للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي الهَيْصَم مع بعض
هَيْصَم
(الكاتبة زهراء احمد)
_______
اليومَ عادَ كأنَّ شيئًا لم يكُن
وبراءةُ الأطفالِ في عينيهِ
ليقول لي : إني رفيقةُ دربهِ
وبأنني الحبُّ الوحيدُ لديهِ
ما عدت أذكر ، والحرائقُ في دمي
كيفَ التجأتُ أنا إلى زنديهِ
خبأت رأسي عندهُ ، وكأنني
طفلٌ أعادوهُ إلى أبويهِ
سامحتهُ ، وسألتُ عن أخبارهِ
وبكيتُ ساعاتٍ على كتفيهِ
كم قلتُ إني غير عائدةٌ لهُ
ورجعتُ ، ما أحلى الرجوع إليهِ
-نزار قباني
ارفد: وتهدد هم!!
محمد: لتعتبره تهديد وإنما حقي كزوج لو نسيت حوري زوجتي ان لم يكن شرعاً فهي مرتي قانونياً، ساعة غضب او مثل متكولون ساعة شيطان رميت عليها يمين الطلاق بحاله عصبيه وكوني رجال متدين واهتم بأمور الدين جبت ويايه سيد يجدد العقد كدامكم لان للأسف المرة الأولى ماحظيتوا بهذا الشرف.
نسر: انت جاي تهينه داخل بيتنا لو اني فهمان خطأ؟
محمد: فهمان صح نسر المحترم او نكول الضابط نسر المحترم منريد نموت بأحد الحيل مالتك تعرف الروح عزيزة.
أرفد: تجاوزت هوايه واني لحد الأن مطول خلك وياك، من الاخير افهمها زوجه ماعندك يمنه تفضل بدون مطرود.
محمد: واذا مطلعت ترتكب بيه جريمه لو تجبر وحدة من خواتي تعترف عليه بشهادة زور؟
نسر: وين تريد توصل بهذا كلامك؟
محمد: لجريمه قبل خمس سنوات ونص جانت من تأليفك وابداعك، راح ضحيتها بنيه بريئة واخوها المتهم بترويج مخدرات ولعلمك ايضاً كان بريئ والتهمه ملفقه عليه لكن للأسف مكدرت اطلعه من السجن وقتها فنتحر وترك الدنيا بسببك وغطوا على جريمتك هَيْصَم وأرفد، سعيت بكل الطرق حتى انتقم لصديقي واخته لكن يكولون يد الظلم اقوه من الحق وتكممت كلمة الحق ببلد الديمقراطية والحريه.
نسر: هذا الكلام اضحك بيه على نفسك علاء جان احد المروجين للمخدرات واذا ماعندك علم كل الادله تثبت ادانته بالأضافة اني ما أللي علاقه بموت ميار ولا انتحار علاء هم ثنينهم تركوا الدنيا بأرادتهم الكامله.
محمد: ميار هي اللي حجتلي كل شي صار وياها من اول يوم دخلت بيه على حياتها وشلون دمرتها بحبك الكاذب وخدعت بنت مراهقه حتى تترقى ويخلون على كتفك نجمه لكن نسيت انو الله حق وطريق الظلم بعمره ميستمر لابد يجي يوم وتوكع بشر أعمالك.
نسر: هذا الكلام مو صحيح ابداً اكو جزء من الحقيقه محد يعرف بيه لحد الأن وهو انو ميار جانت جاسوسه وهي اللي تنطيني معلومات بخصوص اخوها علاء اللي هو اصلآ مو اخوها وإنما ابن عمها المعتدي عليها وحامل من عنده لكن للأسف بنهاية أيامها نحرفت عن الطريق وقررت تصير ضدي لأنها حبتني وطلبت استر عليها واني مقبلت لان احب ايفلين وما أكدر اخونها حتى لو المسألة بيها حياة او موت اتخذت قرار تنهي حياتها وتنتقم من عندي بأيفلين بتوريطها بالجريمه وامها ساعدتها فجانت كل الادله تثبت أيفلين قاتله وهذا اللي دفعني ادخلها مصح عقلي حتى تطلع براءة فكره غبيه صح لكن ضمنت سلامتها وهذا المهم اسبوع بمستشفى للأمراض النفسيه افضل متخلص شبابها بعالم مليئ ناس قذرة سواء ضباط لو مساجين، انت شخصيا ماعندك الشجاعه الكافيه حتى تسوي اللي سويته لهذا السبب مو من حقك تلومني، ونقطه انتهى حوري مراح ترجع وياك خلصنه كلمن يرجع على بيته.
