رواية حين يزهر الحجر الفصل الرابع 4 - بقلم Shaqraa

مساء العافية 🌹
حين يزهر الحجر
الجزء الثالث

سمعت كلامه ونغزني قلبي..هذا ليش هيجي يحجي شنو شاف مني!
يعني معقولة بسبب لبسي..
اذا هيج لعد شكد سطحي وعديم ثقافة..
خل اشوف هذا الاسبوع اذا مارتاحيت ابطل وطز بي وبشغله..
الصومالي المعطب شايف نفسه فد شي لو ماعيونه وطوله محد يكلبه...
رجعت للمكتب مالتي بس ضايجة..
سالني حسن كتله لا مابيه شي..
ماكدرت احجي عليه كدام احد انوب يفتنون وهو منا شلون يرتاحلي...
مشيت الموضوع وسكتت واستمريت اشتغل..
بس احاول مالتقي بي او اتصادم ..
بس هو جان نشط ونلكاه قبلنا جاي من الصبح ..
يكعد نرات يم الريسبشن الي نوقع يمه من اول من نجي نكتب حضورنا ونوقع...
بس لابس الناس وعبالك هو ملك واحنا عبيد..
كل مرة من يشوفني اجي يكوم يدخل اول مرة اشوف رجال هيجي يتحسس مني...
حتى نظراته من يباوع احسها نظرات قرف...
كلت بعد بس يصيرلي موقف ويا اترك..

بس مشى الشغل عادي وحيل مرتاحة بي وارفد مساندني..
جان عدنا مهندس بس مو يمنا شغله وقليل نلتقي..
بس من اجه لمكتبنا وشافني لطش ويبقى يتردد..
اني منطيته وجه وحتى سلام من يسلم ارد بثكل ..
بس كل مرة يجي يحجي وي حسن بس يبسمر بيه..
مرة جنت لابسة بدي بدي اصفر مخفف وبي من كدام موزة مرسومة ع الصدر ..
اول مدخلت شافني ارفد..
كال اليوم عدنا استعراض سيرك مال قرود..
اني ضحكت حيل وطبيعتي ضحكتي عالية وصارت بوجه شجاع وويا المهندس يوسف...
بس نظرات شجاع الي اول مرة احط عيني بعينه عدل..
جانت عبالك كدامه بريعصي مو مهرة..
ويوسف سبل عيونه وشبه ابتسامة بوجهه...
اني تمشيت بسرعة لغرفتي وهم بقو واكفين..
ماردت اطلع واشوفه بعد لان اصلا انحرجت من ضحكتي..
هو كلامي يكول تمط بالكلمة انوب ضحكة بعد..هالمرة صدك حيكول ضحكةراقصة...
بلشت شغل وعندي فايلات رتبتهم بالدولاب والتراب عليها كومة..
خلصت ورحت غسلت ..برجعتي للغرفة شافني السكرتير ..
طبعا يصير اقاربهم بس ماعرف بالضبط شيعودلهم...
بس هو حباب واسلوبه سلس ارتاحله ويرتاحلي..
كال ..اجيت عليج ملكيتج اذا معندج شي استاذ شجاع يريدج..
اي اوكي معندي شي اجيت...

