للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
لَـم يعُد يرعبني الحنين، ترعبني قُدرتي على تحويل أثمن الأشياء إلى العدم .
دخلت للمركز ، ويايه فريقه المقرب بالسراء والضراء اثنين على اليمين واثنين على الشمال واني اتوسطهم ،لابس ملابس مدنيه، اقتربت من الباب مالت غرفتي، فتحته بعد مطرقت عليه لأن عندي معرفه بالشخص الموجود داخل واحتراماً أله طلبت الأذن،
قبل ما ادخل أشرت لواحد من الشباب بفتح ايدي، بمعنى خمس دقايق، بعدها دخلت وسديت الباب اقتربت من عنده وأديت التحيه لأن الموجود،
نهض من الكرسي و اقترب من عندي وكال برزانه.
ضَيْثَم: رخي هَيْصَم ،
انت تعرف سبب جيتي لهنا؟
هَيْصَم: نعم سيدي اني متهم بسوء الأدارة، يبذلون كل جهدهم حتى ينحوني عن منصبي والعملية.
ضَيْثَم: اريد دليل على برائتك حتى نكدر نسد القضيه المرفوعه عليك والا راح ترجع ضابط عادي بهذا المركز وغيرك يستلم المكان بالأضافة للعقوبه القانونيه وممكن اتكون صارمه نوعاً ما.
هَيْصَم: هذا دليلي سيدي،
دخل و بأيدة ملف كامل بالأضافة لشريحة كاميرا التسجيل الجانت موجوده بكل مكان بالمركز بدون علم أحد، مخفية تختلف عن الظاهرات للعلن.
هَمْهَام: اشرفت على التحقيق الكامل سيدي، هذا الشخص اتوفى قبل يومين بسبب تسمم غذائي لكن هاي مو الحقيقه الكامله لأن المتوفي كان أحد الأشخاص التابعين الهم محاكمته بعد اسبوع هو أدلة بشهادته أو وعدنه راح يعترف بكل شي يعرفه كدام القاضي لذلك انقتل، وصل للمستشفى قبل ميفارق الحياة واحد الممرضين كال صحته زينه لكن بعد ساعة وصل خبر وفاته،
بعد شك السيد هَيْصَم أمرنه بأجراء تحقيق سري مع الكادر الطبي واكتشفنه الشخص اللي سممه جان من خارج المستشفى بعد وجود الأدلة والشهود أستخدم هويه مزوره ودخل بينهم سممه وهرب وفي حال جان موضوع تسممه وهو بأمانتنه فلازم يتعاقب المدير المؤقت السيد بيسار لأن السيد هَيْصَم جان متعرض لحادث وبالمستشفى و حضرتك عندك علم بكل شي صار.
ضَيْثَم: هَيْصَم تعرفني مو بحاجه دليل ابداً حتى اثبت برائتك لكن اني اعرف انك ذكي كفايه حتى تطلع نفسك من هاي المشكله لازم تعرف الطريق اللي تسلكه يشبه الى حد ما طريق الموت مراح اتكون هاي آخر محاولة الهم، اعيونهم عليك وعلى كل تحركاتك، اخذ الحيطه والحذر وبالنسبه للبنيه الوياك دور عن خالتها ورجعها الها لتخليها تبقى بخطر وانت اكثر شخص يعرف خطورة هذا الموضوع.
هَيْصَم: هي بأمانتي سيدي الموت ميوصلها قبلي كون مطمأن.
ضَيْثَم: راح اخذ هاي الأدلة حتى اثبت برائتك ونغلق القضيه تابع عملك لخدمه الوطن وجميعنا وياك.
هَيْصَم: أمرك سيدي.
لائِث: برأيكم هاي خطه منو؟
هَيْصَم: الأسود اكيد، هو ايريد اتنازل عن القضيه حتى يگدر ياخذ راحته ويشتري اي ضابط حتى يمارس اعماله الغير قانونيه تحت غطاء الدوله لكن هو ميعرف وي منو يلعب هاي المره ،
نهايته راح تكون على أيدي وهذا وعد الهَيْصَم.
غيروا ملابسكم عدنه مداهمه لأحد البيوت المشبوهه.
لائِث: مكان للرذيله؟
هَيْصَم: نعم.
