رواية حين يستبد أدم الفصل العشرون 20 - بقلم همس ليل

يسعد يومكم....ممنونة من البنات الي قدم تعازيهم...واحب اكول للي تكولي كملي ..نسينا الاحداث واحنة متابعيج لازم تلتزمين ويانة...
اكول لها..ترة هذا موت مو لعبة...مارايحة عرس لو اتونس وعايفتج ماملتزمة وياج...
مثل تريدون واحد يلتزم وياكم المفروض تقدرون وضعه....
وصدكوا لاجل المتابعات الي قدروا ولان ماحب اعوف شي ناقص ...كتبت ....
والله وضعي مايسمح حاليا...واريد اختمها ...تحياتي
#حين يستبد أدم
همس ليل
البارت التاسع عشر
كرم....
رفعت ايدي اتلمس الرطوبة...من باوعت على ايدي دم...
وبدة خشمي ينزف دم...
كمت اريد اجيب شي اخلي على خشمي...
بطلعتي من الصالة شافني ايهاب...
تخبل...راسا جاب كطن وصاح على حامد
حامد وابوية اجو ركض...
بس اني راسي احسه يريد ايطك...
اخذني حامد وايهاب للمستشفى...
الدكتور حولني للطوارئ مباشرة...
طلع ضغطي صاعد حيل...
والدكتور كال المفروض تحمد ربك...
شاب وهيج يصعد ضغطك ..لوما خشمك نزف
جان صار عندك جلطة ...وما اريد اكولك بعد شنو الاحتمالات....
كرم...صار مدة راسي يوجعني...
الدكتور ...هو الظاهر مشكل عندك ضغط وماتدري...الافضل من تطلع منه تراجع دكتور اخصائي...
خلوني بالطوارئ ...على مغذي وابر مدررة
غمضت عيني...وخليت ايدي على راسي
وذكرت....شلون مديت ايدي عليها...
وهية جانت تتوسل بس اسمعني...
لو من ضربت ايدي بالجامة...وكامت تنزف
اني اجرها من شعرها...
وهية مجلبة بية...تريد بس تلف ايدي
معقولة هيج جنت قاسي وياهة
بس اني هم حقي...
من البداية هية تعاند...
ما نطتني فكرة عنها صحيحة...
وشفت شلون اتفقت وية احمد على الكلية...
ومن رجعت سمعتهة تحجي بالتلفون ...
والطرف الثاني يهددها...
وبعدها اجت الصور....
رغم من هدئت جنت ناوي اروح افهم منها موضوع الصور...
بس اجى التصوير وخلاني اغير كل تفكيري...
اعرف اني ظلمتها...بس شنو بيدي وكل الدلائل ضدها
اني هم نغدر بية ...ونظلمت...ماكان سهل علية
احس مخدوع ....
ماقبلت ابقى بالمستشفى رجعنا بالليل للبيت...
تلكاني ابوية وامي وسعاد....
بس ماجان عندي خلك احجي وية احد....
صعدت لغرفتي...من دخلتها وكعدت الجرباية
هاجت كل المواجع.....مصحوبة بشعور الظلم
بينما كل مرة احس بالخداع والخيانة....
بس شعور تكون ظالم لاعز احبابك...
للشخص الوحيد الي حرك مشاعرك...
وسكن كلبك....
صعب حيل هالشعور....
فتحت المجر...وطلعت ظفيرتها الي خليتها
بجيس حتة ماتتوسخ....
ظليت اتلمسها...واحس شي جوة خدي
تلمسته واني اتفاجأ بدموعي....
ثاني مرة ينزل دمعي لاجلها....
وين القوة الي اتباهة بيها...
وين جسارة كلبي....
ليش كله يضيع يمهة...
معقولة راح تقبل ترجع...
******
سعاد.....
المفروض ما اتفاجأ بالي صار....
بس جنت اتمنى مايطلع صدك موج مسوية كل
هذا....
جذبت البنية وخليتها مكان شبهة...
ابوية بعد ماخذوا كرم للمستشفى ...
وخابروه وكالوا ...جان ممكن يصير عنده جلطة
رجع على موج...وماكتله بس....