دكيت الباب كال تفضل ..دخلت..
مرحبا استاذ طلبتني؟..
حجه وهو لابس وجهه مگلوب ..اي ست ..
شوفي انت شغلج جيد وشاطرة وسريعة بس هذا ميشفعلج من تزلين لو تخربطين..
اني تعبت ع شغلي وماريد تطلع سمعة بسبب وحدة امس اجت!
ليش استاذ شنو بدر مني؟حجيتها واني رجفة بية بس مسوية نفسي عود قوية..
انتبهي لنفسج ولتصرفاتج اكثر..
كل الموظفين العدنا اكفاء وجديرين بالاحترام فياريت تاخذين هالشي بعين الاعتبار...
حجيت بنبرة عالية ..استاذ شنو جايبني تذلني؟؟؟؟
اذا متضايق من شغلي وياكم بلا هالشغل..
نصي صوتج وانت متشتغلين وياي تشتغلين عندي..اكو فرق..
هم صح ..ع عموم ممجبورة ابقى بهيج شغل اعتبر اليوم اخر يوم...
ع اذنك..مشيت اريد اطلع كال..
براحتج بس لتنسين العقد وشروطه..
واني ناطيته ظهر كتله ميهمني..
يعني تكدرين تدفعين المبلغ المذكور بالعقد؟؟
التفتت عليه وبهتت ليش اكو فلوس ادفعها لو بطلت؟؟
طبعا ليش مسامعة بهالشي بالعقود !!!
لا سامعة بس متوقعت ..
كلشي توقعي ومرة ثانية صيري فطنة ترى الفهاوة متفيد ..
عن اذنك..حجيتها وطلعت بسرعة..
امشي واني مشوشة والتفكير اكل عقلي ..
شلون بلة شورطت نفسي..هو منو عنده يدفعلي ..
اشو عاطف كوة مدرب عيشتنا ..
ولو كتله ممرتاحة بالشغل اكيد يكلي بطلي بس شلون يدفع..
معناها يورط نفسه بدين ويضايق روحه وهو عنده بيت واطفال واحنا بركبته...
استغفر الله ..دخيلك يارب...

اختنكت وانقهرت من كلامه السمعته..ليش شنو شاف مني وهيجي يحجي..
وفوك اهانته الي لازم ابقى ..شهالحظ هذا ..
بقيت بالمكتب ومكتأبة حيل..
ورا وقت اجت هنادي..
بنية تشتغل ويانا بس جوا وقليل نلتقي..جايبة رقم اضبارة رادتها..
كمت طلعتها الها وانطيته اله..هي باوعتلي وهمست تعالي شوية برا...
طلعت وياها ..كالت..ولج مهرة شنو هذا البدي مالتج خزييي!!
ليش؟؟؟
لج ملابسة الداخلية مرسومة رسم انت شلون تلبسين اسود جوا بدي اصفر..
اكيد يطبع..انداري اخذلج صورة وشوفي..
كصتلي صورة وشفتها يبوو صدك مرسوم رسم ..!!
معقولة لهالسبب المدير رزلني!!اي اكيد ماكو غيرها..
بس هم مو حقه يرزلني ويستصغرني ..
بس هو هذا مدري شلونه احسه متسلط بس لا بي جنون العظمة ههه...
خليني اراسل رحاب بلة اريد اعرف قصته..
راسلتها وسولفنا شوي تالي كتلها..
اكلج هذا حماج شيي مسعور..؟
عزا العزاج جلب هو شنو ..
هو مثل الجلب بس يشوفله احد يحول عليه..
شبي وياج هالمرة؟
خية مرمرني ..بس فهميني هو كلتي مطلق يعني بس لا متعقد ..
لج هو حدي وقليل كلام وبصراحة يعني بالبيت مو هلكد يحجي..
واكثر شي حياته شغل بشغل بس اسلوبه حلو وياي مو مثل ممتصورته انت..
يمعودة كل اسلوب معنده وياي ماعبالك مثقف وجبير..
لا لج اصلا كله يكلي بابا من يحاجيني..
مصغر روحه بابا هو بكد جدي..
لا مو بكد جدج عمره ٣٧ بعده شاب..
ههههههههه بعده شاب لج هذا مخرف مخرف البكده شبعو مي ورد وحتى لغو كبورهم وسووها شارع..
الله يهنيج هههههههههه موتيني ضحك كون يسمعج هسه ..
دستري عليه مالي خلك توة مترزلة ..بس اريد اعرف قصته شنو ليش هيج..
اني اعرفها من ارفد واسولفها الج تدللين..
بقيت احجي وياها تالي رجعت كملت شغل وطلعت للبيت...

**************************************

صوت رعيد قوي طرد الذكريات من راسي وفتحت عيوني برعب كلش اخاف من صوته..
اباوه الجو شبه اظلم...
سديت الفون وكمت اباوع الدنيا تمطر مطر قوي كلش وجو معتم !!
شوكت لحكت تمطر هيج !!خرب معقولة مادري بنفسي...
رحت سديت البلكونة بسرعة المطر كفخ ويدخل قوي..
رعدت مرة ثانية بس قوي تخيلت شي وطك الارض صرخت حيل ...
صعدلي ناظم موظف ويانا متفاجأ..
ع كيفك شبيج ست شصاار؟؟
اني لازمة قلبي انوب تفشلت كتله خفت من الرعيد ضحك كال..
طلعي هسه ترى يكولون احتمال المطر يقوى اكثر لان امس المحافظات فاضت اليوم اجه دورنا وضحك..
اي اي حطلع هسه اتصل بالسايق..
ماشي تحتاجين شي؟؟
لا سلامتك الله وياك...