محمد: اذا مترجع ويايه بالرضى ترجع بالغصب.
أرفد: شنو قصدك وضح أكثر؟
محمد: دكتورنا العزيز وضابطنا المو عزيز شغلت ميار وعلاء سالفه عفا عنها الزمن وصارت كلش قديمه لكن حوري هي حاضري ومستقبلي وام ابني مستحيل اتخلى عنها بعد كل هذا التعب لخاطر عيونكم المحلوه تكون راضيه عسى مرضيتوا طول عمركم مو مهم عندي، مرتي وابني اليوم راجعين ويايه للبيت برضاكم او غصب واللي عاجبه عاجبه والمعاجبه يضرب راسه بالحايط عدكم أربعة ما شاء الله تكفي.
مهدي: انت ابد مخليت احترام لعمك الموجود وسفه بيك تربيه محسن وحرامات انت ابنه.
محمد: وسفه وحرامات نفس المعنى اعذرني عمو العزيز والمو عزيز حسب مزاجي هاي الجمله يعني مرات احسك هيج ومرات هيج المهم هذا مو موضوعنا، لحظه بس وين جنت احجي؟
اهاا تذكرت حوري هي مرتي من توسلتوا بيه حتى اقبل اتزوجها حتى ميجيكم العار بوقتها جنتوا من اهل العشائر المحترمين اللي متقبل عرضها يدنسه احد وعقلكم الصغير جان ناوي يرتكب بيها جريمه بحجه غسل عار لو لا مساعدة الدكتور ارفد الوقور والمحترم، وهسه بعد ما اخذتها وخليتها ابيتي وتعودت على انو أصبح بوجهه كل يوم تجون وتردون اتنازل عنها والله حتى ارضي غروركم؟!
تخسوون مو محمد اللي يترك عائلته ويتخلى عنهم اي صح احنه عدنه طرق ملتويه بس الذراع اللي تمنعنا نلويها ونكسرها هم، مرتي وابني مكانهم بيتي غير هيج ماكو حجي ينكال، حول نظره اليه وكال بصوت عالي ونبرة مستفزة.
محمد: يلا سركي كلبي سامحي زوجج الحباب وخلي نجدد العقد قبل ما اخذج غصب عنهم لبيت الطاعه وتعرفون بدون شرح يعني شنو بيت طاعه، وإذا متصدكون اني سويت هيج فشوفوا هاي الأوراق ودققوا بيها امر استدعاء من المحكمة يوم الأحد للامتثال أمام القاضي حتى يناقش اسباب اخذ زوجتي دون علم زوجها من بيتها وحرماني من سركي كلبي والكتكوت القادم عن قريب.
: بقيت صافنه عليه وهو يطلع الأمر من الجنطه مالته يعني معقوله سواها وهاي المره همات راح يرجع ياخذني غصب عني؟
اخذها ارفد من عنده بغضب خلاهم امام الأمر الواقع غصب راح اروح برجليه لبيته مره ثانيه وهاي المره ما اضمن هذا المخبل شنو ممكن يسوي، على مقدار حبي اله كرهته اضعاف وجوده صار يخنكني مرات اسأل معقوله الكلب يحقد على انسان حبه من اعماقه؟
شفت الوجوه كلها صافنه بحزن بوجهي اخذت نفس وكملت طريقي اروح لسجني مره ثانية لكن وقفني ارفد.
أرفد: مجرد ورقه متكدر تجبر بنتي ترجع وياك.
محمد: اني عندي الدليل اللي يثبت انت اخذتها والدمعه بعينها زوجتي حيل تحبني وانت جبرتها تروح وياك للأسف الشديد.
: حجيت بصوت عالي ونبرة تحدي تجاوز هوايه واذا ابقى ساكته يستغل وضعي وابقى تحت رحمته طول العمر.
حوري: هذا الشي متكدر تثبته بالمحكمة لان اني اللي اتصلت بيه مو هو.
