رواية حين يستبد أدم الفصل العاشر 10 - بقلم همس ليل

حبايب...هذا البارت لخاطركم...بس اتمنى ماتستعجلوني لان بعدنا نربط ذكريات الابطال بحاظرهم...ولازم اكتب على راحتي حتى اكدر اوصلكم الاحداث
#حين يستبد أدم
همس ليل
البارت العاشر
كرم....كعدت على صوت ذرى تصيح...التفت ماكو...كمت عل حيلي ولفيت للجهة الثانية مال الجرباية...جانت كاعدة بالكاع والفة رجليه لبطنه
_لحكني كرم راح اموت
انحنيت يمها...شبيج ذرى...احجي
جانت تبجي بقوة...وتصيح ...بطني ...راح اموت من الوجع...
خليت ايدي جوة ركبة رجليها والثانية جوة اجتافها...ورفعتها...
بس شفت جواها دم...خفت وخاصة من خليتها على الجرباية انطوت على نفسها وبقت تون بقوة...
نزلت لامي ركض...كتلها لحكي ذرى ماعرف شبيها من صعدت وشافت الدم...كالت هسة ناخذها للمستشفى...
خابرت الدكتورة بين ما امي وسعاد يبدلون لذرى
لان دشداشته جانت كلها دم...
طبعا الوكت نص الليل...والدكتورة مستحيل تطلع من بيتها...بس على الاقل نشوف شنسوي
الدكتورة....وديها للمستشفى وراح اخابر الدكتور الخفر...
شلت ذرى ونزلتها للسيارة...خليتها ليورة يم امي وايهاب يمي...
جنت اسوق وابالي يمها وهية تون من الالام..لاول مرة احس نفسي عاجز....
مابيدي شي...حسيت كلبي يريد يطلع من مكانه من خوفي عليها...
تمنيت الالم بية مو بيها...
وصلنا وشلتها للطوارئ الي حولها لردهة النسائية
امي دخلت وياهة وبقيت حاير برة ماعرف شسوي...ظليت الوب
طلع الطبيب...ركضت علي
كال ...هو حالة اسقاط...بس مانكدر نحدد هسة لازم سونار انطيتها مسكن وراح ننتظر تجي الدكتورة
رجعت كعدت على كرسي...حسيت ايد على جتفي...التفت شفت ايهاب...نسيت هو اجة وياي
٣ ساعات وطلع الفجر بس حسيتها دهر
تفاجات الدكتورة دخلت...
وهاي الدكتورة تصير عمة صديقي...وعندي هواي خدمات مسويها لها...
_دكتورة ماتوقعت هسة تجين
_والله كرم اجيت علمود زوجتك
_ليش خير دكتورة..اكو شي مكاله الطبيب
_خلي افوت اشوفها واكلك
ربع ساعة وطلعت...كرم راح ندخلها كورتاج...النزف ماديوكف...وضغطها بدة يهبط...
اني كتلهم يحضرون الغرفة...بس وقع على التعهد
وقعت واني مدهوش...جان ابالي شي واحد ذرى تطلع بالسلامة...
لحد ما طلعت الدكتورة ....ممر كدام غرفة العمليات يمكن الف مرة فريته...
_هادكتور شلونها ذرى
_ان شاء الله زينة...هسة شوية ويطلعوها...تعال وياي للمكتب
رحنا...طلبت من العاملة كهوة لنا
_شوف كرم...اني طبعا بحياتي ما اطلع هيج وكت مهما كان...
ولخاطرك اجيت...لان ما انسى وكفاتك
_دكتورة ما مسوي شي واني ممنون منج...
_باوع ابني...زوجتك قبل كم يوم من اجتني ...كان وضع الطفل ممتاز...وماعنده اي مشاكل
وانتة من خابرتني...كلت يجوز تعب ونازل شي عليها وانتو مهولين الموقف...
بس من خابرني الدكتور الخفر...كان النزف ديزيد وتعرف زوجتك اصلا عدها هبوط بالضغط...
