رواية قاع الشياطين الفصل الرابع والخمسون 54 - بقلم اسماء ديمير

...............☆البارت التاسع والاربعون ☆.............

#قاع_الشياطين(البصر والبصيره)

#بقلم_أسماء_ديمير

للجنه شوي ..

ماكو جنه على الارض ..

لزم ايدي وجرها لحظنه نشوف .. 

تركت زمام الامور اله ، حرك السياره وطلعنه .. شوي وكف السياره ثواني حجه شوي واجي ، 

حجيت وين ..

اجيب شي ، لا تستعجلين ،  فتح باب السياره ونزل ، جرت نفس وين عافني هذا .

درت وجهي عسى اسمع شي اني هم صوجي مالبست العدسات جان كدرت المح شي على الاقل ..

ماتاخر دقايق و اجه  ، فتح الباب الوره و ماعرف شنو خله بس اسمع صوت اكياس ، 

فتح الباب وصعد بصفي .

حجيت شنو اخذت ..

عشانه ..

رفعت حواجبي نتعشه بالسياره ..

لاا بمكان جنت اروح عليه من انهزم من الشرطه ..

كتمت الضحكه كوه ، بيبر ؟؟

-ضحك .. والله ، سكت شوي و حجه بنبره هادئ ، محد يندله بس اني ماتحبين تشاركيني بهل السر ، 

تامن بيه بيبر ..

-اكثر ماامن باخوي و صويحبي ..

-رخت ملامح وجهي ، تدري بيه احبك موو ..

-ادري عيونج تحجيلي دائما بس محتاج اسمعها من السانج و صوتج ..

-خايفه عليك من الدنيا بيبر لو بيدي اضمك بصدري والله بس انته صعب يتسيطر عليك ..

-حافظي عليه وانتي وياي .. مو تحبسيني او تتركيني  ..

-وين مخطبأك السري هذا .. 

-شغل السياره مره الثانيه ، حجه بستان مطل على بحيره ..

-وين هذا ..

بمنطقه ال**** 

رفعت حواجبي تحب البساتين ..

اذا دخلت بنصه صعب احد يلكاك ، لذلك بسنوات الحرب الجيش العراقي من تعصه عليه المناطق الزراعيه يتبع اسلوب اللارض المحروقه ..

يحركون الاخضر و اليابس حتى يدخلون  بلا ما يخسرون اغلب الجنود ، افضل مكان للختله و شرده البساتين والاراضي الزراعيه  ..

-ليش تحجي هيج و كانو وراك مشاكل و تحتاجه  ..

-كل شخص قبل لايخطي خطوه للامام لازم يخلي اباله انو يامن الخطوه الي وراه ، اذا مشه للامام و طلعت الارض بركه و غاصت رجله بالوحل ، شنو اول قرار يتخذه ؟؟! غير يرجع ليوره ..

زين فكيف اذا كان الدرب الوراك هم طينه وبركه ، الغرك مصيرك لامحال ، اني امن الطريق الرجعه اكثر من طريق المسيره للامام ..

طريق رجعه دوم خاص بيه ماامن باحد يامنه الي .. 

-بس بيه تامن صح ..

-انتي مرتي جزء مني ، 

اي جان شاطر حيل ، جان يعرف شلون يسيطر على عواطفي و عقلي ، عرفني وعرف كل دماراتي ، من يحس بلشت ابتعد وبلش الزعل يسكن كلبي و كلام المحيطين بيه بلش ياثر بتفكيري ، هو يخطي خطوه يمحي الكلام من راسي كله ، بالضبط مثل بناء حاجز ابني اني و المحيطي بيه ضده يجي هو بساطه يهدم الاساس و ينسف الحاجز  ..

بروده جان بعقل ، كلامه بوزن ، نظرته ثاقبه ..

واني اخذته بطيبه كلب الله يشهد .. جنت اكول معقوله الي يدنج يلبسني الحذاء و يعتني بيه مثل الطفله اجازي اني بخذلان وبعد ...

صرراع مايفهمه بس الي حبت هيج نموذج وهيج بشر ..

.مشينه بالسياره فتره ، و صلنه وكفت السياره و نزل نزلني وياه ، اول ماخليت رجلي حسيت بعشب ..

جان الجو من ريحته و نسمى الهوى باين شنوو .

كانو ارض مفتووحه ، صوت الهوى الي يضرب بالاشجار و العشب ، لو صوت العصافير ، جرني وياه ..

