في وسط الظلام
سمعت صوت زئير الشجعان
راودتني افكار عن معركة ستُقام
دقت الطبول وسكنت الاصوات والجميع نيام
وجهاً لوجه
العدو يريد الانتقام
هنا رأيت رجلان بالنظرات يتحديان
أحدهم على خصره سكين وسلاح
والآخر سيوف ورماح
خلفهمها يوجد باب وبه مفتاح
أردت معرفة السر فتوجهت نحو القفل وبدت من هنا الحكايه
بدايتها خيانه وسطها موت
وعلى سكة الحياة لابد أن نفوت
ونعرف ماذا سيحدث
ان تجلى الصوت
وطالب البريئ بحقه
والتزم المجرم الصمت
اليوم احكي لكم حكايتي
فهل من مستمع لروايتي؟
بقلمي زهراء احمد
لي قلب واحد نبض ذات يوم لإحدى العذروات، اسرتني بجمالها الفتاك وبرائتها، أخذتها ك مشتري زهور من بائع، اقتربت منها كي اشم عبق عطرها الخلاب وإذ بي أُجرح بالشوك، تساقطت جميع الأوراق واصبحت رماد بين يدي وانتهت الحكاية قبل أن تبتدأ حتى،
انغلقت الأبواب
وسكن في روحي العذاب
وإذ بي أرى جنية افقدت عقلي الصواب
سرت نحوها مسرع وبكل خطوة اقتراب
ينبض لها القلب والروح لاتستطيع الاستيعاب
سأعود والقي الوعود
وأتى اليوم الموعود
بخاتم وزفاف ظننت هكذا ستكون الحياة
حتى عرفت وذقت طعم الممات
بعد كل ماعشت وفات
واكفين كلهم بقلق وخوف باين على ملامحهم متوسطهم وماخذ الغرفة عرض بطول ويصرخ بصوت عالي مخلي الكل صامت مايكدر ينطق حرف.
ضَيْثَم: اروح شهرين بتدريب ارجع الكه المركز مكلوب فوك جوه مديررررركم ويننننن؟
لائِث: سيدي منعرف.
ضَيْثَم: لا بله!!!
لائِث: والله سيدي.
ضَيْثَم: كدامكم ساعتين أريد اشوف هَيْصَم مزروع كدامي بالمركز والا قسماً بجلاله العظيم كلكم احيلكم توقيف.
هَمْاس: خربت يولد منين نجيبه هسه؟
لائِث: من حضن امي.
ضَرْضَم: مو وكت شقاك انت فكر وانطينا حل بدون مسلته.
لائِث: يعني بشرفكم منينننن نجيبه اذا اني صديقة المقرب ماعرف أرضه من سماه، ما عفت مكان مدورته بيه وذيج امه وأهله مسودنين عليه شبيدي كلولي شبيدديييي؟
هَمْاس: اي لتعصب متنحل بهاي الطريقة اهدأ وكل شي بسيط ان شاء الله.
لائِث: شلون يعني بسيط؟
نزرعه ويخضر هنا بهاي اللحظة؟ انت ماشفته شلون عيونه تريد تحركنا شفته لو لااااا؟
هَمْهَام: انت شبيك مسودن علينا شعلينا احنه بلي صار؟
لائِث: لا الكم علاقة لأنكم ادبسزيه طايحين حظ لو مو انتوا مجان صار هيج.
ضَرْضَم: هذا حدك مصختها احنه شعلينه بلا؟!
لائِث: بذلك اليوم مو كتلكم خلي نروح وياه وطز بالواجب صديقنا وحده ومتعوب شكلتولي؟
هَمْاس: جانت عدنا مهمه لتخلط الأوراق ابعضها وطلعنا غلطانين!!! انت تعرف أمرنا مو بيدنا والقانون كاصبنا كصب منكدر نسوي شي واحنه بأمرة قائد ولازم نعتقل المجرمين، ولو هو موجود جان سوه نفس الشي.
لائِث: لا غلطان جان ترك كل شي وراح يساعدنا بس انا واحد طايح حظه خلصت عمري كله يمه وين مايروح اروح مثل ظله وبأصعب يوم تركته وحده يصارع الموت وختاريت الواجب ونسيت الصداقه واجبها اعظم.
هَمْهَام: اللي صار صار وانتهى واحنه ولد اليوم خلينا بالحاضر ونشوف شلون تنحل.
لائِث: ماتنحل، اعرف هَيْصَم اني اذا رجع راح يحرك الكل أو اول مايبدي بينا.
ضَرْضَم: لا هيج زودتها حيل، الصداقة وحد والشغل وحد لتخلط بالثنين لائِث.
لائِث: جانت عايزة التمت.
ميثم: تحجون بمنو؟
ضَرْضَم: منحجي بأحد، شنو تريد انت؟
ميثم: اشوفكم شتسوون.
هَمْاس: مو وقت تكعد وتشمت بينه اذا عندك حل كوله واذا جاي تتفرج فأحب اذكرك هذا مركز شرطة مو سينما.
