رواية حين يستبد أدم الفصل الثالث عشر 13 - بقلم همس ليل

#حين يستبد أدم
همس ليل
البارت الثالث عشر
مر شهر على جيتي لاهلي....
رغم ما اظهر لاهلي اني ماهمني شي...
بس بداخلي شي مكسور...شي يخنكني...
ماعرف شنو تفسيره...
من اجيت لاهلي جانت الكليات بلشت دوام...
وقبل اسبوع كلت لباب اريد اداوم...
بالبداية سكت...وبعدين كال خلي السنة تعدي
لان لازم رجلج يوافق
_يعني شنو بابا اظل معلكة مستقبلي لحد ما الاستاذ يقرر
_بابا انتي بعدج مرته...يعني لازم ناخذ موافقته
بكلبي كلت لو تنطبق السما على الارض ما اخابره واكوله
_زين بابا...خلي اروح اسجل حظور..على الاقل..واجل السنة
اخذني وداني...سويت تاجيل..
مو طاعة جانت من قبلي...بس ما ردت يلكة حجة علية...
اريد يوم اواجه ...يكون بقوة...ماكو نقطة علية
الاسابيع الفاتت..وبعد ماصرت زينة بلشت اساعد
ريم بترتيب اغراضها ...مابقة لها هواي تزوج
فيومي كله مشغول ....
الصبح بين التنظيف والغدة لان امي بالدوام
والظهر وية سما السنة سادس اعدادي...
والعصر وية ريم....
بس الليل تهيج عندي المواجع....صعبة احساسج بالظلم...
والصعب من تحسين ماتكدرين ادافعين عن نفسج...
يمكن لو باقية هناك...جان كدرت اعرف من سواها..
هواي خطرت ابالي اشخاص...
موج...فرح...بس شنو اكدر اسوي اذا بعيدة
اكتفيت ادعي ربي بصلاتي...
اكوله...الهي مالي غيرك...ربي ماترضى بالظلم...واني نظلمت وانتة اعلم...
اريد منك برائتي...
جنت من  يجافنيني النوم...
اظل اكول حسبي الله ونعم الوكيل...
هو يأخذ حقي....
جان امنيتي اشوف كرم من يعرف الحق...
اريد اكسره مثل ما كسرني..
*******.
كرم...
مر شهر ما خليت ما اجت ابالي فكرة...
استجوبت كل البيت بصورة مو مباشرة
ظلت فكرة الي سواها شخص استغل لمة او مناسبة عدنا
موج كامت من تشوفني تختل بالغرفة...
ابوية ...انجمع بية...
ابو كرم...بوية كافي عاد....ادري بيك وليدي عاقل ومايطلع منك الغلط....
بس مايصير هجي ....مرتك صارلها اكثر من شهر
لازم ترجعها...لو دحجي شنو سبب زعلكم
_بوية صار بس انطيني مجال..
سامر حاجيت علي عليه...ماجنت اريد افضح نفسنا
علي تخبل وكال الا ادبه...ومن باجر نخطبها غصب عنه
_لا خوية لا غصب ولا جبر...الرجال الي ماصان عرضه وهي ابيت اهلها...
مايصونها وهي اببته...
عفت ومشيت....
حياتي مكلوبة...اسد باب ...ينفتح باب
كلها بجفة...ورجعتي للغرفة تالي الليل بجفة...
تهيج وجع الفراك...وادك بالكلبي التعبان من ابعادها...
ويزيد وجعي ضيفرتها...الي تركتها عقاب لي...وهية ما تدري شوفتها تحرك كلبي حرك
قررت خلص...اروح اجيبها...اصلا اكبر غلط سويته يوم دزيتها لاهلها...
صح اجاوزت...بس كان المفروض اعاقبها وهية يمي مو اعاقب نفسي ببعادها
********
حامد....خابرت سعاد..
_ترة مايصير هيجي...راح احجي وية كرم..
اريد نزوج
_حامد خطية هو بياحال
_بلة شلون ماتصالح وية مرته...طلكها شلون نبطل ما نزوج
_يمة اسم الله ليش يطلكها...فال الله ولا فالك
_اني دكول مثلا...اليوم احجي وياه
رحت لكرم وحجيت...