حجه مو فله هاي ، كوخ خشب هذا ، صغير ، بس بي كل الي نحتاجه ليلتين ، 

همست ليليتن ؟؟!

اجازه من البيت و الهوسه والمشاكل ..

وخطوبه تالا ..

اعتبريها تاجلت هاي اختج مااخليها تطلع من بيتي بالهين حتى يعرف وراها اهل و اخت سباعيه ، واكفه اله مثل ااعظم بالزردوم ..

ابتسمت فرحانه ، اني ماراضيه عليه تدري ..

اعرف اني هم بس اختج تحبه ورايدته ، خلي تمشي بالطريق الي ختارته لان اذا فرضتي عليها تتركه ممكن تنهزم وياه او تنجرف لطريق تمرد والعناد ..

واحد شراب نوب مو من دينها ..

رجلج هم شراب ترى ..

ابتسمت بعمري ما لمحتك تشرب ..

صح ماشرب هواي واشرب باماكن المخصصه بس هم اشرب ..

شربك مماثر عليه لو ماثر جان حجيت ، و ذنبك على جتفك ، اما دانيال لاا طول اليوم قوطيه بيده ..

اني اكله يخفف عود ..

فتح الباب و حجه اكو درجه كبالج ديربالج ..

رفعت الفستان و صعدت ، لزمت الباب جانت خشب ، دخلت لفحتني ريحه غريبه ..

ريحه الخشب الصااج ، ريحه دفوو ، دخلت تمشيت بحذر ، حجه صغير ترى  .

سته× اربعه ، لزم جف ايدي على ايدج اليمنه اكو طباخ و ثلاجه و ميز صغير ، كبالج مباشرتا اكو شباك ماخذ الضلع كله سلايد يطلع لبره على بستان و كبال الشباك اكو دوشك ابو النفرين ..

و على ايدج اليسره دولاب ابو البابين ، قاطعته ليش دوشك ابو نفرين وانته جنت تجي لوحدك هناا درت وجهي عليه مستغربه ..

سكت حجه افرش العشه ..

اخر مره شوكت اجيت هنا بيبير ..

قبل لا ازوجج والله ..

شلون لعد تكول محد يندله ..

صدك محد يندله  .

شسوي بالفراش ابو نفرين  لعد ..

مريح .. سكت ..

رفعت حواجبي ، ممقتنعه ، حجه جبت مشاوي وكم حاجه يمشنه ليلتين ..

همست اكو حمام هنا …

اكو تواليت اي ..

والحمام ؟؟

بره قريب البحيره نسبح ..

ابتسمت عراه قصدك امام الملأ.

ماكو احد ميرال هذا مكان محد يدخله ..

شدراك ولان جاي حدقجي لو فلاح و جافت علينه ..

لا هاي الارض ملك خاص لشخص ، مو ارض دوله حتى يجفتون علينه ، 

كعدنه ناكل ونسولف ، فتح الي قوطيه الببسي ، يلف الي لفات و يخليهم بيدي اعرف اكل واعرف الف لنفسي بس جان يحب يفرض نفسه و اهتمامه  ..

تعبيره عن الحب جان هيج ، لا هو شاعر و يشعر الي ، ولا هو صاحب حاسه سادسه و يعرف الي بداخلي ويوفره الي ..

كل الي يعرفه يحجي الي بكلبه بدون فلتره ، و يحب يهتم  بيه من عطفه عليه و حبه و يتصرف وياي على يملي عليه كلبه .. 

همست اروح للتواليت بيبير

كومي ، كمت وياه غسلت على سنك اديه ، جان مطبخ ضيك ، طباخ بصفه السنك و بصف السنك الثلاجه و كبالهم الميز صغير ، 

وكف وراي مد اديه على جف اديه يغسلهم ، يفرك بيهم بلطف .. همست و خر اعرف شنو جاهل  ..

لاا بيج سماك بعدهم اصابعج حمر ..

احتك بيه بطريقه قشعرت جسمي همست اروح للتواليت بيبر شبيك ..

جنج جاهل من ينحصر يضل ينك ..

اسويها هنا يعني ..

هههههه هو هم هيج هنا التواليت ترى بنص الكوخ ..

ماكو شي يغطي الخصوصيه يعني ..

لايكرم الله ..

اطلع بره بيبر ..

لا ولج رجلج اني اساعدج ..

دفعته اضحك وخرر عني اكول ..

رفع الفستان كوه و جرني كعدني على توليت غربي اني ماعرف اضحك ماعرف اخجل صحت وخررر لا تصير مزعج  ..

ههههه .. حطلع اذب الزباله اخذي راحتج ..

