لتنسون التعليق بين الفقرات والتصويت للبارت والمتابعه شمعاتي ❤️
هَيْصَم
(الكاتبة زهراء احمد)
______
يُدرك المرء أنه مُتعَب لكنه يجهل ما الذي يتعبه
إنها الهزائم المكبوتة •
_ مي زيادة
فزيت على صوت حركة قريبة مني فتحت عيوني مرعوبه صارت ايده على حلكي مانعني من النطق، الضوه مطفي والغرفة ظلمة رجفت اطرافي من الخوف بس من شميت العطر أخذت نفس، عرفته هو، بس شنو يسوي جاي لغرفتي نص الليل؟ سؤال دار بمخي للحظة حسيت اللي بينه راح ينصلح ونرجع أحباب مثل قبل بس خاب ظني كالعادة من كال وهو يمشي بإتجاه جرباية رويم.
هَيْصَم: اجيت اشوفها ارجعي نامي.
يانوم هذا اللي يزورني بعد مافززني والله يالله عباله كلها ماعدها كلب مثله، شفته نزل لمستواها بعد مشغل الفلاش مال الموبايل قبلها بجبينها وعدل غطاها وطلع بدون مايكول تصبحين على خير، من سمعت باب غرفته نسد كمت من مكاني رايحه للمطبخ شربت كلاص مي والنوم طار من عيوني كعدت على الكرسي وبالي سرح بعيد لأول مره عرفت بيها عندي عمام.
Flash back
هَيْصَم: اليوم بالمركز اجاني رجال جبير بالعمر يسأل عن ابوج الله يرحمه وبعد ما أخذت المعلومات الكامله مالته عرفته يقربكم، طلع عمج جاي يشوف شنو صار وي أخوة.
فيروز: عمي كلت!!
هَيْصَم: اي سمعتي صح عمج واسمه ابو رضا، اجه وياه ثنين.
فيروز: اي وشنو كتله؟
هَيْصَم: كتله وليهمك ندور عليهم ورجعلك خبر.
فيروز: ليش مكتله بالحقيقة؟
هَيْصَم: اني اعرف بيهم من زمان على حسب جنه ساكنين نفس المدينة لكن اعرف هم شرانين ويدورون العركة دواره لهذا السبب محجيت شي الهم لازم اتأكد من النية يلا.
فيروز: يعني شنو ممكن يردون؟
هَيْصَم: سالفة انو مايدرون بيه ميت هاي استبعدها، هم متأكدين انو مات لكن اني شاك بشغلة خليني اتأكد يلا اعرف شلون اشتغلهم عدل.
فيروز: يا شغلة؟
هَيْصَم: يردوج.
فيروز: ليش؟
هَيْصَم: ابوج اله حصه من الورث جدج من مات كتب بأسمه قطعة مال ارض بحكم الوصية ميكدرون يصرفون بيها وبما انو هو مات هسه انتقلت الج شرعاً كون امه وابوه ميتين قبلة وانتِ الوريث الشرعي الوحيد إله، هاي غير بيته والراتب مالته الصار بأسمج.
فيروز: بس الراتب من تزوجتك راح.
هَيْصَم: مايدرون مزوجة وأن دروا وقتها يخيروج بشغلتين اما تتنازلين عن حصتج من الميراث ويتركوج أو تنفصلين عني وبهاي يستفيدون براتبين، النفقة التندفعلج وراتب ابوج اليرجعلج كونج مو بذمة رجال.
فيروز: معقولة يفكرون بهاي الطريقة؟
هَيْصم: يفكرون ليش حتى ميفكرون، اصلاً هم تبروا من ابوج لأن تزوج وحده غريبة علمود الورث تخلوا عنه بس جدج تندم على فراش الموت وكتب بأسمه الأرض لهذا السبب هم يردوج هسه.
فيروز: وشلون عرفت هاي المعلومات انت؟
هَيْصَم: جنه نشتغل سوه أعتقد كايلج اني من زمان فهو حجالي كل شي غير اني جنت جبير من تزوج وتركهم وراح سكن غير مكان ومحد يعرف أرضه من سماه بآخر عملية النه سوه من اجيت اشتغل اهنا شفته صدفة اول مره بعدين صارت بينه عشرة وأن كانت لفترة بسيطة، تعرفت عليه من خلالها، يمكن اني الصديق الوحيد اللي وثق بيه وقتها.
فيروز: حرامات بعد اللي عاشه وحده من المعاناة هسه يدورون وراه ورث، شوف شلون الزمن حقير للأسف.
هَيْصَم: العلاقات اغلبها مصالح قليلة الأشخاص المرتبطين لله، لتضوجين وتفكرين بالموضوع يبقى هذا تخميني لا أكثر بعدني ما متأكد.
فيروز: اذا تأكدت تحجيلهم الحقيقة؟
هَيْصَم: اكيد قابل خايف منهم، اريدهم يجوني برجليهم حتى اطيح حظهم ثار اله وثار الج العافوج وحدج بدون سؤال.
فيروز: اني مامحتاجتهم هَيْصَم سواء وانت موجود بحياتي هسه أو قبلك من توفى والدي، عندي بيتي أو وظفيتي وراتب أبويه، عايشة معززة مكرمة والحمدلله.