_خوية براحتك..عموما اني نهاية الاسبوع اروح ارجع الاهل...
الاسبوع البعده تعال اخذ مرتك...
كمزت بسته...لك اركز شوي عيب...اني اخوها
رجعت واني طاير من الفرح...صح ماصار هواي من عرفتها...
بس حبيت طيبتها...خجلها...وكلشي بيها
خابرتها....حبيبة الكلب...بعد اقل الاسبوعين تنورين بيتي
_صدك ...حجيت وية كرم
_اي وراح ماتصير بس احلام...راح احضن وانام
والله خوش اغنية انفع اكتب اغاني...
خرب بس تضحك...لج ريحي كلبي بكلمة
_من اصير ابيتك...عود اشبعك حجي
_اي الظاهر راح تكضيها حجي...اعرف بحظي المصخم
_لعد شتريد
_بعد اسبوعين اكولج شريد
*********
ذرى.....
نهاية الاسبوع ...صعدت سما العصر تركض...جنت واني ريم دنصفط ملابسها
_ذرى..ذرى
ذرى....شبيج خبلة
سما...لج تدرين منو جوة
ريم...دحجي منو فضيها
_كرم...اجى
جانت بيدي ملابس اصفطها...توقفت فجاة ...
بعدين انتبهت على ريم وسما يباعون علية
رجعت اصفط...شنو يعني
ريم...ذرى لا تستعجلين بقرارج...مرات بساعة العصبية كلشي يطلع من الشخص...
باوعت عليها...صح بس مو كل كلام يغتفر
حجيت وية نفسي...
ابوية دز علية بعد نص ساعة...
قبلها اني لبست بنطلون جينز...وقميص قصير..
شعري من كصيته جان مو عدل...
فاخذت ريم ورحت للصالون بعد ٣ اسابيع من جيتي ورتبت كصته...
صح قصير...بس لاكتلي الكصة...وجنت معتزة بلونه من جان طويل...جان كستنائي لونه
هالمرة خصلت عليه...
بوقتها ردت اغير بشكلي ...
جانت نوع من الثورة على الحزن الي بداخلي
هسة من داشوف نفسي بالمراية...
هواي صاير تغيير بشكلي ...
خليت مكياج خفيف...مو غايتي حتة اعجبه...
لا بس غايتي يفهم مأثر علية بعده ...
ابوية قبل ما ادخل انفرد بية بغرفته..
_بوية...لا تصورين اني ممكن اتنازل عن حقج...
بس ما اريد اصرف من كيفي...ويكون لج رغبة بالرجعة
تريدين تبقين ...هذا بيتج محد يكولج على عينج حاجب...واني اوكف وياج لاخر لحظة
تريدين ترجعين وياه...ماكولج اختيارج وانتي رجعتي...
الحياة ما تخلى من المشاكل بين المزوجين...
مو لازم من اول مشكلة تنهزمين ...وماتواجهين
وبعد القرار قرارج
استمعت له...وهزيت راسي
_صار بابا...بس اريد احجي وياه قبل كلشي
_براحتج
دخلت واني اقوي نفسي...
ليش خايفة من مواجهته...
سلمت وكعدت مقابيله...شفت عينه طفرت
وتوسعت...وهو يناقل بيها على وجهي وشعري
وينزل على باقي لبسي..
باوعت تفاجات بيه...جان شكله ضعفان وبي شي متغير ماعرف شنو...
بس نفس كعدة الشموخ والسيطرة مالته
_شلونج ذرى
_الحمد لله...انت شلونك
_ماشي...مو كافي عاد ترجعين للبيت
_ليش هو منو طلعني من البيت
_ساعة عصبية...
حتة بهاي ما طخ راس ويعتذر
_والاتهام...والضرب
_كتلج ساعة عصبية...وانتي هم تجاوزتي
ماردت اكعد اعاتب ...ابالي شي اريد احققه
_وهسة شنو تاكدت مامسويتها وجيت...لو لا
سكت...وجر نفس
_عوفي هالموضوع
_اعوفه ...وشنو الي يضمن باجر مايجيني اتهام ثاني
_منو يتهمج...انتي شدحجين
_شوف كرم...اني ما اضمن سلامتي بعد يمك
شفته تعصب وعدل كعدته
_بنت عمي عيب هالحجي...ليش مو بعينج احميج
_زين اسالك سؤال...بس تكون صريح
انتة متأكد ماسويتها...
