رواية حين يستبد أدم الفصل الثامن عشر 18 - بقلم همس ليل

يسعد مساؤكم بالخير والعافية....من باجر الساعة تسعة بالليل موعدنا اليومي... انزل بارت....بدت الاسرار تنكشف عدناومابقة شي....وراح تأخذ القصة منحني ثاني...تحياتي

ثاني ....حياتي
#حين يستبد أدم
همس ليل
البارت السابع عشر
سعاد...ذرى شنو الي صار
ذرى...بدت تجيني رسايل ...جانت بالبداية تافهة...
وبعدين...بدت تهديد....
سعاد...شلون يعني...
ذرى...صور ماخوذة بحنتج...وتعرفين فستاني جان مفتوح...
التهديد كان بصور الحنة...اول مرة كال ادزها لكرم..
اني صراحة جنت واثقة كرم راح يعرف هاي صور
ممكن اي واحد ياخذها ويدزها..
بس المشكلة منو اخذها...
وبعدين صور لي وية احمد....
طبعا الشخص الوحيد الي له مصلحة هو سامر
سعاد...وشنو مصلحته
ذرى...لان اذيته...يعني مجرد انتقام لا اكثر ولا اقل...بعدين طلع الموضوع ابعد من هيج
سعاد...ليش ما حجيتي لكرم
ذرى...اولا لحد يوم جيت كرم...عبالي الصور بس مال الحنة...وكتلج واثقة كرم راح يتفهم
بس تفاجات بصور احمد....
سعاد ...شوفيني الصور
طلعت الموبايل وشوفتهة لها....
سعاد...ماعرف ذرى الصور عادية ...
ذرى...صح بس كرم محذرني من احمد...زين خليج بمكانه وتوصل صور وحدنا طالعين شنو راح تسوين
سعاد...يعني انتي منطيته الحق
ذرى...منطيته الحق يعصب ...واعرف هو ابن عرب ومايتقبل هالاشياء...
بس ما انطي الحق مايسمعني....
مانطي الحق يتهمني...
كان المفروض من يرتاح ويرجع لعقله يفكر...
شلون اخلاقي طول هالمدة الي وياه...
مو يطلكني ويشمتهم بية
سعاد...حقج....بس ليش هيج سوة
ذرى...اوووف سعاد الموضوع متشابك كلش
سعاد...يعني شلون...ترة دوختيني...زين الصور وحدة كلتي من رحت لبيت عمي...والباقيات...وين
ذرى....سعاد شبيج باعي للبس...وين جنت لابسته...والمكان ركزي
ظلت صافنة على الموبايل...
سعاد...نفس لبس زفة ريم...والمكان..ماعرف اني ماجاية هواي لبغداد فماكدر اركز
ذرى...باعي اول مرة رحت لعلي ...موكتلج فتت حجيت وية فرح...فسألت على ريم...لان سابقا اني حاجيتلهة عن خطوبتها...
وطبعا هية بنت عمي...عزمتها...
سعاد...هو عمي عزم الكل هم
ذرى...اي...بوقتها كرم الصبح خابرني وكال ايهاب يجي ياخذج بالزفة ...لاتصعدين وية اي شخص اخر
وتذكرين الصار
سعاد...اني وياج وسما وموج صعدنا وية ايهاب....
وذرى...وحظرتج تخربطي بالطريق واضطر ايهاب ينزلنة وياخذج انتي وموج للمستشفى
وطبعا ايهاب من باب كرم موصيه...شاف احمد وكاله وصاه علينا...
سعاد....عاد هو شمدريه كرم يتنحس من احمد
ذرى...صحيح واني ما كدرت اكوله لا
وجماعة زوج ريم نزلوا على جسر الجادرية يركصون
اني نزلت...ورحت اشوف ريم خاف محتاجة شي...من رجعت شفت بس احمد ...فرح وسما رايحات يباعن على الركص...
واحمد رجع سالني على الكلية ...وسوالف عادية ماخذت ربع ساعة ورجعن البنات...