سمعته شال علالكيك و فتح الباب وطلع ، اصوات بره ، ابتسمت فلك اي والله شنو من رجال ..

جان بدي اغسل ، كمت لحيلي مديت ايدي استند اجت ايدي على مغسله صغيره كلش ، مديت ايدي اشوف ، لكيت صابون سائل غسلت وخرت ..

شغلت الماي وابتعدت ..

حجيت بيبر وينك ..

ماكو ..

فتحت الباب و طلعت .. سمعت صوت الحشرات بره  ابتسمت ذبيت شال على صفحه و طلعت بحذر..

بيبر وينك ..

تعاي هنا ..

التفتت صوته على جهتي اليمنه .. شسوي ؟؟!

داسبح ..

صدك وين .. 

بالبحيره ..

ابتسمت ، دنيا ليل هسه ياسبح هسه كوم اطلع لا تتمرض لا يعضك شي ..

تعاي هنا ..

مااجي لا اوكع اطلع يله لا تتاذه ..

تخافين عليهن لاينكرطن يعني  .. 

شنو هنه ..

ههههه ، دتعاي تعاي .. تمشيت عليه بحذر مديت ايدي اله سمعت صوت الماي ، حجه تقدمي ..

لا اوكع بيبر ..

كبالج اني واكف تعاي ، تقدمت على مصدر صوته واديه كبال جسمي ، طخت اصابعي بجسمه ابتسمت ، ملابس قميصه وصدره مبلل ..

ادخل لاتتمرض ..

انزلي وياي للماي ..

لاا اخاف جريت ايدي خايفه ..

وياي وتخافين ؟!

خاف اكو شي بالماي يمعود حيه لو حيوان لوشي ..

ماكو شي تعاي جربي ، فتح سحاب من وره و لزمت الفستان اخاف والله .. 

دجربي شبيج متخسرين شي ، ذبيت الفستان و ضليت بداخليات ، همست لايشوفنه احد ..

مو كتلج محد يوصل والدنيا ليل ، بس وحدنا  اني وياج و السما ونجومها ..

نزلت بالبحيره شوي شوي بيها درجات نزلتهم بهدوء اتكبكب خايفه هو لازمني من وره لا اوكع ، بيبر بداعت اعزازك ماكو شي ترى كلبي ديرجف ..

اني وياج ميرال بطلي خوف ، وصل الماي لافخاذي شهكت .. يمااا بردت خلي اطلع درت وجهي جرني بسرعه و طمسني بالماي ..

عطت بيبرررر ..

ضحك كافي جبااانه .. 

حموووت طلعني يماااا ..

حظني حيل و دخلنه للماي وصل حد ماي للركبه كمت اشهك عبالك حغرك بجيت كبل يمااا حموت بيبر بداعت كلمن عنده معزه بكلبك طلعني يماااا حغرررك والله حغرك ..

كاافي كاافي اااش جرني شوي نزل حد ماي لصدري ، كلبي يدك شوي و يوكف ، بعد شعري عن وجهي ماثقين بيه شنوو ..

تخوف السالفه بيبر شنو متتخيل انته الموضوع ..

ادخلك بظلمه و اطمسك بنص الماي شيصير بيك ..

اسف حبيت اخليج اجربين شي جديد ..

رعبتني والله ..

هههههه جباانه ،  رفعت ايدي و ضربته ، حظني حيل يضحك خليت راسي على جتفه ، اضحك ، شكبرها البحيره ..

هاي بحيره اصطناعيه مسحوبه من نهر **** ، اكو ماطور ماي هنا يغير الماي كل فتره ..

الكوخ منو بناه ..

اني ،  جددته قبل فتره ، 

حسيت شي بين رجليه شهكت مفزوعه بيبر اكوو شي اكوو شي ..

شنوو شبيج ..

شي بين رجليه و الله شي حيوووان اكيد لا لا حيه لا تتحرك لزمته من جتافه فاتحه عيوني مخترعه ..

همس هاي ايدي ..

هاا ..

هههههههه ..

نزلت اديه للماي لزمه لان هو صدك دفعته حيل دوووخر و ربي عيشتني برعب انته ، نطيته ظهري داطلع من بحيره جلب بيه من وره وجرني بحظنه ..

وووخر كلت ..

ههههه دتعاي خوافه ..

لا اموت من رعب بيبر جد احجي  .

