ابني عنده جرع لازم يكملها هناك وهيه مستحيل ترجع وياي لروسيا ..

صاح اي اذلف وولي بس صلح كل شي هنا قبل لاااتروح افتهمت ....

اخذ مهيب وطلعوا وراحوا لبيت اوس .. ومن رجعوا سألت مهيب عن الي صار كال جد اوس انطاه امر يطلع من بغداد ويروح لغير مكان والا هو راح يسجنه هالمرة بنفسه ....

بس هذا ما ريحني اريد اني اطيح حظه بنفسي روحي مشتعلة نار بسببه شلون يصور موج بهالطريقة ......

موج :

هو كال اي شوفيلي شوكت المرافعة الجاية خلي اطلكج وكل واحد يروح لطريقة ...
كتله ديله طلك واني هم اريد اخلص تعبت منك ...

اجه لزمني من ايدي ويباوع لاحمد وكال قبل لا اروح من رخصتك ابو شهاب عندي وياهه حجايتين على انفراد وسحبني

وكف مقابيله احمد كاله هو انته خليت بيها رخصة وبعدين ماتجبرها على شي مو كيفك بطل تتسلط عليها شوفها تقبل تحاجيك على انفراد لوو لا وبعدين يله مو تسحبها وراك موو اجباري تسمع الك عندك حجي احجي كدام القاضي ..

هو بعده جان لازم ايدي قووي اريد افلتها منه ما اكدر ...
جاوبه شبييك ترى مرتي هيه شبيك ماتصير واسطة خير...

كتله ميخالف اسمعك بس عووف ايدي ...
هو ماترك ايدي اول باب صار كدامه فتحه وطب بالغرفة ...

جانت خالتي كاعدة تحووك هيه شافته فات هو تصنم بمكانه وهيه رفعت راسها وكلتله ها ولك كو**د ماتستحي طاب عليه للحمام

هو ظل يباوع على ارجاء الغرفة عباله صدك حمام ...
رحت يمها كتلها خالة بس شوية احمد يريدج برة روحي شوفي شنو يريد

كالت ولج سعدية اخذي كو**ج وطلعي لا انبت الصنارات بعيونكم هسه ...

هو سحبني من يمها كال اكلج ترى خالتج تخووف
باوعتله اهدها عليك هسه ؟

كال دمشي لغير غرفة ماكو بس هاي الغرفة بالشقة ؟

ليش انته ناوي تطول بالحجي مو ع االاساس كلت حجاية وحدة؟

اشوو صايرة متستحين كلش وتطردين ...

تنهدت واباوعله بانزعاج .. هو شوكت طردتك انته غير هذا كلامك ؟

خله ايده على خصره ورافع حاجبه ...
ديله شوفيلي غير غرفة احجي بيها وياج ...

رحت اخذت خالتي وطلعتها وهيه تفشر علينا اني وشرار ..

بقى الباب مفتوح هو راح سدداه اني خفت على نفسي منه .. بقيت حاشكة نفسي بالباب ..

هو تقرب مني كم خطوة خليت ايدي على مقبض الباب ..

ظل يباوعلي بنظرات غريبة ما تتفسر ...
يله متحجي خلصني شكوو تباوعلي هيج ؟ شوف اذا تريد اتنازل شيلها من بالك انته متستاهل اتنازل عمودك لانك اناني وتريد كل شي الك ..واني اكتفيت بحياتي وياك

انته غدرتني واذيتني وجذبت عليه ، مية مرة كتلي علاقتك بزوجتك منتهية وهو جذب وبيتك انييي ابيتك واتعرض لاسووء شي ممكن يصير لأي مرة وهيه انتزاع جنينها من بطنها بهاي البشاعة والقسوة

وانت المسؤؤل عن كل هذا اني لحد هسه متدمرة من ورى مرتك لحد هسه اعاني من اضرار الي سببتها الي مرتك ايام واني اشوفك وياهه واسكت سكتت هواي بس هسه لا بعد وحتى الايام الحلوة الي عشتها وياك مستحيل تشفعلك ..

ابتسم بسخرية :- بعدج تلحين هواي ...

_ مبين فارغ ماعندك حجي جذاب مثل عادتك وطبيعتك كل مرة ، اطلع احسن .. حركت مقبض الباب دااطلع
تقرب ولزم ايدي وصار مايفصلني عنه هواي ...

باوعتله وبعيوني انهار من الدموع وصدري معبى بالحنين والاشتياق ..

كال :- راح اطلكج بس راح اقتل اي شخص يتقرب منج او تفكرين تتزوجينه .. مادام اتنفس محد يقترب منج وياخذج ...

جان يتحدث بلهجة عادية لكن العنف واضح بأعماق عيونه ...

ابتسمت باستهزاء :- انت شخليت بيه ماتكولي شخليت ؟؟ حتى افكر اتزوج ..

كال بثقة لاء انت ماتفكرين تتزوجين لان بعدج تحبيني ...

رديت بحزن :- حقدت من خذلتني وخنتني وكرهت نفسي أكثر لأن ماكدرت اكرهك وهالشي يخليني حاقدة عليك ولو اكرهك جان احسن الك من هالحقد الشايلة قلبي عليك ...

كال اسمعي اذا وصلني خبر ملتقية بزياد او متواصلة وياه والله اقتله والله ..اكدر استدرجه واموته .. اقتله وانتي ما ارحمج اني لحد هسه ممأذيج وصابر عليج ومطول خلك بس لهنا وكافي...

رديت بتبرير :- ماعندي شي وياه ولقائي بي جان صدفة وماطول خمس دقايق والرجال اله فضل عليه وحتى يطلبني فلوس لوو ما هو جان اني تحت رحمتك ورحمة مرتك لهسه ...

رفع اصبع الشهادة بتهديد بوجهي وكال لا تبرررين موج لا تبررررين؟ واسمها طليقتي طليقتي دتفهمين عليه ؟
ودار وجهه وانطاني ظهره ...

كال مشكلتج مالج ثقة بيه .....

كرهت الدفاع عن نفسي بلحظتها كتله يله شرار خلصت ؟

كال بنفاذ صبر يله سويلي طريق ..

فتحت الباب وطلعت احس جنت مخنووكة يمه وهسه تنفست ......

وراها رحنه للمحكمة .رحت اني واحمد . عود يطلكني بس صدمني من كال كدام القاضي انو متمسك بالحياة الزوجية وانو موافق على كل شروطي وكال للقاضي انو مستعد يعيش ويايه باي مكان مكان اريده اني سواء بروسيا العراق او اي دولة ثانية وكال بس اكمل جرعات ابني ودراستي ارجع واستقر هنا اذا هيه تريد .. بحيث قنعه للقاضي ورفض القاضي يطلكنا وبعثنه للباحث الاجتماعي ..

خلاني مصدومة ومن طلعنا تعاركت ويا تمنيت اخذه واشمره من فوك درج المحكمة ..... هو يضحك ولا هامه واني النار مشتعلة بيه ..

رجعنا للبيت اني واحمد وظلينا نتناقش احمد كال اخابر الشيخ واكله على سوالف اخوه ...بعدها تردد وكال لا ترا اكيد الشيخ هيج موصي يسوي
تدرين ليش لان اذا ماحضر جلسات المحكمة يطلكج من القاضي تفريق للهجر ولو اني ما افهم بالقانون بس اعتقد هاي وصية علي الدر اله لان علي رافض تنفصلون وكايل لفرح محد غير موج تكدرله يبطل سوالف الروسيات ويرجع يستقر هنانه يمنه .....

شفت كلامه منطقي علي رافض انو نتطلك وكل مرة يشوفني يقنعني ارجع لشرار .. ظلت الافكار تجيبني وتوديني خاف صدك اتطلك منه ويرجع يتزوج روسية ثانية !!!

اني احبه بس اريد اأدبه ، مستحيل اتزوج واحد ثاني غيره مستحيل .. صعب اتخطاه واني حبيته من كل قلبي ، مثل عرك ينبض بمعصمي وما اكدر اقطعه ..

.....

بعدها صارت ولادة فرح واني رحت وياهه .. جانت نايمة ع السدية وتطلك خطية وتصرررخ ..

كلتلي مووج عفية انطيني ايدج اعضهااااا .. كتلها ولج هو انت شبقيتي بيه ملختيني شنوو ولج ايدي صخل فدوة دجيبي وفضيها الله يخليج بأقل الخسائرررر ...

لشووية هدات راحت الطلكة وهيه مبل الي غفت واجت دكتورة كالت وين ام جاسم مرة الشيخ ديوصي عليهاااا ...

هيه سمعت الدكتورة وهيه فزززت وسحبتني ولج رووحي كليله لا يفشلنا ويكوول ام جاسسم روووحي ...

اني اريد اروح هيه صررخت واجتها الطلوكة ... وصاحت موووج تعالي لالا موج رووحي ..
وكفت ارووح لوو اجي والله احتاريت والله ...

الدكتورة كالت ياا هاي انت ام جاسم عبالي مرة كبيرة ...

وبعدها زاد عدها الطلوك واني تملخت تملخ من وراها اول مرة اجي وياهه للولادة ، بدانيال اجت وياهه الحجية الله يرحمهه وبلقيس ..

ولدت وجابت بنتها رواء الحمدلله جنه متوقعين تجيب عملية بس الحمدلله الله سهل الها هالمرة .. وولدت طبيعي ..

من طلعت استقبلها الشيخ وباسها على راسها وهيه ع الكرسي المتحرك واخذ اديها بوسهم وهيه مطنكرة عليه ليش تكول للدكتورة ام جاسم .. ظل يضحك عليها ..

فرح .. ولدت بنتي رواء جنت فرحانة بيها .. والاكثر مني علي .. طاير بيها وميفاركها .. جنت نايمة ع جرباية وبصفي رواء اجه كعد يمها وظل بس يباوع عليها ويقرا عليها ايات قرآنية بقى ربع ساعة ماباوع عليه واني صافنة بوجهه كتله علي تحبها اكثر مني

ابتسم بوجهي وباسها على راسها واخذها خلاها بسريرها واجه تمدد يمي بوس ايديه وراسي ..
سألني ليش تغارين منها بويه ؟
_ صار ساعة تباوع الها وناسيني ..

ولج شلون انساج وانت ويه نبضي وويه نفسي ...
بس فرحان بيها بوويه مو شويه خسرت اثنين قبلها ..

خليت راسي على صدره لعد شوكت حبيتني ؟

جاوب :- من دخلتي للقصر وبدت شخصيتج تسيطر على كل شي جنت من اشوفج او اسمع صوتج او تجين يمي تشكين من الي يأذيج جانت دكات كلبي تثووور عليج مادري غضب مادري كره لان تصرفاتج جانت ماتعجبني انفعالج وهجوميتج يضوجني ..