هَيْصَم: مو بعدم الاحتياج وانما بالنكران علمود الفلوس، بفاتحته محد أجاه وذكره وهو عايش محد سأل عليه هسه من شمو خبر ميت أجوا حنو!! اريد اطيح حظهم على سوايتهم وياه وعلى الحياة الغريبة العاشها وهو عنده عشيرة تسد عين الشمس.
فيروز: العشيرة التحجي عليهم باعها كلها علمود امي وعلمودي وحتى قبل ميموت ماوصى احد بيه ولا عرفني بيهم حتى لأن يعرف نذالتهم كلهم، اني مكتفيه بحياتي وحابتها وياك أو وي بنتي، انتوا بيتي وعائلتي واقاربي وماريد غيركم.
هَيْصَم: ادوس اللي يحجي عليج كلمة ماتعجب، اني اجيبهم وطلعهم من بيتي فشلانين لتهتمين ابد وخلي راسج بارد.
فيروز: احبك.
هَيْصَم: اعشقج لَّباءَة الهَيْصَم أو وردة حياته انتِ.
ابتسمت على ذكرياتي وياه المليانه حب ولا مره اني وياه تعاركنا ودامت زعلتنا يوم ابدد دائماً نتناقش بأي مشكلة تصير ونحلها بوقتها واذا صادف طالع من البيت اما يتصل بيه لو اني اتصل بيه وينتهي الخلاف ومانرجع نفتح موضوعه ونكعد نعاتب، لان ثنينه عدنا قناعة تامة العمر مابيه رمشه بأي لحظة ممكن ينتهي فشنو معناها نبقى زعلانين على شي تافهه،
ضاعت ابتسامتي من فتح الباب اول مصارت عيني بعينه عقد حاجبه كايل وهو يمشي بإتجاه البراد مالت المي.
هَيْصَم: الساعة بالأربعة ليش بعدج كاعده؟
فيروز: مجايني نوم.
هَيْصَم: السهر مضر بالصحة.
فيروز: اسوء شي يصير اموت وعادي الله يرحمني مو اول وحدة ماتت ولا آخر وحدة هم.
هَيْصَم: تغيير حلو، بس خلي ابالج اذا صار بيج شي تجي وحده غيرج تربي رويم.
فيروز: الواضح والدي وحده اللي جان يحب من اعماقه.
هَيْصَم: اني مو ابوج.
فيروز: ولا راح تكون بيوم هو.
هَيْصَم: اذا عندج شي احجي لتخلي بكلبج.
فيروز: اذا ماعندك شي هنا ياريت تعوفني وحدي.
ابتسم ساحب الكرسي القريب عليه وكعد مكتف أديه لصدره مخلي كعب رجله على رجله الثانية من شفته هيج اني كمت سحبني من أيدي مرجعني لمكاني كايل.
هَيْصَم: ما اجيت علمود ترحين خليج كاعدة اريد اسولف وياج.
فيروز: واني ماعندي شي احجي بيه.
هَيْصَم: كلت اسولف ماكلت اريدج تحجين.
فيروز: واني ماريد اسمعك.
هَيْصَم: بس تسمعيني ماطول اني أريد.
فيروز: والله اذا تريد تحجي احجي اني ما امنعك لكن تنفيذ اللي تكوله يكون يمي والسما اقاربلك.
هَيْصَم: خليني احجي وعود كولي ماريد انفذ.
فيروز: تهددني؟
هَيْصَم: عادي مو اول مره اهددج اني.
فيروز: خلصني شنو تريد اريد أروح.
هَيْصَم: مترحين اريدج يمي.
رفعتله حاجبي بأبتسامه مستهزءة.
فيروز: شسوي بيه بلا يمك؟ اني الخاينة المصانت العشرة، والغدرتك والطعنتك والتركتك كدامها كلها ورحت للمزبله وعفتك بغصتك، شنو تسوي بيه؟
هَيْصَم: وجذبت بكلامي اني؟
فيروز: لا صادق بكل شي كلته اني الغلطانة اصلاً بكل الصار انت ماعندك اي ذنب أبد، ولهذا اكلك اللي بينه ينتهي بس اولد ابنك ماريدك تكون زوجي بعد اليوم.
هَيْصَم: متأكدة؟
فيروز: اي، اني ما احتاجك حتى اعيش ولا ردتك كوني اختنك من تكون بعيد، ولا عتذرت ولا بررت علمود اتوسل بيك حتى تبقى ويايه ومتتركني، اذا مفكر حبي ألك ضعف وتكدر تعاملني بيه بهاي الطريقة فأنت اكبر غلطان على الكوكب، اذا تريد تهدد بالاولاد أخذهم الك ماريدهم وربك يرجعها الك مضاعفه حرمان ام من أولادها، وإذا مفكر اروح لعمامي الرجعتني منهم فأنت هم غلطان عزيزي، بيت ابوي الطلعت منه ارجعله بكرامتي واشتغل وكدر اعيش بدون حتى ما أخذ منك دينار، اني فيروز هَيْصَم بدونك جنت عايشه وبدونك اعيش، وماكو واحد مات وره واحد.