جرني كوه عليه الجو حلو ميرال لا يفوتج ، كل مره اجي هنا ارتاح نفسيا ، هالمره راحه غير شكل ، كلشي صافي و هادى وبارد عندي ، جو حلوو بحيره و بستان و خضار و طبيعه و حوريه جنه لو مو جنه ..

الخضار والماء  الوجه الحسن ..  

ابتسمت ، حظني من وره ساكت ، همس اكو نجوم بالسما هواي ، انتي تساوين الف نجمه بالسما ..

شمعنه  الف …

مره حسبتهم وصلت للالف و تعبت ..

-زادت ابتسامتي ، انتي شمسي بيبر شمس  تنور بس بنفس الوقت تحرك و خطره ..

-شايفتني خطر عليج ..

-لو بس ذيج شغله تتركها احنه بخير ..

شد على اديه و ضغط على بطني ، اذا اني تركتها هي مراح تتركني ، كتلج اني ماتقرب لا على طفل ولا على مره ولاجابر بشر عليها ، 

جريت نفس خانسه مد ايده جوه ابتسمت ..

بالماي احنه و الله يعلم شنو بي من حشرات ..

-شكد تنكين ماعرفج هيج ..

-لان طول اليوم طافر من البيت والا ترى اني نكاكه بكلشي ..

-الله يبشرج بالخير اذا صدك ، زين كلتي حتى ماالفي ابد بس باليل ..

-ههههه … رجع شعري ليوره ولزمني منه ، مد ايده فوك ، لزمته موو هنا خلي ندخل ..

جربي شي جديد بس انتي لعد تجربين بيه شغلاتج الجديده ..

فتح الطبكه ونزل القطعه فوك ، انداريت عليه حظنته ،

بعض الموسيقى في هذه الليل تزيد من لهفتي لنه*** 

صوت جرف الماي وصوت حشرات اليل ، انتهت اليله ، البعض شافها جنه ، والبعض افكاره وشي بداخله ماخلاه يرتاح ، تكلبت بحظنه هيه خانسه ، 

هو نام و ثكلت نومته عكسها هيه ، جافاها نوم يمكن تانيب ظمير على تالا ،،

-همست تالا خاف تطلع من فله وتسوي شي وراي ويه دانيال ، رد بتعب ومن بين نومه وصيت الحرس ممنوع احد يطلع بدون اذني ..

همس نااااامي طفي لعقلج عاد .. لزمت عيوني تعبان ويوجعني ، شنو وضع تالا هسه اكيد معصبه وزعلانه مني ..

كرهتني بسبب الي صار ولان تاجلت خطوبتها ، بس ماجان بالي ، يله من ارجع افهمها واشرح الها الصار ..

غمضت عيوني ودرت وجهي اطمس بحظن بيبر ، الي كل شوي يجفل و يرجع يعدل نومته و يحظني حيل ..

الصبح كعدت على صوت العصافير وهبه الهوى الي داخل من شباك السلايد مقابل الفراش ، 

رفعت راسها مدت ايدها ماكوو احد ، همست بيبر ؟؟

فركت وجها و تثاوبت بنعس ، كعدت لحلها   ، رجعت شعرها ليوره دارت وجها على اصوات العصافير ابتسمت ، كامت لحيلها ، 

وكفت انتبهت هي بلا ملابس ..

جرت الجرجف و لفته ، صاحت بيبر ووينك ..

مشت بحذر ، حاولت تلكه شي تلبسه ، ماكو غير بنطرون و قميص بيبر مال البارحه ، جرت القميص و لبسته ، حجت بيبررر ؟؟
من بعيد صاح هااا ..

وينك تعال انطيني شي البسه ..

دخل يحجي بنبره تعب هاا صباح الخير ..

يسعد صباحك وين جنت ..

دالم الفواكه الي بالارض ، البسي هذول ، نطاها فاليتنه و بجامته ..

لبستهم ، جرها تعاي نتريك بره الجو حلو  ..

دغسل دقيقه ..

اكو بره ماي تعاي ..

جرني من ايدي وطلعنه، لازمه البجامه من فوك بتك ايد خاف لا تخرط وكف اندار عليه شاف و ضعي دنج راسه يربط الي خيط البجامه حتى بناسبني الخصر ..

حجه اكو تين تعاي وياي لمي .

يالون .

اكو اصفر و اكو اسود ..

مد البطل حجه مدي اديج غسلي وجهج ، مديت اديه ، هو بلل ايده و مسح وجهي بهدوء اني اغسلج يله لاتعبين نفسج نجمتي ..

ابتسمت ، ريوك .

جوعانه شنو ، 

اي ..

صايره اكاله ..