محمد: سواء طلعتي مجبورة او برضاج حبيبي جانت طلعتج بدون علمي وهذا الشي كافي يخليني اطلبج أبيت طاعه، القاضي راح يسأل لأي سبب تركتي بيت الزوج؟
خاينج؟
لو مقصر وياج بملبس او ماكل؟
لو اعنفج؟
او اكو شي رابع هذا ينضاف ليوم المحكمة مفاجأة الكم بيت عمي الأعزاء اني ما اخسر شي محامي ومتعود على الفضايح وأمه محمد كلها تعرف أخلاقي شلون تخبل لكن انتوا عائلة محترمه ومرموقه معقوله تضحون بسمعتكم علمود حوري؟!
ارفد: احجي بأسلوب محترم لتتجاوز بألفاظ قبيحه مثلك لاتعرف شلون يكون التصرف الصحيح وي اشكالك.
محمد: شبيهم اشكالي؟!
اني رجل قانون ادافع عن الناس بموجب القانون والقضاء العراقي مامرتكب جريمة، عكسكم انتوا اللي تتسترون على فضايحكم بحجج واهيه.
نسر: انت هوايه تمسلت واحنه ماعدنه وقت لكل هذا الكلام الفارغ الأفضل كل واحد يشوف شغله توكل لعملك وترك حوري واذا تريد ارفع الف قضيه مو قضيه وحده سوي اللي يطلع بايدك اختنه مراح تطلع من هذا البيت لو تنقلب السماء على الأرض.
محمد: خف علينا هسه تسوي نفسك الملك إسرافيل وتنفخ بالصور وتصير يوم القيامة، كلك على بعضك ضابط بالواسطة يعني متكدر تسوي شي لتنفخ عضلاتك وانت اعرف شنو أكدر اسوي ميحتاج نرجع للزمن وشلون جنت السبب بسجنك وفتح تحقيق وياك بمقتل ميار.
نسر: هوايه مهتم بقضية ميار الواضح جنت متعلق بيها حيل وتحبها.
محمد: لو جنت احبها مخليتك تضحك عليها وبسببك تنتحر هي واخوها حتى انت توصل للي تريده احارب حتى اخليها ملكي وافتخر بيها لو مرتكبه الف خطأ.
نسر: ومع هذا حوري مراح تروح وياك.
أرفد: حتى لو سلمناها ألك بأيدنا بوقتها ردنه نحميها ونحافظ على سمعتها هي شخصيا مو اكثر والا اني دكتور كلش بسيطه اعالجها ولكن مردت الطفل يتاذه فكون شاكر انو احنه رحماء مو لخاطرك بس علمودها وهسه انتهت المسرحيه وكل واحد على بيته.
محمد: لكن اني المخرج وبعدني اشوف انو النهاية مو كاملة اكو ضيف معزوم يحضر العقد ويكون شاهد ويايه على زواجنا المره الثانية.
أرفد: تعزم ضيوف في حال جان اكو زواج راح يصير من الأساس انت هوايه تحلم على فكره.
محمد: الاحلام حلوه خاصتا لو جنت رجال كفايه وسعيت لتحقيقهن.
: دقايق قليله ورن الجرس طلع ارفد شويه دخل هو وي رجال نصدمت من شفته، هو صح هيبه بس يخوف مظهره يخليك تنرعب بنظرته اول مصارت عينه بعيني متت بمكاني لكن مطول وابعد نظره عنه كلنه بقى مركز وي أرفد.
هَيْصَم: يامرحبا ابن الخاله.
أرفد: لتكلي انت الشاهد.
هَيْصَم: وين المشكله؟!
أرفد: ما أريد ازوجه حوري انتهى خلي ينفصلون وكل واحد يروح بطريقه افضل للثنين.
هَيْصَم: اختك زوجته لتمسلت حبيبي وحامل هم منو اللي يكون مسؤول عليها اذا صار شي؟
احنه مو مجتمع أوربي يحترم المرأة المطلقه بالعكس راح تصير بيها حاله نفسيه واكتئاب وبعيد عن كل هذا الكلام هي تحبه وهو هم يحبها وين المشكله يرجعون على بيتهم ماعرف!!
أرفد: مو الرجال المناسب الها احنه من الأساس ممقتنعين بيه احد الأقارب للعائلة مو زوج اختي هم.
هَيْصَم: برضاك او غصب هو زوجها ومن حقه ياخذها وياه للبيت خليهم يرجعون يعيدون العقد وترجع وياه لتكون عقبه بحياة احد أرفد الدنيا صغيره كلش حتى تحمل نفسك هيج ذنب ماينغفر ابد.