هَيْصَم: حبيت هذا التغيير الصار فجأة.
فيروز: وما راح تشوف شي ثاني مني غير هيج، هاي المره اني الما اريدك مو العكس، هَيْصَم أفندي.
هَيْصَم: ههههههه، مفكرة يصير اللي تردي؟
فيروز: اذا تحب تخلي خاينة يمك فأنت حر، بس اني مابقى يم شخص طعني بشرفي ابداً.
هَيْصَم: انجبي، اني ماكلت خاينتني وي واحد اني كلت خنتي العشرة بطلعتج.
فيروز: الخيانه واحد عزيزي ماكو فرق بالثنين.
هَيْصَم: الواضح تردين حبس انتِ مثل بدايتنا سوه.
فيروز: هههه، هاي أديه احبسني وابنك بطني وكدام عيون بنتك.
هَيْصَم: تردين تحاربيني بنفس الطريقة؟
فيروز: هَيْصَم، خليها قاعدة بعقلك احنه النساء نعتذر، نبرر، نطلب الغفران وفتح صفحة جديدة، لكن من نشوف الصد من المقابل وعدم احترام لمشاعرنا نعبر ومن نعبر مانعبر مثلكم لااا احنه نترك بدون مانلتفت، لو جانت روحي بيك، ما ابقى وياك واني اشوف بنبرتك شوية اهانه وتجريح، ونطيت شهرين وكلت حقه مجروح مني واني غلطت بس خلص هاي هي، ما النه نصيب مع بعض وكل واحد يروح بطريق.
هَيْصَم: وبكيفج هي؟
فيروز: لا تنسى اني وياك طرف ثاني بالعلاقة وطرف مهم مو اي أحد عادي يعني رأي ينمشي بيه وبدون نقاش حتى.
هَيْصَم: حجيتي العندج وسمعت وهسه تسمعين العندي، واحد رويم كبرت وميصير تنام يمنه، ثنين من اليوم وهاي اللحظة تجين تنامين بالغرفة مالتنا، تلاثة والأهم موضوع الانفصال بيدي شوكت ماريد اسوي وماطول انتِ على ذمتي هسه مثل الحبابه تنفذين بدون كلمة، لتنسين هذا واجبج الشرعي اتجاهي كونج مازلتي مرتي.
فيروز: وحتى لو ادخل نار جهنم هم ما راح اسويها، ما اتشارك وياك مكان نطردت منه، كلامك مجان للحايط، دخل بنص كلبي وتربع بيه.
هَيْصَم: اني كلت العندي وانتِ حره بالتنفيذ.
تركني وحدي كاعده وطلع اني هم رحت للغرفة خليت أيدي على اليده اريد افتحه مينفتح، غمضت عيني بقلة حيله، يعني سوه هيج عناد بيه حتى اروح يمه او والله لو تبقى غرفته آخر مكان بالكوكب وأأمن مكان هم مادخللها هسه، رحت مددت على القنفة وغفيت ماحسيت على شي بعد.
كلاثم: آمندا ولج يمه تعالي انزلي خواتج اجني سلمي عليهن.
ريهاف: عوفيها نايمه خطيه.
آريا: شنو نايمه خلي تكوم تحضرنا غده شي ميته من الجوع.
كلاثم: ليش سوده عليه ميته من الجوع شنو مسوين عليج حصار بيت عيالج؟
آريا: لا والله بالعكس تريكت وجيت بس هسه جعت شسوي.
ريهاف: كومي المطبخ مو بعيد وسوي لنفسج شي مو خطار انتِ.
آريا: كافي طايح حظي من بيت العيال ترديني اطبخ هنا مايصير، راح اروح اكعدها واذا ماكعدت اشمر عليها دولكه مي.
كلاثم: وين صاعده دخيل ربج حامل انتِ تردين تموتينه وتبلينه.
آريا: بشنو ابليج غير هو ابني!!
كلاثم: من يصير بيج شي يطلع الوريث الوحيد لجلالة الملك اثبتي وكعدي مكانج اني اكوم اسوي غده.
ريهاف: لا وين رايحه اني اكوم بس ديري بالج على هَصَّار.
آمندا: اوكفي خليج يم ابنج اني رايحه اطبخ سم للخانم، تزوج وتجي يمي تبليني ماتبقين بيت رجلج اذا هيج ميته من الجوع.
كلاثم: اسم الله يمه شنو هل الحجي اختج هاي وحامل.
آمندا: وذا حامل اني شعليه بيها؟ لازم اخدمها يعني؟
ريهاف: شلونج آمندا؟
آمندا: عايشه.
آريا: شبيج خابصة نفسج هيج تره مالي علاقة بلي صار بيج.
آمندا: يمه سكتي بنتج تره والله انتحر بيها هسه.
آريا: صايرة عصابجية ما عرفناج هيج الخطف مسوي بيج لو الحب، ههه.
آمندا: عبالج اني مثلج دورين ختلات وي هَمْاس؟
كلاثم: لا قصرتن بنياتي قصرتن جان لازم وحده تجيب سجينه والثانيه قامه ويصير الحجي بالدم.
