رواية حين يزهر الحجر الفصل الثامن عشر 18 - بقلم Shaqraa

مساء الورد حبايبي
حين يزهر الحجر
الجزء السادس عشر

سمعت الصوت باذني..مشتاقلج مهرة..
هذا شلون فات لغرفتي!!شكد شايل وقاحة انقرفت لان لازمني..
دفعته حيل ..وخر مني حقيير وخرررر...
لزمني اقوة وكال خل نتفاهم مهرة صبري...
عطت حيل يماااا وينج يمااا لحكيني وبقيت اقاوه هو سد حلكي وخنكني...
امج هسه اوديتها للمستشفى يعني لتصيحين ع الماكو محد يفزعلج،..
فتحت عيوني حيل مصدومة...
يعني امي مو هنا ..
بس مراح اخلي ياذيني لو اموت نفسي..
حجه وهو مخلي ايده ع حلكي...
هسه خلينا نتفاهم بس لا تصرخين حتى اشيل ايدي من حلكج..
هزيت راسي وخرها..
بس اتركني اختنكت وخرر...
دفعته وتركني..

اخذت جرجف ولفيت نفسي ووكفت ..
خليك بعيد عني واحجي التريده ..
حاولت استدرجه واخلي يأمن..
لان اعرفه قليل شرف وانا مهما يكون بنية ومو بقوته وماكدرله...
ليش تستقوي علي لان لوحدي..
احجيها بعصبية بس مو عياط ماريد ابين مهزوزة كدامه...
مااذيج بس فهميني ليش اخطبج وترفضين؟تفاحتي تعرفين شكد احبج..
ريحيني وقبلي مو تعذبت...
براق خلي عندك كرامة ..كم مرة تخطب واني ارفض؟؟
لو اريدك لو قابله بيك ماارفضك للمرة العاشرة او اكثر...
اني وياك منتفاهم ابد ..
وعيب عليك عاطف امن البيت يمك وانت تتعدى ع عرضه...
وبداخلي اكول متعود ومو جديد عليك...

هو جان واكف تقرب يمي اكثر..
مهرة اني استغليت هالفرصة مو حتى ااذيج او اتعدى عليج..
بس انت متقبلين تحجين وياي..
اضطريت اتبع هالاسلوب...
اي وهسه حجينا وعرفت رايي ليش مصر ؟الكان بينا انتهى وخلاص..
ماانتهى اعرف انت تحبيني بس انقهرتي من خطبت المرحومة...
وتردين تعذبيني اعرف...
وهو يحجي اجتني مغصة قوية ...
سويت نفسي تعبانة كلش ..
هو انصدم وباوعلي..
شبيج مهرة شبيج!؟
عدلت نفسي كتله مابيه شي بس هسه اروح للحمام واجي..

اذا تريد ابقى هنا او اكعد بالصالة...بس اروح للحمام واخلي الجاي ع النار..
لا خليني بغرفتج اتأمل بيها شوي وغمزلي...
بس علواه جاي واذا عدكم بندول لان راسي كلش..
حتى من ترجعين نكمل حديثنا اليوم الا اقنعج...
اي بسيطة هسه بسرعة اجي....
مشيت واني لافة نفسي بالجرجف..
ورحت لغرفة امي اخذت عباية وشيلة..
خليت جوا الجرجف وطلعت للحمام...
لبستهم ولفيت نفسي ...
طلعت ركض فتحت باب الشارع ..
احتاريت وين اروح واني لا فلوس ولا تلفون...
بس لازم ابتعد اخاف يطلع وراي...

مشيت لراس الشارع ووكفت تكسي ..سويت نفسي هادئة..
حتى لا يحس علي ابو التكسي..
رحت لزهرة لان ماعندي غير هالحل ..
همزين ابو التكسي ولد صغير يمكن اصغر مني شكله والله هداه الي..
خوش ولد طول مااني بالسيارة مارفع عيننننننه...
وصلني لمنطقتهم كتله..
خوية بس انتظر اجيب فلوس لان مشايلة وياي..
ماقبل كال روحي ومبرية الذمة..
واني اتناقش وياه واريده بس يوكف..
سمعت صوت حسين من وراي...
تقدم سلم عليه ووجهه مصدوم بيه..
تقدم لابو التكسي وكلي تفضلي تفضلي..

