رواية قاع الشياطين الفصل الخامس والثلاثون 35 - بقلم اسماء ديمير

.....................☆البارت الثلاثون  ☆..................

#قاع_الشياطين(البصر والبصيره)

#بقلم_أسماء_ديمير

حجه بيبر اسم الله حبيبي شبيج ..

غمضت عيوني ارجف شكوو شنو هالصوت ..

رد عليه برود :-عواد ..

-بلعت ريك شبي ..

- كاتله جلب بنص شارع وميت  ..

-دنجت راسي لزمته باديه شبي اخوك ويه الجلاب متكلي ..

-عوفينه منه ،

- وين لاكي للجلب بهل اليل .

- يامكثر الجلاب تلكي ماشافه و ساحكه بالسياره نامي يله تعاي .. تعاي دنام تعبان وباجر وراي كعده من صبح ، 

-نمت بحظنه ، بس عيوني مفتحته ماغمضت ، حاله حال جلبي دفنه يم شط ، عمه بعينك كون ياعواد ، بس اذيه والله ..

غفيت بمكاني واني افكر بهل حيوان المسكين ، كعدت صبح على صوت و سن بالبيت و سطله مسح تشحط بيها ..

غسلت وجهي و لبست و طلعت عليهم ، صبحت عليها ردت من وره خشمها عليه ، عقدت حواجبي اضوج من نبره صوتها وياي ..

بس ماحجيت ، حجيت سويلي ريوك بلا زحمه ام حمد ، ردت اخلص مسح بالاول .. 

-لفيت اديه على جسمي ام حمد ..

-ردت وهيه تشتغل وتلهث هاا ..

-عندج شي يمي اسلوبج ابد مو حلو وياي ..

-ليش شبيه وياج قابل ، فتحت عيوني ، حجيت تحجين وياي بجفى ضايجه مني شي اسلوبج من تحجين وياي مو مثل ماتحجين ويه ديما ..

سكتت بعدين حجت ، هذا كله علمود الريوك اسوي هسه عيوني ، مشت تسوي حجيت تعاي كملي شغلج ام حمد ماريد ..

عفتها و مشيت فتحت باب السلايد الزجاجيه مال الصاله الي اطل على الحديقه ، حجيت منا وهيج قبل لاتنظفين افتحيها اذا متصير زحمه…

نانه جانت قبل هيج اسوي ..

-ردت مادامها هيج شغلها يعجبج خلي ترجع تشتغل ليش تاخذ راتب وهيه كاعده بالبيت ، درت وجهي على مصدر صوتها وصفنت بيها ، حجيت متعبج الشغل ام حمد ..

-ردت لا على شنو هنه مسحات و تركيب ..

-شنو علتج لعد ..

-سلامتج .. ضليت مزعوجه حيل وباين على ملامحي بس سكتت ، جريت نفس طلعت بره للحديقه ضايجه ، 

اسمع صوت ابو حمد و صوت رشك ماي ، حجيت ابو حمد ..

-رد ها ياابه تردين شي ..

-ابتسمت صباح الخير ، 

-تقرب عليه صباح النور ،

- مرتك زعلانه شبيها ..

-ضحك عقل نسوان يابه ..

-ترى من ظمن النسوان اني ..

-حشاج يابه بس تعبانه من البنات والولد ..

-الله يحفظهم ، تتريك ..

-متريك بس اذا تردين اتريك وياج ..

-زين بس انته تسوي ريوك مرتك ضايجه واخاف اطلب منها ..

-تدللي عمي من عيوني ، مشيت وياه للمطبخ من باب الثانيه ، اشتم ريحه غريبه ..

ريحه زفر قويه حيل ، عفست وجهي ،  حجه ديربالج جواج ، ماي ودم ..

-رديت شنو دم ..

-حجه من صندوك الشياره مال الاستاذ عواد داعمله جلب و صندوك فايض دم ، دزو عليه انظفه السياره ويراد هم اخذها للفيتر واجهتها متفلشه ..

وكفت يم السياره ، جسمي كزبر ، حجيت شكبره هالجلب هذا ..

-رد مادري والله بس،باين جبير ، لان دمايته مفيضه السياره ، 

هزيت راسي واني لعبانه روحي اريد اتقيئ ، 

بس دخلت للمطبخ هو كعد يسوي ريوك ، طكله بيض و ستكان جاي وكعدنه ناكل ، سالته على بناته واولاده ..