ميثم: لا والله سينما واحله سينما هم، من اشوفكم محتارين ووجوهكم تلطم ارتاح نفسياً ومي بارد ينزل على كلبي.
لائِث: اي روح نشف قبل لتصخن الجو بارد ونخاف عليك.
ميثم: هه تستهزء بيه حضرتك؟
لائِث: انت مثل الدجاجة وهي عايشة ياخذون بيضها ومن يجي خطار يذبحوها عشا.
ميثم: شنو قصدك؟
غضنفر: قصده يحلو امك وجودك مفيد ومن يصير العكس تنوكل مثل الدجاجة يعني بحححح.
هَمْهَام: غضنفر!!
غضنفر: اجيت بناء على طلب القائد مالتي.
لائِث: ضَيْثَم؟ شنو يريد من عندك؟
غضنفر: لا عزيزي قائدنا.
لائِث: هَيْصَم!!!
هَمْاس: هَيْصَم طلب منك تجي؟
غضنفر: شبيكم متفاجأين؟
هَمْهَام: وينه هو هسه؟
غضنفر: ماعرف على اي ساعة يوصل، اني مأمور اسبقه لهنا مو انطيكم تفاصيل حياته.
لابس البيرية والزي الرسمي مالته على اجتافة نسر يميزه عن البقية، (الرائد هَيْصَم حيدر) القائد الشجاع الفذ، نزل من السيارة أمام المركز وكفو الجنود يردون التحيه وكلهم بصوت واحد خشن نادوا:
سيدي
نزع نظارته الشمسية وتقدم يمشي بخطوات رزنه ونظراته تتوزع على الجميع، شي بعيونه مسلوب يمكن الحياة أو الرحمة، على ملامحه غضب عارم، سكوت غريب، حزن عميق، تغيرت الآية ومن كان سابقاً يتعامل مع الكل برأفه وعطف صار جلاد، هل ياترى جلاد للناس ام لذاته؟
هذا السؤال طرحناه كلنه من شفنا، بأيده جكاره قربها من شفايفه اخذ منها نفس وشمرها بالكاع دايس عليها وداخل للمركز، عبرنا بدون ميلتفت، دك كلبي بعنف ولا كأن هذا صديق عمري متغير هواية، جليت صوتي وناديته.
لائِث: هَيْصَم.
توقف والتفتلي نص التفاته ورجع عدل راسه كال بصوت حاد وهو يخطي خطواته لغرفته قبل ميختفي فجأة.
هَيْصَم: سيدي لتنسى هاي الكلمة.
خلاني بصدمه جبيرة غرغرت عيني بالدمع بس ثبتت نفسي وقررت ارمم العلاقة بينه من جديد ونرجع أصدقاء واخوه مثل قبل حتى لو كلفني هذا الأمر حياتي.
ضَيْثَم: وين جنت طول هاي الفتره؟
هَيْصَم: بالمكان الصح سيدي.
ضَيْثَم: اي وشنو صار وياك؟
هَيْصَم: كل شي يمشي مثل مخططنا نحتاج بس شوية وقت بعد.
ضَيْثَم: صار فترة مشايف امك وخواتك تكدر ترجع للبيت اليوم وتجي باجر تمارس عملك كالعادة بشكل طبيعي اعتبرها اجازة الك.
هَيْصَم: بيتي هنا ماكو داعي الأجازة سيادتك.
ضَيْثَم: اسمعني هَيْصَم اني طول عمري معتبرك ابني مو شخص عادي دربته وبس لهذا السبب علاقتي بيك اقوة حتى من علاقتي بأقاربي، الحياة بيها هوايه دروس ملازم تبقى ماخذ وجه واحد تعيش بيه طول عمرك لأن دنيتنا دار بلاء والزين والموزين يمرون بيها علينه، الموت والغدر والخيانة والنفاق والناس السيئة كلهم نعيش وياهم ونمر بيهم بفترة من الفترات، اعتبر الكل محطة وانت القطار تبقى متقدم وميهم اللي صعد واللي نزل منو ياريت وصلك اللي اريده اكوله وفهمته وستوعبته زين، وهسه اترك كل شي هنا ونفذ أمر مديرك ورجع للبيت اهلك ينتظروك هناك امك ميته عليك وبنتك مشتاقتلك هم.
هَيْصَم: تأمر سيدي، كلامك على العين والراس اللي تريده يتنفذ بدون نقاش.
ضَيْثَم: حاول تترك التدخين لتغير عاداتك بسبب أحد حتى لو جان قطعة من كلبك.
هَيْصَم: كل شي بوقته حلو حتى التدخين.
تركه وطلع يمشي بهيبة كأنه جبل ميهزه شي، نظراته بخزرة وصوته الحاد، والجكاره اللي موكعت من أيده من دخل للمركز طفاها بس بوقت الجان بالغرفة اول مطلع رجع شغلها، يدخن وكأن مدمن عليها مو هذا الجان يختنك من ريحتها وميحب يشوفها أبد، تغير هوايه وتغيره هذا محبه واحد بينه،
طلع من المركز وطلع وراه غضنفر اخذت نفس بعمق وكلت بداخلي( الله يستر من الجاي)
غضنفر: هَيْصَم شبيك وي لائِث؟
هَيْصَم: هاي الفترة ملازم احد يطخ بيه خليني بعيد وحيادي وي الكل خاصة لائِث.