بعد وفاة المرحوم وبعد زواجنا ...

ماعرف شوكت تصاعدت هاي الاحساسيس وصار القلب ينبض بحبج ....

..انت وحدج جنتي تخلين نبضات الگلب تتسارع والمشاعر تثوور
جمالج مو وحده سبب كافي انه اشعر باتجاهج بما هو اكثر من الرغبة ، الحب الحقيقي الي صعب الشعور بي حسيته وياج بس انتي ....

شرار :

خلصنا اجراءات المحكمة ورجعت لروسيا يم ابني واستمرينا بالعلاج .. جنت اخذه يشوف بيبيته وامه ماحرمته من شي ..

بقى بالمستشفى اشهر وخلص كل الجرع مالته ، واعلنوا الاطباء شفاءه بالكامل ، طلعته واني فرحان وقنعته عمود الروحة للعراق ، وهو اقتنع من كلامي ، لان امه جانت هواي مخوفته من العراق ، اني غيرت نظرته ..

سويناله حفلة كبيرة بروسيا ويه بيبيته وجده وهو جان كلش فرحان بيها ...

ما اعرف شنوو الي صار وانتكس بعد شهر واحد من اعلان شفائه الاطباء كالوا عدوى وتدمرت كل اعصابه هالمرة بعد سنوات من العلاج والمعاناة وبعد اعلان شفائه صعدت روحه للسماء بليلة سودة مات وخلاني بحالة صدمة صعب استوعبها ...

حسيت نفسي بنيت عمارة كبيرة وبعد مافرحت بيها انهدت فوك راسي حسيت نفسي بشفائه صعدت للسماء من الفرح وبفقدانه وموته حسيت روحي وكعت على الكاع وتفلشت ...

شنووو الي صار وليش ماجنت مستوعب واني وحيد وبغربة .. خسرت كل شي تعب سنين راح بلحظة ....

الحزن سيطر عليه ماتوقعت راح يموت ويفارقني بهالسرعة هاي ..

اجوني علي الدر ولهيب لروسيا وسوينا اجراءات اصريت ننقل جثمانه للعراق ندفنه ... واخذناه ورجعنا للعراق ودفناه بمقبرة اهلنا بالنجف ...

موج :
الصُدفة التي جمعتني بكَ
كانت كـقضبانٌ من النيران
أحاطت قلبي ...
وخَلفت بعدها كَومةٌ من الرمادِ
بينَ ثَنايا روحي !!!بقلم noora-1995

سمعت بخبر وفاة ابنه ، انقهرت حيل هو يحبه ومتعلق بي ومداريه كلش شلوون هيج مات بسرعة ، لا اعتراض على حكمك ياربي ...

سمعت بي اجه للعراق ترددت ايام اروح اشووفه اعزي بس بعدها تشجعت ورحت اله ...

فتت للقصر جان العزا من ايام مخلص .. شفت هدى سألتها عليه .. كالت فوك بغرفته تردين اصيح لهيب يكوله ينزل الج ...

كتلها لا اني اروح يمه ...

صعدت الدرج واني تمر عليه ذكريات هذا البيت ... كلها من جانت عمتي عايشة الى الوقت القضيته بعد ما هو سافر وتركني ، ووتعلق عمتي بيه ووفاتها وووو هوايه ذكريات ...

وصلت لغرفتي الي تزوجنا بيها وكفت مقابيلها ، انملت عيوني دمووع ...

دكيت الباب بخفة كم مرة ماكو استجابة ، جنت رايدة ارجع جنت خايفة من لقاءه ماريد اشووفه مكسور ومتعذب ... جنت اني متعذبة ويا واككثر ..

بس بعدها تشجعت فتحت الباب شفت الغرفة ضاوية وهو نايم على السرير .. ساعد ايده على عيونه ولابس كيمونه سودة والغطاء بس لحد بطنه ...

رحت كعدت بصفه على السرير .دايره صفح. واباوعله وامسح دمووعي ..تنزل غيرها مبين تعباان حيل ..

على صوت شهكاتي الي مكدرت اسيطر عليها تحرك واني فز قلبي ..

وخر ايده من على عيونه جانت حمرة دم .. وشافني تفاجئ .. كعد على حيله ، خليت ايدي على حلكي شهكت من البجي مااعرف حتى شنوو احجي ..

بسرعة حضني حسيته ينفذ داخل ضلوعي ، يبعثر دقات قلبي ويعيد ترتيبها ... هو راحتي وهو هلاكي يغركني وينقذني يموتني ويحيني

كال مات محمد موج ماااات .... اني وحيد هسى موج ماعندي احد بس انتي محد يفهمني غيرج ...

كتله الله يعوضك حبيبي!!!!

وخر من حضني ولزم وجهي باثنين اديه ....
كال بس انتي تعوضيني ...

حركت راسي تملصت من اديه .. هزيت راسي ..
اني جايه اعزيك شرار اني اسسسفة ... عفته وطلعت بسررعة ماردت اضعف كدامه مجنت جايه ارجع اله ...

بس لمن تركته تركته واني احس برمح يثقب صدري ...

بهاي الفترة قررت بعد اترك قرار الطلاق واحترم مشاعره .. هو تعبان حيل .... تركته وسكتت عنه ..

ريلام :

اجتي هيام للبيت مكتوولة وجهه مدمم فد نوب واستنجدت بأمي وتبجي وكعدت تحجي لأمي كل شي .. وامي تدك تلطم ...وهماتين عيالها اخذوا منها جهالها عندها اولاد اثنين ..

هو زوجها من فترة مريض واهله احتاروا وياه وكالوا صايرة بي جنية ووصل للموت ..

وهسه عرفوا بيها تسوي سحورة شايفين سحر بغرفتها
وعرفوا هيه سوتله سحر وطردوها واخذوا الجهال ...

كعدت يمها تبجي وتناشغ وتلطم .. كتلها انت ليش هيج سويتي بنفسج شكد نصحتج ولا فاد وياج بس كليلي انت شون عبرتيها على محمد من تزوجتي وانت حتى للساحر سلمتي نفسج ..

هيه بعد شوويه وتضربني وكعدت تصيح عليه وتحلف والله ماتوقعتج هيج مكان متسانديني ولج اني شوكت انطيت روحي للساحر

كتلها لعد مو مهيب شافج ابيت الساحر ماتبتي من ذيج الساعة ...

كالت بس اني ماسوالي شي صح سحرت محمد بس هو الوحيد الي لمسني مانطيت نفسسي لاحد ...

اجت امي كلتلها ولج جدج عرف بالسالفة خابروا عليه عيالج ويكول بس يجون اسلمها الهم وشيسوون بيها خلي يسوون عسى ما يوذرونهه ويشمرون لحمها للجلاب تستاهل ...انوب عليه امهات السحورة ..

هيه ظلت تلطم وامي كالت لبسن وامشن نروح لخالجن علي الدر ماكو غيره ما يتخلى عنه ..

كلت بقلبي هسه يلا عرفتوا خالو علي الدر .. لبسنه ورحنه لبيت فرح دكينه الباب طلعت فرح بس فتنه هيام نزلت على ايد فرح تبوس بيها وتبجي

فرح حبااابة الله يخليج الله يطول عمرج ويخليلج جهالج كولي لخالوا خلي يرجعلي جهالي فدوووة ...

فرح كولشي ما افتهمت .. خطية بس قلبها طيب وابيض ولا يشيل حقد ، فوتتنا للبيت وتدردم على عيال هيام ماتدري بالمصيبة الي مسويتها هيام شنو ...

دخلتنا جوا وراحت خابرت خالوا وكعدت ماما تتوسل بيها تكوللها عيالها يسوون سحورة وشامرين بغرفتها

بعدها ممكملة ماما طفرت فرح عزاا العزاهم شوون بشر شكد اكره الي يسوون سحورة هاي كله وحدة تسوي سحر الله يبليها ان شاءالله ويطيح حظها ساقطات ميستحن ...

وهيام سمعت حجي فرح وظلت تباوع لماما وتعض بطرف العبايه مالتها ...

شويه واندكت الباب وبالكاميرا شفناهم عمة هيام ومرة حماهه وحماتههه ...

طفرت هيام وراحت تبوس بفرح حبابة فرح يخليلج جهالج ان شاءالله لا تسلميني الهم خاف يموتوني هسه ...

وخرتها فرح وانت شمسوويه فوكها شحدهم فوك ميسوون السحورة ورفعت ايدها شكلت ردانهه وتصيح عليج وتطل بالكاميرا عبالها راح يسمعوها
جايتلجن امهات السحورة اني اعلمجن .. اصبرولي حقجن ماتعرفن منو ام جاسم ...

وطلعت الهن واني اجرجر بيها ومايفيد متحمسة ..
فتحت الباب وظلت تصيح عليهن شعدجن هااا امهات السحورة رجعن للبنية جهالها يله الله ماتخافووونه

كلولهة ولج هو منو سوا سحورة غير بنتكم الادبسز تسووي سحوورة لابنه ووصلته للموت اي والله اذا مات اله انسويها وصلة وصلة

هيه فرح باوعتلي وكالت ريلام شنو السالفة ..

هنه طبن بنص الطرمة وظلن يهددن ويصيحن ويفشرن على هيام ويسمعنها اذا صار بمحمد شي اله يموتنها .... وراحن بعد ما ذبن فلك ...

اباوع لفرح جنها باكت طن هوووا ...من الخوف ..
وظلت كل شويه تخابر خالو يجي يتصرف ..

بعدها رجعنا للقصر .. وخالو تدخل وهدأهم بس رفضوا هيام وخلوها معلكة بلا طلاق وخالو ذب الصوج كله بماما لان هيه دللت هيام وما جانت تحاسبها على اخطاءها ..

مرت فترة هيه تلوب على جهالها بس خالو راد يعاقبها .. حتى مارجعهم الها واكيد جان عقابه قاسي ..

محمد صار زين وارتاح من سحورتها ، ظلت تتوسل بي يرجعها ماقبل ..

وبعد فترة تزوج وهيه بقت تاكل بروحها ...

بس جهالها تمرمروا وتعذبوا هواي .. مرة ابنها انكسرت ايده والثاني اربعة وعشرين ساعة مريض اسهال وتقيء ومحد يهتم بيهم ...

وبعدها سمعنه انو طلك مرته بسبب خلافاتهم على الجهال ..

خالو تواصل وياه وطلب منه يرجع هيام وهو يكفلها اله ...

هو كله ارجعها بس اهلي مايردوها ولا يتقبلوها بعد واني ماعندي امكانية اعزل بيت وحدي ومالي ثقة بيها اخلي يمها الجهال وهيه عدكم ...