أرفد: هي هم متريده اني مجبرتها على شي.
هَيْصَم: متريد تخسر ثقتك بيها مو متريدة باوع بعيونها وراح تشوف عدل كمية الحزن والألم اللي بيهن لان هو بعيد عنها وراح تشوف همات الحب، ياقيس ليلى صرت متعرف تقرأ مشاعر الحب بالعيون لو هاي الخاصيه تفعلها بس وي ري كلبك؟!
أرفد: وانت من شوكت صرت قارئ للعيون؟!
هَيْصَم: من وكعت بالحب ونكسرت كل قواعد الهَيْصَم وعرفت انو الحياة بعيدة عن عيونها بدون لون ولا طعم ولا رائحة هي مثل الهوه بالليالي الربيع هيج عذبه وصافيه وبيها نسمه برودة لطيفه.
أرفد: اي اكعد تغزل شنو هامك!!
هَيْصَم: وانت ليش مهتم لهاي الدرجة!!ثنين يحبون بعض زوجهم واخلص لتحمل ذنبهم خليهم يعيشون مثل ميردون هذا واجبك أرفد ابداً مو من حقك تاخذ قرارات تخص حياتها.
أرفد: ميستاهلها.
هَيْصَم: وعلى اي اساس قررت؟!
أرفد: لان يريد ينتقم بيها من عدنا.
هَيْصَم: بهاي ظلمته هو يحبها صدك ومن كلبه وأكثر من مره يخليني واسطه ألك بس انت ترفض وهسه من صارت زوجته اني هم راح اوكف ضدك مو بس هو اذا متخليها ترجع وياه ارفع بيكم مذكره اعتقال وياخذها بكل اريحيه مثل مسوا نسر وي ايفلين قبل.
أرفد: ليش ادافع عنه وتساعده؟!
هَيْصَم: لان يحبها.
أرفد: مع هذا مراح يتغير يبقى انسان مينبلع.
هَيْصَم: محد طلب من عندك تاكله وشغله مهمه بما انو يحبها يتغير صدكني العشق مثل متكول يكسر هوايه قواعد والدليل اللي واكف كدامك.
أرفد: ليش واثق بيه لهاي الدرجه؟!
هَيْصَم: لان اعرف اشياء انت متعرفها.
أرفد: شنو هي؟
هَيْصَم: أسرار دولة.
لتشلع كلبي كول موافق وخلصني عندي شغل ولازم اخذ لَّباءَة للدكتورة.
أرفد: تأخذها للدكتورة شنو غير رايك واقتنعت اني دكتور قلبيه هاي المره لازم ما ادخل بهيج موضوع؟!
هَيْصَم: لان حبيبي مرت اخوك حامل واكيد مراح اخليك تعالجها.
أرفد: الف مبروك يارب يتربى بوجودكم انت والوالدة طول العمر.
هَيْصَم: ان شاءالله عمره أطول من عمري خليني ادعي هو اللي يدفني بشرفك كافي اني ادفن بالناس.
أرفد: لتحجي هيج عمرك طويل ان شاءالله.
هَيْصَم: حتى لو عمري طويل هم يجي يوم أموت قابل راح ابقى مخلد يعني؟
أرفد: خليها تجي للمستشفى عدنا طبيبات اكفاء يعتنن بيها بشكل مبهر وبما انو انت اقاربي ألك تخفيض.
هَيْصَم: بعمرك متعاملني كاني أقاربك من يخص الموضوع شغله العدل والمساواة بيني وبين المرضى ليش تدعي عكس هيج هسه؟!
أرفد: لخاطر زوجة الأخ مو لخاطرك.
هَيْصَم: اعتبر نفسي مسمعت شي وهسه خليهم يزوجون تره كلش تأخرت وعندي شغل مهم.
أرفد: اني معاجبني ترجع وياه هاي المره لكن لخاطر جيتك والخاطر الطفل حتى ميكون بدون اب راح اوافق.
هَيْصَم: لخاطر اختك اللي تحبه عيفك من عندي ومن ابنه.
: بقوا يحجون بصوت ناصي بس أكدر اسمع كلامهم لان قريبين عليه خلصوا والتفتلي أرفد.