لائِث: بعدني بلا ريوگ ليش اتريد تلعب نفسي؟
هَيْصَم: هذا الواجب، كدامكم عشر دقايق اريد الكل هنا، راح نطلع دوريتين يجتمعون حتى انطيهم الخطه ونتوكل ، لتصفنون بوجهي اتحركوا،
لبست الزي مالتي وطلعت من الغرفة لگيتهم مجتمعين انطيتهم الأوامر:
أحد الدوريات راح تكون بقيادة ضَرْضَم و هَمْهَام اما الدورية الثانيه بقيادة هَمَّاس و لائِث، خلونه ننطلق توكلنا على الحي الذي لايموت ونبارك طلعتنه بقرآة سورة الفاتحه وان شاء الله الفتح والنصر حليفنه بكل خطوة للأمام،
أنطلقنا لأحد البيوت المشبوهه،
نداء واحد تسمعني اجب؟
لائِث: نعم سيدي اسمعك.
هَيْصَم: أخذ الدوريه وره البيت وعيق محاولتهم للهرب.
لائِث: تأمر سيدي،
أمر بالتوجه وره البيت تحركوا شباب.
هَيْصَم: أربعة تسمعني اجب؟
ضَرْضَم:نعم سيدي.
هَيْصَم: داهموا البيت من الباب، جميع الموجودين خلي يتم القبض عليهم وجه فريقك بلأمر.
ضَرْضَم: أمرك سيدي، هَمْهَام افتح الباب وخلي انداهم المكان.
هَمْهَام: نداء للجميع راح نداهم المكان يرجى التوجه لباب البيت.
ضَرْضَم: القوا القبض على الجميع بدون متعوفون واحد.
هَمْهَام: تمت العمليه بنجاح تم القاء القبض على 24 متهم بين رجال ونساء بينهم امرأه متوسطه العمر.
هَيْصَم: الى جميع العناصر المطوقه المكان الأنسحاب الفوري تمت العمليه بنجاح بتوفيق الرب الجليل.
: رجعنا للمركز ويانه المعتقلين اخذوهم لغرفه التحقيق، واني نزلت من السيارة ودخلت للمركز وتوجهت لغرفتي اول مفتحت الباب صارت بوجهي.
هَيْصَم: شنو تسوين اهنا؟
: أريد اطلع من هذا المكان الله يخليك ساعدني والله العظيم جابوني غصب اني ما ألي علاقه بيهم صدگني.
هَيْصَم: مو هم اللي اعترفوا احنه القينه القبض عليج متلبسه بالجرم المشهود وبعدين انتِ شلون ادخلين بدون علمي وتستغلين عدم وجودي؟!
هذا الفعل يترتب عليه عواقب وخيمه متكدرين تتحمليها، عندج علم؟
: مدخلت بدون علم، واحد من المنتسبين جابني اهنا بعد متوسلت بيه، الله يوفقك اعتبرني اختك واسمعني بعدين احكم بشنو اتريد.
هَيْصَم:منو هذا الشخص الدخلج بدون أذني؟
: ما أعرف اسمه بس عنده شوارب كثيفه واسمر.
هَيْصَم: راح انصدم اذا مجان هو ، كولي ليش طلبتي اتشوفيني تحديداً؟
: راح احجيلك من البدايه وانت احكم ،أني اسمي ألين و عمري 18 سنه بأخر يوم امتحاناتي السادس جنت راجعه من المدرسه فرحانه لأن خلصت السنه وأرتاحيت من هم جبير لكن هاي الفرحه مدامت قبل ما اوصل للبيت اجيت اعبر الشارع وقفتني سيارة سودة مضلله نزل من عدها ثلاث ملثمين حاولت اهرب بس واحد من عدهم مسكني من أيدي ورجعني وماعرف شنو خله على خشمي فقدت الوعي وصحيت على وجودي بهذا المكان وصار تقريباً شهر واني يمهم اتعرضت لأنواع العنف الجسدي ويرغموني على اشياء غصب عني والله سيادتك هاي الحقيقه.
هَيْصَم: شنو الدليل؟
ألين: ماعندي اي دليل الجابني بس هو يعرف واني اصلاً ماعرفه منو لكن عندي شهود البنات الموجودات ويايه يعرفن بالحقيقه الكامله اصلاً اغلبهم اتعرضن لنفس الموقف.
هَيْصَم: يعني من كلامج جميع النساء في بيوت الرذيله شريفات؟!
ألين: والله ما اكذب عليك سيدي الله ياخذني اذا اسويها.
هَيْصَم: هو كريم جداً وياي اكيد ميقصر بهاي الشغله لكن مو هسه لازم نكتشف حقيقتج ست وبعدين عدنه نقاش طويل عريض نعرف بيه مدا صدقج.
لائِث: طلبتني سيدي؟
هَيْصَم: اخذها للسجن الأنفرادي وتعال اكو موضوع مهم.
