رواية قاع الشياطين الفصل الثامن والعشرون 28 - بقلم اسماء ديمير

...............☆البارت الرابع والعشرون☆.............

#قاع_الشياطين(البصر والبصيره)

#بقلم_أسماء_ديمير

‏

"أنا ماتهزني فكرة دموعي ولا لحظات ضعفي ولا حتى حزني،
خوفي الوحيد يكمُن إذا خاطري عافك وقسى وقتها لا أنا ولا قلبي نقدر نسعف ما تبقى من محبتك عندي"

دخل الغرفه بهدوء ، لزم يده الباب جسمه هادئ بهدوء اليل المظلم ،  باوع عليها بعدها على نومتها حتى ممكلوبه على جه الثانيه ، ابتسم ، 

سد الباب ودخل ، اتجه للتعلاكه ، جر المنشفه وتوجه للحمام ، دخل جوه الماي ، نزل الماي على راسه ينظف بي ريحه الدخان الي صارت وتعلقت بجسادهم ..

نسى الماي يغسل اجسادهم مو ارواحهم ، غمض عيونه هو يذكر اخو عواد وحالته ، شوكت روحج ياحوراء تترك عواد يرتاح عاد..

ليش ماكدر يجاوز الي صارلج ، صار شكد مر على انتحارج وبعدج مجلبه ومرافقته بكل خطوه بكل نفس ، تطلبين منه شي ، تردين شي ماعرفناه احنه ..

مد ايده على الحايط يسند نفسه المتعب من الافكار ، فتح عيونه ، بؤبؤ عيونه توسع ….

فَلا أنا مُفصِحٌ عَمّا أُعانِي 
ولا وَجعِي عَلى صَمتِي يَزول ….

……..

تالا …

ايام مرت واحنه بيت واحد منجمعين ، كاعده ماعندي شي اراقب بيهم ، ساري مبتعد عن غدير ، اشوفها تلاحقه بكل مكان هو يدير وجه ..
ماعرف سبب هو امنيه سحبته لو خايف من اهلها لان قريبين منه ..

امها صاحت بيها تشوف اخوها ، مشت مدمعه وكل شوي تلتفت على ساري داير وجه عنها مغلس ..

فتحت الباب ودخلت ، تركت الباب مفتوح شوي مديت راسي بفضول ضنيت انها راح تتصل عليه ..

استغربت من المنظر ، عقدت حواجبي بستغراب شفتها دنجت على شخص ترفعه وتعدل كعدته ..

مامبين وجه لان حاجبه رؤيه عني بظهرها ، خلت المخده وراه و غطته زين وكفت لحيلها وبين ولد يطلع بكدي تقريبا ..

رفعت حواجبي باستغراب  ..

اي ولله ولد شاب ، بس شبي مدد ونايم ، حجت وياه غدير اجيب الك الاكل هسه لو بعيدين ..

رفع نظره عليها جسمه نحيل ، هز راسه الها :- ساعه هيج جيبي ، لان ماشتهي هسه ..

ردت تاكل من الموجود لو نسويلك شي ، ديحجي ودار وجه فجأءه لمحني فك عيونه متفاجئ بيه  ؛اني بسرعه ، طفرت شارده ..

دخلت للهول لازمه كلبي ، شافتني نانه فززتني حجت تالا شبيج ..

حجيت ممفتهمه هاا ..

شمسويه ولج تقربت عليه خايفه مني ..

حجيت ممسويه شي والله شبيج ، 

-ولج .. سحبتني من هدومي ..شكو جنتي تسوين جيتي شارده .. دارت وجها وراي تشوف ..

-وربي ماسويت شي نانه شبيج ..

-جرتني يله للصاله كبالي يله ..

-مشيت خاله اصبعي بحلكي خايفه منو هذا ياربي معقوله اخوهن شو مادري ، لا ليش سمعت مره البغل ساري اقصد حبيبي ساري يكول عدهن اخو مريض بس مادريت بي جبير فكرت طفل صغير ..

اخذت الي ركن صافنه بي ، كلت ادز اسامه يشوفه الي نوب خفت لا يجفص بيها ويكللهم تالا دزتني ، مالكيت غير ميرال اسالها ساري يحجي كلشي الها واصلا اذا سالت هيه محد يشك بيها  .

مشيت الها كبل ، دكيت الباب ودخلت لكيتها كاعده تمشط بشعرها ، لابسه شورت وفالينه ..

-حجيت كاشخه ..

-سابحه يمعوده..

-بالعافيه ..

-ربي يعافيج .. درت وجهي مشغله تلفزيون و تسمع ، شفت هذا الخبر الي صارله كم يوم ، و دنيا مكلوبه بسببه ، حجيت مشغله تلفزيون ، ردت ضايجه وكلت اسمع اخبار ، دنيا صايره تخوف يكولون اكو سوك مدري جمله محتركه و وبيها ناس رايحه جوه خطيه …

-اي هم سمعت نانه تسولف بيهم خطيه يكلج عشاير مدري عداوت ..