دفعت الباب زهرة واكفة وراه اول مدخلت شبكتني...
ولج شجابج لوحدج وليش هيج لابسة شنو شاردة!!
تحجي وترجف مخروعة...
هسه خليني ادخل موكفتني هنا..
جرتني وكالت ..
سودة عليه صدك نسيت من هبطتي ولج...
دخلنا للمطبخ فتحت الثلاجة جابتلي بطل ماي واني احاجيها...
لا تخافين ولج رح يوكف قلبج..
بس هذا العار براق باقي ببيتنا لان امي رايحة للمستشفى..
شهكت ولطمت خدها وتقربت مني..
عزا العزاه خو مااذاج...
لا اني غافلته ع اساس اروح للحمام وشردت...
الحمدلله طيحتي كلبي مابيه بعد ..حجتها ورجعت ظهرها ع الكرسي...

شوي وفات حسين وصاح ع زهرة...
ورا شوية رجعت كالت خايف عليج وسأل بس طمنته..
حقه انخرع من شاف منظري ..
ناقصني كونية واصيح خبز خبز نخال...
مع احترامي لليبيعن ..بس منظري شحاله..
احجي ومقهورة واضحك ع نفسي..
نعال البيت وعباية امي قصيرة عليه وشيلة مال حجيات...
ماعرف شحجي وشكول ..
وشنو اتصرف هسه...
ورا شوية اجت زهرة مبدلة وياها حسين ..
كالو امشي للبيت...
اني افكر بشجاع اكيد هسه مراسلني ومخابر ..
ولو هو الفون صامت بس اخاف يلكاه براق...
همزين ماجاي بسيارته براق جان عرف شجاع وشيخلصني...
اخذوني للبيت زهرة وحسين..

من وصلنا مموجود براق ...
شكد عار يعني طلع وعاف البيت فارغ...
بس زين طلع لو باقي يمكن وجاي احد جان كله مهرة شردت لو اصلا مرجعت من الدوام...
كعدنا اني وزهرة بالغرفة وحسين بقى بالاستقبال..
زهرة تتنفس كوة وتعبانة...
شبيج ولج اشو منتهية ليش متروحين لطبيب تشوفين وضعج؟
احاجيها وادور بالفون ..مسجات من شجاع ومكالمات بس مو هواي..
هيج عاديات..
كالت زهرة..اي كلت اروح لان بس الجمعة حسين يفرغ...
لعد تعالي وناخذج اني وامي...
متعرفين حسين ميقبل ويتحسس من عاطف...
هسه هو لو ماانت مااجه..
كال حالف ماادوس بيتكم بس لازم نروح وي مهرة لحد ميجون اهلج ..
وكال احجو الصار كله حتى فد مرة بلكي عاطف يستبعد براق....
اي طبعا اني انتظر عاطف ورح احجي كلشي..
هالشي مينسكت عليه بعد...

زهرة خابرت امي وكلتلها ..
احنا عدكم خل يجي عاطف محتاجه حسين بشغلة..
طبعا امي مارتاحت بس شوي زهرة طمنتها ماكو شي...
اذن الاذان صلينا وحضرنا عشا...
واحنا بالمطبخ اجو امي وعاطف...
عاطف وجهه معكنش لان حسين هنا....
فات جوا سلم ع حسين..
واني وزهرة حجينا لامي الموضوع بتمهيد وشوي شوي اخاف تنهبط ومتصدك مسوالي شي...
واحنا نحجي انصدمنا من صاح عاطف عليه...
رحتله واني خجلانة وخايفه..
بس لا حسين حجاله...