ألين: راح اطلع مو؟
لائِث: انتِ طرشه گال سجن انفرادي مو الزوراء.
هَيْصَم: شوفي اني ما اشتغل بالشهود لأن بالأمكان شراء الجميع عندج دليل يثبت صحة كلامج اساعدج بلي اگدر عليه اما تگولين ماعندي اهنا لازم احنه نبحث عن الدليل لكن شغله مهمه في حال طلعتي جذابه ابذل كل جهدي حتى تنسجنين حتى لو طلع الجميع براءة متكونين من ضمنهم.
ضَرْضَم: سيدي.
هَيْصَم: البنيه اللي اخذها لائِث هسه سوي بحث عنها بالكامل واطلب دكتوره تجي لهنا حتى تفحصها اريد سلالتها حتى جدها السادس عشر.
ضَرْضَم: أمرك سيدي.
هَيْصَم: نعم هَمْهَام اسمع.
هَمْهَام: المحامي اهنا حتى يطلعون بكفاله.
هَيْصَم: راح اتفاجئ اذا منورنا ، خلي يتفضل،
اهلاً وسهلاً تعرف انت اكثر شخص مشتاق اشوف وجهه؟
محمد: شعور متبادل.
هَيْصَم: بشنو اساعدك محامي المجرمين؟!
محمد: تعرف شگد الموضوع مزعج انت تعتقل واني ادافع برأيك هذا مو تعب على الفاضي؟
هَيْصَم: طلعت ادافع عن بنات الهوى شي حلو فكرتك انسان شريف طلعت عكس توقعاتي للأسف.
محمد: هذا عملي ولازم أأديه بأكمل وجه مو صح؟
هَيْصَم: اليوم لازم ايباتون اهنا الفاعل والمفعول به والحر تكفيه الأشاره.
محمد: نادي للرياضه مرخص ليش حتى متخليهم يطلعون ما افهم؟!
هَيْصَم: نادي رياضه!!
شنو يدربون بيه رفع اثقال لو تايكواندو؟
محمد: رشاقه وجمال تعرف الشعب العراقي عدهم سمنه مفرطه.
هَيْصَم: غلطان طياح حظ مفرط بعدين ولا واحد بيهم ضعيف كلهم اسمان وعليه اتخذت قرار راح اخليهم يركضون طول الليل حتى يصيرون رشيقين تعرف احب فعل الخير،
انتهت الزيارة منسمح دخول اي محامي بعد الساعه الثانيه عشر ظهراً يرجى زيارتنا في الوقت اللاحق.
محمد: وعد من عندي اطلعهم كلهم ماكون رجال وگد كلمتي اذا مسويتها.
هَيْصَم: لتفتخر بنفسك المحامي القبلك هسه انشالت من عنده الرخصه وصار يشتغل بتكسي اذا متحب تصير عاله على العم محسن اتفضل بدون مطرود،
واني ألوم أرفد ليش ميحبه يا أخي لايطاق.
دخل للغرفه وعينه على محمد وهو يطلع.
لائِث: شنو يسوي هذا اهنا؟
هَيْصَم: يأدي عمله.
لائِث: ليش شنو شغله وي الشسمهن؟!
هَيْصَم: نادي رياضه للرشاقه و الجمال،
هذا مو موضوعي، ليش خليتها تجي لهنا هاي مو غرفة التحقيق مثل متعرف.
لائِث: شكيت بيها من حركاتها مو شخص عادي واني اعرف محد ياخذ من عدها معلومه مثل مسوي انتَ مثل متعرف العمليه سريه وهي الواضح تعرف اشياء راح تفيدنه، اخذتها وجبتها يمك بدون علم احد منعرف منو الخائن والمدسوس بينه.
هَيْصَم: عقلك صاير يشتغل رفقتك اليه خلتك تصير ذكي عمل جيد.
لائِث: اني ذكي من يوم يومي بس انت متقدر جهودي انسان جاحد.
هَيْصَم: يول مديرك انا لتنسه.
لائِث: هسه يجي واحد اعله من عندك رتبه ياخذ هذا المنصب وتصير حالك حالي حضرة النقيب.
هَيْصَم: اتريد تنطرد لائِث گول لتستحي؟
لائِث: اصلاً اني نسيت ليش اجيت دائماً يصير هيج ويايه من اشوفك جمالك يبهرني وينسيني سالفتي بس انت ممنتبه لنفسك سيدي.
هَيْصَم: اترك هاي السوالف انت اجيت تحجيلي شنو صار وي البقيه بالتحقيق.
لائِث: صحيح، كلهن نفس الأقوال لكن يضيفن بعض البهارات وحده بايعها والدها والثانيه طارديها اهلها قصص حتى شاروخان ممسويها.