عاد خالو تكفل وخلالهم بيت ورجعت لمحمد بس هيه بقت عايشة وماعايشة حسرة عليها الطلعة والتليفون
والثقة بيها معدووومة ..

مهيب :

ببداية سنة ٢٠١٩ طلع عمي حسان من السجن ورحنا كلنا استقبلنا ... وعمتي بلقيس حركت الجو بس يرادلها برنو بعد وترمي بي

كل شوي تهلهل واني وياها ع الواهس فرحان راح اعرس...

خطوبتي صارت جنهه مرة تطلك ومتعسرة ولادتها توصل للحلك ومتصير ... منا عمي حسان مسجون ومنا شرار خطية حيل انتكس على ابنه ...

ظلت عمتي بلقيس تهلهل وتطش جكليت ...

هو بلع الجكليته وكللها دخيلج خيتي كافي راح يصير بيه اسهال من ورى جكليتج هذا ادري طالع من سجن لو ماخذ ماجستير ...

كتلها اندري شووو هوو خلك مجرم ....
كالت موصوجكم ...

ريلام :

وتحدد موعد زواجنا بعطلة نصف السنة ٢٠١٩ بس طلع خالو حسان رأسا تزوجنا مهيب بعد مايصبر على كولته مثل مرة تطلك وماتجيب مدري وين شايف ...

اجه اخذني من الصالون وصعدنا بالسيارة هو عوزه بس يركص جان طاير من الفرح .. عوزة بس يركص واني لزمني الرجيف وبس ارجف برد وخجل وخوف من هاي الليلة ...

بالطريق عطلت السيارة مرتين وسووها كلوله امشي لغير سيارة ماقبل اله سيارة مزينة كال اني صار سنين انتظر اصعد بسيارة مامزينة لهيب كاله طبك طووب
صلحوها وحركت بينا

ثالث مرة هم عطلت وعلى جسر الجادرية خالو علي الدر جبره يغير السيارة نزلت من السيارة وعثرت بالبدلة

وهو لزمني كلي هاي اخر مرة قسما بالله اذا عطلت مرة ثالثة اشيلج على متني واركض بيج للبيت ...وهاي من الله على اريدها اني والله ...

ضحكت بخووف وقلق وصعدنا بسيارة خالو علي الدر مشغل قرأن ومهيب بس يحوص يريد اغاني ...

وكل شوي يشاورني ادري فاتحة لو عرس صدك يحجي ابووي ؟؟

وبعد ماصبر نوصل للبيت كال لخالو يريد اغاني ..
خالو جاوبه وكت اغاني مغرب هسه يا بويه حتى الله يحفظكم ويبارك بيكم ..

وصلنا للبيت ذبحوا الذبايح بالباب وبعدها دنفوت للبيت محضريلي كاسة مي لازم ادفرها وافوت للبيت ..

هم كلولي على كيفج دفعيها برجلج واني مقصرت عبالك ضربة جزاء وكولت بيها انوب لهيب يصيييح كووووول ..... وكلها تضحك ....

كعدنا بالصالة ومهيب يصيح عليهم يله ما كافي دزفونه عاااد ..

فضحنا فضيحة ولا سكت اخذوه خالو حسان ولهيب طلعوه برا ...

بعدها صار وقت الزفة ، زفونا للغرفة مالتنه وجانن بنات عمي وعماتي جاي يصورن وياي بالغرفة وهيام حامل هم كوة خلاها محمد تجي .... وجلبن بالغرفة

ومهيب طكت روحه يريدهن يطلعن وهنه مجلبات ..
نزع سترته وشمرها وهنه ماكو احساس ..

نزع اليلك وعلكه .. ونزع الجواريب وشمرهن على هيام
كللها من تخلصين غسليهن

هيه كامت سوت نننننن ورجعت شمرتهن عليه ...

اخر شي صيح بعلو حسه انزززززع البنطروون حتى تحسن لووو هم ماكو احساسسسسس
يصيح وايده على حزامه ...

هنه صار مطافرهن ماله والي ...

اجه كعد يمي واني اباوعله وارجف .. واسناني تطخ ببعضهااااا ...

ابتسم وبوسني من راسي وخدودي ، حس بيه ارجف ..
كال بردانه هسه تدفين وغمزلي .

.. خجلت وختلت بصدره وهو حضني حييييييل ويبوس بيه حسيته حيفقد وياخذني بالبدلة دفعته وكتله بعيطة خلي انزع البدلة ...

هو كال اووويلي متحمسسسة مثلي فديتج ...
نزعي يابه نزعي اموووت عليج من تنزعييين ...

رحت للباب اريد اطلع لاااء ابد ماا تفقنا هيجي ...
كال بعدج ماشفتي شي ...
كلت يبووووووو ....
سكتني خلاه حلكه على حلكي وسكتني ببوسة ...

فرح :

سجلت دانيال وفاطمة بالروضة بس خايفة عليهم حيل واخابر بالمعلمة تطمني عليهم وهيه يمكن ضاجت مني ظلت بعد متجاوب على تليفونها كطيعة مدري شبيها العالم شدعوة عليج هو بس خمس مرات خابرت شدعوة يعني ...

بعدها خابرني علي كال بوويه خلي المعلمة تشووف شغلها ولا كل شويه تخابرين عليها ...

كتله فلللك شمدريك ساحر انته شمدريك خابرتها وبعدين اني دكيت بس سبع مرات عليها وهيه اخر مكالمتين حتى ماكلفت نفسها وجاوبت ...

كال ولج بوويه ادك على راسي هسه شيكولون الشيخ تخبل شدعوة هلكد تخابرين عليها عيب بوويه عيب.

كتله باحتجاج هيه منيلها رقمك هاا منيلها رقمك لو ميكدرن اله يزحفن !!

كال شنوو هالحجي وبعدين نسيتي من رحنه سجلناهم بالروضة خلينه الرقم

وهيه شوون حفظت رقمك هااا شوون حفظته ؟ وشمعمى انته تحفظ رقمك هااا علي خاف تتزوجها عليه ؟

هااا فرح رجعنا لسوالفج ولج بوويه روحي ماعندج شغل وعمل انتي اليوم روحي شووفي رواء خاف تبجي لا تخلينها فووك وتنزلين وتلتهين عنها وانه عندي شغل والمعلمة لادكين عليها بعد خلي الجهال ساكتين لو يبجون جان انه رحت بنفسي عليهم خوش بويه

اي اي عبالها هاي المعلمة اني مخبلة وتخابر عليك موو

كال الله يطولج ياروحي اللهم منك الصبر وسد التليفون ... صايرة الناس ولا تطول خلك كطيعة ..

مهيب :

بعد مرور اشهر من زواجنا ، حرامات ماوفيت بوعدي لنفسي جنت ناوي ماخليها تخلف الا بعد ٥ سنين ستة بس هيه الخبيثة تجيب ديما وتخليها بنصنه وتكطع عني المي والكهرباء ...

جانت حامل وتعبانة والليل كله متنام خطية واني وياهه .... ع الواهس

كعدت الصبح هيه حاست وكعدت تمططت كالت اكوم اسويلك ريووك ؟

بستها على خدها ورجعتها ومددتها كتلها لاء رجعي نامي اني انزل اتريك ويه لهيب ..

وعفتها ونزلت جانت هدى مسوية ريوك وديما كاعدة تلعب بالمطبخ وعلي اخو هدى كاعد يم لهيب يتريكون ..

هيه خطية كلت البيض وخلته كدامي
تشكرت منها شميت ريحة البيض كتلها الله عاد بيض ام ديمه ماكو مثله والله عاشت ايدج ...

ابتسمت و كالت الف عافية ..

الخبيث لهيب اخذه من كدامي كال وبحلكه اللكمة عاد لا تتلوك عندك مرة تسويلك ريوك ...

مديت ايدي رجعت الصحن يمي ... كتله مرتي ابطنها طفل

كال لعد واني مرتي شنو ابطنها مطي ...

رديت والله انته ادرى بعد ....

طبت ريلام كالت صباح الخير ..

كاللها لهيب ولج تعاي رجلج يكول مرتي ماتعرف تسوي ريوك تسوي البيض زفر هدى تسوي اطيب ....

غصيت باللكمة وهيه اجت نبتت اصابعها بجتفي وهدى ظلت تضحك وعلاوي اخوها يكركر وديمه هم ع الواهس ممفتهمة شي وهم تضحك ...

وبعد اشهر صار عدنا حمودي ابن لهيب ووراه بأشهر ليونه ليان بنتنا اني ومحبوبة عمري ريلام ...

أنين :

سمعت بي طلع من السجن فرحت حيييل فرحت اله رغم مشفته بس اسمع اخباره وهو هم ماحاول يتواصل وياي واني اللتهيت ويا حسوني ودراستي ...

عمر صار عنده طفل بس لسه بعده يلح عليه ارجع اله وهم متعلق بابنه كل اسبوع يجي يشوفه وهم يريد يجي يكعد ابغداد على موده . بس وظيفته بكركوك وميكدر ينتقل

اكثر من مرة يكولي ارجعي اني هسه حالتي زينة واكدر افتح بيتين واني نفسي بيج واريدج .. بس اني لا ماريد اخرب عليه حياته اولا وثانيا قلبي مو ويا وماريد اظلم نفسي مرتين ... ومرتاحة هيج واهلي ممقصرين ويايه ابد ...

بعرس ريلام جنه اني وموج واحمد بتركيا طلعنا نتونس لان جانت عطلة نصف السنة ... وماشفت احسان ..

بتاريخ ١٦ / ١٢ / ٢٠٢٠ ....
جنت يم فرح وشفته هناك اجه يشووف الجهال .. هذا التاريخ احس دخل لعمري جانت فرح توزع نظراتها بيناتنه .. بترقب ..

كبران وحليان مدري لأن اني مشتاقتله ..

اخذ حسوني يبوس بي وكل شويه يسأله شنو اسمك ويباوعلي ..

حسيت نفسي اغووص بالقنفة الي كاعدة بيها تمنيت اختفي بيها حسيت نفسي حيل نحطيت بموقف مااحسد عليه ...

بعدها كلت اني اترخص يله ماما حسوني
هو وكف كال اني اوصلج ...

فرح صارت بيننا كالت لا شقتهم قريبة هنا هيه تروح وتجي وحدها ..

هو ظل يباوعلها بنظرات ماتتفسر هيه خجلت وصاحت دانيال ماما روح ويه عمو وصل خالة ودير بالك عليها ..

هو ظل يفر بيده واخذت دانيال وحسوني ورحنا ويا صعدنا بالسيارة ، كعدت ورا اني ودانيال كدام .. نبضاتي احس تنفجر بداخلي توتر و ترقب ..