مايحجي عن ضيق الحال كل حجايه وكال الحمدالله ، الحلو بالفقير الحال يحمد ربه هواي ، رغم الضروف رغم التعب بس شاكر ربه ..

-ابنك شلونه ..

-مداري اني وامه وخواته وعايش ..

-مايدرس ..

-درس لحد ثالث ابتداىي و تعبته كلياته وكعدهيه كعده بالفراش ..

-دتراجع عليه ..

-نراجع يبه بس نفس الحجي غسل كليه كل فتره ، 

-جريت نفس ، الله يعينكم ، 

كملو وراحو توه طلعو ودخلت ديما وياها ابنها ، حجيت شلونج ديما ، ردت بتعب زينه وانتي..

-.ابتسمت اشتاقيتلج.. حظنتها بوستها ، اجت ايدي على معصمها ، تحسيت ملفوف بلفاف .. شهكت من لزمته ..

حجيت شبيك ..

- مابيه ..

- ايدج شبيها عزاا

- احتركت ،

صفنت بيها شحركج هاا ،

تعبانه لاسالين ...

سكتت، ابنها بجه ، حجت اروح انومه ..

عافتني وراحت ، احسها باهته وتعبانه حيل ، ماعدها ذيج الحيويه ، 

درت ظهري ورجعت للصاله .. راسلتني تالا حجت خلصت الامتحانات ، واريد هديه اذا نجحت ..

-ابتسمت كولي ويجرالج ..

-اروح لاربيل يم خالتي ام هبه ..

-منو ياخذج …

-اي واحد ..

-سكتت ..

-شكلتي مو وعدتيني بهديه ..

-اشوفلج بيبر عود خلي يوصي واحد من الولد ياخذج ..

-لوحدي ..

-وياج اسامه..

-اوو ماخذتلي زعطوط ..

-ماكدر ادز وياج نانه خاف احتاجها لو تاخذين اسامه لو ساري .

-ردت لا عوذه ماريد جلب ساري ..

-بكيفج ..

سديته منها ، فكرت بشار ، امن بشار اكثر ، ستار ماحبه و دانيال واحد فاكس ، ماضل شي وتطلع نتيجه مالتها و عود اخلي بيبر يكول لبشار ياخذها .. هم تغير جو وهم اوفى بكلمتي وياها.. 

تالا …

الحُسنُ يبْعَثُ فِي الأروَاحِ بَهجتهَا

 وَسَهمُ حُسنكِ في الأحشَاءِ قتَّالُ …

استمريت ايام افكر بابو عيون ملونه ، من داومت كعدت رنا تكلي راسلته ومارد جنه ثكيل ..

ابتسمت يمكن ..

بس والله يجنن وعنده اخت اصغر منه ثانوي ..

-شداراج ولج .

-بحثت عنه بالفيس طلعت منشورات مال قبل ست سنوات ، ابو متوفي بنفجار ، وعايش هو وامه واخته بالكراده  ..

-حلو حلوو متعبه نفسج والله ..

-شعبالج ، حجت وفاء امتحانات على الابواب اجلن هسوالف لبعدين ..

-ردت رنا شو حيري برجلج انتي عوفينه احنه ، شو هنيالج عندج رجال يوميه مدثره بحظنه ..

-فرت اديها وفاء والله بطرانه انتي شنو عبالج نومه ويه رجال هينه والله تموت ، خاصه اذا جسمج ناعم تموتين الم ..

-اووف هنيالي على الالم ..

ضحكت اني ، وفاء حجت هاي تحجين هيج لان ممجربه والله احسدجن على حياتجن شنو حياتي اني ياكال رجال يا العيال دباعي وجهي شلون مصفر حتى بطني مالحكت اشبعها شغل بيت ودراسه وبتالي اليل يجي رجال يريد نوم ..

ومن اكله تعبانه يكلشي شعندج شو كله بالبيت اكل ونوم ..

سكتت اني اتامل كلامها ، انقهرت عليها بس ثواني ماطولت وفرت عقلي رنا بكلامها ..

حجت رنا بثقه :- بطلي من المدرسه وتفرغي لرجلج لبس ومكياج ونوم وادلل رجلي شسوين بالمدرسه ..

-ردت فاء ليش هيه حياه بس نوم .

-اي والله بس نوم شحلاها من ينومني بحظنه بتوالي اليل و يبوس بيه ……..

فتحت عيوني وهيه تحجي بالقلم العريض حتى وفاء وجها انطعن احمر اني اضحك واسمع ، متحمسه اعرف بعد ، اول مره واحد يحجي بهيج سوالف بقلم العريض ..