طلعت الفون واتصلت بالسايق..عزااا يطلعلي مغلق..
شسوي هسه !!
رجعت دكيت ع رقمه الثاني دك..اجاني صوته..
ها خوية بس يحجي بنبرة خجل..
ها فدوة تجيلي الجو كلش انكلب اخاف تفيض الشوارع ولو هسه وفاضت..
خوية اني اليوم عود رحنا سفرة لشجرة ادم بس السيارة طكها المطر وبنچرت لان هنا يمنا مطرت الدنيا فاضت..
عزاا شلون لعد حيدر شسوي..
خابرتلج صديقي كتله ياخذج ورح انطيج رقمه خاف يخابرج تعرفي..
اوكي ياريت لان اني جاي انتظره الموظفين كلهم طلعو..
بقى يعتذر مني خطية وكال انتظري...
كعدت انتظر وانتظر وماكو...
نزلت جوا بالاستعلامات بقيت لان كلها طلعت...وشفت الصومالي هم طلع اخذت راحتي..
الولد بالاستعلامات زينين حبابين بس يباوعون ..بس اني اغلس اسوي نفسي ثولة مافهم نظراتهم...
بقيت يمهم وانتظر وانتظر..
اخر شي دك حيدر كال..مهرة الولد سيارته عطلت بالتحسينية ..
رح اخابر وهاب اخوي يجيج ..
لا لا يمعود ليروح يعطل هم هههه مهرة النحسة اكيد تعطل الدنيا وياها..
عذريني خجلان منج خوية وابقي لتطلعين هسه ادز وهاب ياجر تكسي ويجيج..
لا لا يمعود اني ااجر تكسي شبيه عادي..
لح وياي ويريد يدز اخو كتله طلعت للشارع محاجة بعد...

طلعت امشي بس الشارع ضيم الماي وين واصل ..
والسيارات تخطف بسرعة محد بحال احد وشبه ظلمة..
ماجنها ب٣ عبالك بالستة ..
كلت هسه منو بحالي..رفعت ملابسي بيدي لان ثكلو من الماي وخلوني امشي بطيء..
عصرت الاطراف من الماي ورفعتهم وبقيت امشي حيل ..
مااحس الا سيارة كسرت علي وطبكت..
تنهدت واني اشوف احقر واحد بحياتي بهيج يوم..
هو من اوله زبالة وعكر وهسه ختامة بشوفتك هذا مو مسك الختام هذا زفت الختام..
وكف كدامي مباوعت بوجهه اصلا..كال..
هلا شلونج مهرة بسرعة تعالي صعدي اوصلج...
خليته يوكف حتى من امشي ميكدر يلحكني ع ميشغل السيارة اني ماشية حيل..
ورا ماحجه مشيت بسرعة..واني مصرة مااصعد وياه حتى لو اليوم موتي بسبب هالمطرة..

اجه وراي وجرني..شبيج متسمعين ووين مصعده ملابسج زرورج طالعة؟؟
تعالي صعدي وياي بلا خبال..
اترك ايدي لتنكسها وخررررر...ماشتهي اشوف وجهك...
اشو امشييي...جر ايدي وزلكت اجيت اطيح وجرني واني ابجي وادفع بي...
اول مرة انفرد بي بعد الصار احس حاقدة عليه وودي انتقم منه...
دفعني ع السيارة يريد اصعد واني ادفع بي...
ضربني بظهر ايده ع خدي ..
وماشفت الا اندفع بالطين والمدير كعد ع بطنه لهسه اتذكر هالمنظر..
دفعه بخطفة سريعة وكعد ع بطنه ولزم ايديه ولواهم بالعكس بحيث سمعت طكة ايد براق بأذني..
واخذه بوكسات بوجهه واني مثل الخبلة ملابسي تصب ماي واجر بقمصلة شجاع ..
بس عبالك اجر بحايط ولا كانه...
بس اشوفه فقد عليه واني اتوسل بي كافي استاااذ كافي ابوس ايدك كافي ...
وبراق مقاومته ضعيفه ولا كأنه رجال وانضرب عبالك بنية وتتعارك هم اكو بنات سبعات...
لحظات توقعت براق ميعيش بعدها...
بلا تفكير جريت ايد شجاع اليسرى وحضنته ..
ماعرف اتصرف بس ردت اخلص من الصار عبالك كابوس..
هو فلت وجهه بقى صافن علي ثواني ووخرني..
لتتاذين وخرري..