وهو يباوعلي بالمراية مبتسم ... وبعد دقايق ..
سألني تدرسين ؟

بلعت ريك ورديت اي بلي ادرس ...

سألني ع المجال الي ادرسه ..

كتله صيدلة
كال حلوو والله سباعية بس تتخرجين حتى اخليج تلزمين صيدليتي وصاحبي المطي ادفره ..

ضحكت لا ليش خطية خلي ...

كال لا يولي انوب يزحف عليج ...

دنكت وضحكت ...

دليته شقتنه ونزلت يمها هو مد راسه من الجامة
كال اذا تحتاجين اي شيء تعرفين حسابي انتي موو ؟

هزيت راسي بأي .. وسلمت عليه تشكرت منه وطلعت للشقة واني بانتظار فرصة ثانية تجمعنا بلقاء أخر ...

موج :

مرت الايام ... توصلني اخبار شرار من فرح هو بقى بين روسيا وللعراق ، يكمل دراسته وبالعطلة يجي هنانه ...

انطفت بداخلي شغلة الغضب وحل محلها برد حنين قاسي ... بقى شرار مسيطر على كل حواسي ، مثل جبل مايتزحزح من مكانه ، ولا اكدر اتخلص منه ولا اكدر انتمي لغيره ..

بقيت اراقبه من بعيد وخايفة لا تخطفه مني روسية جنت افوت على صفحته اشوف زميلاته روسيات ونقاشاتهم بالتعليقات من ينشر مواضيع وتقارير طبية جنت اخاف حيل عليه ....

بس اهتميت بنفسي وبشغلي هواي ... بس الحظ يلعب دور ... ببداية سنة ٢٠٢٠ افتتحت الجم الخاص بيه فتحته بعد تعب شهور وساعدني احمد هوايه ...

بس حظي خلا فترة الافتتاح ويه كورونا والحظر الي استمر اشهر .. الى ان كدرت افتحه مرة ثانية ورى الحظر ...

مرة اجني صديقاتي الي جنت اشتغل عدهم الاخوات الاثنين دينا و سهاد .. سهاد دائما تكولي خطبيني لطليقج و دينا مرة شافت احمد كالت خطبيني لأخوج ...

هنه كلش حبابات حتى جنت ايام انزف وماكدر ادرب البنات اله اراجع طبيبة وتنطيني علاجات يله اصير زينة وهاي حالة النزف تجيني بين فترة وفترة

هنه ابد مجانن يكطعن ربع من راتبي ويسلمنه الي كما هو ... بس اني حبيت استقل وهذا جان حلمي وبعد ناويه امتلك مركز تجميل متكامل .... ...

جنا طالعين بوقتها اني والبنات ودينا شافت احمد باوعتله وحجت وياي ما الله يهديج وتخطبيني لاخوج
ضحكت

ورحت صعدت ويا .. هو منتبه عليها ... دينا الله يستر عليها حلوة حييل بس اكبر منه بالاشهر وهم مواليد ٩٠ بس ممتزوجة جانت مخطوبة وفاسخة وباقية هيج ....

كتله لاحمد دينا هيج تكول .. هو كال بيها الخير المفروض هسه اروح انزل ستوري واكتب باركولي انخطبت واخلي ملصق ام سبع عيون حتى لا يحسدوني موو ؟؟

ضحكت على سوالفه ... وحجيتله على دينا ...
كال هذول زناكيل وعدهم فلوس الله يخليج كليلها لاتحط عينها عليه وتسويلي مشاكل ...

هو يحجي بالشقة بس الظاهر ظلت اباله وبعدها متواصل وياهه على الفيس وهم هسه اصدقاء وبلكي تغير فكرته على الزواج لأن احنه ماقصرنه شوهنا الزواج بنظره ....

برأس السنة ٢٠٢١ .. فرح عزمتنا كالت مسوية كيك ومجهزة كولشي تعالي انت وانوو ، الشيخ مموجود رايح لوحدة من المحافظات عنده واحد من اصدقائه متوفي ..وراح يحضر العزاء مالته وراح ابقى وحدي ...

احمد كال احتفل ويه اصدقائي واجيكم بالليل نرجع للشقة ....

شمدريني بيها مسويتلي كمين .. لبست تنورة جلد قصيرة سودة ووياهه بلوز صوف بيجي مفتوح من الصدر ، وفتحت شعري ومكيجت هيه دزتني للاستقبال كالت ودي هاي الكيكة ...

فتحت الباب وفتت جوة خليت الكيكة على الميز ، ودااروح حسيت الباب انسدت باوعت شفته شرار انصدمت بي

بقيت لازمة بالميز واباوعله ، هو سد الباب واجه تقرب مني ، باوعلي ثواني واني هم اباوعله ...

كال :- اجيت اشوفج واستقبل السنة الجديدة بشوفة عيونج ...

كتله بارتباك هاا ليش ؟

رد :- غير شوفتج علاج لاكتئابي ...

هزيت راسي .. كال ديله عاد فكيها موو كافي ؟

دنكت وهزيت راسي ... وكعت خصلة من شعري دامد ايدي وارفعها هو رفعها بهدوء وخلاها ورى إذني ...

كتله شنوو تريد شرار ؟

رد :- اني مارايد شي منج اني اريدج كلج ... وجنت دائما وياج صح جسدي بعيد عنج بس جنت وياج بعقلي وروحي وكياني ....

حاجيته ببحة حزن وغصة :- شرار اني منتهية الدكتورات حذرني من الانجاب واكو دكتورة كالت مستحيل يصير يعني بعد مراح يصير عندك طفل وتعوض طفلك المات....

وكملت بعد مابلعت ريك :- ماكو بعد طفل يلعب وياك ويخلي حلكه على خدك ويسوي ببببا بببا با وسعابيله تترس وجهك لو يحك لثته بايدك لو ينبت اسنانه الصغيرة الي توها طالعة بيك لو ضحكته الطفولية والكركرة مالته مراح تسمعها .. لو يجلب بشعر صدرك ويعته ويضحك عليك من تتوجع ..

تعرف لذة الحياة أطفالك يكبرون بجالك وتشوفهم يوصلون مراحل هو هذا طعم الحياة بس اني وياك مراح نعيش هذا كله ...

واني خايفة منك والله خااايفة مثل ما تزوجتني على نيفرا هم يجي يوم وتتزوج عليه ، كما تدين تدان والدمعات من توكع هم الها حووبة ..

اني فاقدة للأمان وياك وما الي ثقة بيك شلون ارجع الك ؟

كال بتوسل ماريد والله اريدج بس انتي انتي تغنيني عن الكون كله ...

كتله :- الطفل جزء لا يتجزأ من الزواج كيفك انته وماتريد

رد بأصرار :- اي ماريد اريدج انتي ...

هه خاف بعدين تخذلني وتتزوج عليه انت متعود تعدد زواجات خاف صارت عادة عندك ...

لزمني من خصري لج عادة شنو هاا ؟؟ ليش كل هالثقة المنعدمة هاي وبعدين تفائلي احسن كدامنا كل الوقت ... احنه مو عجايز اثنينه ثلاثينين جاديين وصاكيين ..

وخرت عنه بهدوء ورحت كعدت على القنفة ..

اجه كعد يمي :- مالج ثقة بيه ؟

هزيت راسي لاء

تحبيني ؟

رفعت راسي وباوعت بعيونه ثواني ودرت وجهي وتنهدت ...

كال شنوو هاي التنهيدة والله اني متاكد تحبيني ..

هزيت راسي تمتمت اي احبك بس شنو الفايدة ما الي ثقة بيك

جذابة تحبيني والج ثقة بيه لان الحب مستحيل ينمو بدون ثقة ...

هاي انته قناعتك متغيرها وتريد تقنعني وياك شسويلك بعد ..

ارجعيلي!!!اني هسه وحيد ...

ممستعدة وجراحي ماشفيت منك بعدها ...

زين جربيني ما اخذلج والله ..

اي اجربك ميخالف بس وانت بعيد عني دااشووفك تكدر تعيش بلا نسوان!!!

ولج هاي صار كم سنة شفتيني تزوجت تصخمت احجي ضميرج ...

شمدريني بيك اني شسوي ماتسووي ؟

لو متزوج او عندي علاقة جان مخايف من احد وعلنتها كدام الكل تدرين بيه ما اخاف اني ......

خليت اديه على وجهي بلحظات الضعف هواي نقدم تنازلات .. حتى نعالج بيها اوجاعنا ومتأملين نعيش بسلام ..

هو سحب اديه من وجهي ودارني عليه
كال لا تخربين مكياجج طالعة حلوة كلش اليوم ويله اني رايح احتفلي ويه اخواتج وتونسي ماريد اكدر عليج هاي الليلة ...

ترك اديه ، بس جانت رغبة بداخلي ماريده يرووح ...
لزمت ايده هو رجعلي ملهووف ...

باوعتله كتله شرار اني بس انطيني مهلة كم يوم افكر بس ..

هو ابتسم وحضني ، خليت راسي على صدره ، حسيت طابت جروحي ، فعلا الوقت كفيل بان يمحي جراح وتعب والم عذاب ...

باسني على راسي ، وكفت على اطراف اصابعي وبسته بخده وابتسمت اله .... وهو عيونه جانت تضوي من السعادة ......

اخذ خصلات شعري وظل يشم بيها .. وباوع وخله ابهامه جوه شفتي كال عطشان بس ماريد اخرب حمرتج ..

ابتسمت واحس عيوني مليانة دمووووع كتله اذا رجعت الك ما اظلمك ؟

كال اصلا بدونج اني مظلوم متعوب واكسر الخاطر ...

احجي ويه احمد ويصير خير ...

لزم اديه وبوسهم .. كال احمد ميوكف بوجهنا اكيد بس انت وين حابة نعيش ترجعين نعيش بااقصر لو نشوف النه بيت بمكان ثاني لو نسافر ؟

هزيت راسي لا مااسافر بعد مستحيل ..... بس ميهم نرجع للقصر عادي البنات احبهن اني والولد احترمهم ...

لتخافين بلقيس صايرة زينة هالايام .... تابت بعد ما كسرت وجهه بنتها ...

ميخالف وهزيت راسي .. بس شغلي اني احتفظ بي ...

كال اي حبيبتي ولا يهمج ...

هزيت راسي وشحيت نظراتي منه ...

خله ايده على حنجي ودار وجهي عليه
سألني :- انت خايفة من فكرة تجديد علاقتنا ..

لا خايفة من خذلانك الي مرة ثانية ...

لتفكرين هيج ولتجذبين الج هذا الشي مراح اخذلج صدكيني وعد وعد الحر دين .....