ريهاف: اسكتي آريا ولتزودين الطين بله تره مناقصيج احنه.
آمندا: يمه نطيني موبايلج اريد اخابر بيه.
كلاثم: بغرفتي تلكي.
آمندا: شكد راح يبقن هنا؟
كلاثم: يمه شهل الحجي عيب خواتج ذني.
آمندا: شكد تبقن خواتي العزيزات؟
ريهاف: ماكو داعي تحجين هيج اذا متردين تشوفينه هسه نروح المهم متضوجين.
آمندا: اني ماريد آريا خليها تروح وحدها ابقي انتِ.
آريا: ليش ماترديني؟ هههه اللي يسمعج يكول جايه لبيتج، شو هَيْصَم مشتري وأمي كاعدة بيه يعني بيت اهلي، اذا مو عاجبج تزوجي حبيب الكلب مو كتلتي روحج عليه وركصتي بالعقد لمن وكعت رجليج شنو منتظرة تزوجيه محد كلج ابقي على كلب الوالدة الله يحفظها وعظم بلعومنا كلما نجي بس تلغين زايد يكول ماكلين من بيتج.
آمندا: انتِ ليش مفكره الناس كلها مثلج بدون اخلاق؟ ياريت لو ما شاهده على وكفاتج بالمطبخ وغمزاتج لحبيب الكلب وكل شويه طلعتي بره بس علمود تصير الصدفة الهنديه وتشوفيه، عاد اني مو مثلج بعبايتي وحجابي نعجب بيه ودك بابي ومستعد يترك الدنيا والبيها بس علمود يتزوجني.
آريا: عاد متأكد منج لا، بقيتي سبوع يم واحد غريب.
بقيت جامدة بمكاني جنت متوقعة هاي الكلمة من الكل بس منها ما متوقعتها بسرعة راح عقلي لغضنفر هم راح يجي يوم ويكلي نفس الكلام سحبت نفسي بهدوء واسمع امي وريهاف يغلطن عليها ويحجن بس شنو الفايدة كلامها أذاني هوايه، أخذت الموبايل وتصلت بيه اول مسمعت صوته نزلت دمعتي وكلت بغصه.
آمندا: تستقبلون ضيف؟
هَيْصَم: انتِ الداخله واحنه الطالعين بعيونه نخليج بنيتي.
آمندا: راخ اتصل بغضنفر يجي يوصلني عادي؟
هَيْصَم: انطيني بس ساعتين واني اجيج اخذج.
آمندا: لا اريده هو علمود احجي وياه عندي موضوع خاص شويه.
هَيْصَم: عادي حبيبتي زوجج هو هسه اتصل بيه اخلي يمرلج.
آمندا: تمام اخذ راحتك خاف اخرتك عن شغلك.
هَيْصَم: الشغل واللي بالشغل يرحولج فدوة لتحجين هيج مره ثانية ازعل منج، شوكت متردين بس ارفعي الموبايل وحجي وياي.
آمندا: ربي يحفظك النه ويخليك حبيبي.
هَيْصَم: يلا بنيتي ديري بالج على نفسج.
آمندا: مع السلامة.
غلقت الخط ورحت للحمام أخذت دوش سريع ونشفت شعري وغيرت ملابسي ونزلت كلت لأمي رايحه يم بيت هَيْصَم اغير جو وراح يجي يوصلني غضنفر مكالت لا من سمعت الهورن طلعت، صعدت يمه بالصدر وهو حرك السيارة مانطق ولا حرف ولا اني هم، ردت اي حجه علمود احجي اللي بكلبي بعد ما اتحمل أكثر من هيج لأن راح انفجر، بلعت ريكي وكلت بهدوء.
آمندا: آسفة لأن تعبتك بس حسيت نفسي مخنوكه وردت اطلع.
غضنفر: راح اشمرج بنص الشارع.
آمندا: آسفة.
غضنفر: على شنو تعتذرين؟
آمندا: هيج بدون سبب اريد اعتذر منك.
غضنفر: راح اشمرج هاي المره من صدك.
آمندا: ليش؟
غضنفر: اني زوجج فبدون رسمية لخاطر شوارب هَيْصَم.
آمندا: غضنفر.
غضنفر: عيونه وكلبه وروحه ومعدته وكليته واعضاء جسمه كلها ادللي.
بقيت ساكته ماعرفت شنو احجي وجاوبه، بقينا شويه هيج الصمت يعم السيارة حتى قطعة كايل.
غضنفر: ليش خجلتي؟ احجي شنو الموضوع شنو ردتي تحجين؟
آمندا: ردت افهم منك شغلة بس هسه صارت مو مهمه انسى.
غضنفر: اكو احد مسمعج كلمة؟
آمندا: لا محد مسمعني شي، ليش؟
غضنفر: لأن هاي اول مره ترحين لبيت هَيْصَم تفاجأت.
آمندا: زوجته وحدها بالبيت وردت اروح اساعدها وهم اغير جو.
غضنفر: عين العقل زين ماسويتي.
آمندا: اريد اكلك شي.
غضنفر: اسمعج سولفي.