غضنفر: والله عندك سوالف تعبانة.
هَيْصَم: ينقهر شويه احسن ما انقهر عليه عمري كله ويتم إبنه وارمل اختي، اسوي هيج لمصلحة الجميع.
غضنفر: زين اني شوكت تخلص شغلتي؟
هَيْصَم: لتصير اناني وتفكر بنفسك خلينا نحسن الوضع بالأول بعدين يلا نتفرغ لسالفتك.
غضنفر: ولك لتخليني ابتلي بيك ومددك بنص الشارع واكعد على صدرك واخنكك بأديه الثنين، اللي اريده نعقد محكمة انا واختك كفرت قابل خو ماكفرت!!!
هَيْصَم: انت تهين مديرك تدري؟
غضنفر: طز.
هَيْصَم: هااا!!
غضنفر: وجعا حتى وجعا.
هَيْصَم: كاعد تغلط عليه انت لو اني اسمع غلط؟
غضنفر: لا عليه لتزعل نسيبي العزيز.
هَيْصَم: هتلي لتصير تره انت تعرف الوضع اللي تمر بيه، وربك وجلاله دمي حامي حيل اطلع حركة كلبي كلها بيك، جر عدل لا اروح ازوجها وخليك بعرسها تكون شاهد.
غضنفر: حتى اسحلك واسحل العريس واسويكم فرجة لأمة محمد، طايح الحظ يريد يزوجها وخشمي يشم الهوه غير ازوعك العافية وموتك بديه الثنين وخلي امك دك وتلطم.
هَيْصَم: عاد تدفني لو لا؟
غضنفر: يضحك اخخ ربي شوف القهر، عبدك راح يسوي بكلبي جلطة ثلاثية الأبعاد.
هَيْصَم: امي تسلم عليك وتكول الاسمر ليمر فرعنا لا ندوس بطنه.
غضنفر: بصراوي دمك حار شحجي وياك.
هَيْصَم: اي والله دمي حيل حار خاصة هسه اريد اكتل واحد وكلما يوصل لأنفاسة الأخيرة ارجع ابدي وياه من جديد عذاب غير منتهي، رايد انتشي بتعذيبه لدرجة يبوس رجلي اتركه وما اتركه.
غضنفر: راح يتحقق اللي تريده وداعتك بس شويه وقت نريد وكل شي يصير بين أدينه.
هَيْصَم: رايح اني بدون ماحجي انت تعرف شغلك.
الحياة بيها هوايه تقلبات ونعطافات كثيرة، مرات من شدة الفرحة عيونك تدمع، ومرات العكس تماماً وراسك يأذيك من كد متبجي لان داخلك مكسور، يقال انو العذاب يجي فقط من الشخص اللي تحبه، اللي تنطي كلبك وتشتري سلامته بسلامتك وصحته بصحتك، مافكرت بيوم حياتي راح تنقلب رأساً على عقب من مجرد تصرف سويته بدون دراسة، أو جنت ادري بس اهملت كل شي وعبرته وقررت اخطي هيج خطوة وجانت من أقذر الخطوات وابشعها وابقى طول عمري ندمانه عليها لو شنو مصار بعدين بحياتي من تغيرات وسعادة،
عيني على رويم اللي كبرت وصارت بنية دبدوبه حليوه، قبل أيام عيد ميلادها الثالث دخلت بالسنة الثالثة، مخلصه البيت بس ركض تركض من مكان لمكان متكعد أبد، الضحكة مالتها تردلي روحي وعافيتي وتنسيني همي وحزني، خليت أيدي على بطني مغمضه واحجي وياه بيني وبين نفسي: انت هم راح تنطي لأمك هذا الشعور لو ولادتك نهاية لقصتنا اني وابوك؟
فتحت عيوني من سمعت صوت الباب نفتح بلعت ريكي من شفته يمكن الحمل مخليني خبلة ماعرف الإشتياق مأثر بيه وصرت اشوفه حلو أكثر بزيادة من قبل صفنت بوجهه اللي مداره إليه أبد نزلت دمعتي رفعت ايدي بسرعة مسحتها، اتقرب من رويم شالها وبده يلاعبها ويبوسها بخدودها ويعضعض بيهم، منظرهم خلاني أقره المعوذتين حراسه من عيني عليهم، كمت من مكاني واني احاول اتقرب من عنده نزلها بالكاع عافني ودخل، سحبت نفس ومكدرت امنع نفسي ما ابجي كل اللي صار من أيدي بس والله جنت مجبورة صحيح غلطانه بس منو ميغلط بينه ليش مكبر الموضوع هيج ويمنعني احجي وبررله موقفي، والله هوايه حاولت احجي وياه بس رافض يسمعني وقطع كل الكلام وياي، صار شهرين ونفس المعاناة اني وياه هيج،
هدأت نفسي من حسيت بيها حاضنه رجليه نزلت راسي الها شفت ابتسامتها العريضة ابتسمت بوجهها ونزلت على الأرض كعدت وهي كعدت على رجلي مدت ايدها الناعمة وخلتها على بطني وكالت بضحكه.