-لا ماعتقد لان طلع على قناه الرسميه يكولون تحماس كهربائي سبب الحريق ،؛

-ماعرف بس شفت لقاء بالشارع ويه اهل محلات ، وعالم تكول باليل طلع صوت رصاص ورمي بعد الله واعلم .

دنجت راسها تكمل تمشيط ، حجت ، هو الاعلام مسيس ، و كله جذب مانعرف هسه صدك وين ..

-كعدت بصفها ابلع بريكي حجيت اصبغ اضافرج ..

-ابتسمت ذبت المشاطه من ايدها حجت غردي شتردين ..

-ضحكت بريبه سلامتج شريد قابل ، درت وجهي شفت علبه مربعه خاليها على الميز المرايه ..

-حجت كولي حبيبتي شتردين لان مو من عوايدج تجين تعرضين خدماتج بدون طلب ، 

-قاطتها شنو هاي العلبه ، على ميز ..

- ردت الي لونها اسود مو ..

-اي عدسات مو ؟؟! مرسوم عليها عيون ..

-حجت اي صار كم يوم جابوها الي بس مالبستها ماعرف واخاف ابط عيوني ..

-اني البسهم الج ..

لايمعوده جايزه من روحي ..

-نجرب ..

-هاا ..

-اي والله تعاي ، جريت العلبه فتحتها ، فتحت علبه عدسات وطلعتم من سائل مالتها ، شلتهم بالملقط المخصص الها ..

حجيت افتحي عيونج باعي فوك شفت باليويتوب شلون يعلمون البنات يلبسنها  .

-حجت وين اباوع  .

-ارفعي بؤبؤ فوك يعني ، واني اخليهم قريب من رمش السفلي، مجرد ماترمشين هيه تثبت على بؤبؤ ترس …

-لا تروحين عيوني خيه ، نوب بدل مايصيحولي العميه يصيحولي العوره ..

-ضحكت دفتحي عيونج يله وخلي عندج ثقه بيه ..

-مو هيه هنا المشكله ذره ثقه ماعندي بيج ..

-خلفه عليج وهاي اني جاي اعرض مساعدتي الج ..

فتحت عيونها وحاولت اخليها الها ، اول عين ثبتت ، وره خمس محاولات بس الثانيه عصت ، يعني عصت بشكل تطفر العدسه .

جانت عدسه شفافه حتى من توكع بالارض ماتبين اضل ادور عليها ..

وارجع اغسل واعقم و اخليها وهم تطفر لحد مابزعت هيه وكالت خلص نزعيلي الاولى انعل ابوهن لابو  ..

-نصيح ديما ..

-بلا ديما بلا بطيخ مااريد متت راحت عيوني ولج ..

غسلتهم وعقمتهم ورجعتن لمكانهن ضلت تفكر بعيونها صارن حمر ، كعدت جريت علبه صبغ الاضافر ..

-حجيت يالون اصبغ الج ..

-حجت ماروني ..

-ليش مو اخضر..

-عفست وجها ساكته ..

-جريت لون الوردي ، كتلها احمر احمر بكيفج ، كعدت اصبغ الها وردي فاتح وهيه ساكته ..

-حجيت ميرال ..

-حجت كوليها للبحصه تالا من الاخر ..

-شفت اليوم ولد معوق اعتقد اخو غدير سامعه بي مو ..

-.ردت مستغربه معووق ؟!

-اي مدد بالفراش حتى شكله نحيل حيل وباين عليه المرض 

-جرت نفس :- سامعه عدهم واحد مريض طفل كالو صغير ..

-حجيت اي بس هذا جبير بكدي يعني .

-هو انتي من كبرج ، 

-هاا رفعت راسي.. ميرااال ..

-ضحكت وشفتي بعد ..

-نايم على ظهره تخيلي حتى غدير شالته عدلته يعني حركته شبه مشلوله ..

-خطيه مسكين  .

-اي والله ، مسكين ابو حمد عنده ولد مثل الورد مشلول و بنته سافله صاحيه مابيها وجع ماكو اي عدل بالحياه ..

-هزت راسها ربج ماخلق شي اذا مابي حكمه ، لاتحجين هيج  

-كملت تصبيغ الها وكمت ، تردين شي ..

- حجت تسال :- يالون ؟؟

-شنو..

رفعت حواجبها ، صبغ الاضافر ..

-ابتسمت احمر ..

-انجبي اعرفج جذابه ، كولي دالبس شي يوالمه بلا حقاره ..

-ضحكت وردي ..

-اطلعي بره نذله ..

-ههههه ..  