خفت عليها واجيت ...
صراحة هسة تفاجات...لان الجنين متكطع ...
_ يعني شنو دكتورة
_ماعرف شكلك بس صار ٢٥ سنة اني بهالمجال...وهيج حالة تصير الا اذا...
_الا اذا شنو
_اريد العلاج الي كتبته لها ...جيب الراجتة والدوة...بس بعد اربع ايام...لان باجر مسافرة لاربيل ٣ ايام مؤتمر وارجع...
_خليتي بالي دكتورة
_لا يظل بالك...بس اريد تروح تجيبلها بطل دم...من المصرف...هسة يفتحون...
_اني اتبرع...
_خلي انطيك ورقة للمختبر
بين مارحت للمختبر واخذوا عينة وحللوها...وتبرعت
كانت ذرى مطلعيها بالغرفة...
لكيت امي تبجي....شكو يمة شبيج
ام كرم...يمة مالحكت تتهنى بوليدك...عين وصابتنا...
كرم...كولي يالله...كلشي رزق
تقربت من جرباية ذرى...جانت بعدها بالبنج...بس وجههة اصفر كركم...
دنكت بست راسها...حسيت شي بداخلي يخنكني
بودي اخذها بحظني واكلها بية ولا بيج
خلولها الدم....وبدت توعى...بس من صحت
ظلت تفر بعيونها بينا...
كمت يمها...حمد لله على سلامتج...شلونج هسة
ذرى...شصار..
امي راسا كامت تبجي...هية فهمت ظلت ساكتة...
وبعدين ...
ذرى...اريد امي...
خابرنا بيت عمي...بقينا كاعدين ساكتين واني يدور ابالي حجي الدكتورة...شنو جانت تقصد
دك تلفوني...طلع عمي واصل ويريد الغرفة..
طلعت استقبلته...واول مافاتت امها..شبكتها
وكامت ذرى تبجي...عفته وطلعت...
ماشايفها ابد تبجي...ودموعها تاذيني...
امي ارتفع ضغطها...فعمي كال وديها ترتاح...ام ريم تبقى يم ذرى
رجعت للبيت...وتلكتنا سعاد وابوية...
عفتهم وصعدت لغرفتي...كعدت على الجرباية
واباوع على الجرجف الي بالكاع...
ممكن يصير اسقاطها من ورة هاي نومتهة
ليش هالقسوة تصير عندي تجاهها...رجعت بشريط ذكرياتي لاول مرة شفتها
********
جنة نحاول اني وعلي نتفاهم وية عمي...وفجاة دخلت علينا...
احنة تفاجأنا ماصايرة عدنا هيج...بس وكفتهة
بكبرياء وانفة جذب نظري لها...
صح من رجعنا انتقدنا اني وعلي هالشي...
بس بداخلي عجبتني شخصيتها...
والمواقف الي تلت هالشي كلها جانت مصادمات وياها...
رغم ما جنت اشوفها هواي...شكد اجينة خاصة بمرض ابوها الي هو عمي
شفنا امها وريم وسما...بس هية لا
متاكد جانت تتجنب تشوفنا....لان مرات من شباك الصالة اشوفها تدخل راجعة من الكلية....
يوم جنت مار اشوف عمي...بابهم مو عالي وشفتها...جانت ظافرة شعرها ولابسة تراك وداتغسل الطرمة...تنرفزت كلش....
ولمن سألتها شلون تطلع هيج جانت اجابتها تحدي مثل كل مرة
بس مظهرها ماراح من بالي...
ماعرف ليش بقت معششة بدماغي...وجانت عندي رغبة اشوفها كل مااروح لبيت عمي....
من كال عمي ريم منطي حجاية عليها...اذا تريدون
اخذوا ذرى....حسيت كلبي فز من مكانه...
هاي الفرس لي...محد يكدر يروضها غيري...
كلت لابوية...اعترض كال بنت عمك محجوزة لك...
