رواية حين يزهر الحجر الفصل العشرون 20 - بقلم Shaqraa

مساء الورد
حين يزهر الحجر
الجزء الثامن عشر

ابو فواد اليوم جايين بطلب ..
ونريد مهرتكم لخيالنا..وانشالله ماتردنا..
كال شجاع..
وحسب ماعرفنا البنية حرة..
لا حاجين بيها ولا مقرية فاتحتها...
كأنه يكول لعاطف ..لا تتحجج بابن عمها...
كال عاطف..هو الصراحة جان ابن عمنا رايدها..
بس صارت مشاكل وانلغت الفكرة...
هو استاذ شجاع زلمة وكفو..
كله الشيخ ..والنعم منكم ابو فؤاد انتو مثل الذهب...
واحنا نريد بنيتكم لان مثل الذهب نفخر بيها وبنسبها بين الناس ..
بوكت الضيك توكف بظهر رجلها...
مثل ما الذهب يفيد صاحبه بوكت العوز...
لان الناس معادن ..
والمعدن الاصيل واحد يتعب لاجله...
تشوف شجاع اصراره ورغم رفضتوه ..
بس لو ماشايف بنيتكم كفو تصيرله زوجنة تدخله الجنة مااصر عليها...
واحنا نعرف ياابو فؤاد الزين بهالوكت حسرة...
يعني اليلكى الزين مثلكم مايفرط بي...
شتكول ياطيب الاصل ياابن الاجاويد...

كلامكم ع عيني وراسي ..
بس ياريت تنطونا مهلة بس نحاجي البنية ويصير خير..
تعرف اني بحساب والدها يعني لازم اكعد واحاجيها...
ورأيها اهم من راييي ..
لان هي صاحبة الشأن...
وجيتكم عزيزة وع راسي وعيني...
تشكره الشيخ وبقو يتمادحون ..
اني ممصدكة السمعته..
معقولة رح يسالني يعني وافق..
شسوي هسه اركص؟لا استحي من امي...
ولو مستحيل ماانتبهت لفرحتي..
وابتسامي الشكت حلكي...
هي كاعدة تسبح وتخطف نظراتها الي ماحجت...

من طلعو اجه يمنا عاطف بالمطبخ...
كال صبيلي استكان مهرة وتعالي وراي ..
امي تسبح وتباوعله...
ها ابن بطني !!نظراتها كلها تساؤل...
هبطت معنوياتي واني اشوفهم مثل الفاهمين بعض...
بس اني اطرش بالزفة....
تقرب يمها واخذ ايدها بيده...
تعاي حجية نتفاهم...
كامت وياه واني حميت الجاي والوب..
اريد بس اخلص وافوت...
طفيت العين وخليته ع الثانية الاكبر منها...
حتى يحمى بسرعة...
بقيت اشبر المطبخ بخطواتي وادعي...
ماعرف ليش قلبي مخموط وبطني مثل الواحد يخوط بيها...
من القلق والخوف هذا احساسي...

كمل الجاي وصبيته واخذته...
امي كاعدة وعاطف يمها وهي تكله...
لا يما امبين كبرت وكبرتك صارت على امك...
وهو يرفع بشعره ليورا ويتنهد...
انطيتهم الجاي وكعدت...
شرب شوية وكال...
مهرة رح اسألج بس سؤال وجاوبي وماريد لا كذب ولا لف ودوران...
احساسي بهاللحظة معقد..خوف ...من شنو رح يسأل عاطف...
قلق..من نتيجة جوابي...
قهر...من موقفي الي صار يتكرر كدام والدي الرباني....
حيرة..شنو اجاوبه لو طلع سؤاله مثل مافكرت وهو ..
انت تحبي لشجاع؟؟تردي؟؟
هذا الشي اليدور براسي ...
هزيتله راسي واني اخلي كوب الجاي بصينية ع الطبلة...
زين...
بوية انت بينج وبين شجاع شي؟؟؟؟
كولي احجي..واعدته بشي؟؟
اصراره مو ع الفارغ ترى..
مو غشمة احنا...
يوومه هنا احس جسمي كله لان بعد مينسند...
بلا مارفع راسيكتله...
لا ابد ماكو شي ولا فاتحني بموضوع ولا يجمعنا حتى حديث..
يعني مجرد سلام وكلام مدير ورب عمله...
احس الشيطان البداخلي يكول...
ضحكي ع نفسج قصدج  زوج وزوجته..

كال يصير خير بوية وكام...
من كام امي كالت ..ليش ماكلتي اي؟؟
باوعتلها بصدمة...
هزت راسها كالت..
اخوج راكب راسه يعني غسلي ايدج يما..
عافتني وكامت..
بس عبالك كفختني بماي بارد فتح عيوني ع الجاي يصير...
فززني من حلمي الي حلمته الظهر ..