ميخالف ... بوسني وطلع ...

رحت ادور على فرح جانت انين بالصالة يم الجهال
وفرح بالمطبخ ركضت كرصتهة وصاكة سنوني
صايرة طبابة خير فرح خاتون مووو ؟

باوعتلي وترمش بعيونها وتمثل عليه هاا اني شنوو شكو شتقصدين شبيج موج

تسوين نفسج ماتدرين لعد الطنطل شجابه هنا ...

دكت على صدرها وكالت عزااا ابيتي طنطل ووينه وينه

فريت براسي ومقلص عيوني .... وهيه دارت وانطتني ظهرها واكتافعا ترتفع عرفتها دتضحك وتكركر ...

كتلها هذا تخطيطج لو تخطيط رجلج ؟؟

دارت وجهه عليه وتضحك كالت لا تخطيط الطنطل هذا ...

يمممه منج وووومنه ....

حاجيت احمد بعدها بأيام وهو بعدها اجه بدون ما اخابره ولا احاجي ... وكعد ويا احمد تفاهمنا ووراها ورجعت للقصر وياه ....

اني اعرف غلطت من تزوجت شخص مرتبط ، واخذت جزائي ... ادعولي بس يصير عندي طفل والله يهدي الي ، اني احبه وهو يحبني واثنينه تعبنا هواي ....

انتهت ....

وهسه من صدك انتهت 😍😍😍😍

خو ما تطلبوني طلابة بعد 😂😂😂😂

انتظروني بقصة جديدة وان شاءالله تكون ظروفي افضل من بهاي القصة لان تعبتكم هواي بيها كلش اعتذر واحبكم كلش 😍😘❤

تعديل ### مية مرة اكولها ... علي ما حب فرح وهيه ع ذمة اخووه ولا حباهه وهيه قبل متتزوج حمدان يابه موو هيج هواي فاهمين غللللط ماكو شي يثبت انو حباهه قبل اخوه لان مجان يعرفها وهو ساندهه صح وهذا مو معناها حب لا يابه مو كلشي نعتبره حب ....

تعديل 2 ### 2 ...
أنين ..

‏يكلها:
وهذا آنه ، العنيد الصرت حبآبچ ♥️

صار ايام عمر يلح يريد ياخذ حسن وياه لكركوك واني ما اقبل احنه ما اتفقنا هيج وحتى طلب الاصطحاب الي سوا بالمحكمة رفضه القاضي اني اخاف عليه وماعرف عن مرته شنو واخاف على ابني

انطيت التليفون لحسوني يحجي وي ابوه مكالمة فديو وطلعت من الغرفة للصالة شفت احمد صافن ولازم التليفون مخلي جوه حنچــه

رحت كعدت يمه ، حس بيه سألني على حسوني
كتله ديحجي ويه ابوه هاي وين صافن

كال هاي دنيا صارلها كم يوم حاظرتني ومتقبل تتنازل وتفتح الحظر ترى تافهة ممستاهلة تزعل من هيج موضوع

طكيتها ضحكة انت شنو سويت الها وحظرتك

كال والله دائما اعيب واقلد على خشمها قبل كم كالت احمد حسوي عملية لخشمي

كتلها والله اذا سويتي عملية لخشمج احظرج اتخبل من عمليات التجميل الله انطاج خشم مناسب شكلج ووجهج شكو ترحين تلعبين بخلقة الله !

هيه عصبت وكالت شكو انتَ تحظرني وتهدد بيه لا والله اني الي احظرك وصدك حظرتني

بعدني مبتسمة لا افااا احمد انتَ يحظروك مع الاسف
والله المفروض تحظر ماتنحظر

كال بانفعال لج تافهة تاافهة والله مشايف هيـج
تافهة

لا ترى مو تفاهة هاي تراكمات خطية البنية مبينة تحبك وبزعت وانت مد تبادر ابد

تحسر وايده ع لحيته يحركها
كتله اي والله احمد شبيك انته مو صغير حتعبر الثلاثين بعد شنوو وانت مدام مشتاق الها ومهتم معناهه هيه تحبك اخطبها بربك خلي نفرح بيك

باوعلي لج لا يا خطوبة بهالزلك متشوفين كورونا والدولار صاعد و طيحان حظ والمجهول الله يستر منه .

وكمل كلامه وبعدين تره هم طاكين كلش منو يكول تقبل بيه او اهلها يقبلون

انت لعد مدام مو ناوي تتزوجها ليش معلكها بيك وليش هسه دتلوب عليها احمد تره انته هم مدتعرف شتريد والله

باوع عليه فاتح عيونه هاي صاحبتج ام لسان زمن بعد متمشين وياهه تره لسانها لسان دلالة والله

ضحكت لا والله شعليها البنية حبابة دنرجع لدنيا تره تحبك وربي
باوعلي اللمعة بعيونه

كال الصراحة اني متعود عليها هواي اخذت مساحة بحياتي

كملت والله لاحظت على نظراتها عليك بعيد ميلاد حسوني والله تدورك دوارة وين متروح بس انت ولا تقلد الها

صيح كال ولج يا مامقلد الها ١٢ ساعة باليوم احجي وياهه بالدقايق نحجي

اي بس مو مثل بالواقع وهاي الحظر اجه لان دتنطيك رسالة بادر شويه تنازل ميصير معلكهه وهيه حتى موج كالت ديجوهه خطابة ودترفض

باوعلي فاتح عيونه شوكت اجوهه خطابة ؟

مااعرف يمكن هذاك الشهر

اشو مكلتلي ولا حجت وهيه حتى من تشتري قلم حمرة جديد تكلي

ضحكت : يمكن استحت تكلك البنية هم عدهه خجل ..

رفع شعره ليفوك .. ديله شوفي شغلج وعزميها على عيد ميلاد حسوني

يايا ياعيد ميلاد حسوني قبل كم شهر وهيه حضرت

زين ناخذهه ويانه لحفلة طهور غيوثي ابن فرح ..

لا فشلة هيه غريبة والحفلة حتصير بالبيت الجبير مال العائلة مو ابيت فرح واكيد هيه مراح تقبل تجي دنيا كلش ذواقة وتستحي

ظل يفر بيده : ذواقة موو ؟ لعد ما استحت من حظرتني انوب صارلها چــم يوم ماحست ولا فتحته

مو كتلك تراكمات !! اكو شي مضوجها منك اكيد ، معليك اني راح احجي ويه موج تحاجيهه تاخذ رأيهه نروح نخطبها الك

عاط لج شتخطبيها شبيج حاظرتني دااكولج

ترى اعرف حاظرتك والله اكيد ماانتهت الدنيا هو حظر وينشال خلي موج تجس نبضها تشوفهه توافق عليك لو لا بس اني متأكدة توافق لان والله تحبك

لج بابا وكت زواج ومهر هاي الفلوس الي جوه ايدي اريد اشتري بيها بيت واقلعكم منا

اي ميخالف هسه خلي نفتح الموضوع وياهه والله كريم تزوج بهاي الشقة شبيها ترى حلوة وبعدين احنه كلنا نتساعد ونشتري احلى بيت .

وخري عني انين فريتي دماغي فرررر اروح انام باجر شغل

اي والله ادري بيك انته رايد تخطبها ومو رايد اخصمها عاد لتروح تطير من ايدك احنه ماصدكنه تلكالك وحدة طول عمرك كاره الزواج والارتباط

كال بنبرة سريعة الله كريم الله كريم دروحي شوفي ابنج هسه واني مولي انام انعل ابوو الي يرتبط وجع كلب كل من مووج عرفتني عليها

انوب نزل على موج وراح يدردم للغرفة
.. ذكرني بيها اروح اخابرها كالت متأخرة عليها االشهرية بلكي حامل

فتت على الغرفة شفت حسوني نايم والموبايل طافي شحنه اخذته نومته بفراشه بوسته وغطيته

والتليفون خليته على الشحن وفتحته عود اخابر موج قبل ميتأخر الوقت بس وصلتني رسائل على الوتساب من رقم غريب تفاجئت وكعدت اقراهم

مكتوب بالمسج اكولج عيني بلا هالستهتار هذا وعيب عليج ترى عمر هسه طليقج ومحرم عليج خوش شنو هالمخابرات بينكم شنو هالرسايل بطليهن حبابة ترى اني مرته ومااقبل

صراحة انصدمت شوكت خابرته شوكت فتحت كام ويا اشو هاي متعرف تحجي احس قلبي وصل لبلعومي وانقهرت حييل

هو اني اصلا مارد عليه هواي ابد وهو يخابر كام يشوف ابنه و يحجي ويا افتح الكام واوخر عن الفون بس هاي الظاهر متعاركة ويا جايه تطلع الحركة بيه

كتلها شوفي عيني اني مراح ابرر الج بس خلي اكولج كم كلمة خليهن ترجية بأذنج اني لو اريد جان رجعت لعمر بس ماريد افتهمتي ووصليله هالكلام اذا يريد شي بعد خلي يخابر على احمد واذا يريد يشوف ابنه خلي يجي يشوفه وفضيناهه

كالت اي بس من يجي مو انتي الي طلعيله وتستعرضين كدامه واذا تردين شي خابريلي الي اني اكوله وهذا رقمي عندج

كتبت الها وانتي منو حتى اطلب منج او اخابرج عمود ابني انتي شنوو ومنووو ومنو كلج احنه مختاحين منج لو من زوجج حمدلله كولشي ممحتاجين ..

ورحت حظرتها وحظرت عمر هماتين بس احس اشتعلت وانطفيت ضوجني حجيها يمها بحالها اني !!
ميتة على رجلها !! صدك جذب استغفر الله ياربي .
عفت التليفون وطفيت الضوه و حتى موج ماخابرتهه
ولا خابرت بيت خالي اسأل على خالتي لان يمهم .

يوم ثاني الصبح كعدت وكت حسوني يكعدني اكوم اريكه وابدله اندكت باب الشقة رحت فتحتها زمن صديقتي تجيني نقرا سوا نفس المرحلة والقسم احنه

كعد حسوني كبال التلفزيون يباوع واني رحت حضرت حبشكلات النه اني و زمن ، جاي و جرزات و كيك وهيه جايبه نساتل وجباسة وبسطنه نقرا وناكل ونسولف

حجيت الها عن مرة عمر كالت ولج والله لو منج ارجع اله عناد بيها مو كالج ارجعي هو واخليلج بيتج وحدج ومتندم ورايدج ارجعي على كلبها ع الاقل هم لخاطر ابنج وها هم خلي يخليلج بيت هنا ابغداد

لج لا مستحيل ارجع اله وبعدين هيه حتى جايهه طفل ثاني بالطريق بس حقها يمكن تغار عليه وهيج تصرفت ..