بس محد يكدر يعترض على جدي...
من حجيت له عنها...كال هاي لك ...
تكدر توكف بظهرك واسندك اذا عرفت تتعامل وياها...
عمي جاسم....جان يغار من عمي جواد...
ومستعد لاي شي ممكن يكسر بيه...
من اجى عمي جواد يريد يصالح...اني توقعت 
جدي راح يشتري منه الكاع ويفضها...
بس ماتوقعت يفرض عليه يزوج بناته لنا...
بوقتها من رجع عمي ابغداد اخذت جدي للكاع ...يحب يطلع يتفرج على الزرع...
وجنت مسويله كعدة جوة كم نخلة ...اخذه هناك واكعد اسولف وياه...
كرم...جدي ليش فرضت على عمي جواد يزوج بناته لنا
الجد...بوية عمك ماعنده احد وبس بنات...واذا باع كاعه...راح يبتعد عنكم...
كرم...لا تزعل مني صارله ٢٥ سنة واكثر بعيد
الجد...اي بس جنت اعرف اكو يوم راح يجي لكاعه
جانت اجاباته مختصرة...طول عمره
جدي هيج
اذكرت....من صادمنا اني وعمي جاسم على الكاع
هو جان يريد شي واني شي ثاني....
بوقتها جنت هسة متخرج...صح ايام الكلية وقبلها
هم وية عمي وعلي اشتغل واراقب بالكاع...
بس بعد التخرج تفرغت لها...لذلك كثرة مصادماتي وية عمي...
عمي انسان متهور وقرارته مستعجلة...
عكس ابنه علي...الي هو صديقي كلش رغم فارق السن بينا
لذلك جدي قرر يقسم الكاع بينا....
وكاع جدي من ابوه...اكتشفنا كلها لمرته الاولة
يعني هاي الكاع كلها لعمي جواد...
صح هية اقل مساحة....بس احسن جزء...واغلى وقريبة من الشارع العام...
عمي جاسم تخبل والنوب جدي وكلها لي...
زاد هالشي من ثورة عمي...بس ماجان يكدر يسوي شي كدام ابوه....وجدي هم راضاه...
بجزء زيادة...
وطبعا عمي باسم موظف وماله خلك للزراعة
والكبار من جهال بنات...
فكاعه هم وكلها لي ...مقابل وارد ..
يعني صارت مسؤليتي جبيرة...صار ٧ سنوات من استلمتها...
طورت هواي بيها...وخاصة اني مهندس زراعي
الجد...هابوية وين رحت
كرم...جدي ليش انطيت كاع عمي جواد لي مو لعمي جاسم...بوقتها سالتك ماجاوبتني
الجد...بوية عمك جاسم يغار من اخوه وطول عمره يعتبره منافس
ولو منطيها له ...مايرجعها لعمك جواد...
كرم...واني تتوقع ارجعها
صفن جدي كدامه...الكاع عزيزة بعزة النفس...وانتة وعلي ابن عمك ورثتوا حب هالكاع اكثر من باقي ولد عمك
انة متأكد انتة ماتبخس حق عمك...اذا راد كاعه
بس هم ماياخذها...تعلم على حياة المدينة...
كرم...واذ رادها
الجد...اشتريها ولا تخلي غيرك يدخلها...هاي كاع اجدادي...كل الكيعان الي اشتريتهة بجفة وهاي بجفة
رجعت من ذكرياتي الي ودتني لذكريات ثانية
اوووف ياذرى...ليش هيج صار
********
ذرى..
صحيت...لكيت نفسي بالمستشفى
كرم وعمتي كاعدين يمي...ذاك الالام الي جنت اصيح بالليل منه مختفي...
بس حسيت اكو فراغ بداخلي...خواء غريب
من سالت الصار...وعمتي بجت عرفت...
احتاجيت امي بلحظتها...
من اجت فاضت دموعي...بالفترة الاخيرة ..حملي صار سلوة لي...جنت احجي وياه...