آمندا: اريد اروح لدكتوره نفسية اذا ماعندك مشكلة يعني.
غضنفر: ليش تكون عندي مشكلة بالعكس اني اشجعج تروحين، اعرف دكتورة اخت صديقي معروفة ومره جبيرة بالعمر متأكد تكدرين تاخذين راحتج وياها.
آمندا: أكدر اروحلها اليوم؟
غضنفر: لازم اتصل بيه وناخذ موعد منها اشوفهم بلكي يصير اليوم ترحين.
آمندا: ماعندك مشكلة؟
غضنفر: بالعكس اني اول واحد اشجعج على هاي الخطوة، تبقى المعالجة النفسية افضل بألف مره من اي شي ثاني، يرتاح كلبج وعقلج وافكارج تتوضح وتخلصين من الأمور السلبية بحياتج وتصيرين اقوة، لعلمج مره من المرات اخذت جلسة يمها، إنسانه لطيفة بكل معنى الكلمة ومتفهمه وعدها قدرة رهيبه بتوضيح الأفكار وترتيبها، بعد مجنت ضايع لكيت نفسي وياها.
آمندا: ليش ماخطبتها لعد؟
التفتلي، وهو مبتسم كال.
غضنفر: لأن هذا الكلب حب اخت هَيْصَم شيسوي بعد وغير هذا مزوجه وعدها ولد قريب من عمرج.
بتسمت دايره وجهي للجامه صافنه على الطريق، وصلنه للبيت نزلت انتظرني لمن دخلت يلا راح سلمت عليها ودخلت جوه جانت على ملامحها علامة تفاجئ الواضح هَيْصَم ما انطاها خبر.
آمندا: اعتذر لأن أجيت بدون ماكول بس صار كل شي صدفة.
بتسمت بوجهي كايله بهدوء، النبرة المتعودة عليها منها.
فيروز: لا يعمري على شنو تعتذرين البيت بيتج تنورين بأي وقت انتِ.
آمندا: رويم وين؟
فيروز: نايمة بالغرفة اذا تردين اكعدها الج.
آمندا: لا يروحي خليها نايمة بس لأن البيت هادئ فسألت عليها.
فيروز: لتتقيدين يمي اخذي راحتج والبيت بيتج تره.
آمندا: ربي يسلمج البيت عامر بأهله ان شاء الله.
فيروز: اكعدي خلي اجيبلج كلاص مي تشربي، اني مجهزة الغدة بس مهدره التمن دقايق ويكون جاهز حتى ناكل سوه، اي شي يعجبج موجود بالثلاجة وشنو تردين بس كولي اسوي الج.
آمندا: شكراً الج بس اني ماريد شي لتعبين نفسج.
فيروز: تعب شنو، شدتحجين عيوني اصلاً بالعكس والله بشوفتج حسيت البيت صارت بيه حياة.
راحت للمطبخ واني صفنت عليها شكد قهر من يكون الغريب حنين عليك ويحترمك أكثر من أهلك دمعت عيوني بس مسحتها بسرعة ماريدها تشوفني ضعيفة تحت أي ظرف كان.
حوري: اليوم حاول ترجع من وقت للبيت.
محمد: ليش مسويتلي مفاجأة؟
حوري: هسه انت شعليك المهم تعال من وقت وبس.
محمد: زين ماكو قبل ما اطلع منا منا؟
حوري: يعني شنو منا منا؟
محمد: ثولتها الفاهيه.
حوري: غير افهم عزيزي قصدك شنو؟
محمد: شبيج يعني اني زوجج شريد مثلاً تصنعيلي قمر صناعي!!
حوري: والله خوش فكرة بيها هوايه ربح بس منين نبدي؟
قاطعني ساحبني لحضنه كايل بصوت عذب يطرب حواسي كلها وياه.
محمد: أقمار تريد اخو يشيلها من ورانه.
حوري: ليش ميشيلها كدامنه؟
محمد: شوفي لاتصيرين ثوله فد مره اقصد بعد مانموت.
حوري: بهاي لتخاف عدها خوال وعمات هاي اذا متنه وهي صغيره واذا كبرت فتكون ان شاء الله بوقتها عدها عائلة وبيت ومتحتاج أخ بعيد عن كل هذا منو يكول الأخ اللي راح نجيبه الها يكون آدمي ويحافظ عليها يجوز هو السبب بتدمير حياتها.
محمد: صخمتيها ولطمتيها بعد.
حوري: ههههه، مو صخمتها ولطمتها بس هذا الواقع ولازم تفكر بكل الاحتمالات.
محمد: بعيد عن اقمار اريد اصير اب للمره الثانية، عاجبني نجيب طفل جديد.
حوري: بهاي لازم ندرس الموضوع من كل جهاته لان هاي السنة مثل ماتعرف اني طالبة وضيعت سنتين من حياتي ومستحيل اضيع هاي السنه هم، العمر ديمشي وماريد الفرصة تضيع.
محمد: متضيع اني وياج وامي وأبوي ليش مصعبة الموضوع؟
حوري: مو مصعبه بس حمل ودراسة ولتنسه أقمار هم يعني هي تصير الضغوطات من وحدها.