-وفاء  ترد ترى عيب والله جاي تحجين انتي مو هاي تالا كاعده نوب ممزوجات شهل تفكير والله يالله .. 

من تزوجين وتشوفين رجال وسوالفه وياج تتفلين على نفسج كل يوم الصبح ..

ردت رنا تضحك :- دخل يجي على ماتفلت على***

-اني وكعت على صفحتي اضحك .. وفاء غمتنه وكامت ، تقربت منها احجي بعد عليج الله منين عرفتي هالسوالف ..

-من حبيبي ولج ، اساله هو يجاوب ..

-ياا بس امبين صغير شعرفه .

-يا ولج مو ***

-هذا سايق مال الخط مالته ..

-كعدت عدل يا ولج ثائر مو مزوج شجابج عليه .

-هههه امبين مرته مشابعته و لفت عليه واجه للدرب صار شهرين مدافعه فلوس الخط يكلي فدوه الج ، وابويا ينطيهم الي منا اخذهم اشتري بيهم رصيد منا ..

-يا فلك طرج كون ، 

-اي والله نتونس يمعوده  ذاك اليوم عزمني على كوفي ونركيله ..

-ياكوفي ..

-ذاك الي براس شارع ..

-ورحتي وياه ..

-شوي ورجعنه .

-مو بس شباب ..

-عادي لو كلها تتفرج علينه وتصافر وتضحك بس تونست والله وشباب كلها فاكه حلكها عليه ، متت ضحك ..

-يما منج يارنا لج شلون امنتي لو معتدين عليج لو مصوريج ..

-لا لبست حجاب ونزلت كذلتي محسبه هيج شي ، وامن بثائر مايسويها يخاف عليه .

-لو يخاف عليج صدك ميدخلك بكوفي بس شباب .

-كوفي مال ابن عمه صعدنه بطابق الثاني احنه مايمنه احد لوحدنا ..

لزمت كلبي :- يما من يمي خفت ..

-لاتخافين ونسه وربي ، سويها انتي هم تشجعي ..

-ويه منو يحضي ..

-اي واحد ..

سكتت صافنه .

-لزمت ايدي ولج شنو من شعور اطيرين بالسما ..

-بس وفاء كال … قاطعتني هاي وفاء نحسه تريد الخير بس الها يمعوده لو صدك كلامها جان تطلكت ، لو مارايده رجلها مو فلفت عليها وعمرها توه ١٤ ومزوجه ..

-مو كالت ابن عمها ، ومرت ابوها زوجتها اله ..

-اطير عيون وربج  ، دجربي هالاحساس تدمنين عليه بس ديربالج هااا مو تفلتيها وتسلمين الاول وتالي و نوب تنفضحين ..

-ابتسمت هو وينه يحظي ..

-ضحكت يجي يجي لاتستعجلين  ..

واستمرت نصائح رنا ، لحد ماقنعت بحجيها وشفت عادي مغامره حلوه اجربها  ماضر ...

وخاصه بعد ماشفت ربع بنات المدرسه هيج ، ماريد اظلم واكول كلها لا اكثر من ٢٠ بالميه بالمدارس مصاحبات ..

وعدهم موبايلات ، وخاصه من ادخل الحمامات اسمع اصوات والمكالمات لا ممكن بنت بيت واخلاق تتلفضها ، من عدا جكاير و الحف هاي بسيطه ..

بس صداقات وعلاقات الحب كلش عادي ، طبيعي انو اشوف بنت تنزل من سياره حبيبها ..

مثل رنا تجي بسيارته وتطلع بسيارته ، وثاني يوم تجي اشوفني صدرها شلون مطكع ، 

وفاء ابد ما رضت بس سكتت ، فد يوم كاعدات بالصف ويمنه مدرسه الانكليزي ، اشرتلي رنا جوه رجله و دنجت راسي اشوف ..

وفاء كاعده بينه دغتني اكعدي لا تنتبه المدرسه ضحكت ، دنجت راسي رنا اشوف شكوو .. لان رنارافعه صدريتها من جوه ومطلعه زرورها تشوفنه وبيهن اثرات حمر  ..

ضحكت اني بفطاره ،  وفاء فتحت عيونها شهكت ، رنا كرصت وفاء حيل وذيج صاحت  اااه  ، التفتت مدرسه وحجت ووجع شهل صوت ..

التفتت على رنا  نترت بيها ، شبيجن وسم  ..