رويم: اخوي هنا؟
فيروز: اي يروحي اخوج هنا.
رويم: ليش هنا؟
فيروز: لأن لازم يكون هنا.
رويم: اني هم جنت هنا؟
فيروز: اي يكلبي هم جنتي هنا.
رويم: لعد شلون صرت جبيره هسه؟
فيروز: من صرتي جنتي حيل صغيرة بعدين اكلتي وكبرتي وهسه عمرج ثلاث سنوات يعني مو صغيرة.
رويم: شلون طلعت؟
فيروز: ههههههه، يا ماما والله عندج سوالف ماعرف شحجي عنها، عوفج من هذا الموضوع وشنو رأيج نروح يم بابا؟
رويم: شاورني كال راح انام ماريد غده.
فيروز: وانتِ هم متردين غدة؟
رويم: مو كلتي كبرت لأن اكل، فأريد اكل أكثر علمود اكبر بعد واصير مثلج ويصير عندي اخ.
فيروز: ولج والله عندج سوالف بس بنت منو بعد، كومي نتغده سوه اني همات ميته جوع.
لازمه أيدي رحنا تغدينا وغسلت المواعين سويتلها حليب واني صبيت لنفسي جاي وكابلتها وكعدت، اشكر ربي بشكل يومي على نعمة وجودها بحياتي لولاها مكدرت اتحمل صعوبة هاي الأيام الكاعد تمر عليه بشق الأنفس، سمعت صوت حركة مال رجلين فتح باب المطبخ ودخل رويم بسرعة حاجته.
رويم: بابا تريد غده؟
هَيْصَم: يروح ابوج وبعد طوايفه كلهم اني اسوي لنفسي واكل بنيتي لتشغلين نفسج بيه ماريد اتعبج.
رويم: تعبك راحة.
هَيْصَم: ههههه، الراحة هي انتِ وضحتكج وصوتج وشكلج.
رويم: اذا هيج كابلني وكعد.
هَيْصَم: انتِ منيلج هذا اللسان؟ منو معلمج كل هل الحجي الحلو؟
رويم: بيبيتي.
هَيْصَم: اي مو اكول من جنتي يمي عاقله من اخذوج تغيرت اخلاقج.
حسيت الدم صعد لراسي وبديت افور خليت الكوكب على الطبلة مالت الأكل وحجيت وعيني مخليتها بالجاي.
فيروز: بيبيتج انسانة واعيه مثقفه علمتج شلون تحجين براحتج وتنطين رأيج بحرية بدون تعسف، خليج هيج وليهمج احد حبيبتي.
هَيْصَم: اللي بلا تربية هيج يشوف الحرية.
كلمته عاديه بس حسيتها طعنتني بنص كلبي شنو قصدة بلا تربية؟ يعني لأن أني يتيمه ماعندي أم ومحد رباني غير ابويه هيج يكول عني مكدرت اسكت درت وجهي اله مبتسمه بستهزاء مجاوبته.
فيروز: من عندك اتعلم الأخلاق سيد متدين.
هَيْصَم: اللي ياخذ كلامي على نفسه معناها بيه عيب لكن اللي يشوف نفسه متربي هوايه ملازم ينزعج من هيج حجي.
فيروز: مو من حقك تتجاوز بالكلام ويايه، حبيتك وحترمتك وكلت كل اللي سواه وكاله من حقه اني غلطت واستاهل بس توصل لهيج مواصيل ما اسمحلك.
دار وجهه يحجي وي رويم.
هَيْصَم: باباتي روحي فتحي كنتوري وجيبي ساعتي الفضيه ابقي دوري على راحتج لتجين بدونها وانتبهي ليوكع عليج شي وتتأذين.
هي كامت وهو اجه تقدم ناحيتي، نزل راسه قريب وجهي ضيعت نفسي بعيونه للحظه ضعفت ونسيت كل شي قديم صار بينه بس صحاني من اوهامي صوته وهو يكول بنبرة حادة، نفس أسلوبه الجاف وتجريحه بأول يوم اجيت بيه لهنا من شهرين.
هَيْصَم: لتنسين نفسج ست، وجودج هنا فقط علمود ابني اللي ابطنج وراها ترجعين من نفس المزبله الرجعتج منها، اني مو نبي ولا أمام ماعندي فرص ثانية للخونة.
راد يعبر لزمته من قميصه كايله بهدوء.
فيروز: ماخنتك اقسم بذات الله ماخنتك أبداً كل اللي صار غصب عني والله العظيم.
خله ايده على أيدي مبعدها وتركني وطلع، حسيت انو خلص من صدك الفجوة الصارت مستحيل يجي يوم وتتصلح وهذا كله من أيدي بس شنو بيدي اسوي؟
محمد: حوري يا قوري كلبي وينج تعالي شوفي هاي بنتج شلون دمرت ملابسي.