أرفد: القرار الاخير الج اذا انتِ محابه ترجعين مستحيل احد يكدر يجبرج على شي وفي حال ردتي ترحين وياه يبقى هذا البيت بيتج واذا زعجج بشي معين بس اتصلي بيه اترك كل شي واجيج ماشي باباتي؟
حوري: تمام.
محمد: بما انو تصافت القلوب خلونا نعقد السيد نملت رجليه وهو منتظر.
: أجيت اروح وياه للاستقبال حتى نعقد وقفتني امي.
ناهده: لحظه بس اني مفرحت بعقد بنتي لأول مره لهذا السبب اريد افرح هسه ونسوي كل العادات المتعودين عليها بالاعراس.
: نزلت دموعي لكن جانت دموع فرح اخذتني من أيدي وصعدتني لبست فستان ابيض للعقد نزلت للصاله كعدت على كرسي قريب الباب مالت الاستقبال خلت رجليه بأنجانه بيها مي والقرآن بأيدي وبين اصابيعي هيل واكيد الياس موجود يكولون حتى تصير الحياة حلوه تقاليد ما اؤمن بيها لكن خلتني سعيدة انو عائلتي مهتمه بيه وكدروا يسامحوني على رغم وجه بابا لسه ثكيل وحتى مشارك بالنقاش اللي صار بين ارفد ومحمد ونسر وكأن اني مو بنته تغيرت نظرته عني وهذا الشي صعب يتصلح بين ليله ويوم ايقنت حتى لو فتحولي صفحة جديده مراح يجي يوم وينسون اللي صار هو اني من الأساس ما أكدر اسامح نفسي مابالك باهلي اللي عدهم الشرف اهم شي للبنيه.
بدأ السيد يعقد ومرت على بالي عقدي اول مره وشلون جنت فرحانه مو هوايه وقت يمكن نص سنه تقريبا وحياتي تغيرت بالكامل صحيح كدرت اكمل دراسه ومتركتها واللي ساعدني هي المظاهرات وحظر التجوال اللي صار فالدراسه إلكترونية وغير متعبه ابداَ صحيح الطبيه صعبه بس وجودي بالبيت مسهلها نوعا ما، تم العقد وصار لازم أودع عائلتي حسيت نفسي عروس هاي المره من صدك سلمت عليهم او والدي ملحكت اشوفه لان طلع اول مكمل العقد بحجة عنده شغل مهم اعرف ميريد يحجي ويايه واني همات عذرته اللي سويته مو قليل وينغفر اله بسهوله، طلعت وصار بوجهي ابن خالتي أجيت اكمل طريقي بس وقفني صوته.
هَيْصَم: محمد انسان لطيف على رغم اللي سوا لكن هو يحبج انسي الماضي وفتحي صفحة جديدة، شكد مجانوا الاخوه مهمين يبقى الزوج اهم لان كل واحد عايش حياته صحيح يحبوج لكن حب محمد مختلف عن حب أرفد ونسر ياريت فهمتي كلامي.
حوري: وليش ادافع عنه؟!
هَيْصَم: لان طلب مساعده عدوه حتى يرجعج للبيت ميسوي هيج غير اللي يحب من صدك.
حوري: ما أريد افتح صفحه جديده واللي صار صعب ينسي، الايد اللي تتركك وانت بأمس الحاجه الها ما اريدها بالوقت اللي اكون بيه مرتاحه، اكو فرق شاسع بين الثنين.
هَيْصَم: غيرج للأفضل، مرات احنه بحاجه لصفعه قويه من اقرب الناس النه حتى نعرف ماكو شي اسمه ثقه مطلقه بالآخرين مع هذا ترك كل شي لمجرد خطأ واحد اكبر ذنب، لتنطين لدرجه الندم ولتتخلين بسهوله حياتج تكون سعيدة بهاي الشغلتين.
حوري: ميفيد بعد هذا الكلام هو خسر المكان اللي احتله بكلبي.
هَيْصَم: بعدج تحبيه لتكذبين عليه اني اكبر من عندج بالعمر وعاشرت هوايه ناس وأقرأ العيون وحركه الشفايف وهمس القلوب، نظره عيونج ورجفة ايدج كلها ادل على انو انتِ تحبيه لكن زعلانه من تصرفه خان الثقه وهذا حقج اكعدوا وتفاهموا وحلوا مشاكلكم ماكو انسان معصوم من الخطأ، رب العالمين يغفر مره وثنين وثلاثه لكن إذا استمر العبد بنفس المعصيه ربج بعد ميغفرله واتمنى هاي المره وضحت الصوره أكثر، ندم ودك بابج خلي كلبج جبير وسامحي صحيح مراح تنسين لكن تجاهلي اللي صار من الأساس العمر ميخلص بالكره والحقد والعداوه.