مشيت اطلع اخر شي انداريت على تلفزيون واكف ابو دفاع المدني ، يكول تماس كهربائي سبب الحريق ، رد الصحفي يجادله :-  وناس الي كالو لكوهم مقتلوين جوه شنو ..

رد ماكو ناس و لم يتم العثور على اي جثه ، و هذا حرب اعلاميه على الدفاع المدني ، وعلى قواتنه الي تسعى الى نشر الامن والامان .. 

رد صحفي ، اهل محلات نقلولنه هالشي …

-اخي هذا كله ادعائات ، تصدك بينه وبالحكومه لو بالناس الي بالشارع …

ضحك الصحفي وهز راسه اندار على الكامره وكال جملته ، ياله سهوله غسل دمائهم و ياصعوبه نسيان ذكراهم .. كان معكم **** من قناه ال****

طلعت بره الغرفه اضحك على ميرال ، اجه كبالي ساري فاتح كتاب يقره و يمه البغله هم تسوي نفسها تقره ، وكل شوي رافعه راسها وتحجي وياه تريد تبجي تالي لم كتبه هو و طلع وعافها وراه مجاهلها  ..

دنجت هيه مقهوره ، لزكتي خماا لزكتي كبر ، مشيت طلعت جهازي اراسله ، 

فرصتي وياه بالكلام بس باليل وبالنهار قليله اخاف لا انكشف ، اجه دانيال جايب مسواك وكفت بصف نانه وهيه تصفي بالغراض ..

جر تفاحه هو وكف ياكل بيها غمزلي شلونج يالتفاحه..

ابتسمت ..

-خفت عليج ذاك اليوم  .

-عوجت حلكي ممصدكته ..

-لااا صدك احجي خفت عليج ماجذب ..

-ماحجيت ..

-تقدم عليه بيش ساعه طلعين من المدرسه ..

-مثل اي مدرسه ب١٢ ونص ..

-ماتصير ب١١ ونص ..

-شلون هاي ..

-اخذج نفتر شوي ..

- زوشنو المناسبه ..

-ماكو مناسبه ماتحبين تطلعين شوي ماختنكتي من البيت والمدرسه ماكو اي متعه غيرهم ..

-مختنكه اي حيل ..

-زين اخذج ناكل موطا و بعدها اذا تحبين للسينما …

-اسال ميرال بالاول ..

-لا لااا انتي مو صغيره ليش تاخذين رايهم الج رايج الخاص خليج مستقله اختج تاخذ رايج من تسوي شي لا اكيد شنو فرقج عنها ..

-يضل بالها ماحب اخوفها عليه ..

-ليش لعد اني اكلج اطلعي من المدرسه ساعه ب١١ حتى عدنا ساعه نفتر ونغير جو ونرجع محد يحس ..

سكتت ، درت وجهي على نانه الي تشتغل وكل شوي تطرف عيونها علينه تراقب بينه بخوف ..

-حجيت وليش تريد تطلع وياي وتخسر نفسك ..

درت وجهي عليه مجتفه اديه ..

-اكو واحد يطلعله يطلع ويه هال جمال ويكول لاا اصلا هذا شرف الي .. ابتسم اخذ قضمه كبيره من تفاحه ويلوك بيها ومبتسم الي ..

بلعت ريك ، مشيت اساعد نانه بهدوء افكر خليج مستقله ، كل شوي ارفع عيوني عليه الكاه يباوعلي ..

شوي وراح ، دنجت اغسل بالفواكه مبتسمه على محاولاته وياي ، اسمع نانه جرت نفس بقوه ، رفعت نظري عليها بهدوء ..

تباوعلي بطرف عينها بس ماحجت ، غلست اني شمسويه قابل ...

لاحظت عليه هو لو يمنه بالمطبخ يكعد لو يفتر بالحديقه طول اليوم ، قبل جان وجوده يمنه نادر ، هسه لازك بجتف ستار طول اليوم ..

بعدها فتره طلعت من المدرسه توه حليت شفته كبالي بسيارته  ، ابتسمت من فتح باب السياره ونزل يدور بعيونه عليه ..

درت ظهري بسرعه حتى مايشوفني صحت صديقتي اكللها هذا دانيال الحجيت الج عنه ..

تقربت مني والتفتت بحذر تضحك ، ياا لعد ياهو ساري ..

-من يصدف فد يوم اشوفه الج ، بس شوفي بعده يدور براسه ..

-اي ولج دخل بنص الطالبات نوب بس باعي سيارته ، شنو يشتغل وعنده هيج سياره ..

-ضحكت مادري ، بس اعرف هو خريج انكليزي  ، حجت ولج تقدم يدور عليج والله ، يااا عيونه ملونه شنو..

-اي خضر ..

-شكله مسيحي سبحان الله مبين …

- راح لو لا ..

-لا بعده واكف يفر براسه ..