رحت يمهم كال كعدي بوية...
كعدت وكال ابو علي حجالي الصار..
طبعا عفت الخجل وصفنت بحسين صار ابو علي يعني عاطف غير وجهة نظره بي...
ليش ماخابرتي جان اجيت وكسرت ظهره...
كله حسين اني اخوها ولو ناطيني خبر جان جبت مرتي واجينا يمها ...
كله كفو منك مقصرت واني الي حساب ويا بسيطة..
واعدرنا ياخوي خجلانين المنا وبينا يسوي هالدكة ...
عفا عليك ابو فؤاد اخوكم اني قابل غريب ومستحي..
ونعم الخوة ابو علي..
اني صافنة واباوع عليهم ثنينهم عبالك اتفرج فلم..
حسين وعاطف تسامحو شكد حلوو...
والاحلى حيتزحلك بريق من طريقي الله ياخذه...

اندارلي عاطف..
كومي بوية حضريلنا لكمة وراي رجعة للمستشفى...
رحت للمطبخ وامي تحجي ع براق وتسب بي وتتحسب علي..
وكل شوي وسالتني ولج مهرة خو ماتدنالج ..
سودا عليه بقت تلوم وخفت يرتفع ضغطها...
كملنا الاكل وتعشو وحسين كال لزهرة ابقي اليوم..
ماصدكت من الفرحة...
من خلصو عشا طلعو حسين وعاطف...
كالت امي راحو لبيت عمج منير ..خليت ايدي ع قلبي اخاف يتهمني بسي هالبلوة هذا...
شجاع مراسلني لان مساع بس دزيتله مسج كتله اختي عدنا وملتهية...
بس احس بالذنب بسبب الصار..
احس ماكدر احاجي شجاع  من الاحساس بالذنب وهو محرم علي اللقاء ببراق...

كتله بالليل نحجي وهو خطية كل شوي يكول انتظرج مو تنامين..
بقينا اني وامي وزهرة نسولف...
اني هاجت عليه الالام عود هدت مساع..
ولو يمكن التهيت ومانتبهت للالم...
سوتلي زهرة لومي بصرة اشو بس شمته لعبت نفسها..
ووضعها كله تخربط...
غسلت وجهها واجت يمي دايخة...
لج شبيج وضعج مو مال عروس؟زهيرة ضامة عني شي حسين مأذيج؟؟؟
لج لا لو كلها تاذيني حسين ميسويها...
ايي مو اكول لو ياذيج مو رقبتج ورقبته مطبعات يحظي واني كاتلني الجفاف...
ههه انت وتشاكي الله يستر يمكن تخلفون واحنا مندري بيكم..
ذبلت عيوني وكتلها ياريت..
كفختني وتضحك ..بس صدك شلون انتبهتي لرقبة حسين..
مو الدشداشة بلا ياخة تبين بلاوي الرقبة غير تلبسي شي يستره...
ولج هو ميدري ولا شافها..
عزا صح هي صايرة ورا هههه فضحتي الرجال....

اجت امي جابت عصير برتقال سوته لزهرة وانطتها وكعدت يمنا..
شوي واجو عاطف وحسين..
حسين سلم وراح وعاطف صاحلنا اجتماع..
كلتله امي ..ها يمه رحتو وشسويتو؟؟
اي حجية رحت لعمي ووحجيت ويا ..
لان حان براق مو بالبيت ..
كتله خل يجي بس لتكله اني يمكم..
ورا شوي اجه وكعدنا اني وعمي وهو بالاستقبال وعمي مقبل احد يعرف....
زنكته وعمي ماقبل ..
كال احترمني مو تكول حاسبك ابوي واجيت اشتكي عندك...
عفته وكعدت ومن حجينا بالموضوع نكر..
كال جنت ناسي تلفوني ورجعت اخذه وهي عبالها اريد الذيها...
وتعاركت وياي وطلعت...
عمي طيح حظه كله راح اتبرى منك ..
مدري شعجب نطى بي وفشله...
واني كتله بعد لهنا وانتهت لا انت ابن عمي ولا اعرفك..
واذا وصلت للمنطقة ادفنك بمكانك ..لخاطر عمي عبرتها بس مرة الثانية اسوي الدم البينا ماي واطشه...