- هاي منو طلعت هالصوت ، رنا ردت وفاء ست …

التفتت عليها المدرسه وحجت وسم ادب سزز شهل الاخلاق ، وفاء وجها انطعن احمر خطيه ..

مدت ايدها تمسح وجها من فشله ، والله هذا الموقف مانسيته ابد حتى كلماتها انحفرت براسي ونبره صوتها ،

ردت المدرسه وهيه تشوف الحلقه بيد وفاء :-  هي هييي نوب مزوجه بعد بعد ..

هو انتن اصلا المزوجات شسون بالمدرسه هااا ، مو تزوجتن شلجن بالدوام وشهاده بعد ...

المزوجات مثل بؤره الفساد بالمدرسه ماعرف شلون يخلون المزوجات ويقببلوهن بالمدارس الثانويه ويه هذني الاطفال ، 

عمي انتن فسدت البنات العالم بسوالفجن ، خربتن اخلاقهن ، انوب تتوهوه علينه هنااا ..

لو ازوج و ابطل واكعد بالبيت وافضل الزواج على المدرسه ، لو اكعد ادرس وانجب شلجن بزواج وحدتج مفلفه على زلمه ..

سكتت وفاء مدمعه ومنزله راسها رنا مدنجه تضحك ، بهت وجهي انقهرت عليها ، دارت وجها المدرسه تكمل شرح وعصبيه ودردم ..

صدك اكو كم طالبه مزوجه ويانه بالمدرسه بس قسم بالله الواحد يحجي ضميره ماكو الطف واجمل واخلاق اكثر منهن ، عكس بعض الطالبات مثل رنا تودي مثل وفاء للشط وترجعها عطشانه ..

حق ينخاف على وفاء من امثال رنا مو يخافون من وفاء علينه ..

عشت بمجتمع منقسم ، ضالم ، تفكيره مريض ..

المزوجه مضطهده وماكول حقها و شايله هم من صغرها ، ومثل وفاء عايشه حياتها زومحد كاللها على عينج حاجب ..

ومدرسه مربيه للاجيال تشجع على ترك المدرسه و تشجع المزوجات بترك احلامهن وطموحاتهن لان بنظرها الحياه يا اما زواج او شهاده مالازم نحقق كلشي بهل حياه ..

افتهمت وعيت على هالامور بس بعديش ،،،

اخذني روج الطيش والمغامرات بذاك الوكت ..

كل مااسال رنا رد دانيال عليج :- تكلي لا لابسنه ابو عيون حراكه ..

قبل الامتحانات بكم يوم سوو كعده شباب ، بالحديقه قريب النافوره ..

مشوين حلفه شوي ، شميت ريحه وفرفح كلبي عليه ..

صعدت فوك بالسطح ، اسمع لاغانيهم اغلبها حزينه جنهم ارامل ، حسام الرسام ..

حبنا ورد و زرعنا يانورا ..

وبدموعنا سكينا يانورا ..

ليش بعجل بعتيني يانوره و انتي اسنيني ..

يانوووره يااانووووره ...

واكف بشار يشوي ومنطيهم ظهره ويهز بخلفيته باتجاهم  ..

اخذت كتبي وصعدت بحجه اقره ، ساري هم قافل باب صاله عليه و بحجه ديقره ..

هو جذاب ديراسل بيه ، سحبت نفسي منه هو لزك عجبتني ساللفه اغلس عليه هو يتوسل بيه دزيلي صور لو بصمه صوت ..

ذبيت الجهاز على صفحه وركزت بابو فالينه بيضه ربع اردان الي حاظنته حظن ، احلاهم والله هو ..

مرجع ظهره ليوره ورافع تك رجل على طبه و يصفك لبشار الي يركص .

ماكو ثواني وطبكت سياره عواد نزلن منها اثنين بنات بس يااا شنو هذني عود لابسات عبي مدري بشت بس مفتوح من تمشي يطير ويطلع البحابيش كلها ..

وحدتهن الفالينه طافره وطالعه صره وبطرون مشكك ، و ثانيه لابسه فستان بينصل فوك ركبه وصدرها هالكبر ،  واكع لحد صرتها بنت الذينه ..

ياا هذا صدرها حقيقي ، دنجت راسي على جسمي ،  لزمت صدري ليش هو اني عندي صدر لا والله ماعدي  جريت فاليتني من يم زيكي اشوفه ، ياااا شو صغير عود ليش مو مثل ذني ..