لا زين شعرها صفر...وكاللها لوما خوفي من
الفضيحة جان كتلتج فوات....
بس ما اريد اخوتج ينزلون راسهم....
ومن رجع كرم ...وشافه مثل المكسور...
وهو متعود على هيبته...
ماتحمل....منة دكة موج...ومنة وكعة كرم
تخربط...ونقلناه للمستشفى....
بس ما كلنا لكرم.....والصبح بس نزلوا سكره
وضغطه...رجعه حامد وايهاب...
بيومها حتة كرم ما كعد من وكت...
وظلت امي كل شوي تصعدله ...تخاف عليه
يعني بليلتها جانت مصيبة علينا....
حامد خابر اخته وطلب منها تجي تبات يم امه
ومن رجع الصبح جان حيل تعبان...
راد بس ينام....
من كعد جبتله جاي ...
سعاد...حامد هسة شراح يسوي كرم
حامد...مااعرف والله ....وين هو هسة
سعاد...من كعد ما تريك بس شرب جاي وطلع
...المفروض مو يروح للذرى يصالحها
حامد...والله كلمة يصالحها ماتكفي...يعني ظلمها واتهمها وشمت بيها الباقين...
وفوكها حاولت تستر على الحية اختج ....
ومافضحتها...
سعاد...هية كالت والله وماصدكتها
جان حامد نص متمدد...عدل كعدته وخلة استكان الجاي على الطبلة...
حامد...شنو كالت لج
سعاد...حجت كل هذا باخر مرة رحتلها...
حامد...يعني جنت تدرين...وماحجيتي
اشرت براسي....واشوف حامد تعصب
حامد...انتو شنو من بشر...تحبون دظلمون غيركم
اختج لاعبة فلك...وانت تدرين وعفتيها براحتهة
يعني هم شاركتي ...ومنو الظلمتوه...اخوج الي ماشفته قصر وية وحدة بيكم
سعاد...ماجنت ادري والله...انتة كلت عنده تصوير
وهية كالت الرام انباك...
شمدريني منو الصادك
حامد....لا والله تدرين...بس خفتي على اختج..
واني اكول عليج طيبة وماعندج شيطنة....
والله لوما كرم بشدة هسة...وما اريد ازيد همه
جان خليتج هنا كبال اختج الحية...
عافني وطلع...حقه..بس ماجان قصدي....
يعني اجذب كل الدلائل الي جانت ضدها ..
واني ماعرفتها عمري كله هية ٦ اشهر
******
ذرى.....
جان اكو استاذ يجينا بمادة ثانوية....
يطلع عمره نهاية الثلاثينات اسمه  حسام...
بعد مابدت السنة باسبوع تفاجأت كالوا سال عنج
بس مارحتله ....
ويوم واني كاعدة بالقاعة انتظر المحاظرة الثانية
ودخل القاعة استاذ حسام وتقرب من الاستول الكاعدة عليه
حسام...صباح الخير
ذرى...صباح النور
حسام ...حظرتج ذرى
ذرى...نعم استاذ ...تفضل
حسام...قبل فترة سألت عليج...وطلبت تمرين عليه
ما وصلولج خبر
ذرى...لا وصلولي ...وتعذرني استاذ..بس ماصار مجال
حسام...مو مشكلة...بس حبيت اكولج اي شي تحتاجين اني حاظر...
ذرى...ممنونة استاذ...بس ماعرفت شمعنى اني
حسام...واحد من ولد عمج صديق اخوية حيل...وصاني عليج
ذرى...شكر جزيلا...ماتقصر
راح واني افكر منو ممكن يكون...اكيد احمد لان كال عندي اصدقاء بالكلية...
بس ما اريد منهم اي شي ....
صار شهرين من داومت ...وحسام دائما يمر يسألني بعدما تخلص محاظرته...اذا احتاج شي...
بكل مرة اشكر منه....
مرة جنت طالعة من المحاظرة...وسمعته صاح براي
التفت عليه...
جان جاية يمشي بأتجاهي...تأملته...
شاب مرتب وانيق...صح متوسط الطول بس رشيق
وهواي بنات يحاولن ينطخن بيه...