بس واحد ابن حلال ...ماخذ صور بهالوكت بالذات
سعاد...يعني معقولة لهدرجة دترتب لهم الامور
ذرى...لا ....مو الامور دترتب لهم...بس همة خبيثين ويستغلون ابرء المواقف
سعاد...زين من اخذ الصور...موج جانت وياي...وسامر ماموجود
ذرى...هنا اكو طرف ثالث بالموضوع....وهو الي رتب اغلب الشغلات...بس منو الله اعلم
سعاد...لج خبلتيني...معقولة يطلع كل هذا من عائلتنا...داحس عايشة بغابة...شنو مصلحتهم
ذرى...همة ٣ اشخاص...كل واحد دحركه غاية اباله...واحد مستغل الثاني....
ارتاحي حبيبة....الي راح ينحجي بعد اكبر لعد
******
حامد.....
سعاد ماعرف شبيها....اعرف امي مرات تلح وياها بالحجي....
بس كلبها طيب...واني مابيدي شي...ماعدها غيري
وكسرت ظهرها تربينة...
ورغم هالشي...سعاد مافد يوم اشتكت ...
دائما حبيبتي متحملة وساكتة...
بس احس اكو شي ثاني...من رجعت من ذرى لسة هية تعبانة ....
يجوز اني هم ضغطت عليها...
بس ماردت تعيدها وية امي....
وصلتها ورجعت...وتلكتني امي تبجي وتنعي
حاولت اسكتها واطمن بالها....
اعرف هية عبالها راح اعوفها لخاطر مرتي...
صعدت لغرفتي واني ضايج...
البارحة مانمت من نزلت بالصالة...بقيت اتكلب..
تعودت عليها بحظني ....
ومن خابرتني ذرى كالت تعبانة ....اجيت اركض وبالي يمها...
بس حيل نقهرت لان مخابرتني....وانقهرت اكثر من شفتها كامت تلطم على وجهها...
ليش هية طول عمرها هادئة....حسيت الغرفة تخنكني...
نزلت وطلعت وية جماعتي ....
حتة كرم صاير ماينجاس...بس واحد يطخه...
يكلب الدنيا....
*********
كرم.....
كعدت بالليل بالحديقة....ودك تلفوني..شفته علي
عاتبني ليش ما امر عليه ...كال شوية وجايك وية ربعنا...
من اجو...واني مالي خلك احجي وية واحد...
بس كلت خلي التهي وياهم....
وواحد من ربعنا....شاعر لحوا عليه يشعرلهم
وكال شعر على حبيبته...وجر النار الي بكلبي
ليش اني مامحظوظ بالعشك...
علي...كرم وانتة مرات هم تكتب
كرم...اني مو شاعر...ولا اعرف بيه..
بس احب اسمع
علي...تذكر من جنت تكتب خواطر...هلي يحظرك كوله
لحوا علية...واني مناه روحي لايبة...
كرم...راح اكول بس لا دحاسبوني ترة مجرد خاطرة مرت ابالي...
انة مايوم حبيت...ولا مرني العشك
من شفتك كلبي فز عليك...
وحبك بسكتة...
يلي شعلت كلبي بنار عشكك
وعني مشيت...
وخليتني مساهر ليلي
والنوم جفاني....
زرعت حبك بكلبي ليش
وانتة ماتوفي يوم ناوي
انة الطول عمري عزيز النفس
ومايوم راسي حنيته الا للباري
بحبك دنكت الراس...
وبقيت انتظر يوم تهواني
جذبت كل ناس وبيك صدكت
ومايوم كلت راح تخون
وتطعن كلبي بسيف هجرك...
يالي من طبعك الجفة ومايوم توافي
وانة من طبعي الوفى..
ولو حبيت...اظل للموت موافي
سكتت ماكدرت اكمل على الي كلته واحس نار بكلبي تحركني...
خلص الوكت وياهم...وراحوا...
واني بقيت اباوع للسما...
ليش هيج نصيبي....ليش ماحبتني مثل ماحبيتها
صبرت عليها...وردتها بس تلين وياي...
وصدكت كلشي كالته....بس جانت صدمتي قوية من عرفت كلشي جان جذب...