رفعت نظري اشوف الله شخالق من بلاوي سوده  ، فكيت عيوني  حيل و تقدمت اشوف ، مكياج من بعد كم متر امبين يضوي ضوو من عدا الاضائه تكول مطمسيها بالمع ومطلعيها ..

ركض ستار جاب ديجي و شغله وغير الاغنيه ، و هذني عبالك يعرفن شغلهن كامن بسرعه ، شمرن العبي على صفحه ..

عواد وكف يكط اصبع الهن ، استغفرالله يربي شنو هاي ، تهز هز وكانو ماعدها عظام بجسمها بس شحم ، نوب خصرها هالكدودته و طي** تكول ليه مال طلي اوربي هالكبر تهتز …

شو هاي ام بنطرون جن تحمست زياده تنحت ونطتهن خلفيتها و تهز بخلفيتها حيل بوجهم ، جنها غساله عطلانه مابيها بريك ..

وكفت سويت مثلها شبيه اتعلم قابل احسن مني هنه ، شو يكرم الله بس  تنحت ملت يمنه ويسره مرتين  طك ظهري ، عبالك انكسر ، لزمت ظهري عطت يماااي انشليت ياابويا  راحت بتك .. 

وكعت بالارض لازمه خلفيتي اشتغل ابيج بت جلب هاي شلون سويتها .  

ام بينصل تهز بشعرها ، اشوف ابو عيون حلوه مد ايده عليها يتلمسها ، رفعت حواجبي اي بالله استمر دشوف اخلاقك فوك شربك يعني ، يكرم الله لزم ص** يمرد بي عبالك طوبه مال ضغط ..

جتفت اديه رافعه حواجبي تكلي رنا ثكيل ياثكيل خفتك بخفه العصفور يالفاكس، 

دعيت طلي اني من النعاس و هذول بعدهم يشربون يركصون ، عواد جر ام بنطرون ودخل جوه ، وضل هاي ام بينصل ..

طفيت كلش متت نعاس وهذول بعدهم غير اعرف ام بينصل وين يصفى مصيرها حتى اطمن عليها ..

غفيت بمكاني ، ماعرف شكد مر وقت بس، حسيت على نفسي نايمه بالسطح ..
كمت اثاوب لميت غراضي دانزل ، رفعت راسي اشوف وينهم ..

ضال بس دانيال نايم بالحديقه على التخم ..

ابتسمت براحه  .. ومقابيله بشار  هم نايم .. و ستار وعواد ماكو ..

نزلت كملت نومتي بالغرفه .. 

بلشت امتحاناتي هو غط سمعت مسافر عنده شغل ، فتحت فيس مالته لكيته ناشر صوره هو بمطعم راقي ويه بيبر وياهم ناس غرب ماعرفتهم ..

لو لوحده هو راكب بايسكل ولابس شورت و فالينه ويضحك قربت صوره من وجهه ، يجنن وربي وجه يضوي ..

بيدي جهاز و دك .

فزيت ..

فتحته كبل …

حجه شلونج..

دانيال ..

لعد منو ..

ماقريت الاسم شلونك .

ليش مادكين عليه ..

ليش ادك ..

هاا ..

سكتت ..

جنت انتظرج ..

عندي امتحانات ..

هاا ..

اي ..

معناها بعد الامتحانات ماكدراطلع وياج لمكان ..

هيج الظاهر …

ماكلتي الي عندج فيس ..

نكرت بسرعه :- ماعندي لا ، ملتهيه بدراسه فيس ايلهي ..

- اخذ ثواني سكت ، حجه همممم زين لعد اشوفج من ارجع ..

شوكت ترجع ..

هالاسبوع ..

ابتسمت هلا بيك ..

صدك فتره ورجع ، جنت بره بالحديقه العب ويه اسامه ، هو تقرب علينه شايل علبه ، رفع حواجبه شلونج ياحلوه …

ابتسمت زينه الحمدلله على سلامه .. 

الله يسلمج ، هاج شوفي ، كون تعجبج ..

اخذته العلبه منه مستغربه ، جان جايب الي لعبه مصنوعه من كزااز على شكل بزون وقاعده مالتها خشب وملونه بسمائي والاصفر ..

ابتسمت حلوه تجن..

رد عيونها تضوي باليل ترى ..

ها شمدريك مدنجه واتلمس بيها ، مبتسمه، رد شفتها بالسوك ولفت انتباهي عيونها الي تشع بالظلمه مثل عيونج..

رفعت راسي عيوني تشع كتلي ..

اي يم شط جانن يشعن ..

ابتسمت حلوه عاشت ايدك ..