شسوي …

حظني و مشه يلم الفواكه الي بالارض ، حجت هااي شوفيها خاف ذبلانه .

لا سليمه يمج سله بصف رجلج خلي بيها ، 

بالجانب الاخر ، ضلت الاخت الاصغر دمعتها مرافقه خدهاا ، من كل عقلها نسوها ومحد بحالها ، لدرجه حتى اهم شي بحياه البنت اجلو وغلسو عليه اختها ورجلهاا ..

حتى دانيال ممنوع عليه تواجد هنا بالفله ، موصي بيبر ، احسهم نقمه مو نعمه ابد ..

خاف جنت بميرال لا طحت برجلها نذل هم ..

دك جهازي شلت دانيال حجه مادكت اختج ..

لاا ..

وين ولوو لعد .

شدراني اني حالي من حالك ..

لا تنترين لج ، شنو ماتدرين مو اختج هي ..

ماكالت طلعت ويه رجلها وخلص ..

اخذو جنط يعني ..

مانتبهت بس على الاغلب لاا .

جر نفس اسمعه يهمس يكله مماخذين جنط ، يمكن بعدهم بالعراق ..

طلع صوت ، من ركزت بي طلع صوت عدي يكله شنو لبست هي قبل لايطلعون ..

حجه اختج شنو جانت لابسه ..

رديت شلك بهل سالفه دانيال ..

ردي فضيني دافتهم ..

فستان عادي ، اووامر ثاني ، دانيال مارد بس اسمعه يحجي ويه عدي وذاك يرد ، نغ* هذا يريد يدوخنه خاف طلع للشمال ..

رد دانيال .. ماعتقد ، بس كول مرته هي لافت عليه مثل ذيج المره و حصرته و خلته ياخذها ويطلع حتى تتاجل الخطوبه ..

سكت عدي ، 

غمضت عيوني مستحيل تسوي هيج هي جانت موافقه ، ماتسوي هيج ، حتى وعدتني تحظر و تسلمني بيدها ليش تكلب علي ..

سد جهاز بوجهي دانيال بدون حتى مايحجي جنت منطيته العذر انو معصب و هم تفشل هو واهله لان ماحترمنه الموعد حتى بدون عذر مقنع.. 

ثاني يوم هم مابينوو ، طلعت بره بالحديقه مجتفه اديه معصبه حيل ،  درت وجهي على الملحق دمعت عيوني ، ختنكت تذكرت اسامه من يلعب هنا ، و ميرال تكعد بصفه ، لو ساري الي يفتر طول اليوم بالبستان ..

لو نانه ، شكد مشتاقه لحنيتها ، احنه بطلنه نسال عنهم و هم هن التهو بحياتهم ، الله يعلم شلون حالهم هسه ..

دنجت راسي مقهوره ، اجت عيوني على ايدي الي صاير بيها طكعه حمره ، تلمستها باصابعي ، رمشت بهدوء  ..

كانو دينتشر بجسمي هذا ، حتى داصخن باليل بسببها ، درت وجهي على صوت ابو زياد يحجي ويه ستار والحارس ..

جايبين غراض ماعرف جنط دخلوهم جوه ، ضلت عيوني عليهم اشوف شنو هذول ..

دخلو للفله توجو للطابق الثاني ، عرفت هذني غراض ام زياد ورجلها .. 

شوكت اطلع منا دارتاح من هالفوضى و المشاكل ، داحس بالغربه والوحده ، اني هم اريد استقل و اعيش بهدوء ، 

رجعت للفله ، طولت ميرال بغيبتها ثلاث ايام ، اجه عدي للفله سال على بيبرس ردت خالته ام زياد…

-طلع هو ومرته صار كم يوم مامنهم خبر ..

-دار وجهه مغندب حجه محتاجه ضروري وكت الغطه مالته هو ، مايفكرر ، وهيوكت سفريات  ونسه هسه .

-ردت عليه ، مرته حيه صفره كتلكم محد صدك ، نوب الاستاذ مايقبل احد يحاجيهاا فرعنها علينه كلنه ..

-مالي علاقه بيها هو وين عقله من هاي فارته فرر ، حاولو تتواصلون وياه لو اسالو وين اني اروحله ..

-ماجاي ايرد علينه بس يرسل رسائل لابو زياد اني مسافر كم يوم ..

-رد بغضب عدي ممسااافر شفت و شيكت على جوازه ممسافر وبعدين مرته ماعدها جواز شلون تسافر .. 

-ردت شدراك ما طلع الها هو ..