تردد شوية....ما اعتقد تسويها
_ما تعتقد...لو متاكد
_اريد اعرف لوين تردين توصلين
وكفت...اريد اوصل...اذا رجعت شنو يضملي باجر يصير شي وتتجمع المواقف علية...وهم تصدك انتة...
لذلك عندي طلب اذا ردتني ارجع وياك
طبعا ما كلت له شرط...لان اعرف بيه يثور
_شنو طلبج
_ماتمد ايدك وتلمسني...لحد ماتثبت برائتي
بقى يباوع علية....وشنو الغاية
_هذا طلبي
_تم بنت عمي...حظري نفسج ولبسي جبة على لبسج لو غيريه
هزيت راسي...وبداخلي اكول بعد كرم الايام الجاية طويلة
طلعت من يمه وامي تلكتني...
_هاماما
_راح الم اغراضي وارجع وياه
_شنو تخبلتي ما كافي الصار
ابو ريم...عوفي البنية هية تقرر
ام ريم...انتة شنو من اب...فهمني...لا حجيت ...لا كتله ليش هيج سويت
ابو ريم...يامرة لا تخربين على بنتج...هية جبيرة ...وتفتهم...
ام ريم...ماما ذرى...مالج علاقة بابوج...ترة ماناقصج شي...اطلكي وكملي دراستج ..والف واحد يتمناج
تقدمت بست راسها...هالمرة اني رايحة بمزاجي لا تخافين علية
عافتني ودخلت للمطبخ
ابو ريم...عوفيها بنتي...هسة تهدى...روحي كملي اغراضج
كملت وريم وسما يساعدوني..
سما ماتبطل بجي
لحد ماصعدت السيارة...وهية تبجي...امي دخلت غرفتها..وماقبلت تسلم علينا
******
كرم رحت لبيت عمي ارجع ذرى...
عمي بقيت متواصل وياه من رجعت ذرى ولغاية هاي اللحظة...
وضحتله بالتلفون بوقتهة الصار...هو تفهم ..وكال حاول ادور على سواها...
جنت متوقع راح الكة معارضة من ذرى...
وراح ترفض ترجع...وعزة نفسها تمنعها حتة تشوفني...
بس تفاجات بهدوئها الغريب...وصح طلبها جان غريب...
بس استغربت من وافقت ترجع وبهدوء وبدون حتة عتب...
من دخلت ومشت من كدامي وعيوني تتمعن بجسمها...
فز كلبي من مكانه..كان ابودي اكوم اضمها لصدري..
واطلع نار البعد كله ....
عيوني تناقلت بين تقاسيمها...
قهرني مظهر شعرها...رغم كصته لايكة عليه
والنوب مخصلة...
طالعة فد شي...بس ضعفانة...
شراح يصبرني وانفذ طلبها....
صعدت يمي...عطرها ملة السيارة
من تحركنا...شدعوة هلكد حاطة عطر
باوعت علية مبتسمة...عادي بس لان مكان مغلق
بداخلي ما مطمن لهدوئها...احس وراها شي
بس سهلة...بس كم موقف تطلع عن طورها وتبين شعدها...
تبسمت واني اتخيل تصورني غبي...ومراح اعرف هية ابالها شي تريد تحققه
من وصلنا تلكوها اهلي وخاصة سعاد....بس موج ما طلعت ..
كعدت يمهم واني صعدت الجنطة للغرفة...
تمددت على الجرباية واني مرتاح...
كافي رجعت لهنا....
غفيت ...وما حسيت الا بعد ساعتين...
جان الدنيا الليل...صار هواي ما نايم هيج نوم عميق...
التفت ماكو هية...بس ملابسهة موجودة...
يعني صاعدة مبدلة ونازلة....
نزلت سمعت صوت ضحكها...هية وسعاد وايهاب بالمطبخ...