حوري: ليش قدمتلي هاي النصيحة؟
هَيْصَم: لان اخوتج ونسائهم مراح يسووها واني أيضا معتبرج مثل اختي لابأس اوعيج على أشياء انتِ مدركيها.
حوري: شكرا الك، كلامك أثر بيه نوعا ما.
هَيْصَم: يارب حياة سعيدة تعوضون بيها الايام الفاتت.
حوري: ألك بالمثل.
هَيْصَم: استأذن عندي شغل مهم.
قبل ميلتفت وقفته.
حوري: لحظه بس.
هَيْصَم: نعم.
حوري: انت الطف مما تخيلتك، بعض الأحيان نفهم خطأ الناس فقط بناء على مظهرهم الخارجي لكن لو تعمقنا شويه راح نشوف شخصيه ثانيه مختلفه تماما.
هَيْصَم: سعيد انو تغيرت وجهة نظرج، مع السلامة.
حوري: مع السلامة.
: ودعت عائلتي ورحت وياه فتحلي باب السيارة ويحجي بابتسامة.
محمد: اي سركي كلبي السيارة ظلمة ونورت بيج.
حوري: كلوب محترك اني وانت السبب متعرف تشغل الكهرباء عدل.
محمد: نصلحج مو مشكله.
حوري: الكلوب ماكو فايدة من تصليحه اشتري واحد جديد افضل.
محمد: اكو فرق بين المتعود عليه والجديد تعرفين عندي حساسية بعيوني ما اتحمل اشوف غير وجهج.
حوري: من شوكت صارت بيك حساسيه؟!
محمد: من تركتي البيت ورحتي يم اهلج متعرفين شلون تأذيت الصراحه كلبي لحد الأن يوجعني.
حوري: انت السبب.
محمد: اعتذر.
حوري: ميفيد اعتذارك اللي سويته مينغفر بأسف ابداً.
محمد: ابقى اعتذر من عندج طول العمر مو مشكله.
حوري: منو ميار؟
محمد: اخت صديقي.
حوري: اللي هو ابن عمها علاء المتهم بترويج المخدات؟
محمد: هو نفسه بس هو معتبرها اخته وجان دائما يكول اختي.
حوري: شلون لعد حامل من عنده؟!
محمد: يمكن هي اللي معتبرته اخوها مو هو ولهذا السبب انطت بيه لنسر.
حوري: حبيتها؟
محمد: منو يحب وحده مثل هاي عدها وجهين ومو ثقه.
حوري: بسببها تكره اخواني صح؟
محمد: مو لهاي الدرجه اني انسان عديم فهم اعرف عدل علاء جان يروج يعني مستحيل اكره الضابط لهذا السبب لان يريد يخلص البلد من هيج ناس سيئة.
حوري: انت اللي دافعت عنه قبل شويه ليش تناقضت هسه!!
محمد: لان جان يروج تحت التهديد بالقتل شغله طويله لتخلينا ندخل بيها.
حوري: شنو سبب كرهك لأرفد ونسر؟
محمد: لان أيفلين دخلت مصح عقلي بسبب نسر وخططه الغبيه اما أرفد بعد عني ريفان من الطفوله جان يمنع احد يلعب وياها او يضحك هو الوحيد المعتني بيها لدرجه صارت قريبه من عنده هو وبس اني اخوها واشوفها بعيني شلون تهتم بابن عمي وتحجي وياه واني بنظرها مثل واحد غريب، وكل هذا بكفه وزواجهن من عدهم بطريقه خارجه عن المألوف وحب والدي الجبير لابناء العم واني ممنطيني اهميه بحياته، انو احجيلج كلمتين يختلف تماما عن شعوري على مدار سنين عمري كلها وعلى هذا قيسي لو جنتي بمكاني هم كرهتيهم.
حوري: لهذا السبب قررت تنتقم من عدهم عن طريقي؟
: وقف السياره والتفتلي يحجي بنبرة حب جبيرة التمست بيها الصدق.