هَيْصَم: العراق العظيم كل شي بيه لتتفاجئ،
أريد المسؤوله عن النادي الرياضي الأم والراعيه الهن و بالنسبه لهاي البنيه وراها سالفه ممعقوله ايكون عدها جرئة تدخل لغرفة المسؤول بهاي الشجاعه، كل الأدلة احسها متورطه وياهم بشي ولازم نعرفه.
لائِث: المسؤوله مموجوده جان عدها علم وشردت بس المساعدة مالتها هي موجوده، على الأساس متفقات يسوون هروب جماعي سوا لكن المساعدة اتأخرت بجمع الأشياء الضروريه وبعد المداهمه مگدرت تفلت.
هَيْصَم: هذا النادي تابع الهم اكيد والا محمد ميجي يدافع عنهن هاي اول مره ايسويها حياته كلها ممدافع عن هيج قضايه.
لائِث: انت شنو رأيك بهذا المحامي سيادتك؟
هَيْصَم: المهم عمله بيه فائدة النه بدون ميعرف اما نيته مو مهمه.
دقق بكل شي ايخصهن اريد اعرف كل شاردة أو وارده عن حياتهن، واحرص ميصير تواصل بينهن وبين المساعدة وخلي عينك عليهن ما اريد اي خطأ لائِث.
لائِث: تأمر سيدي.
هَمَّاس: سيدي.
هَيْصَم: أريدك تاخذلي بصمات هاي الملفات والمكتب وللرفوف الموجوده واعرف هي تابعه لمنو.
هَمَّاس: تأمر سيدي.
ضَرْضَم: سيدي الدكتورة وصلت.
هَيْصَم: خليها تتفضل والبنيه السجينه خلي لائِث يجيبها لهنا.
ضَرْضَم: حاضر سيدي.
هَيْصَم: لنشوف هاي المره شنو مخطط الأسود.
بوران: طلبتني سيدي بشنو اگدر اساعدكم؟
هَيْصَم: البنيه اللي راح تدخل هسه معرضه للأعتداء على مدار شهر كامل أريد تشوفين شغلج.
بوران: تأمر سيدي.
لائِث: السجينه سيدي.
هَيْصَم: شوفي ست هاي الدكتورة تابعه ألنه كوني متعاونه وياها حتى نگدر نساعدج،
اخذهم للغرفه اللي بنهاية الممر.
لائِث: أمرك سيدي.
هَيْصَم: شگد مجان المجرم ذكي لابد يترك وراه أثر وهو بمثابه الدليل ألنه عن طريقه نلقي القبض عليهم من السهل جداً اتكون ضابط لكن يطلب وقت وذكاء حتى تگدر تعيش وسط ناس خونه ومجرمين بهاي المهنه اني استخدم عقلي اكثر من عضلاتي ولهذا السبب محد گدر يهزم الهَيْصَم.
بوران: ماكو اي شي يثبت انها متعرضه للأعتداء أو مو من شهر هي متمرسه بهذا العمل سيادتك.
هَيْصَم: جيد وشنو بعد؟
بوران: طلبت من عندي اشهد الصالحها حتى تگدر تطلع من هذا المكان.
هَيْصَم: التبريرات القدمتها؟
بوران: امها مريضه بالعجز الكلوي وكل هذا حتى تنقذها.
هَيْصَم: دائماً المرتكب ذنب ايحاول يجمله بأي طريقه.
بوران: تريد من عندي شي ثاني سيادتك؟
هَيْصَم: خلي موبايلج شغال دائماً بأي وقت نطلبج تنورينا.
بوران: بخدمتكم سيدي.
هَيْصَم: لخدمه الوطن دكتوره.
شنو طلع وياك؟
هَمَّاس: بصماتها الوحيده الغريبه من بين جميع البصمات.
هَيْصَم: مثل متوقعت جيتها لهنا مرسومه تريد تاخذ معلومات لجماعتها.
لائِث: نعم سيدي.
هَيْصَم: أريدها اهنا وانت تعرف شنو اتسوي بهاي الأثناء.
لائِث: لعبتي هاي الشغله سيادتك.
ألين: صدگتني مو صح سيادتك؟
هَيْصَم: شوفي كدامج 60 ثانيه حتى تحجين الحقيقه والا راح احولج للمحكمه الخيار بأيدج.
ألين: تمام راح احجي، اني ابويه ميت من سنتين وبعدها أمي انصابت بعجز كلوي وهسه هي تغسل الكلى مره بالأسبوع اني ما اگدر أأمن مبلغ مالي لعلاجها او بابا مجان عنده راتب يعني تگدر اتگول انو ملگيت غير هاي الطريقه.