-درت وجهي اشوفه لمحني ، ضحك اني هم ضحكت تقرب عليه ، هزيت راسي اله ..  لااا ..

وكف بعيد عني ، خله اديه بجيوبه مبتسم اشر بشفايفه ليش ؟؟ ..

- اشرت اله ابو حمد ذاك ..

-هز راسه تمام ..

-رجع للسياره و كعد بيها اشرلي تعاي انتي ..

-هزيت راسي لاا ، روح ..

-عقد حواجبه ضايج ، درت ظهري وتوجهت لابو حمد صعدت يمه وسكتت ..

صعدن بناته و مشه بينه السياره ، سياره دانيال ورانه تمشي ، وصلنه للبيت نزلت قبلهن وتوجهت كبل للملحق ، 

بنفس اليوم جنت متوجهه للحديقه ، وكف وعرض دربي ضايج ليش ماصعدتي من كتلج ..

-ماكدر محد يقبل اسوي هيج واصعد وياك ..

-منو ميقبل ..

-اهلي منو يعني ..

-ضحك اهلج  منو ، قصدج ميرال ، ميرال عايشه حياتها وانتي عايفتج يم الخدم ..

-عقدت حواجبي ضايجه ، اولا نانه وساري و اسامه و ميرال اهلي ، و ثانيه ميرال ماعافتني يم الخدم ، هذول ربوني و عاشو ويانه واكلوو ويانه و حجايتك عيب ماقبلها ..

-اوو لا زعلين ، دشاقه وياج ، بس صدك احجي شعليهم بيج ، قابل انتي صغيره و يفرضون رايهم عليج ، ميرال مزوجه وعايشه ويه رجلها ، اما البقيه فهم مو اهلج ربوج اي بس مالهم حق يفرضون عليج شي ..

سكتت ضايجه ..

-حجه حبيت اطلعج واونسج بس حسيت بيج مضايقه بس اذا انتي ماحبه ، فهذا شي ثاني ..

-جريت نفس لا اني هم مخنوكه من توفو اهلي لحد هسه ماطالعه ومغيره جو تصدك جنه كل عطله ربيعيه نطلع نسافر لتركيا ، صار شكد ماطالعه ولا شايفه الدنيا ..

-شفتي شلون حسيت بيج ورب ، اجيج باجر يعني للمدرسه ..

-سكتت خايفه بيش ساعه ..

-ب١١ ..

-شلون المدرسه ماراح يقبلون اطلع قبل موعد حله ..

-ضحك اطفري من السياج ماتعرفين شنو ..

-شهكت انهززم قصدك ..

-لا مايسموها انهزم يسموها مغامره ، الواحد يعيش مره وحده ، تستاهل هالمره الطيش ،  غامري و عيشي حياتج بلا قيود ..

-بلعت ريك ، اخاف ..

-البسي بنطرون جوه الصدريه و البسي حذاء رياضي ؛ واني عود اتلكاج من جه ثانيه من السياج ..

-منين اطفر ..

- هسه اروح اخذلي فره على المدرسه واشوفلج حايط ناصي واردلج خبر وهناك اتلكاج شكلتي …

-ضحكت واذا انلكفت ..

-اهجم المدرسه اذا حجو و طلعو سرنه الصغير تقرب عليه لزم حنجي بهدوء  ..

-ابتسمت اوك ..

-ضحك تمام يحلوه اشوفج باجر  …

عافني و مشه ، اندار اخر مره وحجه اهم شي البنطرون مو تنسي ماريد تطلع عليه شغلات محرمه دوليا .

ضحكت بخجل ...

ضليت على وكفتي حسيت عل صيحه وراي التفتت لان ساري اجه يمشي باتجاهي بسرعه معصب وصل ليمي جرني ..

-شلون تخلين هالنكس يلزمج ..

-دفعته مستنكره ، شبيك هي وخر ..

-جرني حيل خرررا عليج شلون تخلي يلزمج هسكير انعل يومج والله شنو انتي خفيفه فرد نوب ..

-دووخر دفعته وحد منك ابو الاسطبلات ..

ضربنه بكفخه عطت بي :- دوووخر شنو انته وتحاسبني منو انته اصلا لااخوي ولا ابوي شعليك مني حاسب روحك بالاول ..

اجت نانه تركض اصيح ها هاا هم رجعنه شنو القصه ..

-حاجي ابنج يكفخ بيه و يضرب ..

-حجه هو وياها ينتر :-  يما واكفه يم دانيال هالنكس و تخلي يلزمها من حنجها وتتمضحك ترضيها فرد نوب استخفت هاي ، ماعدها ذره خجل ..

-حجت امه فاكه حلها هاا صدك تالا يماا ..