شكد فاهية لخاطر ربج ترى والله انت باردة و فاهية دتحسين على نفسج انت لو لا ؟ لو منج اسحلها سحل انطيني رقمها اطيح حظها

زمن عوفيها تولي يمعودة ممهتمة ولا ابالي لا هيه ولا زوجها

انت لو تحبيه جان تحركتي بس لان متحبي ممهتمة انت محد كاتلج غير ذاك الثلاثيني المجرم الاسمر حمه اخواتج ادري بيج

ضحكت عليها نزول عليج مو ناسيته ليش تذكريني مو نريد نقرا حيوانه هسه ما اظل اركز بعد

شنو مابينكم شي هالايام ؟

ماكو وصار هواي مشايفته اصلا بس هو ضافني ع الفيس واكتفى بالاضافة ومابادر وخلينه هيج احسن

ليش ماتبادرين انتي وتراسلينه

لا يمه لووو لموت ليكول مستقتلة عليه ولج مرة زحفتله بوضع استثنائي وبطريقة غير مباشرة وفشلني يكول متأثرة بالمسلسلات الهندية اذا ميبادر هو مستحيل ابادر بعد حتى لو احبه ادفن حبه بكلبي

ظلت تضحك ولج ادري سولفتيلي بس ميخالف هسه هو عباله جان حب مراهقة ونسيتي

لا هو مايهتم اني ليش اشلع كلبي ادري اني ابتليت بحب من طرف واحد وهذا حظي سدي الموضوع اريد اركز ع ابني ومشاكل ابوه ويومية دعوة شكل وهم دراستي شايلة الهه هم .

اكولج هو خاف بعده يحب ذيج صديقة اختج ؟

والله مادري قابل بكلبه اني ...

باعي انوو روحي كتبيله
شوكت ناوي تشدلك احساس
وتجي تصارحني ...

عضيت شفتي واحاجيها لللج دولي كافي سدي الموضوووع ...

رفعت اديها للسما يارب تصيرين من نصيبه اذا بي صالح الج وتلحكين اخواتج وتصيرين چــنة بيت الشيخ

ظليت اضحك لج لا الناس شتكول اخذوا الاخوان كلهم مبقوا احد خو فرح اخذت اثنين منهم

ضربتني على فخذي لج محاجيتلج على بيت خالتي هنه خمس بنات ، اربعة منهن تزوجوا اربعة اخوان
اولاد عمهن ..

والخامسة وين متكعد تكول وصلت ليمي وعمي كطع الانتاج جان هسه هم صرت جنتهم ويه اخواتي

لا بربج صدك وضحكت ايدي بيدهم وانخطب لأسمري المجرم

عاطت لجج والله عرفتج ميتة عليج والله

سديت حلكها انجبي العمارة كلها سمعتج

وخرت عنها كتلها ولج اني اكول هيج احسن احبه من بعيد ولا اقترب منه يمكن اشوف عيوبه لو يشوف عيوبي ويظل واحد يكره الثاني ...

هيه رادت تحجي كتلها اذا حجيتي حجاية تخص هذا الموضوع شايفة هذا القلم انبته بعينج

كالت هذا هو سكتت يمعودة تخوفين انتي اذا عاشكتلج واحد مجرم وخريج سجون

كتلها بنبرة ملل ديله يله سكتي ..
وضحكنا وظلينه نقرا وبعدين اجت امها عليها اخذتها وراحت ...

رحت خابرت موج جانت هستوها كاعده من النوم ومبين صوتها تعبان
سألتها ها رحتي للطبيبة البارحة حللتي حمل بشريني ؟

كالت بصوت حزين اي رحت وحللت وماكو حمل بس هيج متأخرة وانطتني ابر تنزلها

يله ميخالف موجايه لتضوجين بعدكم مصار هواي من رجعتوا وبعدكم شباب وكدامكم العمر كله ...

كالت امنت بالله والنعم بالله بس والله يقهرني من اشوفه مطلع صور ابنه وعيونه تصير حمرة اريد اعوضه بطفل يفرحه

قابل شبيدج انتي يا عيني ممكتوب هالشهر بلكي ع الشهر اللخ او البعده ..

كالت الله كريم ... تعالوا الجمعة لحفلة طهور غيوثي ماشي حنسوي هنا ابيتنه

اي كالت فرح نجي اني واحمد بس اكولج شوفيلج جارة ويه صديقتج ترى حاظره احمد مدري شبيهه

ليش شبيهه حاظرته هيه ميوكع من لسانها احمد بس هو يجفص وياهه ويدوس ابطنها

اي بس هالمرة على شي تافه بس شوفيها اذا خطبها احمد تقبل بس جسي نبضها

ياريت والله هم واحد مكمل الثاني خلي يتزوجون اريد اصير عمه

كتلها ان شاءالله تصيرين عمة واحلى أُم يابعد رووحي انتي ...

ردت بعد تنهيدة ان شاءالله ..

ختمت المكالمة وياهه ...

الاربعاء جان عيد ميلادي والكل سوالي تهاني على الفيس وشاركوه على صفحتي ..

على منشور موج اجاني اشعار احسان مخلي تفاعل قلب ♡

والله مكلف نفسه هواي كلش ثكيل عشتووو ..

يوم ثاني سوولي مفاجأة كلهم متجمعين وسوولي كيكة وميز مليان وجابولي هدايا فرحت حيييل واحتفلت وياهم والجهال فرحانيين

ودينا اجت عزمتها موج وجانت طالعة كولش حلوة هالمرة جانت نظرات احمد تجاهه مختلفة يمكن عرف حيخسرها وهو مبين حباهه وهيه هم تنحب

ورى العيد ميلاد مالتي كعدنا و اتفقنا نروح على بيتهم نخطبها من اهلها بس كون بعد حفل طهور غيوثي ..

بالليل راسلني عمر عيدني بعيد ميلادي وكتبلي مسج ليش حاظرتني من الوتساب شصاير!!

باوعت لرسالته تذكرت مرته حظرته بسرعة الباب الي يجيك منه ريك سده و استريح احسن .

يوم الجمعة الصبح حضرت نفسي دنروح لبيت الشيخ معزومين عدهم الصبح ع الغده ..

لبست بنطرون زيتوني بوي فريند و قميص بيجي وشال ورحنه اني واحمد وحسوني

هو خطية غيوثي صار بشهر الواحد ٢٠٢٠ بس من صار مريض لان تأخرت هواي بولادتها وشرب ماي الراس وبقى متعلعل وما صحى وما طهروه تخاف فرح...

كلما يريد يطهره الشيخ تاخذه وتختل بالغرفة وتقفل الباب وتظل لليل

الى ان صار عمره سنة وهسه يله طهرته قبل كم يوم وحسويله حفلة اليوم

رحنه اني واحمد وفتنه جوه بالقصر ، وسلمنه على الكل احمد راح كعد بالديوان واني بفيت يم البنات وجانت فرح بعدها ماجايه

سمعت صوت حسان بس احس گلبي صار ببلعوومي ، عضيت شفتي وجريت نفس وظليت اسولف وي ريلام واحاول اضيع توتري

اكول ان شاءالله ما اشوفه ولا التقي بي .
وشي بداخلي يريد اشووفه
حتى لو من بعيد
بس كون
هو مايشوفني ..

ورة شويه احنه كاعدين بالصالة طب شرار بيده كارتون
وصار بمقابيله مهيب باوعله شرار وسأله
وين الجلب اخوك ؟

رد عليه مهيب ؛ هسه يجي يهووهو ...

كله شرار لعد روح صيحله خلي يجي ينزل الكيك من السيارة اجت فرح ومسويه كيك يكفي بغداد كلها .

وراحوا اثنينهم ينزلون بالكيك وراها دخلت فرح وجهالها الاربعة وياها سلمت ع الكل ..

تبعت موج للمطبخ اساعدهم شويه ، ريلام تحاجي ويه هدى تكولها ناسية صارلي يومين مابلع الحبة بس لايصير طفل ومهيب يطيح حظي

مهيب جان فايت من يم المطبخ بالممر
جاوبها وليش اطيح حظج مو بليونه حتى طلوك طلكت وياج ولا تكعد بت بلقيس

بلقيس جانت بالمطبخ جاوبته وهيه متخصرة وشبيهه بت بلقيس مادكيت رجل اله تاخذهه

كاللها ابووس راسج وايدج على هالخلفة

كلتله يله متجي تبوس لعد ، عاد هو كوة عليه راح باس راسهه وطلع يخوزر بمرته .

صبوا الغدة وجان نكعد كلنا سوى نتغده وصار مقابيلي احسان بس لان هوسه وسامعة الزاد ماعليه سلام غلست ماسلمت وكعدت يم خواتي .

بس حيل متوترة احس نظراته عليه لو من يحجي احسه يعلي نبرته يسمعني يريدني انتبه ماعرف هو هيج لو اني كل حواسي تنتبه اله .

خلصنه الغدة غسلنا المواعين وصبوا الجاي وحب وكعدوا يسولفون بس بالي مو يمهم

هو جان كاعد لابس قاط رصاصي بدون رباط بس سترة و قميص ابيض بس بعدين نزع السترة وشكل ردانات قميصه

رن موبايلي باوعت بي وكتمته شفت رقم غريب يتصل عليه خاف هاي زمن يمكن هيه دومها يومية الهه رقم شكل

اخذت التليفون وطلعت من الصالة اجتازيت الممر ووكفت على الدرج كلت اجاوبهه هنا حجيهه كله فوك الركبة خاف تحجي شي واتي اضحك كدامهم استحي

بس من فتحت خط مجانت هيه لا صوت عمر اجاني
بسرعة كال شونج انين شخبارج ليش حاظرتني صاير شي

تنهدت وعصبت كولش كتله اسأل مرتك اني مراح اجاوبك تمام واذا تريد تعرف اخبار ابنك حاجي احمد واذا تريد تشوفه تعال وتعنى لبغداد وشوفه واني هذا اخر كلامي وياك بعد لتحاول .

هو كال لحظة انين شصاير وشعليها مرتي شبيهه وياج وشجابهه عليج

عمر بعد ما احجي روح هيه خلي تكولك اني ميهمني .
وسديت المكالمة لو ادري بي هو والله فلا اجاوبه .

تنهدت بقوة سحبت نفس وزفرته دااروح للصالة جان حسان يسد عليه الطريق وصارت عيني بعينه

جان محدد لحيته ووجهه صح اسمر بس على حمار ونظييف حيل معبالك بنهاية الثلاثين عمره .

بلعت ريك احس وصل صوته اله نصيت راسي وعصرت الموبايل بيدي .