محمد: اني وياج متسوين شي بس تهتمين بدراستج وبس.
حوري: خلي على الأقل فد سنتين بعد بوقتها تكون أقمار كبرت وتكدر تعتمد على نفسها بهوايه أمور مو مثل هسه هي طفلة واجيب طفل ثاني هذا موت على قيد الحياة.
محمد: تمام مثل متردين.
حوري: حوحايتي لتزعل مني بس والله صعب الموضوع كلش بهاي الفترة.
محمد: متفهمج بدون متحجين شي لتهتمين، اني طالع عندي موعد وي هَيْصَم لازم اشوفه بالمكتب.
حوري: انتبه على نفسك وتصل بيه لتنسى.
محمد: اني اصلاً اخلص الطريق كله اسولف وياج وين لكيتيها مالت لتنسى؟
حوري: الذكرى تنفع المؤمن.
محمد: اكو وأحد ينسى نفسه بدون ملابس؟
حوري: شنو هذا المثل الغريب اكيد لا.
محمد: لعد شلون انساج يا فراش روحي وغطاها؟
حوري: انت تحطم الأرقام القياسية بالغزل الغريب.
محمد: احنه كل شي صار ويانه غريب مو بس الغزل.
حوري: يلا روح لتتأخر.
محمد: سامعة اغنية حسام الرسام؟
حوري: ما اسمع اغاني اني تعرفني قابل مثلك تغفه عليهن.
محمد: ميخالف اني اغنيها الج، يكول بوسني هنا وهنا بوسني على الخدين.
حوري: اي وشنو المطلوب هسه؟
محمد: بوسيني مو مرتين تلاثه، انطيني جزء من حقوقي قبل ما اطلع دكتورتي.
ضحكت على سوالفه ومطلع الا نفذ الأغنية وزاد عليها شويه من عنده، أخذت نفس عميق وبديت ارتب الغرفة، بالواقع الحياة الزوجية بيها هوايه مسؤوليات صعب أكدر اتهاون بوحده بيهن ويصير تقصير لأن ماعرفت انظم حياتي عدل، مو فقط محمد يريد طفل اني هم احب وتمنى يصير عندي ولد بس لو صار راح تزيد حياتي صعوبة وياه لأن احتاج هوايه وقت علمود اهتم بأولاد ثنين وبيت وعائلة وكلها بكفة ودراستي وتنظيم وقتها واني ماحب اعتمد على عمتي أبد لأن هي مره جبيرة تحتاج اللي يعتني بيها ويداريها مارجع اخبصها باطفال ودوخه وصياح، اليوم هو يزعل بس باجر يشكرني على كلامي وقراري المدروس.
هَيْصَم: شكد حلو من تجي على الوقت بدون تأخير.
محمد: اعذرني جنت أخوض نقاش مهم مع البيت.
هَيْصَم: سألت البلوك بيا لون تحب تصبغة؟
محمد: ميصير صبغ مباشر قبلها تخلي بورك.
هَيْصَم: ابو الصبغ اسمها مرتي مو بيت، ماتحجي وي طابوك انت بشر هاي.
محمد: اجيت اشوفك شنو تحجي، المهم عوفنه من كل هذا وتعال اريدك تشوفلي القضية وتدرسها بتفاصيلها.
هَيْصَم: البنيه شوكت تجي؟
محمد: شويه بعد مطول مستعجل يكول عندك شي.
هَيْصَم: اطمأن ماريد اخطبها.
محمد: شكو بيها تاخذ ثواب بيها والشرع حلل أربعة.
هَيْصَم: عفت الحلال الك ماريده، خلصني عندي شغل مهم ما ابقى مكابلك وكاعد.
محمد: شنو تشرب؟
هَيْصَم: ماريد شي تسلم.
محمد: لتخاف ماريد اخدرك وستغلك.
هَيْصَم: محمد ماعندي وقت.
محمد: عسى محد غيرك يكول اسمي.
هَيْصَم: وتالي؟
محمد: تشرب جاي اي اللي يدخنون يحبون الجاي، دلل هسه ادزلك على جاي بثخن شواربك يخبل.
هَيْصَم: كدامك ربع ساعة اذا ماشفتها اعوفك وطلع.
محمد: اهم شي لتعصب وسمعني، شوف اني شاك بعمها.
هَيْصَم: احجي كل شي تعرفه عنها.
محمد: عمها مبين عليه شراني وهي مبينه كلش فقيرة.
هَيْصَم: ماكو مره فقيرة كمل.
محمد: اني شاك مو عمها واصلا هي مو بنته.
هَيْصَم: وشلون شكيت؟
محمد: علاقتها واضحة مصلحة واتفاق.
هَيْصَم: من تجي خليها تدخل وحدها لتخلي عمها يجي وياها.
محمد: ليش؟
هَيْصَم: اسمع مني ونفذ.
دك الباب المساعد مالتي وكال اجت هي اشرتله يدخلها وحدها و هَيْصَم كام من مكانه وكف وره الباب اول مدخلت قفلة سمعت الصوت التفتت إله صفن بوجهه شويه وبتسم وكأن تذكر شي، حركته ماعجبتني والشك بأنو يعرفها تحول الحقيقة.