هَيْصَم: من سنتين؟
ألين: سنه ونص.
هَيْصَم: ليش مطلبتي المساعدة من الأقارب او الجوارين؟
ألين: أقاربي هو اللي اخذني لهذا الطريق.
هَيْصَم: عنده عرف بيهم؟
ألين: نعم سيادتك.
هَيْصَم: شنو اسمه؟
ألين: اسمه الحقيقي شاهر.
هَيْصَم: والحركي؟
ألين: كهيال سيدي.
هَيْصَم: شنو تعرفين معلومات عنه؟
ألين: اذا انطيتك المعلومات تساعدني اطلع من هذا المكان؟
هَيْصَم: في حال اتعاونتي ويانه ، وهم اتكفل بعلاج امج بالكامل وأأمن الكم راتب رعايه واذا تحبين انقلج لغير محافظه وميگدر يعرف مكانج ولا انتِ اللي حجيتي شي بخصوص معلوماته.
ألين: هو مو وحدة وانما مجموعه من الأشخاص يشتغلون بمتاجرة النساء البعض ايخلوهن بالكديه بالنهار اما بالليل يتغير هذا العمل و البعض ايتاجرون بيهن لهيج أماكن.
هَيْصَم: العمل مجاني؟
ألين: حتى العلاج اذا تمرضت وحدة محد ياخذها للدكتور عدنه كم ابنيه ماتت لهذا السبب.
هَيْصَم: اتعرفين فقط كهيال؟
ألين: اي لأن هو اقاربي اما البقيه ملثمين ويحرسون فقط البوابه.
هَيْصَم: المسؤوله عنكم منو هي؟
ألين: مره عمرها 50 سنه تقريباً هي تتكفل بكل شي ايخصنه قويه وعقوباتها قاسيه حيل ومحد تگدر متنفذ أوامرها.
هَيْصَم: شنو اسمها؟
ألين: بديعه.
هَيْصَم: وين هي هسه؟
ألين: ماعرف آخر مره شفتها البارحه بالليل.
هَيْصَم: مكان عملكم هو البيت نفسه اللي داهمنا؟
ألين: حسب الوضع كل مره يجي أمر مختلف.
هَيْصَم: تعرفن الأمكان اللي ترحلها؟
ألين: لا يخلون قناع على روسنه من نطلع حتى منكدر نشوف شي.
هَيْصَم: ليش كذبتي اول مسألتج؟
ألين: ردة فعل لأن خفت من عندك سيدي.
هَيْصَم: خفتي وطلبتي تجين لهنا؟!
ألين: ماكو سبب ثاني غير الخوف صدگني.
هَيْصَم: اذا الأسد ينطي الأمان للغزالة بالغابه بوقتها تهرب من عنده ويخسر وجبته الرئيسيه.
ألين: مفهمت؟
هَيْصَم: اني اللي اسأل أو مو غايتي فهمج ست،
لائِث.
لائِث: نعم سيدي.
هَيْصَم: رجعها للزنزانه وخلي ضَرْضَم يجيني.
لائِث: تأمر سيدي.
ضَرْضَم: طلبتني سيادتك؟
هَيْصَم: شنو نتيجه بحثك؟
ضَرْضَم: باجر كل النتائج يمك ان شاء الله البحث مستمر على قدم وساق.
هَيْصَم: جمع الفريق يمي هسه.
هَمْهَام: طلبتنه سيدي؟
هَيْصَم: كهيال ابحثولي عن هذا الشخص ضمن السجلات اللي عدنه عن جماعة الأسود هو ايتاجر بالنساء اسمه الحقيقي شاهر ومره اجبيره اسمها بديعه هُمَ اهم عضوين بكل هاي العمليه اللي صارت اليوم.
هَمَّاس: واللي اعتقلانهم سيدي؟
هَيْصَم: كل وحده بيهن دوروا عن عائلتها وشوفلي السبب اللي خلاها تنخرط بهيج اعمال.
ضَرْضَم: تأمر سيدي راح نبدأ البحث من هاي اللحظه.
هَيْصَم: لائِث اريد مساعدة بديعه.
لائِث: بدع اسمها قديم.
هَيْصَم: مو حقيقي اكيد.
لائِث: اذا هذا حركي لعد اسمها الحقيقي كاظمية؟
هَيْصَم: لائِث.
لائِث: تغير جو هاي شبيك.
هَيْصَم: احترم ابني مو ابنك الصغير.