محمد: حبيتج وانتِ أصدق شي صار بحياتي كلها مجانت علاقتي بيج بِنية الانتقام اطلاقا صحيح اني انسان سيء بنظر الكل بس مو لدرجه اكسر كلب انسانه بريئة مثلج بسبب حقدي على اخوتج.
حوري: من شوكت؟
محمد: سولفتلج مره اجيتي خطار يمنه وشفتج عن قرب وكلبي اعلن تمرده وقرر يطاردج لكن مجانت هاي الخطه اول محسيت نفسي نجذبت الج ناقشت والدي بالموضوع لكن هو رفض لان يعرف عمي المصون ميحبني لان سجنت ابنهم اسبوع انتقام للي صار بأيفلين، مأيست وقررت اروح بنفسي لعمي واطلبج من عنده بالمستشفى.
سكت شويه الواضح ميكدر يحجي لكن الفضول خلاني اسأله.
حوري: وشنو كال؟
محمد: طردني، حسيت بالإهانة بنفس الوقت قسمت اخذج مستحيل تصيرين لواحد ثاني غيري قررت انهي عليج بس مردت اكسر كلبج وتزوجج غصب لهذا السبب تقربت من عندج وخليتج تحبيني وكلما اسمع صوتج اكو شي داخلي يركص من الفرح والسعادة رجعت طفل اضحك على ابسط الاشياء وكلمة احبك من شفايفج تنسيني همي بأكمله حاربت بيج اهلي والمجتمع ومع كل هذا كلت انو مراح اسوي وياج شي غلط وخطبتج الف مره ودزيت هَيْصَم اكثر من مره لأرفد حتى يقبل لكن الجميع تكاتف حتى يبعدوج عني مجان اكو حل غير اتزوجج واخليهم أمام الأمر الواقع.
حوري: جنت بعيده عن الموت بخطوه انت متعرف شنو صار بيه وقتها احتاجيتك تكون ويايه بس سويت العكس وخيبت ضني.
محمد: غلطانه جنت وياج خطوه بخطوه بس الموبايل مالتج مراقب والمكالمات كلها تروح يم أرفد بس يعرف اني وانتِ متفقين راح يزيد الضغط عليج اكثر ولهذا قررت احجي هيج، جرحتج بس اني اللي تأذيت اتمنيت اكون يمج واضمج بحضني بعيد عنهم كلهم بس منعت نفسي حتى متتاذين أكثر حبي الج صادق من البدايه مردت اغشج بس هذا اسلوبي اللي ميعجب هوايه ناس.
حوري: ليش مكتلي من تزوجنا؟
محمد: لان بعقلج الطلاق موجود انتِ بدايه حمل وظروفج صعبه اكيد مراح ازودها عليج واخليج تنهمين أكثر بسببي وبسبب اهلج اللي ميردون الخير النا.
: سكتنا ورجع كمل الطريق للبيت مرت ايام وصار أسبوع واني بعيده عنه وهو اصلا ميسوي شي دائماً بعيد عني ومخليني على راحتي فكرت هوايه بكلامه وشفت من باب العقل افتح وياه صفحة جديدة وننسى الخلاف صحيح ضجت من عنده وحسيت بكره لكن بذرة الحب ما ماتت بالعكس كبرت وازهرت وي تصرفاته والطريقة اللي اعتذر بيها من عندي مجانت مجرد كلمات وانما افعال حسسني بيها من صدك مقدار حبه إليه ولو نرجع للواقع مو بس هو اللي غلط اني همات ورطت نفسي من البدايه لذلك مو غلط انطي فرصة ثانية اله، خلص هذا اليوم بشكل طبيعي واني مقرره من يرجع اناقشه بالموضوع ونطوي الماضي ونبدي من جديد كعدت على الكرسي وبقيت منتظرته يرجع هيج جنت مستعجله حتى نسولف يمكن من باب انو مشتاقه حيل لسوالفنا وردت حجه بس حتى افتح وياه اي موضوع ماعرف شلون غفيت شويه فزيت واني جسمي مكسر فتحت عيوني الدنيا ظلمه وهدوء كمت من مكاني وفتحت الموبايل الساعه عشرة، بالعادة هو ميتاخر لهيج وقت، اتصلت بيه فكرت انو صاير عليه شي لهذا السبب مكدر يرجع صدك خفت حيل خاصتا من مجاوبني اتصلت أكثر من