ضجت...ليش سهلة التعامل وية الكل بس وياي...
رحت عليهم...
_ضحكونا وياكم
ايهاب...صل على نبينا...هاي انتة هنا هيج وكت
اكيد بركات ذرى
ضربته على جتفه...بلا لغوة زايدة
اكو عشا جوعان...
سعاد...اي هسة نخلص ...دقايق وننجمع ..صار شكد ما مجموعين
ايهاب...بعدلج اسبوع وتصيرين غريبة بهالبيت
سعاد...ليش يابة
عفتهم يتلاغون وتقدمت لذرى جانت تثرم زلاطة.
وكفت وراها ...ومديت ايدي اخذ كلاص...
هية فزت من طخ جسمي بجسمها...
التفت علية...غمزت لها...واخذت مي وخرت
بيومها الضحكة ملت وجه الكل...انجمعنة كلنا على العشى
ورجع شقاهم وضحكهم...
ذرى...شو موج ماشفتهة من اجيت لسة
الكل سكت...وهية هم مالحت
لليل...من صعدنة دنام
تفاجات...ذرى صعدت فراش من جوة
_هاي شنو
_حتة ما اضايقك من دنام
_منو  كالج مضايقتني
_انتة لو نسيت
جانت تحجي وياي وتفرش من الجهة الثانية
رحت لها وجريت الفراش
اصعدي نامي على الجرباية...
ولا تخافين...شفتي اربع اشهر ما خالفت وعدي وياج...
صعدت على الجرباية...واني من الجهة الثانية
لحد ماغفت...انداريت عليها...
اتمعن بوجهها...صح ما خالفت وعدي وياج...
بس من يوم ذكت طعم شفايفج...صار صعب علية يمي وما انولج...
*******
ذرى ....
يوم الرجعت...موج لليل وماشفتها...
وثاني يوم...اصلا ما سلمت علية...
وما راحت للمدرسة....شنو الموضوع...
ولاحظت من يكون كرم موجود هية تنهزم منه
ذرى....سعاد شنو موضوع موج
سعاد سكتت...
_اكولج بس لا عرف كرم بيها
_شنو قصدج
_علمود سامر
_انتي تعرفين
_اي مرة شفتهة ...وردت اكولج....بس صارشغلة خطوبتج والحمل ونسيت
_شعجب ماكلتي لكرم
_شلون اكوله غير يموتها...اني نصحتها..بس ما سمعت مني
بحجايتي اذكرت من هددتني...وخليتها ابالي هالمسالة...
خلي نخلص من هوسة عرس سعاد ..وافرغلها
بديت استفزها...
من كاعدين اجي اكعد واشاقة وية الكل ....
وهية اصلا منبوذة...اتعمد اخلي عمتي تصخرها بحجة سعاد تزوج...وماكو احد يساعدنا
مرة شفتها تتنصت علينا اني وسعاد
_اكولج سعاد...هسة شنو راح تكملين دراسة...لو حامد مايقبل
_لا شسوي بيها...هو يريد رب بيت
_يلا احسن...وين تلحكين...
بس تعرفين شنو استخطيت موج
_ليش
_بعد سامر ولا يفكر بيها...صيدلاني وحلو...اكيد هسة وياه يخبلن
_والله خيتي شكولج
علاقتي بكرم رجعت للمربع الاول...
كام يطلع من الصبح واشوفه وكت الغدة والعشى..ويجي من انام
اليوم حنة سعاد ...
لبست فستان طويل نيلي...وبيه ياخة مرفوعة بيضة
ونهاية الردن ايضا بيضة
الفستان كلش مستور من واكفة بس من امشي الفتحة توصل للفخذ...الردن بالحركة تنفتح على الزنود
ومن ورة فتحة سبعة بنص الجتاف...
لبست كلادة ورجعتها ليورة تبين بفتحت الظهر
وشعري مايصير شي هو قصير شسورته
دخل كرم...باوع علية وبقة صافن...
_ها بي شي لبسي
_لا بالعكس...مستور...شعجب...