بس هو كلش ثكيل...وجدي زيادة ...
حسام...شلونج ذرى...
ذرى...اهلا استاذ
حسام...ممكن تمرين علية للمكتب
ذرى...والله استاذ الخط ينتظرني...اذا تريد شي ...
تفضل هنا كوله
هو سكت مثل انحرج...
حسام...خلي اتمشى وياج للخط مالتج
وبالطريق....واني نوعا محرجة...لان استاذ..
والعين عليه...
حسام...ذرى ...كم مرة اجيت وكتلج مري علية
ذرى...استاذ ما محتاجة شي...
حسام...والله اني كلش محرج من ابن عمج....كل مرة يسألني
ذرى...طمنه...كله مامحتاجة شي
حسام...ممكن اعرف...شنو مقطوعة العلاقة بينكم
سكتت ما اريد ادخل بالتفاصيل...وما اريد احرجه..
هو الظاهر يريد يقدم خدمة
حسام...يجوز ادخلت بشي ما يعنيني....
بس الوضع غريب نوعا ما....
وصراحة اني صار فترة مراقبج...وشفتج مو مثل
كل الطالبات...
المحاظرات كلها تحضريها...وعلاقتج محدودة
بالكل....
وبنفس الوقت مو خجولة بالعكس ماشاء شخصيتج
قوية...
وهالشي حيرني...
وصلنا للبارك...التفت عليه...
ذرى...استاذ حسام...لا تحتار ولا تشيل همي...
اني وضعي شوية مختلف...
وممنونة منك...بس ترة ما محتاجة شي
حسام...زين اوعديني اذا احتاجيتي شي
تمرين علية
ذرى...اوكي...ان شاء الله
عفته وصعدت لخطي...واباوع عليه بقى بمكانه صافن...
حتة بالبيت...اني مو مثل قبل...صح ظاهريا
متماسكة ...بس داخلي مكسورة...
واريد ارجع المم شتات حياتي...
ستة اشهر وية كرم ..جانت عمر كامل بالنسبة الي
عشت سلسلة من الاحداث...وشفت عالم غريب
علية
عالم متماسك ظاهريا...بس بالباطن ..يحركه الطمع
والجشع والغيرة ...الحقد المتراكم من سنوات...
يوم رجعت للبيت...شفت سيارات واكفة باب بيتنا
عرفت هالسيارات لمن...
حسيت كلبي رجف ...ورجلي ثكلن...
طبيت سلمت على امي...وما سألت...رغم عيونها جانت تحجي...
صعدت لغرفتي...بدلت وتمددت...ما اريد انزل
ولا مستعدة اسمع لاحد
حتة ابوية ما دز علية ...
بس بالليل...حاجاني..
ابو ريم...بابا اليوم اجة عمج باسم وقاسم وعلي وكرم...
من وصل اسمه...ماعرف شلون تخربطت احوالي
ذرى...شرادو
ابو ريم...اجو اعتذروا...ويريدون ترجعين لرجلج
ذرى...طليقي مو رجلي...هيج بسهولة
ابو ريم ...كالوا مستعدين لاي طلب تطلبيه
ذرى...خلص بابا...كوللهم طلبي الوحيد يعوفوني بحالي...
ترخصت منه وكمت...واني افكر شكد مغرور وشايف نفسه...
مصور بس يأشر راح اجي اركض...يحلم والله
بعدها اجوا اكثر من مرتين...بس جان نفس جوابي
وابوية ما ضغط علية هالمرة ابد...
******
كرم....
راجعت دكتور وسجلي على حب ضغط
لان شكل عندي مزمن....
بس جنت احس بروحي لايبة...ماعرف شسوي
لاول مرة بحياتي احس مقيد...
وامري مو بيدي...
ابوية من شافني هيج...كال احنة نروحلها
وفعلا رحنة....ومن دخلت من الباب الخارجي راجعة من الكلية
شفتها...ورف كلبي عليها...
بس تفاجأنا بعمي
ابو ريم...بوية جيتكم على راسي...بس يوم اختاريت
كرم...لان اتصورت راح يصون بنتي...
وراح اتكون بحماه....