نباوع لبراق فاقد الوعي ووجهه دم وشخوط شي عجيب..
لما هجم عليه شجاع حسيت عنده عنف غير متوفع..
يعني هالانسان مو شغله دفاع او غيرته دفعته يدافع عني...
اوكي غيرته دفعته بس ميضرب هذا الضرب المبرح..
احس تصرف شجاع بيلي هو شخص ناقم ع المجتمع وع الناس...
لو بيناتهم ثار يمكن ميضربه هيج..
والملفت للنظر شال براق ذبه بالسيارة مالته..
ودخلني لسيارته جانت جكسارة كعدت ع الكشن الورا ..
بس ملابسي تصب الكشن تبلل..
فتح التدفئة..
واجه وكف يمي والباب مفتوح..
خابر ع اشرف ابو الاستعلامات اجه يركض..
كله اخذه للمستشفى..اندار علي ..
طلعيلي رقم اخوج ..
ها!؟
لتفهين بسرعة خل اخابره واكله..
لازم يكون بالصورة..
حتى لو صارت عشاير الرجال عنده خبر...

انطيته الرقم واني قلبي يخفق خايفة من ردة فعل عاطف ميته خوف...
خابر وسلم عليه وعرف بنفسه...
وكله شفت ابن عمك تحرش باختك وتضاربنا ..
بس من كلامه حسيت عاطف مارضى ..
هالشي خلاني اطك سن بسن من الخوف ...
سد الخط وباوعلي بنظرات بس مو كره ماعرف تختلف عن القبلها...
بس احسه تفحص جسمي وباوع لوجهي..
بعدها..
نزع قمصلته انطانياها ..
لبسي لان ملابسج تنكعت..وجسمج بين..
حجاها وراح صعد وساق..
لبست القمصلة حسيت بشي مو دفو جسم ..
دفو مشاعر...
سديتها عليه وحضنت نفسي..
شميت بيها عطر رجالي بس ممطروق ..
ابد مشامه هيج..
اويييلي شكد طيب هذا العطر فات لرئتي ودفاها..
الاجواء الممطرة والعطر صنعت لي جو ممتع وحنين نفس الوقت...
غمضت عيوني واني استمتع بهذا الاحساس..
مجرد دقايق غيرت نظرتي بشجاع وبالزلم بصورة عامة..
مو دفاعه عني ووكفته الي ..
لا لا شي مبهم ماعرف شنو..
حمامات شعوري الكانت محبوسة بقفص الصنعته خيانة براق...
تحررت بهاللحظات..
جذبها هالعطر وخلاها ترفرف من جديد وتجي تحوم عليه...

فززني صوت شجاع من كال..
هو مو ابن عمج ليش هيج تعامله وياج؟؟
باوعتله بالمراية بعد نظره عني بجهة الجامة كانه ميريد يباوع لعيوني..
اي جان رايدني واختلفنا بس هو مصر يتحرش...
حجه باستهزاء..
اني شفته من حاجاج ليش مصعدتي؟؟مو مطر جانت ..
وهو ابن عمج اكيد يحميج ..
بهالجو اليخطفج لو يسوي بيج مكسورة منو يدري؟
تنهدت وجاوبته..
مستعده يصير كلشي ولا اصعد وياه..
ورجاءاً اذا مثقلة عليك وتعتب ليش مصعدت وي ابن عمي...
نزلني هنا اخذلي تكسي...
هه..مو صاعدة وي كيكي وانزلج هنا..حجاها وسكت..