لان الكل نابذني...باوعت لكرم جان شكله تعبان
وعيونه حمر...بس بلحظتها تمنيته يروح مايبقى يمي
اجت الدكتورة تيجكني...
الدكتورة...ماما حمد لله على سلامتج...بس يرادلج هالفترة اكل زين لان هواي نزفتي...
بعد عشر ايام تجين اجيكج...
ماما حاولت تكومني تغسلي...بس وكفت دخت ورجعت وكعت....
امي تخبلت وبابا ركض للدكتورة...
عاد اجت من الدكتورات الي وياها خلتلي مغذي...وكالت هذا هبوط بالضغط
كرم اجى بالليل...عباله راح نطلع...بس الدكتورة كالت له تبقى لباجر
كرم...شلون صرتي...
جانت ادير وجهها كانما ماتريد تباوع علية
ذرى...الحمد لله...
بداخلي ما نسيت الي سواه وياي
ثاني يوم امي رادت تاخذني وياها للبيت...
كرم ماقبل...واني ماجنت اكدر اعترض ...مابية حيل
رجعوني للبيت...بس اعتزلت بغرفتي..
حتى من جان يجينة خطار يتحمدون على السلامة
على كد السلام واصعد
حاولت سعاد وايهاب وياي ..بس ٣ الايام الاولى
جنت احس بقهر مو طبيعي
سعاد ...ذرى ادري مو سهل عليج...بس حبيبتي...بعدج صغيرة وتعوضين ..بس دير بالج على نفسج ورجلج...
ترة كرم هم مقهور...والنوب يشوفج هيجي
باوعت عليها...كلت بكلبي كل همي وقهرني منة
سعاد...كومي اسبحي وغيري ملابسج.....وتعطري...خلي نفسيتج تتغير..صار ٣ ايام من رجعتي...وشعرج نفس اللفة...
سمعت حجايتها...لان اريد ارجع لنفسي القديمة
ارجع لقوتي ...
من طلعت من الحمام...لكيت سعاد بعدها تنتظرني
كعدتني على كرسي كدام ميز التواليت...
وفتحت شعري...وبدت تمشطه
سعاد...ذرى شعرج حلو....نفسي اطول شعري هيج
ذرى...اني من صغيرة احب اطوله...بس لان ماما معلمة...وماعدها وكت تمشط لنا واحنة ٣ جانت دائما تكصه...
لحد ماوصلت متوسطة...وبديت اعتمد على نفسي بالتمشيط...بعد ماخليتها تكصه ابد
وبديت اطوله واعتني بيه...
اظفري سعاد...احب اسويه ضفيرة
سعاد ...تعاي ننزل بالحديقة...
نزلنا ...عمتي تلكتني..اي يمة عفية انزلي وكولي يالله...خطية رجلج عينج عليه
كلها توصي بيه ...لعد واني شو محد مقدر مشاعري
سعاد سوت جاي وجانت مسوية كليجة...
وطلعنا كعدنا بالحديقة...
ذرى...شخبارج وية حامد
احمر وجهها..ماكو شي...
_مابين...اشو احمريتي...
_جابلي تلفون كال حتة اخابرج...لان من نطلع نجهز اكو احد ويانة
_ايوة ياعم...طبعا كله مخابرات واني مادري
_انتي جنتي ملتهية وية كرم...مشاكلكم ماتخلص
جريت نفس...ليش احنة مثل العالم
صعدت لغرفتي فتحت البردة وكعدت على الكرسي
كرم من رجعت ذرى من المستشفى لسة...بيها شي طافي...ماعرف شنو...
واني ماردت اضايقها بوجودي...ظليت اطلع اشتغل وارجع وكت الغدة وبالليل بعد ماتنام
من تنام اظل اتمعن بوجهها...نفسي اخذها بحظني...
بس مانسيت شغلة احمد ...
اريد تصحى شوي ونتفاهم...خامة نبقة العمر كله هيج...