وتالي جان ممكن تموت وبنص بيتكم...ومنكم وبيكم
واتهمتوها بسمعتها واخلاقها...
اعرف بنتي هم غلطت من ضمت الموضوع...
بس رادت تستر على بنتكم....وماردت تسويلكم فضيحة
ابو كرم...شو صارت بنتكم وبنتنا...ليش خوية هنا كلهن بناتنا
ابو ريم...لا خوية...الظاهر مو هيج...يوم بنتي غلطت...ابنك طردها وطلكها بدون مايسمعلها...
ولا حتة يسوي خاطر لعمه...ويجي يفهمني
بس بنتكم ...شسويتوا لها...خليتوها سكتة
ابوية سكت...
علي...عمي ذرى من سوت هيج رادت تجنبنا الفضيحة...قابل نجي نفضح نفسنا بنفسنا...
وهاي حوبتها ماتعدت... سامر راح جوة الكبور
وموج عمي وكرم ماقصروا وياها...
ليش نهدم حياتهم على  غلطة جهال
ابو ريم...والله ما مستعد اخسر بنتي...شضمني مايطلعولي جهال النوب وهالمرة تروح بيها
وتالي خلصت كعدتنا وية عمي بدون مانوصل لنتيجة....
ورحنا مرتين النوب...مرة علي كاله شوف رأي البنية
خاف لها نية ترجع لرجلها
كال هية اصلا ماتريد تشوفه...
حجايته حيل كسرتني....صح جنت متوقع منها هالشي...الي سويته وياها مو قليل...
بس جان عندي امل تسامح....
*****
ذرى....
جنت كاعدة على مصطبة انتظر الخط....
جنت مدنكة اكلب بالكتاب...شفت ظل وكع علية...
رفعت راسي اريد اشوف منو هذا...
تفاجأت بكرم واكف قريب علية....
ماعرف شصار بية...ارتبكت بس بنفس الوقت
حاولت استعيد توازني...
رجعت دنكت على كتابي...بس كمت ما اشوف شي من الكلمات الي كدامي
_شلونج ذرى
جاوبته واني مدنكة...بخير مادام بعيدة عنكم
_لهدرجة...
_واكثر...
كعد بصفي ...وسكت فترة...
_ذرى...اعرف اني أذيتج هواي...بس اني هم معذور
...نلعب علينة...
_انتة نلعب عليك...ضحكتني...
لوما بداخلك تريد اتصدك...جان ماصدكت...
على الاقل جان سمعتلي...انطيتني مجال افهمك
_بتصورج جان عندج كل الاسباب الي تخليج تكرهيني..
ودائما جنت تكولين راح اندمك على زواجك مني..
مافكرتي ممكن اخليها ابالي واصور ممكن تسوين اي شي حتة تحركين كلبي
_بس ماتجي اعرض نفسي للموت...او اذب ابني...
لو اريد جان سويته من اول شهر...
مو انتظر للرابع...
عموما هسة شتريد كرم...الموضوع راح وانتهى...
واني اريد ابدي حياتي واكمل دراستي
_واني ذرى...مالي مكان بحياتج...
_انتة حشكت نفسك بحياتي...عمرك مجان لك مكان بيها.. ومن دخلتها ماشفت بس الهم والقهر
سكت وشفت باوع كدامه...
جان يحاول يبين هو متماسك ومايهمه شي...
بس حركة ايده المتوترة ...فضحته..
_بنت عمي ماكدر اجبرج...بس اذا تنفع كلمة الاعتذار.
فأني اسف...
عمري ماكلتها لانسان...بس لج
باوعت عليه...حتة من يعتذر بانفة وما يباوع علية
_اني هم اسفة...ما اكدر اكمل وياك...هذا حدنا وصلنا لطريق مسدود
وكفت لان اجة خطي....هو هم وكف
_من رخصتك...اجة خطي...
مشيت مسافة عنه  وصاح وراية  وكفت
_ذرى....انتي بيوم كلتي تريد تكسر خشمي...
بس بنت عمي انتي هم ماقصرتي وكسرتي كلبي...
عفته وكملت طريقي...واني عيوني صب دمع..
بس مابية حيل للالم بعد....
وللحكاية تكملة