مره يطلع الجهاز مغلق الرعب والقلق خيم على كلبي وعقلي بطلت افكر بشي غير انو صار وياه حادث وهسه حالته خطره وبالمستشفى حرت منو ادعي وشنو اسوي، بقيت افتر بالغرفه واردد ( ياكاشف الكرب عن وجه أخيك الحسين اكشف كربي بحق أخيك الحسين ) أكثر من مره حتى نسيت شكد قريتها اخير شي تعبت واني افتر بالغرفه كعدت على الجربايه وبقيت اردد ( ياصاحب الزمان ادركني ) تأخر الوقت وكلما اتصل يطلع نفس الجواب الجهاز مغلق او خارج نطاق التغطية، صارت الساعه 12ص وهو لحد الأن ماكو حجيت وي ربي ودموعي تنزل:
اللهي وحق عظمتك اذا رجعته اليه سالم افتح وياه صفحة جديدة جديده وانسى الماضي واكمل حياتي وياه بما يرضيك بس رجعه اليه بحق الإمام علي يارب، حجيت ودعيت هوايه من اعماقي بس اريد يرجع سالم ومبيه شي مرت ساعة ثانية وصارت بالوحده فقدت الأمل وكلت خلص راح اترمل هو صح ماكو شي بالواقع بس عقلي شلون يقتنع انو مابيه شي وهو مختفي بشكل كامل، ومن بين دموعي وشهكاتي سمعت صوت خطوات قريب الباب شويه ونفتح اني شفته كدام عيوني وكان شفت باب الجنه ركضت ناحيته متناسيه اني حامل وخطر عليه همي كله احضنه، عاتبته وضربته على صدره وشكيت اله من عنده، سويت العمايل بسبب خوفي وقلقي وعدم اهتمامه وتفكيره بيه، وهو بقى ساكت اخير شي تعبت رفعت راسي عن صدره التقت عيونه بعيوني الغريب شفت على ثغره ابتسامه وكأن فرحان من اللي سويته مسح ادموعي بأبهامه وكال بنبره مليانه حنيه.
محمد: ليش هاي الدموع؟
حوري: ليش موبايلك مغلق؟
محمد: خلص شحنه، بس لا، ولج معقوله تبجين علمودي سركي كلبي؟!
حوري: غير انت زوجي ليش ما ابجي عليك!!
انتهبت شنو كلت من كال.
محمد: فداج زوجج والله لو اعرف هيج راح تحجين من زمان متأخر وغالق موبايلي.
ضربته على صدره وحجيت بغضب.
حوري: مخفت عليك وإنما على نفسي لا أصير ارمله وابنه يتيتم.
محمد: زوجي وابنه، اليوم ناويه تجلطيني اخت أرفد؟
حوري: كم مره كتلك بطل سيرة اخواني لتذكرها؟
محمد: اسفين منعيدها المهم عيونج الحلوه متزعل.
ابتسمت ورجع كمل.
محمد: متصالحين؟
حوري: هاي اخر فرصة صدكني اذا خذلتني مرة ثانية اتركك او اروح بدون ما اسمع اي تبرير.
محمد: سويها اذا تكدرين.
حضني لصدره ولفيت أيدي على ركبته همس قريب أذني.
محمد: تعرفين ليش اسميج سركي كلبي؟
حوري: ليش؟
محمد: لان دخلتي كلبي وسركيتي الباب وراج.
ضحكت بصوت عالي وهو بادلني الضحكه بعدني عن حضنه وكال بكل حب.
محمد: احبج ياكلب محمد وحياته.
حوري: اني هم.
محمد: انتِ شنو؟
حوري: احبك.
يتبع..
وبوصولنه للمليون اشكركم شمعاتي لوجودكم ويايه بهاي الرحله ودعمكم وحبكم وصبركم همات الكم كل الحب حبايبي.
لاحظت شغله هوايه سألين عن بنت عم الهَيْصَم اللي حجه عليها لائِث جان خطأ من عندي المقصود بنت خالته حوري والخطبه اللي صارت.
البارت القادم هو البارت الاخير راح اكتب بيه على راحتي حتى ما أظلم النهايه لذلك لتسألوني شوكت ينزل شمعاتي لكن مع هذا منطول بإذن العليم وتوفيقه.
مسائكم خير وعافيه يارب.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!