-وهو شعلي يدخل هااا اخوي لو ابن عمي و ينزل عليه ضرب اكسر ايدك والله حير بنفسك مسوي نفسك عليه شيخ ، روح حاسب روحك بالاول ..

-اني ولد انتي بنت عيب هاي تتسجل عليج ..

-مالك دخل ، نانه نترت بينه بعصبيه  :- هييي مو اني وواكفه ، وانتي تالا ماما شهل تصرف هذا مو عيب وحرام هم ، واحد طول اليوم بطل بيده شلون توكفين وتسولفين وياه لا نوب تخلي يمد ايده عليج حتى حرام ..

سكتت ابالع بريكي ..

-حجت هاا اني شفته قبل كم يوم يحجي وياج وردت انبهج بس كلت هيه فطنه اكيد ماتغلط ، وسباعيه مو صح انتي عاقله خما تخلين هيج واحد يضحك عليج ..

عوجت حلكي بزعل :- مايضحك عليه قابل صغيره اني ..

ابتسمت بوجهي :- عفيه بالسباعيه بنيتي عفيه بتربيتي اني هم كلت هيج ..

- سكتت ، خرستني  ..

-تقربت حظنتنتي اندارت على ساري ولي انته ابو حلك اكسر ايدك نوب اذا ضربتها ، صاح معصب يماا نترت وجعه ولك ولي يله مناا تضرب بنياتي عاطت بي ..

عافنه ومشه يغلط كلبه الادب سزز ، اندارت علي همست شكلج هالسكير ..

-ضحكت ماكال شي ..

-احجي لاتخافين قابل حموتج اني مثل امج ..

-همست اعز من امي ..

-فدوه لحلكج يله كولي شكالت وجان يحجي وياج ..

-رديت كلي نطلع اني وياج للسينما ..

صفنت بوجهي حجت :- هاا وااااي بعد؟؟! ..

-وكلي ناكل موطا ..

-هزت راسها رافعه حواجبها ، خخووش وبعد ؟؟!

هاهيه ، هاا صدك  ، ضحكت كلي البسي بنطرون حتى من تعبيرن الحايط … فكت عيونها مخترعه هااا هيج كلج..

ابتسمت بغباء :- اي ..

صفنت بوجهي خلت اصابعها على وجها حجت :- وانتي وافقتي ..

-هزيت راسي انكر :- لااااا ابد كتله مستحييييل اهلي ميرضون واصلا ماعوف مدرستي مستقبلي اهم ..

رفعت حاجبها هااا هيج حجيتي ..
-
-وداعتج نانه ..

هزت راسها وجرتني وياها للمطبخ حجت وياي وياي بعد ممنوع تعوفيني مناا لهنا بنيتي اخاف عليج ..

ضحكت خووش ، وصدك جلبت بيه ، عينها وراي وراي ، خاب اسامه مثل ضلي ..

اذا اكعد بالحديقه يفرش العابه ويكابلني ، اذا شافني كمت يلم ملاعيبه و يركض وراي هو وكرشه لو يكلي شيليهم وياي واني امشي مابيه تعبت ..

عبالك ضلي لو جاسوس خالته عليه ، اشوفها من يروح يمها تلزمه تساله هو ايرد عليها تشيل وتنطي جكليته لو مصاصه ويرد يرجع يمي يكمل مهمته ...

اذا  غبت شوي دخلت الحمام ، الكاها تجيني تركض تكلي هاا ويامن حجيتي ، اجنتي تسوين وتتلفت وراي وتمد راسها بفضول تشوف ، .

-جنت بالحمام نانه صدك عود .

-ضحكت بفهاوه ،  ياا مو فقدتج شبيج جرتني دتعاي نسويلنه كليجه شي ..

ميرال ….

طلعت بره الغرفه اجتني نانه تكلي على سالفه دانيال ..

رديت شبي ..

جرتني على صفحه وحجت ديحوم على اختج صار فتره ؛ لا تكليلي مثل اخوها ماكو هيج حجي داشوف بعيوني ابد مو راحه ..

لا هو بكدها لا هو من طينتنه ولا من اهلنه ولا من دينه ، حاجي المهندس يبعده عن تالا ، اني تالا خليتها كبال عيوني بس بالمدرسه شلون حتى ديحرضها تنهزم من المدرسه و يكللها اني اتلكاج .

رفعت حواجبي هاي شوكت ..

- ذاك اليوم …

-هزيت راسي سهله انشالله يجي بيبر و احاجي ، لو اخلي ينقلكم لغير مكان يكون افضل ..

اي فدوه لعينج اني حتى اختنكت هناا محصوره بهل غرفه ، اني والولد بس استحي احجي واخاف تضايقين .

-لا نانه بالي والله ، وداشوف شلون محصورين ، فوك العشرين نفر ساكنين سوه اكيد نتضايق ، بسكلت مو وقتها ، 

راحت هيه بعد ماطمنتها ؛ سمعت صوت سيارات صفت ، درت وجهي على مصدر الصوت ، لاح ضوه اصفر بعيوني كانو شمس دنجت احمي عيوني ..