حوري: انت يوميه بأسم جديد ساعة سركي ساعة قوري تريد تفتح بيه محل لو شنو فلمك؟
محمد: منو مدلعج مثلي؟
حوري: هيج دلع خايس ماريده، بعدين شبيها أقمار وتحجي عليها شوفها شلون عاقله وحلوه وتخبل.
محمد: اي عاقله كلش على امها.
حوري: خو على أبوها ليش أمها!!
محمد: اكلج كافي عليه دوخة المركز وسوالفه التعبانة لدوخيني زايد بشرفج.
حوري: اي صرت ادوخك هسه مو جنك اللي موتت نفسك علمود اقبل بيك وتزوجك.
محمد: غلطة.
حوري: هاااا؟
محمد: واحله غلطة يا اساس اغلاطي كلها وأساس فخري وانتصاري.
ابتسمت مستهزءة بيه خله ايده على عيونها واجه يمي خلاها بنصنه واخذ بوسه من خدي وغمزلي وراح للمرايه يعدل ملابسة، بنتي عمرها ثلاث سنوات ونص واحله شي صار بحياتي وجودها، صحيح محمد ممقصر ويايه بأي شي بس اغلب وقته بره يشتغل حتى من جنه مسافرين على رغم شكد لحت عمتي نبقى ومنروح لكن ابو راس المستطيل دك رجل، اجلت دراستي وهاي السنة راح اكمل واستمر بحياتي مثل قبل بعد مرجعة المياة المجاريها، تصالحت وي والدي ونسر بس بقيت ماروح الهم بشكل متواصل لان بعيونهم بعدني ذيج البنية الغلطانة اللي طلعت عن الطريق بدون إذن اهلها ونزلت راسهم،
كل هاي الأمور صارت ماضي واحنه ولد اليوم ولازم نستمر، تغيرت هوايه بطلت اصير الخاضعه إله وانفذ كل شي يكول عليه حتى لو جان خارج رغبتي صار إليه رأي وقرار، نتناقش ثنينه يلا نسوي اللي نريده، حياتي بأكملها تغيرت ويمكن الأرجح بهذا التغير لكبر عقلي واستيعابي للأمور، فهمت الحب ماتمشي فقط المشاعر وتخليه يستمر وانما يطلب الأمر جهد وعمل وتعب وسهر وطاقه، وتربيه الأولاد هم نفس الشي تتطلب هوايه تضحية اهمها دراستي علمود ابقى يمها واعتني بيها وما خليها تحتاج احد ماطول أمها موجودة وتشم الهوه، الحياة صعبة وماكو شي يصير مثل منريد بهواية من المرات مع هذا وي حبيبك وشريك حياتك لازم يكون التفاهم هو الأساس والا مستحيل تستمر الحياة بشكل طبيعي وتكدر تتحمل المصاعب اللي تمر عليك،
اتقرب مني وبيده الجنطة يريد يطلع للشغل خلاها على الأرض رافع أديه حاضن بيهم أديه، ابتسم بحنان كايل.
محمد: حبي الج يشبه حب الطفل لأمه شكد متعذبه وضربة ميكدر ينام اذا مو بحضنها.
ابتسمت بوجهه اتقرب مني حتى يقبلني من ابتعد حجيت بنفس نبرته قبل شوية.
حوري: وحبي الك حب الأم لابنها شكد ميوصخ وبيه قذارة تبقى تحبه وتحب ريحته.
عضني بزندي ضربته على ايده بكل قوتي واني أضحك رفع رأسه إليه كايل بعصبيه.
محمد: طايحة الحظ فوكاها تضحك الهايشه البقرة.
جاوبته واني أضحك بصوت عالي واني احرك بأيدي على مكان العضه.
حوري: تره نفسهن الهايشه والبقرة عود صاير ذكي براسي.
محمد: تحتاجين تربية من جديد الواضح اني هوايه هاملج ومخليج على مايج الفترة الفاتت بس وليهمج كدامنا وقت طويل واربيج بالطريقة اللي يحبها كلبج.
غمزتله واني اعض شفتي.
حوري: البسلك احمر وترضا عليه مو مشكله.
فتح عيونه بوجهي كايل بتساؤل ويأشر على نفسه.
محمد: قصدج انا ثور!!
حوري: هسه مو انت تكول اني بقرة شو مضجت شكو بيها لو صرت ثور غير مزوجني يعني اكيد ثنينه من نفس الصنف.
محمد: لا صدك والله مستهتره فد مره صرتي كله من وره يلدز وندر اربع وعشرين ساعة عينج بالتلفزيون وتابعين بالغضب، ما طيح حظنه غير المسلسلات التركية بعد فنج ديرين على اي قناة هيج تعرض حدج الشرقية وشرط نيوز.
حوري: صح كلامك علمود اتعلم شلون اموتك بطريقة رحيمة.
محمد: غفرانك ربي اروح اكابل ابو شوارب احسن ما ابقى هنا وسودن أكثر.