كال باستهزاء شونج ست ترى االسلام بفلوس

واني التفت نصف التفاتة ومتوترة جاوبته ها الحمدلله زينة

شنو شبيج ليش معصبة ومنفعلة
رفعت راسي باوعتله
سألته شنو سمعتني واني احجي بالتليفون ؟

قرب باكيت جكايره من حلكه اخذ جكاره من بين شفايفه
كال شكو بيها شسامع هسه اني
اي وين ماوين ؟

حكيت كصتي باظافري متوترة من قربه مجاوبت ع سؤاله احس الكلام واكف ببلعومي .

كال مدام حظر وماكو دوام وكاعده بالبيت شنو رايج تجين تشتغلين بالصيدلية مالتي تستفادين .

جاوبته بس اني بعدني ممتخرجة

رد اعرف بس تتعلمين ترى صديقي اعرفه خريج معهد فنون ويشتغل صيدلاني هيه كله ع التعلوم شبيج .

لا والله تعذرني اني كاكدر ماعندي مجال عندي محاضرات وامتحانات اللكتروني وهماتين ابني محتاج عنايه ما اكدر اتركه

جاوب يابه فرغي نفسج كم يوم بالاسبوع اخذج والا اني ليش دااخذ رأيج انت وحدة زعطوطة متعرفين مصلحتج اني انطي خبر لاحمد هو يعرف شون يتصرف وياج

رفعت راسي باوعت عليه شنو يعني يجبرني احمد !! اوكي حتى لو يجبرني اخسرلك الصيدلية هو غالي ابيعه كله رخيص ثانيا اذا واحد ضغطه هابط اكوله صاعد واذا بي حساسية اكول جرب حتى ابليك ..

كال وهو رافع حاحبه درت وجهي اجاني صوته
لج هيه لعبة هاي حياة بشر بابا ...

جاوبته رجاءً لاتحجي بالانسانية هسه يطلع علاجك كله اكسباير ..

تقرب مني ويباوع بنظرات سخيفه : تمام هاي اني وانتي اذا اشتغلنه بالصيدليه نص العالم نموتهم ...شنو رايج نموتهم ونعيش بس اني وياج بدون ازعاج اولهم فريحه ..

مدنكة اني ومرتبكة صح احجي ويا بس ارجف كوة ارد كتله:و ليش اختي اسم الله ؟

لان هواي ماخذة منها طولة اللسان والرعونة ...

مسكينة يا فرح مايدري اني زمن فرعنتني وطلعت عيني ...

رديت عليه لالا اختي ماعليها ... دااكمل سمعت صوت ورحت ركض وخرت من يمه وكعدت يم اخواتي ...

العصر صارت الحفلة بلقيس تتوسل بمهيب يكول للشيخ علي الدر يقنع زوج هيام حتى تجي للحفلة ومهيب ميقبل يكوللها خاولي خليها كاعدة تسوي مشاكل ...

بعدين صعدنه عدلت مكياجي ولبست بدلة وردي فاتح طويلة حتسوي مولود ودي جي ومعازيم وبيتهم بدا ينترس ناس وبلقيس كالت لفرح ترا ختام جايه لاهلها واني عزمتها وعزمت كل حبايبي خاف يسمعون اكو حفلة ومعازمتهم يزعلون

جاوبتها فرح عادي براحتج اهم شي نتونس ...

نزلت جوه جانت بلقيس تحجي لأحسان على هيام زوجهه ميقبل تجي

كاللها هسه اروح اني اجيبها

كللتله مو هو شراني وقاسي وعنده نفوذ

جاوبها وهو يفر بيده من كلتي عنده نفوذ عبالي هولاكو طلع عايش .. هسه والله موتنه صاحب نفوذ وقاسي وسوالفه هتلر ممسويهن
والله محد كبر راس الرجال غيرجن تتراجفن مراجف وانتن من جوه الجوه

كالت والله خبيث كلش ....

جاوب ؛ هسه يطلع تافه واذا اواجهه يطلعلي شايل ماسحه ويهوس السبع يطلع دم والفاهي يطلع زاهي .

ضحكت وجاوبته :- يا انوب دروح بلكي يكسرك بالماسحه

رد عليها : ...ديله خلي اشوف اطلع دم اطلع زاهي

ديفوت جانو شرار وريلام يطكون صور بالممر هيه مبدلة ومسويه تسريحة ومكياج وبنتها همين شايلتها وتصور بيها
كاللها دوخروا شون شكولات تلعب النفس عبالك مشايفته لو ما مكابلج وكاعد ..

جاوبته شبيك خالو تغار من عدنه

دكعدي راسج مربع كعدي اغار من جوه ابطي وما اغار منكم..

جاوبه شرار وجهك دكول ابليس كاعد من النوم ..
انت بس خشمك يشررد عشيرة ..

واني ميتة ضحك عليهم وعلى مناكرهم .. يموتون ضحك ...

راح وصدك وجابهه واجه وهيه جايه مبهذلة وشحالها خطية تسولف لامها خالو حسان خله محمد شوي ويبجي بعد شويه ويضربه ...

كلت معقولة الهالدرجة عصبي!!!
.. بعدها صعدت اخذت ملابس من ريلام وبدلت لجهالها ونزلت .. بس وجهه تعبان عبالك عجوز ....

صارت الحفلة ... اجت ختام ولابسة فستان واحنه جنه نركص وفرح تشاورنه هاي ختام لابسة البردة احد يفهمها البردة مكانها الشباك

صوتها عالي دفعتها موج وهيه تضحك ولج صوتج لاتسمعج

كالت والله من تزوجت خرفت جانت تلبس حلوو هالايام مدري شبيهه ...

تباوعلها و تحجي وهيه عينها على فرح وجهالها الصغار بنتها وابنها ...

كرصنه فرح نسكتها حتى تتوب منها وتسكت ..

انين بعد ما راحو الناس الغربه ضلوا بس العائلة مالتهم يعني الولد ونسوانهم واكيد حسان موجود

واحمد راح كال بالليل اجي عليج ...

جانت فروحه مسويه تلث كيكات جاهزه وحيل معتنيه بيها والكيكه الثالثه مغليها بيها صورة ابنها

وجان الميز كووولش حلو و راقي هو عباره عن ميز كبيير وعليه تول مطرز بذهبي وطاشه عليه ورود ملووونه ومجففه وتحفيات لونهن ذهبي مثل الكلاصات يجي واحد طويل و واحد اكصر و واحد صغير حيل وحلويات وعصاير يعني جان شئ مرتب بس حلو وبسيط...

وهي فرح جانت لابسه فستان طويل وفضفاض ابيض وبي تطريز ذهبي ولابسه شال ذهبي ومخليه شويه مكياج وشايله ابنها وكاعده هو خطيه جان شويه موجوع

وعلي كاعد يمها ولازم ايد ابنه ويحجي وياه...حبيبي بابا شوف شوف هاي الشمعه لا تبجي يالله سبع

وجان شرار عايش الدور ويصور بالميز والكيكه عبالك العطواني ومندمج حييل

هي كولها جانت تصور بس شرار عايش الدور اكثر واحد بيهم...

حسان وسوالفه وعمايله مال المجرمين كص من الكيكه جانت مليانه كريم وغمز المهيب اشرله يفتح الكاميرا ويصور

ومهيب بعد ضابط اكيد فهمه فتح الكاميرا وصور حسان اخذ الكريم كله ومشه بحذر ولطخ الكريم كله بوجهه شرار ورگبته

كمز شرار من مكانه وعاط بي وهو يمسح بالكريم...لا حسان طيح الله حضك تضل طول عمرك عار وكلب

حسان مشه بغرور والكريم لسه بعد بيده كال...محد كلك امن بيه

وصل يم لهيب ولطخ باقي الكريم بوجهه وهو يضحك ولهيب تخبل ...اهووو حسان شبيك تخبلت

علي صاح بيهم بغضب...شبيكم تخبلتو احترمو النعمه

احنه جنه ميتين من الضحك ومتحمسين لان صار ملاطخ بالكيك قصدي بالكريم

بس الخربها عمو علي مجان راضي وكل شويه وكال عيب متستحون حرام نعمه

مهيب بغفله اخذ من الكريم ولطخه بوجهه حسان ضحك وحسان لزم مهيب ودمره

وكف علي بغضب كااافي كااافي والله بعد الي يسوي هييج اله اكسر الكلاصات علئ راسه مزعطه انتم متكولولي كااافي ...

هم استقروا بس ضاجو وهو كعد علئ الكرسي شرار كال بتنهيده...والله امنيتي الطخ الكريم بوجهه علي بس اخاف انسحل بالشارع...

باوعتله فرح وضحكت..تدلل شرار هسه احقق امنيتك

مشت بخطوات حذره وتقربت من علي وهي بطرف اصبعها شويه كريم

وهو جان يحجي ويه ابنه وممنتبه عليها وخلت الكريم بخده بسرعه انتبه الها ومسح الكريم وخزرها بغضب

هي ضحكت بصووت عالي ومن شافته خزرها سكتت وضلت كوه كاتمه ضحكتها واحنه كذلك

هو انطه الطفل الموج ومسح خده بالكنلكس تحت انظارها

غلس عنها وشرب عصير وضل يطكطك بموبايله يمه الهدوء ما بعد العاصفه

ضل ياخذ بالكيك بالماعون السفري وفرح ضلت تاخذ صور سلفي عاد هو ما قصر لزك الماعون والكيكه كله بوجهه

بحيث وجهه فرح عباره عن كريم وككاوو وفتات مال كيك

كلنه ضحكنه بصوت عالي وهي تخبلت هو لزكه بوجهها ومشه وهي لحكته تركض وتصييح...يا ابو الحرام وحرام وحرام وتالي الكيكه كلها بوجهي اني اصلا لطخت شويه كريم بخدك تلزك الكيكه كلها بوجهي ليش

هو تجاوزها ومشه وهو يبتسم بثقل

باوعتلنه مقهوره ...ياربي حتئ ما اكدر اتنفس الكريم سد منافذ التنفس عندي

شرار...ينرادلج مي يفور وليفه لان الكريم دسم ميطلع من الوجهه

صاحت عليه...انت اخر واحد تحجي اصلا انت السبب

كلها...دروحي اغسلي وجهج جنج الرجل الثلجي وبي كورونا ...

باوعتله بغرور ورجعت تطكطك صور هي والكريم...