لاختي هم جبت وحده ..

ذوقك حلو ، اسامه واكف يم رجلي وحجه واني شجبت الي ..

ضحك دانيال لا شلون مانسيت مد ايده لجيبه طلع ككو كله هاكاك بالي ماناسيك ترى  ..

-هز راسه لا مثل هاي اريد…

-خلصن ماكو مهن بعدين هذول للبنات عيب اشتريلك مثلهن ..

كبل بجه وحجه والله لاكول لامي وراح ركض على نانه يكوللها  ..

ضحكنه عليه اثنينه ..

رد خلصتي امتحانات ..

الحمدلله بس انتظر النتيجه ..

-راح تنحبسين بالبيت مو ..

-ابتسمت رافعه حواجبي لااا هروح لاربيل .

-ويامن ..

-لوحدي ..

-ها خووش مطورين ..

-ضحكت بيبر ياخذني لو لواحد من الولد ..

-هز راسه خوش ، تردين شي هزيت راسي سلامتك ..شكرا على هديه ..

غمزلي ومشه ، ..

ظليت واكفه اكلب بيها ، كل شوي ارفع عيوني عليه ، ماندار عليه ..

كلبي يرجف يمه بس ابتعد جريت نفس ، احسه واثق بنفسه ولا عنده ذيج خوفه ورجفه مثل الشباب ، وكانو يقره الكلوب يباوع بنص عيوني و ماتتحرك بي شعره ..

رجعت للغرفه اشوفلها مكان خليته قريب  من راسي ، طفيت ضوه و صدك تضوي عيونها يجننون ..

ذيج فتره كلها هو بالي كل ماشوفها اذكره وابتسم ،

فتره قصيره وطلعت النتائج ، واكعه بواحد اني بس رغم هذا ضحكت فرحانه توقعت بكلهن والله .

نانه كلبت وجها ضايجه مني ومن ساري الي مستوانه صاير بالحضيض ..

ميرال سمعت وجها انكلب تحججت تلمدرسه جديده ومدافتهم عليهن ، و اني نفسيتي تعبانه ، رغم هذا وافقت ادزني لاربيل ، 

راسلت هبه بت خالتي كالت جهزت الج غرفتي شوكت ماتجين هلا بيج امي طارت من سمعت ، 

وفاء ناحجه بكلهن صلاوات درجاتها بالثمانينات و رنا احسن مني على الاقل ناجحه صح دفع بس ناجحه بكلهن ..

اجت ميرال للفله هيه و بيبرس عازمتهم خالته ، ورحت اشوفها واتفق وياها على روحه ..

ردت مو وكتها هسه عدهم شغل محد فاضي يوديج اجليها بس كم يوم ، كعدت وسكتت ، شفت سياره دانيال صفت ..

طلعت اشوفه وكفت مبتسمه حتى نحجي ..

هو نزل مدنج رفع راسه شافني ودار وجه مغلس عليه .

استغربت وكفت هذا شبي ، تقرب يريد يفوت ..

حجيت شلون ..

رد برود مو مثل العاده :- زين وانتي ..

مشه وعافني ، ورجع وكف اني عيوني عليه ، اندار عليه ، فتح حلكه يحجي ..

صفنت بوجهه ،اخذ ثواني كانو ديفكر  ابتسم بهدوء تجين يم شط نكعد نسولف  باليل..

عقدت حواجبي بريبه ، مادري ..

ماكو ماتدرين ، انتظرج  تجين..  عافني و مشه رجع اندار حجه هاا ام عيون حلوه ، جيبي موبايلج وياج دانقلج شغله بي ..

يا شبي هذا ، دخل يم بيبرس واني رجعت لبيتنه ، صدك باليل اني مشيت يم شط لان اسلوبه مو حلو وياي ، خلي اجس النبضه لايطير مني ..

كعدت انتظره ، ماكو مابين ، شلت عصا الهي روحي بيها نوب وكفت اكطف ورد .

سمعت صوت وراي ..

فزيت من شفته واكف صافن عليه بلا صوت ..

ضحكت بخوف :- رعبتني ..

-رفع حواجبه ، صدك ..

- ابتسمت خايفه ، اي ..

- ماشايفه رعب بعدج ..

-سكتت دنجت للارض كعدت الم بالورد ، حجه سمعت راسبه ..

رديت بعدم مبالاه اضيع خوفي :-اي بس درس واحد ..

-ليش شعندج وراسبه مو صديقتج رنا ناجحه بكلهم رفعت راسي كبل عليه ، ركزت بوجه واكف فوكي مباشرتا ،  مخصر ..