راح واني بقيت اباوع على ظهره ومبتسمه، تعودنا هيج كل يوم الصبح نتعارك بحب وبعد ميطلع بشوية يتصل بيه ويخلص الطريق كله يسولف وياي لمن يوصل لدوامه وبالليل نكون سمنه وعسل، دعيت ربي يحميه ويحفظه شويه ودك الموبايل قريت اسمه فتحت الخط وبدينا نسولف وهاي المره الحديث عقلاني مال عشاق يختلف عن حديثه قبل شويه، حمادي يختلف عن البقية بكل صفاته وهذا الشي ميزه بعيني وخلاني احبه أكثر.
كلاثم: وين مرتك يمه؟
هَيْصَم: بالبيت.
كلاثم: ليش هيج تسوي بنفسك وبيها؟ ليش متسامحها وتبدون صفحة جديدة وتنسى اللي صار، هي تحبك وانت تحبها ولتجذب وتكول لا مبين حبك من عيونك اللي دور عليها وحتى وهي مو هنا ومن تجيني دقيقتين ومتبقى بسرعة تطفر للبيت.
هَيْصَم: يمه، رجاءً لخاطري عندج عوفيني منها اجي يمج ارتاح وصفي بالي لتذكريها وتضوجيني.
كلاثم: هاي هي وليدي ماجيب سيرتها اهم شي ترتاح انت.
هَيْصَم: آمندا وين؟
كلاثم: بغرفتها وين تكون يعني من ذلك اليوم لليوم هي ساكنه بهاي الغرفة ومطفيه الكلوب ونايمة.
هَيْصَم: خابري خواتي كلهن وعزميهن يجن لهنا وخليهن يباتن يومين.
كلاثم: قصدك آريا وريهاف مو؟
هَيْصَم: اي خليهن يجن ويغيرن جو الها.
كلاثم: بس علمود يغيرن جو؟
هَيْصَم: قابل شريد منهن يعني؟
كلاثم: مادري كلبي يلعب.
هَيْصَم: خلي ياخذ أستراحة مره كبرتي مو زين عليج.
كلاثم: شنو رأيك تجيب مرتك تخليها يمنه؟
هَيْصَم: شنو رأيج تجين تكعدين يمها بالبيت؟
كلاثم: ليش ترجع سؤالي بسؤال؟ شكو بيها من تحجي مثل الأوادم؟
هَيْصَم: لأن أني مو آدمي.
كلاثم: شغيرك وليدي؟
هَيْصَم: تردين اكابلج ولطم وانتِ تتنحبين وننصب مأتم مالت عزا مو؟
كلاثم: شكو بيها من تحجي اللي بكلبك وتشاركني همك امك مو غريبة انا.
هَيْصَم: اطمأني ماعندي شي هي هاي الدنيا دوام الحال من المحال بيها.
كلاثم: من تضوج وتنقهر تروح لمنو اذا حتى مرتك بينك وبينها فجوة؟
هَيْصَم: ليش محسستني احنه تايهين بالدنيا وماكو رب يحكمنا ويشوفنا ويسمعنا؟ الله موجود، اللي كدر يطلعني من حزني قبل وخلاني اخذ ثاري مربع ومن عيون أعدائي يكدر يساعدني اليوم وبكل يوم، ما محتاج مره او صديق يطبطب عليه ويكلي اني يمك واسمعك واني عندي الله اكبر من الكل، ف اطمأني ابنج بأيد أمينه.
كلاثم: والنعم بالله، كل شي من ربنا حلو شنو مجان.
هَيْصَم: ما نخلقنا علمود نرتاح يمه، الدنيا هي هيج، ماكو صديق صدوق ولا اكو حبيب يبقى وياك لآخر لحظة، ولا ابن يعينك من يكبر.
كلاثم: ياريت لو كل الولد مثلك، تسع اشهر طلعت تعبهن بيك وزيادة هم، الله يحفظك وليدي ويخليك إليه ولخوانك وبيتك بحق الحبيب محمد وآل بيته.
هَيْصَم: ويحفظج النه يالغالية، هسه اني اترخص لازم اروح سلميلي عليها من تكعد من النوم وكليلها باجر امر عليها العصر حتى يكون عدها علم.
كلاثم: اكعدها تحجي وياها هسه؟
هَيْصَم: لا ماريد ازعجها خليها مرتاحة.
كلاثم: بحفظ الرحمن وليدي حبيبي.
: هذا طلع من البيت.
: راقبه ولتخلي ينتبه عليك.
: تأمر حضرتك.
: ههه مابقى شي وتلحك ابوك.