صحيت علئ همسه من حسان وهو يكول.. شنو رايج تمثلين دور مريتي حتى الطخ الكريم بخدودج وارجع اكله

خزرته متفاجاة من جرأته شنوو هاي مو جنك رحت زايد ترى حرام عليك وعيب

رد عليه بثقه .كلت كون مرتي يعني مو حرام اني من افكر افكر بالحلال قابل كلت كون صاحبتي

همست واني بيه الضحكه ...وجة نظر بس حتئ بالحلال ما اريدك

رد برفعة حاجب ...علينه منو صايرة العطواني وخلصت الحفله بس تصور بيه

باوعتله مصدومه...مصدك نفسك ترئ لا صورتك ولا شئ جنت اصور الاجواء

مد ايده...انطيني الموبايل خلي اشوف الصدك من الجذب

باوعتله :- ..علئ اي اساس انطيك موبايلي وبعدين موبايلي بي صوري

غمزلي : خلي اشوف صورج ؟

رمقته بنظره حاده وبعدها خليت ومشيت وهو جر نفس عميق ويكوول...اووووف

من رجعت للبيت فكرت بكلام احسان وشغلي بالصيدلية مالته وفكرت هم اساعد احمد بالمصرف مالتي ومالة ابني صح عمر ممقصر ويجيب نفقة ابنه بالوقت المحدد بس هم اريد مصرف الي

وبعد كم يوم احمد حيتزوج وهمينه حيزيد عليه المصرف فكرت بس سكتت ولا فتحت الموضوع ويه اي احد .

يوم ثاني اجه احمد حجه ويايه اثاري حسان كايله ولا تفوته فايته واحمد كلي بكيفج انت والصيدليه على طريق بيت فرح اذا تردين تخلين ابنج يمها .

كتله ميخالف كله اني موافقة اشتغل ...

كال اكو بنيه تشتغل وياج وهيه راح تعلمج يعني مو وحدج ...

جان ابالي اسئله يعني هو مو ويانه بس سكتت خفت على نبرتي لا تفضح شي من دواخلي ...

يوم ثاني جنت انتظره يجي ياخذني للصيدلية مالته هو اتفق ويه احمد

حضرت نفسي اني وابني لان محد بالشقة يبقى وحده خالة مجلبة ابيت خالو واحمد طالع عنده شغل .

لبست سترة ماروني طوخ وبنطرون نفس اللون وشيله بيضه وجوه السترة قميص ابيض ...

احس متوترة حيل رغم شوي برد بس عركت وكل شوي اسحب نفس وازفره .

رن موبايلي جان احمد كال احسان ينتظرج جوه طلعيله خابرني وصل ..

كتله يله طالعه قفلت الشقة ونزلت .. جان واكف يم سيارته لابس رسمي كالعادة قميص بدون رباط وفوكه سترة حسيت نفسي صرت سيت اني وياه اثنينه رسمي .

سلمت عليه انحنى شويه كرص خد حسوني ويحجي وياه شلونك حبيبي وين تروح هسه انته

جاوبه حسوني لحاله فرح .. ابتسم وباوعلي ، دنكت راسا يمكن جنت صافنة عليه وعلى حركاته وناسية نفسي ..

بالسيارة هو فتح باب الصدر البصفه واني فتحت الوره هو صعد حسوني وره وسد االباب بسرعة باوعتله مصدومة

كال بابتسامة خبيثة ترى والله مو السايق مالتج ...

هزيت راسي كتله ميخالف بس ابني صغير اخاف عليه اكعد يمه خاف يلعب بشي وينفتح الباب ..

كال اقفلها من يمي ...

بابتسامة مزيفة كتله گلب والدة بعد ..

وفتحت الباب وصعدت يم حسوني ..
خليته بحضني شميته بركبته وبسته بخده هو بهالاثناء هستوة جان صاعد ولاحظته يباوع علينه بالمراية .

خجلت ودنكت واخذت ادين حسوني خليتهم براحة كف ايدي وامسح عليهم بحنان

حرك السيارة وشمر عليه علاكة ورقية تفاجئت كلش منه

كتله شنو هايه

كال مادري اشو عجبني اجيبلج هدية بعيد ميلادج . وهم بمناسبة انو احنه راح نشتغل سوى .

احتاريت وحتى شعوري مكدرت افسره فرحة لو صدمة ما اعرف

بقيت لازمتها وحسوني يجر بيها يريد يفتحها

هو يباوعلي بالمراية يتأمل ملامحي وعينه ع طريق

كتله شكرا ليش تعبت نفسك ...

ما جاوب بس جان لازم لستيرن بقووة ..

وصلنه لبيت فرح نزلنه كلنا هو دك الباب واني وراه ، فتح الباب دانيال هو انحنى شويه صار بمستواه باسه على راسه حبيبي عمره ٨ سنوات هسه صاير رجال .

دخلت للطرمة فرح تنتظرني بوستها وسلمت على حسان بس احس بنظراتها قلق .

كالت ترحين وياه لوحدج وين احمد ادز وياكم دانيال

هو سمعها .. اي شلون ديج مال مصلحة بابا شبيج انت ورانا شغل شعدنه حفلة ناخذ دانيال ويانا روح بابا رووح اقرا معليك من امك .

بقينا صافنين اني وفرح وحدة بوجهه الثانية
راح تكضنها صفنات شبيجن ماكلات لحم مطاية ..ديله ورانه شغل .

مشى واني مشيت وراه وفرح ورانه تمشي وتوصي ..
دير بالك عليها وتكرص بيه وانت ديري بالج على نفسج

اجاوبها واني افرج ايدي اي اي خووش

وهو يجاوبها ملل ايييه لا توصين حريص شيخة ...

طلعنه وهيه واكفة بالباب ظل يكللها بانفعال ويأشر بيده ع السيارة ها ترحين ويانه ؟ انت ونعالج هذا ؟ ودشداشتج ؟

كالت هاا لا بس دير بالك عليها وصيحت انين ديري بالج

كاللها فضحتينه بالمنطقة هسه يكولون مرة الشيخ شبيهه تصيح وبعدين وين ماخذههه للاعدام وبعدين هيه الصيدلية شمرة عصا عن بيتكم .

رحت لزمتهه من اديه كتلها يله فوتي اخابرج بس اوصل ديري بالج على حسوني

هو يحبها حسوني ويفرح من يروح الهم جانت لازمته من ايده كالت من عيوني وفاتت جوه وتتلفت حرك السيارة وطلعنه .

هاالمرة انجبرت اكعد كدام جنت متوترة وهو حس بيه شغل اغنية سعد المجرد عدى الكلام .. كلش انطربت وياهه .

بس بعدني متوترة وهو كل شوي يباوعلي .. واعتقد يحس بيه لان اعصر باصابعي ..

صارت سيارة مقابيلنه وصخة والجامة كلها تراب ومكتوب عليها باصابعهم وعلى التراب اغسلني رحمة
لربك ... وهو عود مجاوبها كاتب مااغسل وسمايل معيب ماد لسانه ...

اني لزمتني الضحكة وابتسمت جان طل بوجهي هو وسررع شوي وسابق وي السيارة الوصخة طلع راسه من الجامة دك هورن وصاح بعلو صوته ع السايق اغسلهه يالوووصخ ...

خليت ايدي على حلكي وظليت اضحك اعتقد هو جان يحاول يلطف الجو لان شافني متوترة لان وحدي وياه .

وصلنه للصيدلية هو نزل واني وراه سلم على البنت اسمها سارة حلوة و مرتبه اكلته بالسلام وظلوا يسولفون ع الشغل واني واكفة وراه يمكن نساني

اصلا ممبينة وراه هو مغطي عليه بجسمه والبنية هم طويلة بس مو اطول منه ..

بعدها التفت عليه وابتسم لي واني عيني بعينه وهم ابتسمت ..

قدمني الها سلمت عليها وصاهه عليه
كال اذا احمد ميجي عليج اني اجي عليج المغرب هزيت راسي بقبول..
وهو راح ..

ظليت ويه سارة ظلت تحجي هوايه ع الادوية وعن نفسها وتسألني شيصير حسان مني وهواي شغلات جاوبتها .. تسالني ليش ميتزوج مناقصة شي هو صديق اخويه بس استحي اسئله كلامنه بس بالشغل .

جاوبتهه واني همين ما ادري ...

شويه انشغلت سارة ويه وحدة تريد شغلات نسائية
اني بالي يم الهدية ...

رحت فتحت الجنطة وفتحت العلبة جانت ساعة رولكس فضية وبيها ذهبي ذووق ونازكة كلش .

باوعت لسارة مشغولة جربتها على ايدي .. وابتسمت .. بعدها سمعت سارة تصيح عليه ضميتهه بسرعة ورحت عليها ...

المغرب اجه عليه احمد ورحت وياه لبيت فرح اخذت ابني ورجعنا للشقة جان يحجي بدينا بعدها مفاتحة الحظر .

كتله الخبر يم موج ..

مرت الايام مو دائما اروح للصيدلية لان دك امتحانات وهو سمعت بي مسافر ولا يكعد بنص هالكورونا والحظر ميكعد ..

رحنه اني وموج لبيت دينا نطلبها لأحمد ..
امها شوي متكبرة عكسها ..

كالت اي وين راح يكعدها بالشقة هاي وكلكم بيها ؟

هيه نطت دينا من يمها وصاحت بنبرة تحذيرية
ماما !!

جاوبتها موج لا خالة احمد هم ديجمع حاى يشتري بيت ...

ردت مفتهمت يريد يتزوج لو يشتري بيت!!!

دينا هم عضت شفتها و صاحت ماما وامها خزرتها ...

كالت موج هو احمد شاغول وتكدرون تسالون عنه وابد ميصرف فلوسه على شغلات تافهه ابد .

كالت الام اوكي عود نتشاور وناخذ رأي ابوهه واخوتهه ونرجع الكم الخبر ..

طلعنا طلعت ورانه دينا شاورت موج لتزعلين من ماما القرار الي بابا ميجبرني وماما هذا طبعها .

موج : لا حبيبتي هيه امج وتريد تأمن مستقبلج وانتي بعد تعرفين احمد وتعرفين كلشي عنه

_ يمعودة اني شبعانة ترى ما اهتم للماديات كم يوم ونرجع الكم الخبر ..

ابتسمت وبوستهها وطلعنه من يمهم .. احمد جان متلهف .. بس هم تأخروا والظاهر الام شويه معاندة ..

موج ماضغطت عليها واحمد هم ممحاجيها وبعدها حاظرته ..

الى ان قبل ايام ردوا النه الموافقة فرحنه كلش واحمد مدري مصدوم مدري فرحان وهيه تكول بالخطوبة يله افتح الحظر معاقبته ....

.....

حبايبي هاي اخر الاحداث للي طلبوا مني اخر احداثهم ....

😘اي شي يصير انا انزله 😘

التعديل بمساعدة الكاتبة المحبوبة سمو العراق Smoo-1997
مشكورة نوارة حبيبتي تعبتج وياي اليوم 😘😘

دمتم سالمين♥️