هَيْصَم: يا هلا ومرحب يا هلا.
: اني اجيت علمود قضيتي وي المحامي محمد مجنه متفقين تجيب ضابط، احنه مو بالسجن.
هَيْصَم: بس راح نصير إلين خانم.
إلين: تذكرني حضرتك.
هَيْصَم: احب الشغل على المكشوف حلو من تكونين شجاعة أو واضحة.
إلين: ماعندي شي اكوله واعتبرني ساحبة منك التوكيل بقضيتي، خليني اطلع وخر من الباب.
هَيْصَم: هو دخول الحمام زي خروجه يهانم، هههههه، اجيتي وجابج الله صارلي سنتين ادور عليج ضعتي وضاع الاتفاق وياج وهسه رجعتي ولازم يتنفذ الماكدرتي تنفذيه قبل وتنفذين بدون نقاش والا امحيج من الوجود كله.
إلين: تهددني كدام المحامي مالتي؟
محمد: اني لا اسمع لا أرى لا اتكلم بكيفك هَيْصَم سوي اللي تريده.
ألين: اشتكي عليكم والله، انتم حابسين بنية وحدها يمكم بالغرفة متخافون من الله والقانون انتوا أبد.
محمد: لتخافين من هاي الناحية مخلين كاميرات مراقبة بالغرفة، بعدين انتِ شايفه وجهج بالمرايه جنج قماش مغسول ومصفط.
هَيْصَم: اول مره تحجي شي بيه حظ عجبتني.
محمد: اني ناوي أعجبك منا وجاي هوايه.
هَيْصَم: يلا ست تفضلي وياي للمركز.
إلين: ما اروح ماعندك أمر إلقاء قبض بحقي.
هَيْصَم: محمد شنو رأيك اخذها لو لا؟
محمد: اخذها.
هَيْصَم: انتِ سجلج بعده مفتوح يعني بس اشوفج القي عليج القبض بدون أمر قضائي.
إلين: ماروح وعوف عمي وحده.
هَيْصَم: لتخافين تشوفيه بالمركز.
فتح الباب وصاح دخلوا مسلحين ثنين من الشرطة اخذوها وطلعوا وهي تصيح وتغلط معروف السان منو بدون ماكوله.
محمد: هَيْصَم ماشكيت ممكن يكون ملعوب اللي صار؟
هَيْصَم: مو شك وانما متأكد، خليني اروح وانت لطول تعال الزم قضيتها اريدها بعد يومين تطلع.
محمد: عندي قضايا هوايه ماكدر اجي اعذرني.
هَيْصَم: محمد.
محمد: دلل مسافة الطريق وتلكاني يمك.
رحت بسيارتي للمركز دخلت ورحت لغرفة التحقيق، اني مو محقق لكن اكو اشخاص لازم اشوفهم بنفسي حتى اتأكد يمشي كل شي حسب القانون خاصة إذا جانوا من ضمن المتورطين بالقضية اللي لازمها، جانت تماطل بالجواب تعبتني صرخت بيها.
هَيْصَم: عندج دقيقة وحق الخلقج وخلاج كدامي اسوي بيج فلم بس الله يدري بيه شنو، اركب عليج أربعة ارهاب وضيعج وره الشمس وتعرفيني شنو سويت بيج من قبل ومستعد اسوي بيج اسوء، انزع اخلاقي من يكون الموضوع بيه تستر عن ترويج بالبشر والارواح وصير مفترس وطيح حظج وانسى شي اسمه احترام الأنثى لأن المره الشريفه والعفيفه والتستحق الستر والتقدير ماتمشي بهذا الطريق، شايفه اللي بره؟ وحق ربج اخليهم يضربوج بطريقة مايبقى مكان بيج سالم فاحجي وكفي الشر احسن متشوفين شي يعجبج.
إلين: ماعندي شي اكوله.
هَيْصَم: شوف شغلك ميثم طلعتي من أيدي بعد.
رفع ردانه وتقدم منها يريد يضربها صاحت.
إلين: احجي والله احجي بس لتشوه وجهي.
سحبت الكرسي وحجيت.
هَيْصَم: غردي يلا اسمع.
إلين: امي جانت محتاجة عملية زراعة كلى، تفقوا وياي ينطوني مبلغ ويدبرولي كلية سليمة علمود عمليتها مقابل اسوي هيج، وماعرف السبب.
هَيْصَم: واللي ماخذ دور عمج منو؟
إلين: ماعرفه كلولي يجيج واحد ومشي وراه واني سويت مثل ميردون بدون مانطق حرف وهذا جان من ضمن الأتفاق.
هَيْصَم: وين جنتي هاي الفترة وليش رحتي بدون متنفذين اللي كلته؟
إلين: بعد ما مات كهيل ماكدرت استمر بالعمل وأخذت امي وشردت لغير مكان بس هسه رجعت علمود الشغله اللي نطوني اياها.
هَيْصَم: شلون وصلولج؟
إلين: عن طريق واحد اسمه مختار.