طلعت من البيت وصعدت بالسيارة مخططي اروح للمركز دخلت بين الافرع طريق مختصر ومابيه ازدحامات وصلت للشارع العام لان ماكو طريق ثاني يربطني بالمركز غير هذا الشارع، واني اسوق وعيني على الطريق صارت بوجهي سيارة سودة مضلله نزلوا منها ثنين مسلحين مخلين لثام على وجهّم ضحكت مستهزء بالوضع الأمني الفالت اللي يعيشه البلد حتى صاروا المجرمين ماخذين راحتهم لهاي الدرجة ويحاولون قتل الناس بالشارع بدون رقابه، وقفت السيارة اني اشوفهم همه ميشوفوني اتقربوا من عندي متفصلهم مسافة ربع متر أقل، قفلت بيبان السيارة ورثت الجكاره ساحب منها نفس، عليت صوت المسجل رجعت راسي على الكشن وبقيت اباوع عليهم شنو راح يسوون، واحد منهم صار ذكي وتقرب من السيارة، دك على الجامة اليمي عباله راح افتح الباب وكله حياك تفضل تعال موتني وخلي القصة تنتهي هنا، بعض الأحيان الغباء مالت المقابل يجبرك تضحك وانت مالك خلك، بقيت ادرس حركاتهم وأريد اشوف وين توصل هاي المهزله، هذا الواكف يم السياره مالتي أشر لذلك البعيد عنه بحركة طلع موبايله المقابل وتصل شويه بقى يسولف بالمكالمة وبعدين اشر للثاني اليمي راح ناحيته وصعدوا بالسيارة، شغلت سيارتي لأن اعرف عدل شنو راح يسوون ماتعبر عليه هيج أمور، أجوا ناحيتي كسرت عليهم وطلعت كبل لافو وتبعوني وصلت للشارع العام وضيعتهم بين السيارات ابتسمت واني اتذكر شنو صار قبل دقايق قليلة.
Flash back
غضنفر: سيارة سودة وراك.
هَيْصَم: مضلله؟
غضنفر: اكو ثنين وحده مضلله والثانية لا.
هَيْصَم: صار هوايه منازل للساحة خليني استمتع وياهم.
غضنفر: شوف اكو وأحد بيهم شاك بيه يكون من جماعته.
هَيْصَم: كلهم جماعته بس واحد يراقب والثاني يأدي العملية.
غضنفر: شلون عرفت؟
هَيْصَم: قبل ثلاث سنوات هيج صار من جنه نحارب الأسود.
غضنفر: الطرق هاي المره تختلف.
هَيْصَم: بس الهدف واحد، يردون موتي.
غضنفر: وموتهم يجي قبل.
هَيْصَم: حتى لو الموت مكتوبلي لازم اخذ ثاري بالأول منهم كلهم وهذا وعدي للمهنه الطاهره الموجود بيها.
غضنفر: علي وياك حبيب واني راح ابقى مراقبلك الوضع خليك على اتصال.
هَيْصَم: ماكو داعي اشوفك بالمركز.
وقفت السيارة نازل منها توقفت من سمعت صوته وراي التفتت إله.
محمد: حي الله الرائد.
هَيْصَم: يحيي أصلك.
محمد: مشتاقين وين هاي الغيبة؟
هَيْصَم: ردت اريحك مني كم يوم.
محمد: لا بالعكس غلطان انت بهذا التفكير اذا ماشوفك بالمركز ما ارتاح.
هَيْصَم: الحمدلله اللي خلاني سبب لراحتك.
محمد: على كل حال اريد احجي وياك بقضية مهمه حيل وجنت منتظر اشوفك علمود احجي بيها.
هَيْصَم: تعال للغرفة واحجي وياي مو هنا كدام الناس.
دخلنا جوه فتحت الباب وفتت وهو بصفي يمشي كعد مقابيلي وبده يسرد حديثة.
محمد: قبل شهر اجتني قضية بخصوص مسجون تم إلقاء القبض عليه بتهمة الترويج، رادوني استلمها وطلعة برائة توكلت بيها وبقيت ادرسها بشكل مكثف ودقيق كتشفت انو هو مورط لا أكثر إنسان بريئ تم تهديده وهذا شجعني اطلعه برائة لأن مظلوم بس اللي صار عكس كل الموضوع والمخطط مالتي، قبل يومين من المحكمة اجيت علمود التقي بيه سمعت من الحرس الواكف بالباب انو مات بلليلة الماضية، ماسكتت وحققت بالأمر الدكتور اللي لازم حالته يكول انو صارت بيه جلطة قلبيه.
هَيْصَم: ايي.
محمد: قبل يومين اجتني للمكتب بنيه عمرها يطلع بالعشرين اجت حجتلي الموضوع بالكامل شلون تورط وي واحد عصابجي وكلوله لو تاخذ التهمه انت عنا لو نساومك بنتك.
هَيْصَم: وبنته وين؟
محمد: عدها عمام كاعده يمهم.
هَيْصَم: شلونهم؟
محمد: مبينين خوش ناس لان عمها اللي جابها.
هَيْصَم: جيبها لهنا.
محمد: تعال انت الها.
هَيْصَم: حدد وياها موعد باجر بالاربعة العصر اني يمك بالمكتب.
محمد: اعتبره تم.
هَيْصَم: بعد عندك شي؟
محمد: اي.
هَيْصَم: وهو؟
محمد: متغير هواي عن آخر مره شفتك بيها.
هَيْصَم: ماكو انسان يبقى على حاله.