بهت وجهي حجيت رنا ؟؟

-اي صاحبتج مو رنا ، شايفها اني وياج من طلعين من المدرسه ..

كصتي عركت :-همست شجابها عليك ..

-غير انتي دازتها عليه ..

-خرط وجهي لاا ..

-دنج عليه وكنبص كبالي شجاب حسابي عدها وزها تراسلني ..

-ماحجيت عيوني دمعت من فشله ..

-رد تكولين ماعندي حبيب .. 

ابتعدت عنه شوي ، حجه بهدوء رمش بعيونه ، شو انطيني جهازج ..

جنت ضامته بجيبي رديت ما جبته وياي نسيت ، رفع راسه ها نسيتي كلتيلي مد ايده خطف على جسمي يدوره .

عطت خررر ، جلب بيه حيل ودفعني على الارض ، صعد فوكي ،  رفعت اديه اضرب بي واعيط وخرر صم حلكي بايد وحده وثبتني برجله و ايده ادور على موبايل طلعه من جيبي ..

وخر بسرعه يغلط  ..

بجيت برعب  كبل :- جيبه ، والله اعيط الم دن… داحجي و هفني راشدي ردش وعيطي اذا ماغركتج هنا بالشط وكتلتج خلاص ولج كح** تضحكين علي وانتي كلج بكد الفرخ .

دفعني حيل ، فتحه وكلب بي ، لزمت كلبي ياارب ماايشووف ياارب ماايشوف رفع حواجبه مدهوش رفع عيونه عليه مصدوم ..

ولج انتي شنووو شيطان خما شيطاان ومثله عليه دور الملاك ، واني الارعن مصدكج  ، 

رجعت ليوره بجيت كبل ، حجيت انطيني جهاز ، رد بنتر مشمئز :- ولج هذا ساري منو هذا نفسه ساكن وياج بالملحق موو ..

هذا بالموبايل وهيج لعد بالحقيقه شلون ..

هزيت راسي ابجي :- مايعرفني اني والله ، مايعرف .

-باوع عليه شلون مايعرف ..

مسحت دموعي ارجف مايعرف ، كعدت بالارض رجليه يرجفن :- وداعت اهلي مايعرف ، هو مايعرف هاي اني واصلا صار فوك الاسبوع تاركته ..

وكف يكلب بي وعاقد حواجبه ضايج ..

مدري شنقل بجهازه وكف يسوي بي ، خلص وشمره عليه اجه ترس براسي بجيت ..

رد نكسه طلعتي مو اني اكول شايله عيون صلفه ، باين على نظراتج مال وحده ماينكدر عليها ، فعلا مايخيب ضني ابد بيجن النسوان ..

دار ظهره يمشي ، ركضت جلبت بي دانيال فدووه بس اوكف افهمك ..

دفعني حيل وخررري ساق** عافني ومشه يفشر عليه ، كعدت بالارض متت بجي ، جريت جهاز اشوف ، لكيته داخل على كل حساباتي عزااا العزززاني وناقل منه سكرينات و بصمات صوت لطمت على وجهي ..

يافضيحتي يااااصخام وجهي ...

رجعت للبيت ابجي ، شافتني نانه اخترعت حجت شبيج ولج رديت لحكني البط و عثرت وكعت ، 

دخلت للحمام اغسل وابجي ، انهاريت بيومها احس شي بيه صار شتات، ليش رنا سوت هيج شلون عرف معقوله حجت اله هيه لو هو كشفها و اضطرت تحجي .. زين ليش مانبهتني ليش ماحذرتني منه .

طلعت من الحمام كبل دكين عليها ، اغلط وارزل بيها ردت هو عرف والله هو جبرني ، 

شلون جبرج وين لكاج .

سكتت حسيتها جفصت بيها 

حجيت بنتره ، معناها راد علج ومراسلته متواعده موو من اسالج تنكرين ..

- ردت اي مره وحده و كعني بالحجي ..

- وليش من اسالج تنكرين ..

-عبالي تحبي ..

-من عرف ليش ماحذرتيني ولج هاا ..

-هددني شسوي ..

-واني مافكرتي بيه يالحيوانه ، 

-ردت اووو هسه شصار ويعني اكلج خما اكلج ، خلي يعرف طوززز شعندج خايفه عندج الاخ الي يذبحج لو الاب الي يعاقبج شو فالتوو انتي ،  سدته بوجهي كبل ، لا يالحيوانه يالنذله ..