ضحكت...فات من يمي...واني داريد اطلع
_اوكفي...هاي شنو
تقرب لزم الكلادة بظهري...ونزلت ايده على فتخة ظهري
_شنو
_هاي الفتحة نص ظهرج طالع
بقت ايده تتلمس بظهري
_ادري كرم هالمرة بس بنات وحتة انتة وعمي وايهاب تبقون بالحديقة بعد شنو
عفته يتلمس بظهري...جانت ايده ترسم حدود
سبعة الفستان...كزبر جسمي...
تأخر يلا جاوب..وجان صوته مبين متأثر
_مو اني استغربت شلون الفستان مستور
ضحكت...وابتعدت عنه
كعدت مقابيله على الكرسي مال ميز التواليت
وجهي له....وبديت البس حذائي...
انفتحت الجاكة على طول الرجل والفخذ
_خرب...لج هاي شنو...
ماتنزلين هيج...رجلج كلها طالعة
وكفت ...بس من اكعد باوع من وكفت اختفت..
عود ما اكعد...
_ومن تمشين...
مشيت كدامه...باوع ما يطلع اي شي
جرني عليه...وخله ايده على خصري....
ومن قرب راسه...
خليت ايدي على حلكه...
_انتة وعدت...
رخت ايده...سحبت نفسي منه ونزلت
جنت اتهادى كدام الكل بمشيتي...وخاصة موج...
وظهرت اني ام البيت...كلشي اني اوجه..
شفت هواي عيون انصدمت ...ونغثت...موج...فرح...عمتي ماعجبها انفرد بكلشي...مرت عمي باسم اول مرة انتبه لنظراته..تخزر بية
بس رغم كلشي جانت الحفلة حلوة وتونسنا بيها
سعاد جانت طالعة حلوة كلش...
مرات هيج حفلات تخلي عندج احساس بالفرح
خلصت الحفلة وصعدت ابدل قبل مايجي ايهاب
البنات كلهن انجمعن نظفن البيت وغسلن كلشي...
تمنيت سما وريم يجون...بس بقت امي زعلانة
وتحججو.. مشغولين بريم
لبست دشداشة قصيرة للركبة...
وكفت كدام المراية امسح مكياجي...
دخل كرم...راح لجهته من الكنتور....
جنت اشوفه بالمراية عينه علية...
_باجر سعاد تريدني اروح وياها للصالون
_من ياخذكم...
_غير زوجها يدز سيارة...ماعرف بعد
_اني اخذكم...
_ومو يجي ياخذها للصورة
_ادري...قابل ترحين وياهم
_لعد اعوف البنية وحدها
سكت وحسيته ضاج
_خلي وحدة من البنات تروح وياها
التفت عليه...شنو السالفة...منو تروح غير اني
_لا كلت...عود خالتي الصغيرة تروح...
_ان شاء الله بالزفة هم ماتريدني اروح
_يازفة...همة راح يودهم لبيتهم...ويرجعون بعد شكو رايحة
دكيت رجلي بالكاع وتخوصرت...شنو هالاستبداد
بس اني مرة وياهم...مو كلهم رايحين...عود ليش اني لا
باوعلي مبتسم...مالي علاقة بغيري...
كلت ماترحين...خلص الحجي...
_لا ما خلص الحجي...هو مو فرض رأي
فات من يمي...يريد يطلع...خليت ايدي على زنده
_وين رايح مو داحجي وياج
التفت علية متفاجأ..
_انتي كد هالحركة
انتبهت على لزمتي...بس سويتها لا اراديا
غلست وسويت نفسي ما مهتمة
_هية شنو الكدها ...اوكف نتفاهم...
_انتي جنيتي على نفسج...
نفس ايدي الي خالتها عليه جرني منها
وخله ايده بورة راسي...
وبلمحة التقطت شفايفه شفايفي...
ما انكر بداخلي المشاعر تحركت...بس
جنت اردد وية نفسي ....
لا تخليه يكسرج....لا تنسين الصار...
خليته براحته...وسحب شفايفه..لتستقر على ركبتي..
وتمدت ايده تتلمس....بلحظة خفت لا استسلم...
بس شفت انفاسه حيل تغييرت...
سحبت نفسي بسرعة...