محمد: اتقبل كلامي، هذا التغيير وراه حزن جبير، طعنه جديدة هَيْصَم؟
هَيْصَم: مو رجال الما يتعرض للطعنات.
محمد: يعني هسه انا مو زلمه بنظرك؟
هَيْصَم: انت ادره بنفسك.
محمد: هههههههههههههه، اترك التدخين لتعود نفسك على عادة ما موجوده بيك بعدين يصير بيك مرض مو زين ومابيه حيل احضر فواتح ماعندي وقت.
هَيْصَم: خارج العائلة كلشي بحياة الهَيْصَم مؤقت اطمأن ماتحضر لفاتحتي، هاي اذا مامتت انت قبلي.
محمد: الحديث وياك ممتع اشوفك باجر ان شاء الله خلص وقت الزيارة.
هَيْصَم: صاير محترم زيادة عن اللزوم خوفتني عليك.
محمد: عندي مصلحة.
هَيْصَم: ماطول شي لخدمة أبناء بلدي ميحتاج تسوي وياي مصلحة اروح وياك حتى لو كان الطريق موت.
محمد: رائد شريف.
هَيْصَم: غصباً عليك.
محمد: يلا باي حبيبي.
هَيْصَم: انجب وطلع بره مو مرتك انا.
محمد: هههههههه، أعوذ بالله شجابك على حوري انت، جان طلكتك من ثاني يوم.
هَيْصَم: احمد ربك مية الف مره لأن عندك مرة متحملتك لهاي الدرجه والا انت منو يعاشرك.
محمد: تموت عليه وداعتك.
هَيْصَم: عميه غيره.
محمد: وأن شاء الله تبقى عميه طول العمر، ههههههه.
هَيْصَم: صاير سفيه هوايه.
محمد: الحياة بدون شويه سفاهه ماتنعاش الله وكيلك.
هَيْصَم: روح بابا روح واري شغل ودوختني انت وضيعت وقتي.
محمد: مع كامل حبي.
ضحكت عليه صاير فد مره الناس من تكبر تعقل الا محمد، فتحت الأوراق اراجع شنو موجود بيها بآخر فتره نطرق الباب كلت تفضل من ريحته عرفته منو بدون ما ارفع راسي.
لائِث: زعلان هَيْصَم؟
صعب أكدر اخليه بهيج موقف لأن اصلا اللي صار هاي الفترة محجيت بيه لأحد واعرف هو مجبور وما اجه وعلى كل حال اني ما زعلان من عنده بس مع هذا سلامته اهم، كل شخص يخصني هاي الفتره يكون معرض للخطر، ما اكدر اثق بأحد احتمال وارد جدا اكو كاميرات مراقبة هنا، دست على نفسي وكلت.
هَيْصَم: سيادتك لتكول هَيْصَم حاف احنه بالمركز مو بالشارع.
هزني كلامه وأثر بيه حيل بس شلون أفهمه اني مجبور؟
لائِث: اعرف الرسميات بس اللي واثق منه الأخوة مابينهم هاي الأمور واني وياك كبرنا ثنينه، اكلنا من نفس الماعون ولعبنا بنفس البيت بعد هاي السنين كلها وسفة هيج يصير بسبب شي مو بيدي جان ويمكن ماعرفه شنو، اذا قيمتي عندك هذا حجمها فقيمتك عندي مازالت نفسها ما بيوم تتغيير خليك واثق.
جانت يمي ورقه شلتها بأيدي وكتبت عليها جملة اخذتها وكمت انطيتهيا وباوعتله بأبتسامة، قراها وتغيرت ملامحه.
(اني وياك نبقى خوان لو كل العالم صارت أعدائنا، اشوفك ب12 بالليل بنفس مكانة )
لائِث: على دجلة ياقيس.
هَيْصَم: بعدين احجيلك الوضع مايسمح هسه.
طلع واني اعرفه هسه يريد يحضني من فرحته ذات شعوري لان مشتاقله حيل، اعتبره مثل زَيَّاف ويمكن مرات أعزه أكثر من عنده، بس الحياة مو دائماً تمشي مثل منريد ولازم تصير بعض الأمور اللي تعكر صفو العلاقات.
:مكان اظلم، أصوات قطرات المي اللي تسقط على الأرض بطريقة متتاليه مصدرة صوت مزعج ومرعب بنفس الوقت، ريحة المكان التشبه الرطوبة والعفن تخليني انجبر اخذ نفس حتى اعيش، خطوات قريبة وذات العطر اللي صارت نفسي تشمئز من عنده، عيوني اللي يحيط بيها السواد بسبب الغطا الموجود عليهن مانعني اشوف رعبي منو، اقترب مني هامس بأذني بذات النبرة اللي تأذي كلبي لدرجة لا توصف.
:العد التنازلي، وره هذا اليوم ما الج اي راحه بعد..
يتبع..
البارت 4132 كلمة..
مسائكم عافية أو ورد وجمال عليكم شمعات روحي،
التنزيل يحدده تفاعلكم ياحلوات وبنات التلي يعرفن شجاي احجي،
اي شي يخص القصة تعالوا يمي انستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!