لائِث: دادا حبيبي يمه فدوة لأبني الحلو اضحك لبوك يروحي و تعال عضني خلي اشوف طلعت اسنانك لو لا.
هَيْصَم: توخر من يمي لو اكسر اسنانك؟
لائِث: عادي اكل تشريب.
هَيْصَم: راح انزل بيك عقوبه.
لائِث: طالع تأمر بشي سيدي؟
هَيْصَم: مساعدة بديعه اريدها اهنا،
اي خانم اسمع.
:أسمي إران سيدي.
هَيْصَم: ماعندي لعبة الحبل ما اسحب من عندج الكلام جمله جمله انطقي كل شي تعرفيه و اتركي الندم وسوالف التوابين هذا مركز شرطه مو جامع واني ضابط مو معمم.
إران: ماكو شي اعرفه سيدي اني مثل كل البنات الموجودات بهذا المكان.
هَيْصَم: واني مو مثل الباقين الموجودين بالمركز لتتأملين انو تطلعين من هذا السجن بسهوله عقوبتج مختلفه عن باقي النساء لأن انتِ مسؤوله عن هيج اعمال غير اخلاقيه ومتهمه بالمساعدة بقضايا متاجرة بالنساء.
إران: اطلع مثل كل مره مو جديدة سيادتك.
هَيْصَم: هَمَّاس.
هَمَّاس: نعم سيدي.
هَيْصَم: اخذها للحبس الأنفرادي حتى موعد محاكمتها أو وعد من عندي هاي المره راح تتحاكمين على أعمالج السابقه والحاليه.
: احضر بالعشا وصافنه بوضعي الحالي فجأة اخذتني افكاري اله،
شنو يسوي؟
اتغده لو لسه؟ أتعرض لمحاولة اغتيال مره ثانيه اثناء عمله لو لا؟
اتذكرت شكله من يلبس الزي يطلع شخصيه يجبرني اباوع بوجهه صايره هاي الأيام من اشوفه اذكر اغنيه اسراء الأصيل،
يزفوني اله امنيتي عروسه.
ضربت على جبيني صايره كلش ادبسز أني بقائي وياه خلاني قليله أدب فد مره ومن الثول اللي صابني بسبب تفكيري بيه وخرت الگدر عن الطباخ بدون شيالات صرت أطفر من الألم بالمطبخ مثل القرد، أخ اللهي الحرگ ايموت،
ماعرف شلون دخل بس مضهره وهو صافن بوجهي خلاني انسه ليش اني واگفه بنهايه المطبخ اصلاً اني شنو اسوي بالمطبخ ماعرف صحاني من گال.
هَيْصَم: صاير شي لَّباءَة؟
فيروز: لا ليش سامع شي؟
هَيْصَم: سامع صوتج وانتِ تصرخين فكرت صايره مداهمه وتطلبين النجدة.
ماعرف يمكن بسبب شكله الحلو والملفت حجيت وي نفسي بس للأسف جان الصوت عالي.
فيروز: وهمه كل النجدة حلوين هيج؟!
هَيْصَم: شنو؟
فيروز: سلامتك.
هَيْصَم: محضرة عشا؟
فيروز: اي.
هَيْصَم: راح ازعجج بهاي الشغله ممكن تصبيلي لأن ميت جوع.
فيروز: الف طلب مثل هل الطلب تدلل.
هَيْصَم: لَّباءَة بيج شي وضعج معاجبني بعدين شنو اتسوين بنهايه المطبخ تعالي لهنا.
فيروز: شنو اتريد؟
هَيْصَم: اقيس حرارتج الواضح امورج مخربطه حيل.
فجأة صحتني لسعة أيدي من كال حراره، تذكرت شلون نجويت، لزمت اصبعي بأيدي الثانيه وبقيت انفخ عليه وامتلت عيوني بالدموع صدگ يأذي محسيت الا وأيدي بين أيدة سحبني للسنك وفتح المي واهنا صدگ فقدت اخر ذرة من تركيزي بوجودة فززني من فرقع اصابيعه بوجهي.
هَيْصَم: اذا تبقين على هاي الحاله مطولين وادفنج بالمقبره.
رفعت حاجبي وكلت بتفاجئ.
فيروز: ليش شنو سويت؟!
هَيْصَم: اكو شخص عاقل بكامل وعيه يشيل الگدر بدون شيالات؟!
فيروز: مشلته مجرد حاولت متشوف بس أيد وحدة تأذت.
هَيْصَم: الله يصبرني، خليها جوه المي دقيقه وأرجع.
فيروز: وين رايح؟
هَيْصَم: اجيب ثلج لأيدج وين يعني!!