هَيْصَم: منو هذا؟
إلين: هذا شخص عندي علاقة شخصية بيه.
هَيْصَم: شلون يعني علاقه شخصية؟
إلين: صديقي، هو اللي يساعدني بتدبير شغل علمود مصرفي.
هَيْصَم: ماتركتي شغلج؟
إلين: ماعندي شغل غيره دورت هوايه ومالكيت وأمي تحتاج علاج واكل صحي ومنين اجيب؟
هَيْصَم: ومن توكليها حرام ترجع صحتها يعني؟
إلين: الناس البره وحوش محد ينطي شي بدون مقابل.
هَيْصَم: اريد عنوانه الكامل ورقم موبايله هسه تتصلين بيه وتحددين وياه موعد.
إلين: مايجي هيج وقت.
هَيْصَم: ليش؟
إلين: لأن هيج ايام زوجته تكون بالبيت.
هَيْصَم: شنو شغلها؟
إلين: دكتوره، يجيني بالأيام اللي يكون عدها خفر.
هَيْصَم: عنده أولاد؟
إلين: ثنين بس كبار عادي يعوفهم ويجيني بس هو يخاف من مرته يغلق موبايله من تكون موجوده حتى متشك بيه.
هَيْصَم: اكيد هو حاجيلج تفاصيل عملها.
إلين: اي، يكول هي قيادية وبنفس الوقت تفكر بالسمعة وماتريد ولدها يتأذون لأن تعرفه يدور هاي السوالف، هي اللي تصرف عليه وتنطي فلوس من راتبها، بين قوسين هي معيشته لهذا السبب يخاف يخسرها حيل لأن اهلها معروفين ويكدرون يورطوه بدقيقة بقضية مايطلع منها لو يموت.
هَيْصَم: اذا زوجته تصرف عليه شلون يصرف عليج؟
إلين: هو يجيبلي شغل يكلي هاي مساعدتي الج.
هَيْصَم: مسوي فضل كثر خيره، المهم اريد اسمها الكامل ورقم موبايله تكتبيه هنا.
أخذت اسمها بحثنه عليه طلعت المعلومات الكامله مالتها، بعد مكالت مكان المستشفى اتصلت بالمدير اعرفه جاوبني وكتله يخابرها يردوها ضروري يمهم غلقت ورحت يمها.
هَيْصَم: خابري وفتحي سبيكر كليله اني واكفة يم الصيدلانية الفلانية...... وطلعت ناسيه فلوسي بالبيت وماكدر اصعد تكسي اخاف والدنيا صارت ليل، العبي بطريقتج المهم يجي، اذا غلطتي بحرف انتٍ تضيعين بيها.
خابرته وهو حن عليها عراقي دمه حار يحب المساعدة الغيره منعته يبقى ساكت وكاعد بمكانه، أشرت لفريقي نطلع وهي اخذوها للحبس لأن ملفها منغلق وهوايه راح تفيديني.
هَيْصَم: هَمْاس اخذ القيادة انت و لائِث، وانت ضَرْضَم وهَمْهَام كونوا فريقين واحد راح يراقب وياخذ الاستعداد والثاني يكون محاوط الصيدليه بس ينزل علمود يحجي وياها تروحون تعتقلوه.
الينار: سيدي جاهزة.
هَيْصَم: اخذي حذرج ماريده يكشفج مو إلين.
الينار: اطمأن سيدي أخذت احتياطي.
انطلقنا اني والفريق للمكان المحدد اول ماجه نزل من سيارته راح باتجاهها، اني شفت صورته بموبايل إلين ونطيتها للولد، هدفي ما اجيبها وياي خاف تسوي حركة وتساعده، فأول ما شفته عرفته انطيت اشاره القوا عليه القبض بهدوء ورجعنا للمركز.
هَيْصَم: سولف.
مختار: انت معتقلني واني بريئ ماعندي شي اسولفه.
هَيْصَم: نعمان منو؟
مختار: ماعرفه.
هَيْصَم: منو راد ينطيها الكلى لإلين؟
مختار: ماعرف.
هَيْصَم: منو الشخص الماتريد تعترف عليه؟
مختار: لتعب نفسك مراح تاخذ مني حرف.
هَيْصَم: ميثم يمك ساعة اريده يصيح مثل الديج بكل شي يعرفة.
ميثم: تأمر سيدي.
:عيونه حمر، بيها ظلام غريب، وجهه نصه مغطيه، اكو وشم سيف وكلمة بلغة ما اعرفها على أيده، سلسلة لازمها وعطر نسائي يفوح منه عطر مو غريب شامته من قبل بس ناسيه وين، يمشي بدون وعي ولا وجهه، ضايع بس بداخله حقد ما معروف سببه شنو، قترب مني فتح شالي واني احرك براسي بمعنى لا لأن اكو لاصق على حلكي يمنعني من الكلام، نثر شعري بأيده رفعة يشمه وبتعد شويه عني مطلع من جيبه ابره يريد يضربني...
يتبع..
البارت 4155 كلمة..
مزعليني هوايه شمعاتي بتفاعلكم تردون ادخل مهيائيل بالقضية👻..
مسائكم عافية وخير وسعادة يارب..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!