كلتله امي يولي لا تغث روحك ..انت تعبان وبس تطخن بالجكاير ولا نوم لا لكمة..
صلي ع النبي وكوم ارتاح..
لا حجية وراي روحة للمستشفى...
الله يشيل عنك الحمل وليدي..
عافنا وكام وامي هم كامت لان تعبانة..
اني وزهرة كعدنا نهز من الفرحة..
خلاااص برااق بح افتكيت يووومه...
كون ابشر شجاع..
بس شحجي..خل استر ع نفسي احسن...

رحت خابرته وزهرة يمي تراسل حسين...
باوعلي شبي وجهج تعبان...
ها مو شوية تعبانة...عادي لا تفكر..
عقد حواجبه بتفكير ..
كال اها شنو اجت؟
يبووو ان ضعت من الفشلة ووجهي فلت..
كتله شلونك..
كال دكولي لو لا شكد تخجلين..حجاها بضحكة ممزوجة برجولة..
هزيت راسي لا وكتله تقريبا..
واني دايرة صفح..
ماشي باجر لتجين ابقي ارتاحي...
لا حبيبي مشتاقتلك...
ماريد تتعبين بالدوام وتبقين متعذبة ..ابقي نايمة ومرتاحة..
واني هم رح اذبها براس ارفد باجر وماداوم...

ايي اذا هيج تمام ههه ااه ..ضحكت وانمغصت وعطت بلا قصد...
ها شنو شكلج متاذية..
اخذتي علاج ؟؟اي اخذت بس بلشت عندي صخونة..
لهذا جسمي تكسر وبدت تطلع الالام..
كومي خلي امج تجيبلج القابلة جيرانكم..
خل تضربج ابرة قبل لا تشتد بالليل عليج وين تروحين...
لا حبيبي مو لهالدرجة...
لا اكثر تصير متشوفين وجههج ذابل وكوة تحجين...
اخذت العلاج مال المستشفى كلش مضبوط وكررته بقيت بس اتوجع اخذه واصير تمام...
اخ من تعاندين...
ابتسمتله كال..
شوكت نتزوج عاد وترتاحين من هالوجع...
درت وجهي عنه وحكيت خشمي...
شبيج ترى احجي لصالحج..
غير تبقين متحسين بالم وترتاحين من هالعذاب...

اووي اسكت شجاع رح اسد الفون من الخجل...
اشتعل اصلج مثل ماشعلتي اصلي ..
اووي مو ..كون الزمج هسه...
دروحي خل نحول صوت ..
لييييش...
لان جدي اشتعييييييل ..يجر بالكلمة ويقلدني...
حولنا صوت وبقيت شوي ويا هو صار يمه هدوء يمكن نام واني غفيت لان تعبانة....
يوم ثاني مارحت صدك ارتاحيت شوية ..
والعلاج هم فادني زين راحت الصخونة وماثكلت
بالليل...
العصر اجه حسين اخذ زهرة وراحو...
ووصاني شنو احتاج اخابره...

رجعت حاجيت شجاع شوية ونمت...
هيج ايام اغلب وقتي نايمة...
كعدت ب٨ بالليل ..
وتعشينا اني وامي...
جبت صينية الجاي ودك فون امي...
جاوبت شوي وعاطت..
واني طفرت عليها ..
شكو يمه شبيييج...
تنحب وتحجي...
ولج مات ابن اخوج مات...

للحكاية بقية
بقلم شقراء(قمر كانون)

١-اذا لكيتو جفصة غلسو لان كلساع انتبه لنفسي كاتبه كلمة مو يم الموضوع..
٢-لا تغلطون ع عاطف ترى اخووووووها ومحد يقبل اخو ينسب..انتقدو تصرفه اوكي..مو وحدة تكتبلي كو...لو كلمة بكد راسي واكعد ادور واحذف ..عفية من تحمون وتتحمسون انتقدو لا تغلطون