سمعت صوت ستار و دانيال ، عقدت حواجبي ..

ماكو صوت بيبير ، رجعت للفله ورحت لغرفتي ادك عليه ..

دكيت مارد ، ضل بالي عليه صار فتره هادى حتى كلامه وغزله قليل احسه متوتر ..

طلعت حجيت ويه ستار رد يكمل شغل و يجي ماعندي اي اخبار عليه ..

- دك عليه وكله ميرال ضل بالي ليش مترد عليها ..

-اعذريني ست مو شغلي هو يكمل ويدك عليج عافني و مشه الحقير ..

برغم هو وبشار توم بس هذا ينكط حقاره …

حجيت نانه دزيلي على دانيال بالحديقه كليلي ميرال تريدك..

حجت خوش ، صحت اسامه تعال طلعني بره على كراسي ، جرني ومشه ، ايده مدبكه حجيت دتاكل؟؟

مصاص ،.

-ابتسمت بالعافيه ، حجه عندي علج تردين ..

مديت ايدي انطيني بالله  .. حجه هذا كرسي وراج اكعدي ، التفتت لزمته لاح عليه لونه بيج ، مديت ايدي على ميز كزاز ، دنجت لارض خضره ، ركزت بيها مبين العشب اخضر ..

ابتسمت كعدت ، هو وكف ينطيني ..

طوله يطلع اكثر من متر و عندك كرش ، بس وجه مواضح مديت ايدي ضحكت اسامه ..

-حجه اوكفي اني انطيج لا تاخذينه كله ..

-ههه تعال تقرب داشوفك ..

تقرب ومدنج ، هامل الي كلته له ، مستمر مدنج يطلع بالعلج ابو سهم عصه عليه ، شعره خفيف تلمسته ، هم ماوضح ، نطاني العلج لزمته قربته من عيوني ..

لون فضي والخط يلمع ، ابتسمت مدمعه يارحمتك ياارب ، رحمتك ربي …

عافني و مشه ، شوي واجه دانيال ، يشحط برجله شحط عوجت حلكي مبين سكران تقرب حجه مساء الخير ست ..

-جر كرسي وكعد كبالي ريحته فاايحه قرف ..

-حجيت شارب ..

-رد اي ست اعذريني خما يضايقج ..

-شي راجع الك دانيال بس البيت بي اطفال ونسوان وبنات صغار مو حلو منظرك وانته تمشي و تطوطح ..

-سكت ..

-ابتسمت لخاطرك احجي ، هم كثره شرب تاذيك ، 

-ضحك شكرا لاهتمامج ..

-واني هم اشكرج لاهتمامك بتالا ..

-تلعثم .. حجه شنو شبيها تالا ..

-حجتلي عنك وعن عروضك الها و تحثها انو تترك المدرسه  ...  ابتسمت انتظر رده فعله .. داصيده زين ..

-حجه لاا ست مو هيج ..

-قصدك تالا جذابه ؟؟! رفعت حواجبي ..

-لا مو هيج بس شفتها ضايجه وعرضت عليها اخذها لمكان تغير جو مثل اخوها اني ، 

-هزيت راسي اعرف اشكرك ، ماريد اتعبك ويانه يكفي بيبر متعبك باوخر اليل ، سكت ..

-كمت لحيلي ادخل جوه ، حجه اساعدج ..

-رديت اندل طريقي ، بس انته باين ماتندل طريقك ، خلي طريقه بعيد عن تالا ، ماشي ؟؟!

سكت مارد ، حجيت بهدوء ، ترى تالا تصير قريبه بيبر ، بيبر نفسه الي انته تشتغل عنده تخيل اذا سمع جاي تعرض عليها عروض ادمر مستقبلها ..

دنج راسه ساكت .. اني هم عفته و كملت دربي للفله ، 

رجع بيبر على العشه ، هو وعواد ، اكلو وكملو و طلعو للحديقه كعدو يشربون نركيله ويحجون ، كعدتهم مثل العاده ..

خالين نراكيل بالنص و مير المشروب ناس تشرب وناس تتفرج بس ، وناس صافنه ..

لليل دخل هو ، اشوفه يفتر ويفتح بالبوب مال كنتور ، حجه ماتنامين ..

رديت ما نعسانه .. رد هممم خوش ، اسمع يكلب باوراق ماعرف شنو …

كعدت على جربايه ساكته ، هو كح ، حجه ساعه ب١١ ترى ..

ابتسمت ، صار فتره ينومني من وكت وذا اعاند ينومي كوه ، تقدم عليه باسني دفعته بهدوء ، حجه شبيج ماتريدن ..

جريت نفس ساكته ..