معقولة اكون لهدرجة نغشيت بيها....
بس جان التصوير بيدي....صوت وصورة
كرم شبيك...هيج العشك طير عقلك...
بية نار ماتقبل تنطفي...
واحس داتحرك ضلوعي حرك...
شلون من ودي اروحلها واسحلها سحل...
بلكت اخفف هالوجع الي بية
جان اكو صوت يصرخ بداخلي...
انتة مشتاكلها...وتريد اطفي نارك بشوفتها
********
سعاد..
ثاني اليوم الصبح ابيت عمي....بس اني مانمت ليلي
صار ليلتين بعيد عن حامد...
والنوب ذرى خلت ابالي موضوع موج...
وما كملت حجيها....اريد اعرف شسوت
نزلنا تريكنا...وهية وسما بدو ينظفون واني بس اريد تكمل حتة تحجيلي ماتبقة
ما صدكت خلصت...
سعاد...ذرى عفية والله راح اطك...تعاي كملي
ذرى...سعاد انتي بياحال ...عوفي الموضوع..بعد ماكو رجة
سعاد ...ليش ما تريدين كرم يعرف الحقيقة
جانت تغسل المواعين....وكفت ايديها لحظات...وبعدين رجعت كملت...وسوت جاي واجت كعدت يمي على ميز الطعام
سعاد...اسفة مارحتي وية سما وامج لريم...علمودي
ذرى...لا ...اني مالي خلك للكال وكلت...وبعدين لا تنسين اني بعدة مال طلاك
كالت الحجاية واحس بيها غصة ....
سعاد...ذرى لو بس دكوليلي وتريحيني
ذرى...جنت اتمنى هو يجي يسألني ويكول اشرحيلي
شيلني الهم وعافني محملة بيه...
سعاد...ليش ما اتصلتي بيه وفهمتي...
ذرى...ليش سعاد...ماعندي كرامة...حتة لو غلطت..ماكو واحد يبيع هيج بسهولة اذا مايكون هو مستغني
سعاد...احجيلي الله عليج
ذرى...بس اذا عندي بكلبج محبة...ماترحين وتحجين لاخوج
اني سويت هالشي لخاطره...ماردت يوم ينكسر كدام بشر...
ماردت يوم احد يعيره ..لو يمس شموخه
وبكل الاحوال جنت ناوية احجيله...لان لازم يوكف اختج عد حدها...بس ما انطاني مجال...
سعاد...والله خوفتيني...
ذرى..طبعا صور مال احمد كتلج ماجنت اعرف بيها...
اجت بيوم وصول كرم...
واني كتلج عبالي سامر يريد ينتقم لان أذيته
طلع الفندي رايد يستغل هالموضوع ويسحب فلوس
سعاد...ماخاف من علي
ذرى...شيريد يسويله ...سيارة سحبها منه...فلوس بطل ينطيه...موبايل واخذه
بعد شيسوي...
وهاي هم اسباب خلته يحقد ...وهو مدمن شرب...فشافها فرصة يبتز
سعاد...بس انتي مانطيتيه...
ذرى...لا ماعنده شي قوي يمي...بس اكو شخص ثاني اسهل يبتزه لان جانت دكاتهم سوة
سعاد...لا تكولين موج
ذرى...اي
سعاد...مو تكولين الصور مسحتوهن
ذرى...كتلج فرمتت الموبايل...وعلي كال ترة مالكيت صور لها
سعاد...طلع ضامهن الصور مو
ذرى...لا وانتي الصادكة...طلع ماكو صور اصلا
سعاد...لعد شنو...
ذرى...راح اكولج الي صار....
طبعا موج باتت يمج بعد زفة ريم...ورجعنة ثاني يوم الصبح سوة...بعدها يومي وثالث...
موج شبه بطلت تاكل...وجهها صار اصفر ...وبدت نادر ماتطلع من غرفتها...
اني خفت كلت بس لا مسوية مصيبة جديدة
صحتها بغرفتي...وحاولت احجي وياها...
بالبداية ما حجت بعدين كامت تبجي...