وهو موافقة عاطف ...
بس مو يكولون حلم الظهر ظاهر!!!
ليش ماتحقق...
بس شكلج نسيتي يامهرة...
حلم المنام يتحقق..
بس حلم اليقظة يبقى معجزة...
لان كلشي مستحيل نحلمه بيقظتنا..
نحلمه لان صعب المنال..
لان حتى عقلنا الباطن ميصيغه النا بصيغة حلم...
يرفض يكون واهمنا بشي اعجازي...
بس عقلنا الظاهر يحاول يلهم نفسه بمشاهد يتمنى تصير...
صفناتنا تبني هاللحظات...
وتقودنا الها ونستقرهناااااك...
اي بذاك المكان البي الشي النريده...

تماما مااخذتني صفنتي لشجاع وهو كاعد يمي بقاط العرس...
ملامحه البصراوية المملوحة..
سماره اليطيب قلبي العليل..
عيونه الي شكد شفت عيون بالكون ومستحيل اكون مبالغه بهالشي...
بس بيها نظرات مشايفتها...
بيها اعماق مثل اعماق المحيط...
رغم هي عيون بنّية ..بس اشوف بيها محيط عميق وبنفس الوقت يحاوط احساسي...
... ..... .... واشوف نفسي بثوب ابيض واني يمه..
وايدي بأيده والسعاده تتسرب من وريدي لوريده من خلال لمساتنا.....

بس الفززني عاطف..فززني وانطاني كفن حتى ادفن بي احلامي...
ادفن بي اوهامي ...
خلاص مهرة انت حلمج ولد بس موؤد...
بسبب طائفية عاطف وعقله المتحجر...
هو يشوف مصلحتي مينطيني اله..
واني اشوفه دفن احساسي بثنين ايديه وهال عليهن تراب الخيبة....

رجع عاطف الخبر بنفس اليوم...
وهو بنفسه خابر شجاع...
يابه البنية حاجيتها وهي بلسانها كالت ماريده..
ولا تظن اكذب عليك...
اقسملك البنية رافضة..
ومامستعد انطي بنيتي هم غصب وهم لرجال بكد ابوها ...
نسبكم شرف صح ...بس مو النا...
من بعد مسمعت هالكلام انهاريت...

فتت لغرفتي وقفلت الباب..
بعد ماكلت لامي رح انام....
اول مرة يخطر ببالي اسمع لطمية...
من اسمع الناس تسمعها وتنسجم وحتى تبجي استغرب...
اكول لهالدرجة ترهف احساسهم...
فتحت اليوتيوب وكتب اسم الملا اسمه باسم الكربلائي...
دائما اسمع رحاب تحجي بي وسيد حسين هم يكل لزهرة
عليه لان يحبه...
طلعت كدامي وحدة ..اسمها يما..
من شيريد الدهر يما...
صفنت ع الكلمات احسها تغلغلت بروحي...
خلت غيوم همس ترعد ..وتتضارب...
حتى ينزل وابل دموعي....
اسمع وابجي ..بقيت اشهك..لا مو مريحة هالدمعات...
اريد اطلع همي...
بقيت الطم ع صدري بقببضة ايدي...
بقيت اضرب ع راسي...
بيديه ثنينهم بقيت الطم ع وجهي...
كااافي اصحي ...اصحيييييي.....
وكل ميعلى صوت اللطمية تعلى شهكاتي وضربي لقلبي بقبضتي...

دقايق فرغت بيها همي..
او يمكن فرغت احساسي..حتى اقتنع بالواقع واعيش بلا احساس...
راسي ثكل..عيوني احس مضلات صارت عليها ...
سديت الفون وغمضت اريد اناااام....
لان شجاع بالعشرة ومااتصل..
اكيد ينازع مثلي هسه..اكيد جاي يواجه الخيبة مثلي...
غمضت وبقيت موكفة عقلي عن كل تفكير....
لحظات وغفيت....
كعدت الصبح...ع صوت المنبه...
كمت بخطوات مشلولة بحزنها...
غسلت واجيت بدلت..
اريد الف شالي...
اباوع لوجهي مورم وعيني يمها اثار الاصابع ثلاثة ازرق...
خدي احمر واضح...
ماحطيت ذرة مكياج ..
خلي اليحجي شيريد يظن...
وشجاع مااراوي  وجهي حتى لا يحقق وياي....

من وصلت جان كاعد كالعادة...
واني مدنكة وقعت بسرعة وفتت للمكتب...
ورا ساعة دز علي...
كلت لوسام مااجي...
كال اذا متجين يكول اجي اني لمكتبج...
كمت حتى احط حد للمهزلة....
انهي المسرحية الي بديناها بسيناريو مسروق مو النا ....
فتت وهو واكف يتمشى...وجكارته بيده...
اول مدخلت اجيت عينه علي...
توقف عن سحب النفس من الجكارة وتقربلي...
ضربج؟؟؟راد يمد ايده ع خدي...
دفعتها...
لاا..ماضربني...
اني ضربت نفسي واريد اادبها...
عندك مانع؟؟
طفى الجكارة وتقرب صار كدامي..عطره المخلوط بالجكاير حرگ روحي...
هه واريد انساه عود...