وصلنا لمنطقتنا وصفتله..
اباوع المطر وكف بس الجو اظلم..
وصلنا لفرعنا..
ذبيت القمصله بمكاني ونزلت ورا ماشكرته...
دخلت اني وتلكتني امي خطية انطتني خاولي ...
كالت روحي للحمام حجيبلج ملابس وتعالي تدفي الصوبة مفتوحة...

اجيت اشطف جسمي بس ماهان علي..
العطر علك بيه ماريد يروح...
بس نشفت جسمي ولبست ملابسي وطلعت..
لكيت الصوبة مفتوحة بالهول وزهرة وامي كاعدين...
اجيت يمهم وامي تحاجيني...
ولج يمه شصار..
اخوج مافهمت منه هدل..
هسه احجيلكم يمه بس عاطف وين؟
غير خابر لعمج وراح للمستشفى..
اخ ياامي بس الله اليستر...
حجيتلهم الصار كله بس فهمت امي ..
انو براق شافني لوحدي امشي وتعارك وياي وضربني لان طالعة وحدي..
لهذا المدير تدخل...
امي طبعا تقتنع بس الضيم بعاطف شيقنعه..
وبراق لو كعد وسالو سبب العركة..
وكلهم مقبلت تصعد وياي لهذا عاركتها...
ضل بالي يودي ويجيب..
وراسي احسه يريد ينفجر دخت حيل..
شوي شوي بديت اصخن..

تمددت وزهرة يمي ونسولف ..
بعد شكد يلا حسيت ع روحي بالغرفة..
اباوع امي نايمة وهي كاعدة...
وزهرة نايمة ع النص يم راسي..
وطاسة ماي وبيها خاولي..
بس شنو احس جسمي عركان حيل ومكسر...
ذبيت الغطا واجيت اكوم فزت زهرة...
ها مهرة شلونج هسه شتحسين ؟
مادري جسمي مكسر شبيه اني شنو صخنت؟
اوف غير صرتي نار نريد نزل الصخونة ماكو ..
كمادات شكد وماكو فايدة نايمة وتونين...
امي راحت لام وركاء القابلة..
جابتها كالت صخونتها عالية..
اضربتج ابرة ومغذي..
يا تحجين صدك ..احجيها واني مسطورة وافرك براسي..
امي ع صوتنا فزت وتقربت تتطمن علي...

بعدين باوعت الساعة ..جانت بالاربعة الفجر..
حييل من العصر اني نمت وصخنت...
صدك شخبار براق عاذف مااجه؟
اووف ولج اجه بس ضايج وقافل كلش كالت زهرة..
امي كالت..
يمه المدير هذا عنده وياه شنو ..يكول عاطف مكسره تكسير...
خشمه مكسور وعينه مشكوكة وحلكه مشكوك وايديه ثنينهم مكسرات ..
وجسمه مرضرض وجتفه مخلوع...
اي طبعا اني متوقعته يعيش من شفت الضرب ..
هو هذا مديرج اخو اخيته بس يمه مو هيج زين ماموت الولد جان شفكنا من عمامج..
هم يردون الزلة علينا..
الله يستر بس....

بقيت افكر وخايفة شنو يصير باجر..
الصبح خابرت رحاب وحجيتلها مختصر...
كالت ابد ماحجه شجاع شي..
كتلها كولي لارفد ماكدر اداوم مريضة..
اخذت اجازة يومين...
الصبح عاطف جان موجود لان جمعة..
لكيته منتظرني يريد يحاجيني..
حجيتله مثل محجيت لامي..
كتله يكلي شعدج تفترين بالشوارع وجرني من ايدي سحلني بالشارع..
ومن كتله اشتغل وبعلم اهلي ضربني راشدي ودفعني...
هنا عاطف انفعل كال لعد يستاهل...
ولو لازمة جان كملت عليه...
شوي ارتاحيت لان بداخلي خايفة من ردة فعل عاطف بس زين عدت سلامات...
للعصر راح للمستشفى ورجع بالليل..
كال كاعد براق وعمي يريد يدز كوامة لبيت المدير..

للحكاية بقية
بقلم شقراء(قمر كانون)