وهو وكف متفاجا...نظرته تكولي شنو الصار
_كتلك سابقا...من تثبت برائتي...قبلها..لا ...
والاهم...من اصير بامان ابيتك...حتة تستحق تكون زوجي...مو يجرئون يسقطوني...وانت موجود
كلماتي مست رجولته...رفع ايده يريد يضربني
وكفت بتحدي ...اضرب تعودت انتة ....مو شي جديد
نزل يده ودفعني من دربه وطلع
كعدت تعبانة على الجرباية...تعبانة من المشاعر الي احاول اسيطر عليها..
وتعبانة من التحدي...
يوم الزفة جانت بسيطة...اخذوا سعاد وراحوا...عمتي ظلت تبجي...وزعلت شلون مارحت وياها
بديت انظف من طلعوا...
دخلت موج...
ذرى_عود نظفي الصالة...
موج_ليش اخذ اوامري منج
ذرى_ليش ما عاجبتج
موج_والله انتي اعرف
ذرى_اي صدكتي...اني اعرف
موج_شنو قصدج
ذرة_ما قصدي شي...بس الجوة ابطه عنز يبقج
موج_لا تشمرين بالحجي...
لوما كرم تعطف عليج ورجعج جان انتي بعدج ابيت اهلج
ذرى_على الاقل يم رجلي...مو  مثل بعض ناس...طفروا وعافوهم
موج_المرة الجاية ...تبقين معلكة ابيت اهلج
تقربت للكاونتر..على اساس ارتب المواعين ظهري لها...
وشغلت الموبايل تسجيل...
وابتعدت بعد ما دفعته شوي...
ذرى_لا صدكين نفسج انتي السبب...
بابا انتي مجرد طفلة....روحي العبي بعيد
موج_صدك...وداعت رقم تلفون احمد...ولقاكم يم التنور
صفنت عليها ...ضحكت ومشت...
صعدت لغرفتي...وبيدي الموبايل...وكل شوي اعيد الحجي
تنفست بحسرة...موج ورة حركة احمد...
بس الحب ما اعتقد...لان مصورة كرم دزني لاهلي من ورة مشكلة احمد...
كرم...بعد موقف الحنة...تعامله بس كدام اهله..بس الغرفة مكتفي بالنوم بالليل...
خاصة هسة بدة يدخل علينا الشتة
يعني النهار كصير...مايلحك ينام الظهر
الشخص الثاني الخطر ابالي...
فرح....بس شلون ابدي وياها...
*******
حامد...
اليوم زفتي ممصدك نفسي....
_اخيرا راحوا...وبقينا وحدنا ياحلو
شبيج حمريتي وصفريتي..
كومي بدلي ونزلي سويلنا عشة يلا بين ما ابدل
_شلون
_شبيج ماسمعتي شكلت
تصنعت العصبية...شفتاه تغير لونها...
_صار...
كامت تريد تاخذ ملابسها وتطلع برة تبدل
_وين رايحة...بدلي هنا كدامي
_شنو...لا عفية
_شلون تفتحين سحاب البدلة
دمعت عينهة...ماتوقعتها هيج بسرعة تبجي
_لج هاي شنو اشاقة والله
تقربت شبكتها...
_ردت اداهرج موقصدي ابجيج
_اذا بليلة عرسنا بجيتني...باقي العمر شراح تسوي
_يوم نتعارك...يوم نتصالح...يوم اكتلج...يوم اطرديني لاهلي...يوم غمزتلها
ظلت تضحك...
_اي هيج...اريد اسمع ضحكتج...شو تعاي خلي اشوفج اليوم الاخير شقصد بيه
كعدتني من الصبح...
_شعنده الحلو من الصبح كاعد...
_ماجعت ...نيمتنا بدون عشى
كمزت على حيلي
_خرب بعمي...نسيت العشى على الميز هسة خرب
كله من وراج
_اني شكو
جريتها لي...يعني هالكمر يمي وافكر بالاكل
دفعتني من جتفي...
_كافي كوم نأكل
_اوكفي....جريت الموبايل...