-تمنعيني ميرال ..

-وين طالع .. 

رد بستغراب :-شنوو؟؟!

-هسه وين تريد تروح ؟! و جاي تريدني انام من وكت ..

-اريد راحتج وعندي كم شغله بسيطه افضها وارجع قابل اخليج سهرانه تنتظريني ..

رخت ملامحي بخيبه :- عوف الشغل بيبر ، باجر الصبح روح خلصه .. 

-كتلج شغل بسيط ، 

-شغل بهل اليل بيبر تضحك على منو عليه اني الي حافظه حتى نفسك الي تجره ..

سكت كام لحيله وابتعد عني ، كمت اني هم لزمت جتفه ، جمد بلا حركه رد بهدوء شغل ورقي  ..

-شغل ورقي يصير الصبح بيبر مو ب١٢ باليل …

اندار عليه نفسه غريب ، لزمت صدره يصعد وينزل بريبه كانو ضايع .. بيببر مايطلع بالظلام غير بس الغلطان الي عنده شي ضامه . الحقاني و الي مايخاف من شي يطلع بالضوء و بالنهار …

-ليش ماتكولين ذيب و طلعاتك ليل …

-اليل ساتر للعيوب ،  حجيت مدمعه اريد يلين لو شوي …

تنفس بهدوء دنج راسه على كيف يعدل بطرف قميصه ، رد ماتاخر شغله بسيطه احلها وارجع و عد …

-عوفها لخاطري ..

-شغل لاتخافين ..

'شغل شغل كله شغل شكد تريد تلم فلوس بيبر شكد ، ترى كفن مابي جيوب حتى تاخذهم وياك ، الكفن مابي جيووب والله ، اتركهم وحافظ على نفسك و عليه ، داحجي و طلع بسرعه كمت وراه صحت بيبر جلبت بي..

دفعني على كيف و باسني يسكتني دفعته بيبر والله ترى خله اصبعه على حلكي اااششش  ..

اششش لاتتبعين وياي هيج اسلوب .. دفعني وطلع جلبت بي بس ماكدرت عليه ، طلع و عافني …

وكفت باب الغرفه مدمعه ، اصواتهم بره هو وعواد ، ضليت لازمه الباب و فاتحتها غصب عني دموعي نزلت ..

توجهت لغرفه ديما ، توه ادكها اسمع صوت ضحك ، غمضت عيوني خليت راسي على الباب استند ، جريت نفس مختنكه ..

دكيت الباب بهدوء ..

بسرعه انفتحت حجيت ادخل ..

تعاي ولج بيبرس طلع مو ..

-اي ويه رجلج ..

-تعاي امير هم نام وضليت لوحدي ..

-جاي اسوين …

-بينه ..

-كولي …

-جرتني كعدنه حجت ويه ابو كوزمتك ..

-رفعت حواجبي بعدج عليه صدك ماعفتي ..

-نتونس ، ديشوفني رحلاته لاربيل ويه جماعته مقاطع تخرب ضحك ، فرايحي مو نكدي ابد وكلامه كله شقه و نكت ..

-سكتت عاقده حواجبي ..

-شبيج انتي كالبه وجهج مغندبه ..

-راسي ياذيني ..

-راسج لو بيبرس …

-سكتت مدمعه درت وجهي احاول مابجي ، حجت عوفي يسوي الي يريده ليش اضلين تركضين وراه جاهل هو قابل لاتخنكي ..

-خايفه ميته خووف ، هو مايحجي من نوع مايحجي او يشكيلي ..

-مو احسن ماينكد عليج ، يخاف عليج حتى من زعل ، حتى لا تشيلين هم ..

-كال شغل ورقي ، خايفه لا هم يتعاركون  ..

- اعتقد راح يكعدون ويفضوها لان الحجي دز عليهم وابو ثروت هم موجود…

-الحجي منو ..

-ابو عزت سمعت هو راعي الخبزه ..

-ابتسمت شهل مصطلحات .

-ضحكت دتعاي اسولفلج على هذا ابو كوزمتك يمعوده شعدنه ، جانت تراسله بصمات هو هم يدزلها بصمات ..

ماجذب واكول جنت رافضه ، بس هم جنت ماراضيه عليها سكتت ، اخذت زاويه متفرج ماحبيت اصير راهبه وناصحه وصالحه براسها واني ماعايشه حياتها ..

اني عندي الي يددلني ويخاف عليه ويراعيني ، بس هيه هذني كلهن متعرفهن ، وحبت ادورهن بمكان بعيد عن عواد لان فقدت الامل بعواد انو ينصلح ..

صح مو مبرر بس عواد السبب ، ولكل فعل رده فعل …

ساعتين واكثر مر و بيبر ماله رجعه ، تعبت ونعست ، وهيه مستمره ويه صاحبها تسولف جانت تضحك من كلبها ..