-رد لاا كتلج شيكت ماطالعين خارج العراق ، و كف متخصر ماعاجبه ، دار وجهه شاف بشار واكف يباوع عليهم ..

فرك وجهه حجه اترخص اني اذا اتصل دزو عليه كلوله عدي يريدك ..

عافنه و طلع معصب وراه دانيال ، دانيال ماشفته ولا انتبهت عليه ، حتى ماكلي جاي اني ، 

رجعت ام زياد عند بنتها ، الي بلشت تطلع شوي ، امها تسندها و تطلع تمشي ..

صاير عدها كرش كانو باشهرها الاخيره ، طلعتها للحديقه و كعدتها .

وجها اصفر تلهث دايره وجها عن امها تعبانه باين عليها القهر و الكابه ، حتى باكلها متهتم برغم هي حامل كانو تتعمد تاذي نفسها والي بطنها ..

اني بصاله اسمع صوتهم من الشباك هنه بره بالحديقه ، دك عليها عواد نطاها خبر لام زياد عود عسل ولدت ..

صاحت ياا صلاوات و سليم لااا ..

ماعرف شنو كال بس اسمعها هيه تحجي بفرح .

كره عينك يااعيوني بالخير عليك الله يخليك اله ان شاءلله ، شنو سميتوو ..

هاا بعد مانصيلح ابو امير كله ابو رامي …

درت وجهي كلهن حبلن وخلفن الا انتي ياميرال ، ماعرف الله كاتبلج لاا ، صابتني كأبه حاده بشكل مو طبيعي ، دوم دايخه وراسي يأذيني ، ثاني يوم رجعو ،

سمعت صوت سياره صفت بالكراج العصر  ، فتحت الشباك غرفتي شفتها نازله من السياره تضحك عضيت شفتي حيل معصبه منها ..

لزمها رجلها ودخلها حاظن جتفها ، ولا كانو تركتني بحركان اعصابي و طلعت تتونس ، انتبهت ضافره ضفيره امبينه من جوه الشال ..

منو ضافر الها هيج ، هي ماتعرف ، جريت نفس بقوه ، فتحت باب غرفتي وكفت مزنبره جتفت اديه انتظرها تصعد دانتر بيها وابرد كلبي بيها ..

صعد وياها رجلها و خرط وجهي تالي خنست ، اجت عيونه عليه تغيرت ملامحه من الابتسامه للملامح جامده ..

فاتو من يمي ماطلعت صوت بس هيه كانو عرفت اندارت باتجاهي همست تالاا ؟؟

ماحجيت باوعت الها بغضب ..

تالا انتي هنا يعمرري ..

همست بعصبيه :- بعد وكت ..

رفع حواجبه رجلها باتجاهي ضايج ..

حجت احجيلج الصار وعد لازعلين ، حفله خطوبتج راح تصير احلى مما تتوقعين ، اني انظمها الج ليش مستعجله ..

ماحجيت ضليت واكفه مدمعه مقهوره وخايفه لا احجي ويكب الحقير رجلها عليه ..

جرها رجلها ودخلها للغرفه ، حاظن جتفها ، انتبهت على وحده من اديه بيها وشم .. ظهر ايده عليه وشم اول مره اشوفه ..

عفتها ورجعت لغرفتي ، باليل دزت عليه العامله تتعذر مني ، تكلي ردت اشلع كلبه حتى يعرف غلاتج عدنا مو بسهوله يحصلج و هم نفس ماتفقت وياج عندي شرط بسيط  وانتي راح توكفين وياي موو .

ماعرف اشوف دانيال شيكول ويله ..

-لا انتي صاحبه القرار هسه ، انتي واعيه وعاقله مو حبيبتي ، راح ندخله بامتحان نشوفه يضحي و يسوي المستحيل ديحصلج لو يطفر من اول طلب ..

-شناويه تطلبين منه بيت لو قصر مثلا ترى حالهم وسط هم ..

-منو كلج بيت ماناويه اطلب منه حلقه اصلا ، الحمدلله ماعايزين اله ، اريد شي معنوي يدل على حبه الج مو استغلال ..

-يحبني متاكده ..

-ماشي لعد اسكتي يوم الي احجي وياه واطلب منه ..

-شوكت يجون ..

-باجر باذن الله ..

-هم عود فركشو السالفه ، فشلوو و فشلوني وياكم ..