*****
ذرى...موج احجي شنو الموضوع....ليش تبجين
موج...ادري قصرت وياج هواي...بس الله عليج ...بداعت عزاز كلبج ساعديني....
ذرى...لج شنو...مو فضينة شغلة الصور ...بعد شنو وراج
موج...لا اني جذبت عليج....ماكو صور المسألة اكبر
ذرى...اكبر شلون يعني
موج...عنده تصوير ..ديهدد بيه...اذا ما انطي فلوس...راح ينطي لكرم
ذرى...عزة بعينج...تصويريش...
موج...ادري اذا تعرفين ماراح تساعديني
بس احلفج بكرم اعرفه عزيز عليج...
ساعديني...والله يكتلني...مو بس هالشي...كال انشره
ذرى...يطبج مرض...شكدودج وهيج لعبتي من تكبرين شلون
موج...مو كتلج لخاطر كرم...
جانت كاعدة مقابيلي...راسا كامت وكعت على ايدي تبوسها...
جريت ايدي...شدسوين
موج...الله يخليج ساعديني
ذرى...باعي راح اساعدج بس مو لخاطرج...بس لخاطر شيبة عمي....
لخاطر اخوتج...
شنو المطلوب...
موج...يريد فلوس مقابل التصوير...ولا دخلين علي
لان كال مهما يسوي علي اوصل التصوير
ذرى...شكد يريد
كالت رقم هو مو جبير كلش...بس مانكدر ندبره
ذرى...انزلي واحاول اشوف شلون ادبر الفلوس
صفنت شسوي....
اعوفها اخاف هذا ناقص مو بس يدز التصوير لكرم
اخاف ينشرها صدك...
ادري شنو ذنب ابوها ...اخوتها....
وكرم كل ذيج الهيبة تروح لاجل وحدة زعطوطة..لعبت فلك
ياربي شسوي...خلي ادفعله...ومن يجي كرم انطي خبر عن الصار...لازم يسويلها جارة لاخته
بس خلي استر عليها هسة...واسد الموضوع
ثاني يوم كعدت الصبح...هو اصلا اني مانايمة
وكتلها اخذي موعد منه....
جنت اعرف كرم وين يخلي فلوسه...
اخذت منهن...ورحت لنفس المكان الي جان يواعدها بيه...
شفته كاعد ينتظر...من شافني وكف ...
سامر...هلا بنت عمي
ذرى...لا هلة ولا مرحبا
سامر...ليش...
ذرى...يعني ماتعرف ليش
سامر...طبعا ما اعرف ليش...
اني لا يمج...ولا حواليج...انتي اندكيتي بية
ذرى...انتة صدك ماتستحي...يعني تهدد بنت عمك وعرضك...وتريد اسكتلك
شو هذا ضحك...ورجع كعد على نخلة مكصوصة باقي بس جذع صاير مثل المقعد...
سامر...بنت عمج الي ضحكت عليج...وكالتلج عندي صور...
وانتي ركضتي لعلي كلتيله....
من كد ماحجوا بيج ....جنت اصورج اذكى من هيج....
ذرى...مافهمت شنو تقصد
سامر...يعني هسة انتي تعرفين شنو بالتصوير
ذرى...مايهمني ...المهم اسد الموضوع
سامر...والله لو تعرفين جان ولا جيتي
ذرى....بلا لغوة زيادة ...وين التصوير....وشنو يضمن باجر ماترجع تهدد بنسخة ثانية
سامر....الج كلمتي
من كال هيج ضحكت من كل كلبي
سامر...صدقة لهالضحكة....ادري تشايفة بكرم ...
يلوكلج واحد يقدرج
ذرى...تسكت عار...شجابك لكرم ياسكط
بيك خير حامي عرضك...موتلعب على بنت عمك وتشهر بيها
سامر...تجاوزتي وماجاوبتج...بس من ارد عليج...أذيج
ذرى...فضني...وين الرام...ومن تصير رجال عود ذيج الساعة احجي
حسيته عيونه كام تجدح نار...شكله شكد وسيم...
بس حسيته قبيح كلش
اثاري الجمال مو بالشكل ...لا ...بالاخلاق
انطاني الرام ونطيته الفلوس...