نوب طكت لروحها  صوره ودزتها اله ، بلش كلامهم يطور و الشقه ثكل ، كتلها اني اروح نعست ..

،اوديج ..

-لا ولج اروح لوحدي ، كمت على حيلي اروح ، حجيت ديما ترى صوت ضحكتج واصل للصاله ديربالج …

عفتها وطلعت ،رجعت لغرفتي انام ، تمددت وخليت راسي على مخده ، ريحه بيبر على وجه مخده ..

حظنتها ودفنت راسي بيها اهود كلبي الي يدك عليه ، غفيت على ريحته ، مشكلتي تعلقت بي ..

صار الي مثل شمعه بظلمه ، كانو نسمه هوى ،

حنيته حبه دلاله كله غزر بيه ، خفت لا افقده وصعب الكه العوض والبديل  ، ويمكن هو هذا الي خلاني اتحمله فتره طويله و ادوس على نفسي بعدين ..

خفت لا افقد الي قدمه الي من احترام وتقدير وحب ، دست على كلشي في سبيل مااتركه واخسره ..

ماضنيت راح ادفع ثمن تجاهلي للواقع بعدين ، الحياه مثل الدولاب مثل ما تقدم و تتصرف تتلكه افعالك بعد فتره ضدك ..

تفعل زين تتلكاه زين ..

تفعل شين تتلكاه شين ..

ثاني يوم كعدت حسيت بيد على بطني ..

انداريت لان بيبر ، درت عليه و حظنته و نمت ، دفنت راسي بصدره احبه اي نعم ، احسه عايش بدمي ويه نبضي .. 

جرني عليه  حيل ، ماعرف بيش ساعه بس حسيت عليه يحوص ، ابتسمت ..

-باسني مشتاقلج ….

-مديت ايدي على حنجه اتلمسه ..

-ماقبلتي البارحه ..

-نفسيا جنت تعبانه كلبي عليك .

-ماكو شي سالفه فضت انشالله ..

-ثروت وابوو؟؟!

-انحلت الشراكه فضيناها ، وكلمن اخذ حصته ومنطقته ، انقسمت ، محد يوصل للثاني و الي يتعده يدفع تعويض للطرف الثاني .. 

-جريت نفس يعني هسه امان ..

-ماكو امان بالعراق ميرال لاتصدكين اكو امان …

-قابل نظل هنا اغلبنه محصور بغرفه وحده ، 

-راح ارجعهم كلهم هناك بالفله جبيره هالكم يوم ، واحنه وعواد و عايلته نظل هنا .. 

-سكتت ..

-حجه تريد اختج تضل هنا لو تروح ويه ام ساري ..

-الافضل اتضل ويه نانه ، نانه دير بالها عليها اكثر مني وتعرف تتصرف وياها ، حجيت وخالتك ..

-بكيفها بس الاحسن تروح هناك تشرف على بيت و الاسطبل ..

من يومها بلشو يرجعون كلهم ، بس اتفق بيبر ويه خالته ادز وسن ورجلها كل يوم صبح علمود ترتيب البيت ويكملون شغل ويرجعون الظهر ، 

بين الفله جبيره وبين هاي بس نهر دجله و يرحون ويجون نوبات بالقارب ونوبات بالسياره ..

نقلو كلهم ضلينه بس احنه و الحرس الي جابهم بيبر يحرسون الفله من بره ..

فد يوم كاعده بره اني وديما ، بعد ماراحت وسن وصلها ستار ، ديما تقربت تسمعني بصمات هالولد الي شاغل بالها ..

ابتسمت بخوف عود ليش تخلي يستخدم الفشار وياج مو عيب ..

رد حلات هيج سوالف بالفشار بيها لذه ..

عفست وجهي قشعر بدني ، درت وجهي بيبر ابد ميفشر والله السانه يخبل ..

ضحكت ضحكه تخرع ، رجلج يستشرررف وخوفج من هالنوع ..

-انداريت عليها رجلي مؤدب ، وعنده كاريزما ..

-ضحكت مستهزئه ، رجلج خنوسي يماماا ...

فتحت بصمه و طلع صوت صاحبها يكللها دزيلي فديو وانتي تخلين لوشن لافخاذج ..

حجيت . هلاااا هلااااا يدور افخاذ ..

بعدنه دنضحك .. سمعت صوت فحيط اطار سياره دخلت للكراج حيل التفتنه اثنينه حجيت ياست... بعدني ممكمله ، ويجينه صوت عواد  فززنه اثنينه خلانه نوكف لحيلنه نترادم وجه بوجه ..

صاح ديما لج كح**

همست وحلكي رجف رحنه بيها ياديما ...

#يتبع ....

صفحه الفيس ( كتابات اسماء ديمير )

الانستا ..asmaa_demer