مهرة لا تلعبين علي...حجاها بعصبية وغيض...
اخوج ضربج موووو؟؟؟؟
ولله مو هو ضربني..
اني ..اني ضربت نفسي من قهري...حجيتها واختنكت بعبرتي...
ضربت نفسي حتى اوعى للواقع الاني بييي....
بقت دموي تكت...
سحبني لصدره دفعته...
وخرر لتذبحني...جر راسي حيل وحطني ع صدره وايديه شابكة ظهري...
كافي كافي كل دمعة ماريد...

ولج تنزل دمعتج وتيأسين واني موجود؟؟؟؟
من البارحة لليوم اني محترك حرك واخابر بس اريد اطمنج...
اريد اكلج معليج باخوج...
وكلامه ماهمني...
ومستعد اصبر دهر ..ومااخلي ينطيج لغيري واني ريتي بيها نفس...
اني هو يحجي وشهكتي تزيد وابجي...
سكتي شريان گلبي سكتي...
جرني من حظنه ومسح خدودي...
باسني بين عيوني وجرني كعدني ع القنفة ووكف قريب...
ليش ولج مزورگة الخدود الحلوة...
ليش ينطيج گلبج تأذيني؟؟بهذا فعلج مردتي گلبي كفيلج الله ...

لا تهتمين لكلام اخوج...
واني اعرف رح تضعفين..واعرف اذا جابلج واحد وكلج اخذي تقبلين..
لان تكولين مالي امل بشجاع ...
ليش اربطه بيه واضيع عمره الباقي...
وهو منا شايب واني اخلص البقى من عمره...
انوب يوشل حتى جاهل مايبقى بي...

ضحكت واني فعلا البارحة حجيت وي نفسي اتركه ولا اخلي يضيع عمره وياي..
اي ضحكتي غديت فدوة لهالضحكة الصافية مثل گلبج...
مدامج مريتي محد يتدنالج ...
كمت وكتله...
رح اروح لان اخاف ينتبهون...
هو حجيتله عن كلام هنادي وكام يتحذر...
طلعت واحس مزاجي كله تغير...
سبحان الله ..مفاتيح احساسنا يملكها النحبه...
وبيده يخلينا سعداء او لا....

رجعت اشتغل بس حسن رغم نظراته الكلها تساؤل من منظري...
لا سأل ولا تدخل..
الله يستر عليه من انسان شكد واعي ومثقف..
كملت ورجعت للبيت...
امي من شافتني تفاجئت...
بس كالت..روحج اهم بنيتي...
لا تضرينها ترى ربج يحاسب عليها...
ولو فات الفوت ماينفع الصوت...

فهمت مغزى كلامها الي كان بنبرة مواساة وشجن
ام فاهمة بزرها محروم من اليحبه...
خابرتني رحاب لان شجاع كايللها..
حاولي تلهينها لان مخبلة اخاف تاذي نفسها بالكآبة...
وهي وزهرة ميعوفوني..
كل شوي سالفة وكل شوي صورة لو نكتة...
مرت اربع اشهر اني الكآبة مفاركتني...
كلش ناحلة ونفسيتي متغيرة..
شكد جنت احشش واضحك واصنف...
ع كولة امي حلكج ميند بس من تنامين...
طول ماانت كاعدة لو ترهمين لو تلگمين...
بس هسه لا ..الاكل والضحك زاعلتهم ..
ومقهورة ع شجاع اكثر من نفسي...
لان نزل نفسه لعاطف هواي...
ومن حقه بعمره يتزوج ويخلف...
يعني الى متى ينتظرني واني ماعرف مصيرنا شنو؟...

بيوم جنت راجعة من الدوام ...
شفت سيارة ببابنا اوباما بيضا...
فتت وامي بالمطبخ تصب اكل...
كلتلي الله يساعدج ..بست راسها وكلتلها الله يساعدج..
شنو منو عدنا؟؟
عدنا الشفية يما...
ابن عمج..
براق؟
اي هو اجو هو وعاطف سوا من برا...
وهسه جاي اصبلهم غدا...
شرجعهم سوا؟؟؟
حبيبة رجعهم العشك..حجتها وهي تباوعلي بنظرات حزن...
اخذت الصينية وراحت...
واني فتت لان هم كاعدين بالاستقبال همزين...

فتت لغرفة ومضروبة براسي من هذا الخسيس...
شرجعه ولا عنده كرامه ولا يمل..
والادهى عاطف..
راجعين سوا وجايبه يزقنب ويا...
بقيت الوب بالغرفة...
بعدين ورا ماراح..
اجاني عاطف للغرفة...
كعدنا وبدا يمهد بالكلام...
اخر شي كال...
انت كبرتي وتعرفين البنية ورا التخرج فرصها بالزواج تقل...
براق اعتذر مني وكال اني غلطان...
بس احبها واريدها من الصغر..
وفرطت بيها قبل ماافرط بيها هسه...
يابوية توكلي وخلينا نفرح بيكم..
اني حاس بي لان هم اريد اخته ومااكدر اكله احبها وماعيش بدونها...
بس بنظراته واضحة...
شتكولين اردله الجواب ونفرح بيكم؟؟

وللحكاية بقية
بقلم شقراء(قمر كانون)
طبعا ماعدنا كهرباء من ٨ وهسه اشتركت 3G حتى متبقون تنتظرون🌹