_لمن تخابر
_اخابر اخوج...اكوله شعدها اختك بايتة يمي
_صخام...جيب التلفون
رفعت ايدي فوك
_اذا كدرتي تلوحي قزومة
ظلت تتعارك وياي تريد تاخذه
واخر شي جريتهة يمي...
_الريوك ينتظر شوي
******
ايهاب....
يوم سبعة سعاد....مكانها فارغ بالبيت
الصبح من كعدنا جانوا يتحضرون يرحولها
كرم كال راح اخذ امي وذرى وموج
وانت مر على بيت عمي جواد
جيب البنات...يريدون يجون للسبعة...ومايندلون
كيفت...صدقة لله راح اشوفها
فترة الي رجعت علاقتنا بعمي...اني قليل اروح
لحد ما عزومنا بيت عمي جواد بعد عرس كرم
فاتت بنية ...صدقة ربي شلون حلوة
بنات عمي كلهن حلوات...بس وحدة تختلف عن الثانية...
ريم ....جمالها من النوع الفاهي...يعني بيضة بعيون نرجسي طويلة...بس ماتحس جمالها
ذرى....بيضة بعيون سود علينا طالعة وطويلة...
بس شخصية...وجرعة كلش...الي يشوفها يكول كلش توالم كرم
بس الثالثة...ماتشبه اخواتها...سمرة وعيون سود...
قصيرة...وخجولة كلش..
سمارها من النوع المحبوب...تدخل للكلب راسا
طول فترة العزومة وعيني مانزلت من عليها..
حست هية بنظراتي...بينت من ارتباكها وخجلها
المرة الثانية شفتها من  وصلت ذرى ...كرم جان عنده شغل...كال وديها واني ارجعها
واخر مرة...من وديت ذرى زعلانة لاهلها
هية هم طلعتلي...بس شافت اختها متخربطة
راسا كامت تبجي...
بقت ابالي...بس ادري بيها السنة سادس اعدادي
واني هم رابع كلية
خلي اتخرج ونشوف...ومثلي مثل باقي ولد عمي
متاملين اخذ من بنات عمي باسم...
رحت لبيت عمي...وطلع عمي استقلبني
دخلت بين ماشربت جاي ...دخلن البنات...طفرت عيني لسما...
صدقة لربج شلون طالعة....
اخذتهم...مرت عمي ما اجت بس ريم وسما
ريم صعدت يمي..سما ليورة
عدلت المراية عليها...
وطول الطريق عيني عليها...
من وصلتهن..جانت ريم اغلب الوقت هية تحجي...سما ما سمعت صوتهة
من نزلوا...ريم انتظرت سما
ظليت واكف ورجعت صحت لسما...
من شفت ريم انشغلت تسلم على ذرى
_نعم
_نسيت انطيكم تلفوني ...حتة من تخلصون تخابروني...سجلي
طلعت تلفونها...ايده ترجف وهية حيل مرتبكة
عجبني ارتباكها...انتجيت على السيارة وهية داتحاول تفتح التلفون
رديته له...بهاللحظة طلعت ذرى
_شكو ايهاب
_ماكو شي انطيتها تلفوني حتة يخابروني من يكملون
جنت احجي وعيني عليها شلون ارتبكت زيادة
ذرى رفعت اصبعها مثل التهديد...وعيونها تأشر
على سما
واني رفعت ايدي علامات الاستسلام
ضحكت وجرت اختها وطبت
بقيت انتظر شوكت دخابرني...
دك تلفوني ...اباوع ذرى...
خرب ....كرم شمزوج...
_نعم ذرى
_تعال افندي الجماعة ينتظروك...بس ها مو تنسى
ضحكت...سدج امين
رجعتهم بس مصار مجال احجي وياها...
******
ذرى....
بالسبعة تقربت من فرح...ورحت كعدت يمها
وبديت اسولف وياها...
بالبداية تحذرت وبعدين بدت تسولف...
وسالت على صبغ شعري...كتلها اخذي رقمي ومن تريدين خابريني وتعاي اسويلج اني اعرف
واجت...وفعلا سويتلها شعرها...وخلال اسبوعين
توطدت علاقتي بيها...
وجانت المفاجاة من مرة دنحجي ...
وللحكاية تكملة