-الي صار ذاك اليوم لمصلحتج حتى يعرف ماشامرين نفسنه عليه ولازم يتحمل ، هاي اجلنه خطوبه  وحظرته ضايج لاا نوب مزعلج الج هم ، لعد غيرها شراح يسوي بس لاعباله مسوي فضل علينه ، هو هذا الي يحب و يخطب يتحمل دلال الي يحبها ، مو يكولون لاجل عين تهون الف عين ..

سكتت ، حجيت وين جنتوو ..

ابتسمت ، بمكان حلو ..

سافرتو يعني ..

هيج شي ..

درت وجهي اني هم اريد اطلع اختنكت ، مليت حتى من نفسي ..

نطلع ان شاءلله بس خلي تمر سالفه خطوبتج باجر  ، وصيت على تجهيزات للحفله استلميهم انتي و خلي العامله تساعدج بترتيب وياكم ديماا ..

ثاني يوم راتبنه الصاله التخم و الورود و الطبلات ، جان عندي فستان لون اصفر فاتح ، لبسته جبته اردان لان عندي كم بقعه خفت لا يبينن و يخربن الوك ..

حذاء كعب صغير ، ماعرف ميرال على شنو ناويه بس كلبي مطمان لان هي راضيه و قانعه ، هي على الاقل افهم مني وهم اكون مو وحيده وياي ظهر وسند ..

وكفت ارتب بشعري وارش عطر ، باوعت لنفسي اخر مره جريت نفس دخل الهوى لريتي ، ماكو ام ولا حتى نانه ، حتى بهل اليوم داجهز نفسي لوحدي ..

لا صديقات ولا كرايب ، الي اعرفه خطبت البنت تصير هوسه وكلها تعتني بيها ، رجعت خصله من شعري وره اذني ، يله مابقه شي واكون اسره لحالي اسوي اسره جبيره ..

اخلف كوم حتى احطهم بحظني هيج كون من اكعد دير مدايري يصيرون .. ابتسمت وعيوني دمعت حقق الي هالامنيه يااارب عايله حلوه وبيت دافي ..

وابني شي لنفسي ،  دنجت اعدل بحزامي ، اندكت الباب ودخلت ميرال ..

التفتت عليها بهدوء ، لابسه فستان ماروني طويل و خاله شال على راسها ..

ابتسمت حجت جهزتي لو بعد .

جهزت .. نزلت نظري على علبه بيدها ، تقدمت عليه بهدوء ، حجت شوفي هذا يناسب ملابسج ..

شنوو ..

تقربت فتحت العلبه ، ذهب ابيض وياه لؤلؤ ، عقدت حواجبي .. مالتج هذا ؟؟!

همست لا هديه مني الج ، لزمت وجهي بجف ايدها يستاهل هالوجه ..

مديت ايدي رفعت الكلاده ، اكلب بيها ، مافرحانه بيها ابد  ، حجيت تذكرت الذهب جان يجيبه بابا ..

ردت الله يرحمهم برحمته ، الانسان يموت مياخذ وياه شي بس اعماله  ..

رفعت نظري عليها ،  شنو صار على ذهب الي بالمحل مالتنه ، 

-رخت ملامحها حجت بستغراب ليش ..

-مو وريثه اني لو ممسموح الي اعرف ..

-ردت كله مامن عليه لايضل بالج ، من تبلغين تلكين حقج كامل ماناقصه شي ، 

-رجلج كالج هيج موو ..

-ليش دانيال حجه الج غير هالكلام لو انتي تعرفين شي مثلا ماعرفه ..

-مامنه برجلج عنده الكلمات سر و حتى دفتر شيكات بيده .. 

-منو كلج عندي دفتر الشيكات ..

-اعرف ماكو شي ينظم ..

-جرت نفس ، ضيعت الموضوع بجمله، لبسي شوفي حلو عليج لاا ، 

جريت الكلاده ودرت على المرايه اشوفه ، جان نازك حيل الكلاده ام طابقين ، السلسله الفوك بيها فراشات صغار و السلسه الجوه لؤلؤ ناعم صغار ..

حجت هاا ..

-حلوو كلش ..

-ابتسمت شوفي تراجي ، لبست تراجي والمحبس .. لزمت جف ايدي ، كل ماغليتي نفسج تالا كل ما الحواليج احترموج وخلولج قيمه ، لا ترخصين نفسج وبعدين تكولين ليش انباعيت برخص ..

مقامج عالي تالا ، انولدنه بنات حسب ونسب و جاهه ، لا تنزلين نفسج حتى للي يحبج ، مثل ديما ، بنت ناس واصله وعدها شهاده بس شوفي حالها ليش ؟؟ من ايدهاا هي وصلت نفسها لهيج مرحله رجال طافش وميحترمها مزوج عليها و يكرهاا مقلل من قيمتها ..