من ردت اروح...صاح وراي
سامر...ذرى...مثل ما كلتلج انتي اندكيتي بية
رجعت...وتلكتني موج...
موج...ها جبتي
ذرى..اي
موج...وينه
ذرى...شنو هوة
موج...التصوير...انطينياه
ذرى...تحجين صدك...طبعا ما انطيه...
موج...ليش...حتة تذليني بيه
ذرى...لج انتي شكد قبيحة...
عفتهة وصعدت...خليت الرام بالموبايل...
واني مترددة اشوفه لو لا ....
جنت خايفة افتحه...وبعدين فتحته
وياريت ما فتحته....
*******
سعاد....
من دا تحجي ذرى عن موج...ما اصدك هاي اختي الصغيرة هيج تسوي...
كمت الوب من القهر وحسيت صار عندي مغص   ومن وصلت بالحجي...
لحد مافتحت الرام...حسيت اجتني مغصة قوية صحت منها...
كمزت ذرى من مكانها....سعاد شبيج
سعاد....ذرى بطني راح اموت من الوجع
ذرى...راح اخابر حامد حتة نوديج للمستشفى
دكيت على حامد..كال اني يم كرم خارج بغداد
جاي هسة...
ركضت ذرى جابتلي عباية اسلامية وشال...
وهية هم لبست....
بس الوجع زاد....
ذرى...سعاد راح اجر تاكسي للمستشفى مو نفس دكتورتي
أشرت براسي...
وفعلا خطية ذرى اخذتني للدكتورة.....
الدكتورة ..كالت عندج تقلصات قوية والطفل نازل...
نيمتني بالمستشفى ...
جانت لويات قوية تجيني....
وذرى ركضت للصيدلية اشترت العلاج...لان المستشفى اهلي...
شكلولي مغذي وضربوني ابرة يمكن جانت مسكن
شفت حامد دخل ...شكله جان مرعوب
ذرى ترخصت وطلعت...وهو تقدم علية
باس راسي...شبيج عمري...شجاج
سعاد...حامد تعبانة حيل
شوية شوي بديت ما احس بالدنيا ....
من فتحت عيني جان حامد فوك راسي ...
وامي وكرم وذرى كاعدة على صفخة

******
كرم....
جان حامد يمي عدنا شغل ودك رقم عليه...
باوع عليه...
حامد...هاي ذرى...خاف صار شي
مجرد كال اسمها....
تخربطت احوالي....جنت مركز وية حامد شيحجي وياها
من سد التلفون....كرم هاي ذرى تكول سعاد متخربطة
راح اطلع لبغداد ...
كرم...روح انتة واني راح اجيب الوالدة والحكك
رجعت للبيت...اخذت امي...ولحكت حامد...
بالطريق خابرته...ردت اعرف وين همة
كال...ذرى ماخذتها للمستشفى
توجهت لهناك....وبية لهفة لشوفتها
من وصلت ...واول ما فتت شفتها كاعدة بالاستعلامات....
جانت لابسة عباية اسلامية مفتوح جزء منها...
وطالع تراك جواها....
وشالها ماشادته زين...بس هيج شامرته
فات من يمها دكتور...وتوقف بدة يحاجيهة
روحي فارت...ومشيت سريع باتجاهم...
من سلمت...شفتها فتحت عينها بقوة
يمكن تفاجأت بوجودي...
ترخص الدكتور وراح....
كرم...شراد
ذرى...يكول خلص المغذي مال سعاد....وراح تبقة للمغرب حتة تستقر حالتها
طبعا نسيت امي وراية ...
من اجت...ذرى تقدمت وسلمت عليها وباستها
تمنيت بلحظتها كون اني بمكان امي
بعدين هزيت راسي...اريد ابعد هالافكار
كرم...وين غرفتهم...وحامد ما وصل
ذرى...لا وصل عفته يم سعاد ...
دلتنا على غرفة سعاد....
وهية راحت كعدت على صفحة...بين ماخلصنا سلام
حامد...خوية ذرى...خلي اوصلج للبيت...