فيروز: ليش عصبت شنو حجيت قابل.
هَيْصَم: لَّبااااءَة.
فيروز: نعم.
هَيْصَم: صوتج مو طفل أني.
حجيت وي نفسي بصوت ناصي حتى مايسمع: يعني واذا صار صوتي شويه عالي شنو يعني، شنو هل تعجرف والغرور العنده.
طلع مكعب ثلج من الثلاجه و انطاني اخليه على الحرق فكرت راح يسوي مشهد رومانسي ويسحب أيدي ويخلي عليها الثلج وهو يباوع بعيوني بس اكتشفت افكار الهنود راح تاخذني لطريق ما منه رجعه،
اصحي على نفسج لتفكرين بيه ابداً وليسحرج بتصرفاته الكريزما والهيبه لتاخذ عقلج وتسيطر عليه،
اسمج فيروز مو لَّباءَة وانتِ متعنيله شي بعد ميعرف مكان خالتي يرجعني الها لتعلقين نفسج بحبال من وهم ومحد يخسر غيرج ، گلبج ملكج احفظي هاي القاعدة ولتسمحين الهَيْصَم يسحبج لمكان مغلق العودة من عنده مستحيله،
اني ما احبه هاي مجرد اوهام لأن صايره اشوفه بشكل يومي اسلوبه واحترامه اليه خلاني اصنع صورة ذهنيه خاطئة لذلك لازم ارجع اسيطر على نفسي وامحي هاي الفكره خلص،
رجعت لواقعي بعد رحله بين العقل والقلب على صوته وهو يگول.
هَيْصَم: الموت واقع حتماً والحياة مجرد كذبه جميله نحاول نصدگها كل يوم والأكثر مينتبه الا و النهايه مقتربه لدرجه اتصير صور الماضي كدام عيونه بهاي اللحظة المأساويه اللي من المفترض يلتقي بعدها العبد وي ربه شغله وحده تخطر على باله،
اني شنو سويت بحياتي؟
محققت حلم الطفوله ولا سعيت بأهداف الشباب ولاصار عندي اسم ينذكر بعد موتي غير الينكتب على كبري ويذكره بس احبابي المقربين وبرأيج منو الشخص اللي يبقى مخلص طول العمر؟
الجميع ينسى ولا واحد من الناس اللي تمديله أيدج راح يذكرج بسورة الفاتحه حتى، فهمتي مقصدي لَّباءَة؟
فيروز: اعذرني اذا گتلك لا ياريت توضح.
هَيْصَم: لتشغلين عقلج بأي شخص وتعرضين حياتج للأذى ماكو مخلوق بهاي الكره المدورة يستحق هذا النوع من الأهتمام المفرط بيه.
فيروز: وانت شلون عرفت اني جنت افكر بشخص ما؟!
هَيْصَم: المراهق اليوم يعرف هذا النوع من الصفنات ما بالج بشخص خلص عمره بالتحقيق والجرائم؟
فيروز: وانت ليش مخلي عقلك يمي؟!
هَيْصَم: لأن سألتج سؤال ومجاوبتي عليه، عرفت عقلج فاصل عن العمل حاولت اصحيج بصوت عالي حتى تنتبهين يمي.
فيروز: مسمعت اسفه شنو سألتني؟
هَيْصَم: ادربتي اليوم على حمل السلاح؟
فيروز: لا.
هَيْصَم: بعد العشا راح ادربج بشكل مختلف ونبدي بتنفيذ العقوبه في حال تهاونتي عن العمل.
فيروز: قاسي.
هَيْصَم: ک الأسد من يهجم على فريسته.
فيروز: هو على شنو گادر الأسد بس على الغزاله المسكينه ليش ميهاجم النمر مثلاً؟!
هَيْصَم: ايصير قوات مكافحه الأرهاب تهاجم قوات التدخل السريع؟
فيروز: وين الربط؟!
هَيْصَم: تگدرين تگولين أهدافهم مشتركه لكن عملهم مختلف.
فيروز: امثالك ليش عسكريه؟
هَيْصَم: لأن ميليق بينه غيرها.
فيروز: ماعندك اطلاع على غير هاي المهنه؟
هَيْصَم: كل شخص يجتهد بعمله هذا هو الأفضل.
فيروز: المعرفه العامه حلوه.
هَيْصَم: ماعندي وقت لهيج أمور لَّباءَة، افراد السلك اغلب وقتهم مشغول.
فيروز: مو صح من جنت اتابع بالتيك توك فيديوهات هوايه ضباط عدهم منشوارت عامه وحتى حكم والأكثريه يحششون.