رجعت تعبان...الشغل ما يتعبني...بس ذرى تعبتني
دخلت للغرفة ...جانت كاعدة ولامة رجليها لصدرها...وشابكتهن بايديهة...
مخلية راسها على ركبها...وتباوع على الشباك
ظفيرتهة نازلة ...مظهرها مال طفلة...حبيت كلش شكلهة...وتحركت مشاعري..
رحت باتجاهه...وكعدت مقابيلهة على الجرباية
ادري عرفت من دخلت بس ما رفعت راسها...
تنفست بحسرة...ومديت ايدي لزمت ضفيرتها...
اتلمسها...
_ذرى...لشوكت تبقين هيج...تريدين اطلعين تغيرين جو
رفعت راسها...جان اكو لمعة دمع بعيونها...
حركة كلبي...كمت وجريتهة وياي...رفعت راسها
خليت يدي على خدهه وابهامي بدة يتحرك على خدها...
ماكو حجي...من نحجي نصادم ...بس مرات اكو فعل يغني عن الكلام...
خليت ايدي على خصرهة...واني ماكدر اقاوم الرغبة الي بداخلي...سحبتها لي..
ابد ماقاومت ...تنهدت جان خدها يصيحني..
دنكت بستهة من خدها ...خلت ايديها على صدري..
حركتها شعلت النار بية ...جريتها لحظني واني اريد ادخلها بضلوعي...
حظنتها بقوة ...راسها على صدري ولافها بيدي الاثنين...
فزينا على دكة التلفون بجيبي...هية سحبت نفسها..
واني جريت نفس..وطلعت التلفون...شفتها الدكتورة متصلة....
كالت رجعت وياريت تجيب العلاج والراجيتة وتجيني
كرم...ذرى وين اخر علاج جبناه من الدكتورة
ذرى...على ميز التواليت
كرم....لا مو هذا...الي اخذتي قبل الاسقاط
راحت للمجر...وفتحته وطلعت جيس بيه العلاج
من فتحته ماكو وياه الراجتة...وين الوصفة
_ماعرف ...خلي اشوفها بالجنطة...
ظلت ادور بالجنطة ...واني ادور بالمجرات...
لكيتها بمجرها وياه شريط حبوب
كرم...هاي وينها...وهذا الشريط وياها
ماباوعت علية جانت ترجع بالجنط...
_اكيد وياهة لان ماعندي علاجات غيرها
اخذت العلاجات ورحت الدكتورة...
جان الوقت الظهر...وماكو مراجعين يمها...بس السكرتيرة...
دخلت...وانطيتها الوصفة والعلاج
الدكتورة...مثل ماكلت نفس العلاج الي كاتبته منطيها ابو الصيدلية ماكو تغيير..
جانت تكلب بالادوية لحد ماوصلت لاخر شريط
شالته وظلت صافنة عليه
_هذا من وين
_من ضمن العلاج غير
_لا ما كاتبته اني...شلون اكتب هيج شي
_ما فهمت دكتورة
_كرم ابني...هاي الرجيتة وهاي العلاجات..مابيها هذا الدوة...
اني من يوم سويت كرتاج لمرتك شكيت بالامر...
لان الاسقاط جان مو طبيعي...ووضع الطفل مثل ماكتلك مو مال يوكع هيج
_يعني شنو فهميني دكتورة
_هاي الحبوب مال اسقاط...يعني الحامل الي تاخذهن تطرح...
بس مال الاشهر الاولى...
مرتك بالرابع...جان ممكن تروح بيها وتموت...لوما ربك رحم بحالها
جانت تحجي واحس واحد ضربني على راسي
طلعت منها والف فكرة وفكرة براسي
سقت بسرعة والغضب عاميني...
معقولة تطرح الطفل عناد بية...
بس الدكتورة كالت ممكن تموت بيها...
ما اصور تجازف بحياتها
زين مين جابته...اذكرت اختها صيدلانية
خلي افتهم منها ...ما اريد اتهور وياها
وللحكاية تكملة