عمتي موجودة وانتي تعبتي
ذرى...عادي خيي...بس كون سالمة سعاد
كرم...لا ابقى انتة ...اني اوصلها..
توقعت راح تعترض...بس سكتت...
من طلعنا من غرفة سعاد...باوعت للعيون المراجعين شلون تباوع عليها
كرم...سدي عبايتج...ولبسي شالج عدل
ماجاوبتني...
صعدت يمي بالسيارة ...واني اشم ملي ريتي عطرها
طول الطريق لبيتهم...كلبي يخفق بحجاية...
مشتاكاج...
وعقلي يفكر بحجاية ...ليش هيج سويتي
ويوم الحجيت جانت لا كلمة كلبي ولاوكلمة عقلي
كرم...شبيها سعاد
ذرى...ماعرف
كرم....اتمنى تبتعدين عن حياتهة...سعاد طول عمرها عاقلة وتعرف تتصرف....
سكتت ماجاوبت...بس دارت وجها ناحية الشباك
بس وصلنا....فتحت باب سيارة
والتفت علية ...جان بعينهة نظرة غريبة
ذرى....ممنونة ابن عمي ماقصرت....ومايكون خاطرك الا طيب....اعتبرني خارج حياتكم للابد
كلمات بسيطة ...مكان ما تسعدني...حسيتها تطعني
بيها....
وكلبي جان يكول قصدها جان شي ثاني بيها
******
ذرى...
بعد ما وصلت ذرى وكشفت عليها الدكتورة...وديناها لغرفتها بالمستشفى...
الدكتورة دزت دكتور يجيكها...من باب احنة عرف
ومن طلع وصل حامد...
طلعت وعفتهم براحتهم....
جنت كاعدة بالاستعلامات...واجة نفس الدكتور
كال طمنت الدكتورة عليكم....اذا تحتاجون شي اني موجود
ذرى...ماقصرت دكتور...شلونها هسة سعاد
بعده الدكتور ديبلغني عن وضع سعاد...
ما اشوف الا كرم يمنا....
كلبي كام يخفك سريع...وجنت احاول اسيطر على وضعي...
ما اريد يلاحظ ارتباكي....
دليتهم على غرفة سعاد....
وحامد اصور شاف الوضع محرج...فعرض يوصلني
بس تفاجات بكرم...يكول اني اوصلها
ما رفضت لان مو وكت جدل....
ومهما يكون حامد غريب...
عيب اصعد وياه.....
جان اصوت بداخلي يكلي جذابة
وتفاجأت....من كال ابتعدي عن حياة سعاد
حسيت سجين وضربني بكلبي....
ماجاوبت...خفت لا يسمع الرجفة بصوتي
بس من نزلت تشكرت منه...واني اقصد...
بحجايتي...خلص بعد لو مهما يكون بعد ما ارجع لحياتهم...
******
سعاد...
بقيت لثاني يوم بالمستشفى...
بس ذرى بعد ما رجعت وخابرتني....
وحتة من سألت حامد كال ماخابرت...
رجعت للبيت وبقت كم يوم امي يمي...
وعمتي صارت كلش زينة وياي هالفترة كدامهم...
استغربت على ذرى ....ليش هيج سوت
سعاد...حامد شعجب ذرى كطعت وياي
حامد...ما اعرف
سعاد...من يجي كرم لازم احجي وياه
حامد...سعاد لا ادخلين نفسج اكثر...
همة يعرفون يصرفون
سعاد...لا حامد ...كرم ظالم ذرى...
لازم يفتهم الوضع
حامد....شنو الي يفتهم...انتي شتعرفين
سعاد...اعرف كل الموضوع....
حامد...لعد شلون ظالمها...اذا شاف التصوير بنفسه
سعاد...التصوير عنده...مين جابه...وشبيه جان
حامد...مو تكولين تعرفين كل الموضوع
سعاد...ماعرف بس شبيه التصوير...كول حامد
حامد...التصوير...بيه مين ذرى اشترت الحب الاجهاض..وشلون
سعاد...شلون....
وللحكاية تكملة....