هَيْصَم: كل انسان ايمثل شخصيته الحقيقيه واني رجل متهويني هاي الأمور ترديني مثلاً وي كل هاي الهيبه ارگص بمواقع التواصل لو القي نكت سخيفه احجي بالنساء؟!
فيروز: صدگ انتم ليش عليكم سمعه مو زينه؟!
هَيْصَم: كل مكان بيه زين ومو زين واحنه عدنه قانون لكل شخص مو زين لازم يتعاقب، قانون صارم يختلف عن القوانين المواطنين العاديين.
فيروز: يعني هسه انت تقنعني ملتزم بالقانون ومتسوي شي غلط؟!
هَيْصَم: غلط مثل شنو؟
فيروز: مثل باقي الضباط يعني مثل شنو.
هَيْصَم: وضحي أكثر.
فيروز: اوعدني متعصب وتكون متفاهم بس هو مجرد سؤال اتذكرته.
هَيْصَم: وعد مراح اعصب احجي.
فيروز: شوف مره قريت بأحد المنشورات اعتقد قصه ماعرف شنو مكتوب انو الضباط عدهم علاقات وي الشسمهن ويتزوجون متعه واغلب افلوسهم اتروح لهيج اماكن صح هذا الكلام؟
هَيْصَم: عقوبه بالقانون العراقي تنص على من مارس البغاء(علاقه غير شرعيه) ينسجن ثلاث اشهر و توصل ست اشهر في حالات ثانيه لكن بنفس الوقت البعض من عدهم ميتعاقبون اما برشوه او لأي سبب ثاني يعني مو الجميع يراقبون جنودهم.
فيروز: اذاً هاي الأخبار كذب؟
هَيْصَم: متواجدة بكثرة بالشارع العراقي مو فقط العسكري يسوي هاي الأشياء، خليها ابالج وحفظيها عدل بجميع الأماكن وبكل الوظائف والمهن وعلى مختلف البلدان يوجد الزين والموزين بس هي سمعه سيئة اتسبب بيها بعض الأشخاص لا أكثر.
فيروز: وبالنسبه لأخلاقكم؟
هَيْصَم: شايفتنه نازعين ملابسنه بالشارع لو معتدين على وحدة كدام الناس؟!
فيروز: مو قصدي هيج افهمني يعني مثلاً اسلوبكم بالكلام اغلبكم يسب ويشتم او يلفظ الفاظ بذيئه ما احب اگولها.
هَيْصَم: هاي الألفاظ موجوده بكل مكان حتى الأطفال يحجون بيها مو فقط اليشتغلون بالسلك العسكري واني شخص من السلك ميوم حجيت بأشياء غير مناسبه بمكان عملي لأن احترام الشخص من احترام نفسه بالأول اشلون المنتسبين يحترموني اذا اني محترمت نفسي؟!
كل كلمه محسوبه عليه الأنسان يعرف من منطوقه وهذا مو ربط بين العسكري وغيره الأخلاق والثقافه هي لجميع الناس مو حصراً بأحد لَّباءَة.
بعدين هاي شنو من أشياء اتابعيها وقتج ثمين ومحسوب عليج عمر مُحاسبه عليه بعدين، خلصي ساعاتج بأشياء ذات فائدة على سبيل المثال اللياقه البدنيه اتقوي العضلات وتفيد في حال اتعرضتي لتحرش او محاولة خطف.
فيروز: اللي يعيش وي ضابط لازم ايصير مثله؟
هَيْصَم: انتِ مختلفه لأن اني معلمت هاي الأشياء لخواتي حتى.
فيروز: شنو السبب؟
هَيْصَم: لأن حياتج معرضه للخطر فمن الجيد التعلم والتدريب حتى تگدرين ادافعين عن نفسج بوقت الضرورة وهسه اتركي هذا النقاش خلي نتعشا.
حضر العشا بالمواعين وخلاهم على الميز لأن ايدي محروگه ساعدني هو صح مو حرق جبير لكن هو اخلاقه عاليه،
كملنه وغسلنه المواعين اجيت اروح لغرفتي حتى انام وقفني صوته.
هَيْصَم: عندي الج مفاجأه راح تعجبج اني متأكد تعالي ويايه للغرفه حتى اتشوفيها.
يتبع.
تفاعلكم اللي يسوي واهس وتعليقاتكم بين الفقرات وتصويتكم للبارت يحلوين
البارت الثالث لهذا الأسبوع حيكون يوم الجمعه ونرجع لجدول التنزيل الأسبوع القادم بأذن العليم.
حسابي الأنستا لأي شي يخص القصه..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!