وشوفيني اني ، رغم ماكو عيون ، وقليله حيله ، ماكملت دراسه بس مع هذا كدرت اخلي الكل يحترمني ..

و رجلي مايكدر يستغني عني و مايوم رفع صوته بوجهي ، ولا كسر الي طلب ..

لا تنزلين نفس للناس حتى لاحد يدوس عليج بعدين تكولين لييش  ، لان هذا جزات الي ينزل لحد الرجلين ، افتهمتي اخذي بكلامي ماتندمين ..

هزيت راسي بكيفج ..

اجو هم ، استقبلهم بيبر ، من شباك شفت دانيال جايب امه و اخته الصغيره وياهم زلم اثنين كبار و ياه عدي هم .. وراهم مره تشبه امه كانو خالته  ..

دخلوهم للصاله ، ضلت يمي ميرال لمده نص ساعه اجت ديما حجت يردوكم تعالو …

نزلت ويه ديما ميرال ضلت كاعده حجت روحو وراكم اجي ..

التفتت عليها حجت تالاا مثل ماحجيت موو ..

هزيت راسي اي ..

ابتسمت ، جيد ..

عفتها ونزلت ، حجت ديما حلووه ملابسج ..

ابتسمت خجلانه دنجت راسي عليهم اشوف ،  همست تحبي ..

درت وجهي عليهاا رخت ملامحي ماعرف ، بس اريده وخاص ..

الله يسعدكم ، 

دخلت للصاله جانو كاعدين سلمت وكفت ، حجه بيبر تعاي هناا يمي ..

كعدت بصفه ، رد هالحيوان اجه يخطبج راضيه .. باوعت بوجه بيبرس ، ملامحه جامده كوه متحملني كانوو مدري شبي .

ضحك دانيال حجه على كيفك وياها ماتعرف شقاك ترى ..

-رد كولي تالا حبيبي احجي موافقه موو ..

فركت جف ايدي العركان ، التفتت وراي اريد ميرال وين شو بطت ..

وراي واكفه ديما مبتسمه من جذب ، حجه عدي انتي مو تعرفي لدانيال وبينكم قصه حب بعد عليش السكوت الي ماله داعي ..

التفتت عليه وجهيى خارط من الفشله ، مبتسم تك خط مستهزء ، باوعت لدانيال الي اندار عليه ..

مفضوحه اني لو هو هذا فاضحني بينهم والكل يعرف بسببه ، اكيد بسبب الشرب و خرطهن كلهن الهم ..

حجيت امتمت :- بكيف ميرال ..

رد عدي ، شلون يعني بكيف ميرال ليش هي اامخطوبه يعني ..

-باوعت لام دانيال مره كاعده بهدوء مانطقت بس تباوعلي بابتسامه هادئه ، و بنتها بصفها تلعب بشعرها و صافنه بوجهي ...

رمشت بعيوني مو اختي الجبيره ، شلون لعد هي وليه امري ..

-دانيال حجه ، انتي موافقه ، اختج مالها شغل بعد ، طلع صوتها وراي التفتت عليها ..

-شلون يعني مالي شغل ، اختك اذا حبت تزوج وراكم بدون اذن ولا علم يصير …

ديما لزمتها توجها كعدتها بصف بيبر من جهه الثانيه ، 

-حجت امه لا يمه مانرضاها بس حب ياخذ موافقه البنت بالاول ..

-ابتسمت ميرال سالت :- امه لدانيال حظرتج ؟؟

-اي يماا ..

-ياااهلا وسهلاا ، عندج بنت سمعت مو ؟ تعرفين بنت شكد غاليه ونخاف عليها ، وخاصه اذا تزوجت بعمر صغير ، اني مناويه ازوجها صراحه وضد الزواج المبكر بس هي مصره ..

رد دانيال موافقين يعني نعقد باجر ..

ابتسمت هي شلون تعقد حظرتك ، نسيت انته مسيحي وهي مسلمه  ..

#يتبع ...

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق

استراحتي باااجر 🙂💜

البارحه مسوين مظاهرات حظرتكم هاااا ضليتن تهبدن بهل تعليقااات ، اني مثل الحكومه العراقيه لو مو تطلعون مظاهرات لو تباتن بفندق الوتبادي  هم ماتتنفذ المطالب  😂😂😂

لان تعباانه والله حر و كهرباء دمار وشغل مع اطفال ..