لزمتني صخونه بيومها ارجف ، اكلت روحي اكل ، شراح يسوي بيه يمن يفضحني نوب مدري شاخذ من جهازي وحوله الي معقوله اكتفي بسكرينات وبصمات  ..

حتى من غمضت عيوني انام ، هم ماتركني وجه كابووس صارلي ، مانمت اليل صبحت صبح اعيط من راسي وابجي متت ، نانه عبالها مقهوره لان ماراح اسافر ، اجت ميرال تخبلت من شافتني ابجي وجهي مصغر ..

حجت شبيج ياعيوني احجي ..

مارد بس ابجي ، خايفه خووف يموت والله ، صخنت من وراه حتى الاكل كطعته ..

ميرال حجت احاجي بشار يوصلج لخالتي بس كومي لحيلج غير تكولين شبيج ..

كتلها اريد اعوف المكان هذا اريد اطلع منه ..

ردت هسه اكوم اخابر بيبر بس كومي لحيلج اكليلج لكمه ..

جابت الي شوربه وخلتها بحظني هيه تريد واحد يداريها بس خطيه اشوفها تمشي وتتعثر وخايفه ترجف وتحجي اذا على نتيجه مزعلانه اني عادي ميخالف اهز براسي اني مدمعه ..

اكلت شوي و كفت نانه تلم الي حاجاتي وملابسي بالجنطه ..

خابرت ميرال بيبر وضلت تلح عليه ، لحد ماقنعته ،  وكاللها باجر بشار ياخذها خلي تحظر نفسها ، من الصبح ..

دخلتني نانه للحمام تسبحني حتى تفك الصخونه مني ، 

خلت ميرال فلوس بالجنطه حجت هذني اصرفي منهم اذا احتاجيتي ، ردت نانه اني اطيها يمه هذني هواي عيب من رجلج ..

ردت مو مالات بيبر هذول هذني فلوسنه احنه بيبر كمل الي معامله مال سحب الفلوس وشكد مانريد نكدر نسحب بشيك او بكردد كارت من حساب بابا من بنك.. 

خلتهم وبوستني وطلعت ردت لبيتها … ساري ماشوفته وجهي اكول هسه يدخل عليه يمرعدني ..

كل ماسمع حسهم بصاله افز اكول وصل الهم خبر لو حجه ،

اليل كله ماغمضت عيوني اريد بس يصبح الصبح حتى اطفر منا ، والله اذا عرفو وين اودي وجهي عزا العزاني اي والله ..

تفكير موتني ، اكلت بروحي اكل ، واكفه وافتر لزمت راسي ااااه ياايمه و ينج ، شوداني اني لهيج درب ..

صبح صبح بسرعه غسلت وبدلت ، كلت اذا كلش اضل هناك يم خالتي مارجع ، بين مايهدى الوضع وهذا ينساني  …

اجت وسن كالت بشار ينتظرج بالسياره ، بوستهم و جريت الجنطه وطلعت ..

تلكاني بشار حجه هاا ولج شو وجهج خارط ..

ابتسمت متوتره مريضه شوي ..

لا سلامتج سلامتج .. اخذ جنطه خلاها بالصندوك صعدت يمه بالصدر..

طلع بينه خليت راسي على جامه ، ارقب الناس ، غمضت عيوني دخت لا اكل ولا نوم وضعي تخربط اول مره بحياتي ادخل بهيج مصيبه نوب لوحدي ماكلت لاحد ولا شكيت لاحد يساعدني ..

مافكر ابد احجي لميرال يماا غير تموت ، كل طسه يفز كلبي وياها ، دمعت عزا موقفي شكد زباله ، شنو اخذ عليه نظره ..

لو ساري اذا عرف لو نانه لايربي لاتكتبها هاي الفضيحه تووبه والله ...

دك جهاز بشار ، اني مو بالي جنت  صافنه ، وكفت السياره ، فتحت عيوني ، نزل بشار ، وكفنه يم بانزين خانه …

حجه لاتنزلين هسه اجي …

رجعت غمضت عيوني ريحه البانزين تكتل لعبت نفسي ، اختنكت منها ، انفنحت الباب وصعد ..

حركت السياره و مشت ، احس نفسي لعبت ، فتحت عيوني اريد اكله اريد بطل ماي ..

الفتت عليه فزيت من شفت دانيال كاعد هو الي يسوق بصفي  !!

#يتبع ..

اكو طلب باختصار القصه تردون اختصرها ؟؟!🤔

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق